14. ஏதத³க்³க³வக்³கோ³

(14) 4. சதுத்த²ஏதத³க்³க³வக்³க³வண்ணனா

ஆனந்த³த்தே²ரவத்து²

219-223. சதுத்த²வக்³க³ஸ்ஸ பட²மே ஹேட்டா² வுத்தப்பமாணந்தி ஹேட்டா² கோண்ட³ஞ்ஞத்தே²ரஸ்ஸ வத்து²ம்ஹி ‘‘தஸ்ஸ து⁴ரபத்தானி நவுதிஹத்தா²னி ஹோந்தி, கேஸரம் திம்ஸஹத்த²ம், கண்ணிகா த்³வாத³ஸஹத்தா², பாதே³ன பதிட்டி²தட்டா²னம் ஏகாத³ஸஹத்த²’’ந்தி ஏவம் வுத்தப்பமாணம். ரஞ்ஞோ பேஸேஸீதி பச்சந்தஸ்ஸ குபிதபா⁴வம் ஆரோசேத்வா பேஸேஸி. தே²ரகா³தா²ஸம்வண்ணனாயம் (தே²ரகா³. அட்ட². 2.1016 ஆனந்த³த்தே²ரகா³தா²வண்ணனா) பன ‘‘பச்சந்தஸ்ஸ குபிதபா⁴வம் ரஞ்ஞோ அனாரோசேத்வா ஸயமேவ தம் வூபஸமேஸி, தம் ஸுத்வா ராஜா துட்ட²மானஸோ புத்தம் பக்கோஸாபேத்வா ‘வரம் தே, ஸுமன, த³ம்மி, க³ண்ஹாஹீ’தி ஆஹா’’தி வுத்தம். ந மேதம் சித்தம் அத்தீ²தி மம ஏவரூபம் சித்தம் நத்தி². அவஞ்ஜ²ந்தி அதுச்ச²ம். அஞ்ஞம் வரேஹீதி அஞ்ஞம் பத்தே²ஹி, அஞ்ஞம் க³ண்ஹாஹீதி வுத்தம் ஹோதி. உத³கம் அதி⁴ட்டா²யாதி ‘‘உத³கம் ஹோதூ’’தி அதி⁴ட்ட²ஹித்வா. க³தேனாதி க³மனேன. ந ஆமிஸசக்கு²காதி சீவராதி³பச்சயஸங்கா²தம் ஆமிஸம் ந ஓலோகேந்தி.

வஸனட்டா²னஸபா⁴கே³யேவாதி வஸனட்டா²னஸமீபேயேவ. ஏகந்தவல்லபோ⁴தி உபட்டா²கட்டா²னே ஏகந்தேன வல்லபோ⁴. ஏதஸ்ஸேவாதி ஏதஸ்ஸேவ பி⁴க்கு²ஸ்ஸ. த்³வேஜ்ஜ²கதா² ந ஹோந்தீதி த்³விதா⁴பூ⁴தகதா² ந ஹோந்தி, அனேகந்திககதா² ந ஹோந்தீதி வுத்தம் ஹோதி. அனிப³த்³தா⁴தி அனியதா. லோஹிதேன க³லந்தேனாதி இத்த²ம்பூ⁴தக்கா²னே கரணவசனம், க³லந்தேன லோஹிதேன யுத்தோதி அத்தோ². அன்வாஸத்தோதி அனுக³தோ. உட்டே²ஹி, ஆவுஸோ ஆனந்த³, உட்டே²ஹி, ஆவுஸோ ஆனந்தா³தி துரிதே இத³மாமேடி³தவசனம். து³விதே⁴ன உத³கேனாதி ஸீதுத³கேன உண்ஹுத³கேன ச. திவிதே⁴ன த³ந்தகட்டே²னாதி கு²த்³த³கம் மஹந்தம் மஜ்ஜி²மந்தி ஏவம் திப்பகாரேன த³ந்தகட்டே²ன. நவ வாரே அனுபரியாயதீதி ஸத்த²ரி பக்கோஸந்தே படிவசனதா³னாய தி²னமித்³த⁴வினோத³னத்த²ம் நவக்க²த்தும் அனுபரியாயதி. தேனேவாஹ – ‘‘ஏவஞ்ஹிஸ்ஸ அஹோஸீ’’திஆதி³. ஸேஸமேத்த² ஸுவிஞ்ஞேய்யமேவ.

உருவேலகஸ்ஸபத்தே²ரவத்து²

224. து³தியே யம் வத்தப்³ப³ம், தம் வித்தா²ரதோ வினயபாளியம் ஆக³தமேவ.

காளுதா³யித்தே²ரவத்து²

225. ததியே க³மனாகப்பந்தி க³மனாகாரம். ஸேஸமேத்த² உத்தானமேவ.

பா³குலத்தே²ரவத்து²

226. சதுத்தே² நிராபா³தா⁴னந்தி ஆபா³த⁴ரஹிதானம். யதா² ‘‘த்³வாவீஸதி த்³வத்திம்ஸா’’திஆதி³ம்ஹி வத்தப்³பே³ ‘‘பா³வீஸதி பா³த்திம்ஸா’’திஆதீ³னி வுச்சந்தி, ஏவமேவம் த்³வே குலானி அஸ்ஸாதி த்³விகுலோ, த்³வேகுலோதி வா வத்தப்³பே³ பா³குலோதி வுத்தந்தி ஆஹ – ‘‘பா³குலோதி த்³வீஸு குலேஸு வட்³டி⁴தத்தா ஏவம்லத்³த⁴னாமோ’’தி. உபயோகே³னாதி ஆனுபா⁴வேன. பா²ஸுககாலேதி அரோக³காலே. க³த்³து³ஹனமத்தம்பீதி கோ³து³ஹனமத்தம்பி காலம். இத⁴ பன ந ஸகலோ கோ³து³ஹனக்க²ணோ அதி⁴ப்பேதோ, அத² கோ² கா³விம் த²னே க³ஹேத்வா ஏககீ²ரபி³ந்து³து³ஹனகாலமத்தம் அதி⁴ப்பேதம். ஆரோக்³யஸாலந்தி ஆதுரானம் அரோக³பா⁴வகரணத்தா²ய கதஸாலம்.

