4-7. ஸேய்யாஸுத்தாதி³வண்ணனா

246-9. சதுத்தே² பேதாதி பேச்சபா⁴வம் க³தா. தே பன யஸ்மா இத⁴ கதகாலகிரியா காலேன கதஜீவிதுச்சே²தா³ ஹோந்தி, தஸ்மா வுத்தம் ‘‘காலகதா வுச்சந்தீ’’தி, மதாதி அத்தோ². அத² வா பேச்சப⁴வம் க³தா, பேதூபபத்திவஸேன நிப்³ப³த்திம் உபக³தாதி அத்தோ². தேனாஹ ‘‘அத² வா பேதவிஸயே நிப்³ப³த்தா பேதா நாமா’’தி. ஏகேன பஸ்ஸேன ஸயிதும் ந ஸக்கோந்தி து³க்கு²ப்பத்திதோ.

தேஜுஸ்ஸத³த்தாதி இமினா ஸீஹஸ்ஸ அபீ⁴ருகபா⁴வம் த³ஸ்ஸேதி. பீ⁴ருகா ஸேஸமிகா³ அத்தனோ ஆஸயம் பவிஸித்வா ஸந்தாஸபுப்³ப³கம் யதா² ததா² ஸயந்தி, ஸீஹோ பன அபீ⁴ருகோ ஸபா⁴வதோ ஸதோகாரீ பி⁴க்கு² விய ஸதிம் உபட்ட²பேத்வாவ ஸயதி. தேனாஹ ‘‘த்³வே புரிமபாதே³’’திஆதி³. த³க்கி²ணே புரிமபாதே³ வாமஸ்ஸ புரிமபாத³ஸ்ஸ ட²பனவஸேன த்³வே புரிமபாதே³ ஏகஸ்மிம் டா²னே ட²பேத்வா. பச்சி²மபாதே³ வுத்தனயேனேவ இதா⁴பி ஏகஸ்மிம் டா²னே ட²பனம் வேதி³தப்³ப³ம், டி²தோகாஸஸல்லக்க²ணம் அபீ⁴ருகவஸேனேவ. ஸீஸம் பன உக்கி²பித்வாதிஆதி³னா வுத்தஸீஹகிரியா அனுத்ரஸ்தப்பபு³ஜ்ஜ²னா விய அபீ⁴ருபா⁴வஸித்³த⁴த⁴ம்மதாவஸேனேவாதி வேதி³தப்³பா³. ஸீஹவிஜம்ப⁴னம் அதிவேலம் ஏகாகாரே ட²பிதானம் ஸரீராவயவானம் க³மனாதி³கிரியாஸு யோக்³யபா⁴வாபாத³னத்த²ம். திக்க²த்தும் ஸீஹனாத³னத³னம் அப்பேஸக்க²மிக³ராஜேஹி பரித்தாஸபரிஹரணத்த²ம்.

அயம் வுச்சதி, பி⁴க்க²வே, ததா²க³தஸேய்யாதி இமினா சதுத்த²ஜ்ஜா²னஸேய்யா ததா²க³தஸேய்யா நாமாதி த³ஸ்ஸேதி. ஸேதி அப்³யாவடபா⁴வேன பவத்ததி ஏத்தா²தி ஸேய்யா, சதுத்த²ஜ்ஜா²னமேவ ஸேய்யா சதுத்த²ஜ்ஜா²னஸேய்யா. கிம் பன தம் சதுத்த²ஜ்ஜா²னந்தி? ஆனாபானசதுத்த²ஜ்ஜா²னம். தத்த² ஹி ட²த்வா விபஸ்ஸனம் வட்³டே⁴த்வா ப⁴க³வா அனுக்கமேன அக்³க³மக்³க³ம் அதி⁴க³ந்த்வா ததா²க³தோ ஜாதோதி. தயித³ம் பத³ட்டா²னம் நாம ந ஸேய்யா, ததா²பி யஸ்மா ‘‘சதுத்த²ஜ்ஜா²னஸமனந்தரா ப⁴க³வா பரினிப்³பா³யீ’’தி மஹாபரினிப்³பா³னே (தீ³. நி. 2.219) ஆக³தம், தஸ்மா லோகியசதுத்த²ஜ்ஜா²னஸமாபத்தி ஏவ ததா²க³தஸேய்யாதி கேசி. ஏவம் ஸதி பரினிப்³பா³னகாலிகாவ ததா²க³தஸேய்யா ஆபஜ்ஜதி, ந ச ப⁴க³வா லோகியசதுத்த²ஜ்ஜா²னஸமாபஜ்ஜனப³ஹுலோ விஹாஸி. அக்³க³ப²லவஸேன பவத்தம் பனேத்த² சதுத்த²ஜ்ஜா²னம் வேதி³தப்³ப³ம். தத்த² யதா² ஸத்தானம் நித்³தூ³பக³மலக்க²ணா ஸேய்யா ப⁴வங்க³சித்தவஸேன ஹோதி, ஸா பன நேஸம் பட²மஜாதிஸமன்வயா யேபு⁴ய்யவுத்திகா, ஏவம் ப⁴க³வதோ அரியஜாதிஸமன்வயம் யேபு⁴ய்யவுத்திகம் அக்³க³ப²லபூ⁴தம் சதுத்த²ஜ்ஜா²னம் ததா²க³தஸேய்யாதி வேதி³தப்³ப³ம். பஞ்சமாதீ³னி உத்தானத்தா²னி.

ஸேய்யாஸுத்தாதி³வண்ணனா நிட்டி²தா.