10-11. ஸமணஸுத்தாதி³வண்ணனா

241-2. த³ஸமே ஸேஸபதே³ஸுபீதி ‘‘இத⁴ து³தியோ ஸமணோ’’திஆதீ³ஸு ஸேஸபதே³ஸுபி. யதா² ஹி ‘‘விவிச்சேவ காமேஹீ’’தி (தீ³. நி. 1.226; ம. நி. 1.271, 287, 297; ஸம். நி. 2.152; அ. நி. 4.123) ஏத்த² கதோ நியமோ ‘‘விவிச்ச அகுஸலேஹீ’’தி ஏத்தா²பி கதோயேவ ஹோதி ஸாவதா⁴ரணஅத்த²ஸ்ஸ இச்சி²தப்³ப³த்தா, ஏவமிதா⁴பீதி. தேனாஹ ‘‘து³தியாத³யோபி ஹீ’’திஆதி³. ஸாமஞ்ஞப²லாதி⁴க³மவஸேன நிப்பரியாயதோ ஸமணபா⁴வோதி தேஸம் வஸேனேத்த² சத்தாரோ ஸமணா தே³ஸிதா. இமஸ்மிஞ்ஹி டா²னே சத்தாரோ ப²லட்ட²கஸமணாவ அதி⁴ப்பேதா ஸமிதபாபஸமணக்³க³ஹணதோ. கஸ்மா பனேத்த² மஹாபரினிப்³பா³னே விய மக்³க³ட்டா² தத³த்தா²ய படிபன்னாபி ந க³ஹிதாதி? வேனேய்யஜ்ஜா²ஸயதோ. தத்த² ஹி மக்³கா³தி⁴க³மத்தா²ய விபஸ்ஸனாபி இதோ ப³ஹித்³தா⁴ நத்தி², குதோ மக்³க³ப²லானீதி த³ஸ்ஸேந்தேன ப⁴க³வதா ‘‘ஞாயஸ்ஸ த⁴ம்மஸ்ஸ பதே³ஸவத்தீ, இதோ ப³ஹித்³தா⁴ ஸமணோபி நத்தீ²’’தி (தீ³. நி. 2.214) வுத்தம். இத⁴ பன நிட்டா²னப்பத்தமேவ தம்தம்ஸமணபா⁴வம் க³ண்ஹந்தேன ப²லட்ட²கஸமணாவ க³ஹிதா, மக்³க³ட்ட²தோ ப²லட்டோ² ஸவிஸேஸம் த³க்கி²ணேய்யோதி. ஸ்வாயமத்தோ² த்³வீஸு ஸுத்தேஸு தே³ஸனாபே⁴தே³னேவ விஞ்ஞாயதீதி. ரித்தாதி விவித்தா. துச்சா²தி நிஸ்ஸாரா படிபன்னகஸாராபா⁴வதோ.

பவத³ந்தி ஏதேஹீதி பவாதா³. தி³ட்டி²க³திகானம் நானாதி³ட்டி²தீ³பகஸமயாதி ஆஹ ‘‘சத்தாரோ ஸஸ்ஸதவாதா³’’திஆதி³. தத்த² சத்தாரோ ஸஸ்ஸதவாதா³தி லாபி⁴வஸேன தயோ, தக்கிவஸேன ஏகோதி ஏவம் சத்தாரோ ஸஸ்ஸதவாதா³. புப்³பே³னிவாஸஞாணலாபீ⁴ தித்தி²யோ மந்த³பஞ்ஞோ அனேகஜாதிஸதஸஹஸ்ஸமத்தம் அனுஸ்ஸரதி, மஜ்ஜ²பஞ்ஞோ த³ஸ ஸம்வட்டவிவட்டகப்பானி, திக்க²பஞ்ஞோ சத்தாலீஸ ஸம்வட்டவிவட்டகப்பானி, ந ததோ பரம். ஸோ ஏவம் அனுஸ்ஸரந்தோ ‘‘ஸஸ்ஸதோ அத்தா ச லோகோ சா’’தி அபி⁴வத³தி, தக்கீ பன தக்கபரியாஹதம் வீமம்ஸானுசரிதம் ஸயம்படிபா⁴னம் ‘‘ஸஸ்ஸதோ அத்தா ச லோகோ சா’’தி அபி⁴வத³தி. தேன வுத்தம் ‘‘லாபி⁴வஸேன தயோ, தக்கிவஸேன ஏகோதி ஏவம் சத்தாரோ ஸஸ்ஸதவாதா³’’தி.