நிமுஜ்ஜனும்முஜ்ஜனவஸேனாதி ஜாணுப்பமாணே உத³கே தோ²கம்யேவ நிமுஜ்ஜனும்முஜ்ஜனவஸேன. ச²ட்³டே³த்வா பலாயீதி மச்ச²ஸ்ஸ முக²ஸமீபேயேவ ச²ட்³டே³த்வா பலாயி. தா³ரகஸ்ஸ தேஜேனாதி தா³ரகஸ்ஸ புஞ்ஞதேஜேன. மாரியமானாவ மரந்தீதி த³ண்டா³தீ³ஹி போதே²த்வா மாரியமானாவ மரந்தி, ந ஜாலேன ப³த்³த⁴தாமத்தேன அமாரியமானா. நீஹடமத்தோவ மதோதி நீஹடக்க²ணேயேவ மதோ. தேனஸ்ஸ மாரணத்த²ம் உபக்கமோ ந கதோ, யேன உபக்கமேன தா³ரகஸ்ஸ ஆபா³தோ⁴ ஸியா. தந்தி மச்ச²ம். ஸகலமேவாதி அவிகலமேவ பரிபுண்ணாவயவமேவ. ந கேளாயதீதி ந நந்த³தி, கிஸ்மிஞ்சி ந மஞ்ஞதி. பிட்டி²தோ பா²லேந்தீதி தா³ரகஸ்ஸ புஞ்ஞதேஜேன பிட்டி²தோ பா²லேந்தீ. பே⁴ரிம் சராபேத்வாதி ‘‘புத்தம் லபி⁴’’ந்தி உக்³கோ⁴ஸனவஸேன பே⁴ரிம் சராபேத்வா. பகதிம் ஆசிக்கீ²தி அத்தனோ புத்தபா⁴வம் கதே²ஸி. குச்சி²யா தா⁴ரிதத்தா அமாதா காதும் ந ஸக்காதி ஜனனீபா⁴வதோ அமாதா காதும் ந ஸக்கா. மச்ச²ம் க³ண்ஹந்தாபீதி மச்ச²ம் விக்கிணித்வா க³ண்ஹந்தாபி. ததா² க³ண்ஹந்தா ச தப்பரியாபன்னம் ஸப்³ப³ம் க³ண்ஹந்தி நாமாதி ஆஹ – ‘‘வக்கயகனாதீ³னி ப³ஹி கத்வா க³ண்ஹந்தா நாம நத்தீ²’’தி. அயம்பி அமாதா காதும் ந ஸக்காதி தி³ன்னபுத்தபா⁴வதோ ந ஸக்கா.

ஸோபி⁴தத்தே²ரவத்து²

227. பஞ்சமம் உத்தானத்த²மேவ.

