1. ஸம்கி²த்தஸுத்தவண்ணனா

161. து³தியஸ்ஸ பட²மே து³க்கா²படிபதா³ த³ந்தா⁴பி⁴ஞ்ஞாதிஆதீ³ஸு பாளியா ஆக³தனயேன அத்தோ² வேதி³தப்³போ³. ததா² ஹி –

‘‘தத்த² கதமா து³க்க²படிபதா³ த³ந்தா⁴பி⁴ஞ்ஞா பஞ்ஞா? கிச்சே²ன கஸிரேன ஸமாதி⁴ம் உப்பாதே³ந்தஸ்ஸ த³ந்த⁴ம் தம் டா²னம் அபி⁴ஜானந்தஸ்ஸ யா உப்பஜ்ஜதி பஞ்ஞா பஜானனா…பே… அமோஹோ த⁴ம்மவிசயோ ஸம்மாதி³ட்டி², அயம் வுச்சதி து³க்க²படிபதா³ த³ந்தா⁴பி⁴ஞ்ஞா பஞ்ஞா. தத்த² கதமா து³க்க²படிபதா³ கி²ப்பாபி⁴ஞ்ஞா பஞ்ஞா? கிச்சே²ன கஸிரேன ஸமாதி⁴ம் உப்பாதே³ந்தஸ்ஸ கி²ப்பம் தம் டா²னம் அபி⁴ஜானந்தஸ்ஸ யா உப்பஜ்ஜதி பஞ்ஞா பஜானனா…பே… ஸம்மாதி³ட்டி², அயம் வுச்சதி து³க்க²படிபதா³ கி²ப்பாபி⁴ஞ்ஞா பஞ்ஞா. தத்த² கதமா ஸுக²படிபதா³ த³ந்தா⁴பி⁴ஞ்ஞா பஞ்ஞா? அகிச்சே²ன அகஸிரேன ஸமாதி⁴ம் உப்பாதே³ந்தஸ்ஸ த³ந்த⁴ம் தம் டா²னம் அபி⁴ஜானந்தஸ்ஸ யா உப்பஜ்ஜதி பஞ்ஞா பஜானனா…பே… ஸம்மாதி³ட்டி², அயம் வுச்சதி ஸுக²படிபதா³ த³ந்தா⁴பி⁴ஞ்ஞா பஞ்ஞா. தத்த² கதமா ஸுக²படிபதா³ கி²ப்பாபி⁴ஞ்ஞா பஞ்ஞா? அகிச்சே²ன அகஸிரேன ஸமாதி⁴ம் உப்பாதே³ந்தஸ்ஸ கி²ப்பம் தம் டா²னம் அபி⁴ஜானந்தஸ்ஸ யா உப்பஜ்ஜதி பஞ்ஞா பஜானனா…பே… ஸம்மாதி³ட்டி², அயம் வுச்சதி ஸுக²படிபதா³ கி²ப்பாபி⁴ஞ்ஞா பஞ்ஞா’’தி (விப⁴. 801) – அயமேத்த² பாளி.

தத்த² கிச்சே²ன கஸிரேன ஸமாதி⁴ம் உப்பாதே³ந்தஸ்ஸாதி புப்³ப³பா⁴கே³ ஆக³மனகாலே கிச்சே²ன கஸிரேன து³க்கே²ன ஸஸங்கா²ரேன ஸப்பயோகே³ன கிலேஸே விக்க²ம்பே⁴த்வா லோகுத்தரஸமாதி⁴ம் உப்பாதே³ந்தஸ்ஸ. த³ந்த⁴ம் தம் டா²னம் அபி⁴ஜானந்தஸ்ஸாதி விக்க²ம்பி⁴தேஸு கிலேஸேஸு விபஸ்ஸனாபரிவாஸே சிரம் வஸித்வா தம் லோகுத்தரஸமாதி⁴ஸங்கா²தம் டா²னம் த³ந்த⁴ம் ஸணிகம் அபி⁴ஜானந்தஸ்ஸ படிவிஜ்ஜ²ந்தஸ்ஸ, பாபுணந்தஸ்ஸாதி அத்தோ². அயம் வுச்சதீதி யா ஏஸா ஏவம் உப்பஜ்ஜதி, அயம் கிலேஸவிக்க²ம்ப⁴னப்படிபதா³ய து³க்க²த்தா, விபஸ்ஸனாபரிவாஸபஞ்ஞாய ச த³ந்த⁴த்தா மக்³க³காலே ஏகசித்தக்க²ணே உப்பன்னாபி பஞ்ஞா ஆக³மனவஸேன ‘‘து³க்க²படிபதா³ த³ந்தா⁴பி⁴ஞ்ஞா நாமா’’தி வுச்சதி. உபரி தீஸு பதே³ஸுபி இமினா நயேன அத்தோ² வேதி³தப்³போ³.

ஸம்கி²த்தஸுத்தவண்ணனா நிட்டி²தா.