2. து³தியோ பரிச்சே²தோ³

சேதஸிகனித்³தே³ஸோ

67. சித்தானந்தரமுத்³தி³ட்டா², யே ச சேதஸிகா மயா;

தேஸம் தா³னி கரிஸ்ஸாமி, விபா⁴ஜனமிதோ பரம்.

தத்த² சித்தஸம்பயுத்தா, சித்தே ப⁴வா வா சேதஸிகா. தேபி சித்தம் விய ஸாரம்மணதோ ஏகவிதா⁴, ஸவிபாகாவிபாகதோ து³விதா⁴, குஸலாகுஸலாப்³யாகதபே⁴த³தோ திவிதா⁴, காமாவசராதி³பே⁴த³தோ சதுப்³பி³தா⁴.

தத்த² காமாவசரசித்தஸம்பயுத்தா காமாவசரா. தேஸு காமாவசரபட²மமஹாகுஸலசித்தஸம்பயுத்தா தாவ நியதா ஸரூபேன ஆக³தா ஏகூனதிம்ஸ த⁴ம்மா ஹோந்தி. ஸேய்யதி²த³ம் – ப²ஸ்ஸோ வேத³னா ஸஞ்ஞா சேதனா விதக்கோ விசாரோ பீதி சித்தேகக்³க³தா ஸத்³தா⁴ ஸதி வீரியம் பஞ்ஞா ஜீவிதிந்த்³ரியம் அலோபோ⁴ அதோ³ஸோ ஹிரீ ஓத்தப்பம் காயப்பஸ்ஸத்³தி⁴ சித்தப்பஸ்ஸத்³தி⁴ காயலஹுதா சித்தலஹுதா காயமுது³தா சித்தமுது³தா காயகம்மஞ்ஞதா சித்தகம்மஞ்ஞதா காயபாகு³ஞ்ஞதா சித்தபாகு³ஞ்ஞதா காயுஜுகதா சித்துஜுகதாதி. புன ச²ந்தோ³, அதி⁴மோக்கோ², தத்ரமஜ்ஜ²த்ததா, மனஸிகாரோ சாதி சத்தாரோ நியதயேவாபனகா ஹோந்தி. இமேஹி சதூஹி தேத்திம்ஸ ஹோந்தி. புன கருணா முதி³தா காயது³ச்சரிதவிரதி வசீது³ச்சரிதவிரதி மிச்சா²ஜீவவிரதி சேதி இமே பஞ்ச அனியதா. இமே பன கதா³சி உப்பஜ்ஜந்தி.

இமேஸு பன கருணாமுதி³தாவஸேன பா⁴வனாகாலே கருணாபுப்³ப³பா⁴கோ³ வா முதி³தாபுப்³ப³பா⁴கோ³ வா ஏதா உப்பஜ்ஜந்தி, ந பனேகதோ உப்பஜ்ஜந்தி. யதா³ பன இமினா சித்தேன மிச்சா²கம்மந்தாதீ³ஹி விரமதி, ததா³ ஸம்மாகம்மந்தாதீ³னி பரிபூரேந்தி, ஏகா விரதி உப்பஜ்ஜதி, கருணாமுதி³தாஹி ஸஹ, அஞ்ஞமஞ்ஞேன ச ந உப்பஜ்ஜந்தி. தஸ்மா ஏதேஸு ஏகேன ஸஹ சதுத்திம்ஸேவ த⁴ம்மா ஹோந்தி.

68. ஆதி³னா புஞ்ஞசித்தேன, தேத்திம்ஸ நியதா மதா;

கருணாமுதி³தேகேன, சதுத்திம்ஸ ப⁴வந்தி தே.

69. கஸ்மா பனேத்த² மேத்தா ச, உபேக்கா² ச ந உத்³த⁴டா;

யேவாபனகத⁴ம்மேஸு, த⁴ம்மராஜேன ஸத்து²னா.

70. அப்³யாபாதே³ன மேத்தாபி, தத்ரமஜ்ஜ²த்ததாய ச;

உபேக்கா² க³ஹிதா யஸ்மா, தஸ்மா ந க³ஹிதா உபோ⁴.

71. கஸ்மா யேவாபனா த⁴ம்மா, பு³த்³தே⁴னாதி³ச்சப³ந்து⁴னா;

ஸரூபேனேவ ஸப்³பே³தே, பாளியம் ந ச உத்³த⁴டா.

72. யஸ்மா அனியதா கேசி, யஸ்மா ராஸிம் ப⁴ஜந்தி ந;

யஸ்மா ச து³ப்³ப³லா கேசி, தஸ்மா வுத்தா ந பாளியம்.

73. ச²ந்தா³தி⁴மோக்க²முதி³தா மனஸி ச காரோ,

மஜ்ஜ²த்ததா ச கருணா விரதித்தயம் ச;

புஞ்ஞேஸு தேன நியதானியதா ச ஸப்³பே³,

யேவாபனா முனிவரேன ந சேவ வுத்தா.

74. கஸ்மா பனேத்த² ப²ஸ்ஸோவ, பட²மம் ஸமுதீ³ரிதோ;

பட²மாபி⁴னிபாதத்தா, சித்தஸ்ஸாரம்மணே கிர.

75. பு²ஸித்வா பன ப²ஸ்ஸேன, வேத³னாய ச வேத³யே;

ஸஞ்ஜானாதி ச ஸஞ்ஞாய, சேதனாய ச சேதயே.

76. ப³லவபச்சயத்தா ச, ஸஹஜாதானமேவ ஹி;

ப²ஸ்ஸோவ பட²மம் வுத்தோ, தஸ்மா இத⁴ மஹேஸினா.

77. அகாரணமித³ம் ஸப்³ப³ம், சித்தானம் து ஸஹேவ ச;

ஏகுப்பாதா³தி³பா⁴வேன, சித்தஜானம் பவத்திதோ.

78. அயம் து பட²முப்பன்னோ, அயம் பச்சா²தி நத்தி²த³ம்;

ப³லவபச்சயத்தேபி, காரணஞ்ச ந தி³ஸ்ஸதி.

79. தே³ஸனாக்கமதோ சேவ, பட²மம் ஸமுதீ³ரிதோ;

இச்சேவம் பன விஞ்ஞேய்யம், விஞ்ஞுனா ந விஸேஸதோ.

80. ந ச பரியேஸிதப்³போ³யம், தஸ்மா புப்³பா³பரக்கமோ;

வசனத்த²லக்க²ணாதீ³ஹி, த⁴ம்மா ஏவ விஜானதா.

