(7) 2. யமகவக்³கோ³

1-7. அவிஜ்ஜாஸுத்தாதி³வண்ணனா

61-67. து³தியஸ்ஸ பட²மாதீ³னி உத்தானத்தா²னி. ஸத்தமே நளகபானகேதி ஏவம்னாமகே நிக³மே. புப்³பே³ கிர (ஜா. அட்ட². 1.1.19 ஆத³யோ) அம்ஹாகம் போ³தி⁴ஸத்தோ கபியோனியம் நிப்³ப³த்தோ மஹாகாயோ கபிராஜா ஹுத்வா அனேகஸதவானரஸஹஸ்ஸபரிவுதோ பப்³ப³தபாதே³ விசரி, பஞ்ஞவா கோ² பன ஹோதி மஹாபஞ்ஞோ. ஸோ பரிஸம் ஏவம் ஓவத³தி, ‘‘தாதா, இமஸ்மிம் பப்³ப³தபாதே³ விஸப²லானி ஹோந்தி, அமனுஸ்ஸபரிக்³க³ஹிதா போக்க²ரணிகா நாம ஹோந்தி, தும்ஹே புப்³பே³ கா²தி³தபுப்³பா³னேவ ப²லானி கா²த³த², பீதபுப்³பா³னேவ பானீயானி பிவத², ஏத்த² வோ படிபுச்சி²தகிச்சம் நத்தீ²’’தி. தே அபீதபுப்³ப³ம் தி³ஸ்வா ஸஹஸாவ அபிவித்வா ஸமந்தா பரிதா⁴வித்வா மஹாஸத்தஸ்ஸ ஆக³மனம் ஓலோகயமானா நிஸீதி³ம்ஸு. மஹாஸத்தோ ஆக³ந்த்வா ‘‘கிம், தாதா, பானீயம் ந பிவதா²’’தி ஆஹ. தும்ஹாகம் ஆக³மனம் ஓலோகேமாதி. ‘‘ஸாது⁴, தாதா’’தி ஸமந்தா பத³ம் பரியேஸமானோ ஓதிண்ணபத³ம்யேவ அத்³த³ஸ, ந உத்திண்ணபத³ம். அதி³ஸ்வா ‘‘ஸபரிஸ்ஸயா’’தி அஞ்ஞாஸி. தாவதே³வ ச தத்த² அபி⁴னிப்³ப³த்தஅமனுஸ்ஸோ உத³கம் த்³வேதா⁴ கத்வா உட்டா²ஸி – ஸேதமுகோ², நீலகுச்சி², ரத்தஹத்த²பாதோ³, மஹாதா³டி²கோ, வந்ததா³டோ², விரூபோ, பீ³ப⁴ச்சோ², உத³கரக்க²ஸோ. ஸோ ஏவமாஹ – ‘‘கஸ்மா பானீயம் ந பிவத², மது⁴ரம் உத³கம் பிவத², கிம் தும்ஹே ஏதஸ்ஸ வசனம் ஸுணாதா²’’தி. மஹாஸத்தோ ஆஹ ‘‘த்வம் அதி⁴வத்தோ² அமனுஸ்ஸோ’’தி? ஆமாஹந்தி. ‘‘த்வம் இத⁴ ஓதிண்ணே லப⁴ஸீ’’தி ஆஹ. ஆம, தும்ஹே பன ஸப்³பே³ கா²தி³ஸ்ஸாமீதி. ந ஸக்கி²ஸ்ஸஸி யக்கா²தி. பானீயம் பன பிவிஸ்ஸதா²தி. ஆம, பிவிஸ்ஸாமாதி. ஏவம் ஸந்தே ஏகம்பி வானரம் ந முஞ்சிஸ்ஸந்தி. ‘‘பானீயஞ்ச பிவிஸ்ஸாம, ந ச தே வஸம் க³மிஸ்ஸாமா’’தி நளம் ஆஹராபேத்வா கோடியம் க³ஹேத்வா த⁴மி. ஸப்³போ³ ஏகச்சி²த்³தோ³ அஹோஸி. தீரே நிஸீதி³த்வாவ பானீயம் பிவி. ஸேஸவானரானம்பி பாடியேக்கம் நளம் ஆஹராபேத்வா த⁴மித்வா அதா³ஸி. ஸப்³பே³ தே பஸ்ஸந்தஸ்ஸேவ பானீயம் பிவிம்ஸு. வுத்தம்பி சேதம் –

