(8) 3. யோதா⁴ஜீவவக்³கோ³

1-2. பட²மசேதோவிமுத்திப²லஸுத்தாதி³வண்ணனா

71-72. ததியஸ்ஸ பட²மே அவிஜ்ஜாபலிக⁴ந்தி ஏத்த² அவிஜ்ஜாதி வட்டமூலிகா அவிஜ்ஜா, அயம் பசுரஜனேஹி உக்கி²பிதும் அஸக்குணேய்யபா⁴வதோ து³க்கி²பனட்டே²ன நிப்³பா³னத்³வாரப்பவேஸவிப³ந்த⁴னேன ச ‘‘பலிகோ⁴ வியாதி பலிகோ⁴’’தி வுச்சதி. தேனேஸ தஸ்ஸா உக்கி²த்தத்தா ‘‘உக்கி²த்தபலிகோ⁴’’தி வுத்தோ. புனப்³ப⁴வஸ்ஸ கரணஸீலோ, புனப்³ப⁴வம் வா ப²லம் அரஹதீதி போனோப⁴விகா, புனப்³ப⁴வதா³யிகாதி அத்தோ². ஜாதிஸம்ஸாரோதி ஜாயனவஸேன சேவ ஸம்ஸரணவஸேன ச ஏவம்லத்³த⁴னாமானம் புனப்³ப⁴வக்க²ந்தா⁴னம் பச்சயோ கம்மாபி⁴ஸங்கா²ரோ. ஜாதிஸம்ஸாரோதி ஹி ப²லூபசாரேன காரணம் வுத்தம். தஞ்ஹி புனப்புனம் உப்பத்திகாரணவஸேன பரிக்கி²பித்வா டி²தத்தா ‘‘பரிகா²’’தி வுச்சதி ஸந்தானஸ்ஸ பரிக்கி²பனதோ. தேனேஸ தஸ்ஸ ஸம்கிண்ணத்தா விகிண்ணத்தா ஸப்³ப³ஸோ கி²த்தத்தா வினாஸிதத்தா ‘‘ஸம்கிண்ணபரிகோ²’’தி வுத்தோ.

தண்ஹாஸங்கா²தந்தி ஏத்த² தண்ஹாதி வட்டமூலிகா தண்ஹா. அயஞ்ஹி க³ம்பீ⁴ரானுக³தட்டே²ன ‘‘ஏஸிகா’’தி வுச்சதி. லுஞ்சித்வா உத்³த⁴ரித்வா. ஓரம்பா⁴கி³யானீதி ஓரம்பா⁴க³ஜனகானி காமப⁴வே உபபத்திபச்சயானி காமராக³ஸம்யோஜனாதீ³னி. ஏதானி ஹி கவாடம் விய நக³ரத்³வாரம் சித்தம் பித³ஹித்வா டி²தத்தா ‘‘அக்³க³ளா’’தி வுச்சந்தி. தேனேஸ தேஸம் நிக்³க³தத்தா பி⁴ன்னத்தா ‘‘நிரக்³க³ளோ’’தி வுத்தோதி. அக்³க³மக்³கே³ன பன்னோ அபசிதோ மானத்³த⁴ஜோ ஏதஸ்ஸாதி பன்னத்³த⁴ஜோ. பன்னபா⁴ரோதி க²ந்த⁴பா⁴ரகிலேஸபா⁴ரஅபி⁴ஸங்கா²ரபா⁴ரா ஓரோபிதா அஸ்ஸாதி பன்னபா⁴ரோ. விஸம்யுத்தோதி சதூஹி யோகே³ஹி ஸப்³ப³கிலேஸேஹி ச விஸம்யுத்தோ. அஸ்மிமானோதி ரூபே அஸ்மீதி மானோ, வேத³னாய, ஸஞ்ஞாய, ஸங்கா²ரேஸு, விஞ்ஞாணே அஸ்மிமானோ. ஏத்த² ஹி பஞ்சபி க²ந்தே⁴ அவிஸேஸதோ ‘‘அஸ்மீ’’தி க³ஹேத்வா பவத்தமானோ அஸ்மிமானோதி அதி⁴ப்பேதோ.

