1. மேத்தாவக்³கோ³

1. மேத்தாஸுத்தவண்ணனா

1. அட்ட²கனிபாதஸ்ஸ பட²மே வட்³டி⁴தாயாதி பா⁴வனாபாரிபூரிவஸேன பரிப்³ரூஹிதாய. புனப்புனம் கதாயாதி பா⁴வனாய ப³ஹுலீகரணேன அபராபரம் பவத்திதாய. யுத்தயானஸதி³ஸகதாயாதி யதா² யுத்தஆஜஞ்ஞயானம் சே²கேன ஸாரதி²னா அதி⁴ட்டி²தம் யதா²ருசி பவத்ததி, ஏவம் யதா²ருசி பவத்தாரஹதம் க³மிதாய. பதிட்டா²னட்டே²னாதி ஸப்³ப³ஸம்பத்திஅதி⁴ட்டா²னட்டே²ன. பச்சுபட்டி²தாயாதி பா⁴வனாப³ஹுலீகாரேஹி பதி பதி உபட்டி²தாய அவிஜஹிதாய. ஸமந்ததோ சிதாயாதி ஸப்³ப³பா⁴கே³ன பா⁴வனானுரூபம் சயம் க³மிதாய. தேனாஹ ‘‘உபசிதாயா’’தி. ஸுட்டு² ஸமாரத்³தா⁴யாதி அதிவிய ஸம்மதே³வ நிப்³ப³த்திக³தாய.

யோ ச மேத்தம் பா⁴வயதீதிஆதீ³ஸு யோ கோசி க³ஹட்டோ² வா பப்³ப³ஜிதோ வா. மேத்தந்தி மேத்தாஜா²னம்.

அப்பமாணந்தி பா⁴வனாவஸேன ஆரம்மணவஸேன ச அப்பமாணம். அஸுப⁴பா⁴வனாத³யோ விய ஹி ஆரம்மணே ஏகதே³ஸக்³க³ஹணம் அகத்வா அனவஸேஸப²ரணவஸேன அனோதி⁴ஸோ ப²ரணவஸேன ச, அப்பமாணாரம்மணதாய பகு³ணபா⁴வனாவஸேன ச அப்பமாணம். தனூ ஸம்யோஜனா ஹோந்தீதி மேத்தம் பாத³கம் கத்வா ஸம்மஸித்வா ஹேட்டி²மே அரியமக்³கே³ அதி⁴க³ச்ச²ந்தஸ்ஸ ஸுகே²னேவ படிக⁴ஸம்யோஜனாத³யோ பஹீயமானா தனூ ஹோந்தீதி ஏவமேத்த² அத்தோ² த³ட்ட²ப்³போ³.

ஏவம் கிலேஸப்பஹானஞ்ச நிப்³பா³னாதி⁴க³மஞ்ச மேத்தாபா⁴வனாய ஸிகா²ப்பத்தமானிஸம்ஸம் த³ஸ்ஸேத்வா இதா³னி அஞ்ஞேபி ஆனிஸம்ஸே த³ஸ்ஸேதும் ‘‘ஏகம்பி சே’’திஆதி³ வுத்தம். தத்த² அது³ட்ட²சித்தோதி மேத்தாப³லேன ஸுட்டு² விக்க²ம்பி⁴தப்³யாபாத³தாய ப்³யாபாதே³ன அதூ³ஸிதசித்தோ. மேத்தாயதீதி ஹிதப²ரணவஸேன மேத்தம் கரோதி. குஸலீதி அதிஸயேன குஸலவா மஹாபுஞ்ஞோ, படிகா⁴தி³அனத்த²விக³மேன கே²மீ. ஸப்³பே³ ச பாணேதி ச-ஸத்³தோ³ ப்³யதிரேகோ. மனஸானுகம்பீதி சித்தேன அனுகம்பந்தோ. இத³ம் வுத்தம் ஹோதி – ஏகஸத்தவிஸயாபி தாவ மேத்தா மஹாகுஸலராஸி, ஸப்³பே³ பன பாணே அத்தனோ புத்தம் விய ஹிதப²ரணேன மனஸா அனுகம்பந்தோ பஹுகம் பஹும் அனப்பகம் அபரியந்தம் சதுஸட்டி²மஹாகப்பேபி அத்தனோ விபாகப்பப³ந்த⁴ம் பவத்தேதும் ஸமத்த²ம் உளாரம் புஞ்ஞம் அரியோ பரிஸுத்³த⁴சித்தோ புக்³க³லோவ கரோதி நிப்பா²தே³தீதி. ஸத்தப⁴ரிதந்தி ஸத்தேஹி அவிரளம், ஆகிண்ணமனுஸ்ஸந்தி அத்தோ².

