1. கம்மகாரணவக்³கோ³

1. வஜ்ஜஸுத்தவண்ணனா

1. து³கனிபாதஸ்ஸ பட²மே பஹாரஸாத⁴னத்த²ந்தி த³ண்ட³ப்பஹாரஸ்ஸ ஸுக²ஸித்³தி⁴-அத்த²ம். கஞ்ஜிதோ நிப்³ப³த்தம் கஞ்ஜியம், ஆரனாலம், யம் பி³லங்க³ந்திபி வுச்சதி, தம் யத்த² ஸிஞ்சதி, ஸா கஞ்ஜியஉக்க²லிகா பி³லங்க³தா²லிகா, தம்ஸதி³ஸம் காரணம் பி³லங்க³தா²லிகம். ஸீஸகடாஹம் உப்பாடேத்வாதி அயோகு³ளப்பவேஸப்பமாணம் சி²த்³த³ம் கத்வா. ஸங்க²முண்ட³கம்மகாரணந்தி ஸங்க²ம் விய முண்ட³கரணம் கம்மகாரணம். ராஹுமுக²கம்மகாரணந்தி ராஹுமுக²க³தஸூரியஸதி³ஸகம்மகாரணம்.

ஜோதிமாலிகந்தி ஜோதிமாலவந்தம் கம்மகாரணம். ஹத்த²பஜ்ஜோதிகந்தி ஹத்த²ஸ்ஸ பஜ்ஜோதனகம்மகாரணம். ஏரகவத்தகம்மகாரணந்தி ஏரகவத்தஸதி³ஸே ஸரீரதோ சம்மவத்தே உப்பாடனகம்மகாரணம். சீரகவாஸிககம்மகாரணந்தி ஸரீரதோ உப்பாடிதவத்தசீரகேஹி நிவாஸாபனகம்மகாரணம். தம் கரோந்தா யதா² கீ³வதோ பட்டா²ய வத்³தே⁴ கந்தித்வா கடியம் ட²பேந்தி, ஏவம் கோ³ப்ப²கதோ பட்டா²ய கந்தித்வாபி கடியமேவ ட²பேந்தி. அட்ட²கதா²யம் பன ‘‘கடிதோ பட்டா²ய கந்தித்வா கோ³ப்ப²கேஸு ட²பேந்தீ’’தி வுத்தம். ஏணேய்யககம்மகாரணந்தி ஏணிமிக³ஸதி³ஸகம்மகாரணம். அயவலயானி த³த்வாதி அயவலயானி படிமுஞ்சித்வா. அயஸூலானி கோட்டேந்தீதி கப்பரஜண்ணுககோடீஸு அயஸூலானி பவேஸேந்தி. தந்தி தம் ததா²கதகம்மகாரணம் ஸத்தம்.

ப³ளிஸமம்ஸிகந்தி ப³லிஸேஹி மம்ஸுப்பாடனகம்மகாரணம். கஹாபணிகந்தி கஹாபணமத்தஸோ சி²ந்த³னகம்மகாரணம். கோட்டேந்தீதி சி²ந்த³ந்தி. கா²ராபதச்சி²கந்தி தச்சே²த்வா கா²ராபஸிஞ்சனகம்மகாரணம். பலிக⁴பரிவத்திகந்தி பலிக⁴ஸ்ஸ விய பரிவத்தனகம்மகாரணம். ஏகாப³த்³த⁴ம் கரோந்தி அயஸூலஸ்ஸ கோட்டனேன. பலாலபீட²கந்தி பலாலபீட²ஸ்ஸ விய ஸரீரஸ்ஸ ஸம்வேல்லனகம்மகாரணம். காரணிகாதி கா⁴தனகாரகா. பலாலவட்டிம் விய கத்வாதி யதா² பலாலபீட²ம் கரோந்தா பலாலம் வட்டிம் கத்வா ஸம்வேல்லனவஸேன புன வேடே²ந்தி, ஏவம் கரோந்தீதி அத்தோ². சா²தகஸுனகே²ஹீதி கு²த்³த³கேஹி கோலேய்யகஸுனகே²ஹி. தே ஹி ப³லவந்தா ஜவயோகா³ ஸூரா ச ஹோந்தி. ஸஹஸ்ஸப⁴ண்டி³கந்தி ஸஹஸ்ஸத்த²விகம்.

யாஹந்தி யம் அஹம். யந்தி ச காரணவசனம். தேனாஹ ‘‘யேன அஹ’’ந்தி. சி²ன்னமூலகேதி தண்ஹாமூலஸ்ஸ உச்சி²ன்னத்தா ஸஞ்சி²ன்னமூலகே.

வஜ்ஜஸுத்தவண்ணனா நிட்டி²தா.

