3. க³ஹபதிவக்³கோ³

1-7. பட²மஉக்³க³ஸுத்தாதி³வண்ணனா

21-27. ததியஸ்ஸ பட²மது³தியேஸு நத்தி² வத்தப்³ப³ம். ததியே ‘‘ஹத்த²கோ³’’தி வத்தப்³பே³ ‘‘ஹத்த²கோ’’தி வுத்தம். ஸோ ஹி ராஜபுரிஸானம் ஹத்த²தோ யக்க²ஸ்ஸ ஹத்த²ம், யக்க²ஸ்ஸ ஹத்த²தோ ப⁴க³வதோ ஹத்த²ம், ப⁴க³வதோ ஹத்த²தோ புன ராஜபுரிஸானம் ஹத்த²ம் க³தத்தா நாமதோ ஹத்த²கோ ஆளவகோதி ஜாதோ. தேனாஹ ‘‘ஆளவகயக்க²ஸ்ஸ ஹத்த²தோ ஹத்தே²ஹி ஸம்படிச்சி²தத்தா ஹத்த²கோதி லத்³த⁴னாமோ ராஜகுமாரோ’’தி. சதுத்தா²தீ³னி உத்தானத்தா²னேவ.

பட²மஉக்³க³ஸுத்தாதி³வண்ணனா நிட்டி²தா.

8. து³தியப³லஸுத்தவண்ணனா

28. அட்ட²மே கீ²ணாஸவஸ்ஸ ஸப்³பே³ஸம் ஸங்கா²ரானம் அனிச்சதா அஸம்மோஹவஸேன கிச்சதோ மக்³க³பஞ்ஞாய ஸுப்படிவித்³தா⁴, விபஸ்ஸனாய ஆரம்மணகரணவஸேனபீதி த³ஸ்ஸேந்தோ ஆஹ ‘‘ஸஹவிபஸ்ஸனாய மக்³க³பஞ்ஞாயா’’தி. இமே காமாதி த்³வேபி காமே வத³தி. கிலேஸவஸேன உப்பஜ்ஜமானோ ஹி பரிளாஹோ வத்து²காமஸன்னிஸ்ஸயோ வத்து²காமவிஸயோ வாதி த்³வேபி ஸபரிளாஹட்டே²ன அங்கா³ரகாஸு வியாதி ‘‘அங்கா³ரகாஸூபமா’’தி வுத்தா. அந்தோ வுச்சதி லாமகட்டே²ன தண்ஹா, ப்³யந்தம் விக³தந்தம் பூ⁴தந்தி ப்³யந்திபூ⁴தந்தி ஆஹ ‘‘விக³தந்தபூ⁴த’’ந்தி, நித்தண்ஹந்தி அத்தோ².

து³தியப³லஸுத்தவண்ணனா நிட்டி²தா.

9. அக்க²ணஸுத்தவண்ணனா

29. நவமே யஸ்மா மஹித்³தி⁴கபேதா தே³வாஸுரானம் ஆவாஹம் க³ச்ச²ந்தி, விவாஹம் ந க³ச்ச²ந்தி, தஸ்மா பேத்திவிஸயேனேவ அஸுரகாயோ க³ஹிதோதி வேதி³தப்³போ³. பேதாஸுரா பன பேதா ஏவாதி தேஸம் பேதேஹி ஸங்க³ஹோ அவுத்தஸித்³தோ⁴வ.

அக்க²ணஸுத்தவண்ணனா நிட்டி²தா.