ஸங்க³ஹவத்தூ²னீதி (ஸம். நி. டீ. 1.1.120) லோகஸ்ஸ ஸங்க³ண்ஹனகாரணானி. நிப்ப²ன்னஸஸ்ஸதோ நவ பா⁴கே³ கஸ்ஸகஸ்ஸ த³த்வா ரஞ்ஞம் ஏகபா⁴க³க்³க³ஹணம் த³ஸமபா⁴க³க்³க³ஹணம். ஏவம் கஸ்ஸகா ஹட்ட²துட்டா² ஸஸ்ஸானி ஸம்பாதே³ந்தீதி ஆஹ ‘‘ஸஸ்ஸஸம்பாத³னே மேதா⁴விதாதி அத்தோ²’’தி. ததோ ஓரபா⁴கே³ கிர ச²பா⁴க³க்³க³ஹணம் ஜாதம். ச²மாஸிகந்தி ச²ன்னம் ச²ன்னம் மாஸானம் பஹோனகம். பாஸேதீதி பாஸக³தே விய கரோதி. வாசாய பியம் வாசாபியம், தஸ்ஸ கம்மம் வாசாபேய்யம். ஸப்³ப³ஸோ ரட்ட²ஸ்ஸ இத்³தா⁴தி³பா⁴வதோ கே²மம். நிரப்³பு³த³ம் சோரியாபா⁴வதோ. இத்³த⁴ஞ்ஹி ரட்ட²ம் அசோரியம். ‘‘நிரக்³க³ள’’ந்தி வுச்சதி அபாருதக⁴ரபா⁴வதோ.

உத்³த⁴ம்மூலகம் கத்வாதி உம்மூலம் கத்வா. த்³வீஹி பரியஞ்ஞேஹீதி மஹாயஞ்ஞஸ்ஸ புப்³ப³பா⁴கே³ பச்சா² ச பவத்தேதப்³பே³ஹி த்³வீஹி பரிவாரயஞ்ஞேஹி. ஸத்த…பே… பீ⁴ஸனஸ்ஸாதி ஸத்தனவுதாதி⁴கானம் பஞ்சன்னம் பஸுஸதானம் மாரணேன பே⁴ரவஸ்ஸ பாபபீ⁴ருகானம் ப⁴யாவஹஸ்ஸ. ததா² ஹி வத³ந்தி –

‘‘ச²ஸதானி நியுஜ்ஜந்தி, பஸூனம் மஜ்ஜி²மே ஹனி;

அஸ்ஸமேத⁴ஸ்ஸ யஞ்ஞஸ்ஸ, ஊனானி பஸூஹி தீஹீ’’தி. (ஸம். நி. டீ. 1.1.120; அ. நி. டீ. 2.4.39);