‘‘தி³ஸ்வா பத³மனுத்திண்ணம், தி³ஸ்வானோதரிதம் பத³ம்;

நளேன வாரிம் பிஸ்ஸாம, நேவ மம் த்வம் வதி⁴ஸ்ஸஸீ’’தி. (ஜா. 1.1.20);

ததோ பட்டா²ய யாவ அஜ்ஜதி³வஸா தஸ்மிம் டா²னே நளா ஏகச்சி²த்³தா³வ ஹோந்தி. இமஸ்மிஞ்ஹி கப்பே கப்பட்டி²யபாடிஹாரியானி நாம சந்தே³ ஸஸலக்க²ணம் (ஜா. 1.4.61 ஆத³யோ), வட்டஜாதகே (ஜா. 1.1.35) ஸச்சகிரியட்டா²னே அக்³கி³ஜாலஸ்ஸ ஆக³மனுபச்சே²தோ³, க⁴டீகாரஸ்ஸ மாதாபிதூனம் வஸனட்டா²னே அனோவஸ்ஸனம் (ம. நி. 2.291), போக்க²ரணியா தீரே நளானம் ஏகச்சி²த்³த³பா⁴வோதி. இதி ஸா போக்க²ரணீ நளேன பானீயஸ்ஸ பிவிதத்தா ‘‘நளகபானகா’’தி நாமம் லபி⁴. அபரபா⁴கே³ தம் போக்க²ரணிம் நிஸ்ஸாய நிக³மோ பதிட்டா²ஸி, தஸ்ஸபி ‘‘நளகபான’’ந்த்வேவ நாமம் ஜாதம். தம் பன ஸந்தா⁴ய வுத்தம் ‘‘நளகபானே’’தி. பலாஸவனேதி கிம்ஸுகவனே.

துண்ஹீபூ⁴தம் துண்ஹீபூ⁴தந்தி ப்³யாபனிச்சா²யம் இத³ம் ஆமேடி³தவசனந்தி த³ஸ்ஸேதும் ‘‘யம் யம் தி³ஸ’’ந்திஆதி³ வுத்தம். அனுவிலோகேத்வாதி ஏத்த² அனு-ஸத்³தோ³ ‘‘பரீ’’தி இமினா ஸமானத்தோ²தி ஆஹ ‘‘ததோ ததோ விலோகேத்வா’’தி. கஸ்மா ஆகி³லாயதி கோடிஸஹஸ்ஸஹத்தி²னாகா³னம் ப³லம் தா⁴ரேந்தஸ்ஸாதி சோத³கஸ்ஸ அதி⁴ப்பாயோ. ஆசரியோ பனஸ்ஸ ‘‘ஏஸ ஸங்கா²ரானம் ஸபா⁴வோ, யதி³த³ம் அனிச்சதா. யே பன அனிச்சா, தே ஏகந்தேனேவ உத³யவயப்படிபீளிததாய து³க்கா² ஏவ. து³க்க²ஸபா⁴வேஸு தேஸு ஸத்து²காயே து³க்கு²ப்பத்தியா அயம் பச்சயோ’’தி த³ஸ்ஸேதும் ‘‘ப⁴க³வதோ’’திஆதி³ வுத்தம். பிட்டி²வாதோ உப்பஜ்ஜி, ஸோ ச கோ² புப்³பே³கதகம்மபச்சயா. ஏத்தா²ஹ ‘‘கிம் பன தம் கம்மம், யேன அபரிமாணகாலம் ஸக்கச்சம் உபசிதவிபுலபுஞ்ஞஸம்பா⁴ரோ ஸத்தா² ஏவரூபம் து³க்க²விபாகமனுப⁴வதீ’’தி? வுச்சதே – அயமேவ ப⁴க³வா போ³தி⁴ஸத்தபூ⁴தோ அதீதஜாதியம் மல்லபுத்தோ ஹுத்வா பாபஜனஸேவீ அயோனிஸோமனஸிகாரப³ஹுலோ சரதி. ஸோ ஏகதி³வஸம் நிப்³பு³த்³தே⁴ வத்தமானே ஏகம் மல்லபுத்தம் க³ஹேத்வா கா³ள்ஹதரம் நிப்பீளேஸி. தேன கம்மேன இதா³னி பு³த்³தோ⁴ ஹுத்வாபி து³க்க²மனுப⁴வி. யதா² சேதம், ஏவம் சிஞ்சமாணவிகாதீ³னமித்தீ²னம் யானி ப⁴க³வதோ அப்³ப⁴க்கா²னாதீ³னி து³க்கா²னி, ஸப்³பா³னி புப்³பே³கதஸ்ஸ விபாகாவஸேஸானி, யானி கம்மபிலோதிகானீதி வுச்சந்தி. வுத்தஞ்ஹேதம் அபதா³னே (அப. தே²ர 1.39.64-96) –