யஸ்மா பன இமே த⁴ம்மா வசனத்த²லக்க²ணாதீ³ஹி வுச்சமானா பாகடா ஹோந்தி ஸுவிஞ்ஞேய்யாவ, தஸ்மா தேஸம் வசனத்த²லக்க²ணாதீ³னி பவக்கா²மி. ஸேய்யதி²த³ம் – பு²ஸதீதி ப²ஸ்ஸோ. ஸ்வாயம் பு²ஸனலக்க²ணோ, ஸங்க⁴ட்டனரஸோ, ஸன்னிபாதபச்சுபட்டா²னோ, ப²லட்டே²ன வேத³னாபச்சுபட்டா²னோ வா, ஆபாத²க³தவிஸயபத³ட்டா²னோ. அயம் ஹி அரூபத⁴ம்மோபி ஸமானோ ஆரம்மணேஸு பு²ஸனாகாரேனேவ பவத்ததி, ஸோ த்³வின்னம் மேண்டா³னம் ஸன்னிபாதோ விய த³ட்ட²ப்³போ³.

ஸுந்த³ரம் மனோதி ஸுமனோ, ஸுமனஸ்ஸ பா⁴வோ ஸோமனஸ்ஸம், ஸோமனஸ்ஸமேவ வேத³னா ஸோமனஸ்ஸவேத³னா. ஸா வேத³யிதலக்க²ணா, இட்டா²காரானுப⁴வனரஸா ராஜா விய ஸுபோ⁴ஜனரஸம், சேதஸிகஅஸ்ஸாத³பச்சுபட்டா²னா, பஸ்ஸத்³தி⁴பத³ட்டா²னா.

நீலாதி³பே⁴த³ம் ஆரம்மணம் ஸஞ்ஜானாதீதி ஸஞ்ஞா. ஸா ஸஞ்ஜானனலக்க²ணா, பச்சாபி⁴ஞ்ஞாணகரணரஸா வட்³ட⁴கிஸ்ஸ அபி⁴ஞ்ஞாணகரணமிவ, யதா²க³ஹிதனிமித்தவஸேன அபி⁴னிவேஸகரணபச்சுபட்டா²னா, யதோ²பட்டி²தவிஸயபத³ட்டா²னா.

சேதயதீதி சேதனா. ஸத்³தி⁴ம் அத்தனா ஸம்பயுத்தத⁴ம்மே ஆரம்மணே அபி⁴ஸந்த³ஹதீதி அத்தோ². ஸா சேதயிதலக்க²ணா, ஆயூஹனரஸா, ஸம்வித³ஹனபச்சுபட்டா²னா ஸககிச்சபரகிச்சஸாத⁴கா ஜேட்ட²ஸிஸ்ஸமஹாவட்³ட⁴கிஆத³யோ விய.

விதக்கேதீதி விதக்கோ. விதக்கனம் வா விதக்கோ. ஸ்வாயம் ஆரம்மணே சித்தஸ்ஸ அபி⁴னிரோபனலக்க²ணோ, ஆஹனனபரியாஹனனரஸோ, ஆரம்மணே சித்தஸ்ஸ ஆனயனபச்சுபட்டா²னோ.

ஆரம்மணே தேன சித்தம் விசரதீதி விசாரோ. விசரணம் வா விசாரோ. அனுஸஞ்சரணந்தி வுத்தம் ஹோதி. ஸ்வாயம் ஆரம்மணானுமஜ்ஜனலக்க²ணோ, தத்த² ஸஹஜாதானுயோஜனரஸோ, சித்தஸ்ஸ அனுபப³ந்த⁴பச்சுபட்டா²னோ.

பினயதீதி பீதி. ஸா ஸம்பியாயனலக்க²ணா, காயசித்தபீணனரஸா, ப²ரணரஸா வா, ஓத³க்³யபச்சுபட்டா²னா.

சித்தஸ்ஸ ஏகக்³க³பா⁴வோ சித்தேகக்³க³தா. ஸமாதி⁴ஸ்ஸேதம் நாமம். ஸோ அவிஸாரலக்க²ணோ, அவிக்கே²பலக்க²ணோ வா, ஸஹஜாதானம் ஸம்பிண்ட³னரஸோ ந்ஹானியசுண்ணானம் உத³கம் விய, உபஸமபச்சுபட்டா²னோ, விஸேஸதோ ஸுக²பத³ட்டா²னோ.

ஸத்³த³ஹந்தி ஏதாய, ஸயம் வா ஸத்³த³ஹதி, ஸத்³த³ஹனமத்தமேவ வா ஏஸாதி ஸத்³தா⁴. ஸா பனேஸா ஸத்³த³ஹனலக்க²ணா, பஸாத³னரஸா உத³கப்பஸாத³கமணி விய, அகாலுஸியபச்சுபட்டா²னா, ஸத்³தே⁴ய்யவத்து²பத³ட்டா²னா.

ஸரந்தி ஏதாய, ஸயம் வா ஸரதி, ஸரணமத்தமேவ வா ஏஸாதி ஸதி. ஸா அபிலாபனலக்க²ணா, அஸம்மோஸரஸா, ஆரக்க²பச்சுபட்டா²னா, தி²ரஸஞ்ஞாபத³ட்டா²னா.

வீரபா⁴வோ வீரியம். வீரானம் வா கம்மம் வீரியம். தம் பனேதம் உஸ்ஸாஹனலக்க²ணம், ஸஹஜாதானம் உபத்த²ம்ப⁴னரஸம், அஸம்ஸீத³னபா⁴வபச்சுபட்டா²னம், ஸம்வேக³பத³ட்டா²னம்.

பஜானாதீதி பஞ்ஞா. ஸா பனேஸா விஜானனலக்க²ணா, விஸயோபா⁴ஸனரஸா பதீ³போ விய, அஸம்மோஹபச்சுபட்டா²னா அரஞ்ஞக³தஸுதே³ஸகோ விய.

