நவமோ பரிச்சே²தோ³

9. சேதஸிகஸங்க³ஹகதா²

315. ஸத்த ஸாதா⁴ரணா சேவ, ச² த⁴ம்மா ச பகிண்ணகா;

ஸத்³தா⁴தி³ பஞ்சவீஸேதி, அட்ட²திம்ஸ ஸமிஸ்ஸிதா.

316. காமாவசரபுஞ்ஞேஸு, லப்³ப⁴ந்தி பட²மத்³வயே;

ஸத்ததிம்ஸேவ து³தியே, பஞ்ஞாமத்தவிவஜ்ஜிதா.

317. ததியே ச யதா²வுத்தா, பீதிமத்தவிவஜ்ஜிதா;

ச²த்திம்ஸேவ சதுத்த²ம்ஹி, பஞ்ஞாபீதித்³வயம் வினா.

318. மஹாக்ரியாஸு யுஜ்ஜந்தி, ஹித்வா விரதியோ ததா²;

பஞ்சதிம்ஸ சதுத்திம்ஸத்³வயம் தேத்திம்ஸகம் கமா.

319. ட²பேத்வா அப்பமஞ்ஞா ச, மஹாபாகேஸு யோஜிதா;

தேத்திம்ஸா சேவ த்³வத்திம்ஸத்³வயேகத்திம்ஸகம் கமா.

320. அப்பமஞ்ஞா க³ஹேத்வான, ஹித்வா விரதியோ ததா²;

பஞ்சதிம்ஸேவ பட²மே, ரூபாவசரமானஸே.

321. விதக்கம் து³தியே ஹித்வா, விசாரஞ்ச ததோ பரம்;

சதுத்தே² பன பீதிஞ்ச, அப்பமஞ்ஞஞ்ச பஞ்சமே.

322. யதா²வுத்தபகாராவ, சதுத்திம்ஸ யதா²க்கமம்;

தேத்திம்ஸ சேவ த்³வத்திம்ஸ, ஸமதிம்ஸஞ்ச லப்³ப⁴ரே.

323. பஞ்சமேன ஸமானா ச, ட²பேத்வாருப்பமானஸா;

பூ⁴மாரம்மணபே⁴த³ஞ்ச, அங்கா³னஞ்ச பணீததம்.

324. அப்பமஞ்ஞா ட²பேத்வான, க³ஹேத்வா விரதித்தயம்;

ச²த்திம்ஸானுத்தரே ஹோந்தி, பட²மஜ்ஜா²னமானஸே.

325. விதக்கம் து³தியே ஹித்வா, விசாரஞ்ச ததோ பரம்;

பீதிம் ஹித்வா சதுத்தே² ச, பஞ்சமேபி ச ஸப்³ப³தா².

326. யதா²வுத்தப்பகாராவ, பஞ்சதிம்ஸ யதா²க்கமம்;

சதுத்திம்ஸஞ்ச தேத்திம்ஸ, ததா² தேத்திம்ஸ சாபரே.

327. ஏவம் பா³வீஸதா⁴ பே⁴தோ³, அனவஜ்ஜேஸு ஸங்க³ஹோ;

ஏகூனஸட்டி²சித்தேஸு, அட்ட²திம்ஸானமீரிதோ.

328. விரதீ அப்பமஞ்ஞா ச, க³ஹேத்வா பன ஸப்³ப³ஸோ;

ஏகமேகம் க³ஹேத்வா ச, பச்சக்கா²ய ச ஸப்³ப³தா².

329. காமேஸு ஸத்ததா⁴ புஞ்ஞே, சதுதா⁴ ச க்ரியே ததா²;

ரூபஜ்ஜா²னசதுக்கே ச, கத்தப்³போ³யம்பி ஸங்க³ஹோ.

330. இமினா பனுபாயேன, ஸமஸத்ததி பே⁴த³தோ;

அனவஜ்ஜேஸு விஞ்ஞேய்யோ, சித்துப்பாதே³ஸு ஸங்க³ஹோ.

331. இதி ஸப்³ப³ப்பகாரேன, அனவஜ்ஜவினிச்ச²யம்;

ஞத்வா யோஜேய்ய மேதா⁴வீ, ஸாவஜ்ஜேஸு ச ஸங்க³ஹம்.

332. ஸத்த ஸாதா⁴ரணா சேவ, ச² த⁴ம்மா ச பகிண்ணகா;

சத்தாரோ பாபஸாமஞ்ஞா, த⁴ம்மா ஸத்தரஸேவிமே.

333. ஏகூனவீஸாஸங்கா²ரே, பட²மே லோப⁴தி³ட்டி²யா;

து³தியே லோப⁴மானேன, யதா²வுத்தா ச தத்தகா.

