ஸத்தவீஸதிமோ பரிச்சே²தோ³

1062. சித்தம் சேதஸிகம் ரூபம், நிப்³பா³னம்பி ச பா⁴ஜிதம்;

தஸ்மா தா³னி யதா²யோக³ம், பஞ்ஞத்திபி பவுச்சதி.

1063. ஸா சாயம் அத்த²பஞ்ஞத்தி-நாமபஞ்ஞத்திபே⁴த³தோ;

து³விதா⁴ ஹோதி பஞ்ஞத்தி, அத்த²பஞ்ஞத்தி தத்த² ச.

1064. ஸத்தஸம்பா⁴ரஸண்டா²ன-ஸங்கா⁴டபரிணாமதோ;

விகப்புபட்டா²னாகாரவோஹாராபி⁴னிவேஸதோ.

1065. ததா² பவத்தஸங்கேதஸித்³தா⁴ அத்தா² பகப்பிதா;

பஞ்ஞாபீயந்தி நாமாதி, பஞ்ஞத்தீதி பகித்திதா.

1066. அத்தா² ஹி பரமத்த²த்தா², பஞ்ஞத்தத்தா²தி ச த்³விதா⁴;

தத்த² ச பரமத்த²த்தா², ஸச்சிகட்டா² ஸலக்க²ணா.

1067. பஞ்ஞத்தத்தா² ஸச்சிகட்ட²ஸலக்க²ணஸபா⁴வதோ;

அஞ்ஞதா² க³ஹிதா தம்தமுபாதா³ய பகப்பிதா.

1068. தஸ்மா உபாதா³பஞ்ஞத்தி, அத்த²பஞ்ஞத்தினாமகா;

பஞ்ஞபேதப்³ப³னாமாவ, பஞ்ஞத்தத்தா²வ ஸப்³ப³தா².

1069. பரமத்தா² யதா²வுத்தா, சித்தசேதஸிகாத³யோ;

பஞ்ஞத்தா இத்தி²புரிஸமஞ்சபீட²படாத³யோ.

1070. யேன வுச்சதி தம் நாமம், பஞ்ஞபேதீதி வுச்சதி;

பஞ்ஞத்தீதி ச ஸா நாமபஞ்ஞத்தீதி ததோ மதா.

1071. ஸங்கா² ஸமஞ்ஞா பஞ்ஞத்தி, வோஹாரோதி ச பா⁴ஜிதா;

சதுதா⁴ பஞ்ஞபேதப்³ப³பஞ்ஞத்தீதி ஹி வண்ணிதா.

1072. ததோ நாமம் நாமகம்மம், நாமதே⁴ய்யம் அதா²பரம்;

நிருத்தி ப்³யஞ்ஜனமபி⁴லாபோதி பன பா⁴ஜிதா.

1073. நாமபஞ்ஞத்தி நாமாதி, பஞ்ஞத்தி து³விதா⁴ கதா;

ஸப்³பே³வ த⁴ம்மா பஞ்ஞத்திபதா²தி பன பா⁴ஜிதா.

1074. பரமத்த²பஞ்ஞத்தத்தா², து³விதா⁴ ஹோந்தி தத்த² ச;

பஞ்ஞத்திபதா²வ ஹோந்தி, பரமத்தா² ஸலக்க²ணா.

1075. பஞ்ஞத்தத்தா² பஞ்ஞத்தி ச, பஞ்ஞபேதப்³ப³மத்ததோ;

பஞ்ஞத்திபதா² ச நாமபஞ்ஞத்திபத²பா⁴வதோ.

1076. நாமம்பி பஞ்ஞாபேதப்³ப³மேவ கிஞ்சாபி கேனசி;

நாமமேவம்பேதம் தத்த², பஞ்ஞத்திச்சேவ வண்ணிதம்.

1077. பஞ்ஞபேதப்³ப³த⁴ம்மா ச, தேஸம் பஞ்ஞாபிதாபி ச;

இச்சி²தப்³பா³பி பஞ்ஞத்திபதா² பஞ்ஞத்தினானதா.

1078. இதி வுத்தானுஸாரேன, வுத்தம் அட்ட²கதா²னயே;

நயம் க³ஹேத்வா ஏத்தா²பி, பஞ்ஞத்தி து³விதா⁴ கதா.

1079. தஸ்மிம்பி பரமத்தா² ச, ஸச்சிகட்ட²ஸலக்க²ணா;

அத்தா² பஞ்ஞத்திமத்தா ச, அத்த²பஞ்ஞத்தினாமகா.

1080. தேஸம் பஞ்ஞாபிகா சேவ, நாமபஞ்ஞத்தினாமிகா;

இச்சேவம் வண்ணனாமக்³கே³, ஞேய்யத்தா திவிதா⁴ கதா.

1081. பரமத்த²ஸச்சம் நாம, பரமத்தா²வ தத்த² ச;

ஸச்சிகட்ட²ஸபா⁴வத்தா, அவிஸம்வாத³கா ஹி தே.

1082. ஸம்முதிஸச்சம் பஞ்ஞத்தித்³வயம் வோஹாரவுத்தியா;

லோகஸமஞ்ஞாதி⁴ப்பாயாவிஸம்வாத³கபா⁴வதோ.

1083. இதி ஸச்சத்³வயம்பேதம், அக்கா²ஸி புரிஸுத்தமோ;

தேனாபி நாமஸம்விஞ்ஞூ, வோஹரேய்யுப⁴யம்பி வா.

இதி பஞ்ஞத்திவிபா⁴கே³ பபே⁴த³கதா² நிட்டி²தா.

ஸத்தவீஸதிமோ பரிச்சே²தோ³.