3. பா³லவக்³க³வண்ணனா

22-24. ததியஸ்ஸ பட²மது³தியததியானி உத்தானத்தா²னேவ.

25. சதுத்தே² நேதப்³போ³தி அஞ்ஞதோ ஆஹரித்வா போ³தே⁴தப்³போ³, ஞாபேதப்³போ³தி அத்தோ².

27. ச²ட்டே² நோ சேபி படிச்சா²தே³த்வா கரோந்தீதி பாணாதிபாதாதீ³னி கரோந்தோ ஸசேபி அப்படிச்சா²தே³த்வா கரோந்தி. படிச்ச²ன்னமேவாதி விஞ்ஞூஹி க³ரஹிதப்³ப³பா⁴வதோ படிச்சா²த³னாரஹத்தா படிச்ச²ன்னமேவாதி வுச்சதி. அவீசிஆத³யோ பதே³ஸவிஸேஸா தத்தூ²பபன்னா ஸத்தா ச நிரயக்³க³ஹணேன க³ஹிதாதி ஆஹ ‘‘நிரயோதி ஸஹோகாஸகா க²ந்தா⁴’’தி. திரச்சா²னயோனி நாம விஸும் பதே³ஸவிஸேஸோ நத்தீ²தி ஆஹ ‘‘திரச்சா²னயோனியம் க²ந்தா⁴வ லப்³ப⁴ந்தீ’’தி.

31. த³ஸமே அத்தோ² ப²லம் தத³தீ⁴னவுத்திதாய வஸோ ஏதஸ்ஸாதி அத்த²வஸோ, ஹேதூதி ஆஹ ‘‘அத்த²வஸேதி காரணானீ’’தி. அரஞ்ஞவனபத்தா²னீதி அரஞ்ஞலக்க²ணப்பத்தானி வனபத்தா²னி. வனபத்த²-ஸத்³தோ³ ஹி ஸண்ட³பூ⁴தே ருக்க²ஸமூஹேபி வத்ததீதி அரஞ்ஞக்³க³ஹணம். வனீயதி விவேககாமேஹி ப⁴ஜீயதி, வனுதே வா தே அத்தஸம்பத்தியா வஸனத்தா²ய யாசந்தோ விய ஹோதீதி வனம், பதிட்ட²ஹந்தி ஏத்த² விவேககாமா யதா²தி⁴ப்பேதவிஸேஸாதி⁴க³மேனாதி பத்த²ம், வனேஸு பத்த²ம் க³ஹனட்டா²னே ஸேனாஸனம் வனபத்த²ம். கிஞ்சாபீதி அனுஜானனஸம்பா⁴வனத்தே² நிபாதோ. கிம் அனுஜானாதி? நிப்பரியாயதோ அரஞ்ஞபா⁴வம் கா³மதோ ப³ஹி அரஞ்ஞந்தி. தேனாஹ ‘‘நிப்பரியாயேனா’’திஆதி³. கிம் ஸம்பா⁴வேதி? ஆரஞ்ஞகங்க³னிப்பா²த³கத்தம். யஞ்ஹி ஆரஞ்ஞகங்க³னிப்பா²த³கம், தம் விஸேஸதோ அரஞ்ஞந்தி வத்தப்³ப³ந்தி. தேனாஹ ‘‘யம் தம் பஞ்சத⁴னுஸதிக’’ந்திஆதி³. நிக்க²மித்வா ப³ஹி இந்த³கீ²லாதி இந்த³கீ²லதோ ப³ஹி நிக்க²மித்வா, ததோ ப³ஹி பட்டா²யாதி அத்தோ². ப³ஹி இந்த³கீ²லாதி வா யத்த² த்³வே தீணி இந்த³கீ²லானி, தத்த² ப³ஹித்³தா⁴ இந்த³கீ²லதோ பட்டா²ய. யத்த² தம் நத்தி², தத³ரஹட்டா²னதோ பட்டா²யாதி வத³ந்தி. கா³மந்தந்தி கா³மஸமீபம். அனுபசாரட்டா²னந்தி நிச்சகிச்சவஸேன ந உபசரிதப்³ப³ட்டா²னம். தேனாஹ ‘‘யத்த² ந கஸீயதி ந வபீயதீ’’தி.