ஜீவந்தி தேன தம்ஸம்பயுத்தத⁴ம்மாதி ஜீவிதம். தம் பன அத்தனா அவினிப்³பு⁴த்தானம் த⁴ம்மானம் அனுபாலனலக்க²ணம், தேஸம் பவத்தனரஸம், தேஸம்யேவ ட²பனபச்சுபட்டா²னம், யாபயிதப்³ப³த⁴ம்மபத³ட்டா²னம். ஸந்தேபி ச தேஸம் அனுபாலனலக்க²ணாதி³ம்ஹி விதா⁴னே அத்தி²க்க²ணேயேவ தம் தே த⁴ம்மே அனுபாலேதி உத³கம் விய உப்பலாதீ³னி, யதா²ஸகம் பச்சயுப்பன்னேபி ச த⁴ம்மே அனுபாலேதி தா⁴தி விய குமாரம், ஸயம்பவத்திதத⁴ம்மஸம்ப³ந்தே⁴னேவ பவத்ததி நியாமகோ விய, ந ப⁴ங்க³தோ உத்³த⁴ம் பவத்தயதி அத்தனோ ச பவத்தயிதப்³பா³னஞ்ச அபா⁴வா, ந ப⁴ங்க³க்க²ணே ட²பேதி ஸயம் பி⁴ஜ்ஜமானத்தா கீ²யமானோ விய வத்திஸ்னேஹோவ பதீ³பஸிக²ந்தி.

ந லுப்³ப⁴ந்தி தேன, ஸயம் வா ந லுப்³ப⁴தி, அலுப்³ப⁴னமத்தமேவ வா தந்தி அலோபோ⁴. ஸோ ஆரம்மணே சித்தஸ்ஸ அலக்³க³பா⁴வலக்க²ணோ கமலத³லே ஜலபி³ந்து³ விய, அபரிக்³க³ஹரஸோ முத்தபி⁴க்கு² விய, அனல்லீனபா⁴வபச்சுபட்டா²னோ அஸுசிம்ஹி பதிதபுரிஸோ விய.

ந து³ஸ்ஸந்தி தேன, ஸயம் வா ந து³ஸ்ஸதி, அது³ஸ்ஸனமத்தமேவ வா தந்தி அதோ³ஸோ. ஸோ அசண்டி³க்கலக்க²ணோ, அவிரோத⁴லக்க²ணோ வா அனுகூலமித்தோ விய, ஆகா⁴தவினயனரஸோ, பரிளாஹவினயனரஸோ வா சந்த³னம் விய, ஸோம்மபா⁴வபச்சுபட்டா²னோ புண்ணசந்தோ³ விய.

காயது³ச்சரிதாதீ³ஹி ஹிரீயதீதி ஹிரீ. லஜ்ஜாயேதம் அதி⁴வசனம். தேஹியேவ ஓத்தப்பதீதி ஓத்தப்பம். பாபதோ உப்³பே³க³ஸ்ஸேதம் அதி⁴வசனம். தத்த² பாபதோ ஜிகு³ச்ச²னலக்க²ணா ஹிரீ, ஓத்தாஸலக்க²ணம் ஓத்தப்பம். உபோ⁴பி பாபானம் அகரணரஸா, பாபதோ ஸங்கோசனபச்சுபட்டா²னா, அத்தகா³ரவபரகா³ரவபத³ட்டா²னா. இமே த⁴ம்மா லோகபாலாதி த³ட்ட²ப்³பா³.

காயபஸ்ஸம்ப⁴னம் காயபஸ்ஸத்³தி⁴. சித்தபஸ்ஸம்ப⁴னம் சித்தபஸ்ஸத்³தி⁴. காயோதி சேத்த² வேத³னாத³யோ தயோ க²ந்தா⁴. உபோ⁴பி பனேதா ஏகதோ ஹுத்வா காயசித்தத³ரத²வூபஸமலக்க²ணா, காயசித்தத³ரத²னிம்மத³னரஸா, காயசித்தானம் அபரிப்ப²ந்த³னஸீதிபா⁴வபச்சுபட்டா²னா, காயசித்தபத³ட்டா²னா, காயசித்தானம் அவூபஸமதாஉத்³த⁴ச்சாதி³கிலேஸப்படிபக்க²பூ⁴தாதி வேதி³தப்³பா³.

காயலஹுபா⁴வோ காயலஹுதா. சித்தலஹுபா⁴வோ சித்தலஹுதா. காயசித்தானம் க³ருபா⁴வவூபஸமலக்க²ணா, காயசித்தக³ருபா⁴வனிம்மத³னரஸா, காயசித்தானம் அத³ந்த⁴தாபச்சுபட்டா²னா, காயசித்தபத³ட்டா²னா, காயசித்தானம் க³ருபா⁴வகரதி²னமித்³தா⁴தி³கிலேஸப்படிபக்க²பூ⁴தாதி வேதி³தப்³பா³.

காயமுது³பா⁴வோ காயமுது³தா. சித்தமுது³பா⁴வோ சித்தமுது³தா. காயசித்தானம் த²த்³த⁴பா⁴வவூபஸமலக்க²ணா, காயசித்தானம் த²த்³த⁴பா⁴வனிம்மத³னரஸா, அப்படிகா⁴தபச்சுபட்டா²னா, காயசித்தபத³ட்டா²னா, காயசித்தானம் த²த்³த⁴பா⁴வகரதி³ட்டி²மானாதி³கிலேஸப்படிபக்க²பூ⁴தாதி வேதி³தப்³பா³.

காயகம்மஞ்ஞபா⁴வோ காயகம்மஞ்ஞதா. சித்தகம்மஞ்ஞபா⁴வோ சித்தகம்மஞ்ஞதா. காயசித்தானம் அகம்மஞ்ஞபா⁴வவூபஸமலக்க²ணா, காயசித்தானம் அகம்மஞ்ஞபா⁴வனிம்மத³னரஸா, காயசித்தானம் ஆரம்மணகரணஸம்பத்திபச்சுபட்டா²னா, காயசித்தபத³ட்டா²னம், காயசித்தானம் அகம்மஞ்ஞபா⁴வகரஅவஸேஸனீவரணாதி³கிலேஸப்படிபக்க²பூ⁴தாதி வேதி³தப்³பா³.

காயபாகு³ஞ்ஞபா⁴வோ காயபாகு³ஞ்ஞதா. சித்தபாகு³ஞ்ஞபா⁴வோ சித்தபாகு³ஞ்ஞதா. காயசித்தானம் அகே³லஞ்ஞபா⁴வலக்க²ணா, காயசித்தானம் கே³லஞ்ஞனிம்மத³னரஸா, நிராதீ³னவபச்சுபட்டா²னா, காயசித்தபத³ட்டா²னா, காயசித்தானம் கே³லஞ்ஞபா⁴வகரஅஸ்ஸத்³தா⁴தி³கிலேஸப்படிபக்க²பூ⁴தாதி த³ட்ட²ப்³பா³.

