5. பரிஸவக்³க³வண்ணனா
43. பஞ்சமஸ்ஸ பட²மே உத்³த⁴ச்சேன ஸமன்னாக³தாதி அகப்பியே கப்பியஸஞ்ஞிதாய, கப்பியே அகப்பியஸஞ்ஞிதாய, அவஜ்ஜே வஜ்ஜஸஞ்ஞிதாய, வஜ்ஜே அவஜ்ஜஸஞ்ஞிதாய உத்³த⁴ச்சப்பகதிகா. யே ஹி வினயே அபகதஞ்ஞுனோ ஸம்கிலேஸவோதா³னியேஸு த⁴ம்மேஸு ந குஸலா ஸகிஞ்சனகாரினோ விப்படிஸாரப³ஹுலா, தேஸம் அனுப்பன்னஞ்ச உத்³த⁴ச்சம் உப்பஜ்ஜதி, உப்பன்னஞ்ச பி⁴ய்யோபா⁴வம் வேபுல்லம் ஆபஜ்ஜதி. ஸாராபா⁴வேன துச்ச²த்தா நளோ வியாதி நளோ, மானோதி ஆஹ ‘‘உன்னளாதி உக்³க³தனளா’’தி. தேனாஹ ‘‘உட்டி²ததுச்ச²மானா’’தி. மானோ ஹி ஸேய்யஸ்ஸ ஸேய்யோதி ஸதி³ஸோதி ச பவத்தியா விஸேஸதோ துச்சோ². சாபல்லேனாதி சபலபா⁴வேன, தண்ஹாலோலுப்பேனாதி அத்தோ². முக²க²ராதி முகே²ன ப²ருஸா, ப²ருஸவாதி³னோதி அத்தோ².
விகிண்ணவாசாதி விஸ்ஸடவசனா ஸம்ப²ப்பலாபிதாய அபரியந்தவசனா. தேனாஹ ‘‘அஸம்யதவசனா’’திஆதி³. விஸ்ஸட்ட²ஸதினோதி ஸதிவிரஹிதா. பச்சயவேகல்லேன விஜ்ஜமானாயபி ஸதியா ஸதிகிச்சம் காதும் அஸமத்த²தாய ஏவம் வுத்தா. ந ஸம்பஜானந்தீதி அஸம்பஜானா, தம்யோக³னிவத்தியம் சாயம் அகாரோ ‘‘அஹேதுகா த⁴ம்மா (த⁴. ஸ. து³கமாதிகா 2), அபி⁴க்கு²கோ ஆவாஸோ’’திஆதீ³ஸு (சூளவ. 76) வியாதி ஆஹ ‘‘நிப்பஞ்ஞா’’தி, பஞ்ஞாரஹிதாதி அத்தோ². பாளியம் விப்³ப⁴ந்தசித்தாதி உப்³ப⁴ந்தசித்தா. ஸமாதி⁴விரஹேன லத்³தோ⁴காஸேன உத்³த⁴ச்சேன தேஸம் ஸமாதி⁴விரஹானம் சித்தம் நானாரம்மணேஸு பரிப்³ப⁴மதி வனமக்கடோ விய வனஸாகா²ஸு. பாகதிந்த்³ரியாதி ஸம்வராபா⁴வேன கி³ஹிகாலே விய விவடஇந்த்³ரியா. தேனாஹ ‘‘பகதியா டி²தேஹீ’’திஆதி³. விவடேஹீதி அஸம்வுதேஹி.