உபாலித்தே²ரவத்து²

228. ச²ட்டே² பா⁴ருகச்ச²கவத்து²ந்தி அஞ்ஞதரோ கிர பா⁴ருகச்ச²தே³ஸவாஸீ பி⁴க்கு² ஸுபினந்தே புராணது³தியிகாய மேது²னம் த⁴ம்மம் படிஸேவித்வா ‘‘அஸ்ஸமணோ அஹம் விப்³ப⁴மிஸ்ஸாமீ’’தி பா⁴ருகச்ச²ம் க³ச்ச²ந்தோ அந்தராமக்³கே³ ஆயஸ்மந்தம் உபாலிம் பஸ்ஸித்வா ஏதமத்த²ம் ஆரோசேஸி. ஆயஸ்மா உபாலி, ஏவமாஹ – ‘‘அனாபத்தி, ஆவுஸோ, ஸுபினந்தேனா’’தி. யஸ்மா ஸுபினந்தே அவிஸயத்தா ஏவம் ஹோதி. தஸ்மா உபாலித்தே²ரோ ப⁴க³வதா அவினிச்சி²தபுப்³ப³ம்பி இமம் வத்து²ம் நயக்³கா³ஹேன ஏவம் வினிச்சி²னி. க³ஹபதினோ த்³வே தா³ரகா ஹோந்தி புத்தோ ச பா⁴கி³னேய்யோ ச. அத² ஸோ க³ஹபதி கி³லானோ ஹுத்வா ஆயஸ்மந்தம் அஜ்ஜுகம் ஏதத³வோச – ‘‘இமம், ப⁴ந்தே, ஓகாஸம் யோ இமேஸம் தா³ரகானம் ஸத்³தோ⁴ ஹோதி பஸன்னோ, தஸ்ஸ ஆசிக்கே²ய்யாஸீ’’தி. தேன ச ஸமயேன தஸ்ஸ ச க³ஹபதினோ பா⁴கி³னேய்யோ ஸத்³தோ⁴ ஹோதி பஸன்னோ. அதா²யஸ்மா அஜ்ஜுகோ தம் ஓகாஸம் தஸ்ஸ தா³ரகஸ்ஸ ஆசிக்கி². ஸோ தேன ஸாபதேய்யேன குடும்ப³ஞ்ச ஸண்ட²பேஸி, தா³னஞ்ச பட்ட²பேஸி. அத² தஸ்ஸ க³ஹபதினோ புத்தோ ஆயஸ்மந்தம் ஆனந்த³ம் ஏதத³வோச – ‘‘கோ நு கோ², ப⁴ந்தே ஆனந்த³, பிதுனோ தா³யஜ்ஜோ புத்தோ வா பா⁴கி³னேய்யோ வா’’தி. புத்தோ கோ², ஆவுஸோ, பிதுனோ தா³யஜ்ஜோதி. ஆயஸ்மா, ப⁴ந்தே, அய்யோ அஜ்ஜுகோ அம்ஹாகம் ஸாபதேய்யம் அம்ஹாகம் மேது²னகஸ்ஸ ஆசிக்கீ²தி. அஸ்ஸமணோ, ஆவுஸோ, ஸோ அஜ்ஜுகோதி. அதா²யஸ்மா அஜ்ஜுகோ ஆயஸ்மந்தம் ஆனந்த³ம் ஏதத³வோச – ‘‘தே³ஹி மே, ஆவுஸோ ஆனந்த³, வினிச்ச²ய’’ந்தி. தே உபோ⁴பி உபாலித்தே²ரஸ்ஸ ஸந்திகம் அக³மம்ஸு. அதா²யஸ்மா உபாலி, ஆயஸ்மந்தம் ஆனந்த³ம் ஏதத³வோச – ‘‘யோ நு கோ², ஆவுஸோ ஆனந்த³, ஸாமிகேன ‘இமம் ஓகாஸம் இத்த²ன்னாமஸ்ஸ ஆசிக்கா²’தி வுத்தோ, தஸ்ஸ ஆசிக்க²தி, கிம் ஸோ ஆபஜ்ஜதீ’’தி? ந, ப⁴ந்தே, கிஞ்சி ஆபஜ்ஜதி அந்தமஸோ து³க்கடமத்த²ம்பீதி. அயம், ஆவுஸோ, ஆயஸ்மா அஜ்ஜுகோ ஸாமிகேன ‘‘இமம் ஓகாஸம் இத்த²ன்னாமஸ்ஸ ஆசிக்கா²’’தி வுத்தோ தஸ்ஸ ஆசிக்க²தி, அனாபத்தி, ஆவுஸோ, ஆயஸ்மதோ அஜ்ஜுகஸ்ஸாதி. ப⁴க³வா தம் ஸுத்வா ‘‘ஸுகதி²தம், பி⁴க்க²வே, உபாலினா’’தி வத்வா ஸாது⁴காரமதா³ஸி, தம் ஸந்தா⁴யேதம் வுத்தம். குமாரகஸ்ஸபவத்து² (அ. நி. அட்ட². 1.1.217) பன ஹேட்டா² ஆக³தமேவ.

ச²ன்னம் க²த்தியானந்தி ப⁴த்³தி³யோ ஸக்யராஜா அனுருத்³தோ⁴ ஆனந்தோ³ ப⁴கு³ கிமிலோ தே³வத³த்தோதி இமேஸம் ச²ன்னம் க²த்தியானம். பஸாத⁴கோதி மண்ட³யிதா. பாளியந்தி ஸங்க⁴பே⁴த³க்க²ந்த⁴கபாளியந்தி (சூளவ. 330 ஆத³யோ).

நந்த³கத்தே²ரவத்து²

229. ஸத்தமே ஏகஸமோதா⁴னேதி ஏகஸ்மிம் ஸமோதா⁴னே, ஏகஸ்மிம் ஸன்னிபாதேதி அத்தோ². ஸேஸம் ஸுவிஞ்ஞேய்யமேவ.

நந்த³த்தே²ரவத்து²

230. அட்ட²மே ந தம் சதுஸம்பஜஞ்ஞவஸேன அபரிச்சி²ந்தி³த்வா ஓலோகேதீதி ஸாத்த²கஸப்பாயகோ³சரஅஸம்மோஹஸம்பஜஞ்ஞஸங்கா²தானம் சதுன்னம் ஸம்பஜஞ்ஞானம் வஸேன அபரிச்சி²ந்தி³த்வா தம் தி³ஸம் ந ஓலோகேதி. ஸோ ஹி ஆயஸ்மா ‘‘யமேவாஹம் இந்த்³ரியேஸு அகு³த்தத்³வாரதம் நிஸ்ஸாய ஸாஸனே அனபி⁴ரதிஆதி³விப்பகாரப்பத்தோ, தமேவ ஸுட்டு² நிக்³க³ஹேஸ்ஸாமீ’’தி உஸ்ஸாஹஜாதோ ப³லவஹிரோத்தப்போ, தத்த² ச கதாதி⁴காரத்தா இந்த்³ரியஸம்வரோ உக்கம்ஸபாரமிப்பத்தோ சதுஸம்பஜஞ்ஞம் அமுஞ்சித்வாவ ஸப்³ப³தி³ஸம் ஆலோகேதி. வுத்தஞ்சேதம் ப⁴க³வதா –

‘‘ஸசே, பி⁴க்க²வே, நந்த³ஸ்ஸ புரத்தி²மா தி³ஸா ஆலோகேதப்³பா³ ஹோதி, ஸப்³ப³ம் சேதஸோ ஸமன்னாஹரித்வா நந்தோ³ புரத்தி²மம் தி³ஸம் ஆலோகேதி ‘ஏவம் மே புரத்தி²மம் தி³ஸம் ஆலோகயதோ நாபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸவிஸ்ஸந்தீ’தி. இதிஹ தத்த² ஸம்பஜானோ ஹோதி. ஸசே, பி⁴க்க²வே, நந்த³ஸ்ஸ பச்சி²மா தி³ஸா, உத்தரா தி³ஸா, த³க்கி²ணா தி³ஸா, உத்³த⁴ம், அதோ⁴, அனுதி³ஸா அனுவிலோகேதப்³பா³ ஹோதி, ஸப்³ப³ம் சேதஸோ ஸமன்னாஹரித்வா நந்தோ³ அனுதி³ஸம் அனுவிலோகேதி ‘ஏவம் மே அனுதி³ஸம் அனுவிலோகயதோ…பே… ஸம்பஜானோ ஹோதீ’’’தி (அ. நி. 8.9).