அத்தனோ ச தி³ட்ட²த⁴ம்மஸுக²விஹாரந்தி ஏதேன ஸத்தா² அத்தனோ விவேகாபி⁴ரதிம் பகாஸேதி. தத்த² தி³ட்ட²த⁴ம்மோ நாம அயம் பச்சக்கோ² அத்தபா⁴வோ, ஸுக²விஹாரோ நாம சதுன்னம் இரியாபத²விஹாரானம் பா²ஸுதா. ஏககஸ்ஸ ஹி அரஞ்ஞே அந்தமஸோ உச்சாரவஸ்ஸாவகிச்சம் உபாதா³ய ஸப்³பே³ இரியாபதா² பா²ஸுகா ஹோந்தி, தஸ்மா தி³ட்ட²த⁴ம்மே ஸுக²விஹாரம் தி³ட்ட²த⁴ம்மஸுக²விஹாரந்தி ஏவம் வா ஏத்த² அத்தோ² த³ட்ட²ப்³போ³.

பச்சி²மஞ்ச ஜனதம் அனுகம்பமானோதி கத²ம் அரஞ்ஞவாஸேன பச்சி²மா ஜனதா அனுகம்பிதா ஹோதி? ஸத்³தா⁴பப்³ப³ஜிதா ஹி குலபுத்தா ப⁴க³வதோ அரஞ்ஞவாஸம் தி³ஸ்வா ‘‘ப⁴க³வாபி நாம அரஞ்ஞஸேனாஸனானி ந முஞ்சதி, யஸ்ஸ நேவத்தி² பரிஞ்ஞாதப்³ப³ம் ந பஹாதப்³ப³ம் ந பா⁴வேதப்³ப³ம் ந ஸச்சி²காதப்³ப³ம், கிமங்க³ம் பன மய’’ந்தி சிந்தேத்வா தத்த² வஸிதப்³ப³மேவ மஞ்ஞிஸ்ஸந்தி, ஏவம் கி²ப்பமேவ து³க்க²ஸ்ஸந்தகரா ப⁴விஸ்ஸந்தி. ஏவம் பச்சி²மா ஜனதா அனுகம்பிதா ஹோதி. ஏதமத்த²ம் த³ஸ்ஸேந்தோ ஆஹ ‘‘பச்சி²மே மம ஸாவகே அனுகம்பந்தோ’’தி.

32. ஏகாத³ஸமே விஜ்ஜம் ப⁴ஜந்தீதி விஜ்ஜாபா⁴கி³யா, விஜ்ஜாபா⁴கே³ விஜ்ஜாகோட்டா²ஸே வத்தந்தீதிபி விஜ்ஜாபா⁴கி³யா. பத³ம் பச்சி²ந்த³தீதி மக்³க³சித்தஸ்ஸ பதிட்ட²ம் உபச்சி²ந்த³தி, மக்³க³சித்தம் பதிட்டா²பேதும் ந தே³தீதி அத்தோ². உப்³ப³ட்டேத்வாதி ஸமுச்சே²த³வஸேன ஸமூலம் உத்³த⁴ரித்வா. அட்ட²ஸு டா²னேஸூதி பு³த்³தா⁴தீ³ஸு அட்ட²ஸு டா²னேஸு. ராக³ஸ்ஸ க²யவிராகே³னாதி ராக³ஸ்ஸ க²யஸங்கா²தேன விராகே³ன, ராக³ஸ்ஸ அனுப்பத்தித⁴ம்மதாபாத³னேனாதி வுத்தம் ஹோதி.

பா³லவக்³க³வண்ணனா நிட்டி²தா.