ஸம்மந்தி யுக³ச்சி²த்³தே³ பக்கி²பிதப்³ப³த³ண்ட³கம். பாஸந்தீதி கி²பந்தி. ஸம்ஹாரிமேஹீதி ஸகடேஹி வஹிதப்³பே³ஹி. புப்³பே³ கிர ஏகோ ராஜா ஸம்மாபாஸம் யஜந்தோ ஸரஸ்ஸதினதி³தீரே பத²வியா விவரே தி³ன்னே நிமுக்³கோ³யேவ அஹோஸி. அந்த⁴பா³லப்³ராஹ்மணா க³தானுக³திக³தா ‘‘அயம் தஸ்ஸ ஸக்³க³க³மனமக்³கோ³’’தி ஸஞ்ஞாய தத்த² ஸம்மாபாஸம் யஞ்ஞம் பட்ட²பேந்தி. தேன வுத்தம் ‘‘நிமுக்³கோ³காஸதோ பபு⁴தீ’’தி. அயூபோ அப்பகதி³வஸோ யாகோ³, ஸயூபோ ப³ஹுதி³வஸம் ஸாதே⁴ய்யோ ஸத்ரயாகோ³. மந்தபதா³பி⁴ஸங்க²தானம் ஸப்பிமதூ⁴னம் ‘‘வாஜ’’மிதி ஸமஞ்ஞா. ஹிரஞ்ஞஸுவண்ணகோ³மஹிம்ஸாதி³ ஸத்தரஸகத³க்கி²ணஸ்ஸ. ஸாரக³ப்³ப⁴கோட்டா²கா³ராதீ³ஸு நத்தி² ஏத்த² அக்³க³ளாதி நிரக்³க³ளோ. தத்த² கிர யஞ்ஞே அத்தனோ ஸாபதேய்யம் அனவஸேஸதோ அனிகூ³ஹித்வா நிய்யாதீயதி.

சந்த³ப்பபா⁴தி (இதிவு. அட்ட². 27) சந்தி³மஸ்ஸேவ பபா⁴ய. தாராக³ணாவ ஸப்³பே³தி யதா² ஸப்³பே³பி தாராக³ணா சந்தி³மஸோபா⁴ய ஸோளஸிம்பி கலம் நாக்³க⁴ந்தி, ஏவம் தே அஸ்ஸமேதா⁴த³யோ யஞ்ஞா மேத்தஸ்ஸ சித்தஸ்ஸ வுத்தலக்க²ணேன ஸுபா⁴விதஸ்ஸ ஸோளஸிம்பி கலம் நானுப⁴வந்தி, ந பாபுணந்தி, நாக்³க⁴ந்தீதி அத்தோ².

இதா³னி அபரேபி தி³ட்ட²த⁴ம்மிகஸம்பராயிகே மேத்தாபா⁴வனாய ஆனிஸம்ஸே த³ஸ்ஸேதும் ‘‘யோ ந ஹந்தீ’’திஆதி³ வுத்தம். தத்த² யோதி மேத்தாப்³ரஹ்மவிஹாரபா⁴வனானுயுத்தோ புக்³க³லோ. ந ஹந்தீதி தேனேவ மேத்தாபா⁴வனானுபா⁴வேன தூ³ரவிக்க²ம்பி⁴தப்³யாபாத³தாய ந கஞ்சி ஸத்தம் ஹிம்ஸதி, லேட்³டு³த³ண்டா³தீ³ஹி ந விபா³த⁴தி வா. ந கா⁴தேதீதி பரம் ஸமாத³பேத்வா ந ஸத்தே மாராபேதி ந விபா³தா⁴பேதி ச. ந ஜினாதீதி ஸாரம்ப⁴விக்³கா³ஹிககதா²தி³வஸேன ந கஞ்சி ஜினாதி ஸாரம்ப⁴ஸ்ஸேவ அபா⁴வதோ, ஜானிகரணவஸேன வா அட்டகரணாதி³னா ந கஞ்சி ஜினாதி. தேனாஹ ‘‘ந அத்தனா பரஸ்ஸ ஜானிம் கரோதீ’’தி. ந ஜாபயேதி பரேஹி பயோஜேத்வா பரேஸம்பி த⁴னஜானிம் ந காராபேய்ய. தேனாஹ ‘‘ந பரேன பரஸ்ஸ ஜானிம் காரேதீ’’தி. மேத்தாய வா அம்ஸோ அவிஹேட²னட்டே²ன அவயவபூ⁴தோதி மேத்தம்ஸோ.