நக³ரத்³வாரஸ்ஸ பரிஸ்ஸயபடிபா³ஹனத்த²ஞ்சேவ ஸோத⁴னத்த²ஞ்ச உபோ⁴ஸு பஸ்ஸேஸு ஏஸிகாத²ம்பே⁴ நிக²ணித்வா ட²பேதீதி ஆஹ ‘‘நக³ரத்³வாரே உஸ்ஸாபிதே ஏஸிகாத²ம்பே⁴’’தி. பாகாரவித்³த⁴ம்ஸனேனேவ பரிகா²பூ⁴மிஸமகரணம் ஹோதீதி ஆஹ ‘‘பாகாரம் பி⁴ந்தி³த்வா பரிக²ம் விகிரித்வா’’தி. ‘‘ஏவ’’ந்திஆதி³ உபமாஸம்ஸந்த³னம். ஸந்தோ ஸம்விஜ்ஜமானோ காயோ த⁴ம்மஸமூஹோதி ஸக்காயோ, உபாதா³னக்க²ந்த⁴பஞ்சகம். த்³வத்திம்ஸகம்மகாரணா து³க்க²க்க²ந்தே⁴ ஆக³தது³க்கா²னி. அக்கி²ரோக³ஸீஸரோகா³த³யோ. அட்ட²னவுதி ரோகா³, ராஜப⁴யாதீ³னி பஞ்சவீஸதிமஹாப⁴யானி. து³தியம் உத்தானமேவ.

பட²மசேதோவிமுத்திப²லஸுத்தாதி³வண்ணனா நிட்டி²தா.

3-4. பட²மத⁴ம்மவிஹாரீஸுத்தாதி³வண்ணனா

73-74. ததியே நியகஜ்ஜ²த்தேதி அத்தனோ ஸந்தானே. மேத்தாய உபஸம்ஹரணவஸேன ஹிதம் ஏஸந்தேன. கருணாய வஸேன அனுகம்பமானேன. பரிக்³க³ஹேத்வாதி பரிதோ க³ஹேத்வா, ப²ரித்வாதி அத்தோ². பரிச்சாதி பரிதோ கத்வா, ஸமந்ததோ ப²ரித்வா இச்சேவ அத்தோ². ‘‘படிச்சா’’திபி பாடோ². மா பமஜ்ஜித்தா²தி ‘‘ஜா²யதா²’’தி வுத்தஸமத²விபஸ்ஸனானம் அனனுயுஞ்ஜனேன அஞ்ஞேன வா கேனசி பமாத³காரணேன மா பமாத³ம் ஆபஜ்ஜித்த². நிய்யானிகஸாஸனே அகத்தப்³ப³கரணம் விய கத்தப்³பா³கரணம்பி பமாதோ³தி. விபத்திகாலேதி ஸத்தஅஸப்பாயாதி³விபத்தியுத்தே காலே. ஸப்³பே³பி ஸாஸனே கு³ணா இதே⁴வ ஸங்க³ஹம் க³ச்ச²ந்தீதி ஆஹ ‘‘ஜா²யத² மா பமாத³த்த²…பே… அனுஸாஸனீ’’தி. சதுத்தே² நத்தி² வத்தப்³ப³ம்.

பட²மத⁴ம்மவிஹாரீஸுத்தாதி³வண்ணனா நிட்டி²தா.

5. பட²மயோதா⁴ஜீவஸுத்தவண்ணனா

75. பஞ்சமே யுஜ்ஜ²னம் யோதோ⁴, ஸோ ஆஜீவோ ஏதேஸந்தி யோதா⁴ஜீவா. தேனாஹ ‘‘யுத்³தூ⁴பஜீவினோ’’தி. ஸந்த²ம்பி⁴த்வா டா²தும் ந ஸக்கோதீதி ப³த்³தோ⁴ தி⁴திஸம்பன்னோ டா²தும் ந ஸக்கோதி. ஸமாக³தேதி ஸம்பத்தே. ப்³யாபஜ்ஜதீதி விகாரமாபஜ்ஜதி. தேனாஹ ‘‘பகதிபா⁴வம் ஜஹதீ’’தி.

