(19) 4. அரஞ்ஞவக்³கோ³

1. ஆரஞ்ஞிகஸுத்தவண்ணனா

181. சதுத்த²ஸ்ஸ பட²மே அப்பீச்ச²தம்யேவ நிஸ்ஸாயாதிஆதீ³ஸு ‘‘இதி அப்பிச்சோ² ப⁴விஸ்ஸாமீ’’தி இத³ம் மே ஆரஞ்ஞிகங்க³ம் அப்பிச்ச²தாய ஸம்வத்திஸ்ஸதி, ‘‘இதி ஸந்துட்டோ² ப⁴விஸ்ஸாமீ’’தி இத³ம் மே ஆரஞ்ஞிகங்க³ம் ஸந்துட்டி²யா ஸம்வத்திஸ்ஸதி, ‘‘இதி கிலேஸே ஸல்லிகி²ஸ்ஸாமீ’’தி இத³ம் மே ஆரஞ்ஞிகங்க³ம் கிலேஸஸல்லிக²னத்தா²ய ஸம்வத்திஸ்ஸதீதி ஆரஞ்ஞிகோ ஹோதி. அக்³கோ³தி ஜேட்ட²கோ. ஸேஸானி தஸ்ஸேவ வேவசனானி.

க³வா கீ²ரந்தி கா³விதோ கீ²ரம் நாம ஹோதி, ந கா³வியா த³தி⁴. கீ²ரம்ஹா த³தீ⁴திஆதீ³ஸுபி ஏஸேவ நயோ. ஏவமேவந்தி யதா² ஏதேஸு பஞ்சஸு கோ³ரஸேஸு ஸப்பிமண்டோ³ அக்³கோ³, ஏவமேவம் இமேஸு பஞ்சஸு ஆரஞ்ஞிகேஸு யோ அயம் அப்பிச்ச²தாதீ³னி நிஸ்ஸாய ஆரஞ்ஞிகோ ஹோதி, அயம் அக்³கோ³ சேவ ஸேட்டோ² ச மோக்கோ² ச பவரோ ச. இமேஸு ஆரஞ்ஞிகேஸு ஜாதிஆரஞ்ஞிகா வேதி³தப்³பா³, ந ஆரஞ்ஞிகனாமமத்தேன ஆரஞ்ஞிகாதி வேதி³தப்³பா³. பம்ஸுகூலிகாதீ³ஸுபி ஏஸேவ நயோ.

ஆரஞ்ஞிகஸுத்தவண்ணனா நிட்டி²தா.

அரஞ்ஞவக்³க³வண்ணனா நிட்டி²தா.