மேத்தாஸுத்தவண்ணனா நிட்டி²தா.

2-4. பஞ்ஞாஸுத்தாதி³வண்ணனா

2-4. து³தியே ஆதி³ப்³ரஹ்மசரியிகாயாதி ஆதி³ப்³ரஹ்மசரியமேவ ஆதி³ப்³ரஹ்மசரியிகா. தேனாஹ ‘‘மக்³க³ப்³ரஹ்மசரியஸ்ஸ ஆதி³பூ⁴தாயா’’தி. அரியோதி நித்³தோ³ஸோ பரிஸுத்³தோ⁴. துண்ஹீபா⁴வோ ந தித்தி²யானம் மூக³ப்³ப³தக³ஹணம் விய அபரிஸுத்³தோ⁴தி அரியோ துண்ஹீபா⁴வோ. சதுத்த²ஜ்ஜா²னந்தி உக்கட்ட²னித்³தே³ஸேனேதம் வுத்தம், பட²மஜ்ஜா²னாதீ³னிபி அரியோ துண்ஹீபா⁴வோத்வேவ ஸங்க²ம் க³ச்ச²ந்தி. ஜானந்தி இத³ம் கம்மஸாத⁴னந்தி ஆஹ ‘‘ஜானிதப்³ப³கம் ஜானாதீ’’தி. யதா² வா ஏகச்சோ விபரீதம் க³ண்ஹந்தோ ஜானந்தோபி ந ஜானாதி, பஸ்ஸந்தோபி ந பஸ்ஸதி, ந ஏவமயம். அயம் பன ஜானந்தோ ஜானாதி, பஸ்ஸந்தோ பஸ்ஸதீதி ஏவமேத்த² த³ட்ட²ப்³போ³. ததியாதீ³னி ஸுவிஞ்ஞேய்யானி.

பஞ்ஞாஸுத்தாதி³வண்ணனா நிட்டி²தா.

5. பட²மலோகத⁴ம்மஸுத்தவண்ணனா

5. பஞ்சமே லோகஸ்ஸ த⁴ம்மாதி ஸத்தலோகஸ்ஸ அவஸ்ஸம்பா⁴வித⁴ம்மா. தேனாஹ ‘‘ஏதேஹி முத்தா நாம நத்தி²’’திஆதி³. கா⁴ஸச்சா²த³னாதீ³னம் லத்³தி⁴ லாபோ⁴, தானி ஏவ வா லத்³த⁴ப்³ப³தோ லாபோ⁴, தத³பா⁴வோ அலாபோ⁴, லாப⁴க்³க³ஹணேன சேத்த² தப்³பி³ஸயோ அனுரோதோ⁴ க³ஹிதோ, அலாப⁴க்³க³ஹணேன விரோதோ⁴. யஸ்மா லோஹிதே ஸதி தது³பகா⁴தவஸேன புப்³போ³ விய அனுரோதோ⁴ லத்³தா⁴வஸரோ ஏவ ஹோதி, தஸ்மா வுத்தம் ‘‘லாபே⁴ ஆக³தே அலாபோ⁴ ஆக³தோயேவா’’தி. ஏஸ நயோ யஸாதீ³ஸுபி. ஸேஸம் ஸுவிஞ்ஞேய்யமேவ.

பட²மலோகத⁴ம்மஸுத்தவண்ணனா நிட்டி²தா.

