த்³வாவீஸதிமோ பரிச்சே²தோ³

22. பகிண்ணககதா²

844. இத்த²ம் ரூபானமுப்பத்திம், தீ³பேத்வா தா³னி வுச்சதி;

பவத்திகோஸல்லத்தா²ய, தத்தே²வேதம் பகிண்ணகம்.

845. து³விதா⁴ ஸந்தி⁴யோ தத்த², மிஸ்ஸாமிஸ்ஸவிபா⁴க³தோ;

திவிதா⁴பி சேகசது-பஞ்சவோகாரபே⁴த³தோ.

846. ரூபமத்தா அஸஞ்ஞீனம், நாமாபா⁴வா அமிஸ்ஸிதா;

நாமமத்தா அரூபீனம், ரூபாபா⁴வாதி ச த்³விதா⁴.

847. காமாவசரிகா சேவ, ரூபாவசரிகாதி ச;

து³விதா⁴ மிஸ்ஸிதா சேதி, ப⁴வந்தி ச சதுப்³பி³தா⁴.

848. ஏகச்சதுவோகாரா ச, அமிஸ்ஸா பஞ்ச ஸந்தி⁴யோ;

ச²ப்³பீ³ஸதிவிதா⁴ மிஸ்ஸா, பஞ்சவோகாரஸந்தி⁴யோ.

849. இத்த²ம் பூ⁴மிப்பபே⁴தே³ன, ஏகதிம்ஸவிதா⁴பி ச;

ஸந்ததிராஸிபே⁴தே³ன, ஸியும் திம்ஸவிதா⁴ கத²ம்.

850. ரூபஸந்ததிஸீஸானம்,

ராஸயோ ஸத்தவீஸதி;

வுத்தா காமே வஸா தேஸம்,

ஸத்தகா காமஸந்தி⁴யோ.

851. வேத³னாஸஞ்ஞாஸங்கா²ர-விஞ்ஞாணக்க²ந்த⁴ஸங்க³ஹா;

ஸப்³ப³த்தா²பி சதஸ்ஸோவ, நாமஸந்ததியோ ஸியும்.

852. இச்சுபி⁴ன்னம் வஸா ஹோந்தி, தத்தே²காத³ஸகாத³யோ;

ஸந்ததிராஸயோ புப்³பே³, விப⁴த்தா ஸத்தகாத³யோ.

853. ஏகாத³ஸகத³ஸக-நவட்ட²ஸத்தகா ஸியும்;

ச²க்கேன ஸத்³தி⁴ம் விஞ்ஞேய்யா, தஸ்மா தத்த² ச² ஸங்க³ஹா.

854. அட்ட² ஸந்ததியோ ஹோந்தி, ரூபலோகேன மிஸ்ஸிதா;

அட்ட²கோ ராஸி தத்தே²கோ, தஸ்மா ஸந்ததி வுச்சதி.

855. ஜீவிதனவகோ த்வேகோ, அஸஞ்ஞீ படிஸந்தி⁴யம்;

அரூபீனம் சதஸ்ஸோபி, நாமஸந்ததியோ ஸியும்.

856. இச்சேககசதுக்கானம், வஸேன த்³வே அமிஸ்ஸிதா;

அட்ட²வீஸஞ்ச மிஸ்ஸாதி, திம்ஸேவ ஹோந்தி ஸந்தி⁴யோ.

857. ஏகுப்பாத³னிரோதா⁴ ச, அமிஸ்ஸா தத்த² ராஸயோ;

மிஸ்ஸிதானம் விபா⁴கோ³யம், யதா²யோக³ம் கதீ²யதி.

858. உப்பாத³ட்டி²திப⁴ங்கா³னம், வஸா தீணி க²ணானிபி;

ஸமானானேவ நாமானம், ஏகசித்தக்க²ணம் மதம்.

859. துல்யமுப்பாத³ப⁴ங்கா³னம், ரூபானம்பி க²ணத்³வயம்;

ஏகூனபஞ்ஞாஸமத்தம், டி²திக்க²ணமுதீ³ரிதம்.

860. நாமரூபானமுப்பாதோ³, ப⁴ங்கோ³பி ஹி ஸமோ மதோ;

த³ந்த⁴ம் ஹி வத்திகம் ரூபம், நாமம் து லஹுவத்திகம்.

