3. அகம்மனியவக்³க³வண்ணனா

21. ததியஸ்ஸ பட²மே அபா⁴விதந்தி ஸமத²விபஸ்ஸனாபா⁴வனாவஸேன ந பா⁴விதம் ததா² அபா⁴விதத்தா. தஞ்ஹி ‘‘அவட்³டி⁴த’’ந்தி வுச்சதி படிபக்கா²பி⁴ப⁴வேன பரிப்³ரூஹனாபா⁴வதோ. தேனாஹ ப⁴க³வா – ‘‘அகம்மனியம் ஹோதீ’’தி.

22. து³தியே வுத்தவிபரியாயேன அத்தோ² வேதி³தப்³போ³. பட²மேதி ததியவக்³க³ஸ்ஸ பட²மஸுத்தே. வட்டவஸேனாதி விபாகவட்டவஸேன. தேபூ⁴மகவட்டந்தி தேபூ⁴மகவிபாகவட்டம். வட்டபடிலாபா⁴ய கம்மந்தி விபாகவட்டஸ்ஸ படிலாபா⁴ய உபனிஸ்ஸயபூ⁴தம் கம்மம், தஸ்ஸ ஸஹாயபூ⁴தம் கிலேஸவட்டம்பி கம்மக்³க³ஹணேனேவ ஸங்க³ஹிதந்தி த³ட்ட²ப்³ப³ம். விவட்டபடிலாபா⁴ய கம்மந்தி விவட்டாதி⁴க³மஸ்ஸ உபனிஸ்ஸயபூ⁴தம் கம்மம். யம் பன சரிமப⁴வனிப்³ப³த்தகம் கம்மம், தம் விவட்டப்படிலாபா⁴ய கம்மம் ஹோதி, ந ஹோதீதி? ந ஹோதி வட்டபாத³கபா⁴வதோ. சரிமப⁴வபடிஸந்தி⁴ விய பன விவட்டூபனிஸ்ஸயோதி ஸக்கா விஞ்ஞாதும். ந ஹி கதா³சி திஹேதுகபடிஸந்தி⁴யா வினா விஸேஸாதி⁴க³மோ ஸம்ப⁴வதி. இமேஸு ஸுத்தேஸூதி இமேஸு பன பட²மது³தியஸுத்தேஸு யதா²க்கமம் வட்டவிவட்டமேவ கதி²தம்.

23. ததியே அபா⁴விதந்தி ஏத்த² பா⁴வனா நாம ஸமாதி⁴பா⁴வனா. ஸா யத்த² ஆஸங்கிதப்³பா³, தம் காமாவசரபட²மமஹாகுஸலசித்தாதி³அபா⁴விதந்தி அதி⁴ப்பேதந்தி ஆஹ – ‘‘தே³வமனுஸ்ஸஸம்பத்தியோ’’திஆதி³.

24. சதுத்தே² யஸ்மா சித்தந்தி விவட்டவஸேனேவ உப்பன்னசித்தம் அதி⁴ப்பேதம், தஸ்மா ஜாதிஜராப்³யாதி⁴மரணஸோகாதி³து³க்க²ஸ்ஸ அனிப்³ப³த்தனதோ மஹதோ அத்தா²ய ஸம்வத்ததீதி யோஜனா வேதி³தப்³பா³.

25-26. பஞ்சமச²ட்டே²ஸு உப்பன்னந்தி அவிக³துப்பாதா³தி³க²ணத்தயம்பி அபா⁴விதம் பா⁴வனாரஹிதம் அபாதுபூ⁴தமேவ பண்டி³தஸம்மதஸ்ஸ உப்பன்னகிச்சஸ்ஸ அஸாத⁴னதோ யதா² ‘‘அபுத்தோ’’தி. ஸோ ஹி ஸமத்தோ² ஹுத்வா பிது புத்தகிச்சம் அஸாதே⁴ந்தோ அபுத்தோதி லோகே வுச்சதி, ஏவம் ஸம்பத³மித³ம். தேனாஹ – ‘‘கஸ்மா’’திஆதி³. தேஸு த⁴ம்மேஸூதி லோகுத்தரபாத³கஜ்ஜா²னாதீ³ஸு. தே²ரோ பன மத்த²கப்பத்தமேவ பா⁴விதம் சித்தம் த³ஸ்ஸேந்தோ ‘‘மக்³க³சித்தமேவா’’தி ஆஹ.

27-28. ஸத்தமட்ட²மேஸு புனப்புனம் அகதந்தி பா⁴வனாப³ஹுலீகாரவஸேன புனப்புனம் ந கதம். இமானிபி த்³வேதி இமேஸு த்³வீஸு ஸுத்தேஸு ஆக³தானி இமானிபி த்³வே சித்தானி.

29-30. நவமே அதி⁴வஹதீதி ஆனேதி. து³க்கே²னாதி கிச்சே²ன. து³ப்பேஸனதோதி து³க்கே²ன பேஸேதப்³ப³தோ. மத்த²கப்பத்தம் விபஸ்ஸனாஸுக²ம் பாகதிகஜ்ஜா²னஸுக²தோ ஸந்ததரபணீததரமேவாதி ஆஹ – ‘‘ஜா²னஸுக²தோ விபஸ்ஸனாஸுக²’’ந்தி. தேனாஹ ப⁴க³வா –

‘‘ஸுஞ்ஞாகா³ரம் பவிட்ட²ஸ்ஸ, ஸந்தசித்தஸ்ஸ பி⁴க்கு²னோ;

அமானுஸீ ரதி ஹோதி, ஸம்மா த⁴ம்மம் விபஸ்ஸதோ.

‘‘யதோ யதோ ஸம்மஸதி, க²ந்தா⁴னம் உத³யப்³ப³யம்;

லப⁴தீ பீதிபாமோஜ்ஜம், அமதம் தம் விஜானத’’ந்தி. (த⁴. ப. 374);

தஞ்ஹி சித்தம் விஸ்ஸட்ட²இந்த³வஜிரஸதி³ஸம் அமோக⁴பா⁴வதோ.

அகம்மனியவக்³க³வண்ணனா நிட்டி²தா.