2. பதா⁴னஸுத்தவண்ணனா

2. து³தியே உப⁴தோப்³யூள்ஹஸங்கா³மப்பவேஸனஸதி³ஸந்தி யுத்³த⁴த்தா²ய உப⁴தோராஸிகதசதுரங்கி³னிஸேனாமஜ்ஜ²ப்பவேஸனஸதி³ஸம். தா³னஞ்ச யுத்³த⁴ஞ்ச ஸமானமாஹூதி ஏத்த² கத²ம் பனீத³முப⁴யம் ஸமானம்? ஜீவிதவினாஸபீ⁴ருகோ ஹி யுஜ்ஜி²தும் ந ஸக்கோதி, போ⁴க³க்க²யபீ⁴ருகோ தா³னம் தா³தும் ந ஸக்கோதி. ‘‘ஜீவிதஞ்ச ரக்கி²ஸ்ஸாமி, யுஜ்ஜி²ஸ்ஸாமீ’’தி ஹி வத³ந்தோ ந யுஜ்ஜ²தி, ஜீவிதே பன ஆலயம் விஸ்ஸஜ்ஜேத்வா ‘‘ஹத்த²பாதா³தி³ச்சே²தோ³ வா ஹோது மரணம் வா, க³ண்ஹிஸ்ஸாமேதம் இஸ்ஸரிய’’ந்தி உஸ்ஸஹந்தோவ யுஜ்ஜ²தி. ‘‘போ⁴கே³ ச ரக்கி²ஸ்ஸாமி, தா³னஞ்ச த³ஸ்ஸாமீ’’தி வத³ந்தோபி ந த³தா³தி, போ⁴கே³ஸு பன ஆலயம் பிஸ்ஸஜ்ஜேத்வா ‘‘மஹாதா³னம் த³ஸ்ஸாமீ’’தி உஸ்ஸஹந்தோவ தே³தி. ஏவம் தா³னஞ்ச யுத்³த⁴ஞ்ச ஸமம் ஹோதி. கிஞ்ச பி⁴ய்யோ – அப்பாபி ஸந்தா ப³ஹுகே ஜினந்தி, யதா² ச யுத்³தே⁴ அப்பகாபி வீரபுரிஸா ப³ஹுகே பீ⁴ருபுரிஸே ஜினந்தி, ஏவம் ஸத்³தா⁴தி³ஸம்பன்னோ அப்பகம்பி தா³னம் த³த³ந்தோ ப³ஹுவித⁴ம் லோப⁴தோ³ஸஇஸ்ஸாமச்ச²ரியதி³ட்டி²விசிகிச்சா²தி³பே⁴த³ம் தப்படிபக்க²ம் அபி⁴ப⁴வதி, ப³ஹுஞ்ச தா³னவிபாகம் அதி⁴க³ச்ச²தி. ஏவம்பி தா³னஞ்ச யுத்³த⁴ஞ்ச ஸமானம். தேனாஹ ‘‘அப்பம்பி சே ஸத்³த³ஹானோ த³தா³தி, தேனேவ ஸோ ஹோதி ஸுகீ² பரத்தா²’’தி.

அகா³ரஸ்ஸ ஹிதம் கஸிகோ³ரக்கா²தி³ அகா³ரியம், தம் நத்தி² ஏத்தா²தி அனகா³ரியம், பப்³ப³ஜ்ஜாதி ஆஹ ‘‘அகா³ரஸ்ஸ…பே… அனகா³ரியம் பப்³ப³ஜ்ஜ’’ந்தி. ஸப்³பூ³பதி⁴படினிஸ்ஸக்³க³த்தா²யாதி ஏத்த² சத்தாரோ உபதீ⁴ – காமுபதி⁴, க²ந்து⁴பதி⁴, கிலேஸுபதி⁴, அபி⁴ஸங்கா²ருபதீ⁴தி. காமாபி ஹி ‘‘யம் பஞ்ச காமகு³ணே படிச்ச உப்பஜ்ஜதி ஸுக²ம் ஸோமனஸ்ஸம், அயம் காமானம் அஸ்ஸாதோ³’’தி (அ. நி. 9.34) ஏவம் வுத்தஸ்ஸ ஸுக²ஸ்ஸ, தத³ஸ்ஸாத³னிமித்தஸ்ஸ வா து³க்க²ஸ்ஸ அதி⁴ட்டா²னபா⁴வதோ உபதீ⁴யதி ஏத்த² ஸுக²ந்தி இமினா வசனத்தே²ன ‘‘உபதீ⁴’’தி வுச்சந்தி. க²ந்தா⁴பி க²ந்த⁴மூலகஸ்ஸ து³க்க²ஸ்ஸ அதி⁴ட்டா²னபா⁴வதோ, கிலேஸாபி அபாயது³க்க²ஸ்ஸ அதி⁴ட்டா²னபா⁴வதோ, அபி⁴ஸங்கா²ராபி ப⁴வது³க்க²ஸ்ஸ அதி⁴ட்டா²னபா⁴வதோ ‘‘உபதீ⁴’’தி வுச்சந்தி. ஸப்³பே³ஸம் உபதீ⁴னம் படினிஸ்ஸக்³கோ³ பஹானம் ஏத்தா²தி ஸப்³பூ³பதி⁴படினிஸ்ஸக்³க³ம், நிப்³பா³னம். தேனாஹ ‘‘ஸப்³பே³ஸம் க²ந்தூ⁴பதி⁴…பே… நிப்³பா³னஸ்ஸ அத்தா²யா’’தி.

