(21) 1. கிமிலவக்³கோ³

1-4. கிமிலஸுத்தாதி³வண்ணனா

201-4. பஞ்சமஸ்ஸ பட²மது³தியானி உத்தானத்தா²னேவ. ததியே அதி⁴வாஸனம் க²மனம், பரேஸம் து³க்கடம் து³ருத்தஞ்ச படிவிரோதா⁴கரணேன அத்தனோ உபரி ஆரோபேத்வா வாஸனம் அதி⁴வாஸனம், ததே³வ க²ந்தீதி அதி⁴வாஸனக்க²ந்தி. ஸுபே⁴ ரதோதி ஸூரதோ, ஸுட்டு² வா பாபதோ ஓரதோ விரதோ ஸோரதோ, தஸ்ஸ பா⁴வோ ஸோரச்சம். தேனாஹ ‘‘ஸோரச்சேனாதி ஸுசிஸீலதாயா’’தி. ஸா ஹி ஸோப⁴னகம்மரததா, ஸுட்டு² வா பாபதோ ஓரதபா⁴வோ விரததா. சதுத்தே² நத்தி² வத்தப்³ப³ம்.

கிமிலஸுத்தாதி³வண்ணனா நிட்டி²தா.

5. சேதோகி²லஸுத்தவண்ணனா

205. பஞ்சமே சேதோகி²லா நாம அத்த²தோ விசிகிச்சா² கோதோ⁴ ச. தே பன யஸ்மிம் ஸந்தானே உப்பஜ்ஜந்தி, தஸ்ஸ க²ரபா⁴வோ கக்க²ளபா⁴வோ ஹுத்வா உபதிட்ட²ந்தி, பகே³வ அத்தனா ஸம்பயுத்தசித்தஸ்ஸாதி ஆஹ ‘‘சித்தஸ்ஸ த²த்³த⁴பா⁴வா’’தி. யதா² லக்க²ணபாரிபூரியா க³ஹிதாய ஸப்³பா³ ஸத்து² ரூபகாயஸிரீ க³ஹிதா ஏவ நாம ஹோதி ஏவம் ஸப்³ப³ஞ்ஞுதாய ஸப்³ப³த⁴ம்மகாயஸிரீ க³ஹிதா ஏவ நாம ஹோதீதி தது³ப⁴யவத்து²கமேவ கங்க²ம் த³ஸ்ஸேந்தோ ‘‘ஸரீரே கங்க²மானோ’’திஆதி³மாஹ. விசினந்தோதி த⁴ம்மஸபா⁴வம் வீமம்ஸந்தோ. கிச்ச²தீதி கிலமதி. வினிச்சே²தும் ந ஸக்கோதீதி ஸன்னிட்டா²தும் ந ஸக்கோதி. ஆதபதி கிலேஸேதி ஆதப்பம், ஸம்மாவாயாமோதி ஆஹ ‘‘ஆதப்பாயாதி கிலேஸஸந்தாபனவீரியகரணத்தா²யா’’தி. புனப்புனம் யோகா³யாதி பா⁴வனம் புனப்புனம் யுஞ்ஜனாய. ஸததகிரியாயாதி பா⁴வனாய நிரந்தரப்பயோகா³ய.

படிவேத⁴த⁴ம்மே கங்க²மானோதி ஏத்த² கத²ம் லோகுத்தரத⁴ம்மே கங்கா² பவத்தீதி? ந ஆரம்மணகரணவஸேன, அனுஸ்ஸுதாகாரபரிவிதக்கலத்³தே⁴ பரிகப்பிதரூபே கங்கா² பவத்ததீதி த³ஸ்ஸேந்தோ ஆஹ ‘‘விபஸ்ஸனா…பே… வத³ந்தி, தம் அத்தி² நு கோ² நத்தீ²தி கங்க²தீ’’தி. ஸிக்கா²தி சேத்த² புப்³ப³பா⁴க³ஸிக்கா² வேதி³தப்³பா³. காமஞ்சேத்த² விஸேஸுப்பத்தியா மஹாஸாவஜ்ஜதாய சேவ ஸம்வாஸனிமித்தம் க⁴டனாஹேது அபி⁴ண்ஹுப்பத்திகதாய ச ஸப்³ரஹ்மசாரீஸூதி கோபஸ்ஸ விஸயோ விஸேஸேத்வா வுத்தோ, அஞ்ஞத்தா²பி கோபோ ந சேதோகி²லோதி ந ஸக்கா விஞ்ஞாதுந்தி கேசி. யதி³ ஏவம் விசிகிச்சா²யபி அயம் நயோ ஆபஜ்ஜதி, தஸ்மா யதா²ருதவஸேன க³ஹேதப்³ப³ம்.

