(12) 2. பச்சோரோஹணிவக்³கோ³

1-4. பட²மஅத⁴ம்மஸுத்தாதி³வண்ணனா

113-6. து³தியஸ்ஸ பட²மது³தியானி உத்தானத்தா²னி. ததியே ஜானம் ஜானாதீதி ஸப்³ப³ஞ்ஞுதஞ்ஞாணேன ஜானிதப்³ப³ம் ஸப்³ப³ம் ஜானாதி ஏவ. ந ஹி பதே³ஸஞாணே டி²தோ ஜானிதப்³ப³ம் ஸப்³ப³ம் ஜானாதி. உக்கட்ட²னித்³தே³ஸேன ஹி அவிஸேஸக்³க³ஹணேன ச ‘‘ஜான’’ந்தி இமினா நிரவஸேஸம் ஞேய்யஜாதம் பரிக்³க³ய்ஹதீதி தப்³பி³ஸயாய ஜானனகிரியாய ஸப்³ப³ஞ்ஞுதஞ்ஞாணமேவ கரணம் ப⁴விதும் யுத்தம், பகரணவஸேன ‘‘ப⁴க³வா’’தி ஸத்³த³ந்தரஸன்னிதா⁴னேன ச அயமத்தோ² விபா⁴வேதப்³போ³. பஸ்ஸிதப்³ப³மேவ பஸ்ஸதீதி தி³ப்³ப³சக்கு²பஞ்ஞாசக்கு²த⁴ம்மசக்கு²பு³த்³த⁴சக்கு²ஸமந்தசக்கு²ஸங்கா²தேஹி ஞாணசக்கூ²ஹி பஸ்ஸிதப்³ப³ம் பஸ்ஸதி ஏவ. அத² வா ஜானம் ஜானாதீதி யதா² அஞ்ஞே ஸவிபல்லாஸா காமரூபபரிஞ்ஞாவாதி³னோ ஜானந்தாபி விபல்லாஸவஸேன ஜானந்தி, ந ஏவம் ப⁴க³வா. ப⁴க³வா பன பஹீனவிபல்லாஸத்தா ஜானந்தோ ஜானாதி ஏவ, தி³ட்டி²த³ஸ்ஸனஸ்ஸ அபா⁴வா பஸ்ஸந்தோ பஸ்ஸதியேவாதி அத்தோ². சக்கு² விய பூ⁴தோதி த³ஸ்ஸனபரிணாயகட்டே²ன சக்கு² விய பூ⁴தோ. யதா² ஹி சக்கு² ஸத்தானம் த³ஸ்ஸனத்த²ம் பரிணேதி ஸாதே⁴தி, ஏவம் லோகஸ்ஸ யாதா²வத³ஸ்ஸனஸாத⁴னதோபி த³ஸ்ஸனகிச்சபரிணாயகட்டே²ன சக்கு² விய பூ⁴தோ, பஞ்ஞாசக்கு²மயத்தா வா ஸயம்பு⁴ஞாணேன பஞ்ஞாசக்கு²ம் பூ⁴தோ பத்தோதி வா சக்கு²பூ⁴தோ.

