21. உப்பத்திகதா²

797. அட்ட²வீஸதி ரூபானி, கலாபா சேகவீஸதி;

வுத்தா சேத்தாவதா தேஸம், உப்பாதோ³ தா³னி நிய்யதே.

798. அண்ட³ஜா ஜலாபு³ஜா ச, ஸம்ஸேத³ஜோபபாதிகா;

இச்சுப்பத்திபபே⁴தே³ன, சதஸ்ஸோ யோனியோ மதா.

799. பு⁴ம்மவஜ்ஜேஸு தே³வேஸு,

பேதே நிஜ்ஜா²மதண்ஹிகே;

நிரயேஸு ச ஸம்போ⁴தி,

யோனேகாவோபபாதிகா.

800. பு⁴ம்மதே³வே மனுஸ்ஸேஸு,

திரச்சா²னாஸுரே ததா²;

பேதேஸு சாவஸேஸேஸு,

சதஸ்ஸோபி ச யோனியோ.

801. தத்த²ண்ட³ஜா ஜலாபு³ஜா, க³ப்³ப⁴ஸேய்யஸமுக்³க³மோ;

ஸம்ஸேத³ஜோபபாதிகா, ஓபபாதிகனாமகா.

802. தத்த² ஸம்புண்ணாயதனோ, க³ப்³ப⁴ஸேய்யஸமுக்³க³மோ;

அபா⁴வோ த்³வே ஸபா⁴வா ச, இத்தி²பும்பா⁴வமிஸ்ஸிதா.

803. பரிபுண்ணாபரிபுண்ணோ, ஓபபாதிகனாமகோ;

அபா⁴வோ த்³வே ஸபா⁴வா ச, சதுராபாயபூ⁴மியம்.

804. ஸம்புண்ணாயதனோவேஸோ,

காமே ஸுக³தியம் பன;

ஆதி³கப்பே அபா⁴வோ ச,

த்³வே ஸபா⁴வா ததோ பரம்.

805. அபரிபுண்ணாயதனோ, அபா⁴வோ ச மஹக்³க³தே;

இச்சேவம் த³ஸதா⁴ ஹோந்தி, ஸப்³பா³ ஸந்தி⁴ஸமுக்³க³மா.

806. தத்தே²வ த³ஸதா⁴ பி⁴ன்னே, அத்தபா⁴வஸமுக்³க³மே;

ஸந்தி⁴யஞ்ச பவத்தே ச, ரூபுப்பத்திம் விபா⁴வயே.

807. தத்தா²பா⁴வகஸத்தானம், க³ப்³ப⁴ஸேய்யஸமுக்³க³மே;

காயவத்து²வஸா த்³வேவ, த³ஸகா ஹோந்தி கம்மஜா.

808. ரூபஸந்ததிஸீஸானி, த்³வே ச ரூபானி வீஸதி;

அக³ஹீதக்³க³ஹணேன, தத்தே²காத³ஸ நித்³தி³ஸே.

809. ததோ பரம் பவத்திம்ஹி, வட்³ட⁴மானஸ்ஸ ஜந்துனோ;

சக்கு²த³ஸகாத³யோ ச, சத்தாரோ ஹோந்தி ஸம்ப⁴வா.

810. இச்சாபா⁴வகஸத்தானம், ச²ளேவுத்தமகோடியா;

ஹேட்டி²மகோடியா த்³வேவ, க³ப்³ப⁴ஸேய்யஸமுக்³க³மே.

811. சக்கு²ஸோதகா⁴னவஸா, தத்த² தித்³வேகஹீனகா;

ஏகோ தயோ தயோ சேவ, ஸியும்திசதுபஞ்சகா.

812. ஓபபாதிகஸங்கா²தே, அபா⁴வகஸமுக்³க³மே;

ஜிவ்ஹாகாயவத்து²வஸா, தயோ ஹேட்டி²மகோடியா.

813. உத்தமகோடியா ஹோந்தி, ச²ளேவோபி⁴ன்னமந்தரே;

சதுக்கபஞ்சகா தத்த², த்³வேகஹீனா தயோ தயோ.

814. ச²க்காத³யோ அபா⁴வானம்,

இச்சேவம் பஞ்சஸங்க³ஹா;

ஏகோ தயோ தயோ சேகோ,

ஏகோதி ச யதா²க்கமம்.

815. ஸபா⁴வகானம் த்³வின்னம்பி, து³விதா⁴ ஸத்தகாத³யோ;

பா⁴வாதி³கா யதா²வுத்தா, நவதா⁴ நவதா⁴ ஸியும்.

816. ஸத்தேவுத்தமதோ ஹேட்டா², திசதுக்கா தத³ந்தரே;

சதுக்கபஞ்சகச்ச²க்கா, பஞ்சச²க்காபி ச த்³விதா⁴.

817. திண்ணன்னம்பி வஸேனேவ, ஸத்தகச்ச²க்கபஞ்சகா;

சதுக்கதிகது³க்கா ச, ச² கோட்டா²ஸா யதா²ரஹம்.

818. த்³வே ஸத்த ச நவ பஞ்ச, தயோ சேகோ யதா²க்கமம்;

ரூபஸந்ததிஸீஸானம், ராஸயோ ஸத்தவீஸதி.

819. கம்மஜாதா யதா²யோக³ம், பவத்தந்தி க²ணே க²ணே;

காமாவசரஸத்தானம், படிஸந்தி⁴பவத்தியம்.

820. தத்த² ஸந்ததிஸீஸானி, ரூபானி ச யதா²ரஹம்;

புப்³பே³ வுத்தனயேனேவ, ஸப்³ப³த்தா²பி வினித்³தி³ஸே.

