10. து³தியஸேக²ஸுத்தவண்ணனா

90. த³ஸமே அதிபாதோவாதி ஸப்³ப³ரத்திம் நித்³தா³யித்வா ப³லவபச்சூஸே கோடிஸம்முஞ்ஜனியா தோ²கம் ஸம்மஜ்ஜித்வா முக²ம் தோ⁴வித்வா யாகு³பி⁴க்க²த்தா²ய பாதோவ பவிஸதி. தம் அதிக்கமித்வாதி கி³ஹிஸம்ஸக்³க³வஸேன காலம் வீதினாமேந்தோ மஜ்ஜ²ன்ஹிகஸமயம் அதிக்கமித்வா பக்கமதி. பாதோயேவ ஹி கா³மம் பவிஸித்வா யாகு³ம் ஆதா³ய ஆஸனஸாலம் க³ந்த்வா பிவித்வா ஏகஸ்மிம் டா²னே நிபன்னோ நித்³தா³யித்வா மனுஸ்ஸானம் போ⁴ஜனவேலாய ‘‘பணீதபி⁴க்க²ம் லபி⁴ஸ்ஸாமீ’’தி உபகட்டே² மஜ்ஜ²ன்ஹிகே உட்டா²ய த⁴ம்மகரணேன உத³கம் க³ஹேத்வா அக்கீ²னி புஞ்சி²த்வா பிண்டா³ய சரித்வா யாவத³த்த²ம் பு⁴ஞ்ஜித்வா கி³ஹிஸம்ஸட்டோ² காலம் வீதினாமேத்வா மஜ்ஜ²ன்ஹே வீதிவத்தே படிக்கமதி.

அப்பிச்ச²கதா²தி, ‘‘ஆவுஸோ, அத்ரிச்ச²தா பாபிச்ச²தாதி இமே த⁴ம்மா பஹாதப்³பா³’’தி தேஸு ஆதீ³னவம் த³ஸ்ஸேத்வா ‘‘ஏவரூபம் அப்பிச்ச²தம் ஸமாதா³ய வத்திதப்³ப³’’ந்திஆதி³னயப்பவத்தா கதா². தீஹி விவேகேஹீதி காயவிவேகோ, சித்தவிவேகோ, உபதி⁴விவேகோதி இமேஹி தீஹி விவேகேஹி. தத்த² ஏகோ க³ச்ச²தி, ஏகோ திட்ட²தி, ஏகோ நிஸீத³தி, ஏகோ ஸேய்யம் கப்பேதி, ஏகோ கா³மம் பிண்டா³ய பவிஸதி, ஏகோ படிக்கமதி, ஏகோ சங்கமம் அதி⁴ட்டா²தி, ஏகோ சரதி, ஏகோ விஹரதீதி அயம் காயவிவேகோ நாம. அட்ட² ஸமாபத்தியோ பன சித்தவிவேகோ நாம. நிப்³பா³னம் உபதி⁴விவேகோ நாம. வுத்தம்பி ஹேதம் – ‘‘காயவிவேகோ ச விவேகட்ட²காயானம் நேக்க²ம்மாபி⁴ரதானம், சித்தவிவேகோ ச பரிஸுத்³த⁴சித்தானம் பரமவோதா³னப்பத்தானம், உபதி⁴விவேகோ ச நிருபதீ⁴னம் புக்³க³லானம் விஸங்கா²ரக³தான’’ந்தி (மஹானி. 57). து³வித⁴ம் வீரியந்தி காயிகம், சேதஸிகஞ்ச வீரியம். ஸீலந்தி சதுபாரிஸுத்³தி⁴ஸீலம். ஸமாதி⁴ந்தி விபஸ்ஸனாபாத³கா அட்ட² ஸமாபத்தியோ. விமுத்திகதா²தி வா அரியப²லம் ஆரப்³ப⁴ பவத்தா கதா². ஸேஸம் உத்தானமேவ.

து³தியஸேக²ஸுத்தவண்ணனா நிட்டி²தா.

தே²ரவக்³க³வண்ணனா நிட்டி²தா.