(12) 2. அந்த⁴கவிந்த³வக்³கோ³

1-4. குலூபகஸுத்தாதி³வண்ணனா

111-114. து³தியஸ்ஸ பட²மே அஸந்த²வேஸு குலேஸு விஸ்ஸாஸோ ஏதஸ்ஸாதி அஸந்த²வவிஸ்ஸாஸீ. அனிஸ்ஸரோ ஹுத்வா விகப்பேதி ஸம்வித³ஹதி ஸீலேனாதி அனிஸ்ஸரவிகப்பீ. விஸ்ஸட்டா²னி விஸும் கி²த்தானி பே⁴தே³ன அவத்தி²தானி குலானி க⁴டனத்தா²ய உபஸேவதி ஸீலேனாதி விஸ்ஸட்டு²பஸேவீ. து³தியாதீ³னி உத்தானத்தா²னேவ.

குலூபகஸுத்தாதி³வண்ணனா நிட்டி²தா.

5-13. மச்ச²ரினீஸுத்தாதி³வண்ணனா

115-123. பஞ்சமே ஆவாஸமச்ச²ரியாதீ³னி பஞ்ச இத⁴ பி⁴க்கு²னியா வஸேன ஆக³தானி, பி⁴க்கு²ஸ்ஸ வஸேனபி தானி வேதி³தப்³பா³னி. ஆவாஸமச்ச²ரியேன ஹி ஸமன்னாக³தோ பி⁴க்கு² ஆக³ந்துகம் தி³ஸ்வா ‘‘ஏத்த² சேதியஸ்ஸ வா ஸங்க⁴ஸ்ஸ வா பரிக்கா²ரோ ட²பிதோ’’திஆதீ³னி வத்வா ஸங்கி⁴கஆவாஸம் ந தே³தி. குலமச்ச²ரியேன ஸமன்னாக³தோ பி⁴க்கு² தேஹி தேஹி காரணேஹி ஆதீ³னவம் த³ஸ்ஸேத்வா அத்தனோ உபட்டா²கே குலே அஞ்ஞேஸம் பவேஸம்பி நிவாரேதி. லாப⁴மச்ச²ரியேன ஸமன்னாக³தோ ஸங்கி⁴கம்பி லாப⁴ம் மச்ச²ராயந்தோ யதா² அஞ்ஞே ந லப⁴ந்தி, ஏவம் கரோதி அத்தனா விஸமனிஸ்ஸிததாய ப³லவனிஸ்ஸிததாய ச. வண்ணமச்ச²ரியேன ஸமன்னாக³தோ அத்தனோ வண்ணம் வண்ணேதி, பரேஸம் வண்ணே ‘‘கிம் வண்ணோ ஏஸோ’’தி தம் தம் தோ³ஸம் வத³தி. வண்ணோதி சேத்த² ஸரீரவண்ணோபி, கு³ணவண்ணோபி வேதி³தப்³போ³.

த⁴ம்மமச்ச²ரியேன ஸமன்னாக³தோ – ‘‘இமம் த⁴ம்மம் பரியாபுணித்வா ஏஸோ மம் அபி⁴ப⁴விஸ்ஸதீ’’தி அஞ்ஞஸ்ஸ ந தே³தி. யோ பன – ‘‘அயம் இமம் த⁴ம்மம் உக்³க³ஹேத்வா அஞ்ஞதா² அத்த²ம் விபரிவத்தேத்வா நாஸேஸ்ஸதீ’’தி த⁴ம்மனுக்³க³ஹேன வா – ‘‘அயம் இமம் த⁴ம்மம் உக்³க³ஹேத்வா உத்³த⁴தோ உன்னளோ அவூபஸந்தசித்தோ அபுஞ்ஞம் பஸவிஸ்ஸதீ’’தி புக்³க³லானுக்³க³ஹேன வா ந தே³தி, ந தம் மச்ச²ரியம். த⁴ம்மோதி சேத்த² பரியத்தித⁴ம்மோ அதி⁴ப்பேதோ. படிவேத⁴த⁴ம்மோ ஹி அரியானம்யேவ ஹோதி, தே ச நம் ந மச்ச²ராயந்தி மச்ச²ரியஸ்ஸ ஸப்³ப³ஸோ பஹீனத்தாதி தஸ்ஸ அஸம்ப⁴வோ ஏவ. தத்த² ஆவாஸமச்ச²ரியேன லோஹகே³ஹே பச்சதி, யக்கோ² வா பேதோ வா ஹுத்வா தஸ்ஸேவ ஆவாஸஸ்ஸ ஸங்காரம் ஸீஸேன உக்கி²பித்வா சரதி. குலமச்ச²ரியேன அப்பபோ⁴கோ³ ஹோதி. லாப⁴மச்ச²ரியேன கூ³த²னிரயே நிப்³ப³த்ததி, ஸங்க⁴ஸ்ஸ வா க³ணஸ்ஸ வா லாப⁴ம் மச்ச²ராயித்வா புக்³க³லிகபரிபோ⁴கே³ன வா பரிபு⁴ஞ்ஜித்வா யக்கோ² வா பேதோ வா மஹாஅஜக³ரோ வா ஹுத்வா நிப்³ப³த்ததி. வண்ணமச்ச²ரியேன ப⁴வேஸு நிப்³ப³த்தஸ்ஸ வண்ணோ நாம ந ஹோதி. த⁴ம்மமச்ச²ரியேன குக்குளனிரயே நிப்³ப³த்ததி. ச²ட்டா²தீ³னி உத்தானத்தா²னேவ.

மச்ச²ரினீஸுத்தாதி³வண்ணனா நிட்டி²தா.

அந்த⁴கவிந்த³வக்³க³வண்ணனா நிட்டி²தா.