ஸத்தேஸு ஸங்கா²ரேஸு ச ஏகச்சம் ஸஸ்ஸதந்தி பவத்தோ வாதோ³ ஏகச்சஸஸ்ஸதவாதோ³. ஸோ பன ப்³ரஹ்மகாயிககி²ட்³டா³பதோ³ஸிகமனோபதோ³ஸிகத்தபா⁴வதோ சவித்வா இதா⁴க³தானம் தக்கினோ ச உப்பஜ்ஜனவஸேன சதுப்³பி³தோ⁴தி ஆஹ ‘‘சத்தாரோ ஏகச்சஸஸ்ஸதவாதா³’’தி.

சத்தாரோ அந்தானந்திகாதி ஏத்த² அமதி க³ச்ச²தி ஏத்த² வோஸானந்தி அந்தோ, மரியாதா³. தப்படிஸேதே⁴ன அனந்தோ. அந்தோ ச அனந்தோ ச அந்தானந்தோ ஸாமஞ்ஞனித்³தே³ஸேன, ஏகஸேஸேன வா ‘‘நாமரூபபச்சயா ஸளாயதன’’ந்திஆதீ³ஸு (ம. நி. 3.126; உதா³. 1) விய. அந்தானந்தஸஹசரிதோ வாதோ³ அந்தானந்தோ யதா² ‘‘குந்தா சரந்தீ’’தி. அந்தானந்தஸன்னிஸ்ஸயோ வா யதா² ‘‘மஞ்சா கோ⁴ஸந்தீ’’தி. ஸோ ஏதேஸம் அத்தீ²தி அந்தானந்திகா. ‘‘அந்தவா அத்தா ச லோகோ ச, அனந்தவா அத்தா ச லோகோ ச, அந்தவா ச அனந்தவா ச அத்தா ச லோகோ ச, நேவந்தவா நானந்தவா’’தி ஏவம் பவத்தவாதா³ சத்தாரோ. அவட்³டி⁴தகஸிணஸ்ஸ தம் கஸிணம் அத்தாதி ச லோகோதி ச க³ண்ஹந்தஸ்ஸ வஸேன பட²மோ வுத்தோ, து³தியோ வட்³டி⁴தகஸிணஸ்ஸ வஸேன வுத்தோ, ததியோ திரியம் வட்³டே⁴த்வா உத்³த⁴மதோ⁴ அவட்³டி⁴தகஸிணஸ்ஸ, சதுத்தோ² தக்கிவஸேன வுத்தோ. ஏத்த² ச யுத்தம் தாவ புரிமானம் திண்ணம் வாதா³னம் அந்தஞ்ச அனந்தஞ்ச அந்தானந்தஞ்ச ஆரப்³ப⁴ பவத்தவாத³த்தா அந்தானந்திகத்தம், பச்சி²மஸ்ஸ பன தது³ப⁴யனிஸேத⁴னவஸேன பவத்தவாத³த்தா கத²மந்தானந்திகத்தந்தி? தது³ப⁴யப்படிஸேத⁴னவஸேன பவத்தவாத³த்தா ஏவ. அந்தானந்திகப்படிஸேத⁴வாதோ³பி ஹி அந்தானந்தவிஸயோ ஏவ தம் ஆரப்³ப⁴ பவத்தத்தா.