காயஸ்ஸ உஜுகபா⁴வோ காயுஜுகதா. சித்தஸ்ஸ உஜுகபா⁴வோ சித்துஜுகதா. காயசித்தானம் அகுடிலபா⁴வலக்க²ணா, காயசித்தானம் அஜ்ஜவலக்க²ணா வா, காயசித்தானம் குடிலபா⁴வனிம்மத³னரஸா, அஜிம்ஹதாபச்சுபட்டா²னா, காயசித்தபத³ட்டா²னா, காயசித்தானம் குடிலபா⁴வகரமாயாஸாடே²ய்யாதி³கிலேஸப்படிபக்க²பூ⁴தாதி த³ட்ட²ப்³பா³.

ச²ந்தோ³தி கத்துகம்யதாயேதம் அதி⁴வசனம். தஸ்மா ஸோ கத்துகம்யதாலக்க²ணோ ச²ந்தோ³, ஆரம்மணபரியேஸனரஸோ, ஆரம்மணேன அத்தி²கதாபச்சுபட்டா²னோ, ததே³வஸ்ஸ பத³ட்டா²னோ.

அதி⁴முச்சனம் அதி⁴மோக்கோ². ஸோ ஸன்னிட்டா²னலக்க²ணோ, அஸம்ஸப்பனரஸோ, நிச்ச²யபச்சுபட்டா²னோ, ஸன்னிட்டே²ய்யத⁴ம்மபத³ட்டா²னோ, ஆரம்மணே நிச்சலபா⁴வேன இந்த³கீ²லோ விய த³ட்ட²ப்³போ³.

தேஸு தேஸு த⁴ம்மேஸு மஜ்ஜ²த்தபா⁴வோ தத்ரமஜ்ஜ²த்ததா. ஸா சித்தசேதஸிகானம் ஸமவாஹிதலக்க²ணா, ஊனாதி⁴கதானிவாரணரஸா, பக்க²பாதுபச்சே²த³னரஸா வா, மஜ்ஜ²த்தபா⁴வபச்சுபட்டா²னா.

கிரியா காரோ, மனஸ்மிம் காரோ மனஸிகாரோ. புரிமமனதோ விஸதி³ஸம் மனம் கரோதீதி ச மனஸிகாரோ.

ஸ்வாயம் ஆரம்மணபடிபாத³கோ, வீதி²படிபாத³கோ, ஜவனபடிபாத³கோதி திப்பகாரோ. தத்த² ஆரம்மணபடிபாத³கோ மனஸ்மிம் காரோ மனஸிகாரோ. ஸோ ஸாரணலக்க²ணோ, ஸம்பயுத்தானம் ஆரம்மணே ஸம்யோஜனரஸோ, ஆரம்மணாபி⁴முக²பா⁴வபச்சுபட்டா²னோ, ஆரம்மணபத³ட்டா²னோ, ஸங்கா²ரக்க²ந்த⁴பரியாபன்னோ ஆரம்மணபடிபாத³கத்தேன ஸம்பயுத்தானம் ஸாரதீ² விய த³ட்ட²ப்³போ³. வீதி²படிபாத³கோதி பஞ்சத்³வாராவஜ்ஜனஸ்ஸேதம் அதி⁴வசனம், ஜவனபடிபாத³கோதி மனோத்³வாராவஜ்ஜனஸ்ஸேதம் அதி⁴வசனம், ந தே இத⁴ அதி⁴ப்பேதா.

கருணாதி பரது³க்கே² ஸதி ஸாதூ⁴னம் ஹத³யகம்பனம் கரோதீதி கருணா, கினாதி வினாஸேதி வா பரது³க்க²ந்தி கருணா. ஸா பரது³க்கா²பனயனாகாரப்பவத்திலக்க²ணா, பரது³க்கா²ஸஹனரஸா, அவிஹிம்ஸாபச்சுபட்டா²னா, து³க்கா²பி⁴பூ⁴தானம் அனாத²பா⁴வத³ஸ்ஸனபத³ட்டா²னா.

மோத³ந்தி தாய, ஸயம் வா மோத³தீதி முதி³தா. ஸா பமோத³னலக்க²ணா, அனிஸ்ஸாயனரஸா, அரதிவிகா⁴தபச்சுபட்டா²னா, ஸத்தானம் ஸம்பத்தித³ஸ்ஸனபத³ட்டா²னா. கேசி பன மேத்துபேக்கா²யோபி அனியதே இச்ச²ந்தி, தம் ந க³ஹேதப்³ப³ம். அத்த²தோ ஹி அதோ³ஸோ ஏவ மேத்தா, தத்ரமஜ்ஜ²த்துபேக்கா²யேவ உபேக்கா²தி.

காயது³ச்சரிததோ விரதி காயது³ச்சரிதவிரதி. ஏஸேவ நயோ ஸேஸேஸுபி த்³வீஸு. லக்க²ணாதி³தோ பன ஏதா திஸ்ஸோபி விரதியோ காயது³ச்சரிதாதி³வத்தூ²னம் அவீதிக்கமலக்க²ணா, காயது³ச்சரிதாதி³வத்து²தோ ஸங்கோசனரஸா, அகிரியபச்சுபட்டா²னா, ஸத்³தா⁴ஹிரிஓத்தப்பஅப்பிச்ச²தாதி³கு³ணபத³ட்டா²னா. கேசி பன இமாஸு ஏகேகம் நியதம் விரதிம் இச்ச²ந்தி. ஏவம் காமாவசரபட²மமஹாகுஸலசித்தேன இமே தேத்திம்ஸ வா சதுத்திம்ஸ வா த⁴ம்மா ஸம்பயோக³ம் க³ச்ச²ந்தீதி வேதி³தப்³பா³.

யதா² ச பட²மேன, ஏவம் து³தியசித்தேனாபி. ஸஸங்கா²ரபா⁴வமத்தமேவ ஹி ஏத்த² விஸேஸோ. புன ததியேன ஞாணவிப்பயோக³தோ ட²பேத்வா அமோஹம் அவஸேஸா த்³வத்திம்ஸ வா தேத்திம்ஸ வா வேதி³தப்³பா³. ததா² சதுத்தே²னாபி ஸஸங்கா²ரபா⁴வமத்தமேவ விஸேஸோ, பட²மே வுத்தேஸு பன ட²பேத்வா பீதிம் அவஸேஸா பஞ்சமேன ஸம்பயோக³ம் க³ச்ச²ந்தி. ஸோமனஸ்ஸட்டா²னே சேத்த² உபேக்கா²வேத³னா பவிட்டா². ஸா பன இட்டா²னிட்ட²விபரீதானுப⁴வனலக்க²ணா, பக்க²பாதுபச்சே²த³னரஸா. யதா² ச பஞ்சமேன, ஏவம் ச²ட்டே²னாபி. ஸஸங்கா²ரமத்தமேவ ஹோதி விஸேஸோ. ஸத்தமேன பன ட²பேத்வா பஞ்ஞம் அவஸேஸா ஏகதிம்ஸ வா த்³வத்திம்ஸ வா த⁴ம்மா ஹோந்தி, ததா² அட்ட²மேனாபி. ஸஸங்கா²ரமத்தமேவ விஸேஸோ. ஏவம் தாவ காமாவசரகுஸலசேதஸிகா வேதி³தப்³பா³.