44. து³தியே ப⁴ண்ட³னம் வுச்சதி கலஹஸ்ஸ புப்³ப³பா⁴கோ³தி கலஹஸ்ஸ ஹேதுபூ⁴தா பரிபா⁴ஸா தம்ஸதி³ஸீ ச அனிட்ட²கிரியா ப⁴ண்ட³னம் நாம. கலஹஜாதாதி ஹத்த²பராமாஸாதி³வஸேன மத்த²கப்பத்தோ கலஹோ ஜாதோ ஏதேஸந்தி கலஹஜாதாதி ஏவமேத்த² அத்தோ² த³ட்ட²ப்³போ³. விருத்³த⁴வாத³ந்தி ‘‘அயம் த⁴ம்மோ, நாயம் த⁴ம்மோ’’திஆதி³னா விருத்³த⁴வாத³பூ⁴தம் விவாத³ம். முக²ஸன்னிஸ்ஸிததாய வாசா இத⁴ ‘‘முக²’’ந்தி அதி⁴ப்பேதாதி ஆஹ ‘‘து³ப்³பா⁴ஸிதா வாசா முக²ஸத்தியோதி வுச்சந்தீ’’தி. சதுப்³பி³த⁴ம்பி ஸங்க⁴கம்மம் ஸீமாபரிச்சி²ன்னேஹி பகதத்தேஹி பி⁴க்கூ²ஹி ஏகதோ கத்தப்³ப³த்தா ஏககம்மம் நாம. பஞ்சவிதோ⁴பி பாதிமோக்கு²த்³தே³ஸோ ஏகதோ உத்³தி³ஸிதப்³ப³த்தா ஏகுத்³தே³ஸோ நாம. பஞ்ஞத்தம் பன ஸிக்கா²பத³ம் ஸப்³பே³ஹிபி லஜ்ஜீபுக்³க³லேஹி ஸமம் ஸிக்கி²தப்³ப³பா⁴வதோ ஸமஸிக்க²தா நாம. பாளியம் கீ²ரோத³கீபூ⁴தாதி யதா² கீ²ரஞ்ச உத³கஞ்ச அஞ்ஞமஞ்ஞம் ஸம்ஸந்த³தி, விஸும் ந ஹோதி, ஏகத்தம் விய உபேதி. ஸதிபி ஹி உப⁴யேஸம் கலாபானம் பரமத்த²தோ பே⁴தே³ பசுரஜனேஹி பன து³விஞ்ஞேய்யனானத்தம் கீ²ரோத³கம் ஸமோதி³தம் அச்சந்தமேவ ஸம்ஸட்ட²ம் விய ஹுத்வா திட்ட²தி, ஏவம் ஸாமக்³கி³வஸேன ஏகத்தூபக³தசித்துப்பாதா³ வியாதி கீ²ரோத³கீபூ⁴தாதி ஏவமேத்த² அத்தோ² த³ட்ட²ப்³போ³. மேத்தாசக்கூ²ஹீதி மேத்தாசித்தம் பச்சுபட்ட²பேத்வா ஓலோகனசக்கூ²ஹி. தானி ஹி பியபா⁴வதீ³பனதோ ‘‘பியசக்கூ²னீ’’தி வுச்சந்தி.
45. ததியே அக்³க³வதீதி ஏத்த² அக்³க³-ஸத்³தோ³ உத்தமபரியாயோ, தேன விஸிட்ட²ஸ்ஸ புக்³க³லஸ்ஸ, விஸிட்டா²ய வா படிபத்தியா க³ஹணம் இதா⁴தி⁴ப்பேதந்தி ஆஹ ‘‘அக்³க³வதீதி உத்தமபுக்³க³லவதீ’’திஆதி³. அவிக³ததண்ஹதாய தம் தம் பரிக்கா²ரஜாதம் ப³ஹும் லந்தி ஆதி³யந்தீதி ப³ஹுலா, ப³ஹுலா ஏவ பா³ஹுலிகா யதா² ‘‘வேனயிகோ’’தி (அ. நி. 8.11; பாரா. 8; ம. நி. 1.246). தே பன யஸ்மா பச்சயப³ஹுபா⁴வாய யுத்தப்பயுத்தா நாம ஹோந்தி, தஸ்மா ஆஹ ‘‘சீவராதி³பா³ஹுல்லாய படிபன்னா’’தி. ஸிக்கா²ய ஆத³ரகா³ரவாபா⁴வதோ ஸிதி²லம் அத³ள்ஹம் க³ண்ஹந்தீதி ஸாத²லிகாதி வுத்தம். ஸிதி²லந்தி ச பா⁴வனபும்ஸகனித்³தே³ஸோ, ஸிதி²லஸத்³தே³ன வா ஸமானத்த²ஸ்ஸ ஸாத²லஸத்³த³ஸ்ஸ வஸேன ஸாத²லிகாதி பத³ஸித்³தி⁴ வேதி³தப்³பா³. அவக³மனட்டே²னாதி அதோ⁴க³மனட்டே²ன, ஓரம்பா⁴கி³யபா⁴வேனாதி அத்தோ². உபதி⁴விவேகேதி ஸப்³பூ³பதி⁴படினிஸ்ஸக்³க³தாய உபதி⁴விவித்தே. ஓரோபிதது⁴ராதி உஜ்ஜி²துஸ்ஸாஹா. து³வித⁴ம்பி வீரியந்தி காயிகம் சேதஸிகஞ்ச வீரியம்.