ரஜக்³க³ஸ்மிந்தி பச்சத்தே பு⁴ம்மவசனந்தி ஆஹ ‘‘கிம் தஸ்ஸ புக்³க³லஸ்ஸ ரஜக்³க³ம் நாமா’’தி. வினிப்³பே³டே²த்வாதி க³ஹிதக்³க³ஹணம் விஸ்ஸஜ்ஜாபேத்வா. மோசேத்வாதி ஸரீரதோ அபனேத்வா.

பட²மயோதா⁴ஜீவஸுத்தவண்ணனா நிட்டி²தா.

6. து³தியயோதா⁴ஜீவஸுத்தவண்ணனா

76. ச²ட்டே² சம்மந்தி இமினா சம்மமயம் சம்மமிதி ஸிப்³பி³தம், அஞ்ஞம் வா கேடகப²லகாதி³ம் ஸங்க³ண்ஹாதி. த⁴னுகலாபம் ஸன்னய்ஹித்வாதி த⁴னுஞ்சேவ தூணிரஞ்ச ஸன்னய்ஹித்வா ஸஜ்ஜேத்வா. த⁴னுத³ண்ட³ஸ்ஸ ஜியாயத்தபா⁴வகரணாதி³பி ஹி த⁴னுனோ ஸன்னய்ஹனம். தேனேவாஹ ‘‘த⁴னுஞ்ச ஸரகலாபஞ்ச ஸன்னய்ஹித்வா’’தி. யுத்³த⁴ஸன்னிவேஸேன டி²தந்தி த்³வின்னம் ஸேனானம் ப்³யூஹனஸம்விதா⁴னனயேன கதோ யோ ஸன்னிவேஸோ, தஸ்ஸ வஸேன டி²தம், ஸேனாப்³யூஹஸம்விதா⁴னவஸேன ஸன்னிவிட்ட²ந்தி வுத்தம் ஹோதி. உஸ்ஸாஹஞ்ச வாயாமஞ்ச கரோதீதி யுஜ்ஜ²னவஸேன உஸ்ஸாஹம் வாயாமஞ்ச கரோதி. பரியாபாதே³ந்தீதி மரணபரியந்திகம் அபரம் பாபேந்தி. தேனாஹ ‘‘பரியாபாத³யந்தீ’’தி, ஜீவிதம் பரியாபாத³யந்தி மரணம் படிபஜ்ஜாபேந்தீதி வுத்தம் ஹோதி.

அரக்கி²தேனேவ காயேனாதிஆதீ³ஸு ஹத்த²பாதே³ கீளாபேந்தோ கீ³வம் விபரிவத்தேந்தோ காயம் ந ரக்க²தி நாம. நானப்பகாரம் து³ட்டு²ல்லம் கரோந்தோ வாசம் ந ரக்க²தி நாம. காமவிதக்காத³யோ விதக்கேந்தோ சித்தம் ந ரக்க²தி நாம. அனுபட்டி²தாய ஸதியாதி காயக³தாய ஸதியா அனுபட்டி²தாய. ராகே³ன அனுக³தோதி ராகே³ன அனுபஹதோ. ராக³பரேதோதி வா ராகே³ன பு²ட்டோ² பு²ட்ட²விஸேன விய ஸப்பேன.