6-8. து³தியலோகத⁴ம்மஸுத்தாதி³வண்ணனா

6-8. ச²ட்டே² அதி⁴கம் பயஸதி பயுஜ்ஜதி ஏதேனாதி அதி⁴ப்பயாஸோ, ஸவிஸேஸம் இதிகத்தப்³ப³கிரியா. தேனாஹ ‘‘அதி⁴கப்பயோகோ³’’தி. ஸத்தமட்ட²மேஸு நத்தி² வத்தப்³ப³ம்.

து³தியலோகத⁴ம்மஸுத்தாதி³வண்ணனா நிட்டி²தா.

9. நந்த³ஸுத்தவண்ணனா

9. நவமே து³விதா⁴ குலபுத்தா ஜாதிகுலபுத்தா ஆசாரகுலபுத்தா ச. தத்த² ‘‘தேன கோ² பன ஸமயேன ரட்ட²பாலோ குலபுத்தோ தஸ்மிம்யேவ து²ல்லகோட்டி²கே அக்³க³குலிகஸ்ஸ புத்தோ’’தி (ம. நி. 2.294) ஏவம் ஆக³தா உச்சாகுலபுத்தா ஜாதிகுலபுத்தா. ‘‘ஸத்³தா⁴யேதே குலபுத்தா அகா³ரஸ்மா அனகா³ரியம் பப்³ப³ஜிதா’’தி (ம. நி. 3.78) ஏவம் ஆக³தா பன யத்த² கத்த²சி குலே பஸுதாபி ஆசாரகுலபுத்தா நாம. இத⁴ பன உச்சாகுலப்பஸுததம் ஸந்தா⁴ய ‘‘குலபுத்தோதி, பி⁴க்க²வே, நந்த³ம் ஸம்மா வத³மானோ வதே³ய்யா’’தி ப⁴க³வதா வுத்தந்தி ஆஹ ‘‘ஜாதிகுலபுத்தோ’’தி. உபோ⁴ஹிபி பன காரணேஹி தஸ்ஸ குலபுத்தபா⁴வோயேவ. ஸேஸமேத்த² உத்தானமேவ.

நந்த³ஸுத்தவண்ணனா நிட்டி²தா.

10. காரண்ட³வஸுத்தவண்ணனா

10. த³ஸமே படிசரதீதி படிச்சா²த³னவஸேன சரதி பவத்ததி. படிச்சா²த³னட்டோ² ஏவ வா சரதி-ஸத்³தோ³ அனேகத்த²த்தா தா⁴தூனந்தி ஆஹ ‘‘படிச்சா²தே³தீ’’தி. அஞ்ஞேனாஞ்ஞந்தி பன படிச்சா²த³னாகாரத³ஸ்ஸனந்தி ஆஹ ‘‘அஞ்ஞேன காரணேனா’’திஆதி³. தத்த² அஞ்ஞம் காரணம் வசனம் வாதி யம் சோத³கேன சுதி³தகஸ்ஸ தோ³ஸவிபா⁴வனம் காரணம், வசனம் வா வுத்தம், தம் ததோ அஞ்ஞேனேவ காரணேன, வசனேன வா படிச்சா²தே³தி. காரணேனாதி சோத³னாய அமூலாய அமூலிகபா⁴வதீ³பனியா யுத்தியா வா. வசனேனாதி தத³த்த²போ³த⁴கேன வசனேன. ‘‘கோ ஆபன்னோ’’திஆதி³னா சோத³னம் விஸ்ஸஜ்ஜேத்வாவ விக்கே²பாபஜ்ஜனம் அஞ்ஞேனாஞ்ஞம் படிசரணம். ப³ஹித்³தா⁴ கதா²பனாமனா நாம ‘‘இத்த²ன்னாமம் ஆபத்திம் ஆபன்னோஸீ’’தி வுத்தே – ‘‘பாடலிபுத்தம் க³தோம்ஹீ’’திஆதி³னா சோத³னம் விஸ்ஸஜ்ஜேத்வாதி அயமேவ விஸேஸோ. யோ ஹி ‘‘ஆபத்திம் ஆபன்னோஸீ’’தி வுத்தோ ‘‘கோ ஆபன்னோ, கிம் ஆபன்னோ, கிஸ்மிம் ஆபன்னா, கம் ப⁴ணத², கிம் ப⁴ணதா²’’தி வா வத³தி, ‘‘ஏவரூபம் கிஞ்சி தயா தி³ட்ட²’’ந்தி வுத்தே ‘‘ந ஸுணாமீ’’தி ஸோதம் வா உபனேதி, அயம் அஞ்ஞேனாஞ்ஞம் படிசரதி நாம. யோ பன ‘‘இத்த²ன்னாமம் நாம ஆபத்திம் ஆபன்னோஸீ’’தி புட்டோ² ‘‘பாடலிபுத்தம் க³தோம்ஹீ’’தி வத்வா புன ‘‘ந தவ பாடலிபுத்தக³மனம் புச்சா²ம, ஆபத்திம் புச்சா²மா’’தி வுத்தே ததோ ‘‘ராஜக³ஹம் க³தோம்ஹி. ராஜக³ஹம் வா யாஹி ப்³ராஹ்மணக³ஹம் வா, ஆபத்திம் ஆபன்னோஸீதி. தம் தத்த² மே ஸூகரமம்ஸம் லத்³த⁴’’ந்திஆதீ³னி வத³தி, அயம் ப³ஹித்³தா⁴ கத²ம் அபனாமேதி நாம. ஸமணகசவரோதி ஸமணவேஸதா⁴ரணேன ஸமணப்பதிரூபகதாய ஸமணானம் கசவரபூ⁴தம்.