அபி⁴ஸேககே³ஹபவேஸனஆவாஹமங்க³லேஸு வத்தமானேஸூதி இத⁴ தீணி மங்க³லானி வுத்தானி, வினயட்ட²கதா²யம் பன ‘‘தம் தி³வஸமேவ நந்த³குமாரஸ்ஸ கேஸவிஸ்ஸஜ்ஜனம், பட்டப³ந்தோ⁴, க⁴ரமங்க³லம், ச²த்தமங்க³லம், ஆவாஹமங்க³லந்தி பஞ்ச மங்க³லானி ஹோந்தீ’’தி வுத்தம். தத்த² குலமரியாத³வஸேன கேஸோரோபனம் கேஸவிஸ்ஸஜ்ஜனம். யுவராஜபட்டப³ந்த⁴னம் பட்டப³ந்தோ⁴. அபி⁴னவக⁴ரப்பவேஸனமஹோ க⁴ரமங்க³லம். விவாஹகரணமஹோ ஆவாஹமங்க³லம். யுவராஜச²த்தமஹோ ச²த்தமங்க³லம்.

நந்த³குமாரம் அபி⁴ஸேகமங்க³லம் ந ததா² பீளேஸி, யதா² ஜனபத³கல்யாணியா வுத்தவசனந்தி அஜ்ஜா²ஹரிதப்³ப³ம். ததே³வ பன வசனம் ஸரூபதோ த³ஸ்ஸேதும் – ‘‘பத்தம் ஆதா³ய க³மனகாலே’’திஆதி³ வுத்தம். ஜனபத³கல்யாணீதி ஜனபத³ம்ஹி கல்யாணீ உத்தமா ச² ஸரீரதோ³ஸரஹிதா பஞ்ச கல்யாணஸமன்னாக³தா. ஸா ஹி யஸ்மா நாதிதீ³கா⁴ நாதிரஸ்ஸா நாதிகிஸா நாதிதூ²லா நாதிகாளீ நாச்சோதா³தாதி அதிக்கந்தா மானுஸவண்ணம், அஸம்பத்தா தி³ப்³ப³வண்ணம், தஸ்மா ச² ஸரீரதோ³ஸரஹிதா. ச²விகல்யாணம் மம்ஸகல்யாணம் ந்ஹாருகல்யாணம் அட்டி²கல்யாணம் வயகல்யாணந்தி இமேஹி பன கல்யாணேஹி ஸமன்னாக³தத்தா பஞ்ச கல்யாணஸமன்னாக³தா நாம. தஸ்ஸா ஹி ஆக³ந்துகோபா⁴ஸகிச்சம் நத்தி², அத்தனோ ஸரீரோபா⁴ஸேனேவ த்³வாத³ஸஹத்தே² டா²னே ஆலோகம் கரோதி, பியங்கு³ஸாமா வா ஹோதி ஸுவண்ணஸாமா வா, அயமஸ்ஸா ச²விகல்யாணதா. சத்தாரோ பனஸ்ஸா ஹத்த²பாதா³ முக²பரியோஸானஞ்ச லாகா²ரஸபரிகம்மகதம் விய ரத்தபவாளரத்தகம்ப³லஸதி³ஸம் ஹோதி, அயமஸ்ஸா மம்ஸகல்யாணதா. வீஸதி பன நக²பத்தானி மம்ஸதோ அமுத்தட்டா²னே லாகா²ரஸபூரிதானி விய, முத்தட்டா²னே கீ²ரதா⁴ராஸதி³ஸானி ஹோந்தி, அயமஸ்ஸா ந்ஹாருகல்யாணதா. த்³வத்திம்ஸ த³ந்தா ஸுபு²ஸிதா ஸுதோ⁴தவஜிரபந்தி விய கா²யந்தி, அயமஸ்ஸா அட்டி²கல்யாணதா. வீஸம்வஸ்ஸஸதிகாபி ஸமானா ஸோளஸவஸ்ஸுத்³தே³ஸிகா விய ஹோதி நிப்பலிதேன, அயமஸ்ஸா வயகல்யாணதா. இதி இமேஹி பஞ்சஹி கல்யாணேஹி ஸமன்னாக³தத்தா ‘‘ஜனபத³கல்யாணீ’’தி வுச்சதி. துவடந்தி ஸீக⁴ம்.

