(7) 2. ஸுக²வக்³க³வண்ணனா

65. து³தியஸ்ஸ பட²மே ஸப்³ப³காமனிப்ப²த்திமூலகம் ஸுக²ந்தி அனவஸேஸஉபபோ⁴க³பரிபோ⁴க³வத்து²னிப்ப²த்திஹேதுகம் காமஸுக²ம். பப்³ப³ஜ்ஜாமூலகம் ஸுக²ந்தி பப்³ப³ஜ்ஜாஹேதுகம் பவிவேகஸுக²ம்.

66. து³தியே காமேதி பஞ்ச காமகு³ணே, ஸப்³பே³பி வா தேபூ⁴மகே த⁴ம்மே. வுத்தஞ்ஹேதம் ‘‘ஸப்³பே³பி தேபூ⁴மகா த⁴ம்மா கமனீயட்டே²ன காமா’’தி (மஹானி. 1). நேக்க²ம்மம் வுச்சதி பப்³ப³ஜ்ஜா க⁴ரப³ந்த⁴னதோ நிக்க²ந்தத்தா. நிப்³பா³னமேவ வா –

‘‘பப்³ப³ஜ்ஜா பட²மம் ஜா²னம், நிப்³பா³னஞ்ச விபஸ்ஸனா;

ஸப்³பே³பி குஸலா த⁴ம்மா, நேக்க²ம்மந்தி பவுச்சரே’’தி. (இதிவு. அட்ட². 109) –

ஹி வுத்தம்.

67. ததியே உபதீ⁴ வுச்சந்தி பஞ்சுபாதா³னக்க²ந்தா⁴, தன்னிஸ்ஸிதம் ஸுக²ம் உபதி⁴ஸுக²ம். தப்படிபக்க²தோ நிருபதி⁴ஸுக²ம் லோகுத்தரஸுக²ம்.

68. சதுத்தே² வட்டபரியாபன்னம் ஸுக²ம் வட்டஸுக²ம். நிப்³பா³னாரம்மணம் ஸுக²ம் விவட்டஸுக²ம்.

69. பஞ்சமே ஸம்கிலேஸந்தி ஸம்கிலிட்ட²ம். தேனாஹ ‘‘வட்டகா³மிஸுக²’’ந்தி. விவட்டஸுக²ந்தி மக்³க³ப²லஸஹக³தம் ஸுக²ம்.

70. ச²ட்டே² அரியானமேவ ஸுக²ம் அரியஸுக²ம், அரியஞ்ச தம் ஸுக²ஞ்சாதிபி அரியஸுக²ம். அனரியானமேவ ஸுக²ம் அனரியஸுக²ம். அனரியஞ்ச தம் ஸுக²ஞ்சாதிபி அனரியஸுக²ம்.

71. ஸத்தமே தந்தி சேதஸிகஸுக²ம்.

72. அட்ட²மே ஸஹ பீதியா வத்ததீதி ஸப்பீதிகம், பீதிஸஹக³தம் ஸுக²ம். ஸபா⁴வதோ விராக³தோ ச நத்தி² ஏதஸ்ஸ பீதீதி நிப்பீதிகம் ஸுக²ம். அட்ட²கதா²யம் பனேத்த² ஜா²னஸுக²மேவ உத்³த⁴டம், ததா² ச ‘‘லோகியஸப்பீதிகஸுக²தோ லோகியனிப்பீதிகஸுக²ம் அக்³க³’’ந்தி வுத்தம். லோகியனிப்பீதிகம்பி ஹி அக்³க³ம் லப்³ப⁴தேவாதி பூ⁴மந்தரம் பி⁴ந்தி³த்வா அக்³க³பா⁴வோ வேதி³தப்³போ³.

73. நவமே ஸாதஸபா⁴வமேவ ஸுக²ம் ஸாதஸுக²ம், ந உபேக்கா²ஸுக²ம் விய அஸாதஸபா⁴வம். காமஞ்சேத்த² காயவிஞ்ஞாணஸஹக³தம்பி ஸாதஸுக²மேவ, அட்ட²கதா²யம் பன ‘‘தீஸு ஜா²னேஸு ஸுக²’’ந்தேவ வுத்தம்.

74. த³ஸமே ஸமாதி⁴ஸம்பயுத்தம் ஸுக²ம் ஸமாதி⁴ஸுக²ம். ந ஸமாதி⁴ஸம்பயுத்தம் ஸுக²ம் அஸமாதி⁴ஸுக²ம்.

75. ஏகாத³ஸமே ஸுத்தந்தகதா² ஏஸாதி ‘‘ஸப்பீதிகம் ஜா²னத்³வய’’ந்தி வுத்தம்.

77. தேரஸமே ரூபஜ்ஜா²னம் ரூபம் உத்தரபத³லோபேன, தம் ஆரம்மணம் ஏதஸ்ஸாதி ரூபாரம்மணம். சதுத்த²ஜ்ஜா²னக்³க³ஹணம் பன யத³ஸ்ஸ படியோகீ³, தேன ஸமானயோக³க்க²மத³ஸ்ஸனபரம். யம் கிஞ்சி ரூபந்தி யம் கிஞ்சி ருப்பனலக்க²ணம் ரூபம். தப்படிக்கே²பேன அரூபம் வேதி³தப்³ப³ம்.

ஸுக²வக்³க³வண்ணனா நிட்டி²தா.