‘‘அனோதத்தஸராஸன்னே, ரமணீயே ஸிலாதலே;

நானாரதனபஜ்ஜோதே, நானாக³ந்த⁴வனந்தரே.

‘‘மஹதா பி⁴க்கு²ஸங்கே⁴ன, பரேதோ லோகனாயகோ;

ஆஸீனோ ப்³யாகரீ தத்த², புப்³ப³கம்மானி அத்தனோ.

‘‘ஸுணாத² பி⁴க்க²வோ மய்ஹம், யம் கம்மம் பகதம் மயா;

பிலோதிகஸ்ஸ கம்மஸ்ஸ, பு³த்³த⁴த்தேபி விபச்சதி.

1. ‘‘முனாளி நாமஹம் து⁴த்தோ, புப்³பே³ அஞ்ஞாஸு ஜாதிஸு;

பச்சேகபு³த்³த⁴ம் ஸுரபி⁴ம், அப்³பா⁴சிக்கி²ம் அதூ³ஸகம்.

‘‘தேன கம்மவிபாகேன, நிரயே ஸம்ஸரிம் சிரம்;

ப³ஹூ வஸ்ஸஸஹஸ்ஸானி, து³க்க²ம் வேதே³ஸி வேத³னம்.

‘‘தேன கம்மாவஸேஸேன, இத⁴ பச்சி²மகே ப⁴வே;

அப்³ப⁴க்கா²னம் மயா லத்³த⁴ம், ஸுந்த³ரிகாய காரணா.

2. ‘‘ஸப்³பா³பி⁴பு⁴ஸ்ஸ பு³த்³த⁴ஸ்ஸ, நந்தோ³ நாமாஸி ஸாவகோ;

தம் அப்³ப⁴க்கா²ய நிரயே, சிரம் ஸம்ஸரிதம் மயா.

‘‘த³ஸ வஸ்ஸஸஹஸ்ஸானி, நிரயே ஸம்ஸரிம் சிரம்;

மனுஸ்ஸபா⁴வம் லத்³தா⁴ஹம், அப்³ப⁴க்கா²னம் ப³ஹும் லபி⁴ம்.

‘‘தேன கம்மாவஸேஸேன, சிஞ்சமாணவிகா மமம்;

அப்³பா⁴சிக்கி² அபூ⁴தேன, ஜனகாயஸ்ஸ அக்³க³தோ.

3. ‘‘ப்³ராஹ்மணோ ஸுதவா ஆஸிம், அஹம் ஸக்கதபூஜிதோ;

மஹாவனே பஞ்சஸதே, மந்தே வாசேஸி மாணவே.