861. ததா² ஹி ரூபே திட்ட²ந்தே, சித்துப்பாதா³ து ஸோளஸ;

உப்பஜ்ஜித்வா பவத்தித்வா, பி⁴ஜ்ஜந்தி ச லஹும் லஹும்.

862. தஸ்மா ஹி ஏகபஞ்ஞாஸ-க²ணரூபக்க²ணம் ததா²;

ஸத்தரஸசித்தக்க²ணம், திக²ணந்தி ச வுச்சதி.

863. சித்தக்க²ணம் ஹி திண்ணன்னம், தத்த² விஞ்ஞத்திகத்³வயம்;

லக்க²ணத்தயரூபம் து, ஸலக்க²ணவவத்தி²தம்.

864. தஸ்மா ஹித்வா த்³வயஞ்சேதம், பா³வீஸதிவித⁴ம்பி ச;

ரூபம் நாம சதுக்கஞ்ச, ஸலக்க²ணனியாமிதம்.

865. ஏகுப்பாத³னிரோதா⁴ ச, தத்த² துல்யக்க²ணா மதா;

அதுல்யக்க²ணத⁴ம்மானம், ஸியா பே⁴த³ம் யதா²ரஹம்.

866. படிஸந்தி⁴க்க²ணே ஜாதம், தஸ்மா ரூபம் ததோ பரம்;

ஸத்தரஸமசித்தஸ்ஸ, ப⁴ங்கே³ன ஸஹ பி⁴ஜ்ஜதி.

867. தஸ்ஸ டி²திக்க²ணே ஜாதம், ரூபம்பி ச ததோ பரம்;

அட்டா²ரஸமசித்தஸ்ஸ, உப்பாதே³ பன பி⁴ஜ்ஜதி.

868. தஸ்ஸ ப⁴ங்க³க்க²ணே ஜாதம், ரூபம்பி ச ததோ பரம்;

அட்டா²ரஸமசித்தஸ்ஸ, டி²திகாலேஸு பி⁴ஜ்ஜதி.

869. ததா² து³தியசித்தஸ்ஸ, உப்பாத³ம்ஹி ஸமுட்டி²தம்;

அட்டா²ரஸமசித்தஸ்ஸ, ப⁴ங்கே³ன ஸஹ பி⁴ஜ்ஜதி.

870. இதி வுத்தனியாமேன, ஸஜாதிக்க²ணதோ பரம்;

ட²த்வா ஏகூனபஞ்ஞாஸ, க²ணானி புன பி⁴ஜ்ஜதி.

871. தஸ்மா ஏகூனபஞ்ஞாஸ, கலாபா ஸஹ வத்தரே;

ஏகோ ஜாயதி ஏகோ ச, பி⁴ஜ்ஜதீதி ச ஸப்³ப³தா².

872. ஏகஸந்ததிஸம்ப³ந்தா⁴, கலாபா ஸஹ கம்மஜா;

யதா²னுபுப்³ப³க⁴டிதா, ஏகபஞ்ஞாஸ லப்³ப⁴ரே.

873. ஸத்தவீஸ பனிச்சேவம், காமே த்³வே ரூபபூ⁴மியம்;

ரூபஸந்ததிஸீஸானம், ராஸயோ ஸத்தகாத³யோ.

874. ஏகூனதிம்ஸ ஸப்³பே³பி, கம்மஜாதா யதா²ரஹம்;

ஏகபஞ்ஞாஸ க⁴டிகா, பவத்தந்தி க²ணே க²ணே.

875. தத்த² ஸந்தி⁴க்க²ணே ஜாதம், ஸத்தரஸமசேதஸோ;

உப்பாதே³ பி⁴ஜ்ஜதிச்சேவம், வுத்தோ அட்ட²கதா²னயோ.

876. தம் நயம் படிபா³ஹித்வா, சித்தேன ஸஹ பி⁴ஜ்ஜதி;

சித்தேன ஸஹ ஜாதந்தி, வுத்தமாசரியேன ஹி.

877. ஆனாபானதக்கசாரா, ஏகுப்பாத³னிரோத⁴கா;

வுத்தா ஹி யமகே காயவசீஸங்கா²ரனாமகா.

