5. தா³னூபபத்திஸுத்தவண்ணனா

35. பஞ்சமே தா³னபச்சயாதி தா³னகாரணா, தா³னமயபுஞ்ஞஸ்ஸ கதத்தா உபசிதத்தாதி அத்தோ². உபபத்தியோதி மனுஸ்ஸேஸு தே³வேஸு ச நிப்³ப³த்தியோ. ட²பேதீதி ஏகவாரமேவ அனுப்பஜ்ஜித்வா யதா² உபரி தேனேவாகாரேன பவத்ததி, ஏவம் ட²பேதி. ததே³வ சஸ்ஸ அதி⁴ட்டா²னந்தி ஆஹ ‘‘தஸ்ஸேவ வேவசன’’ந்தி. வட்³டே⁴தீதி ப்³ரூஹேதி ந ஹாபேதி. விமுத்தந்தி அதி⁴முத்தம், நின்னம் போணம் பப்³பா⁴ரந்தி அத்தோ². விமுத்தந்தி வா விஸ்ஸட்ட²ம். நிப்பரியாயதோ உத்தரி நாம பணீதம் மஜ்ஜே²பி ஹீனமஜ்ஜி²மவிபா⁴க³ஸ்ஸ லப்³ப⁴னதோதி வுத்தம் ‘‘உத்தரி அபா⁴விதந்தி ததோ உபரிமக்³க³ப²லத்தா²ய அபா⁴வித’’ந்தி. ஸம்வத்ததி ததா²பணிஹிதம் தா³னமயம் சித்தம். யம் பன பாளியம் ‘‘தஞ்ச கோ²’’திஆதி³ வுத்தம், தம் தத்ருபபத்தியா விப³ந்த⁴கரது³ஸ்ஸீல்யாபா⁴வத³ஸ்ஸனபரம் த³ட்ட²ப்³ப³ம், ந தா³னமயஸ்ஸ புஞ்ஞஸ்ஸ கேவலஸ்ஸ தம்ஸம்வத்தனதாத³ஸ்ஸனபரந்தி த³ட்ட²ப்³ப³ம். ஸமுச்சி²ன்னராக³ஸ்ஸாதி ஸமுச்சி²ன்னகாமராக³ஸ்ஸ. தஸ்ஸ ஹி ஸியா ப்³ரஹ்மலோகே உபபத்தி, ந ஸமுச்சி²ன்னப⁴வராக³ஸ்ஸ. வீதராக³க்³க³ஹணேன சேத்த² காமேஸு வீதராக³தா அதி⁴ப்பேதா, யாய ப்³ரஹ்மலோகூபபத்தி ஸியா. தேனாஹ ‘‘தா³னமத்தேனேவா’’திஆதி³. யதி³ ஏவம் தா³னம் தத்த² கிமத்தி²யந்தி ஆஹ ‘‘தா³னம் பனா’’திஆதி³. தா³னேன முது³சித்தோதி ப³த்³தா⁴கா⁴தே வேரிபுக்³க³லேபி அத்தனோ தா³னஸம்படிச்ச²னேன முது³பூ⁴தசித்தோ.

தா³னூபபத்திஸுத்தவண்ணனா நிட்டி²தா.