46. சதுத்தே² இத³ம் து³க்க²ந்தி து³க்க²ஸ்ஸ அரியஸச்சஸ்ஸ பச்சக்க²தோ அக்³க³ஹிதபா⁴வத³ஸ்ஸனத்த²ம் வுத்தம். ஏத்தகமேவ து³க்க²ந்தி தஸ்ஸ பரிச்சி²ஜ்ஜ அக்³க³ஹிதபா⁴வத³ஸ்ஸனத்த²ம். இதோ உத்³த⁴ம் து³க்க²ம் நத்தீ²தி அனவஸேஸேத்வா அக்³க³ஹிதபா⁴வத³ஸ்ஸனத்த²ம். யதா²ஸபா⁴வதோ நப்பஜானந்தீதி ஸரஸலக்க²ணப்படிவேதே⁴ன அஸம்மோஹதோ நப்படிவிஜ்ஜ²ந்தி. அஸம்மோஹபடிவேதோ⁴ ச யதா² தஸ்மிம் ஞாணே பவத்தே பச்சா து³க்க²ஸ்ஸ ரூபாதி³பரிச்சே²தே³ ஸம்மோஹோ ந ஹோதி, ததா² பவத்தி. அச்சந்தக்க²யோதி அச்சந்தக்க²யனிமித்தம் நிப்³பா³னம். அஸமுப்பத்தீதி ஏத்தா²பி ஏஸேவ நயோ. யம் நிப்³பா³னம் மக்³க³ஸ்ஸ ஆரம்மணபச்சயட்டே²ன காரணபூ⁴தம் ஆக³ம்ம தது³ப⁴யம்பி நிருஜ்ஜ²தி, தம் தேஸம் அஸமுப்பத்தி நிப்³பா³னம் து³க்க²னிரோதோ⁴தி வுச்சதி.
47. பஞ்சமே விஸேஸனஸ்ஸ பரனிபாதேன ‘‘பரிஸாகஸடோ’’தி வுத்தந்தி ஆஹ ‘‘கஸடபரிஸா’’திஆதி³. ‘‘கஸடபரிஸா’’தி ஹி வத்தப்³பே³ ‘‘பரிஸாகஸடோ’’தி வுத்தம். பரிஸாமண்டோ³தி ஏத்தா²பி ஏஸேவ நயோ. ஸேஸமேத்த² உத்தானமேவ.
48. ச²ட்டே² க³ம்பீ⁴ராதி அகா³தா⁴ து³க்கோ²கா³ள்ஹா. பாளிவஸேனாதி இமினா யோ த⁴ம்மபடிஸம்பி⁴தா³ய விஸயோ க³ம்பீ⁴ரபா⁴வோ, தமாஹ. த⁴ம்மப்படிவேத⁴ஸ்ஸ ஹி து³க்கரபா⁴வதோ த⁴ம்மஸ்ஸ பாளியா து³க்கோ²கா³ள்ஹதாய க³ம்பீ⁴ரபா⁴வோ. ‘‘பாளிவஸேன க³ம்பீ⁴ரா’’தி வத்வா ‘‘ஸல்லஸுத்தஸதி³ஸா’’தி வுத்தம் தஸ்ஸ ‘‘அனிமித்தமனஞ்ஞாத’’ந்திஆதி³னா (ஸு. நி. 579) பாளிவஸேன க³ம்பீ⁴ரதாய லப்³ப⁴னதோ. ததா² ஹி தத்த² தா கா³தா² து³விஞ்ஞேய்யரூபா திட்ட²ந்தி. து³விஞ்ஞேய்யஞ்ஹி ஞாணேன து³க்கோ²கா³ள்ஹந்தி கத்வா ‘‘க³ம்பீ⁴ர’’ந்தி வுச்சதி. புப்³பா³பரம்பேத்த² காஸஞ்சி கா³தா²னம் து³விஞ்ஞேய்யதாய து³க்கோ²கா³ள்ஹமேவ, தஸ்மா தம் ‘‘பாளிவஸேன க³ம்பீ⁴ரா’’தி வுத்தம். இமினாவ நயேன ‘‘அத்த²வஸேன க³ம்பீ⁴ரா’’தி ஏத்தா²பி அத்தோ² வேதி³தப்³போ³. மஹாவேத³ல்லஸுத்தஸ்ஸ (ம. நி. 1.449 ஆத³யோ) அத்த²வஸேன க³ம்பீ⁴ரதா ஸுவிஞ்ஞேய்யாவ. லோகம் உத்தரதீதி லோகுத்தரோ, நவவிதோ⁴ அப்பமாணத⁴ம்மோ. ஸோ அத்த²பூ⁴தோ ஏதேஸம் அத்தீ²தி லோகுத்தரா. தேனாஹ ‘‘லோகுத்தரஅத்த²தீ³பகா’’தி.
