3. ததியோ பரிச்சே²தோ³

சேதஸிகவிபா⁴க³னித்³தே³ஸோ

89. ஸப்³பே³ சேதஸிகா வுத்தா, பு³த்³தே⁴னாதி³ச்சப³ந்து⁴னா;

நாமஸாமஞ்ஞதோயேவ, த்³வேபஞ்ஞாஸ ப⁴வந்தி தே.

ஸேய்யதி²த³ம் – ப²ஸ்ஸோ வேத³னா ஸஞ்ஞா சேதனா விதக்கோ விசாரோ பீதி சித்தேகக்³க³தா வீரியம் ஜீவிதம் ச²ந்தோ³ அதி⁴மோக்கோ² மனஸிகாரோ தத்ரமஜ்ஜ²த்ததா ஸத்³தா⁴ ஸதி ஹிரீ ஓத்தப்பம் அலோபோ⁴ அதோ³ஸோ அமோஹோ காயப்பஸ்ஸத்³தி⁴ஆதீ³னி ச² யுகா³னி, திஸ்ஸோ விரதியோ, கருணா முதி³தா லோபோ⁴ தோ³ஸோ மோஹோ உத்³த⁴ச்சம் மானோ தி³ட்டி² இஸ்ஸா மச்ச²ரியம் குக்குச்சம் தி²னம் மித்³த⁴ம் விசிகிச்சா² அஹிரிகம் அனோத்தப்பஞ்சாதி.

90. சதுபஞ்ஞாஸதா⁴ காமே, ரூபே பஞ்சத³ஸேரிதா;

தே ஹோந்தி த்³வாத³ஸாரூபே, சத்தாலீஸமனாஸவா.

91. ஏகவீஸஸதம் ஸப்³பே³, சித்துப்பாதா³ ஸமாஸதோ;

ஏதேஸு தேஸமுப்பத்திம், உத்³த⁴ரித்வா பனேககம்.

92. ப²ஸ்ஸாதீ³னம் து த⁴ம்மானம், பவக்கா²மி இதோ பரம்;

பாடவத்தா²ய பி⁴க்கூ²னம், சித்தசேதஸிகேஸ்வஹம்.

93. ஏகக்³க³தா மனக்காரோ, ஜீவிதம் ப²ஸ்ஸபஞ்சகம்;

அட்டே²தே அவினிப்³போ⁴கா³, ஏகுப்பாதா³ ஸஹக்க²யா.

94. ப²ஸ்ஸோ ச வேத³னா ஸஞ்ஞா, சேதனா ஜீவிதிந்த்³ரியம்;

ஏகக்³க³தா மனக்காரோ, ஸப்³ப³ஸாதா⁴ரணா இமே.

95. விதக்கோ பஞ்சபஞ்ஞாஸ-சித்தேஸு ஸமுதீ³ரிதோ;

சாரோ ச²ஸட்டி²சித்தேஸு, ஜாயதே நத்தி² ஸம்ஸயோ.

96. ஏகபஞ்ஞாஸசித்தேஸு, பீதி தேஸட்டி²யா ஸுக²ம்;

உபேக்கா² பஞ்சபஞ்ஞாஸ-சித்தே து³க்க²ம் து தீஸு ஹி.

97. ஹோதி த்³வாஸட்டி²சித்தேஸு, ஸோமனஸ்ஸிந்த்³ரியம் பன;

து³க்கி²ந்த்³ரியம் பனேகஸ்மிம், ததே²கம்ஹி ஸுகி²ந்த்³ரியம்.

98. பஞ்சுத்தரஸதே சித்தே, வீரியம் ஆஹ நாயகோ;

சதுத்தரஸதே சித்தே, ஸமாதி⁴ந்த்³ரியமப்³ரவி.

99. ஸப்³பா³ஹேதுகசித்தானி, ட²பேத்வா சேகஹேதுகே;

ஏகுத்தரஸதே சித்தே, ச²ந்த³ஸ்ஸுப்பத்திமுத்³தி³ஸே.

100. ட²பேத்வா த³ஸ விஞ்ஞாணே, விசிகிச்சா²யுதம்பி ச;

த³ஸுத்தரஸதே சித்தே, அதி⁴மோக்கோ² உதீ³ரிதோ.

101. ஸத்³தா⁴ ஸதி ஹிரோத்தப்பம், அலோபா⁴தோ³ஸமஜ்ஜ²தா;

ச²ளேவ யுக³ளா சாதி, த⁴ம்மா ஏகூனவீஸதி.

102. ஏகனவுதியா சித்தே, ஜாயந்தி நியதா இமே;

அஹேதுகேஸு சித்தேஸு, அபுஞ்ஞேஸு ந ஜாயரே.

103. ஏகூனாஸீதியா சித்தே, பஞ்ஞா ஜாயதி ஸப்³ப³தா³;

அட்ட²வீஸதியா சித்தே, கருணாமுதி³தா ஸியும்.

104. காமாவசரபுஞ்ஞேஸு, ஸப்³ப³லோகுத்தரேஸு ச;

சத்தாலீஸவிதே⁴ சித்தே, ஸாட்ட²கே விரதித்தயம்.

105. ஸத்³தா⁴ ஸதி ஹிரோத்தப்பம், அலோபா⁴தி³த்தயம்பி ச;

யுக³ளானி ச² மஜ்ஜ²த்தம், கருணாமுதி³தாபி ச.