பதா⁴னஸுத்தவண்ணனா நிட்டி²தா.

3. தபனீயஸுத்தவண்ணனா

3. ததியே தபனீயாதி ஏத்த² கத்துஅத்தே² அனீய-ஸத்³தோ³தி ஆஹ ‘‘தபந்தீதி தபனீயா’’தி. தபந்தீதி விபா³தே⁴ந்தி, விஹேடே²ந்தீதி அத்தோ². தபனம் வா து³க்க²ம், தி³ட்டே² சேவ த⁴ம்மே அபி⁴ஸம்பராயஞ்ச தஸ்ஸ உப்பாத³னேன சேவ அனுப³லப்பதா³னேன ச ஹிதாதி தபனீயா. அத² வா தபந்தி தேனாதி தபனம், அனுதாபோ, விப்படிஸாரோதி அத்தோ². தஸ்ஸ ஹேதுபா⁴வதோ ஹிதாதி தபனீயா. அனுஸோசதீதி விப்படிஸாரீ ஹுத்வா கதாகதம் அனுக³ம்ம ஸோசதி. ஸோசனஞ்ஹி கதத்தா ச ஹோதி அகதத்தா ச. ததா² சேவ பாளியம் விப⁴த்தம். நந்த³யக்கா²தீ³னம் வத்தூ²னி பாகடானீதி தானி அத³ஸ்ஸேத்வா த்³வேபா⁴திகவத்து²ம் த³ஸ்ஸேந்தோ ‘‘தே கிரா’’தி ஆதி³மாஹ. தத்த² தேதி த்³வே பா⁴தரோ. புன கிம் மக்³க³ஸீதி புன கிம் இச்ச²ஸி.

தபனீயஸுத்தவண்ணனா நிட்டி²தா.

5. உபஞ்ஞாதஸுத்தவண்ணனா

5. பஞ்சமே இமஞ்ஹி த⁴ம்மத்³வயந்தி குஸலேஸு த⁴ம்மேஸு அஸந்துட்டி²தா, பதா⁴னஸ்மிம் அனோஸக்கனஸங்கா²தம் த⁴ம்மத்³வயம். இமினாதி ‘‘அஸந்துட்டி²தா குஸலேஸு த⁴ம்மேஸூ’’தி வசனேன. இமம் தீ³பேதீதி ‘‘யாவ ஸோ உப்பஜ்ஜதி, ந தாவாஹம் ஸந்துட்டோ² அஹோஸி’’ந்தி ஏதம் பரியந்தம் கத்வா வக்க²மானத்த²ம் தீ³பேதி. பதா⁴னஸ்மிந்தி வீரியாரம்பே⁴. இமமத்த²ந்தி ‘‘பதா⁴னஸ்மிஞ்சா’’திஆதி³னா வுத்தமத்த²ம். வீரியப்பவாஹே வத்தமானே அந்தரா ஏவ படிக³மனம் நிவத்தனம் படிவானம், தத³ஸ்ஸ அத்தீ²தி படிவானீ, ந படிவானீ அப்படிவானீ, தஸ்ஸ பா⁴வோ அப்படிவானிதா, அனோஸக்கனாதி ஆஹ ‘‘அப்படிவானிதாதி அப்படிக்கமனா அனோஸக்கனா’’தி. தத்த² அனோஸக்கனாதி அப்படினிவத்தி.

ஆக³மனீயபடிபதா³தி ஸமத²விபஸ்ஸனாஸங்கா²தா புப்³ப³பா⁴க³படிபத்தி. ஸா ஹி ஆக³ச்ச²ந்தி விஸேஸமதி⁴க³ச்ச²ந்தி ஏதாய, ஆக³ச்ச²தி வா விஸேஸாதி⁴க³மோ ஏதாயாதி ஆக³மனீயா, ஸா ஏவ படிபஜ்ஜிதப்³ப³தோ படிபதா³தி ஆக³மனீயபடிபதா³. அப்படிவானபதா⁴னந்தி ஓஸக்கனாரஹிதப்பதா⁴னம், அந்தரா அனோஸக்கித்வா கதவீரியந்தி அத்தோ².