81. உபேக்கா²யுத்தசித்தேஸு, ந து³க்க²ஸுக²பீதியோ;

ஜாயந்தேவ விஸும் பஞ்ச, கருணாமுதி³தாத³யோ.

அவஸேஸேஸு பன ரூபாவசரசித்தஸம்பயுத்தா ரூபாவசரா, தத்த² பட²மசித்தஸம்பயுத்தா தாவ காமாவசரபட²மசித்தே வுத்தேஸு ட²பேத்வா விரதித்தயம் அவஸேஸா வேதி³தப்³பா³. விரதியோ பன காமாவசரகுஸலலோகுத்தரேஸ்வேவ உப்பஜ்ஜந்தி, ந அஞ்ஞேஸு. து³தியேன விதக்கவஜ்ஜா த்³வத்திம்ஸ வா தேத்திம்ஸ வா. ததியேன விசாரவஜ்ஜா ஏகதிம்ஸ வா த்³வத்திம்ஸ வா. சதுத்தே²ன ததோ பீதிவஜ்ஜா திம்ஸ வா ஏகதிம்ஸ வா. பஞ்சமேன ததோ கருணாமுதி³தாவஜ்ஜா திம்ஸ ஹோந்தி, ஸோமனஸ்ஸட்டா²னே உபேக்கா² பவிட்டா². ஏவம் ரூபாவசரகுஸலசேதஸிகா வேதி³தப்³பா³.

அரூபாவசரசித்தஸம்பயுத்தா அரூபாவசரா, தே பன ரூபாவசரபஞ்சமே வுத்தனயேன வேதி³தப்³பா³. அரூபாவசரபா⁴வோவேத்த² விஸேஸோ.

லோகுத்தரசித்தஸம்பயுத்தா லோகுத்தரா, தே பன பட²மஜ்ஜா²னிகே மக்³க³சித்தே பட²மரூபாவசரசித்தே வுத்தனயேன து³தியஜ்ஜா²னிகாதி³பே⁴தே³பி மக்³க³சித்தே து³தியரூபாவசரசித்தாதீ³ஸு வுத்தனயேனேவ வேதி³தப்³பா³. கருணாமுதி³தானமபா⁴வோ ச நியதவிரதிபா⁴வோ ச லோகுத்தரபா⁴வோ சேத்த² விஸேஸோ. ஏவம் தாவ குஸலசித்தஸம்பயுத்தசேதஸிகா வேதி³தப்³பா³.

அகுஸலா பன சேதஸிகா பூ⁴மிதோ ஏகவிதா⁴ காமாவசராயேவ, தேஸு லோப⁴மூலபட²மாகுஸலசித்தஸம்பயுத்தா தாவ நியதா ஸரூபேனாக³தா பன்னரஸ, யேவாபனகா நியதா சத்தாரோதி ஏகூனவீஸதி ஹோந்தி. அனியதா ச² யேவாபனகாதி ஸப்³பே³ பஞ்சவீஸதி ஹோந்தி. ஸேய்யதி²த³ம் – ப²ஸ்ஸோ ஸோமனஸ்ஸவேத³னா ஸஞ்ஞா சேதனா விதக்கோ விசாரோ பீதி சித்தஸ்ஸேகக்³க³தா வீரியம் ஜீவிதம் அஹிரிகம் அனோத்தப்பம் லோபோ⁴ மோஹோ மிச்சா²தி³ட்டீ²தி இமே ஸரூபேனாக³தா பன்னரஸ, ச²ந்தோ³ அதி⁴மோக்கோ² உத்³த⁴ச்சம் மனஸிகாரோதி இமே சத்தாரோ நியதயேவாபனகா, இமே பன படிபாடியா த³ஸஸு சித்தேஸு நியதா ஹோந்தி, மானோ இஸ்ஸா மச்ச²ரியம் குக்குச்சம் தி²னமித்³த⁴ந்தி இமே ச²யேவ அனியதயேவாபனகா.

82. ஏவம் யேவாபனா ஸப்³பே³, நியதானியதா த³ஸ;

நித்³தி³ட்டா² பாபசித்தேஸு, ஹதபாபேன தாதி³னா.

தத்த² ப²ஸ்ஸோதி அகுஸலசித்தஸஹஜாதோ ப²ஸ்ஸோ. ஏஸ நயோ ஸேஸேஸுபி. ந ஹிரீயதீதி அஹிரிகோ, அஹிரிகஸ்ஸ பா⁴வோ அஹிரிகம். காயது³ச்சரிதாதீ³ஹி ஓத்தப்பதீதி ஓத்தப்பம், ந ஓத்தப்பம் அனோத்தப்பம். தத்த² காயது³ச்சரிதாதீ³ஹி அஜிகு³ச்ச²னலக்க²ணம், அலஜ்ஜாலக்க²ணம் வா அஹிரிகம், அனோத்தப்பம் தேஹேவ அஸாரஜ்ஜனலக்க²ணம், அனுத்தாஸலக்க²ணம் வா.

லுப்³ப⁴ந்தி தேன, ஸயம் வா லுப்³ப⁴தி, லுப்³ப⁴னமத்தமேவ வா தந்தி லோபோ⁴. ஸோ ஆரம்மணக³ஹணலக்க²ணோ மக்கடாலேபோ விய, அபி⁴ஸங்க³ரஸோ தத்தகபாலே பக்கி²த்தமம்ஸபேஸி விய, அபரிச்சாக³பச்சுபட்டா²னோ தேலஞ்ஜனராகோ³ விய, ஸம்யோஜனியேஸு த⁴ம்மேஸு அஸ்ஸாத³த³ஸ்ஸனபத³ட்டா²னோ.

முய்ஹந்தி தேன, ஸயம் வா முய்ஹதி, முய்ஹனமத்தமேவ வா தந்தி மோஹோ. ஸோ சித்தஸ்ஸ அந்த⁴பா⁴வலக்க²ணோ, அஞ்ஞாணலக்க²ணோ வா, அஸம்படிவேத⁴ரஸோ, ஆரம்மணஸபா⁴வச்சா²த³னரஸோ வா, அந்த⁴காரபச்சுபட்டா²னோ, அயோனிஸோமனஸிகாரபத³ட்டா²னோ.