சேதோகி²லஸுத்தவண்ணனா நிட்டி²தா.

6-8. வினிப³ந்த⁴ஸுத்தாதி³வண்ணனா

206-8. ச²ட்டே² பவத்திதும் அப்பதா³னவஸேன குஸலசித்தம் வினிப³ந்த⁴ந்தீதி சேதஸோவினிப³ந்தா⁴. தம் பன வினிப³ந்த⁴ந்தா முட்டி²க்³கா³ஹம் க³ண்ஹந்தா விய ஹோந்தீதி ஆஹ ‘‘சித்தம் வினிப³ந்தி⁴த்வா’’திஆதி³. காமகி³த்³தோ⁴ புக்³க³லோ வத்து²காமேபி கிலேஸகாமேபி அஸ்ஸாதே³தி அபி⁴னந்த³தீதி வுத்தம் ‘‘வத்து²காமேபி கிலேஸகாமேபீ’’தி. அத்தனோ காயேதி அத்தனோ நாமகாயே, அத்தபா⁴வே வா. ப³ஹித்³தா⁴ரூபேதி பரேஸம் காயே அனிந்த்³ரியப³த்³த⁴ரூபே ச. உத³ரம் அவதி³ஹதி உபசினோதி பூரேதீதி உத³ராவதே³ஹகம். ஸேய்யஸுக²ந்தி ஸேய்யாய ஸயனவஸேன உப்பஜ்ஜனகஸுக²ம். ஸம்பரிவத்தகந்தி ஸம்பரிவத்தித்வா. பணிதா⁴யாதி தண்ஹாவஸேனேவ பணித³ஹித்வா. இதி பஞ்சவிதோ⁴பி லோப⁴விஸேஸோ ஏவ ‘‘சேதோவினிப³ந்தோ⁴’’தி வுத்தோதி வேதி³தப்³போ³. ஸத்தமட்ட²மேஸு நத்தி² வத்தப்³ப³ம்.

வினிப³ந்த⁴ஸுத்தாதி³வண்ணனா நிட்டி²தா.

9-10. கீ³தஸ்ஸரஸுத்தாதி³வண்ணனா

209-210. நவமே ஆயதகோ நாம கீ³தஸ்ஸரோ தம் தம் வத்தம் பி⁴ந்தி³த்வா அக்க²ரானி வினாஸேத்வா பவத்தோதி ஆஹ ‘‘ஆயதகேனா’’திஆதி³. த⁴ம்மேஹி ஸுத்தவத்தம் நாம அத்தி², கா³தா²வத்தம் நாம அத்தி², தம் வினாஸேத்வா அதிதீ³க⁴ம் காதும் ந வட்டதி. த⁴ம்மஞ்ஹி பா⁴ஸந்தேன சதுரஸ்ஸேன வத்தேன பரிமண்ட³லானி பத³ப்³யஞ்ஜனானி த³ஸ்ஸேதப்³பா³னி. ‘‘அனுஜானாமி, பி⁴க்க²வே, ஸரப⁴ஞ்ஞ’’ந்தி (சூளவ. 249) ச வசனதோ ஸரேன த⁴ம்மம் ப⁴ணிதும் வட்டதி. ஸரப⁴ஞ்ஞே கிர தரங்க³வத்ததோ⁴தகவத்தபா⁴க³க்³க³ஹகவத்தாதீ³னி த்³வத்திம்ஸ வத்தானி அத்தி². தேஸு யம் இச்ச²தி, தம் காதும் லப⁴தீதி. த³ஸமே நத்தி² வத்தப்³ப³ம்.

கீ³தஸ்ஸரஸுத்தாதி³வண்ணனா நிட்டி²தா.

கிமிலவக்³க³வண்ணனா நிட்டி²தா.