‘‘தத்தா²க³தோ இஸி பீ⁴மோ, பஞ்சாபி⁴ஞ்ஞோ மஹித்³தி⁴கோ;

தஞ்சாஹம் ஆக³தம் தி³ஸ்வா, அப்³பா⁴சிக்கி²ம் அதூ³ஸகம்.

‘‘ததோஹம் அவசம் ஸிஸ்ஸே, காமபோ⁴கீ³ அயம் இஸி;

மய்ஹம்பி பா⁴ஸமானஸ்ஸ, அனுமோதி³ம்ஸு மாணவா.

‘‘ததோ மாணவகா ஸப்³பே³, பி⁴க்க²மானம் குலே குலே;

மஹாஜனஸ்ஸ ஆஹம்ஸு, காமபோ⁴கீ³ அயம் இஸி.

‘‘தேன கம்மவிபாகேன, பஞ்ச பி⁴க்கு²ஸதா இமே;

அப்³ப⁴க்கா²னம் லபு⁴ம் ஸப்³பே³, ஸுந்த³ரிகாய காரணா.

4. ‘‘வேமாதுபா⁴தரம் புப்³பே³, த⁴னஹேது ஹனிம் அஹம்;

பக்கி²பிம் கி³ரிது³க்³க³ஸ்மிம், ஸிலாய ச அபிம்ஸயிம்.

‘‘தேன கம்மவிபாகேன, தே³வத³த்தோ ஸிலம் கி²பி;

அங்கு³ட்ட²ம் பிம்ஸயீ பாதே³, மம பாஸாணஸக்க²ரா.

5. ‘‘புரேஹம் தா³ரகோ ஹுத்வா, கீளமானோ மஹாபதே²;

பச்சேகபு³த்³த⁴ம் தி³ஸ்வான, மக்³கே³ ஸகலிகம் கி²பிம்.

‘‘தேன கம்மவிபாகேன, இத⁴ பச்சி²மகே ப⁴வே;

வத⁴த்த²ம் மம் தே³வத³த்தோ, அபி⁴மாரே பயோஜயி.

6. ‘‘ஹத்தா²ரோஹோ புரே ஆஸிம், பச்சேகமுனிமுத்தமம்;

பிண்டா³ய விசரந்தம் தம், ஆஸாதே³ஸிம் க³ஜேனஹம்.

‘‘தேன கம்மவிபாகேன, ப⁴ந்தோ நாளாகி³ரீ க³ஜோ;

கி³ரிப்³ப³ஜே புரவரே, தா³ருணோ ஸமுபாக³மி.

7. ‘‘ராஜாஹம் பத்தி²வோ ஆஸிம், ஸத்தியா புரிஸம் ஹனிம்;

தேன கம்மவிபாகேன, நிரயே பச்சிஸம் பு⁴ஸம்.

‘‘கம்முனோ தஸ்ஸ ஸேஸேன, இதா³னி ஸகலம் மம;

பாதே³ ச²விம் பகப்பேஸி, ந ஹி கம்மம் வினஸ்ஸதி.

8. ‘‘அஹம் கேவட்டகா³மஸ்மிம், அஹும் கேவட்டதா³ரகோ;

மச்ச²கே கா⁴திதே தி³ஸ்வா, ஜனயிம் ஸோமனஸ்ஸகம்.

‘‘தேன கம்மவிபாகேன, ஸீஸது³க்க²ம் அஹூ மம;

ஸப்³பே³ ஸக்கா ச ஹஞ்ஞிம்ஸு, யதா³ ஹனி விடடூபோ⁴.

9. ‘‘பு²ஸ்ஸஸ்ஸாஹம் பாவசனே, ஸாவகே பரிபா⁴ஸயிம்;

யவம் கா²த³த² பு⁴ஞ்ஜத², மா ச பு⁴ஞ்ஜத² ஸாலயோ.

‘‘தேன கம்மவிபாகேன, தேமாஸம் கா²தி³தம் யவம்;

நிமந்திதோ ப்³ராஹ்மணேன, வேரஞ்ஜாயம் வஸிம் ததா³.

