(16) 4. ஏகத⁴ம்மபாளி-சதுத்த²வக்³க³வண்ணனா

322. சதுத்த²ஸ்ஸ பட²மே ஸஞ்ஞாணபூ⁴தாதி உபலக்க²ணபூ⁴தா. பஞ்சத³ஸயோஜனாவட்டக்க²ந்தா⁴தி பஞ்சத³ஸயோஜனக்க²ந்த⁴பரிக்கே²பா. யதா² சாதி ச-ஸத்³தே³ன கத³ம்ப³ருக்கா²தீ³னம் கப்பட்டா²யிபா⁴வம் விய யோஜனஸதுப்³பே³தா⁴தி³பா⁴வம் ஸமுச்சினோதி, ந பன ஜம்பு³யா ஜம்பு³தீ³பஸ்ஸ விய தேஹி அபரகோ³யானாதீ³னம் ஸஞ்ஞாணபா⁴வம். ராமணேய்யகந்தி ரமணீயபா⁴வம். ஸேஸபதே³ஸூதி வனராமணேய்யகாதி³பதே³ஸு. உக்³க³தம் கூலம் உஸ்ஸிதபா⁴வோ ஏதஸ்ஸாதி உக்கூலம், விக³தம் அபக³தம் கூலம் ஏதஸ்ஸாதி விகூலந்தி ஆஹ – ‘‘உன்னதட்டா²னம் நின்னட்டா²ன’’ந்தி ச. நந்தி³யாவட்டமச்ச²பிட்டே²னேவாதி குஜ்ஜககுலிஸகமச்ச²ஸங்கா⁴தபிட்டே²னேவ.

323. து³தியாதீ³ஸு சத்தாரோ அபாயா அஞ்ஞத்ர மனுஸ்ஸேஹீதி அதி⁴ப்பேதா, ந தே³வா அஞ்ஞத்ர மனுஸ்ஸேஹீதி ஹீனாய ஜாதியா அதி⁴ப்பேதத்தா. உபாதா³யுபாதா³யாபி மஜ்ஜி²மதே³ஸோ லப்³ப⁴தி, யத்த² க³தி பி⁴க்கூ²னம் பி⁴க்கு²னீனம் உபாஸகானம் உபாஸிகானம் அஞ்ஞேஸம்பி கம்மவாதி³கிரியவாதி³விஞ்ஞுஜாதிகானம், யோ பதிரூபதே³ஸோதி வுச்சதி. தேனாஹ – ‘‘ஸகலோபி ஹீ’’திஆதி³.

324. ஏளாதி தோ³ஸோ. தேனாஹ – ‘‘நித்³தோ³ஸமுகா²தி அத்தோ²’’தி.

326. ததா²க³தஸ்ஸ கு³ணே ஜானித்வா சக்கு²னாபி த³ஸ்ஸனம் த³ஸ்ஸனமேவ, அஜானித்வா பன த³ஸ்ஸனம் திரச்சா²னக³தானம்பி ஹோதியேவாதி ஆஹ – ‘‘யே ததா²க³தஸ்ஸ கு³ணே ஜானித்வா’’திஆதி³.

327. பகாஸேத்வா கதி²தந்தி ஸச்சானி பகாஸேத்வா கதி²தம்.

328. ஸுதானம் த⁴ம்மானம் அஸம்மோஸோ தா⁴ரணந்தி ஆஹ – ‘‘தா⁴ரேந்தீதி ந பம்முஸ்ஸந்தீ’’தி.

329. அத்தா²னத்த²ம் உபபரிக்க²ந்தீதி ‘‘அயம் இமிஸ்ஸா பாளியா அத்தோ², அயம் ந அத்தோ²’’தி அத்தா²னத்த²ம் உபபரிக்க²ந்தி. அனத்த²பரிஹாரேன ஹி அத்த²க்³க³ஹணம் யதா² அத⁴ம்மபரிவஜ்ஜனேன த⁴ம்மப்படிபத்தி.