ஸத்தஸுஞ்ஞம் த⁴ம்மமத்தமேவாதி ஸத்தேன அத்தனா ஸுஞ்ஞம் கேவலம் த⁴ம்மமத்தமேவ. உக்³க³ஹேதப்³ப³ம் பரியாபுணிதப்³ப³ந்தி லிங்க³வசனவிபல்லாஸேன வுத்தந்தி ஆஹ ‘‘உக்³க³ஹேதப்³பே³ ச பரியாபுணிதப்³பே³ சா’’தி. கவினோ கம்மம் கவிதா. யம் பனஸ்ஸ கம்மம், தம் தேன கதந்தி வுச்சதீதி ஆஹ ‘‘கவிதாதி கவீஹி கதா’’தி. இதரந்தி காவேய்யாதி பத³ம், காப்³யந்தி வுத்தம் ஹோதி. காப்³யந்தி ச கவினா வுத்தந்தி அத்தோ². தேனாஹ ‘‘தஸ்ஸேவ வேவசன’’ந்தி. விசித்ரஅக்க²ராதி விசித்தாகாரக்க²ரா விஞ்ஞாபனீயா. ஸாஸனதோ ப³ஹிபூ⁴தாதி ந ஸாஸனாவசரா. தேஸம் ஸாவகேஹீதி பு³த்³தா⁴னம் ஸாவகாதி அபஞ்ஞாதானம் யேஸம் கேஸஞ்சி ஸாவகேஹி. ந சேவ அஞ்ஞமஞ்ஞம் படிபுச்ச²ந்தீதி யே வாசேந்தி, யே ச ஸுணந்தி, தே அஞ்ஞமஞ்ஞம் அத்தா²தி³ம் நப்படிபுச்ச²ந்தி, கேவலம் வாசனஸவனமத்தேனேவ பரிதுட்டா² ஹோந்தி. சாரிகம் ந விசரந்தீதி அஸுகஸ்மிம் டா²னே அத்தா²தி³ம் ஜானந்தா அத்தீ²தி புச்ச²னத்தா²ய சாரிகம் ந க³ச்ச²ந்தி தாதி³ஸஸ்ஸ புக்³க³லஸ்ஸ அபா⁴வதோ தஸ்ஸ ச புப்³பா³பரவிரோத⁴தோ. கத²ம் ரோபேதப்³ப³ந்தி கேன பகாரேன நிக்கி²பிதப்³ப³ம். அத்தோ² நாம ஸபா⁴வதோ அனுஸந்தி⁴தோ ஸம்ப³ந்த⁴தோ புப்³பா³பரதோ ஆதி³பரியோஸானதோ ச ஞாதோ ஸம்மாஞாதோ ஹோதீதி ஆஹ ‘‘கோ அத்தோ²’’திஆதி³. அனுத்தானீகதந்தி அக்க²ரஸன்னிவேஸாதி³னா அனுத்தானீகதம். கங்கா²யாதி ஸம்ஸயஸ்ஸ.