இமஸ்மிம் டா²னே நிவத்தேஸ்ஸதி, இமஸ்மிம் டா²னே நிவத்தேஸ்ஸதீதி சிந்தேந்தமேவாதி ஸோ கிர ததா²க³தே கா³ரவவஸேன ‘‘பத்தம் வோ, ப⁴ந்தே, க³ண்ஹதா²’’தி வத்தும் அவிஸஹந்தோ ஏவம் சிந்தேஸி – ‘‘ஸோபானஸீஸே பத்தம் க³ண்ஹிஸ்ஸதீ’’தி. ஸத்தா² தஸ்மிம்பி டா²னே ந க³ண்ஹி. இதரோ ‘‘ஸோபானபாத³மூலே க³ண்ஹிஸ்ஸதீ’’தி சிந்தேஸி. ஸத்தா² தத்தா²பி ந க³ண்ஹி. இதரோ ‘‘ராஜங்க³ணே க³ண்ஹிஸ்ஸதீ’’தி சிந்தேஸி. ஸத்தா² தத்தா²பி ந க³ண்ஹி. ஏவம் ‘‘இத⁴ க³ண்ஹிஸ்ஸதி, ஏத்த² க³ண்ஹிஸ்ஸதீ’’தி சிந்தேந்தமேவ ஸத்தா² விஹாரம் நேத்வா பப்³பா³ஜேஸி.

மஹாகப்பினத்தே²ரவத்து²

231. நவமே ஸுதவித்தகோதி த⁴ம்மஸ்ஸவனபியோ. படிஹாரகஸ்ஸாதி தோ³வாரிகஸ்ஸ. ஸச்சகாரேனாதி ஸச்சகிரியாய. ஸத்தா² ‘‘உப்பலவண்ணா ஆக³ச்ச²தூ’’தி சிந்தேஸி. தே²ரீ ஆக³ந்த்வா ஸப்³பா³ பப்³பா³ஜேத்வா பி⁴க்கு²னீஉபஸ்ஸயம் க³தாதி இத³ம் அங்கு³த்தரபா⁴ணகானம் கதா²மக்³க³ம் த³ஸ்ஸேந்தேன வுத்தம். தேனேவ த⁴ம்மபத³ட்ட²கதா²யம் (த⁴. ப. அட்ட². 1.மஹாகப்பினத்தே²ரவத்து²) வுத்தம் –

‘‘தா ஸத்தா²ரம் வந்தி³த்வா ஏகமந்தம் டி²தா பப்³ப³ஜ்ஜம் யாசிம்ஸு. ஏவம் கிர வுத்தே ஸத்தா² உப்பலவண்ணாய ஆக³மனம் சிந்தேஸீதி ஏகச்சே வத³ந்தி. ஸத்தா² பன தா உபாஸிகாயோ ஆஹ – ‘ஸாவத்தி²ம் க³ந்த்வா பி⁴க்கு²னீஉபஸ்ஸயே பப்³பா³ஜேதா²’தி. தா அனுபுப்³பே³ன ஜனபத³சாரிகம் சரமானா அந்தராமக்³கே³ மஹாஜனேன அபி⁴ஹடஸக்காரஸம்மானா பத³ஸாவ வீஸயோஜனஸதிகம் மக்³க³ம் க³ந்த்வா பி⁴க்கு²னீஉபஸ்ஸயே பப்³ப³ஜித்வா அரஹத்தம் பாபுணிம்ஸூ’’தி.

த⁴ம்மபீதீதி த⁴ம்மபாயகோ, த⁴ம்மம் பிவந்தோதி அத்தோ². த⁴ம்மோ ச நாமேஸ ந ஸக்கா பா⁴ஜனேன யாகு³ஆதீ³னி விய பாதும், நவவித⁴ம் பன லோகுத்தரத⁴ம்மம் நாமகாயேன பு²ஸந்தோ ஆரம்மணதோ ஸச்சி²கரோந்தோ பரிஞ்ஞாபி⁴ஸமயாதீ³ஹி து³க்கா²தீ³னி அரியஸச்சானி படிவிஜ்ஜ²ந்தோ த⁴ம்மம் பிவதி நாம. ஸுக²ம் ஸேதீதி தே³ஸனாமத்தமேதம், சதூஹிபி இரியாபதே²ஹி ஸுக²ம் விஹரதீதி அத்தோ². விப்பஸன்னேனாதி அனாவிலேன நிருபக்கிலேஸேன. அரியப்பவேதி³தேதி பு³த்³தா⁴தீ³ஹி அரியேஹி பவேதி³தே ஸதிபட்டா²னாதி³பே⁴தே³ போ³தி⁴பக்கி²யத⁴ம்மே. ஸதா³ ரமதீதி ஏவரூபோ த⁴ம்மபீதி விப்பஸன்னேன சேதஸா விஹரந்தோ பண்டி³ச்சேன ஸமன்னாக³தோ ஸதா³ ரமதி அபி⁴ரமதி. பா³ஹிதபாபத்தா ‘‘ப்³ராஹ்மணா’’தி தே²ரம் ஆலபதி.

