தேவீஸதிமோ பரிச்சே²தோ³

4. நிப்³பா³னவிபா⁴கோ³

23. மூலவிஸுத்³தி⁴கதா²

895. இத்த²ம் சித்தம் சேதஸிகம், ரூபஞ்சேவாதி ஸங்க²தா;

வுத்தா அஸங்க²தம் தா³னி, நிப்³பா³னந்தி பவுச்சதி.

896. ஸீலவிஸுத்³தி⁴ ஆதி³ம்ஹி, ததோ சித்தவிஸுத்³தி⁴ ச;

தி³ட்டி²விஸுத்³தி⁴னாமா ச, கங்கா²விதரணாபி ச.

897. ததோ பரம் மக்³கா³மக்³க³-ஞாணத³ஸ்ஸனனாமிகா;

ததா² படிபதா³ஞாண-த³ஸ்ஸனா ஞாணத³ஸ்ஸனம்.

898. இச்சானுக்கமதோ வுத்தா, ஸத்த ஹோந்தி விஸுத்³தி⁴யோ;

ஸத்தமானுத்தரா தத்த², புப்³ப³பா⁴கா³ ச² லோகியா.

899. ஸம்வரோ பாதிமோக்கோ² ச, ததே²விந்த்³ரியஸம்வரோ;

ஆஜீவபாரிஸுத்³தி⁴ ச, ஸீலம் பச்சயனிஸ்ஸிதம்.

900. இதி ஸீலவிஸுத்³தீ⁴தி, ஸுத்³த⁴மேதம் பவுச்சதி;

சதுபாரிஸுத்³தி⁴ஸீலம், து⁴தங்க³பரிவாரிதம்.

901. கஸிணானி த³ஸாஸுபா⁴, த³ஸானுஸ்ஸதியோ பன;

அப்பமஞ்ஞா ச ஸஞ்ஞா ச, வவத்தா²ருப்பகாதி ச.

902. ஸமத²க்கம்மட்டா²னானி, தாலீஸட்ட²கதா²னயே;

பாளியம் து விப⁴த்தானி, அட்ட²திம்ஸாதி வண்ணிதம்.

903. பத²வாபோ ச தேஜோ ச,

வாயோ நீலஞ்ச பீதகம்;

லோஹிதோதா³தமாகாஸம்,

ஆலோககஸிணந்தி ச.

904. கஸிணானி த³ஸேதானி, வுத்தானட்ட²கதா²னயே;

அட்டே²வ பாளியம் ஹித்வா, அந்தே து கஸிணத்³வயம்.

905. உத்³து⁴மாதம் வினீலஞ்ச, விபுப்³ப³கம் விகா²யிதம்;

விச்சி²த்³த³கஞ்ச விக்கி²த்தம், ஹதவிக்கி²த்தலோஹிதம்.

906. புளவகம் அட்டி²கஞ்சேதி, அஸுபா⁴ த³ஸ தே³ஸிதா;

ரூபகாயவிபா⁴கா³ய, த³ஸகாயவிபத்தியா.

907. பு³த்³தே⁴ த⁴ம்மே ச ஸங்கே⁴ ச, ஸீலே சாகே³ ச அத்தனா;

தே³வதோபஸமாயஞ்ச, ஸத்தானுஸ்ஸதியோ கமா.

908. மரணஸ்ஸதி நாமேகா, ததா² காயக³தாஸதி;

ஆனாபானஸ்ஸதிச்சேவம், த³ஸானுஸ்ஸதியோ மதா.

909. மேத்தா கருணா முதி³தா, உபேக்கா²தி சதுப்³பி³தா⁴;

வுத்தா ப்³ரஹ்மவிஹாரா ச, அப்பமஞ்ஞாதி தாதி³னா.

910. ஏகாஹாரே படிக்கூல-ஸஞ்ஞா நாமேகமேவ து;

சதுதா⁴துவவத்தா²னம், சதுதா⁴துபரிக்³க³ஹோ.

911. ஆகாஸானஞ்சாயதனம், விஞ்ஞாணஞ்சமதா²பரம்;

ஆகிஞ்சஞ்ஞம் ததா² நேவ-ஸஞ்ஞானாஸஞ்ஞனாமகம்.

912. இச்சானுக்கமதோ வுத்தா, அரூபஜ்ஜா²னிகா பன;

அரூபகம்மட்டா²னானி, சத்தாரோபி பகித்திதா.

913. கஸிணாஸுப⁴கோட்டா²ஸே, ஆனாபானே ச ஸப்³ப³தா²;

தி³ஸ்வா ஸுத்வா பு²ஸித்வா வா, பரிகம்மம் து குப்³ப³தோ.

914. உக்³க³ஹோ நாம ஸம்போ⁴தி, நிமித்தம் தத்த² யுஞ்ஜதோ;

படிபா⁴கோ³ தமாரப்³ப⁴, தத்த² வத்ததி அப்பனா.

915. ஸாது⁴ ஸத்தா ஸுகீ² ஹோந்து, து³க்கா² முச்சந்து பாணினோ;

அஹோ ஸத்தா ஸுக²ப்பத்தா, ஹோந்து யதி³ச்ச²காதி ச.

916. உத்³தி³ஸ்ஸ வா அனோதி³ஸ்ஸ, யுஞ்ஜதோ ஸத்தகோ³சரே;

அப்பமஞ்ஞா பனப்பேந்தி, அனுபுப்³பே³ன வத்திகா.

917. கஸிணுக்³கா⁴டிமாகாஸே, பட²மாருப்பமானஸே;

தஸ்ஸேவ நத்தி²பா⁴வே ச, ததியாருப்பகேதி ச.