மிச்சா² பஸ்ஸந்தி தாய, ஸயம் வா மிச்சா² பஸ்ஸதி, மிச்சா²த³ஸ்ஸனமத்தமேவ வா ஏஸாதி மிச்சா²தி³ட்டி². ஸா அயோனிஸோஅபி⁴னிவேஸலக்க²ணா, பராமாஸரஸா, மிச்சா²பி⁴னிவேஸபச்சுபட்டா²னா, அரியானம் அத³ஸ்ஸனகாமதாதி³பத³ட்டா²னா.

உத்³த⁴தபா⁴வோ உத்³த⁴ச்சம். தம் அவூபஸமலக்க²ணம் வாதாபி⁴கா⁴தசலஜலம் விய, அனவட்டா²னரஸம் வாதாபி⁴கா⁴தசலத⁴ஜபடாகா விய, ப⁴ந்தத்தபச்சுபட்டா²னம் பாஸாணாபி⁴கா⁴தஸமுத்³த⁴தப⁴ஸ்மம் விய, அயோனிஸோமனஸிகாரபத³ட்டா²னம்.

மஞ்ஞதீதி மானோ. ஸோ உண்ணதிலக்க²ணோ, ஸம்பக்³க³ஹணரஸோ, கேதுகம்யதாபச்சுபட்டா²னோ, தி³ட்டி²விப்பயுத்தலோப⁴பத³ட்டா²னோ.

இஸ்ஸதீதி இஸ்ஸா. ஸா பரஸம்பத்தீனம் உஸூயனலக்க²ணா, தத்தே²வ அனபி⁴ரதிரஸா, ததோ விமுக²பா⁴வபச்சுபட்டா²னா, பரஸம்பத்திபத³ட்டா²னா.

மச்ச²ரபா⁴வோ மச்ச²ரியம். தம் அத்தனோ ஸம்பத்தீனம் நிகு³ஹணலக்க²ணம், தாஸம்யேவ பரேஹி ஸாதா⁴ரணபா⁴வஅக்க²மனரஸம், ஸங்கோசனபச்சுபட்டா²னம், அத்தஸம்பத்திபத³ட்டா²னம்.

குச்சி²தம் கதம் குகதம், தஸ்ஸ பா⁴வோ குக்குச்சம். தம் பச்சா²னுதாபலக்க²ணம், கதாகதானுஸோசனரஸம், விப்படிஸாரபச்சுபட்டா²னம், கதாகதபத³ட்டா²னம்.

தி²னதா தி²னம். மித்³த⁴தா மித்³த⁴ம். அனுஸ்ஸாஹனஸம்ஸீத³னதா, அஸத்திவிகா⁴தோ சாதி அத்தோ². தி²னஞ்ச மித்³த⁴ஞ்ச தி²னமித்³த⁴ம். தத்த² தி²னம் அனுஸ்ஸாஹனலக்க²ணம், வீரியவினோத³னரஸம், ஸம்ஸீத³னபா⁴வபச்சுபட்டா²னம். மித்³த⁴ம் அகம்மஞ்ஞதாலக்க²ணம், ஓனஹனரஸம், லீனதாபச்சுபட்டா²னம், உப⁴யம்பி அயோனிஸோமனஸிகாரபத³ட்டா²னம். ஸேஸா குஸலே வுத்தனயேன வேதி³தப்³பா³.

ஏத்த² பன விதக்கவீரியஸமாதீ⁴னம் மிச்சா²ஸங்கப்பமிச்சா²வாயாமமிச்சா²ஸமாத⁴யோ விஸேஸகா. இதி இமே ஏகூனவீஸதி சேதஸிகா பட²மாகுஸலசித்தேன ஸம்பயோக³ம் க³ச்ச²ந்தீதி வேதி³தப்³பா³. யதா² ச பட²மேன, ஏவம் து³தியேனாபி. ஸஸங்கா²ரபா⁴வோ சேத்த² தி²னமித்³த⁴ஸ்ஸ நியதபா⁴வோ ச விஸேஸோ. ததியேன பட²மே வுத்தேஸு ட²பேத்வா தி³ட்டி²ம் ஸேஸா அட்டா²ரஸ வேதி³தப்³பா³. மானோ பனேத்த² அனியதோ ஹோதி, தி³ட்டி²யா ஸஹ ந உப்பஜ்ஜதீதி. சதுத்தே²ன து³தியே வுத்தேஸு ட²பேத்வா தி³ட்டி²ம் அவஸேஸா வேதி³தப்³பா³. ஏத்தா²பி ச மானோ அனியதோ ஹோதி. பஞ்சமேன பட²மே வுத்தேஸு ட²பேத்வா பீதிம் அவஸேஸா ஸம்பயோக³ம் க³ச்ச²ந்தீதி. ஸோமனஸ்ஸட்டா²னே பனேத்த² உபேக்கா² பவிட்டா². ச²ட்டே²னாபி பஞ்சமே வுத்தஸதி³ஸா ஏவ. ஸஸங்கா²ரதா, தி²னமித்³த⁴ஸ்ஸ நியதபா⁴வோ ச விஸேஸோ. ஸத்தமேன பஞ்சமே வுத்தேஸு ட²பேத்வா தி³ட்டி²ம் அவஸேஸா வேதி³தப்³பா³. மானோ பனேத்த² அனியதோ. அட்ட²மேன ச²ட்டே² வுத்தேஸு ட²பேத்வா தி³ட்டி²ம் அவஸேஸா வேதி³தப்³பா³. ஏத்தா²பி மானோ அனியதோ ஹோதி. ஏவம் லோப⁴மூலசேதஸிகா வேதி³தப்³பா³.

தோ³மனஸ்ஸஸஹக³தேஸு படிக⁴ஸம்பயுத்தேஸு தோ³ஸமூலேஸு த்³வீஸு பட²மேன அஸங்கா²ரிகேன ஸம்பயுத்தா நியதா ஸரூபேனாக³தா தேரஸ. ஸேய்யதி²த³ம் – ப²ஸ்ஸோ தோ³மனஸ்ஸவேத³னா ஸஞ்ஞா சேதனா சித்தேகக்³க³தா விதக்கோ விசாரோ வீரியம் ஜீவிதம் அஹிரிகம் அனோத்தப்பம் தோ³ஸோ மோஹோ சேதி இமே தேரஸ த⁴ம்மா ச²ந்தா³தீ³ஹி சதூஹி நியதயேவாபனகேஹி ஸத்தரஸ ஹோந்தி இஸ்ஸாமச்ச²ரியகுக்குச்சேஸு அனியதேஸு தீஸு ஏகேன ஸஹ அட்டா²ரஸ ஹோந்தி, ஏதேபி தயோ ந ஏகதோ உப்பஜ்ஜந்தி.