10. ‘‘நிப்³பு³த்³தே⁴ வத்தமானம்ஹி, மல்லபுத்தம் நிஹேட²யிம்;

தேன கம்மவிபாகேன, பிட்டி²து³க்க²ம் அஹூ மம.

11. ‘‘திகிச்ச²கோ அஹம் ஆஸிம், ஸேட்டி²புத்தம் விரேசயிம்;

தேன கம்மவிபாகேன, ஹோதி பக்க²ந்தி³கா மம.

12. ‘‘அவசாஹம் ஜோதிபாலோ, ஸுக³தம் கஸ்ஸபம் ததா³;

குதோ நு போ³தி⁴ முண்ட³ஸ்ஸ, போ³தி⁴ பரமது³ல்லபா⁴.

‘‘தேன கம்மவிபாகேன, அசரிம் து³க்கரம் ப³ஹும்;

ச²ப்³ப³ஸ்ஸானுருவேலாயம், ததோ போ³தி⁴மபாபுணிம்.

‘‘நாஹம் ஏதேன மக்³கே³ன, பாபுணிம் போ³தி⁴முத்தமம்;

கும்மக்³கே³ன க³வேஸிஸ்ஸம், புப்³ப³கம்மேன வாரிதோ.

‘‘புஞ்ஞபாபபரிக்கீ²ணோ, ஸப்³ப³ஸந்தாபவஜ்ஜிதோ;

அஸோகோ அனுபாயாஸோ, நிப்³பா³யிஸ்ஸமனாஸவோ.

‘‘ஏவம் ஜினோ வியாகாஸி, பி⁴க்கு²ஸங்க⁴ஸ்ஸ அக்³க³தோ;

ஸப்³பா³பி⁴ஞ்ஞாப³லப்பத்தோ, அனோதத்தே மஹாஸரே’’தி. (அப. தே²ர 1.39.64-96);

அவிஜ்ஜாஸுத்தாதி³வண்ணனா நிட்டி²தா.

9-10. பட²மகதா²வத்து²ஸுத்தாதி³வண்ணனா

69-70. நவமே (தீ³. நி. டீ. 1.17; தீ³. நி. அபி⁴. டீ. 1.17; ஸம். நி. டீ. 2.5.1080) து³க்³க³திதோ ஸம்ஸாரதோ ச நிய்யாதி ஏதேனாதி நிய்யானம், ஸக்³க³மக்³கோ³, மோக்க²மக்³கோ³ ச. தம் நிய்யானம் அரஹதி, நிய்யானே வா நியுத்தா, நிய்யானம் வா ப²லபூ⁴தம் ஏதிஸ்ஸா அத்தீ²தி நிய்யானிகா. வசீது³ச்சரிதஸம்கிலேஸதோ நிய்யாதீதி வா ஈகாரஸ்ஸ ரஸ்ஸத்தம், யகாரஸ்ஸ ச ககாரம் கத்வா நிய்யானிகா, சேதனாய ஸத்³தி⁴ம் ஸம்ப²ப்பலாபா வேரமணி. தப்படிபக்க²தோ அனிய்யானிகா, தஸ்ஸா பா⁴வோ அனிய்யானிகத்தம், தஸ்மா அனிய்யானிகத்தா. திரச்சா²னபூ⁴தந்தி திரோகரணபூ⁴தம். கே³ஹஸ்ஸிதகதா²தி கே³ஹப்படிஸம்யுத்தா. கம்மட்டா²னபா⁴வேதி அனிச்சதாபடிஸம்யுத்தசதுஸச்சகம்மட்டா²னபா⁴வே.