அனுத³ஹனட்டே²னாதி அனுபாயப்படிபத்தியா. ஸம்பதி ஆயதிஞ்ச மஹாபி⁴தாபட்டே²ன. அனவத்தி²தஸபா⁴வதாய இத்தரபச்சுபட்டா²னட்டே²ன. முஹுத்தரமணீயதாய தாவகாலிகட்டே²ன. ப்³யத்தேஹி அபி⁴ப⁴வனீயதாய ஸப்³ப³ங்க³பச்சங்க³பலிப⁴ஞ்ஜனட்டே²ன. சே²த³னபே⁴த³னாதி³அதி⁴கரணபா⁴வேன உக்³க⁴ட்டனஸதி³ஸதாய அதி⁴குட்டனட்டே²ன. அவணே வணம் உப்பாதே³த்வா அந்தோ அனுபவிஸனஸபா⁴வதாய வினிவிஜ்ஜ²னட்டே²ன. தி³ட்ட²த⁴ம்மிகஸம்பராயிக அனத்த²னிமித்ததாய ஸாஸங்கஸப்படிப⁴யட்டே²ன.

து³தியயோதா⁴ஜீவஸுத்தவண்ணனா நிட்டி²தா.

7-8. பட²மஅனாக³தப⁴யஸுத்தாதி³வண்ணனா

77-78. ஸத்தமே விஸேஸஸ்ஸ பத்தியா விஸேஸஸ்ஸ பாபுணனத்த²ம். வீரியந்தி பதா⁴னவீரியம். தம் பன சங்கமனவஸேன கரணே ‘‘காயிக’’ந்திபி வத்தப்³ப³தம் லப⁴தீதி ஆஹ – ‘‘து³வித⁴ம்பீ’’தி. ஸத்த²கவாதாதி ஸந்தி⁴ப³ந்த⁴னானி கத்தரியா சி²ந்த³ந்தா விய பவத்தவாதா. தேனாஹ – ‘‘ஸத்த²ம் வியா’’திஆதி³. கதகம்மேஹீதி கதசோரகம்மேஹி. தே கிர கதகம்மா யம் நேஸம் தே³வதம் ஆயாசித்வா கம்மம் நிப்ப²ன்னம், தஸ்ஸ உபகாரத்தா²ய மனுஸ்ஸே மாரேத்வா க³லலோஹிதானி க³ண்ஹந்தி. தே ‘‘அஞ்ஞேஸு மனுஸ்ஸேஸு மாரியமானேஸு கோலாஹலம் உப்பஜ்ஜிஸ்ஸதி, பப்³ப³ஜிதம் பரியேஸந்தோ நாம நத்தீ²’’தி மஞ்ஞமானா பி⁴க்கூ² க³ஹேத்வா மாரேந்தி. தம் ஸந்தா⁴யேதம் வுத்தம். அகதகம்மேஹீதி அடவிதோ கா³மம் ஆக³மனகாலே கம்மனிப்ப²த்தத்த²ம் புரேதரம் ப³லிகம்மம் காதுகாமேஹி. தேனேவாஹ – ‘‘சோரிகம் கத்வா நிக்க²ந்தா கதகம்மா நாமா’’திஆதி³. அட்ட²மே நத்தி² வத்தப்³ப³ம்.

பட²மஅனாக³தப⁴யஸுத்தாதி³வண்ணனா நிட்டி²தா.

