10. அரகஸுத்தவண்ணனா

74. த³ஸமே பரித்தந்தி இத்தரம். தேனாஹ ‘‘அப்பம் தோ²க’’ந்தி. பப³ந்தா⁴னுபச்சே²த³ஸ்ஸ பச்சயபா⁴வோ இத⁴ ஜீவிதஸ்ஸ ரஸோ கிச்சந்தி அதி⁴ப்பேதந்தி ஆஹ ‘‘ஸரஸபரித்ததாயபீ’’தி. தத³தீ⁴னவுத்திதாயபி ஹி ‘‘யோ, பி⁴க்க²வே, சிரம் ஜீவதி, ஸோ வஸ்ஸஸதம் அப்பம் வா பி⁴ய்யோ’’தி வசனதோ பரித்தம் க²ணபரித்ததாயபி. பரமத்த²தோ ஹி அதிபரித்தோ ஸத்தானம் ஜீவிதக்க²ணோ ஏகசித்தக்க²ணப்பவத்திமத்தோயேவ. யதா² நாம ரத²சக்கம் பவத்தமானம்பி ஏகேனேவ நேமிப்பதே³ஸேன பவத்ததி, திட்ட²மானம்பி ஏகேனேவ திட்ட²தி, ஏவமேவம் ஏகசித்தக்க²ணிகம் ஸத்தானம் ஜீவிதம் தஸ்மிம் சித்தே நிருத்³த⁴மத்தே ஸத்தோ நிருத்³தோ⁴தி வுச்சதி. யதா²ஹ ‘‘அதீதே சித்தக்க²ணே ஜீவித்த² ந ஜீவதி ந ஜீவிஸ்ஸதி. அனாக³தே சித்தக்க²ணே ந ஜீவித்த² ந ஜீவதி ஜீவிஸ்ஸதி. பச்சுப்பன்னே சித்தக்க²ணே ந ஜீவித்த² ஜீவதி ந ஜீவிஸ்ஸதி.

‘‘ஜீவிதம் அத்தபா⁴வோ ச, ஸுக²து³க்கா² ச கேவலா;

ஏகசித்தஸமாயுத்தா, லஹுஸோ வத்ததே க²ணோ.

‘‘யே நிருத்³தா⁴ மரந்தஸ்ஸ, திட்ட²மானஸ்ஸ வா இத⁴;

ஸப்³பே³பி ஸதி³ஸா க²ந்தா⁴, க³தா அப்படிஸந்தி⁴கா.

‘‘அனிப்³ப³த்தேன ந ஜாதோ, பச்சுப்பன்னேன ஜீவதி;

சித்தப⁴ங்கா³ மதோ லோகோ, பஞ்ஞத்தி பரமத்தி²யா’’தி. (மஹானி. 10);

லஹுஸந்தி லஹுகம். தேனாஹ ‘‘லஹும் உப்பஜ்ஜித்வா நிருஜ்ஜ²னதோ லஹுஸ’’ந்தி. பரித்தம் லஹுஸந்தி உப⁴யம் பனேதம் அப்பகஸ்ஸ வேவசனம். யஞ்ஹி அப்பகம், தம் பரித்தஞ்சேவ லஹுகஞ்ச ஹோதி. இத⁴ பன ஆயுனோ அதி⁴ப்பேதத்தா ரஸ்ஸந்தி வுத்தம் ஹோதி. மந்தாயந்தி கரணத்தே² ஏதம் பு⁴ம்மவசனந்தி ஆஹ ‘‘மந்தாய போ³த்³த⁴ப்³ப³ம், பஞ்ஞாய ஜானிதப்³ப³ந்தி அத்தோ²’’தி. மந்தாயந்தி வா மந்தேய்யந்தி வுத்தம் ஹோதி, மந்தேதப்³ப³ம் மந்தாய உபபரிக்கி²தப்³ப³ந்தி அத்தோ². பஞ்ஞாய ஜானிதப்³ப³ந்தி ஜானிதப்³ப³ம் ஜீவிதஸ்ஸ பரித்தபா⁴வோ ப³ஹுது³க்கா²தி³பா⁴வோ. ஜானித்வா ச பன ஸப்³ப³பலிபோ³தே⁴ சி²ந்தி³த்வா கத்தப்³ப³ம் குஸலம், சரிதப்³ப³ம் ப்³ரஹ்மசரியம். யஸ்மா இத்தி² ஜாதஸ்ஸ அமரணம், அப்பம் வா பி⁴ய்யோ வஸ்ஸஸததோ உபரி அப்பம் அஞ்ஞம் வஸ்ஸஸதம் அப்பத்வா வீஸம் வா திம்ஸம் வா சத்தாலீஸம் வா பண்ணாஸம் வா ஸட்டி² வா வஸ்ஸானி ஜீவதி, ஏவம்தீ³கா⁴யுகோ பன அதிது³ல்லபோ⁴. ‘‘அஸுகோ ஹி ஏவம் சிரம் ஜீவதீ’’தி தத்த² தத்த² க³ந்த்வா த³ட்ட²ப்³போ³ ஹோதி. தத்த² விஸாகா² உபாஸிகா வீஸஸதம் ஜீவதி, ததா² போக்க²ரஸாதிப்³ராஹ்மணோ, ப்³ரஹ்மாயுப்³ராஹ்மணோ, பா³வரியப்³ராஹ்மணோ, ஆனந்த³த்தே²ரோ, மஹாகஸ்ஸபத்தே²ரோதி. அனுருத்³த⁴த்தே²ரோ பன வஸ்ஸஸதஞ்சேவ பண்ணாஸஞ்ச வஸ்ஸானி. பா³குலத்தே²ரோ வஸ்ஸஸதஞ்சேவ ஸட்டி² ச வஸ்ஸானி, அயம் ஸப்³ப³தீ³கா⁴யுகோ, ஸோபி த்³வே வஸ்ஸஸதானி ந ஜீவி.

அரகஸுத்தவண்ணனா நிட்டி²தா.

மஹாவக்³க³வண்ணனா நிட்டி²தா.