ந மரதீதி அமரா. கா ஸா? ‘‘ஏவந்திபி மே நோ’’திஆதி³னா (தீ³. நி. 1.62) நயேன பரியந்தரஹிதா தி³ட்டி²க³திகஸ்ஸ தி³ட்டி² சேவ வாசா ச. விவிதோ⁴ கே²போதி விக்கே²போ, அமராய தி³ட்டி²யா, வாசாய வா விக்கே²போதி அமராவிக்கே²போ, ஸோ ஏதஸ்ஸ அத்தீ²தி அமராவிக்கே²பிகோ. அத² வா அமரா நாம மச்ச²ஜாதி, ஸா உம்முஜ்ஜனாதி³வஸேன உத³கே ஸந்தா⁴வமானா கா³ஹம் ந க³ச்ச²தி, ஏவமேவம் அயம்பி வாதோ³ இதோ சிதோ ச ஸந்தா⁴வதி, கா³ஹம் ந உபக³ச்ச²தீதி அமராவிக்கே²போதி வுச்சதி, ஸோ ஏதேஸம் அத்தீ²தி அமராவிக்கே²பிகா. ஸ்வாயம் வாதோ³ முஸாவாதா³னுயோக³ச²ந்த³ராக³ப⁴யமோஹபா⁴வஹேதுகதாய சதுதா⁴ பவத்தோதி ஆஹ ‘‘சத்தாரோ அமராவிக்கே²பிகா’’தி.

அதி⁴ச்ச யதி²ச்ச²கம் யம் கிஞ்சி காரணம் கஸ்ஸசி பு³த்³தி⁴புப்³ப³ம் வா வினா ஸமுப்பன்னோதி அத்தலோகஸஞ்ஞிதானம் க²ந்தா⁴னம் அதி⁴ச்ச பவத்திஆகாராரம்மணம் த³ஸ்ஸனம் ததா³காரஸன்னிஸ்ஸயேன பவத்திதோ ததா³காரஸஹசரிததாய ச ‘‘அதி⁴ச்சஸமுப்பன்ன’’ந்தி வுச்சதி யதா² ‘‘மஞ்சா கோ⁴ஸந்தி’’, ‘‘குந்தா சரந்தீ’’தி ச. தம் ஏதேஸம் அத்தீ²தி அதி⁴ச்சஸமுப்பன்னிகா. லாபி⁴வஸேன தக்கிவஸேன ச ‘‘த்³வே அதி⁴ச்சஸமுப்பன்னிகா’’தி வுத்தம்.

ஸஞ்ஞீதி பவத்தோ வாதோ³ ஸஞ்ஞிவாதோ³, ஸோ ஏதேஸம் அத்தீ²தி ஸஞ்ஞிவாதா³. ரூபிசதுக்கம் ஏகந்தஸுக²சதுக்கந்தி இமேஸம் சதுன்னம் சதுக்கானம் வஸேன ஸோளஸ ஸஞ்ஞிவாதா³. இமேஸுயேவ புரிமானம் த்³வின்னம் சதுக்கானம் வஸேன அட்ட² ஸஞ்ஞிவாதா³, அட்ட² நேவஸஞ்ஞினாஸஞ்ஞிவாதா³ வேதி³தப்³பா³. கேவலஞ்ஹி தத்த² ‘‘ஸஞ்ஞீ அத்தா’’தி க³ண்ஹந்தானம் தா தி³ட்டி²யோ, இத⁴ அஸஞ்ஞீதி ச நேவஸஞ்ஞீனாஸஞ்ஞீதி ச.

ஸத்த உச்சே²த³வாதா³தி மனுஸ்ஸத்தபா⁴வே காமாவசரதே³வத்தபா⁴வே ரூபாவசரத்தபா⁴வே சதுப்³பி³தா⁴ரூபத்தபா⁴வே ச ட²த்வா ஸத்தஸ்ஸ உச்சே²த³பஞ்ஞாபனவஸேன ஸத்த உச்சே²த³வாதா³.