334. அட்டா²ரஸ வினா பீதிம், ததியே லோப⁴தி³ட்டி²யா;

சதுத்தே²பி வினா பீதிம், லோப⁴மானேன தத்தகா.

335. படிகே⁴ ச வினா பீதிம், அஸங்கா²ரே ததே²வ தே;

லப்³ப⁴ந்தி தோ³ஸகுக்குச்ச-மச்ச²ரியாஹி வீஸதி.

336. அஸங்கா²ரேஸு வுத்தா ச, ஸஸங்கா²ரேஸு பஞ்சதா⁴;

தி²னமித்³தே⁴னேகவீஸ, வீஸ த்³வேவீஸதிக்கமா.

337. ச²ந்த³ம் பீதிஞ்ச உத்³த⁴ச்சே, ஹித்வா பஞ்சத³ஸேவ தே;

ஹித்வா விமோக்க²ம் கங்க²ஞ்ச, க³ஹேத்வா கங்கி²தே ததா².

338. ஸத்தவீஸதித⁴ம்மானம், இதி த்³வாத³ஸ ஸங்க³ஹா;

த்³வாத³ஸாபுஞ்ஞசித்தேஸு, விஞ்ஞாதப்³பா³ விபா⁴வினா.

339. ஹித்வா சா²னியதே த⁴ம்மே, க³ஹேத்வா ச யதா²ரஹம்;

சதுத்திம்ஸாபி விஞ்ஞேய்யா, ஸங்க³ஹா தத்த² விஞ்ஞுனா.

340. த்³வாத³ஸாகுஸலேஸ்வேவ, ஞத்வா ஸங்க³ஹமுத்தரம்;

ஞேய்யாஹேதுகசித்தேஸு, ஸங்க³ஹம் கமதோ கத²ம்?

341. ஸத்த ஸாதா⁴ரணா ச²ந்த³வஜ்ஜிதா ச பகிண்ணகா;

ஹஸிதுப்பாத³சித்தம்ஹி, த்³வாத³ஸேவ பகாஸிதா.

342. வோட்ட²ப்³பே³ ச வினா பீதிம், வீரியம் ஸுக²தீரணே;

ஏகாத³ஸ யதா²வுத்தா, த⁴ம்மா த்³வீஸுபி தே³ஸிதா.

343. மனோதா⁴துத்திகே சேவ, உபேக்கா²தீரணத்³வயே;

த³ஸ ஹோந்தி யதா²வுத்தா, ஹித்வா வீரியபீதியோ.

344. ஸத்த ஸாதா⁴ரணா ஏவ, பஞ்சவிஞ்ஞாணஸம்ப⁴வா;

இச்சாஹேதுகசித்தேஸு, பஞ்சதா⁴ ஸங்க³ஹோ டி²தோ.

345. இதி சேதஸிகே த⁴ம்மே, சித்தேஸு க³ணிதே புன;

சித்தேன ஸஹ ஸங்க³ய்ஹ, க³ணேய்யாபி ச பண்டி³தோ.

346. அட்ட²திம்ஸாதி யே வுத்தா, சித்தேன ஸஹ தே புன;

ஏகூனசத்தாலீஸேதி, ஸப்³ப³த்தே²காதி⁴கம் நயே.

347. பா³வீஸேவம் த³ஸ த்³வே ச, பஞ்ச சேதி யதா²ரஹம்;

ஸங்க³ஹா ஸம்பயுத்தானம், தாலீஸேகூனகா கதா².

348. விதக்கோ ச விசாரோ ச, பீதி பஞ்ஞா ததா² பன;

அப்பமஞ்ஞா விரதீதி, நவ த⁴ம்மா யதா²ரஹம்.

349. க³ஹேதப்³பா³பனேதப்³பா³, ப⁴வந்தி அனவஜ்ஜகே;

பரிவத்தேதி ஸப்³ப³த்த², வேத³னா து யதா²ரஹம்.

350. ச²ந்தா³தி⁴மோக்க²வீரியா, ஸத்³தா⁴தே³கூனவீஸதி;

ப²ஸ்ஸாத³யோ ச²ளேவாதி, ந சலந்தட்ட²வீஸதி.

351. தேரஸேவ து ஸாவஜ்ஜே, ச²ளேவாஹேதுமானஸே;

ந சலந்தி த³ஸ அஞ்ஞே, சுத்³த³ஸா ச² ச ஸம்ப⁴வாதி.

இதி சேதஸிகவிபா⁴கே³ சேதஸிகஸங்க³ஹகதா² நிட்டி²தா.

நவமோ பரிச்சே²தோ³.