9. ஸுகு²மாலஸுத்தவண்ணனா

39. நவமே நித்³து³க்கோ²தி காயிகசேதஸிகது³க்க²விரஹிதோ. ஸது³க்கே² ஹி ஸவிகா⁴தே ஸுகு²மாலத்தா அனவஸரா, தஸ்மா ஸுகி²தோ நித்³து³க்க²தாய ஸுகு²மாலோ நாம. யாவஸ்ஸ ஸுகு²மாலத்தா பரமுக்கம்ஸக³தாதி ஆஹ ‘‘பரமஸுகு²மாலோ’’தி. அதிவிய ஸுகு²மாலோதி அத்தோ². அந்தமதீதம் அச்சந்தம். ஸப்³ப³தா³ ஸுகு²மாலோதி ஆஹ ‘‘ஸததனித்³து³க்கோ²’’தி. சரியகாலேதி போ³தி⁴சரியாய சரணகாலே. தேனாதி போ³தி⁴ஸத்தேன. அஞ்ஞத்த² பன பது³மந்தி ரத்தம் கமலம். புண்ட³ரீகந்தி ஸேதம் வுச்சதி. இதராதி இதரபோக்க²ரணியோ. ‘‘போ³தி⁴ஸத்தஸ்ஸ கிரா’’திஆதி³கம் போக்க²ரணீனம் உப்பத்தித³ஸ்ஸனம். குத்³தா³லகம்மகாரேதி க²ணகே. போக்க²ரணிட்டா²னானீதி போக்க²ரணிக²ணனயோக்³க³ட்டா²னானி. க³ண்ஹாபேஸீதி க²ணாபேஸி. போக்க²ரணிஸத்³தோ³ சேத்த² தாதி³ஸே ஜலாஸயே நிருள்ஹோ த³ட்ட²ப்³போ³ பங்கஜாதி³ஸத்³தா³ விய. ஸோபானபா³ஹுகானம் மத்த²கட்டா²னம் உண்ஹீஸந்தி அதி⁴ப்பேதம். உத³கஸேசனனாளிகாதி உத³கச்ச²டாவிஸ்ஸஜ்ஜனனாளியந்தானி. பஞ்சவிதா⁴தி வண்ணவஸேன ஜாதிவஸேன ச.

கோ² பனஸ்ஸாதி நிபாதமத்தம். காஸிக-ஸத்³தோ³ அதிவிய ஸண்ஹே ஸுகு²மே மஹக்³க⁴வத்தே² நிருள்ஹோ, அஞ்ஞஸ்மிம்பி ததா²ஜாதிகே ருள்ஹிவஸேன பவத்ததீதி த³ட்ட²ப்³ப³ம். தேனாஹ ‘‘அகாஸிகம் சந்த³ன’’ந்தி. ஹேமந்தே வாஸோ ஹேமந்தம், ஹேமந்தம் அரஹதீதி ஹேமந்திகோ, பாஸாதோ³. ‘‘இதரேஸுபி ஏஸேவ நயோ’’தி வத்வா ததே³வ நேஸம் அரஹதம் த³ஸ்ஸேதும் ‘‘தத்த² ஹேமந்திகோ’’திஆதி³ வுத்தம். ஸஜாலானீதி ஸஜாலவாதபானானி, உத³கயந்தானீதி உத³கதா⁴ராவிஸ்ஸந்த³னகயந்தானி. பாஸாத³மத்த²கேதி பாஸாத³ஸ்ஸ உபரிஆகாஸதலே. ப³ந்தி⁴த்வாதி பயோஜிதயந்தே ஸுக்க²மஹிம்ஸசம்மம் ப³ந்தி⁴த்வா. யந்தம் பரிவத்தேத்வாதி யதா²பயோஜிதம் யந்தம் பாஸாணாரோபனத்த²ஞ்சேவ புன தேஸம் விஸ்ஸஜ்ஜனத்த²ஞ்ச பரிவத்தேத்வா. தஸ்மிம் விஸ்ஸஜ்ஜேந்தீதி ச²த³னபிட்டே² ப³த்³த⁴ஸுக்க²மஹிம்ஸசம்மே விஸ்ஸஜ்ஜேந்தி.