ஸாக³தத்தே²ரவத்து²

232. த³ஸமே ச²ப்³ப³க்³கி³யானம் வசனேனாதி கோஸம்பி³கா கிர உபாஸகா ஆயஸ்மந்தம் ஸாக³தம் உபஸங்கமித்வா அபி⁴வாதே³த்வா ஏகமந்தம் டி²தா ஏவமாஹம்ஸு – ‘‘கிம், ப⁴ந்தே, அய்யானம் து³ல்லப⁴ஞ்ச மனாபஞ்ச, கிம் படியாதே³மா’’தி? ஏவம் வுத்தே ச²ப்³ப³க்³கி³யா பி⁴க்கூ² கோஸம்பி³கே உபாஸகே ஏதத³வோசும் – ‘‘அத்தா²வுஸோ காபோதிகா, நாம பஸன்னா பி⁴க்கூ²னம் து³ல்லபா⁴ ச மனாபா ச, தம் படியாதே³தா²’’தி. அத² கோஸம்பி³கா உபாஸகா க⁴ரே க⁴ரே காபோதிகம் பஸன்னம் படியாதே³த்வா ஆயஸ்மந்தம் ஸாக³தம் பிண்டா³ய சரந்தம் தி³ஸ்வா ஏதத³வோசும் – ‘‘பிவது, ப⁴ந்தே, அய்யோ ஸாக³தோ காபோதிகம் பஸன்னம், பிவது, ப⁴ந்தே, அய்யோ ஸாக³தோ காபோதிகம் பஸன்ன’’ந்தி. அதா²யஸ்மா ஸாக³தோ க⁴ரே க⁴ரே காபோதிகம் பஸன்னம் பிவித்வா நக³ரம்ஹா நிக்க²மந்தோ நக³ரத்³வாரே பதி. தேன வுத்தம் – ‘‘ச²ப்³ப³க்³கி³யானம் வசனேன ஸப்³ப³கே³ஹேஸு காபோதிகம் பஸன்னம் படியாதே³த்வா’’திஆதி³. தத்த² காபோதிகா நாம கபோதபாத³ஸமானவண்ணா ரத்தோபா⁴ஸா. பஸன்னாதி ஸுராமண்ட³ஸ்ஸேதம் அதி⁴வசனம். வினயே ஸமுட்டி²தந்தி ஸுராபானஸிக்கா²பதே³ (பாசி. 326 ஆத³யோ) ஆக³தம்.

ராத⁴த்தே²ரவத்து²

233. ஏகாத³ஸமே ஸத்தா² ஸாரிபுத்தத்தே²ரஸ்ஸ ஸஞ்ஞம் அதா³ஸீதி ப்³ராஹ்மணம் பப்³பா³ஜேதும் ஸஞ்ஞம் அதா³ஸி, ஆணாபேஸீதி வுத்தம் ஹோதி. ப⁴க³வா கிர தம் ப்³ராஹ்மணம் பப்³ப³ஜ்ஜம் அலபி⁴த்வா கிஸம் லூக²ம் து³ப்³ப³ண்ணம் உப்பண்டு³ப்பண்டு³கஜாதம் தி³ஸ்வா பி⁴க்கூ² ஆமந்தேஸி – ‘‘கோ, பி⁴க்க²வே, தஸ்ஸ ப்³ராஹ்மணஸ்ஸ அதி⁴காரம் ஸரதீ’’தி. ஏவம் வுத்தே ஆயஸ்மா ஸாரிபுத்தோ ப⁴க³வந்தம் ஏதத³வோச – ‘‘அஹம் கோ², ப⁴ந்தே, தஸ்ஸ ப்³ராஹ்மணஸ்ஸ அதி⁴காரம் ஸராமீ’’தி. கிம் பன த்வம், ஸாரிபுத்த, ப்³ராஹ்மணஸ்ஸ அதி⁴காரம் ஸரஸீதி. இத⁴ மே, ப⁴ந்தே, ஸோ ப்³ராஹ்மணோ ராஜக³ஹே பிண்டா³ய சரந்தஸ்ஸ கடச்சு²பி⁴க்க²ம் தா³பேஸி, இமம் கோ² அஹம், ப⁴ந்தே, தஸ்ஸ ப்³ராஹ்மணஸ்ஸ அதி⁴காரம் ஸராமீ’’தி. ஸாது⁴ ஸாது⁴, ஸாரிபுத்த. கதஞ்ஞுனோ ஹி, ஸாரிபுத்த, ஸப்புரிஸா கதவேதி³னோ, தேன ஹி த்வம், ஸாரிபுத்த, தம் ப்³ராஹ்மணம் பப்³பா³ஜேஹி உபஸம்பாதே³ஹீதி. அட்டு²ப்பத்தியம் ஆக³தோதி அலீனசித்தஜாதகஸ்ஸ (ஜா. 1.2.11-12) அட்டு²ப்பத்தியம் (ஜா. அட்ட². 2.2.அலீனசித்தஜாதகவண்ணனா) ஆக³தோ.

நிதீ⁴னந்தி தத்த² தத்த² நித³ஹித்வா ட²பிதானம் ஹிரஞ்ஞஸுவண்ணாதி³பூரானம் நிதி⁴கும்பீ⁴னம். பவத்தாரந்தி கிச்ச²ஜீவிகே து³க்³க³தமனுஸ்ஸே அனுகம்பம் கத்வா ‘‘ஏஹி, தே ஸுகே²ன ஜீவனுபாயம் த³ஸ்ஸேஸ்ஸாமீ’’தி நிதி⁴ட்டா²னம் நேத்வா ஹத்த²ம் பஸாரேத்வா ‘‘இமம் க³ஹேத்வா ஸுக²ம் ஜீவா’’தி ஆசிக்கி²தாரம் விய. வஜ்ஜத³ஸ்ஸினந்தி த்³வே வஜ்ஜத³ஸ்ஸினோ ‘‘இமினா நம் அஸாருப்பேன வா க²லிதேன வா ஸங்க⁴மஜ்ஜே² நிக்³க³ண்ஹிஸ்ஸாமீ’’தி ரந்த⁴க³வேஸகோ ச, அனஞ்ஞாதம் ஞாபனத்தா²ய ஞாதம் அனுக்³க³ண்ஹனத்தா²ய ஸீலாதீ³னமஸ்ஸ வுத்³தி⁴காமதாய தம் தம் வஜ்ஜம் ஓலோகனேன உல்லும்பனஸபா⁴வஸண்டி²தோ ச. அயம் இத⁴ அதி⁴ப்பேதோ. யதா² ஹி து³க்³க³தமனுஸ்ஸோ ‘‘இமம் க³ண்ஹாஹீ’’தி தஜ்ஜேத்வாபி போதே²த்வாபி நிதி⁴ம் த³ஸ்ஸேந்தே கோபம் ந கரோதி, பமுதி³தோவ ஹோதி, ஏவமேவம் ஏவரூபே புக்³க³லே அஸாருப்பம் வா க²லிதம் வா தி³ஸ்வா ஆசிக்க²ந்தே கோபோ ந காதப்³போ³, துட்டே²னேவ ப⁴விதப்³ப³ம். ‘‘ப⁴ந்தே, மஹந்தம் வோ கம்மம் கதம் மய்ஹம் ஆசரியுபஜ்ஜா²யட்டா²னே ட²த்வா ஓவத³ந்தேஹி, புனபி மம் வதே³ய்யாதா²’’தி பவாரேதப்³ப³மேவ.

