1-4. ஸாரஜ்ஜஸுத்தாதி³வண்ணனா

101-4. ததியஸ்ஸ பட²மே நத்தி² வத்தப்³ப³ம். து³தியே பிண்ட³பாதாதி³அத்தா²ய உபஸங்கமிதும் யுத்தட்டா²னம் கோ³சரோ, வேஸியா கோ³சரோ அஸ்ஸாதி வேஸியாகோ³சரோ, மித்தஸந்த²வவஸேன உபஸங்கமிதப்³ப³ட்டா²னந்தி அத்தோ². வேஸியா நாம ரூபூபஜீவினியோ, தா மித்தஸந்த²வவஸேன ந உபஸங்கமிதப்³பா³ ஸமணபா⁴வஸ்ஸ அந்தராயகரத்தா, பரிஸுத்³தா⁴ஸயஸ்ஸபி க³ரஹாஹேதுதோ, தஸ்மா த³க்கி²ணாதா³னவஸேன ஸதிம் உபட்ட²பேத்வா உபஸங்கமிதப்³ப³ம். வித⁴வா வுச்சந்தி மதபதிகா, பவுத்த²பதிகா வா. து²ல்லகுமாரியோதி மஹல்லிகா அனிவித்³தா⁴ குமாரியோ. பண்ட³காதி நபும்ஸகா. தே ஹி உஸ்ஸன்னகிலேஸா அவூபஸந்தபரிளாஹா லோகாமிஸனிஸ்ஸிதகதா²ப³ஹுலா, தஸ்மா ந உபஸங்கமிதப்³பா³. பி⁴க்கு²னியோ நாம உஸ்ஸன்னப்³ரஹ்மசரியா. ததா² பி⁴க்கூ²பி. அஞ்ஞமஞ்ஞம் விஸபா⁴க³வத்து²பா⁴வதோ ஸந்த²வவஸேன உபஸங்கமனே கதிபாஹேனேவ ப்³ரஹ்மசரியந்தராயோ ஸியா, தஸ்மா ந உபஸங்கமிதப்³பா³, கி³லானபுச்ச²னாதி³வஸேன உபஸங்கமனே ஸதோகாரினா ப⁴விதப்³ப³ம். ததியசதுத்தா²னி உத்தானத்தா²னேவ.

ஸாரஜ்ஜஸுத்தாதி³வண்ணனா நிட்டி²தா.