821. ஸீதுண்ஹோதுஸமஞ்ஞாதா,

தேஜோதா⁴து டி²திக்க²ணே;

பூ⁴தா ஸந்தி⁴க்க²ணே ரூபம்,

ஜனேதி உதுஜட்ட²கம்.

822. படிஸந்தி⁴மதிக்கம்ம, சித்தம் சித்தஜமட்ட²கம்;

ப⁴வங்கா³தி³முபாதா³ய, ஜனேதுப்பத்தியம் பன.

823. பு⁴த்தாஹாரோ டி²திப்பத்தோ, மாதரா ச ஸயம்பி ச;

ஸரீரானுக³தோ ஹுத்வா, ஜனேதாஹாரஜட்ட²கம்.

824. இதி ஸுத்³த⁴ட்ட²கானி ச, தேஸமுட்டா²னிகாபரே;

ஸத்³த³விஞ்ஞத்திலஹுதா, ஸம்ப⁴வே ஸம்ப⁴வந்தி ச.

825. இத்த²ம் சதுஸமுட்டா²னா, கலாபா காமபூ⁴மியம்;

யாவஜீவம் பவத்தந்தி, தீ³பஜாலாவ ஸந்ததி.

826. சக்கு²ஸோதவத்து²வஸா, த³ஸகா ச தயோ பரம்;

ஜீவிதனவகஞ்சேவ, ரூபாவசரபூ⁴மியம்.

827. ஹோந்தி ஸந்தி⁴பவத்தீஸு, சத்தாரோ கம்மஜா ஸதா³;

புப்³பே³ வுத்தனயேனேவ, பவத்தே உதுசித்தஜா.

828. ஜீவிதனவகஞ்சேகம், படிஸந்தி⁴பவத்தியம்;

பவத்தே உதுஜஞ்சேதி, த்³வேதா⁴ஸஞ்ஞீனமுத்³தி³ஸே.

829. இச்சுப்பத்திகமம் ஞத்வா, விபா⁴வேய்ய ததோ பரம்;

கலாபானஞ்ச ரூபானம், ஸம்ப⁴வாஸம்ப⁴வம்பி ச.

830. இந்த்³ரியப³த்³த⁴ஸந்தானே, ஸப்³பே³ ஸம்போ⁴ந்தி ஸம்ப⁴வா;

கலாபா சேவ ரூபானி, ததா² ஸந்ததிராஸயோ.

831. ப³ஹித்³தா⁴ மதகாயே ச, நோபலப்³ப⁴ந்தி கம்மஜா;

சித்தோஜஜா கலாபா ச, உதுஜா லஹுதாத³யோ.

832. ததா² ஸுத்³த⁴ட்ட²கஸத்³த³-நவகஞ்சோது ஸப்³ப³தா²;

கலாபா தத்த² லப்³ப⁴ந்தி, த்³வே ச ரூபானி உத்³தி³ஸே.

833. தேஸமுட்டா²னிகா ஸப்³பே³, கலாபா நத்தி² ஸந்தி⁴யம்;

உப்பாத³காலே ஸப்³ப³த்த², ஜரதானிச்சதாபி ச.

834. கலாபா கம்மஜா ஸந்தி, ஜாதிரூபஞ்ச ஸந்தி⁴யம்;

ரூபானி ச கலாபா ச, ஸப்³பே³பி ச பவத்தியம்.

835. ஸந்தி ஸப்³பா³னி ரூபானி, காமேஸு சதுஸம்ப⁴வா;

ஜீவிதனவகம் ஹித்வா, கலாபா ஹோந்தி வீஸதி.

836. த³ஸகேஸ்வேவ க³ஹிதம், விஸும் காமே ந லப்³ப⁴தி;

ஜீவிதனவகம் நாம, ரூபலோகே விஸும் ஸியா.

837. ஆஹாரஜகலாபா ச, பா⁴வா த்³வே சாதி³கப்பிகே;

ஆதி³காலே ந லப்³ப⁴ந்தி, பச்சா² லப்³ப⁴ந்தி கேசிபி.

838. கா⁴னஜிவ்ஹாகாயபா⁴வ-த³ஸகா ரூபபூ⁴மியம்;

ஆஹாரஜகலாபா ச, ந லப்³ப⁴ந்தேவ ஸப்³ப³தா².

839. சக்கு²ஸோதவத்து²ஸத்³தா³, கலாபா சித்தஜாபி ச;

அஸஞ்ஞிபூ⁴மியம் புப்³பே³, வுத்தாபி ச ந லப்³ப⁴ரே.

840. கலாபா ஸத்த ரூபானி, பஞ்ச ரூபேஸ்வஸஞ்ஞிஸு;

நத்தே²காத³ஸ ரூபானி, கலாபேகூனவீஸதி.

841. தஸ்மா தேவீஸ ரூபானி, கலாபா பன சுத்³த³ஸ;

தேஸமுட்டா²னிகா ஸந்தி, ரூபாவசரபூ⁴மியம்.

842. ஸத்தரஸேவ ரூபானி, கலாபா த்³வே த்³விஸம்ப⁴வா;

அஸஞ்ஞீனம் து ஸம்போ⁴ந்தி, நத்தா²ரூபேஸு கிஞ்சிபி.

843. உப்பத்திக்கமமிச்சேவம், ஸம்ப⁴வாஸம்ப⁴வம்பி ச;

கலாபானஞ்ச ரூபானம், யதா²யோக³ம் விபா⁴வயேதி.

இதி ரூபவிபா⁴கே³ உப்பத்திகதா² நிட்டி²தா.

ஏகவீஸதிமோ பரிச்சே²தோ³.