878. சித்துப்பாத³க்க²ணே ஜாதா, உது தஸ்ஸ டி²திக்க²ணே;

ரூபம் ஜனேதி தத்தா²பி, உது ப⁴ங்க³க்க²ணேபி ச.

879. அனுபுப்³ப³க்கமேனேவம், ஜாதம் ரூபம் ததா²பரம்;

அட்டா²ரஸமஉப்பாத³ட்டி²திஆதீ³ஸு பி⁴ஜ்ஜதி.

880. இத்த²ம் கலாபா க⁴டிதா, உதுஜாஹாரஜாபி ச;

ஏகஸந்ததிஸம்ப³ந்தா⁴, ஏகபஞ்ஞாஸ லப்³ப⁴ரே.

881. கலாபா சித்தஜா யஸ்மா, உப்பாத³க்க²ணஸம்பூ⁴தா;

க⁴டிகா ஸஹ லப்³ப⁴ந்தி, தஸ்மா ஸத்தரஸேவ தே.

882. ஸப்³பே³பி ரூபஜனகா, சித்துப்பாதே³ யதா²ஸகம்;

ஜனேந்தி டி²திப⁴ங்கே³ஸு, ந ஜனேந்தீதி கேசனா.

883. குஸலாப்³யாகதாதீ³னம், ஏகுப்பாத³னிரோத⁴தா;

த⁴ம்மானம் யமகே வுத்தா, இதி பாளி வத³ந்தி ச.

884. குஸலாதி³கஸம்ப³ந்தா⁴, தத்த² தத்த² ஹி தே³ஸிதா;

இதி வத்வா புரே வுத்தம், இச்ச²ந்தாசரியா நயம்.

885. இச்சேவம் சதுஸம்பூ⁴தா, ரூபஸந்ததிராஸயோ;

ரூபானி ச கலாபா ச, ஏகாப³த்³தா⁴ யதா²ரஹம்.

886. ஸுத்தபவத்தமத்தானம், ஸம்பு³த்³தா⁴னம்பி பாணினம்;

யாவ மரணகாலாபி, பவத்தந்தி நிரந்தரம்.

887. ஆயுக்க²யா ச மரணம், ததா² கம்மக்க²யா ஸியா;

உபி⁴ன்னம் வா க²யா சாத², உபச்சே²த³ககம்முனா.

888. சதுதா⁴பி மரந்தஸ்ஸ, தஸ்ஸேவம் து யதா²ரஹம்;

ஸத்தரஸசித்தக்க²ணமத்தஸேஸம்ஹி ஜீவிதே.

889. உபரிச்சுதிசித்தஸ்ஸ, ஸத்தரஸமசேதஸோ;

டி²திகாலமுபாதா³ய, ந து ஜாயதி கம்மஜம்.

890. தஸ்ஸுப்பாத³க்க²ணே ஜாதம்,

ரூபஞ்ச சுதியா ஸஹ;

பி⁴ஜ்ஜதீதி மதோ நாம,

ததோ ஹோதி ஸ புக்³க³லோ.

891. சித்தஜாஹாரஜஞ்சாபி, ந ஜாயதி ததோ பரம்;

உதுஸம்ப⁴வரூபம் து, அவஸிஸ்ஸதி வா ந வா.

892. ததோ வுத்தனயேனேவ, மதஸத்தோ யதா²ரஹம்;

மிஸ்ஸாமிஸ்ஸாஹி ஸந்தீ⁴ஹி, புனதே³வோபபஜ்ஜதி.

893. ததோ வுத்தனயேனேவ, ஏகூனதிம்ஸ கம்மஜா;

தேஸமுட்டா²னிகா பஞ்ச, சதுத்திம்ஸ ஸமிஸ்ஸிதா.

894. கலாபா ராஸயோ ஹோந்தி, ஸத்தவீஸதிபூ⁴மிஸு;

இதி ஸப்³ப³பகாரேன, ரூபத⁴ம்மா பகாஸிதாதி.

இதி ரூபவிபா⁴கே³ பகிண்ணககதா² நிட்டி²தா.

த்³வாவீஸதிமோ பரிச்சே²தோ³.

நிட்டி²தோ ச ஸப்³ப³தா²பி ரூபவிபா⁴கோ³.