அட்ட²மோ பரிச்சே²தோ³

2. சேதஸிகவிபா⁴கோ³

8. சேதஸிகஸம்பயோக³கதா²

286. இதி சித்தவிதி⁴ம் ஞத்வா, த்³வேபஞ்ஞாஸ விபா⁴வினா;

ஞேய்யா சேதஸி ஸம்பூ⁴தா, த⁴ம்மா சேதஸிகா கத²ம்.

287. ப²ஸ்ஸோ ச வேத³னா ஸஞ்ஞா, சேதனேகக்³க³தா ததா²;

ஜீவிதம் மனஸிகாரோ, ஸத்த ஸாதா⁴ரணா இமே.

288. விதக்கோ ச விசாரோ ச, பீதி ச வீரியம் ததா²;

ச²ந்தோ³ ச அதி⁴மோக்கோ² ச, ச² பகிண்ணகனாமகா.

289. புஞ்ஞாபுஞ்ஞேஸு பாகேஸு, க்ரியாஸு ச யதா²ரஹம்;

மானஸேஸு பவத்தந்தி, விப்பகிண்ணா பகிண்ணகா.

290. ஸத்³தா⁴ ஸதிந்த்³ரியஞ்சேவ, ஹிரோத்தப்பப³லத்³வயம்;

அலோபோ⁴ ச அதோ³ஸோ ச, பஞ்ஞா மஜ்ஜ²த்ததாபி ச.

291. அட்டே²தே உத்தமா நாம, த⁴ம்மா உத்தமஸாத⁴னா;

நிவஜ்ஜாதி பவுச்சந்தி, யுக³ளா ச² ததோபரே.

292. பஸ்ஸத்³தி⁴ காயசித்தானம், லஹுதா முது³தா ததா²;

கம்மஞ்ஞதா ச பாகு³ஞ்ஞ-தா ச உஜுகதாதி ச.

293. அப்பமஞ்ஞாத்³வயம் நாம, கருணாமுதி³தா ஸியும்;

ஸம்மாவாசா ச கம்மந்தா-ஜீவா ச விரதித்தயம்.

294. பஞ்சவீஸ பனிச்சேதே, அனவஜ்ஜா யதா²ரஹம்;

பாபாஹேதுகமுத்தேஸு, அனவஜ்ஜேஸு ஜாயரே.

295. லோபோ⁴ தோ³ஸோ ச மோஹோ ச,

மானோ தி³ட்டி² ச ஸம்ஸயோ;

தி²னமித்³த⁴ஞ்ச உத்³த⁴ச்சம்,

குக்குச்சஞ்ச ததா² த³ஸ.

296. அஹிரீகமனோத்தப்பம், இஸ்ஸா மச்ச²ரியந்தி ச;

ஹோந்தி சுத்³த³ஸ ஸாவஜ்ஜா, ஸாவஜ்ஜேஸ்வேவ ஸம்ப⁴வா.

297. த்³வேபஞ்ஞாஸ சதுத்³தே⁴வம், த⁴ம்மா சேதஸிகா டி²தா;

தேஸம் தா³னி பவக்கா²மி, ஸம்பயோக³ஞ்ச ஸங்க³ஹம்.

298. ஸத்த ஸாதா⁴ரணா ஸப்³ப³-சித்தஸாதா⁴ரணா ததோ;

சித்தேன ஸத்³தி⁴ அட்ட²ன்னம், விப்பயோகோ³ ந கத்த²சி.

299. விதக்கோ பஞ்சவிஞ்ஞாணம், து³தியாதி³விவஜ்ஜிதே;

விசாரோபி ச தத்தே²வ, ததியாதி³விவஜ்ஜிதே.

300. ஸோமனஸ்ஸயுதே பீதி-சதுத்த²ஜ்ஜா²னவஜ்ஜிதே;

வீரியம் பட²மாவஜ்ஜ-விபாகாஹேதுவஜ்ஜிதே.

301. ச²ந்தோ³ ஸம்போ⁴தி ஸப்³ப³த்த², மோமூஹாஹேதுவஜ்ஜிதே;

அதி⁴மோக்கோ² விசிகிச்சா²-பஞ்சவிஞ்ஞாணவஜ்ஜிதே.

302. ச²ஸட்டி² பஞ்சபஞ்ஞாஸ, ஸத்ததி சேவ ஸோளஸ;

வீஸதேகாத³ஸேவாத², பகிண்ணகவிவஜ்ஜிதா.

303. மானஸா பஞ்சபஞ்ஞாஸ, ஸவிதக்கா ச²ஸட்டி² ச;

ஸவிசாரேகபஞ்ஞாஸ, ஸப்பீதிகமனா ததா².

304. தேஸத்ததி ஸவீரியா, ஸச²ந்தே³கூனஸத்ததி;

ஸாதி⁴மோக்கா² பவுச்சந்தி, அட்ட²ஸத்ததி மானஸா.

305. பஞ்ஞாப்பமஞ்ஞாவிரதீ, ஹித்வா ஏகூனஸட்டி²ஸு;

பாபாஹேதுகமுத்தேஸு, ஸத்³தா⁴தே³கூனவீஸதி.

306. த்³விஹேதுகாஹேதுபாபவஜ்ஜிதேஸு ஸமாஸதோ;

பஞ்ஞா து ஜாயதே ஸத்தசத்தாலீஸேஸு ஸப்³ப³தா².

307. மஹாக்ரியாகாமபுஞ்ஞ-ரூபஜ்ஜா²னேஸு ஜாயரே;

அப்பமஞ்ஞாட்ட²வீஸேஸு, ஹித்வா ஜா²னம் து பஞ்சமம்.

308. லோகுத்தரேஸு ஸப்³ப³த்த², ஸஹேவ விரதித்தயம்;

காமபுஞ்ஞேஸு ஸம்போ⁴தி, யதா²ஸம்ப⁴வதோ விஸும்.

309. விரதீஅப்பமஞ்ஞாஸு, பஞ்சஸ்வபி யதா²ரஹம்;

கதா³சிதே³வ ஸம்போ⁴தி, ஏகேகோவ ந சேகதோ.

310. அஹிரீகமனோத்தப்பம், மோஹஉத்³த⁴ச்சமேவ ச;

பாபஸாதா⁴ரணா நாம, சத்தாரோ பாபஸம்ப⁴வா.

311. லோபோ⁴ ச லோப⁴மூலேஸு, தி³ட்டி²யுத்தேஸு தி³ட்டி² ச;

மானோ தி³ட்டி²வியுத்தேஸு, தி³ட்டி²மானா ந சேகதோ.

312. தோ³ஸமூலேஸு தோ³ஸோ ச, இஸ்ஸா மச்ச²ரியம் ததா²;

குக்குச்சமிதி சத்தாரோ, விசிகிச்சா² து கங்கி²தே.

313. ஸஹேவ தி²னமித்³த⁴ம் து, ஸஸங்கா²ரேஸு பஞ்சஸு;

இதி சுத்³த³ஸ ஸாவஜ்ஜா, ஸாவஜ்ஜேஸ்வேவ நிச்சி²தா.

314. மானோ ச தி²னமித்³த⁴ஞ்ச, ஸஹ வாத² விஸும் ந வா;

இஸ்ஸாமச்சே²ரகுக்குச்சா, அஞ்ஞமஞ்ஞம் விஸும் ந வாதி.

இதி சேதஸிகவிபா⁴கே³ சேதஸிகஸம்பயோக³கதா² நிட்டி²தா.

அட்ட²மோ பரிச்சே²தோ³.