உபஞ்ஞாதஸுத்தவண்ணனா நிட்டி²தா.

6. ஸம்யோஜனஸுத்தவண்ணனா

6. ச²ட்டே² ஸம்யோஜனானம் ஹிதா பச்சயபா⁴வேனாதி ஸம்யோஜனியா, தேபூ⁴மகா த⁴ம்மா. தேனாஹ ‘‘த³ஸன்னம் ஸம்யோஜனான’’ந்திஆதி³. ஸம்யோஜனியே த⁴ம்மே அஸ்ஸாத³தோ அனுபஸ்ஸதி ஸீலேனாதி அஸ்ஸாதா³னுபஸ்ஸீ, தஸ்ஸ பா⁴வோ அஸ்ஸாதா³னுபஸ்ஸிதா. நிப்³பி³தா³னுபஸ்ஸிதாதி ஏத்தா²பி ஏஸேவ நயோ. உக்கண்ட²னவஸேனாதி ஸம்யோஜனியேஸு தேபூ⁴மகத⁴ம்மேஸு நிப்³பி³ந்த³னவஸேன. ஜனனம் ஜாதி, க²ந்தா⁴னம் பாதுபா⁴வோதி ஆஹ ‘‘ஜாதியாதி க²ந்த⁴னிப்³ப³த்திதோ’’தி, க²ந்தா⁴னம் தத்த² தத்த² ப⁴வே அபராபரம் நிப்³ப³த்திதோதி அத்தோ². க²ந்த⁴பரிபாகோ ஏகப⁴வபரியாபன்னானம் க²ந்தா⁴னம் புராணபா⁴வோ. ஏகப⁴வபரியாபன்னஜீவிதிந்த்³ரியப்பப³ந்த⁴விச்சே²த³வஸேன க²ந்தா⁴னம் பே⁴தோ³ இத⁴ மரணந்தி ஆஹ ‘‘மரணேனாதி க²ந்த⁴பே⁴த³தோ’’தி. அந்தோனிஜ்ஜா²னம் சித்தஸந்தாபோ. பரிதே³வோ நாம ஞாதிப்³யஸனாதீ³ஹி பு²ட்ட²ஸ்ஸ வாசாவிப்பலாபோ. ஸோ ச ஸோகஸமுட்டா²னோதி ஆஹ ‘‘தன்னிஸ்ஸிதலாலப்பிதலக்க²ணேஹி பரிதே³வேஹீ’’தி. லாலப்பிதம் வாசாவிப்பலாபோ, ஸோ ச அத்த²தோ ஸத்³தோ³யேவ.

து³க்க²ந்தி இத⁴ காயிகம் து³க்க²ம் அதி⁴ப்பேதந்தி ஆஹ ‘‘காயபடிபீளனது³க்கே²ஹீ’’தி. மனோவிகா⁴ததோ³மனஸ்ஸேஹீதி மனஸோ விகா⁴தகரேஹி தோ³மனஸ்ஸேஹி. ப்³யாபாத³ஸம்பயோகே³ன மனஸோ விஹனனரஸஞ்ஹி தோ³மனஸ்ஸம். பு⁴ஸோ ஆயாஸோ உபாயாஸோ யதா² ‘‘பு⁴ஸமாதா³னம் உபாதா³ன’’ந்தி, ஸோ ச அத்த²தோ ஞாதிப்³யஸனாதீ³ஹி பு²ட்ட²ஸ்ஸ அதி⁴மத்தசேதோது³க்க²ப்பபா⁴விதோ தோ³ஸோயேவ. காயசித்தானஞ்ஹி ஆயாஸனவஸேன தோ³ஸஸ்ஸேவ பவத்திஆகாரோ உபாயாஸோதி வுச்சதி ஸங்கா²ரக்க²ந்த⁴பரியாபன்னோ. தம் சுத்³த³ஸஹி அகுஸலசேதஸிகேஹி அஞ்ஞோ ஏகோ சேதஸிகத⁴ம்மோதி ஏகே. யம் விஸாதோ³தி ச வத³ந்தி.

ஸம்யோஜனஸுத்தவண்ணனா நிட்டி²தா.