தத்த² து³ட்டு² மனோதி து³மனோ, து³மனஸ்ஸ பா⁴வோ தோ³மனஸ்ஸம், தோ³மனஸ்ஸவேத³னாயேதம் அதி⁴வசனம். தேன ஸஹக³தம் தோ³மனஸ்ஸஸஹக³தம். தம் அனிட்டா²ரம்மணானுப⁴வனலக்க²ணம், அனிட்டா²காரஸம்போ⁴க³ரஸம், சேதஸிகாபா³த⁴பச்சுபட்டா²னம், ஏகந்தேனேவ ஹத³யவத்து²பத³ட்டா²னம்.

து³ஸ்ஸந்தி தேன, ஸயம் வா து³ஸ்ஸதி, து³ஸ்ஸனமத்தமேவ வா தந்தி தோ³ஸோ. ஸோ சண்டி³க்கலக்க²ணோ பஹதாஸீவிஸோ விய, விஸப்பனரஸோ விஸனிபாதோ விய, அத்தனோ நிஸ்ஸயத³ஹனரஸோ வா தா³வக்³கி³ விய, து³ஸ்ஸனபச்சுபட்டா²னோ லத்³தோ⁴காஸோ விய ஸபத்தோ, ஆகா⁴தவத்து²பத³ட்டா²னோ. அவஸேஸா ஹேட்டா² வுத்தப்பகாராவ. இதி இமே ஸத்தரஸ வா அட்டா²ரஸ வா நவமேன ஸம்பயோக³ம் க³ச்ச²ந்தீதி வேதி³தப்³பா³. யதா² ச நவமேன, ஏவம் த³ஸமேனாபி. ஸஸங்கா²ரதா, பனேத்த² தி²னமித்³த⁴ஸம்ப⁴வோ ச விஸேஸோ.

த்³வீஸு பன மோஹமூலேஸு விசிகிச்சா²ஸம்பயுத்தேன ஏகாத³ஸமேன ஸம்பயுத்தா தாவ ப²ஸ்ஸோ உபேக்கா²வேத³னா ஸஞ்ஞா சேதனா விதக்கோ விசாரோ வீரியம் ஜீவிதம் சித்தட்டி²தி அஹிரிகம் அனோத்தப்பம் மோஹோ விசிகிச்சா²தி ஸரூபேனாக³தா தேரஸ, உத்³த⁴ச்சம் மனஸிகாரோதி த்³வே யேவாபனகா நியதா. தேஹி ஸத்³தி⁴ம் பன்னரஸ ஹோந்தி.

தத்த² பவத்தட்டி²திமத்தா ஏகக்³க³தா. விக³தா சிகிச்சா²தி விசிகிச்சா². ஸபா⁴வம் விசினந்தோ ஏதாய கிச்ச²தி கிலமதீதி விசிகிச்சா². ஸா ஸம்ஸயலக்க²ணா, கம்பனரஸா, அனிச்ச²யபச்சுபட்டா²னா, அயோனிஸோமனஸிகாரபத³ட்டா²னா. ஸேஸா வுத்தனயா ஏவ.

த்³வாத³ஸமேன உத்³த⁴ச்சஸம்பயுத்தேன ஸம்பயுத்தா ஸரூபேனாக³தா விசிகிச்சா²ஸஹக³தே வுத்தேஸு விசிகிச்சா²ஹீனா உத்³த⁴ச்சம் ஸரூபேன ஆக³தம், தஸ்மா தேரஸேவ ஹோந்தி. விசிகிச்சா²ய அபா⁴வேன பனேத்த² அதி⁴மோக்கோ² உப்பஜ்ஜதி, தேன ஸத்³தி⁴ம் சுத்³த³ஸ ஹோந்தி. அதி⁴மோக்க²ஸம்ப⁴வதோ ஸமாதி⁴ ப³லவா ஹோதி, அதி⁴மோக்க²மனஸிகாரா த்³வே யேவாபனகா, தேஹி ஸஹ பன்னரஸேவ ஹோந்தி. ஏவம் தாவ அகுஸலசேதஸிகா வேதி³தப்³பா³.

இதா³னி அப்³யாகதா வுச்சந்தி, அப்³யாகதா பன து³விதா⁴ விபாககிரியபே⁴த³தோ. தத்த² விபாகா குஸலா விய பூ⁴மிவஸேன சதுப்³பி³தா⁴ காமாவசரம் ரூபாவசரம் அரூபாவசரம் லோகுத்தரஞ்சேதி. தத்த² காமாவசரவிபாகா ஸஹேதுகாஹேதுகவஸேன து³விதா⁴. தத்த² ஸஹேதுகவிபாகஸம்பயுத்தா ஸஹேதுகா. தே ஸஹேதுககாமாவசரகுஸலஸம்பயுத்தஸதி³ஸா. யா பன கருணாமுதி³தா அனியதா, தா ஸத்தாரம்மணத்தா விபாகேஸு நுப்பஜ்ஜந்தி. காமாவசரவிபாகானம் ஏகந்தபரித்தாரம்மணத்தா விரதியோ பனேத்த² ஏகந்தகுஸலத்தா ந லப்³ப⁴ந்தி. விப⁴ங்கே³ ‘‘பஞ்ச ஸிக்கா²பதா³ குஸலாயேவா’’தி ஹி வுத்தம். ஏவம் காமாவசரஸஹேதுகவிபாகசேதஸிகா வேதி³தப்³பா³.

83. தேத்திம்ஸாதி³த்³வயே த⁴ம்மா, த்³வத்திம்ஸேவ ததோ பரே;

பா³த்திம்ஸ பஞ்சமே ச²ட்டே², ஏகதிம்ஸ ததோ பரே.

அஹேதுகசித்தஸம்பயுத்தா பன அஹேதுகா. தேஸு சக்கு²விஞ்ஞாணஸம்பயுத்தா தாவ ப²ஸ்ஸோ உபேக்கா²வேத³னா ஸஞ்ஞா சேதனா ஜீவிதம் சித்தட்டி²தீதி ஸரூபேனாக³தா ச², மனஸிகாரேன ச ஸத்த ஹோந்தி. ஸோதகா⁴னஜிவ்ஹாகாயவிஞ்ஞாணஸம்பயுத்தாபி ஸத்த ஸத்தேவ சேதஸிகா. தத்த² காயவிஞ்ஞாணஸம்பயுத்தேஸு பன உபேக்கா²டா²னே ஸுக²வேத³னா பவிட்டா². ஸா காயிகஸாதலக்க²ணா, பீணனரஸா, ஸேஸா வுத்தனயா ஏவ.