நிக்³க³ய்ஹவாதி³ந்தி ஏகச்சோ ஹி ஸத்³தி⁴விஹாரிகாதீ³னம் அஸாருப்பம் வா க²லிதம் வா தி³ஸ்வா ‘‘அயம் மே முகோ²த³கதா³னாதீ³ஹி ஸக்கச்சம் உபட்ட²ஹதி, ஸசே நம் வக்கா²மி, ந மம் உபட்ட²ஹிஸ்ஸதி, ஏவம் மே பரிஹானி ப⁴விஸ்ஸதீ’’தி தம் வத்தும் அவிஸஹந்தோ ந நிக்³க³ய்ஹவாதீ³ நாம ஹோதி, ஸோ இமஸ்மிம் ஸாஸனே கசவரம் ஆகிரதி. யோ பன ததா²ரூபம் வஜ்ஜம் தி³ஸ்வா வஜ்ஜானுரூபம் தஜ்ஜேந்தோ பணாமேந்தோ த³ண்ட³கம்மம் கரோந்தோ விஹாரா நீஹரந்தோ ஸிக்கா²பேதி, அயம் நிக்³க³ய்ஹவாதீ³ நாம ஸேய்யதா²பி, ஸம்மாஸம்பு³த்³தோ⁴. வுத்தஞ்ஹேதம் – ‘‘நிக்³க³ய்ஹ நிக்³க³ய்ஹாஹம், ஆனந்த³, வக்கா²மி, பவய்ஹ பவய்ஹ, ஆனந்த³, வக்கா²மி, யோ ஸாரோ, ஸோ ட²ஸ்ஸதீ’’தி (ம. நி. 3.196). மேதா⁴விந்தி த⁴ம்மோஜபஞ்ஞாய ஸமன்னாக³தம். தாதி³ஸந்தி ஏவரூபம் பண்டி³தம் ப⁴ஜேய்ய பயிருபாஸேய்ய. தாதி³ஸஞ்ஹி ஆசரியம் ப⁴ஜமானஸ்ஸ அந்தேவாஸிகஸ்ஸ ஸேய்யோ ஹோதி ந பாபியோ, வட்³டி⁴யேவ ஹோதி, நோ பரிஹானீதி.

மோக⁴ராஜத்தே²ரவத்து²

234. த்³வாத³ஸமே கட்ட²வாஹனனக³ரேதி கட்ட²வாஹனேன க³ஹிதத்தா ஏவம்லத்³த⁴னாமகே நக³ரே. அதீதே கிர பா³ராணஸிவாஸீ ஏகோ ருக்க²வட்³ட⁴கீ ஸகே ஆசரியகே அது³தியோ. தஸ்ஸ ஸோளஸ ஸிஸ்ஸா ஏகமேகஸ்ஸ ஸஹஸ்ஸம் அந்தேவாஸிகா. ஏவம் தே ஸத்தரஸாதி⁴கா ஸோளஸ ஸஹஸ்ஸா ஆசரியந்தேவாஸிகா ஸப்³பே³பி பா³ராணஸிம் உபனிஸ்ஸாய ஜீவிகம் கப்பேந்தா பப்³ப³தஸமீபம் க³ந்த்வா ருக்கே² க³ஹேத்வா தத்தே²வ நானாபாஸாத³விகதியோ நிட்டா²பேத்வா குல்லம் ப³ந்தி⁴த்வா க³ங்கா³ய பா³ராணஸிம் ஆனேத்வா ஸசே ராஜா அத்தி²கோ ஹோதி, ரஞ்ஞோ ஏகபூ⁴மகம் வா ஸத்தபூ⁴மகம் வா பாஸாத³ம் யோஜேத்வா தே³ந்தி. நோ சே, அஞ்ஞேஸம்பி விக்கிணித்வா புத்ததா³ரம் போஸேந்தி. அத² நேஸம் ஏகதி³வஸம் ஆசரியோ ‘‘ந ஸக்கா வட்³ட⁴கிகம்மேன நிச்சம் ஜீவிதும், து³க்கரஞ்ஹி ஜராகாலே ஏதம் கம்ம’’ந்தி சிந்தேத்வா அந்தேவாஸிகே ஆமந்தேஸி – ‘‘தாதா, உது³ம்ப³ராத³யோ அப்பஸாரருக்கே² ஆனேதா²’’தி. தே ‘‘ஸாதூ⁴’’தி படிஸ்ஸுணித்வா ஆனயிம்ஸு. ஸோ தேஹி கட்ட²ஸகுணம் கத்வா தஸ்ஸப்³ப⁴ந்தரம் பவிஸித்வா வாதேன யந்தம் பூரேஸி. கட்ட²ஸகுணோ ஸுவண்ணஹம்ஸராஜா விய ஆகாஸே லங்கி⁴த்வா வனஸ்ஸ உபரி சரித்வா அந்தேவாஸீனம் புரதோ ஓருஹி.