ஸஹ அத்தே²னாதி ஸாத்த²கம், ஹிதப்படிஸம்யுத்தந்தி அத்தோ². ‘‘ஸுராகதா²’’திபி பாடோ²தி ஆஹ ‘‘ஸுராகத²ந்தி பாளியம் பனா’’தி. ஸா பனேஸா கதா² ‘‘ஏவரூபா நவஸுரா பீதா ரதிஜனனீ ஹோதீ’’தி அஸ்ஸாத³வஸேன ந வட்டதி, ஆதீ³னவவஸேன பன ‘‘உம்மத்தகஸம்வத்தனிகா’’திஆதி³னா நயேன வட்டதி. தேனாஹ ‘‘அனேகவித⁴ம்…பே… ஆதீ³னவவஸேன வட்டதீ’’தி. விஸிகா²தி க⁴ரஸன்னிவேஸோ. விஸிகா²க³ஹணேன ச தன்னிவாஸினோ க³ஹிதா ‘‘கா³மோ ஆக³தோ’’திஆதீ³ஸு விய. தேனேவாஹ ‘‘ஸூரா ஸமத்தா²’’தி ச ‘‘ஸத்³தா⁴ பஸன்னா’’தி ச. கும்ப⁴ட்டா²னப்பதே³ஸேன கும்ப⁴தா³ஸியோ வுத்தாதி ஆஹ ‘‘கும்ப⁴தா³ஸிகதா² வா’’தி.

ராஜகதா²தி³புரிமகதா²ய, லோகக்கா²யிகாதி³பச்சி²மகதா²ய வா வினிமுத்தா புரிமபச்சி²மகதா² விமுத்தா. உப்பத்திடி²திஸம்ஹாராதி³வஸேன லோகம் அக்கா²யதீதி லோகக்கா²யிகா. அஸுகேன நாமாதி பஜாபதினா ப்³ரஹ்முனா, இஸ்ஸரேன வா. விதண்ட³ஸல்லாபகதா²தி ‘‘அட்டீ²னம் ஸேதத்தா ஸேதோதி ந வத்தப்³போ³, பத்தானம் காளத்தா காளோதி பன வத்தப்³போ³’’தி ஏவமாதி³கா. ஆதி³-ஸத்³தே³ன ‘‘ஸேலபுப்ப²லகானி விய ஜீவிதா³விரபாரயத்திவிஸாலா நத்தி², யம் யோ கோசி திரியாமானா கதத்தா’’தி ஏவமாதீ³னம் ஸங்க³ஹோ த³ட்ட²ப்³போ³. ஸாக³ரதே³வேனாதி ஸாக³ரபுத்தராஜூஹி. க²தோதி ஏதம் ஏகவசனம் தேஹி பச்சேகம் க²தத்தா ‘‘ஸாக³ரதே³வேன க²தத்தா’’தி வுத்தம். ஸஹமுத்³தா³ ஸமுத்³தோ³தி வுத்தோ. ப⁴வதி வத்³த⁴தி ஏதேனாதி ப⁴வோ. ப⁴வாப⁴வா ஹோந்தீதி இதிப⁴வாப⁴வகதா². ஏத்த² ச ப⁴வோதி ஸஸ்ஸதம், அப⁴வோதி உச்சே²த³ம். ப⁴வோதி வுத்³தி⁴, அப⁴வோதி ஹானி. ப⁴வோதி காமஸுக²ம், அப⁴வோதி அத்தகிலமதோ²தி இதி இமாய ச²ப்³பி³தா⁴ய இதிப⁴வாப⁴வகதா²ய ஸத்³தி⁴ம் பா³த்திம்ஸ திரச்சா²னகதா² நாம ஹோந்தி. அத² வா பாளியம் ஸரூபதோ அனாக³தாபி அரஞ்ஞபப்³ப³தனதீ³தீ³பகதா² இதிஸத்³தே³ன ஸங்க³ண்ஹித்வா பா³த்திம்ஸ திரச்சா²னகதா² வுத்தா. த³ஸமே நத்தி² வத்தப்³ப³ம்.

பட²மகதா²வத்து²ஸுத்தாதி³வண்ணனா நிட்டி²தா.

யமகவக்³க³வண்ணனா நிட்டி²தா.