9. ததியஅனாக³தப⁴யஸுத்தவண்ணனா

79. நவமே பாளிக³ம்பீ⁴ராதி (ஸம். நி. டீ. 2.2.229) பாளிவஸேன க³ம்பீ⁴ரா அகா³தா⁴ து³க்கோ²கா³ஹா ஸல்லஸுத்தஸதி³ஸா. ஸல்லஸுத்தஞ்ஹி (ஸு. நி. 579) ‘‘அனிமித்தமனஞ்ஞாத’’ந்திஆதி³னா பாளிவஸேன க³ம்பீ⁴ரம், ந அத்த²க³ம்பீ⁴ரம். ததா² ஹி தத்த² தா தா கா³தா² து³விஞ்ஞேய்யரூபா திட்ட²ந்தி. து³விஞ்ஞேய்யஞ்ஹி ஞாணேன து³க்கோ²கா³ஹந்தி கத்வா ‘‘க³ம்பீ⁴ர’’ந்தி வுச்சதி. புப்³பா³பரம்பேத்த² காஸஞ்சி கா³தா²னம் து³விஞ்ஞேய்யதாய து³க்கோ²கா³ஹமேவ, தஸ்மா பாளிவஸேன க³ம்பீ⁴ரம். அத்த²க³ம்பீ⁴ராதி அத்த²வஸேன க³ம்பீ⁴ரா மஹாவேத³ல்லஸுத்தஸதி³ஸா, மஹாவேத³ல்லஸுத்தஸ்ஸ (ம. நி. 1.449 ஆத³யோ) அத்த²வஸேன க³ம்பீ⁴ரதா பாகடாயேவ. லோகம் உத்தரதீதி லோகுத்தரோ, ஸோ அத்த²பூ⁴தோ ஏதேஸம் அத்தீ²தி லோகுத்தரா. தேனாஹ – ‘‘லோகுத்தரத⁴ம்மதீ³பகா’’தி. ஸுஞ்ஞதாபடிஸம்யுத்தாதி ஸத்தஸுஞ்ஞத⁴ம்மப்பகாஸகா. தேனாஹ ‘‘க²ந்த⁴தா⁴துஆயதனபச்சயாகாரப்படிஸம்யுத்தா’’தி. உக்³க³ஹேதப்³ப³ம் பரியாபுணிதப்³ப³ந்தி ச லிங்க³வசனவிபல்லாஸேன வுத்தந்தி ஆஹ ‘‘உக்³க³ஹேதப்³பே³ சேவ வளஞ்ஜேதப்³பே³ சா’’தி. கவினோ கம்மம் கவிதா. யஸ்ஸ பன யம் கம்மம், தம் தேன கதந்தி வுச்சதீதி ஆஹ ‘‘கவிதாதி கவீஹி கதா’’தி. காவேய்யந்தி கப்³யம், கப்³யந்தி ச கவினா வுத்தந்தி அத்தோ². தேனாஹ ‘‘தஸ்ஸேவ வேவசன’’ந்தி. சித்தக்க²ராதி சித்ராகாரஅக்க²ரா. இதரம் தஸ்ஸேவ வேவசனம். ஸாஸனதோ ப³ஹித்³தா⁴ டி²தாதி ந ஸாஸனாவசரா. பா³ஹிரகஸாவகேஹீதி ‘‘பு³த்³தா⁴’’தி அப்பஞ்ஞாதானம் யேஸம் கேஸஞ்சி ஸாவகேஹி. ஸுஸ்ஸூஸிஸ்ஸந்தீதி அக்க²ரசித்ததாய சேவ ஸரஸம்பத்தியா ச அத்தமனா ஹுத்வா ஸாமணேரத³ஹரபி⁴க்கு²மாதுகா³மமஹாக³ஹபதிகாத³யோ ‘‘ஏஸ த⁴ம்மகதி²கோ’’தி ஸன்னிபதித்வா ஸோதுகாமா ப⁴விஸ்ஸந்தி.

ததியஅனாக³தப⁴யஸுத்தவண்ணனா நிட்டி²தா.