84. இட்டா²ரம்மணயோக³ஸ்மிம், சக்கு²விஞ்ஞாணகாதி³ஸு;

ஸதி கஸ்மா உபேக்கா²வ, வுத்தா சதூஸு ஸத்து²னா.

85. உபாதா³ய ச ரூபேன, உபாதா³ரூபகே பன;

ஸங்க⁴ட்டனானிக⁴ம்ஸஸ்ஸ, து³ப்³ப³லத்தாதி தீ³பயே.

86. பஸாத³ம் பனதிக்கம்ம, கூடம்வ பிசுபிண்ட³கம்;

பூ⁴தரூபேன பூ⁴தானம், க⁴ட்டனாய ஸுகா²தி³கம்.

தஸ்மா காயவிஞ்ஞாணம் ஸுகா²தி³ஸம்பயுத்தந்தி வேதி³தப்³ப³ம். மனோதா⁴துனா ஸம்பயுத்தா ஸரூபேனாக³தா சக்கு²விஞ்ஞாணேன ஸத்³தி⁴ம் வுத்தா ச², விதக்கவிசாரேஹி ஸஹ அட்ட², அதி⁴மோக்க²மனஸிகாரேஹி த்³வீஹி யேவாபனகேஹி த³ஸ த⁴ம்மா ஹோந்தி. ததா² மனோவிஞ்ஞாணதா⁴துஉபேக்கா²ஸஹக³தேன. ஸோமனஸ்ஸஸஹக³தேன பீதிஅதி⁴கா வேத³னாபரிவத்தனஞ்ச நானத்தம். தஸ்மாவேத்த² ஏகாத³ஸ த⁴ம்மா ஹோந்தி. ஏவம் அஹேதுகாபி காமாவசரவிபாகசேதஸிகா வேதி³தப்³பா³.

ரூபாவசரவிபாகசித்தஸம்பயுத்தா பன ரூபாவசரா. அரூபாவசரவிபாகசித்தஸம்பயுத்தா அரூபாவசரா. தே ஸப்³பே³பி அத்தனோ அத்தனோ குஸலசித்தஸம்பயுத்தசேதஸிகேஹி ஸதி³ஸாயேவாதி.

லோகுத்தரவிபாகசித்தஸம்பயுத்தா லோகுத்தரா. தே ஸப்³பே³ தேஸம்யேவ லோகுத்தரவிபாகசித்தானம் ஸதி³ஸா குஸலசித்தஸம்பயுத்தேஹி சேதஸிகேஹி ஸதி³ஸா. ஏவம் ரூபாவசராரூபாவசரலோகுத்தரவிபாகசேதஸிகா வேதி³தப்³பா³.

அகுஸலவிபாகசித்தஸம்பயுத்தா பன அகுஸலவிபாகசேதஸிகா நாம. தே பன குஸலவிபாகாஹேதுகசித்தேஸு சக்கு²விஞ்ஞாணாதீ³ஸு வுத்தசேதஸிகஸதி³ஸா. ஏத்த² பன காயவிஞ்ஞாணே து³க்க²வேத³னா பவிட்டா². ஸா காயிகாபா³த⁴லக்க²ணா. ஸேஸா வுத்தனயாயேவாதி. ஏவம் ச²த்திம்ஸ விபாகசித்தஸம்பயுத்தசேதஸிகா வேதி³தப்³பா³.

கிரியாப்³யாகதா ச சேதஸிகா பூ⁴மிதோ திவிதா⁴ ஹோந்தி காமாவசரா ரூபாவசரா அரூபாவசராதி. தத்த² காமாவசரா ஸஹேதுகாஹேதுகதோ து³விதா⁴ ஹோந்தி. தேஸு ஸஹேதுககிரியசித்தஸம்பயுத்தா ஸஹேதுகா, தே பன அட்ட²ஹி காமாவசரகுஸலசித்தஸம்பயுத்தேஹி ஸமானா ட²பேத்வா விரதித்தயம் அனியதயேவாபனகேஸு கருணாமுதி³தாயேவ உப்பஜ்ஜந்தி. அஹேதுககிரியசித்தஸம்பயுத்தா அஹேதுகா, தே குஸலவிபாகாஹேதுகமனோதா⁴துமனோவிஞ்ஞாணதா⁴துசித்தஸம்பயுத்தேஹி ஸமானா. மனோவிஞ்ஞாணதா⁴துத்³வயே பன வீரியிந்த்³ரியம் அதி⁴கம். வீரியிந்த்³ரியஸம்ப⁴வதோ பனேத்த² ப³லப்பத்தோ ஸமாதி⁴ ஹோதி. ஹஸிதுப்பாத³சித்தேன ஸம்பயுத்தா த்³வாத³ஸ த⁴ம்மா ஹோந்தி பீதியா ஸஹ. அயமேத்த² விஸேஸோ.

ரூபாவசரகிரியசித்தஸம்பயுத்தா பன ரூபாவசரா. அரூபாவசரகிரியசித்தஸம்பயுத்தா அரூபாவசரா. தே ஸப்³பே³பி ஸகஸகபூ⁴மிகுஸலசித்தஸம்பயுத்தேஹி ஸமானாதி. ஏவம் வீஸதி கிரியசித்தஸம்பயுத்தா ச சேதஸிகா வேதி³தப்³பா³.

ஏத்தாவதா குஸலாகுஸலவிபாககிரியபே⁴த³பி⁴ன்னேன ஏகூனனவுதியா சித்தேன ஸம்பயுத்தா சேதஸிகா நித்³தி³ட்டா² ஹோந்தி.

87. குஸலாகுஸலேஹி விபாகக்ரியா-

ஹத³யேஹி யுதா பன சேதஸிகா;

ஸகலாபி ச ஸாது⁴ மயா கதி²தா,

ஸுக³தேன மஹாமுனினா கதி²தா.

88. அவக³ச்ச²தி யோ இமம் அனுனம்,

பரமம் தஸ்ஸ ஸமந்ததோ மதி;

அபி⁴த⁴ம்மனயே தூ³ராஸதே³,

அதிக³ம்பீ⁴ரடா²னே விஜம்ப⁴தே.

இதி அபி⁴த⁴ம்மாவதாரே சேதஸிகனித்³தே³ஸோ நாம

து³தியோ பரிச்சே²தோ³.