7. கண்ஹஸுத்தவண்ணனா

7. ஸத்தமே யதா² ‘‘கண்ஹா கா³வீ’’திஆதீ³ஸு காளவண்ணேன ஸமன்னாக³தா ‘‘கண்ஹா’’தி வுச்சதி, ந ஏவம் காளவண்ணதாய த⁴ம்மா ‘‘கண்ஹா’’தி வுச்சந்தி, அத² கோ² கண்ஹாபி⁴ஜாதினிப்³ப³த்திஹேதுதோ அப்பப⁴ஸ்ஸரபா⁴வகரணதோ வா ‘‘கண்ஹா’’தி வுச்சந்தீதி த³ஸ்ஸேந்தோ ‘‘ந காளவண்ணதாயா’’திஆதி³மாஹ. கண்ஹதாயாதி கண்ஹாபி⁴ஜாதிதாய. கண்ஹாபி⁴ஜாதீதி ச அபாயா வுச்சந்தி மனுஸ்ஸேஸு ச தோ³ப⁴க்³கி³யம். ஸரஸேனாதி ஸபா⁴வேன. ந ஹிரீயதி ந லஜ்ஜதீதி அஹிரிகோ, புக்³க³லோ, சித்தம், தம் ஸம்பயுத்தத⁴ம்மஸமுதா³யோ வா. தஸ்ஸ பா⁴வோ அஹிரிக்கந்தி வத்தப்³பே³ ஏகஸ்ஸ க-காரஸ்ஸ லோபம் கத்வா அஹிரிகந்தி வுத்தந்தி ஆஹ ‘‘அஹிரிகந்தி அஹிரிகபா⁴வோ’’தி. ந ஓத்தப்பதீதி அனோத்தாபீ, புக்³க³லோ, யதா²வுத்தத⁴ம்மஸமுதா³யோ வா, தஸ்ஸ பா⁴வோ அனோத்தப்பந்தி ஆஹ ‘‘அனோத்தாபிபா⁴வோ’’தி.

கண்ஹஸுத்தவண்ணனா நிட்டி²தா.

8. ஸுக்கஸுத்தவண்ணனா

8. அட்ட²மே ‘‘ஸுக்கம் வத்த²’’ந்திஆதீ³ஸு விய ந வண்ணஸுக்கதாய த⁴ம்மானம் ஸுக்கதா, அத² கோ² ஸுக்காபி⁴ஜாதிஹேதுதோ பப⁴ஸ்ஸரபா⁴வகரணதோ சாதி த³ஸ்ஸேந்தோ ‘‘ந வண்ணஸுக்கதாயா’’திஆதி³மாஹ. ஸுக்கதாயாதி ஸுக்காபி⁴ஜாதிதாய. ஹிரீ பாபத⁴ம்மே கூ³த²ம் விய பஸ்ஸந்தீ ஜிகு³ச்ச²தீதி ஆஹ ‘‘பாபதோ ஜிகு³ச்ச²னலக்க²ணா ஹிரீ’’தி. ஓத்தப்பம் தே உண்ஹம் விய பஸ்ஸந்தம் ததோ பா⁴யதீதி வுத்தம் ‘‘பா⁴யனலக்க²ணம் ஓதப்ப’’ந்தி. இத³ஞ்ச ஹிரோத்தப்பம் அஞ்ஞமஞ்ஞவிப்பயோகீ³ பாபதோ விமுக²பூ⁴தஞ்ச, தஸ்மா நேஸம் இத³ம் நானாகரணம் – அஜ்ஜ²த்தஸமுட்டா²னா ஹிரீ, ப³ஹித்³தா⁴ஸமுட்டா²னம் ஓத்தப்பம். அத்தாதி⁴பதி ஹிரீ, லோகாதி⁴பதி ஓதப்பம். லஜ்ஜாஸபா⁴வஸண்டி²தா ஹிரீ, ப⁴யஸபா⁴வஸண்டி²தம் ஓத்தப்பம். ஸப்பதிஸ்ஸவலக்க²ணா ஹிரீ, வஜ்ஜபீ⁴ருகப⁴யத³ஸ்ஸாவிலக்க²ணம் ஓத்தப்பந்தி.