49. ஸத்தமே கிலேஸேஹீ ஆமஸிதப்³ப³தோ ஆமிஸம், சத்தாரோ பச்சயா. ததே³வ க³ரு க³ருகாதப்³ப³ம் ஏதேஸம், ந த⁴ம்மோதி ஆமிஸக³ரூ. தேனாஹ ‘‘லோகுத்தரத⁴ம்மம் லாமகதோ க³ஹேத்வா டி²தபரிஸா’’தி. உப⁴தோ பா⁴க³தோ விமுத்தோதி உப⁴தோபா⁴க³விமுத்தோ. த்³வீஹி பா⁴கே³ஹி த்³வே வாரே விமுத்தோ. பஞ்ஞாய விமுத்தோதி ஸமத²ஸன்னிஸ்ஸயேன வினா அக்³க³மக்³க³பஞ்ஞாய விமுத்தோ. தேனாஹ ‘‘ஸுக்க²விபஸ்ஸககீ²ணாஸவோ’’தி. காயேனாதி நாமகாயேன. ஜா²னப²ஸ்ஸம் பு²ஸித்வாதி அட்ட²ஸமாபத்திஸஞ்ஞிதம் ஜா²னப²ஸ்ஸம் அதி⁴க³மவஸேன பு²ஸித்வா. பச்சா² நிரோத⁴ம் நிப்³பா³னம் யதா² ஆலோசிதம் நாமகாயேன ஸச்சி²கரோதீதி காயஸக்கீ². ந து விமுத்தோ ஏகச்சானம் ஆஸவானம் அபரிக்கீ²ணத்தா. தி³ட்ட²ந்தம் பத்தோதி தி³ட்ட²ஸ்ஸ அந்தோ அனந்தரோ காலோ தி³ட்ட²ந்தோ, த³ஸ்ஸனஸங்கா²தஸ்ஸ ஸோதாபத்திமக்³க³ஞாணஸ்ஸ அனந்தரம் பத்தோதி அத்தோ². பட²மப²லதோ பட்டா²ய ஹி யாவ அக்³க³மக்³கா³ தி³ட்டி²ப்பத்தோ. தேனாஹ ‘‘இமே த்³வேபி ச²ஸு டா²னேஸு லப்³ப⁴ந்தீ’’தி.
ஸத்³த³ஹந்தோ விமுத்தோதி ஏதேன ஸப்³ப³தா² அவிமுத்தஸ்ஸ ஸத்³தா⁴மத்தேன விமுத்தபா⁴வத³ஸ்ஸனேன ஸத்³தா⁴விமுத்தஸ்ஸ ஸேக்க²பா⁴வமேவ விபா⁴வேதி. ஸத்³தா⁴விமுத்தோதி வா ஸத்³தா⁴ய அவிமுத்தோதி அத்தோ². ச²ஸு டா²னேஸூதி பட²மப²லதோ பட்டா²ய ச²ஸு டா²னேஸு. த⁴ம்மம் அனுஸ்ஸரதீதி பட²மமக்³க³பஞ்ஞாஸங்கா²தம் த⁴ம்மம் அனுஸ்ஸரதி. ஸத்³த⁴ம் அனுஸ்ஸரதீதி ஏத்தா²பி ஏஸேவ நயோ. உபோ⁴பி ஹேதே ஸோதாபத்திமக்³க³ட்டா²யேவ. இமம் கஸ்மா க³ண்ஹந்தீதி ஏவம் ஏகந்தபாஸம்ஸேஸு அரியேஸு க³ய்ஹமானேஸு இமம் ஏகந்தனிந்தி³தம் லாமகம் து³ஸ்ஸீலம் கஸ்மா க³ண்ஹந்தி. ஸப்³பே³ஸு ஸப்³ப³தா ஸதி³ஸேஸு லப்³ப⁴மானோபி விஸேஸோ ந பஞ்ஞாயதி, விஸபா⁴கே³ பன ஸதி ஏவ பஞ்ஞாயதி படபா⁴வேன விய சித்தபடஸ்ஸாதி ஆஹ ‘‘ஏகச்சேஸு பனா’’திஆதி³. க³ந்தி²தாதி அவப³த்³தா⁴. முச்சி²தாதி முச்ச²ம் ஸம்மோஹம் ஆபன்னா. ச²ந்த³ராக³அபகட்³ட⁴னாயாதி ச²ந்த³ராக³ஸ்ஸ அபனயனத்த²ம். நிஸ்ஸரணபஞ்ஞாயாதி ததோ நிஸ்ஸரணாவஹாய பஞ்ஞாய விரஹிதா.