10. சதுத்த²அனாக³தப⁴யஸுத்தவண்ணனா

80. த³ஸமே பஞ்சவிதே⁴ன ஸம்ஸக்³கே³னாதி ‘‘ஸவனஸம்ஸக்³கோ³, த³ஸ்ஸனஸம்ஸக்³கோ³, ஸமுல்லாபஸம்ஸக்³கோ³, ஸம்போ⁴க³ஸம்ஸக்³கோ³, காயஸம்ஸக்³கோ³’’தி ஏவம் வுத்தேன பஞ்சவிதே⁴ன ஸம்ஸக்³கே³ன. ஸம்ஸஜ்ஜதி ஏதேனாதி ஸம்ஸக்³கோ³, ராகோ³. ஸவனஹேதுகோ, ஸவனவஸேன வா பவத்தோ ஸம்ஸக்³கோ³ ஸவனஸம்ஸக்³கோ³. ஏஸ நயோ ஸேஸேஸுபி. காயஸம்ஸக்³கோ³ பன காயபராமாஸோ. தேஸு பரேஹி வா கதி²யமானம் ரூபாதி³ஸம்பத்திம் அத்தனா வா ஸிதலபிதகீ³தஸத்³த³ம் ஸுணந்தஸ்ஸ ஸோதவிஞ்ஞாணவீதி²வஸேன உப்பன்னோ ராகோ³ ஸவனஸம்ஸக்³கோ³ நாம. விஸபா⁴க³ரூபம் ஓலோகேந்தஸ்ஸ பன சக்கு²விஞ்ஞாணவீதி²வஸேன உப்பன்னோ ராகோ³ த³ஸ்ஸனஸம்ஸக்³கோ³ நாம. அஞ்ஞமஞ்ஞஆலாபஸல்லாபவஸேன உப்பன்னராகோ³ ஸமுல்லாபஸம்ஸக்³கோ³ நாம. பி⁴க்கு²னோ பி⁴க்கு²னியா ஸந்தகம், பி⁴க்கு²னியா பி⁴க்கு²ஸ்ஸ ஸந்தகம் க³ஹேத்வா பரிபோ⁴க³கரணவஸேன உப்பன்னராகோ³ ஸம்போ⁴க³ஸம்ஸக்³கோ³ நாம. ஹத்த²க்³கா³ஹாதி³வஸேன உப்பன்னோ ராகோ³ காயஸம்ஸக்³கோ³ நாம.

அனேகவிஹிதந்தி அன்னஸன்னிதி⁴பானஸன்னிதி⁴வத்த²ஸன்னிதி⁴யானஸன்னிதி⁴ஸயனஸன்னிதி⁴க³ந்த⁴ஸன்னிதி⁴- ஆமிஸஸன்னிதி⁴வஸேன அனேகப்பகாரம். ஸன்னிதி⁴கதஸ்ஸாதி ஏதேன ‘‘ஸன்னிதி⁴காரபரிபோ⁴க³’’ந்தி (த⁴. ஸ. திகமாதிகா 10) ஏத்த² கார-ஸத்³த³ஸ்ஸ கம்மத்த²தம் த³ஸ்ஸேதி. யதா² வா ‘‘ஆசயம் கா³மினோ’’தி வத்தப்³பே³ அனுனாஸிகலோபேன ‘‘ஆசயகா³மினோ’’தி நித்³தே³ஸோ கதோ, ஏவம் ‘‘ஸன்னிதி⁴காரம் பரிபோ⁴க³’’ந்தி வத்தப்³பே³ அனுனாஸிகலோபேன ‘‘ஸன்னிதி⁴காரபரிபோ⁴க³’’ந்தி வுத்தம், ஸன்னிதி⁴ம் கத்வா பரிபோ⁴க³ந்தி அத்தோ².