தத்த² அஜ்ஜ²த்தஸமுட்டா²னம் ஹிரிம் சதூஹி காரணேஹி ஸமுட்டா²பேதி ஜாதிம் பச்சவேக்கி²த்வா, வயம், ஸூரபா⁴வம், பா³ஹுஸச்சம் பச்சவேக்கி²த்வா. கத²ம்? ‘‘பாபகரணம் நாமேதம் ந ஜாதிஸம்பன்னானம் கம்மம், ஹீனஜச்சானம் கேவட்டாதீ³னம் கம்மம், மாதி³ஸஸ்ஸ ஜாதிஸம்பன்னஸ்ஸ இத³ம் காதும் ந யுத்த’’ந்தி ஏவம் தாவ ஜாதிம் பச்சவேக்கி²த்வா பாபம் அகரோந்தோ ஹிரிம் ஸமுட்டா²பேதி. ததா² ‘‘பாபகரணம் நாமேதம் த³ஹரேஹி கத்தப்³ப³ம் கம்மம், மாதி³ஸஸ்ஸ வயே டி²தஸ்ஸ இத³ம் காதும் ந யுத்த’’ந்தி ஏவம் வயம் பச்சவேக்கி²த்வா பாபம் அகரோந்தோ ஹிரிம் ஸமுட்டா²பேதி. ததா² ‘‘பாபகரணம் நாமேதம் து³ப்³ப³லஜாதிகானம் கம்மம், மாதி³ஸஸ்ஸ ஸூரபா⁴வஸம்பன்னஸ்ஸ இத³ம் காதும் ந யுத்த’’ந்தி ஏவம் ஸூரபா⁴வம் பச்சவேக்கி²த்வா பாபம் அகரோந்தோ ஹிரிம் ஸமுட்டா²பேதி. ததா² ‘‘பாபகம்மம் நாமேதம் அந்த⁴பா³லானம் கம்மம், ந பண்டி³தானம், மாதி³ஸஸ்ஸ பண்டி³தஸ்ஸ ப³ஹுஸ்ஸுதஸ்ஸ இத³ம் காதும் ந யுத்த’’ந்தி ஏவம் பா³ஹுஸச்சம் பச்சவேக்கி²த்வா பாபம் அகரோந்தோ ஹிரிம் ஸமுட்டா²பேதி. ஏவம் அஜ்ஜ²த்தஸமுட்டா²னம் ஹிரிம் சதூஹி காரணேஹி ஸமுட்டா²பேதி, ஸமுட்டா²பேந்தோ ச ஹிரிம் நிஸ்ஸாய பாபகம்மம் ந கரோதி.

கத²ம் ப³ஹித்³தா⁴ஸமுட்டா²னம் ஓத்தப்பம்? ‘‘ஸசே த்வம் பாபகம்மம் கரிஸ்ஸஸி, சதூஸு பரிஸாஸு க³ரஹப்பத்தோ ப⁴விஸ்ஸஸி, ததோ தம் ஸீலவந்தோ ஸப்³ரஹ்மசாரீ விவஜ்ஜிஸ்ஸந்தீ’’தி பச்சவேக்கி²த்வா ப³ஹித்³தா⁴ஸமுட்டா²னம் ஓத்தப்பம் நிஸ்ஸாய பாபகம்மம் ந கரோதி. ஏவம் ப³ஹித்³தா⁴ஸமுட்டா²னம் ஓத்தப்பம்.

கத²ம் அத்தாதி⁴பதி ஹிரீ? இதே⁴கச்சோ குலபுத்தோ அத்தானம் அதி⁴பதிம் ஜேட்ட²கம் கத்வா ‘‘மாதி³ஸஸ்ஸ ஸத்³தா⁴பப்³ப³ஜிதஸ்ஸ ப³ஹுஸ்ஸுதஸ்ஸ து⁴தத⁴ரஸ்ஸ ந யுத்தம் பாபகம்மம் காது’’ந்தி பாபம் ந கரோதி. ஏவம் அத்தாதி⁴பதி ஹிரீ. தேனாஹ ப⁴க³வா ‘‘ஸோ அத்தானம்யேவ அதி⁴பதிம் கரித்வா அகுஸலம் பஜஹதி, குஸலம் பா⁴வேதி, ஸாவஜ்ஜம் பஜஹதி, அனவஜ்ஜம் பா⁴வேதி, ஸுத்³த⁴ம் அத்தானம் பரிஹரதீ’’தி (அ. நி. 3.40).

கத²ம் லோகாதி⁴பதி ஓத்தப்பம்? இதே⁴கச்சோ குலபுத்தோ லோகம் அதி⁴பதிம் ஜேட்ட²கம் கத்வா ‘‘ஸசே கோ² த்வம் பாபகம்மம் கரேய்யாஸி, ஸப்³ரஹ்மசாரினோ தாவ தம் ஜானிஸ்ஸந்தி, மஹித்³தி⁴கா மஹானுபா⁴வா லோகே ச ஸமணப்³ராஹ்மணா தே³வதா ச, தஸ்மா தே ந யுத்தம் பாபம் காது’’ந்தி பாபகம்மம் ந கரோதி. யதா²ஹ – ‘‘மஹா கோ² பனாயம் லோகஸன்னிவாஸோ, மஹந்தஸ்மிம் கோ² பன லோகஸன்னிவாஸே ஸந்தி ஸமணப்³ராஹ்மணா இத்³தி⁴மந்தோ தி³ப்³ப³சக்கு²கா பரசித்தவிது³னோ. தே தூ³ரதோபி பஸ்ஸந்தி, ஆஸன்னாபி ந தி³ஸ்ஸந்தி, சேதஸாபி சித்தம் ஜானந்தி, தேபி மம் ஏவம் ஜானிஸ்ஸந்தி ‘பஸ்ஸத², போ⁴, இமம் குலபுத்தம், ஸத்³தா⁴ அகா³ரஸ்மா அனகா³ரியம் பப்³ப³ஜிதோ ஸமானோ வோகிண்ணோ விஹரதி பாபகேஹி அகுஸலேஹி த⁴ம்மேஹீ’தி. ஸந்தி தே³வதா இத்³தி⁴மந்தினியோ தி³ப்³ப³சக்கு²கா பரசித்தவிது³னியோ, தா தூ³ரதோபி பஸ்ஸந்தி, ஆஸன்னாபி ந தி³ஸ்ஸந்தி, சேதஸாபி சித்தம் ஜானந்தி, தாபி மம் ஜானிஸ்ஸந்தி ‘பஸ்ஸத², போ⁴, இமம் குலபுத்தம், ஸத்³தா⁴ அகா³ரஸ்மா அனகா³ரியம் பப்³ப³ஜிதோ ஸமானோ வோகிண்ணோ விஹரதி பாபகேஹி அகுஸலேஹி த⁴ம்மேஹீ’தி…பே… ஸோ லோகம்யேவ அதி⁴பதிம் கரித்வா அகுஸலம்…பே… பரிஹரதீ’’தி. ஏவம் லோகாதி⁴பதி ஓத்தப்பம்.