காரண்ட³வம் (ஸு. நி. அட்ட². 2.283-284) நித்³த⁴மதா²தி விபன்னஸீலதாய கசவரபூ⁴தம் புக்³க³லம் கசவரமிவ அனபேக்கா² அபனேத². கஸம்பு³ம் அபகஸ்ஸதா²தி கஸம்பு³பூ⁴தஞ்ச நம் க²த்தியாதீ³னம் மஜ்ஜ²க³தம் பபி⁴ன்னபக்³க⁴ரிதகுட்ட²ம் சண்டா³லம் விய அபகட்³ட⁴த². கிம் காரணம்? ஸங்கா⁴ராமோ நாம ஸீலவந்தானம் கதோ, ந து³ஸ்ஸீலானம். யதோ ஏததே³வ ஸந்தா⁴யாஹ ‘‘ததோ பலாபே வாஹேத², அஸ்ஸமணே ஸமணமானினே’’தி. யதா² பலாபா அந்தோஸாரரஹிதா அதண்டு³லா ப³ஹி து²ஸேன வீஹீ விய தி³ஸ்ஸந்தி, ஏவம் பாபபி⁴க்கூ² அந்தோ ஸீலரஹிதாபி ப³ஹி காஸாவாதி³பரிக்கா²ரேன பி⁴க்கூ² விய தி³ஸ்ஸந்தி, தஸ்மா ‘‘பலாபா’’தி வுச்சந்தி. தே பலாபே வாஹேத² ஓபுனத² வித⁴மத², பரமத்த²தோ அஸ்ஸமணே ஸமணவேஸமத்தேன ஸமணமானினே. கப்பயவ்ஹோதி கப்பேத², கரோதா²தி வுத்தம் ஹோதி. பதிஸ்ஸதாதி ஸப்பதிஸ்ஸா. வட்டது³க்க²ஸ்ஸ அந்தம் கரிஸ்ஸத², பரினிப்³பா³னம் பாபுணிஸ்ஸதா²தி அத்தோ².

காரண்ட³வஸுத்தவண்ணனா நிட்டி²தா.

மேத்தாவக்³க³வண்ணனா நிட்டி²தா.