26. வுட்டா²னவிஸுத்³தி⁴கதா²

1019. தஸ்ஸேவம் படிபன்னஸ்ஸ, ஸிகா²பத்தா விபஸ்ஸனா;

வுட்டா²னகா³மினீ நாம, யதா³ ஹோதி ததா³ பன.

1020. பரிகம்மோபசாரானுலோமகோ³த்ரபு⁴தோ பரம்;

மக்³கோ³ ததோ ப²லம் ஹோதி, ப⁴வங்கா³ பச்சவேக்க²ணா.

1021. பரிகம்மோபசாரானுலோமஸங்கா²தகோ³சரா;

மக்³க³ஸ்ஸாவஜ்ஜனம் ஹுத்வா, நிப்³பா³னே ஹோதி கோ³த்ரபு⁴.

1022. சதுத்த²ம் பஞ்சமம் வாத², ச²ட்ட²ம் வாபி யதா²ரஹம்;

அப்பேதி மக்³க³ஜவனம், நிப்³பா³னே ஸகிமேவ தம்.

1023. ததோ ப²லானி தீணி த்³வே, ஏகம் வாத² யதா²க்கமம்;

மக்³கா³வஸேஸனிரோத⁴மக்³க³வுட்டா²னவீதி²யம்.

1024. ததோ ப⁴வங்க³பாதோவ,

தம் சே²த்வா பச்சவேக்க²ணா;

திஸ்ஸோ பஞ்சவிதா⁴ ஹோந்தி,

யதா²யோக³ம் ததா² ஹி ச.

1025. மக்³க³ம் ப²லஞ்ச நிப்³பா³னம், அவஸ்ஸம் பச்சவேக்க²தி;

ஹீனே கிலேஸே ஸேஸே ச, பச்சவேக்க²தி வா ந வா.

1026. ததோ ச புன ஸங்கா²ரே, விபஸ்ஸந்தோ யதா² புரே;

அப்பேதி அனுபுப்³பே³ன, ஸேஸமக்³க³ப²லானி ச.

1027. தத்த² வுச்சந்தி நிப்³பா³ன-ப²லமக்³க³விபஸ்ஸனா;

ஸுஞ்ஞதா சானிமித்தா ச, ததா²பணிஹிதானி ச.

1028. ஸுஞ்ஞதாவிபஸ்ஸனாதி³னாமேன ஹி விபஸ்ஸதி;

விமோக்க²முக²பூ⁴தாதி, திவிதா⁴ பா⁴ஜிதா ததா².

1029. ஸுஞ்ஞதாதி³கனாமேன, விமோக்கா² திவிதா⁴ மதா;

நிப்³பா³னப²லமக்³கா³ ச, ஸமாபத்திஸமாத⁴யோ.

1030. தத்தே²வ பட²மபூ⁴மிம், பத்தோ அரியபுக்³க³லோ;

ஸத்தக்க²த்துபரமோ ஸோ, ஸோதாபன்னோதி வுச்சதி.

1031. பத்தோ து³தியபூ⁴மிஞ்ச, ஸகதா³கா³மிநாமகோ;

ஸகிமேவ இமம் லோகம், ஆக³ந்த்வா ஹோதி மானுஸம்.

1032. பத்தோ ததியபூ⁴மிஞ்ச, அனாகா³மீதி வுச்சதி;

ப்³ரஹ்மலோகா அனாக³ந்த்வா, இத⁴காமோபபத்தியா.

1033. பத்தோ சதுத்த²பூ⁴மிஞ்ச, அரஹா அக்³க³புக்³க³லோ;

தி³ட்டே²வ த⁴ம்மே து³க்க²க்³கி³ம், நிப்³பா³பேதீதி வுச்சதி.

1034. இதி மக்³க³ப²லட்டா²னம், வஸா அரியபுக்³க³லா;

த்³விதா⁴பி சதுதா⁴ யுக்³கா³, அட்ட² ஹோந்தி விபா⁴க³தோ.

1035. உப⁴தோபா⁴க³விமுத்த-

விபா⁴கா³தி³வஸா பன;

விப⁴த்தா ஹோந்தி ஸத்தேதே,

யதா²யோக³ம் ததா² ஹி ச.

1036. ஸத்³தா⁴து⁴ரஸ்ஸானிச்சதோ, வுட்டா²னம் து³க்க²தோபி ச;

பஞ்ஞாது⁴ரஸ்ஸானத்ததோ, இதி தீ³பேந்தி பண்டி³தா.

1037. ஸத்³தா⁴னுஸாரி ஆதி³ம்ஹி, மஜ்ஜே² ஸத்³தா⁴விமுத்தகோ;

அந்தே பஞ்ஞாவிமுத்தோவ, தஸ்மா ஸத்³தா⁴து⁴ரோ ஸியா.

1038. த⁴ம்மானுஸாரி ஆதி³ம்ஹி, தி³ட்டி²ப்பத்தோ ததோபரி;

அந்தே பஞ்ஞாவிமுத்தோவ, ஹோதி பஞ்ஞாது⁴ரோபி ச.

1039. ஸமத²யானிகா சேவ, ரூபானுத்தரபாத³கா;

விபஸ்ஸனாயானிகா ச, ஸப்³பே³ ஸுக்க²விபஸ்ஸகா.

1040. து⁴ரவுட்டா²னபே⁴தே³ன, ஹோந்தி பஞ்சேவ ஸப்³ப³தா²;

ஆருப்பபாத³கா சாபி, ஆதி³ம்ஹி து³விதா⁴ ததா².