பஞ்ச தி³ட்ட²த⁴ம்மனிப்³பா³னவாதா³தி பஞ்சகாமகு³ணஉபபோ⁴க³வஸேன சதுப்³பி³த⁴ரூபஜ்ஜா²னஸுக²பரிபோ⁴க³வஸேன ச தி³ட்ட²த⁴ம்மே நிப்³பூ³திபஞ்ஞாபனவாதா³. தி³ட்ட²த⁴ம்மோதி பச்சக்க²த⁴ம்மோ வுச்சதி, தத்த² தத்த² படிலத்³த⁴த்தபா⁴வஸ்ஸேதம் அதி⁴வசனம். தி³ட்ட²த⁴ம்மே நிப்³பா³னம் தி³ட்ட²த⁴ம்மனிப்³பா³னம், இமஸ்மிம்யேவ அத்தபா⁴வே து³க்க²வூபஸமந்தி அத்தோ². தம் வத³ந்தீதி தி³ட்ட²த⁴ம்மனிப்³பா³னவாதா³.

ஞாயதி கமதி படிவிஜ்ஜ²தீதி ஞாயோ, ஸோ ஏவ நிப்³பா³னஸம்பாபகஹேதுதாய த⁴ம்மோதி ஆஹ ‘‘ஞாயஸ்ஸ த⁴ம்மஸ்ஸா’’தி. இதோ ப³ஹித்³தா⁴ ஸமணோபி நத்தீ²திஆதீ³ஸு கஸ்மா பனேதே அஞ்ஞத்த² நத்தீ²தி? அக்கே²த்ததாய. யதா² ஹி ந ஆரக்³கே³ ஸாஸபோ திட்ட²தி, ந உத³கபிட்டே² அக்³கி³ ஜலதி, ந பிட்டி²பாஸாணே பீ³ஜானி விருஹந்தி, ஏவமேவம் பா³ஹிரேஸு தித்தா²யதனேஸு ந இமே ஸமணா உப்பஜ்ஜந்தி, இமஸ்மிம்யேவ ஸாஸனே உப்பஜ்ஜந்தி. கஸ்மா? ஸுக்கே²த்ததாய. ஸா பன நேஸம் அக்கே²த்ததா ஸுக்கே²த்ததா ச அரியமக்³க³ஸ்ஸ அபா⁴வதோ பா⁴வதோ ச வேதி³தப்³பா³. தேனாஹ ப⁴க³வா –

‘‘யஸ்மிம் கோ², ஸுப⁴த்³த³, த⁴ம்மவினயே அரியோ அட்ட²ங்கி³கோ மக்³கோ³ ந உபலப்³ப⁴தி, ஸமணோபி தத்த² ந உபலப்³ப⁴தி, து³தியோபி தத்த² ஸமணோ ந உபலப்³ப⁴தி, ததியோபி தத்த² ஸமணோ ந உபலப்³ப⁴தி, சதுத்தோ²பி தத்த² ஸமணோ ந உபலப்³ப⁴தி. யஸ்மிஞ்ச கோ², ஸுப⁴த்³த³, த⁴ம்மவினயே அரியோ அட்ட²ங்கி³கோ மக்³கோ³ உபலப்³ப⁴தி, ஸமணோபி தத்த² உபலப்³ப⁴தி, து³தியோபி தத்த²… ததியோபி தத்த²… சதுத்தோ²பி தத்த² ஸமணோ உபலப்³ப⁴தி. இமஸ்மிம் கோ², ஸுப⁴த்³த³, த⁴ம்மவினயே அரியோ அட்ட²ங்கி³கோ மக்³கோ³ உபலப்³ப⁴தி. இதே⁴வ, ஸுப⁴த்³த³, ஸமணோ, இத⁴ து³தியோ ஸமணோ, இத⁴ ததியோ ஸமணோ, இத⁴ சதுத்தோ² ஸமணோ, ஸுஞ்ஞா பரப்பவாதா³ ஸமணேபி⁴ அஞ்ஞேஹீ’’தி (தீ³. நி. 2.214).