லஜ்ஜாஸபா⁴வஸண்டி²தாதி ஏத்த² லஜ்ஜாதி லஜ்ஜனாகாரோ, தேன ஸபா⁴வேன ஸண்டி²தா ஹிரீ. ப⁴யந்தி அபாயப⁴யம், தேன ஸபா⁴வேன ஸண்டி²தம் ஓத்தப்பம். தது³ப⁴யம் பாபபரிவஜ்ஜனே பாகடம் ஹோதி. தத்த² யதா² த்³வீஸு அயோகு³ளேஸு ஏகோ ஸீதலோ ப⁴வேய்ய கூ³த²மக்கி²தோ, ஏகோ உண்ஹோ ஆதி³த்தோ. தேஸு யதா² ஸீதலம் கூ³த²மக்கி²தத்தா ஜிகு³ச்ச²ந்தோ விஞ்ஞுஜாதிகோ ந க³ண்ஹாதி, இதரம் டா³ஹப⁴யேன. ஏவம் பண்டி³தோ லஜ்ஜாய ஜிகு³ச்ச²ந்தோ பாபம் ந கரோதி, ஓத்தப்பேன அபாயப⁴யபீ⁴தோ பாபம் ந கரோதி, ஏவம் லஜ்ஜாஸபா⁴வஸண்டி²தா ஹிரீ, ப⁴யஸபா⁴வஸண்டி²தம் ஓத்தப்பம்.

கத²ம் ஸப்பதிஸ்ஸவலக்க²ணா ஹிரீ, வஜ்ஜபீ⁴ருகப⁴யத³ஸ்ஸாவிலக்க²ணம் ஓத்தப்பம்? ஏகச்சோ ஹி ஜாதிமஹத்தபச்சவேக்க²ணா, ஸத்து²மஹத்தபச்சவேக்க²ணா, தா³யஜ்ஜமஹத்தபச்சவேக்க²ணா, ஸப்³ரஹ்மசாரிமஹத்தபச்சவேக்க²ணாதி ஏவம் சதூஹி காரணேஹி தத்த² கா³ரவேன ஸப்பதிஸ்ஸவலக்க²ணம் ஹிரிம் ஸமுட்டா²பேத்வா பாபம் ந கரோதி. ஏகச்சோ அத்தானுவாத³ப⁴யம், பரானுவாத³ப⁴யம், த³ண்ட³ப⁴யம், து³க்³க³திப⁴யந்தி ஏவம் சதூஹி காரணேஹி வஜ்ஜதோ பா⁴யந்தோ வஜ்ஜபீ⁴ருகப⁴யத³ஸ்ஸாவிலக்க²ணம் ஓத்தப்பம் பச்சுபட்டா²பேத்வா பாபகம்மம் ந கரோதி. ஏத்த² ச அஜ்ஜ²த்தஸமுட்டா²னாதி³தா ஹிரோத்தப்பானம் தத்த² தத்த² பாகடபா⁴வேன வுத்தா, ந பன நேஸம் கதா³சி அஞ்ஞமஞ்ஞவிப்பயோகோ³. ந ஹி லஜ்ஜனம் நிப்³ப⁴யம், பாபப⁴யம் வா அலஜ்ஜனம் அத்தீ²தி. ஏவமேத்த² வித்தா²ரதோ அத்த²வண்ணனா வேதி³தப்³பா³.

ஸுக்கஸுத்தவண்ணனா நிட்டி²தா.