918. யுஞ்ஜந்தஸ்ஸ பனேதேஸு, கோ³சரேஸு சதூஸுபி;

அப்பேந்தி அனுபுப்³பே³ன, ஆருப்பாபி சதுப்³பி³தா⁴.

919. ஆனாபானஞ்ச கஸிணம், பஞ்சகஜ்ஜா²னிகம் தஹிம்;

பட²மஜ்ஜா²னிகா வுத்தா, கோட்டா²ஸாஸுப⁴பா⁴வனா.

920. ஸுகி²தஜ்ஜா²னிகா திஸ்ஸோ, அப்பமஞ்ஞா ச ஹேட்டி²மா;

உபேக்கா²ருப்பகா பஞ்ச, உபேக்கா²ஜா²னிகாதி ச.

921. ஏகா த³ஸேகா த³ஸ ச, தயோ பஞ்சேதி ஸப்³ப³தா²;

பரிகம்மவஸா திம்ஸ, ச² கோட்டா²ஸா யதா²க்கமம்.

922. பஞ்சகாதி³ஸுகோ²பேக்கா², ஜா²னபே⁴தா³ சதுப்³பி³தா⁴;

ஏகச்சதுபஞ்சஜா²ன-வஸேன திவிதா⁴ ஸியும்.

923. ரூபாரூபவஸா த்³வே ச, அப்பனாதோ புனேகதா⁴;

இச்சேவமப்பனா கம்ம-ட்டா²னபே⁴தா³ ஸமிஸ்ஸிதா.

924. த்³வே ச ஸஞ்ஞாவவத்தா²னா, அட்டா²னுஸ்ஸதியோதி ச;

ஸேஸா த³ஸ பவுச்சந்தி, உபசாரஸமாதி⁴கா.

925. பரிகம்மோபசாரானுலோமகோ³த்ரபு⁴தோ பரம்;

பஞ்சமம் வா சதுத்த²ம் வா, ஜவனம் ஹோதி அப்பனா.

926. அப்பனாஜவனம் ஸப்³ப³ம், லோகுத்தரமஹக்³க³தம்;

திஹேதுகபரித்தானி, புரிமானி யதா²ரஹம்.

927. ஆவஜ்ஜனா ச வஸிதா, தம்ஸமாபஜ்ஜனா ததா²;

அதி⁴ட்டா²னா ச வுட்டா²னா, பச்சவேக்க²ண பஞ்சமா.

928. வஸிதாஹி வஸீபூ⁴தா, இதி கத்வான பஞ்சஹி;

பா⁴வேந்தஸ்ஸ பனப்பேந்தி, உபரூபரி அப்பனா.

929. யுஞ்ஜந்தஸ்ஸ து வுட்டா²ய, கஸிணஜ்ஜா²னபஞ்சமா;

பஞ்சாபி⁴ஞ்ஞா ஹி அப்பேந்தி, ரூபஸத்³தா³தி³கோ³சரே.

930. லோகுத்தரா பனப்பேந்தி, ஸப்³பே³ நிப்³பா³னகோ³சரே;

அனிச்சது³க்கா²னத்தாதி, பூ⁴மித⁴ம்மே விபஸ்ஸதோ.

931. தத்த² ச பாத³கஜ்ஜா²னம், ஸம்மட்ட²ஜ்ஜா²னமேவ வா;

அஜ்ஜா²ஸயோ ச வுட்டா²ன-கா³மினீ ச விபஸ்ஸனா.

932. மக்³கா³னம் ஜா²னபே⁴தா³ய, யதா²யோக³ம் நியாமதா;

யதா²ஸகம் ப²லானம் து, மக்³கா³ ஹோந்தி நியாமதா.

933. மக்³கா³னந்தரமேவாத², பூ⁴மித⁴ம்மே விபஸ்ஸதோ;

ப²லஸமாபத்தியம்பி, அப்பேதி ப²லமானஸம்.

934. அனுபுப்³ப³ஸமாபத்திம், ஸமாபஜ்ஜிஸ்ஸ வுட்டி²தோ;

ஜா²னத⁴ம்மே விபஸ்ஸித்வா, தத்த² தத்தே²வ பண்டி³தோ.

935. சதுத்தா²ருப்பமப்பேத்வா, ஏகத்³விஜவனாபரம்;

நிரோத⁴ம் நாம பு²ஸதி, ஸமாபத்திமசித்தகம்.

936. அரஹா வா அனாகா³மீ, பஞ்சவோகாரபூ⁴மியம்;

யதா²ஸகம் ப²லுப்பாதோ³, வுட்டா²னந்தி ததோ மதோ.

937. அப்பனாபரியோஸானே, ஸியா ஸப்³ப³த்த² ஸம்ப⁴வா;

ப⁴வங்க³பாதோ தம் சே²த்வா, ஜாயதே பச்சவேக்க²ணா.

938. இதி வுத்தானுஸாரேன, அப்பனானயஸங்க³ஹம்;

யதா²யோக³ம் விபா⁴வேய்ய, தத்த² தத்த² விசக்க²ணோ.

939. சித்தவிஸுத்³தி⁴ நாமாயம், சித்தஸம்க்லேஸஸோத⁴னோ;

உபசாரப்பனாபே⁴தோ³, ஸமதோ² புப்³ப³பா⁴கி³யோதி.

இதி நிப்³பா³னவிபா⁴கே³ மூலவிஸுத்³தி⁴கதா² நிட்டி²தா.

தேவீஸதிமோ பரிச்சே²தோ³.