330. அனுலோமபடிபத³ந்தி நிப்³பா³னஸ்ஸ அனுலோமிகம் படிபத³ம்.

331. ஸம்வேக³ஜனகேஸு காரணேஸூதி ஸம்வேக³ஜனகேஸு ஜாதிஆதீ³ஸு காரணேஸு. ஸம்வேஜனீயேஸு டா²னேஸு ஸஹோத்தப்பஞாணம் ஸம்வேகோ³.

332. உபாயேனாதி யேன உபாயேன வட்டூபச்சே²தோ³, தேன உபாயேன. பதா⁴னவீரியம் கரோந்தீதி ஸம்மப்பதா⁴னஸங்கா²தம் வீரியம் கரோந்தி உப்பாதே³ந்தி.

333. வவஸ்ஸஜீயந்தி விஸ்ஸஜ்ஜீயந்தி ஏத்த² ஸங்கா²ராதி வவஸ்ஸக்³கோ³, அஸங்க²தா தா⁴தூதி ஆஹ – ‘‘வவஸ்ஸக்³கோ³ வுச்சதி நிப்³பா³ன’’ந்தி.

334. உத்தமன்னானந்தி உத்தமானம் பஞ்சன்னம் போ⁴ஜனானம். உத்தமரஸானந்தி உத்தமானம் ரஸானம். உஞ்சா²சாரேனாதி உஞ்சா²சரியாய கஸ்ஸசி அபரிக்³க³ஹபூ⁴தஸ்ஸ கிஞ்சி அயாசித்வா க³ஹணம் உஞ்சா²சாரோ. ஏத்த² சாதிஆதி³னா அன்னாதீ³னம் அக்³க³பா⁴வோ நாம மனாபபரமோ இச்சி²தக்க²ணலாபோ⁴, ந தேஸம் லாபி⁴தாமத்தந்தி த³ஸ்ஸேதி. படிலப⁴ந்தீதி தே³ந்தி பணீதபா⁴வேன. ப⁴த்தஸ்ஸ ஏகபாதீதி ஏகபாதிபூரம் ப⁴த்தம். இத³ம் கிம் நாமாதி ‘‘இத³ம் அன்னக்³க³ரஸக்³க³ம் நாம ஹோதி, ந ஹோதீ’’தி புச்ச²தி. உஞ்சே²ன கபாலாப⁴தேனாதி மிஸ்ஸகப⁴த்தேன. யாபேந்தேதி யாபனஸீஸேன யாபனஹேதும் ப⁴த்தம் வத³தி. உபாதா³ய அக்³க³ரஸம் நாமாதி தம் தம் உபாதா³யுபாதா³ய அன்னக்³க³ரஸக்³க³ம் த³ட்ட²ப்³ப³ந்தி த³ஸ்ஸேதி. சக்கவத்திஆஹாரதோ ஹி சாதுமஹாராஜிகானம் ஆஹாரோ அக்³கோ³தி ஏவம் யாவ பரனிம்மிதவஸவத்திதே³வா நேதப்³ப³ம்.

335. அத்த²ரஸோ நாம சத்தாரி ஸாமஞ்ஞப²லானி ‘‘அரியமக்³கா³னம் ப²லபூ⁴தோ ரஸோ’’தி கத்வா. த⁴ம்மரஸோ நாம சத்தாரோ மக்³கா³ ‘‘ஸாமஞ்ஞப²லஸ்ஸ ஹேதுபூ⁴தோ ரஸோ’’தி கத்வா விமுத்திரஸோ நாம அமதம் நிப்³பா³னம் ‘‘ஸப்³ப³ஸங்கா²ரஸமதோ²’’தி கத்வா.

சதுத்த²வக்³க³வண்ணனா நிட்டி²தா.

ஜம்பு³தீ³பபேய்யாலோ நிட்டி²தோ.