106. ததா² விரதியோ திஸ்ஸோ, ஸப்³பே³ தே பஞ்சவீஸதி;

குஸலாப்³யாகதா சாபி, குஸலேன பகாஸிதா.

107. அஹிரீகமனோத்தப்பம், மோஹோ உத்³த⁴ச்சமேவ ச;

த்³வாத³ஸாபுஞ்ஞசித்தேஸு, நியதாயேவ ஜாயரே.

108. லோபோ⁴ தோ³ஸோ ச மோஹோ ச, மானோ தி³ட்டி² ச ஸம்ஸயோ;

மித்³த⁴முத்³த⁴ச்சகுக்குச்சம், தி²னம் மச்ச²ரியம்பி ச.

109. அஹிரீகமனோத்தப்பம், இஸ்ஸா ச தோ³மனஸ்ஸகம்;

ஏதே அகுஸலா வுத்தா, ஏகந்தேன மஹேஸினா.

110. லோபோ⁴ அட்ட²ஸு நித்³தி³ட்டோ², வுத்தா சதூஸு தி³ட்டி²து;

மானோ தி³ட்டி²வியுத்தேஸு, தோ³ஸோத்³வீஸ்வேவ ஜாயதே.

111. இஸ்ஸாமச்சே²ரகுக்குச்சா, த்³வீஸு ஜாயந்தி நோ ஸஹ;

விசிகிச்சா² பனேகஸ்மிம், தி²னமித்³த⁴ம் து பஞ்சஸு.

112. ப²ஸ்ஸோ ச வேத³னா ஸஞ்ஞா, சேதனா ஜீவிதம் மனோ;

விதக்கோ ச விசாரோ ச, பீதி வீரியஸமாதி⁴ ச.

113. ச²ந்தோ³ சேவாதி⁴மோக்கோ² ச, மனஸிகாரோ ச சுத்³த³ஸ;

குஸலாகுஸலா சேவ, ஹோந்தி அப்³யாகதாபி ச.

114. ஏகூனதிம்ஸசித்தேஸு, ஜா²னம் பஞ்சங்கி³கம் மதம்;

சதுஜா²னங்க³யுத்தானி, ஸத்ததிம்ஸாதி நித்³தி³ஸே.

115. ஏகாத³ஸவித⁴ம் சித்தம், திவங்கி³கமுதீ³ரிதம்;

சதுதிம்ஸவித⁴ம் சித்தம், து³வங்கி³கமுதீ³ரிதம்.

116. ஸபா⁴வேனாவிதக்கேஸு, ஜா²னங்கா³னி ந உத்³த⁴ரே;

ஸப்³பா³ஹேதுகசித்தேஸு, மக்³க³ங்கா³னி ந உத்³த⁴ரே.

117. தீணி ஸோளஸசித்தேஸு, இந்த்³ரியானி வதே³ பு³தோ⁴;

ஏகஸ்மிம் பன சத்தாரி, பஞ்ச தேரஸஸுத்³த⁴ரே.

118. ஸத்த த்³வாத³ஸசித்தேஸு, இந்த்³ரியானி ஜினோப்³ரவி;

ஏகேனூனேஸு அட்டே²வ, சத்தாலீஸமனேஸு ச.

119. சத்தாலீஸாய சித்தேஸு, நவகம் நாயகோப்³ரவி;

ஏவம் இந்த்³ரியயோகோ³பி, வேதி³தப்³போ³ விபா⁴வினா.

120. அமக்³க³ங்கா³னி நாமேத்த², அட்டா²ரஸ அஹேதுகா;

ஜா²னங்கா³னி ந விஜ்ஜந்தி, விஞ்ஞாணேஸு த்³விபஞ்சஸு.

121. ஏகம் சித்தம் து³மக்³க³ங்க³ம், திமக்³க³ங்கா³னி ஸத்தஸு;

சத்தாலீஸாய சித்தேஸு, மக்³கோ³ ஸோ சதுரங்கி³கோ.

122. பஞ்சத்³த³ஸஸு சித்தேஸு, மக்³கோ³ பஞ்சங்கி³கோ மதோ;

வுத்தோ த்³வத்திம்ஸசித்தேஸு, மக்³கோ³ ஸத்தங்கி³கோபி ச.

123. மக்³கோ³ அட்ட²ஸு சித்தேஸு, மதோ அட்ட²ங்கி³கோதி ஹி;

ஏவம் து ஸப்³ப³சித்தேஸு, மக்³க³ங்கா³னி ஸமுத்³த⁴ரே.

124. ப³லானி த்³வே த்³விசித்தேஸு, ஏகஸ்மிம் தீணி தீ³பயே;

ஏகாத³ஸஸு சத்தாரி, ச² த்³வாத³ஸஸு நித்³தி³ஸே.

125. ஏகூனாஸீதியா ஸத்த, ஸோளஸேவாப³லானி து;

சித்தமேவம் து விஞ்ஞேய்யம், ஸப³லம் அப³லம்பி ச.

126. ஜா²னங்க³மக்³க³ங்க³ப³லிந்த்³ரியானி,

சித்தேஸு ஜாயந்தி ஹி யேஸு யானி;

மயா ஸமாஸேன ஸமுத்³த⁴ரித்வா,

வுத்தானி ஸப்³பா³னிபி தானி தேஸு.

இதி அபி⁴த⁴ம்மாவதாரே சேதஸிகவிபா⁴க³னித்³தே³ஸோ நாம

ததியோ பரிச்சே²தோ³.