அதா²சரியோ ஸிஸ்ஸே ஆஹ – ‘‘தாதா ஈதி³ஸானி கட்ட²வாஹனானி கத்வா ஸக்கா ஸகலஜம்பு³தீ³பே ரஜ்ஜே க³ஹேதும், தும்ஹேபி தாதா ஏதானி கரோத², ரஜ்ஜம் க³ஹேத்வா ஜீவிஸ்ஸாம, து³க்கரம் வட்³ட⁴கிஸிப்பேன ஜீவிது’’ந்தி. தே ததா² கத்வா ஆசரியஸ்ஸ படிவேதே³ஸும். ததோ நே ஆசரியோ ஆஹ – ‘‘கதமம் தாதா ரஜ்ஜம் க³ண்ஹாமா’’தி? பா³ராணஸிரஜ்ஜம் ஆசரியாதி. அலம் தாதா, மா ஏதம் ருசித்த², மயஞ்ஹி தம் க³ஹேத்வாபி ‘‘வட்³ட⁴கிராஜா, வட்³ட⁴கியுவராஜா’’தி வட்³ட⁴கிவாதா³ ந முச்சிஸ்ஸாம, மஹந்தோ ஜம்பு³தீ³போ, அஞ்ஞத்த² க³ச்சா²மாதி. ததோ ஸபுத்ததா³ரகா கட்ட²வாஹனானி அபி⁴ருஹித்வா ஸஜ்ஜாவுதா⁴ ஹுத்வா ஹிமவந்தாபி⁴முகா² க³ந்த்வா ஹிமவதி அஞ்ஞதரம் நக³ரம் பவிஸித்வா ரஞ்ஞோ நிவேஸனேயேவ பச்சுட்ட²ம்ஸு. தே தத்த² ரஜ்ஜம் க³ஹேத்வா ஆசரியம் ரஜ்ஜே அபி⁴ஸிஞ்சிம்ஸு. ஸோ ‘‘கட்ட²வாஹனோ ராஜா’’தி பாகடோ அஹோஸி, தம் நக³ரம் தேன க³ஹிதத்தா ‘‘கட்ட²வாஹனனக³ர’’ந்தேவ நாமம் லபி⁴.

தபசாரந்தி தபசரணம். பாஸாணசேதியே பிட்டி²பாஸாணே நிஸீதீ³தி பாஸாணகசேதியந்தி லத்³த⁴வோஹாரே பிட்டி²பாஸாணே ஸக்கேன மாபிதே மஹாமண்ட³பே நிஸீதி³. தத்த² கிர மஹதோ பாஸாணஸ்ஸ உபரி புப்³பே³ தே³வட்டா²னம் அஹோஸி, உப்பன்னே பன ப⁴க³வதி விஹாரோ ஜாதோ, ஸோ தேனேவ புரிமவோஹாரேன ‘‘பாஸாணசேதிய’’ந்தி வுச்சதி.

தேன புச்சி²தே து³தியோ ஹுத்வா ஸத்தா²ரம் பஞ்ஹம் புச்சீ²தி –

‘‘முத்³த⁴ம் முத்³தா⁴தி⁴பாதஞ்ச, பா³வரீ பரிபுச்ச²தி;

தம் ப்³யாகரோஹி ப⁴க³வா, கங்க²ம் வினய நோ இஸே’’தி. (ஸு. நி. 1031) –

ஏவம் தேன பஞ்ஹே புச்சி²தே ப⁴க³வதா ச –

‘‘அவிஜ்ஜா முத்³தா⁴தி ஜானாஹி, விஜ்ஜா முத்³தா⁴தி⁴பாதினீ;

ஸத்³தா⁴ஸதிஸமாதீ⁴ஹி, ச²ந்த³வீரியேன ஸம்யுதா’’தி. (ஸு. நி. 1032) –

பஞ்ஹே விஸ்ஸஜ்ஜிதே து³தியோ ஹுத்வா பஞ்ஹம் புச்சி².

அத²ஸ்ஸ…பே… பஞ்ஹம் கதே²ஸீதி –

‘‘கத²ம் லோகம் அவேக்க²ந்தம், மச்சுராஜா ந பஸ்ஸதீ’’தி. (ஸு. நி. 1124) –

தேன பஞ்ஹே புச்சி²தே –

‘‘ஸுஞ்ஞதோ லோகம் அவேக்க²ஸ்ஸு, மோக⁴ராஜ ஸதா³ ஸதோ;

அத்தானுதி³ட்டி²ம் ஊஹச்ச, ஏவம் மச்சுதரோ ஸியா;

ஏவம் லோகம் அவேக்க²ந்தம், மச்சுராஜா ந பஸ்ஸதீ’’தி. (ஸு. நி. 1125) –

பஞ்ஹம் விஸ்ஸஜ்ஜேஸி.

ஸேஸஜனாதி தஸ்மிம் ஸமாக³மே ஸன்னிபதிதா ஸேஸஜனா. ந கதீ²யந்தீதி ‘‘ஏத்தகா ஸோதாபன்னா’’திஆதி³னா ந வுச்சந்தி. ஏவம் பாராயனே வத்து² ஸமுட்டி²தந்தி பாராயனவக்³கே³ இத³ம் வத்து² ஸமுட்டி²தம்.

சதுத்த²ஏதத³க்³க³வக்³க³வண்ணனா நிட்டி²தா.

தே²ரபாளிஸம்வண்ணனா நிட்டி²தா.