10. அனுருத்³த⁴மஹாவிதக்கஸுத்தவண்ணனா

30. த³ஸமே அப்பிச்ச²ஸ்ஸாதி ந இச்ச²ஸ்ஸ. அபா⁴வத்தோ² ஹேத்த² அப்பஸத்³தோ³ ‘‘அப்பட³ம்ஸமகஸவாதாதபா’’திஆதீ³ஸு (அ. நி. 10.11) விய. பச்சயேஸு அப்பிச்சோ² பச்சயப்பிச்சோ², சீவராதி³பச்சயேஸு இச்சா²ரஹிதோ. அதி⁴க³மப்பிச்சோ²தி ஜா²னாதி³அதி⁴க³மவிபா⁴வனே இச்சா²ரஹிதோ. பரியத்திஅப்பிச்சோ²தி பரியத்தியம் பா³ஹுஸச்சவிபா⁴வனே இச்சா²ரஹிதோ. து⁴தங்க³ப்பிச்சோ²தி து⁴தங்கே³ஸு அப்பிச்சோ² து⁴தங்க³பா⁴வவிபா⁴வனே இச்சா²ரஹிதோ. ஸந்தகு³ணனிகு³ஹனேனாதி அத்தனி ஸம்விஜ்ஜமானானம் ஜா²னாதி³கு³ணானஞ்சேவ பா³ஹுஸச்சகு³ணஸ்ஸ து⁴தங்க³கு³ணஸ்ஸ ச நிகு³ஹனேன சா²த³னேன. ஸம்பஜ்ஜதீதி நிப்ப²ஜ்ஜதி ஸிஜ்ஜ²தி. நோ மஹிச்ச²ஸ்ஸாதி மஹதியா இச்சா²ய ஸமன்னாக³தஸ்ஸ நோ ஸம்பஜ்ஜதி அனுத⁴ம்மஸ்ஸபி அனிப்ப²ஜ்ஜனதோ. பவிவித்தஸ்ஸாதி பகாரேஹி விவித்தஸ்ஸ. தேனாஹ ‘‘காயசித்தஉபதி⁴விவேகேஹி விவித்தஸ்ஸா’’தி. ஆரம்ப⁴வத்து²வஸேனாதி பா⁴வனாபி⁴யோக³வஸேன ஏகீபா⁴வோவ காயவிவேகோதி அதி⁴ப்பேதோ, ந க³ணஸங்க³ணிகாபா⁴வமத்தந்தி த³ஸ்ஸேதி. கம்மந்தி யோக³கம்மம்.

ஸத்தேஹி கிலேஸேஹி ச ஸங்க³ணனம் ஸமோதா⁴னம் ஸங்க³ணிகா, ஸா ஆரமிதப்³ப³ட்டே²ன ஆராமோ ஏதஸ்ஸாதி ஸங்க³ணிகாராமோ, தஸ்ஸ. தேனாஹ ‘‘க³ணஸங்க³ணிகாய சேவா’’திஆதி³. ஆரத்³த⁴வீரியஸ்ஸாதி பக்³க³ஹிதவீரியஸ்ஸ. தஞ்ச கோ² உபதி⁴விவேகே நின்னதாவஸேன ‘‘அயம் த⁴ம்மோ’’தி வசனதோ. ஏஸ நயோ இதரேஸுபி. விவட்டனிஸ்ஸிதம்யேவ ஹி ஸமாதா⁴னம் இதா⁴தி⁴ப்பேதம், ததா² பஞ்ஞாபி. கம்மஸ்ஸ-கதபஞ்ஞாய ஹி டி²தோ கம்மவஸேன ப⁴வேஸு நானப்பகாரோ அனத்தோ²தி ஜானந்தோ கம்மக்க²யகரம் ஞாணம் அபி⁴பத்தே²தி, தத³த்த²ஞ்ச உஸ்ஸாஹம் கரோதி. மானாத³யோ ஸத்தஸந்தானம் ஸம்ஸாரே பபஞ்சேந்தி வித்தா²ரேந்தீதி பபஞ்சாதி ஆஹ ‘‘தண்ஹாமானதி³ட்டி²பபஞ்சரஹிதத்தா’’திஆதி³. ஸேஸமேத்த² ஸுவிஞ்ஞேய்யமேவ.

அனுருத்³த⁴மஹாவிதக்கஸுத்தவண்ணனா நிட்டி²தா.

க³ஹபதிவக்³க³வண்ணனா நிட்டி²தா.