அரியமக்³க³ஸ்ஸ ச அபா⁴வோ பா⁴வோ ச ஸுபரிஸுத்³த⁴ஸ்ஸ ஸீலஸ்ஸ ஸுபரிஸுத்³தா⁴ய ஸமத²விபஸ்ஸனாபா⁴வனாய அபா⁴வதோ பா⁴வதோ ச வேதி³தப்³போ³. தது³ப⁴யஞ்ச து³ரக்கா²தஸ்வாக்கா²தபா⁴வஹேதுகம். ஸோ ச அஸம்மாஸம்பு³த்³த⁴ப்பவேதி³தத்தா. யஸ்மா தித்தா²யதனம் அக்கே²த்தம், ஸாஸனம் கே²த்தம், தஸ்மா யதா² ஸுரத்தஹத்த²பாதோ³ பா⁴ஸுரகேஸரபா⁴ரோ ஸீஹோ மிக³ராஜா ந ஸுஸானே வா ஸங்காரகூடே வா படிவஸதி, தியோஜனஸஹஸ்ஸவித்த²தம் பன ஹிமவந்தம் அஜ்ஜோ²கா³ஹேத்வா மணிகு³ஹாயமேவ வஸதி, யதா² ச ச²த்³த³ந்தோ நாக³ராஜா ந கோ³சரியஹத்தி²குலாதீ³ஸு நவஸு குலேஸு உப்பஜ்ஜதி, யதா² ச வலாஹகோ அஸ்ஸராஜா ந க³த்³ரப⁴குலே வா கோ⁴டககுலே வா உப்பஜ்ஜதி, ஸிந்து⁴தீரே பன ஸிந்த⁴வகுலேயேவ உப்பஜ்ஜதி, யதா² ச ஸப்³ப³காமத³த³ம் மனோஹரம் மணிரதனம் ந ஸங்காரகூடே வா பம்ஸுபப்³ப³தாதீ³ஸு வா உப்பஜ்ஜதி, விபுலபப்³ப³தப்³ப⁴ந்தரேயேவ உப்பஜ்ஜதி, யதா² ச திமிரபிங்க³லோ மச்ச²ராஜா ந கு²த்³த³கபோக்க²ரணீஸு உப்பஜ்ஜதி, சதுராஸீதியோஜனஸஹஸ்ஸக³ம்பீ⁴ரே மஹாஸமுத்³தே³யேவ உப்பஜ்ஜதி, யதா² ச தி³யட்³ட⁴யோஜனஸதிகோ ஸுபண்ணராஜா ந கா³மத்³வாரே ஏரண்ட³வனாதீ³ஸு படிவஸதி, மஹாஸமுத்³த³ம் பன அஜ்ஜோ²கா³ஹேத்வா ஸிம்ப³லித³ஹவனேயேவ படிவஸதி, யதா² ச த⁴தரட்டோ² ஸுவண்ணஹம்ஸோ ந கா³மத்³வாரே ஆவாடகாதீ³ஸு படிவஸதி, நவுதிஹம்ஸஸஹஸ்ஸபரிவாரோ பன ஹுத்வா சித்தகூடேயேவ படிவஸதி, யதா² ச சதுத்³தீ³பிஸ்ஸரோ சக்கவத்திராஜா ந நீசகுலே உப்பஜ்ஜதி, அஸம்பி⁴ன்னஜாதியக²த்தியகுலேயேவ பன உப்பஜ்ஜதி, ஏவமேவம் இமேஸு ஸமணேஸு ஏகஸமணோபி ந அஞ்ஞத்த² தித்தா²யதனே உப்பஜ்ஜதி, அரியமக்³க³பரிக்க²தே பன பு³த்³த⁴ஸாஸனேயேவ உப்பஜ்ஜதி. தேனாஹ ப⁴க³வா – ‘‘இதே⁴வ, பி⁴க்க²வே, ஸமணோ…பே… ஸுஞ்ஞா பரப்பவாதா³ ஸமணேபி⁴ அஞ்ஞேஹீ’’தி (ம. நி. 1.139-140; அ. நி. 4.241). ஏகாத³ஸமே நத்தி² வத்தப்³ப³ம்.

ஸமணஸுத்தாதி³வண்ணனா நிட்டி²தா.

கம்மவக்³க³வண்ணனா நிட்டி²தா.