பஞ்ஞாது⁴ரேனாதி விபஸ்ஸனாபி⁴னிவேஸேன. அபி⁴னிவிட்டோ²தி விபஸ்ஸனாமக்³க³ம் ஓதிண்ணோ. தஸ்மிம் க²ணேதி ஸோதாபத்திமக்³க³க்க²ணே. த⁴ம்மானுஸாரீ நாம பஞ்ஞாஸங்கா²தேன த⁴ம்மேன அரியமக்³க³ஸோதஸ்ஸ அனுஸ்ஸரணதோ. காயஸக்கீ² நாம நாமகாயேன ஸச்சி²காதப்³ப³ஸ்ஸ நிப்³பா³னஸ்ஸ ஸச்சி²கரணதோ. விக்க²ம்ப⁴னஸமுச்சே²தா³னம் வஸேன த்³விக்க²த்தும். அரூபஜ்ஜா²னேஹி ரூபகாயதோ, அக்³க³மக்³கே³ன ஸேஸகாயதோதி த்³வீஹி பா⁴கே³ஹி நிஸ்ஸக்கவசனஞ்சேதம். தி³ட்ட²ந்தம் பத்தோ, தி³ட்ட²த்தா வா பத்தோதி தி³ட்டி²ப்பத்தோ. தத்த² தி³ட்ட²ந்தம் பத்தோதி த³ஸ்ஸனஸங்கா²தஸ்ஸ ஸோதாபத்திமக்³க³ஞாணஸ்ஸ அனந்தரம் பத்தோதி அத்தோ². தி³ட்ட²த்தாதி சதுஸச்சத³ஸ்ஸனஸங்கா²தாய பஞ்ஞாய நிரோத⁴ஸ்ஸ தி³ட்ட²த்தா. ஜா²னப²ஸ்ஸரஹிதாய ஸாதிஸயாய பஞ்ஞாய ஏவ விமுத்தோதி பஞ்ஞாவிமுத்தோ. ஸேஸம் வுத்தனயத்தா ஸுவிஞ்ஞேய்யமேவ.
50. அட்ட²மே ந ஸமாதி விஸமா. காயகம்மாதீ³னம் விஸமத்தா ததோ ஏவ தத்த² பக்க²லனம் ஸுலப⁴ந்தி ஆஹ ‘‘ஸபக்க²லனட்டே²னா’’தி. நிப்பக்க²லனட்டே²னாதி பக்க²லனாபா⁴வேன. உத்³த⁴ம்மானீதி த⁴ம்மதோ அபேதானி. உப்³பி³னயானீதி ஏத்தா²பி ஏஸேவ நயோ.
51. நவமே அத⁴ம்மிகாதி அத⁴ம்மே நியுத்தா. தேனாஹ ‘‘நித்³த⁴ம்மா’’தி, த⁴ம்மரஹிதாதி அத்தோ².
52. த³ஸமே க³ண்ஹந்தீதி பவத்தேந்தி. ந சேவ அஞ்ஞமஞ்ஞம் ஸஞ்ஞாபேந்தீதி மூலதோ பட்டா²ய தம் அதி⁴கரணம் யதா² வூபஸம்மதி, ஏவம் அஞ்ஞமஞ்ஞம் இதரீதரே ந ஸம்மா ஜானாபேந்தி. ஸஞ்ஞாபனத்த²ம் ஸன்னிபாதே ஸதி தத்த² யுத்தபத்தகரணேன ஸஞ்ஞத்தியா ப⁴விதப்³ப³ம், தே பன ஸஞ்ஞாபனத்த²ம் ந ஸன்னிபதந்தி. ந பேக்கா²பேந்தீதி தம் அதி⁴கரணம் மூலதோ பட்டா²ய அஞ்ஞமஞ்ஞம் ந பேக்கா²பேந்தி. அஸஞ்ஞத்தியேவ அத்தனா க³ஹிதபக்க²ஸ்ஸ ப³லம் ஏதேஸந்தி அஸஞ்ஞத்திப³லா. ந ததா² மந்தேந்தீதி ஸந்தி³ட்டி²பராமாஸிஆதா⁴னக்³கா³ஹிது³ப்படினிஸ்ஸக்³கி³பா⁴வேன ததா² ந மந்தேந்தி. தேனாஹ ‘‘தா²மஸா’’திஆதி³. உத்தானத்தோ²யேவ கண்ஹபக்கே² வுத்தப்படிபக்கே²ன க³ஹேதப்³ப³த்தா.
பரிஸவக்³க³வண்ணனா நிட்டி²தா.
பட²மபண்ணாஸகம் நிட்டி²தம்.