1041. ச²ஸு டா²னேஸு மஜ்ஜ²கே, காயஸக்கீ²தி பா⁴ஜிதா;

உப⁴தோபா⁴க³விமுத்தோ, அரஹத்தே பதிட்டி²தோ.

1042. இத்த²ம் வுத்தயானது⁴ர-வுட்டா²னானம் விபா⁴க³தோ;

மக்³க³ப்ப²லபூ⁴மியோ ச, ஸத்தட்டா²ரியபுக்³க³லா.

1043. தத்த² சானுத்தரஞாணம், ஸச்சானம் படிவேத⁴கம்;

ஸமுச்சே²த³ப்பஹானேன, க்லேஸானுஸயஸோத⁴னம்.

1044. சதுமக்³க³விபா⁴கே³ன, வுட்டா²னந்தி பகித்திதம்;

ஞாணத³ஸ்ஸனவிஸுத்³தி⁴, நாம ஹோதி ததா²பி ச.

1045. மக்³கோ³ ச பரிஜானாதி, து³க்க²ம் தேபூ⁴மகம் ததா²;

யதா²யோக³ம் பஜஹதி, தண்ஹாஸமுத³யம்பி ச.

1046. நிரோத⁴ம் ஸச்சி²கரோதி, மக்³க³ஸச்சமனுத்தரம்;

பா⁴வனாவீதி²மோதிண்ணோ, பா⁴வேதீதி பவுச்சதி.

1047. தி³ட்டி²க்³க³தவிசிகிச்சா²-ஸீலப்³ப³தமஸேஸதோ;

அபாயக³மனீயஞ்ச, ராக³தோ³ஸாதி³கத்தயம்.

1048. ததே³கட்டே² கிலேஸே ச, ஸஹஜாதப்பஹானதோ;

பஜஹாதி ஸோதாபத்தி-மக்³கோ³ பட²மபூ⁴மிகோ.

1049. ததே³கட்டே² பஜஹதி, ராக³தோ³ஸாதி³கேபி ச;

தூ²லே து ஸகதா³கா³மி-மக்³கோ³ து³தியபூ⁴மிகோ.

1050. பஜஹாதி அனாகா³மி-மக்³கோ³ நிரவஸேஸதோ;

காமராக³ப்³யாபாதே³ ச, ததே³கட்டே² ச ஸம்ப⁴வா.

1051. ரூபாரூபராக³மானு-த்³த⁴ச்சாவிஜ்ஜாதி பஞ்சகம்;

அக்³க³மக்³கோ³ பஜஹதி, க்லேஸே ஸேஸே ச ஸப்³ப³தா².

1052. இதி ஸச்சபடிவேத⁴ம், க்லேஸக்க²யப²லாவஹம்;

மக்³க³ஞாணம் பகாஸேந்தி, விஸுத்³தி⁴ம் ஸத்தமம் பு³தா⁴.

1053. ச²ப்³பி³ஸுத்³தி⁴கமேனேவம், ஸப்³ப³தா²ய விஸுத்³தி⁴யா;

ஸத்தமாயானுபத்தப்³ப³ம், நிப்³பா³னந்தி பவுச்சதி.

1054. க்லேஸக்க²யகரம் தாணம், ஸம்ஸாராதிக்கமம் பரம்;

பாரிமம் தீரமப⁴யம், ஸப்³ப³ஸங்கா²ரனிஸ்ஸடம்.

1055. தேனம்மத³னிம்மத³னம், பிபாஸவினயாதி³னா;

க்லேஸஸம்ஸாரஸங்கா²ர-படிபக்க²னித³ஸ்ஸிதம்.

1056. அஜராமரமச்சந்த-மனுப்பாத³மஸங்க²தம்;

அனுத்தரமஸங்கா²ரம், அனந்தமதுலஞ்ச தம்.

1057. பரமத்த²மனோபம்மம், ஸந்தி அப்படிமம் ஸுக²ம்;

நிரோத⁴ஸச்ச நிப்³பா³னம், ஏகந்தம் அமதம் பத³ம்.

1058. ஸோபாதி³ஸேஸனிப்³பா³ன-தா⁴து சேவ ததா²பரா;

அனுபாதி³ஸேஸா சேதி, து³விதா⁴ பரியாயதோ.

1059. ஸுஞ்ஞதம் சானிமித்தஞ்ச, ததா²பணிஹிதந்தி ச;

அத்தாதி³கா³ஹாபா⁴வேன, திவிதா⁴பி ச பா⁴ஜிதம்.

1060. க்லேஸஸம்ஸாரஸங்கா²ர-பச்சனீகவிபா⁴க³தோ;

ப⁴வக்க²யாதி³பே⁴தே³ஹி, ப³ஹுதா⁴பி பவுச்சதி.

1061. ததே³வமச்சுதம் த⁴ம்மம், லோகுத்தரமகாலிகம்;

வானாபா⁴வா வானாதீதோ, ‘‘நிப்³பா³ன’’ந்தி பகித்திதம்.

இதி நிப்³பா³னவிபா⁴கே³ வுட்டா²னவிஸுத்³தி⁴கதா² நிட்டி²தா.

ச²ப்³பீ³ஸதிமோ பரிச்சே²தோ³.

நிட்டி²தோ ச ஸப்³ப³தா²பி நிப்³பா³னவிபா⁴கோ³.