(8) 3. யமகவக்³கோ³

1-10. ஸத்³தா⁴ஸுத்தாதி³வண்ணனா

71-80. அட்ட²மஸ்ஸ பட²மாதீ³னி உத்தானத்தா²னேவ. த³ஸமே குச்சி²தம் ஸீத³தீதி குஸீதோ த³-காரஸ்ஸ த-காரம் கத்வா. யஸ்ஸ த⁴ம்மஸ்ஸ வஸேன புக்³க³லோ ‘‘குஸீதோ’’தி வுச்சதி, ஸோ குஸிதபா⁴வோ இத⁴ குஸித-ஸத்³தே³ன வுத்தோ. வினாபி ஹி பா⁴வஜோதனஸத்³த³ம் பா⁴வத்தோ² விஞ்ஞாயதி யதா² ‘‘படஸ்ஸ ஸுக்க’’ந்தி, தஸ்மா குஸீதபா⁴வவத்தூ²னீதி அத்தோ². தேனாஹ ‘‘கோஸஜ்ஜகாரணானீதி அத்தோ²’’தி. கம்மம் நாம ஸமணஸாருப்பம் ஈதி³ஸந்தி ஆஹ ‘‘சீவரவிசாரணாதீ³’’தி. வீரியந்தி பதா⁴னவீரியம். தம் பன சங்கமனவஸேன கரணே காயிகந்திபி வத்தப்³ப³தம் லப⁴தீதி ஆஹ ‘‘து³வித⁴ம்பீ’’தி. பத்தியாதி பாபுணனத்த²ம். ஓஸீத³னந்தி பா⁴வனானுயோகே³ ஸங்கோசோ. மாஸேஹி ஆசிதம் நிசிதம் வியாதி மாஸாசிதம், தம் மஞ்ஞே. யஸ்மா மாஸா திந்தா விஸேஸேன க³ருகா ஹோந்தி, தஸ்மா ‘‘யதா² திந்தமாஸோ’’திஆதி³ வுத்தம். வுட்டி²தோ ஹோதி கி³லானபா⁴வாதி அதி⁴ப்பாயோ.

தேஸந்தி ஆரம்ப⁴வத்தூ²னம். இமினாவ நயேனாதி இமினா குஸீதவத்தூ²ஸு வுத்தேனேவ நயேன ‘‘து³வித⁴ம்பி வீரியம் ஆரப⁴தீ’’திஆதி³னா. இத³ம் பட²மந்தி ‘‘இத³ம், ஹந்தா³ஹம், வீரியம் ஆரபா⁴மீ’’தி, ‘‘ஏவம் பா⁴வனாய அப்³பு⁴ஸ்ஸஹனம் பட²மம் ஆரம்ப⁴வத்தூ²’’திஆதி³னா ச அத்தோ² வேதி³தப்³போ³. யதா² ததா² பட²மம் பவத்தம் அப்³பு⁴ஸ்ஸஹனஞ்ஹி உபரி வீரியாரம்ப⁴ஸ்ஸ காரணம் ஹோதி. அனுரூபபச்சவேக்க²ணஸஹிதானி ஹி அப்³பு⁴ஸ்ஸஹனானி தம்மூலகானி வா பச்சவேக்க²ணானி அட்ட² ஆரம்ப⁴வத்தூ²னீதி வேதி³தப்³பா³னி.

ஸத்³தா⁴ஸுத்தாதி³வண்ணனா நிட்டி²தா.

யமகவக்³க³வண்ணனா நிட்டி²தா.

81-626. ஸேஸம் உத்தானமேவ.

இதி மனோரத²பூரணியா அங்கு³த்தரனிகாய-அட்ட²கதா²ய

அட்ட²கனிபாதவண்ணனாய அனுத்தானத்த²தீ³பனா ஸமத்தா.