ஞாணஸபா⁴வோதி விதி³தகரணட்டே²ன ஞாணஸபா⁴வோ. அவிபரீதஸபா⁴வட்டே²ன பரியத்தித⁴ம்மப்பவத்தனதோ வா ஹத³யேன சிந்தேத்வா வாசாய நிச்சா²ரிதத⁴ம்மமயோதி த⁴ம்மபூ⁴தோ. தேனாஹ ‘‘த⁴ம்மஸபா⁴வோ’’தி. த⁴ம்மா வா போ³தி⁴பக்கி²யா தேஹி உப்பன்னத்தா லோகஸ்ஸ ச தது³ப்பாத³னதோ, அனஞ்ஞஸாதா⁴ரணம் வா த⁴ம்மம் பத்தோ அதி⁴க³தோதி த⁴ம்மபூ⁴தோ. ஸேட்ட²ட்டே²ன ப்³ரஹ்மபூ⁴தோதி ஆஹ ‘‘ஸேட்ட²ஸபா⁴வோ’’தி. அத² வா ப்³ரஹ்மா வுச்சதி மக்³கோ³, தேன உப்பன்னத்தா லோகஸ்ஸ ச தது³ப்பாத³னதோ, தஞ்ச ஸயம்பு⁴ஞாணேன பத்தோதி ப்³ரஹ்மபூ⁴தோ. சதுஸச்சத⁴ம்மம் வத³தீதி வத்தா. சிரம் ஸச்சப்படிவேத⁴ம் பவத்தேந்தோ வத³தீதி பவத்தா. அத்த²ம் நீஹரித்வாதி து³க்கா²தி³அத்த²ம் தத்தா²பி பீளனாதி³அத்த²ம் உத்³த⁴ரித்வா. பரமத்த²ம் வா நிப்³பா³னம் பாபயிதா நின்னேதா. அமதாதி⁴க³மபடிபத்திதே³ஸனாய அமதஸச்சி²கிரியம் ஸத்தேஸு உப்பாதே³ந்தோ அமதம் த³தா³தீதி அமதஸ்ஸ தா³தா. போ³தி⁴பக்கி²யத⁴ம்மானம் ததா³யத்தபா⁴வதோ த⁴ம்மஸாமீ. சதுத்தே² நத்தி² வத்தப்³ப³ம்.

பட²மஅத⁴ம்மஸுத்தாதி³வண்ணனா நிட்டி²தா.

5-42. ஸங்கா³ரவஸுத்தாதி³வண்ணனா

117-154. பஞ்சமே அப்பகாதி தோ²கா, ந ப³ஹூ. அதா²யம் இதரா பஜாதி யா பனாயம் அவஸேஸா பஜா ஸக்காயதி³ட்டி²தீரமேவ அனுதா⁴வதி, அயமேவ ப³ஹுதராதி அத்தோ². ஸம்மத³க்கா²தேதி ஸம்மா அக்கா²தே ஸுகதி²தே. த⁴ம்மேதி தவ தே³ஸனாத⁴ம்மே. த⁴ம்மானுவத்தினோதி தம் த⁴ம்மம் ஸுத்வா தத³னுச்ச²விகம் படிபத³ம் பூரேத்வா மக்³க³ப²லஸச்சி²கரணேன த⁴ம்மானுவத்தினோ. மச்சுனோ டா²னபூ⁴தந்தி கிலேஸமாரஸங்கா²தஸ்ஸ மச்சுனோ நிவாஸட்டா²னபூ⁴தம். ஸுது³த்தரம் தரித்வா பாரமேஸ்ஸந்தீதி யே ஜனா த⁴ம்மானுவத்தினோ, தே ஏதம் ஸுது³த்தரம் து³ரதிக்கமம் மாரதே⁴ய்யம் தரித்வா அதிக்கமித்வா நிப்³பா³னபாரம் க³மிஸ்ஸந்தி.

கண்ஹம் த⁴ம்மம் விப்பஹாயாதி காயது³ச்சரிதாதி³பே⁴த³ம் அகுஸலம் த⁴ம்மம் ஜஹித்வா. ஸுக்கம் பா⁴வேதா²தி பண்டி³தோ பி⁴க்கு² அபி⁴னிக்க²மனதோ பட்டா²ய யாவ அரஹத்தமக்³கா³ காயஸுசரிதாதி³பே⁴த³ம் ஸுக்கம் த⁴ம்மம் பா⁴வேய்ய. ஓகா அனோகமாக³ம்மாதி ஓகம் வுச்சதி ஆலயோ, அனோகம் வுச்சதி அனாலயோ. ஆலயதோ நிக்க²மித்வா அனாலயஸங்கா²தம் நிப்³பா³னம் படிச்ச ஆரப்³ப⁴.