ஸஹஸ்ஸதா²மந்தி புரிஸஸஹஸ்ஸப³லம், புரிஸஸஹஸ்ஸேன வஹிதப்³ப³பா⁴ரவஹம். பல்லங்கே நிஸின்னோவாதி ரதனமயபல்லங்கே யதா²னிஸின்னோ ஏவ. உப்பதனாகாரபத்தந்தி உப்பதித்வா டி²தம் விய. ஜியம் போதே²ந்தஸ்ஸாதி ஜியாகா⁴தம் கரோந்தஸ்ஸ. ஜியப்பஹாரஸத்³தோ³தி ஜியாகா⁴தஸத்³தோ³. யந்தே ப³த்³த⁴ந்தி யந்தப³த்³த⁴ம் கத்வா ட²பிதம். ஸத்³த³ந்தரேதி தா²மமஜ்ஜி²மஸ்ஸ புரிஸஸ்ஸ ஸத்³த³ஸவனட்டா²னே. கா³வுதஸ்ஸ சதுத்தோ² பா⁴கோ³ கோஸோதிபி வுச்சதி த்³விஸஹஸ்ஸத³ண்ட³ப்பமாணட்டா²னம்.

ஸப்³ப³ட்டா²னானீதி மஹாபுரிஸஸ்ஸ தானி தானி ஸப்³பா³னி வஸனட்டா²னானி. ஸிகா²ப³த்³தோ⁴தி புரிஸஸபா⁴வஸ்ஸேவ விஸேஸதோ த³ஸ்ஸனமேதம். ந உப்பிலாவிதபா⁴வத்த²ந்தி உப்பிலாவிதபா⁴வஸங்கா²தம் அத்த²ம் ந கதே²ஸீதி அத்தோ². தஸ்ஸ ஹி போ³தி⁴மூலேயேவ ஸேதுகா⁴தோ. தேனேவாதி அப்பமாத³லக்க²ணஸ்ஸ தீ³பனதோ ஏவ. அத்தானம் அதிக்கமித்வாதி அத்தனோ ஜராபத்திம் அசிந்தேத்வா அட்டீயதி. ந பனேஸ மக்³கே³ன பஹீனோ ததா³ மக்³க³ஸ்ஸ அனதி⁴க³தத்தா. ஸிக்க²ம் படிக்கி²பித்வாதி யதா²ஸமாதி³ன்னஸிக்க²ம் பஹாய.

அவிபரீதப்³யாதி⁴ஆதி³ஸபா⁴வாவாதி ஏகந்தேன ப்³யாதி⁴ஆதி³ஸபா⁴வா ஏவ. ஏவம் ஜிகு³ச்சா²விஹாரேனாதி ஏவம் ஸகலஸ்ஸேவ வட்டது³க்க²ஸ்ஸ ஜிகு³ச்ச²னவிஹாரேன விஹரந்தஸ்ஸ. ஏவம் ஜிகு³ச்ச²னந்தி ஏவம் பரஸ்ஸ ஜிகு³ச்ச²னம். பரம் அஜிகு³ச்ச²மானோதி கருணாயனேன ஏவம் பரம் அஜிகு³ச்ச²ந்தோ. அபி⁴போ⁴ஸ்மீதி அபி⁴ப⁴விதா அஸ்மி. உஸ்ஸாஹோ அஹூதி சதுரங்க³ஸமன்னாக³தம் வீரியமேவ சதுப்³பி³த⁴ஸம்மப்பதா⁴னவீரியஞ்ச அஹோஸி, யேன மக்³க³ப்³ரஹ்மசரியபராயணோ ஜாதோ.

ஸுகு²மாலஸுத்தவண்ணனா நிட்டி²தா.