1. ஸம்கி²த்தஸுத்தவண்ணனா

232. சதுத்த²ஸ்ஸ பட²மே காளகந்தி மலீனம், சித்தஸ்ஸ அப்பப⁴ஸ்ஸரபா⁴வகரந்தி அத்தோ². தம் பனேத்த² கம்மபத²ப்பத்தமேவ அதி⁴ப்பேதந்தி ஆஹ ‘‘த³ஸஅகுஸலகம்மபத²’’ந்தி. கண்ஹாபி⁴ஜாதிஹேதுதோ வா கண்ஹம். தேனாஹ ‘‘கண்ஹவிபாக’’ந்தி. அபாயூபபத்தி மனுஸ்ஸேஸு ச தோ³ப⁴க்³கி³யம் கண்ஹவிபாகோ, யம் தஸ்ஸ தமபா⁴வோ வுத்தோ. நிப்³ப³த்தனதோதி நிப்³ப³த்தாபனதோ. பண்ட³ரகந்தி ஓதா³தம், சித்தஸ்ஸ பப⁴ஸ்ஸரபா⁴வகரந்தி அத்தோ². ஸுக்காபி⁴ஜாதிஹேதுதோ வா ஸுக்கம். தேனாஹ ‘‘ஸுக்கவிபாக’’ந்தி. ஸக்³கூ³பபத்தி மனுஸ்ஸஸோப⁴க்³கி³யஞ்ச ஸுக்கவிபாகோ, யம் தஸ்ஸ ஜோதிபா⁴வோ வுத்தோ. உக்கட்ட²னித்³தே³ஸேன பன ‘‘ஸக்³கே³ நிப்³ப³த்தனதோ’’தி வுத்தம், நிப்³ப³த்தாபனதோதி அத்தோ². மிஸ்ஸககம்மந்தி காலேன கண்ஹம் காலேன ஸுக்கந்தி ஏவம் மிஸ்ஸகவஸேன கதகம்மம். ஸுக²து³க்க²விபாகந்தி வத்வா தத்த² ஸுக²து³க்கா²னம் பவத்திஆகாரம் த³ஸ்ஸேதும் ‘‘மிஸ்ஸககம்மம் ஹீ’’திஆதி³ வுத்தம். கம்மஸ்ஸ கண்ஹஸுக்கஸமஞ்ஞா கண்ஹஸுக்காபி⁴ஜாதிஹேதுதாயாதி அபசயகா³மிதாய தது³ப⁴யவித்³த⁴ம்ஸகஸ்ஸ கம்மக்க²யகரகம்மஸ்ஸ இத⁴ ஸுக்கபரியாயோபி இச்சி²தோதி ஆஹ ‘‘உப⁴ய…பே… அயமேத்த² அத்தோ²’’தி. தத்த² உப⁴யவிபாகஸ்ஸாதி யதா²தி⁴க³தஸ்ஸ உப⁴யவிபாகஸ்ஸ. ஸம்பத்திப⁴வபரியாபன்னோ ஹி விபாகோ இத⁴ ஸுக்கம் ஸுக்கவிபாகோதி அதி⁴ப்பேதோ, ந அச்சந்தபரிஸுத்³தோ⁴ அரியப²லவிபாகோ.

ஸம்கி²த்தஸுத்தவண்ணனா நிட்டி²தா.