1-8. பட²மவினயத⁴ரஸுத்தாதி³வண்ணனா

75-82. அட்ட²மஸ்ஸ பட²மம் து³தியஞ்ச உத்தானத்த²மேவ. ததியே வினயலக்க²ணே பதிட்டி²தோ லஜ்ஜிபா⁴வேன வினயலக்க²ணே டி²தோ ஹோதி. அலஜ்ஜீ (பாரா. அட்ட². 1.45) ஹி ப³ஹுஸ்ஸுதோபி ஸமானோ லாப⁴க³ருகதாய தந்திம் விஸம்வாதே³த்வா உத்³த⁴ம்மம் உப்³பி³னயம் ஸத்து²ஸாஸனம் தீ³பேத்வா ஸாஸனே மஹந்தம் உபத்³த³வம் கரோதி, ஸங்க⁴பே⁴த³ம்பி ஸங்க⁴ராஜிம்பி உப்பாதே³தி. லஜ்ஜீ பன குக்குச்சகோ ஸிக்கா²காமோ ஜீவிதஹேதுபி தந்திம் அவிஸம்வாதே³த்வா த⁴ம்மமேவ வினயமேவ ச தீ³பேதி, ஸத்து²ஸாஸனம் க³ரும் கத்வா ட²பேதி. ஏவம் யோ லஜ்ஜீ, ஸோ வினயம் அஜஹந்தோ அவோக்கமந்தோவ லஜ்ஜிபா⁴வேன வினயலக்க²ணே டி²தோ ஹோதி பதிட்டி²தோ.

அஸம்ஹீரோதி ஏத்த² ஸம்ஹீரோ நாம யோ பாளியம் வா அட்ட²கதா²யம் வா ஹேட்டா² வா உபரிதோ வா பத³படிபாடியா வா புச்சி²யமானோ வித்து²னதி விப்ப²ந்த³தி, ஸண்டா²தும் ந ஸக்கோதி, யம் யம் பரேன வுச்சதி, தம் தம் அனுஜானாதி, ஸகவாத³ம் ச²ட்³டே³த்வா பரவாத³ம் க³ண்ஹாதி. யோ பன பாளியம் வா அட்ட²கதா²யம் வா ஹேட்டு²பரியவஸேன வா பத³படிபாடியா வா புச்சி²யமானோ ந வித்து²னதி ந விப்ப²ந்த³தி, ஏகேகலோமம் ஸண்டா³ஸேன க³ண்ஹந்தோ விய ‘‘ஏவம் மயம் வதா³ம, ஏவம் நோ ஆசரியா வத³ந்தீ’’தி விஸ்ஸஜ்ஜேதி. யம்ஹி பாளி ச பாளிவினிச்ச²யோ ச ஸுவண்ணபா⁴ஜனே பக்கி²த்தஸீஹவஸா விய பரிக்க²யம் பரியாதா³னம் அக³ச்ச²ந்தோ திட்ட²தி, அயம் வுச்சதி அஸம்ஹீரோ. யஸ்மா பன ஏவரூபோ யம் யம் பரேன வுச்சதி, தம் தம் நானுஜானாதி, அத்தனா ஸுவினிச்சி²னிதம் கத்வா க³ஹிதம் அவிபரீதமத்த²ம் ந விஸ்ஸஜ்ஜேதி, தஸ்மா வுத்தம் ‘‘ந ஸக்கோதி க³ஹிதக்³க³ஹணம் விஸ்ஸஜ்ஜாபேது’’ந்தி. சதுத்தா²தீ³னி ஸுவிஞ்ஞேய்யானி.

பட²மவினயத⁴ரஸுத்தாதி³வண்ணனா நிட்டி²தா.