9. சரியஸுத்தவண்ணனா

9. நவமே லோகந்தி ஸத்தலோகம். ஸந்தா⁴ரேந்தீதி ஆசாரஸந்தா⁴ரணவஸேன தா⁴ரேந்தி. ட²பேந்தீதி மரியாதா³யம் ட²பேந்தி. ரக்க²ந்தீதி ஆசாரஸந்தா⁴ரணேன மரியாதா³யம் ட²பேத்வா ரக்க²ந்தி. க³ருசித்தீகாரவஸேன ந பஞ்ஞாயேதா²தி க³ரும் கத்வா சித்தே கரணவஸேன ந பஞ்ஞாயேத², அயமாசாரோ ந லப்³பே⁴ய்ய. மாதுச்சா²தி வாதி ஏத்த² இதி-ஸத்³தோ³ ஆத்³யத்தோ². தேன மாதுலானீதி வா ஆசரியப⁴ரியாதி வா க³ரூனம் தா³ராதி வாதி இமே ஸங்க³ண்ஹாதி. தத்த² மாது ப⁴கி³னீ மாதுச்சா². மாதுலப⁴ரியா மாதுலானீ. க³ரூனம் தா³ரா மஹாபிதுசூளபிதுஜேட்ட²பா⁴துஆதீ³னம் க³ருட்டா²னியானம் ப⁴ரியா. யதா² அஜேளகாதிஆதீ³ஸு அயம் ஸங்கே²பத்தோ² – யதா² அஜேளகாத³யோ திரச்சா²னா ஹிரோத்தப்பரஹிதா மாதாதி ஸஞ்ஞம் அகத்வா பி⁴ன்னமரியாதா³ ஸப்³ப³த்த² ஸம்பே⁴தே³ன வத்தந்தி, ஏவமயம் மனுஸ்ஸலோகோ யதி³ லோகபாலத⁴ம்மா ந ப⁴வேய்யும், ஸப்³ப³த்த² ஸம்பே⁴தே³ன வத்தேய்ய. யஸ்மா பனிமே லோகபாலகத⁴ம்மா லோகம் பாலேந்தி, தஸ்மா நத்தி² ஸம்பே⁴தோ³தி.

சரியஸுத்தவண்ணனா நிட்டி²தா.

10. வஸ்ஸூபனாயிகஸுத்தவண்ணனா

10. த³ஸமே அபஞ்ஞத்தாதி அனனுஞ்ஞாதா, அவிஹிதா வா. வஸ்ஸேதி வஸ்ஸாரத்தம் ஸந்தா⁴ய வத³தி, உதுவஸ்ஸேதி ஹேமந்தம் ஸந்தா⁴ய. ஏகிந்த்³ரியம் ஜீவம் விஹேடே²ந்தாதி ருக்க²லதாதீ³ஸு ஜீவஸஞ்ஞிதாய ஏவமாஹம்ஸு. ஏகிந்த்³ரியந்தி ச காயிந்த்³ரியம் அத்தீ²தி மஞ்ஞமானா வத³ந்தி. ஸங்கா⁴தம் ஆபாதே³ந்தாதி வினாஸம் ஆபாதே³ந்தா. ஸம்கஸாயிஸ்ஸந்தீதி அப்போஸ்ஸுக்கா நிப³த்³த⁴வாஸம் வஸிஸ்ஸந்தி. அபரஜ்ஜுக³தாய ஆஸாள்ஹியா உபக³ந்தப்³பா³தி ஏத்த² அபரஜ்ஜு க³தாய அஸ்ஸாதி அபரஜ்ஜுக³தா, தஸ்ஸா அபரஜ்ஜுக³தாய அதிக்கந்தாய, அபரஸ்மிம் தி³வஸேதி அத்தோ², தஸ்மா ஆஸாள்ஹிபுண்ணமாய அனந்தரே பாடிபத³தி³வஸே உபக³ந்தப்³பா³தி ஏவமேத்த² அத்தோ² த³ட்ட²ப்³போ³. மாஸக³தாய ஆஸாள்ஹியா உபக³ந்தப்³பா³தி மாஸோ க³தாய அஸ்ஸாதி மாஸக³தா, தஸ்ஸா மாஸக³தாய அதிக்கந்தாய, மாஸே பரிபுண்ணேதி அத்தோ². தஸ்மா ஆஸாள்ஹிபுண்ணமதோ பராய புண்ணமாய அனந்தரே பாடிபத³தி³வஸே உபக³ந்தப்³பா³தி அத்தோ² த³ட்ட²ப்³போ³.

வஸ்ஸூபனாயிகஸுத்தவண்ணனா நிட்டி²தா.

கம்மகாரணவக்³க³வண்ணனாய லீனத்த²ப்பகாஸனா நிட்டி²தா.