(10) 5. அஸுரவக்³கோ³
1-2. அஸுரஸுத்தாதி³வண்ணனா
91-92. பஞ்சமஸ்ஸ பட²மது³தியானி உத்தானத்தா²னேவ.
அஸுரஸுத்தாதி³வண்ணனா நிட்டி²தா.
3. து³தியஸமாதி⁴ஸுத்தவண்ணனா
93. ததியே அப்படிவானீதி பா⁴வப்பதா⁴னோ நித்³தே³ஸோதி ஆஹ ‘‘அனிவத்தனதா’’தி. ‘‘அப்படிவானிதா’’தி வத்தப்³பே³ ‘‘அப்படிவானீ’’தி வுத்தம். ததா² ஹி வீரியப்பவாஹே வத்தமானே அந்தரா ஏவ படிக³மனம் நிவத்தனம் படிவானம், தம் அஸ்ஸ அத்தீ²தி படிவானீ, ந படிவானீ அப்படிவானீ, தஸ்ஸ பா⁴வோ அப்படிவானிதா, அனிவத்தனாதி அத்தோ². அப்படிவானீதி வா இத்தி²லிங்க³வஸேனேவாயம் நித்³தே³ஸோ. அந்தராயேவ படிக³மனம் நிவத்தனம் படிவானீ, ந படிவானீ அப்படிவானீ, அனிவத்தனாதி அத்தோ².
து³தியஸமாதி⁴ஸுத்தவண்ணனா நிட்டி²தா.
4. ததியஸமாதி⁴ஸுத்தவண்ணனா
94. சதுத்தே² ஸண்ட²பேதப்³ப³ந்தி ஸம்மதே³வ ட²பேதப்³ப³ம். யதா² பன ட²பிதம் ஸண்ட²பிதம் ஹோதி, தம் த³ஸ்ஸேதும் ‘‘ஸன்னிஸாதே³தப்³ப³’’ந்திஆதி³ வுத்தம். தத்த² ஸன்னிஸாதே³தப்³ப³ந்தி ஸமாதி⁴ப்படிபக்கே² கிலேஸே ஸன்னிஸீதா³பேந்தேன சித்தம் கோ³சரஜ்ஜ²த்தே ஸன்னிஸீதா³பேதப்³ப³ந்தி. ஏகோதி³ காதப்³ப³ந்தி அப்³யக்³க³பா⁴வாபாத³னேன ஏகக்³க³ம் காதப்³ப³ம். ஸமாத³ஹிதப்³ப³ந்தி யதா² ஆரம்மணே ஸுட்டு² அப்பிதம் ஹோதி, ஏவம் ஸம்மா ஸம்மதே³வ ஆத³ஹிதப்³ப³ம், ஸுட்டு² ஆரோபேதப்³ப³ம் ஸமாஹிதம் காதப்³ப³ந்தி அத்தோ².
ததியஸமாதி⁴ஸுத்தவண்ணனா நிட்டி²தா.
5-6. ச²வாலாதஸுத்தாதி³வண்ணனா
95-96. பஞ்சமே ச²வாலாதந்தி ச²வானம் த³ட்³ட⁴ட்டா²னே அலாதம். தேனேவாஹ ‘‘ஸுஸானே அலாத’’ந்தி. மஜ்ஜ²ட்டா²னே கூ³த²மக்கி²தந்தி பமாணேன அட்ட²ங்கு³லமத்தம் த்³வீஸு டா²னேஸு ஆதி³த்தம் மஜ்ஜே² கூ³த²மக்கி²தம். கட்ட²த்த²ந்தி கட்டே²ன காதப்³ப³கிச்சம். ஸேஸமேத்த² உத்தானமேவ. ச²ட்ட²ம் உத்தானமேவ.
ச²வாலாதஸுத்தாதி³வண்ணனா நிட்டி²தா.
7-10. கி²ப்பனிஸந்திஸுத்தாதி³வண்ணனா
97-100. ஸத்தமே கி²ப்பனிஸந்தீதி கி²ப்பபஞ்ஞோ. தேனாஹ ‘‘கி²ப்பனிஸாமனோ’’திஆதி³. அனுரூபத⁴ம்மந்தி லோகுத்தராதி⁴க³மஸ்ஸ அனுச்ச²விகஸபா⁴வம். கல்யாணா ஸுந்த³ரா பரிமண்ட³லபத³ப்³யஞ்ஜனா வாசா அஸ்ஸாதி கல்யாணவாசோ. தேனாஹ ‘‘ஸுந்த³ரவசனோ’’தி. கல்யாணம் மது⁴ரம் வாக்கரணம் உதா³ஹாரகோ⁴ஸோ அஸ்ஸாதி கல்யாணவாக்கரணோ. கு³ணபரிபுண்ணபா⁴வேன பூரே புண்ணபா⁴வே ப⁴வாதி போரீ, தாய போரியா. தேனாஹ ‘‘கு³ணபரிபுண்ணாயா’’தி. புரே ப⁴வத்தா போரியா நாக³ரிகித்தி²யா ஸுகு²மாலத்தனேன ஸதி³ஸாதி போரீ, தாய போரியா. ‘‘ஸுகு²மாலத்தனேனா’’தி இமினா தஸ்ஸா வாசாய முது³ஸண்ஹபா⁴வோ வுத்தோ. அபலிபு³த்³தா⁴யாதி பித்தஸேம்ஹாதீ³ஹி ந பலிவேடி²தாய. அதோ³ஸாயாதி ஸந்தி³த்³த⁴விலம்பி³தாதி³தோ³ஸரஹிதாய அக³ளிதபத³ப்³யஞ்ஜனாயாதி அபதிதபத³ப்³யஞ்ஜனாய அவிரஹிதபத³ப்³யஞ்ஜனாய. உப⁴யமேதம் அனேலக³லாயாதி இமஸ்ஸேவ அத்த²வசனம். அனேலக³லாயாதி ஹி அனேலாய சேவ அக³லாய சாதி அத்தோ². அத்த²ம் விஞ்ஞாபேதும் ஸமத்தா²யாதி ஆதி³மஜ்ஜ²பரியோஸானம் பாகடம் கத்வா பா⁴ஸிதத்த²ஸ்ஸ விஞ்ஞாபனஸத்தா²ய. அட்ட²மனவமத³ஸமானி உத்தானத்தா²னேவ.
கி²ப்பனிஸந்திஸுத்தாதி³வண்ணனா நிட்டி²தா.
அஸுரவக்³க³வண்ணனா நிட்டி²தா.
து³தியபண்ணாஸகம் நிட்டி²தம்.