‘‘ஸன்னிதி⁴கதஸ்ஸ பரிபோ⁴க³’’ந்தி ஏத்த² (தீ³. நி. அட்ட². 1.12) பன து³விதா⁴ கதா² வினயவஸேன ஸல்லேக²வஸேன ச. வினயவஸேன தாவ யம் கிஞ்சி அன்னம் அஜ்ஜ படிக்³க³ஹிதம் அபரஜ்ஜு ஸன்னிதி⁴காரம் ஹோதி, தஸ்ஸ பரிபோ⁴கே³ பாசித்தியம். அத்தனா லத்³த⁴ம் பன ஸாமணேரானம் த³த்வா தேஹி லத்³த⁴ம் வா பாபேத்வா து³தியதி³வஸே பு⁴ஞ்ஜிதும் வட்டதி, ஸல்லேகோ² பன ந ஹோதி. பானஸன்னிதி⁴ம்ஹிபி ஏஸேவ நயோ. வத்த²ஸன்னிதி⁴ம்ஹி அனதி⁴ட்டி²தாவிகப்பிதம் ஸன்னிதி⁴ ச ஹோதி, ஸல்லேக²ஞ்ச கோபேதி. அயம் நிப்பரியாயகதா². பரியாயதோ பன திசீவரஸந்துட்டே²ன ப⁴விதப்³ப³ம், சதுத்த²ம் லபி⁴த்வா அஞ்ஞஸ்ஸ தா³தப்³ப³ம். ஸசே யஸ்ஸ கஸ்ஸசி தா³தும் ந ஸக்கோதி, யஸ்ஸ பன தா³துகாமோ ஹோதி, ஸோ உத்³தே³ஸத்தா²ய வா பரிபுச்ச²த்தா²ய வா க³தோ, ஆக³தமத்தே தா³தப்³ப³ம், அதா³தும் ந வட்டதி. சீவரே பன அப்பஹோந்தே, ஸதியா வா பச்சாஸாய அனுஞ்ஞாதகாலம் ட²பேதும் வட்டதி. ஸூசிஸுத்தசீவரகாரகானம் அலாபே⁴ ததோபி வினயகம்மம் கத்வா ட²பேதும் வட்டதி ‘‘இமஸ்மிம் ஜிண்ணே புன ஈதி³ஸம் குதோ லபி⁴ஸ்ஸாமீ’’தி பன ட²பேதும் ந வட்டதி, ஸன்னிதி⁴ ச ஹோதி, ஸல்லேக²ஞ்ச கோபேதி.

யானஸன்னிதி⁴ம்ஹி யானம் நாம வய்ஹம் ரதோ² ஸகடம் ஸந்த³மானிகா பாடங்கீதி. ந பனேதம் பப்³ப³ஜிதஸ்ஸ யானம், உபாஹனம் பன யானம். ஏகபி⁴க்கு²ஸ்ஸ ஹி ஏகோ அரஞ்ஞவாஸத்தா²ய, ஏகோ தோ⁴தபாத³கத்தா²யாதி உக்கம்ஸதோ த்³வே உபாஹனஸங்கா⁴டகா வட்டந்தி, ததியம் லபி⁴த்வா அஞ்ஞஸ்ஸ தா³தப்³போ³. ‘‘இமஸ்மிம் ஜிண்ணே அஞ்ஞம் குதோ லபி⁴ஸ்ஸாமீ’’தி ட²பேதும் ந வட்டதி, ஸன்னிதி⁴ ச ஹோதி, ஸல்லேக²ஞ்ச கோபேதி. ஸயனஸன்னிதி⁴ம்ஹி ஸயனந்தி மஞ்சோ. ஏகஸ்ஸ பி⁴க்கு²னோ ஏகோ ஸயனக³ப்³பே⁴, ஏகோ தி³வாட்டா²னேதி உக்கம்ஸதோ த்³வே மஞ்சா வட்டந்தி. ததோ உத்தரிம் லபி⁴த்வா அஞ்ஞஸ்ஸ பி⁴க்கு²னோ, க³ணஸ்ஸ வா தா³தப்³போ³, அதா³தும் ந வட்டதி, ஸன்னிதி⁴ சேவ ஹோதி, ஸல்லேகோ² ச குப்பதி. க³ந்த⁴ஸன்னிதி⁴ம்ஹி பி⁴க்கு²னோ கண்டு³கச்சு²ச²விதோ³ஸாதி³ஆபா³தே⁴ ஸதி க³ந்தா⁴ வட்டந்தி. க³ந்த⁴த்தி²கேன க³ந்த⁴ஞ்ச ஆஹராபேத்வா தஸ்மிம் ரோகே³ வூபஸந்தே அஞ்ஞேஸம் வா ஆபா³தி⁴கானம் தா³தப்³ப³ம், த்³வாரே பஞ்சங்கு³லிக⁴ரதூ⁴பனாதீ³ஸு வா உபனேதப்³ப³ம். ‘‘புன ரோகே³ ஸதி ப⁴விஸ்ஸதீ’’தி ட²பேதும் ந வட்டதி, க³ந்த⁴ஸன்னிதி⁴ ச ஹோதி, ஸல்லேக²ஞ்ச கோபேதி.