தத்ராபி⁴ரதிமிச்சே²ய்யாதி யஸ்மிம் அனாலயஸங்கா²தே விவேகே நிப்³பா³னே இமேஹி ஸத்தேஹி து³ரபி⁴ரமம், தத்ராபி⁴ரதிமிச்சே²ய்ய. து³விதே⁴பி காமேதி வத்து²காமகிலேஸகாமே. சித்தக்லேஸேஹீதி பஞ்சஹி நீவரணேஹி அத்தானம் பரியோத³பேய்ய வோதா³பேய்ய, பரிஸோதே⁴ய்யாதி அத்தோ².

ஸம்போ³தி⁴யங்கே³ஸூதி ஸம்போ³ஜ்ஜ²ங்கே³ஸு. ஸம்மா சித்தம் ஸுபா⁴விதந்தி ஸம்மா ஹேதுனா நயேன சித்தம் ஸுட்டு² பா⁴விதம் வட்³டி⁴தம். ஜுதிமந்தோதி ஆனுபா⁴வவந்தோ, அரஹத்தமக்³க³ஞாணஜுதியா க²ந்தா⁴தி³பே⁴தே³ த⁴ம்மே ஜோதேத்வா டி²தாதி அத்தோ². தே லோகே பரினிப்³பு³தாதி தே இமஸ்மிம் க²ந்தா⁴தி³லோகே பரினிப்³பு³தா நாம அரஹத்தப்பத்திதோ பட்டா²ய கிலேஸவட்டஸ்ஸ கே²பிதத்தா ஸஉபாதி³ஸேஸேன, சரிமசித்தனிரோதே⁴ன க²ந்த⁴வட்டஸ்ஸ கே²பிதத்தா அனுபாதி³ஸேஸேன சாதி த்³வீஹி பரினிப்³பா³னேஹி பரினிப்³பு³தா, அனுபாதா³னோ விய பதீ³போ அபண்ணத்திகபா⁴வம் க³தாதி அத்தோ².

இதோ பரம் யாவ ததியோ பண்ணாஸகோ, தாவ உத்தானத்த²மேவ.

ஸங்கா³ரவஸுத்தாதி³வண்ணனா நிட்டி²தா.

ததியபண்ணாஸகம் நிட்டி²தம்.

4. சதுத்த²பண்ணாஸகம்

155-166. சதுத்த²ஸ்ஸ பட²மவக்³கோ³ உத்தானத்தோ²யேவ.

1-44. ப்³ராஹ்மணபச்சோரோஹணீஸுத்தாதி³வண்ணனா

167-210. து³தியே ச பட²மாதீ³னி உத்தானத்தா²னி. த³ஸமே பச்சா²பூ⁴மிவாஸினோதி பச்சந்ததே³ஸவாஸினோ. ஸேவாலமாலிகாதி பாதோவ உத³கம் ஓரோஹித்வா ஸேவாலஞ்சேவ உப்பலாதீ³னி ச க³ஹேத்வா அத்தனோ உத³கஸுத்³தி⁴கபா⁴வஜானனத்த²ஞ்சேவ ‘‘லோகஸ்ஸ ச உத³கேன ஸுத்³தி⁴ ஹோதீ’’தி இமஸ்ஸ அத்த²ஸ்ஸ ஜானனத்த²ஞ்ச மாலம் கத்வா பிலந்த⁴னகா. உத³கோரோஹகாதி பாதோ மஜ்ஜ²ன்ஹே ஸாயன்ஹே ச உத³கஓரோஹணகா. தேனாஹ ‘‘ஸாயததியகம் உத³கோரோஹணானுயோக³மனுயுத்தா’’தி. ஏகாத³ஸமாதீ³னி உத்தானத்தா²னி. சதுத்தே² பண்ணாஸகே நத்தி² வத்தப்³ப³ம்.

ப்³ராஹ்மணபச்சோரோஹணீஸுத்தாதி³வண்ணனா நிட்டி²தா.

சதுத்த²பண்ணாஸகம் நிட்டி²தம்.