ஆமிஸந்தி வுத்தாவஸேஸம் த³ட்ட²ப்³ப³ம். ஸேய்யதி²த³ம் – இதே⁴கச்சோ பி⁴க்கு² ‘‘ததா²ரூபே காலே உபகாராய ப⁴விஸ்ஸந்தீ’’தி திலதண்டு³லமுக்³க³மாஸனாளிகேரலோணமச்ச²ஸப்பிதேலகுலாலபா⁴ஜனாதீ³னி ஆஹராபேத்வா ட²பேதி. ஸோ வஸ்ஸகாலே காலஸ்ஸேவ ஸாமணேரேஹி யாகு³ம் பசாபேத்வா பரிபு⁴ஞ்ஜித்வா ‘‘ஸாமணேர உத³ககத்³த³மே து³க்க²ம் கா³மம் பவிஸிதும், க³ச்ச² அஸுககுலம் க³ந்த்வா மய்ஹம் விஹாரே நிஸின்னபா⁴வம் ஆரோசேஹி, அஸுககுலதோ த³தி⁴ஆதீ³னி ஆஹரா’’தி பேஸேதி. பி⁴க்கூ²ஹி ‘‘கிம், ப⁴ந்தே, கா³மம் பவிஸிஸ்ஸாமா’’தி வுத்தேபி ‘‘து³ப்பவேஸோ, ஆவுஸோ, இதா³னி கா³மோ’’தி வத³தி. தே ‘‘ஹோது, ப⁴ந்தே, அச்ச²த² தும்ஹே, மயம் பி⁴க்க²ம் பரியேஸித்வா ஆஹரிஸ்ஸாமா’’தி க³ச்ச²ந்தி. அத² ஸாமணேரோ த³தி⁴ஆதீ³னி ஆஹரித்வா ப⁴த்தஞ்ச ப்³யஞ்ஜனஞ்ச ஸம்பாதே³த்வா உபனேதி, தம் பு⁴ஞ்ஜந்தஸ்ஸேவ உபட்டா²கா ப⁴த்தம் பஹிணந்தி, ததோபி மனாபமனாபம் பு⁴ஞ்ஜதி. அத² பி⁴க்கூ² பிண்ட³பாதம் க³ஹேத்வா ஆக³ச்ச²ந்தி, ததோபி மனாபமனாபம் பு⁴ஞ்ஜதியேவ. ஏவம் சதுமாஸம்பி வீதினாமேதி. அயம் வுச்சதி பி⁴க்கு² முண்ட³குடும்பி³கஜீவிகம் ஜீவதி, ந ஸமணஜீவிகந்தி. ஏவரூபோ ஆமிஸஸன்னிதி⁴ நாம ஹோதி. பி⁴க்கு²னோ பன வஸனட்டா²னே ஏகா தண்டு³லனாளி ஏகோ கு³ளபிண்டோ³ குடு³வமத்தம் ஸப்பீதி ஏத்தகம் நிதே⁴தும் வட்டதி அகாலே ஸம்பத்தசோரானம் அத்தா²ய. தே ஹி ஏத்தகம் ஆமிஸபடிஸந்தா²ரம் அலப⁴ந்தா ஜீவிதா வோரோபேய்யும், தஸ்மா ஸசே ஹி ஏத்தகம் நத்தி², ஆஹராபேத்வாபி ட²பேதும் வட்டதி. அபா²ஸுககாலே ச யதே³த்த² கப்பியம், தம் அத்தனாபி பரிபு⁴ஞ்ஜிதும் வட்டதி. கப்பியகுடியம் பன ப³ஹும் ட²பேந்தஸ்ஸபி ஸன்னிதி⁴ நாம நத்தி².

சதுத்த²அனாக³தப⁴யஸுத்தவண்ணனா நிட்டி²தா.

யோதா⁴ஜீவவக்³க³வண்ணனா நிட்டி²தா.