4. சதுத்தோ² பரிச்சே²தோ³

பகிண்ணகவிபா⁴கோ³

211. இதோ பரம் கிச்சதோ ச, த்³வாராலம்ப³ணவத்து²தோ;

பூ⁴மிபுக்³க³லதோ டா²னா, ஜனகா ச யதா²ரஹம்.

212. ஸங்க³ஹோ ச பவத்தி ச, படிஸந்தி⁴பவத்திஸு;

சித்துப்பாத³வஸேனேவ, ஸம்கி²பித்வான நிய்யதே.

213. ரூபாரூபமஹாபாகா, முபேக்கா²தீரணத்³வயம்;

சுதிஸந்தி⁴ப⁴வங்கா³னி, சித்தானேகூனவீஸதி.

214. ஆவஜ்ஜனம் து யுக³ளம், த³ஸ்ஸனம் ஸவனம் ததா²;

கா⁴யனம் ஸாயனஞ்சேவ, பு²ஸனம் ஸம்படிச்ச²னம்.

215. தீணி தீரணசித்தானி, ஏகம் வோட்ட²ப்³ப³னம் மதம்;

பஞ்சத்³வாரே மனோத்³வாரே, ததா³வஜ்ஜனனாமகம்.

216. பஞ்சபஞ்ஞாஸ ஜவனகிச்சானீதி வினித்³தி³ஸே;

க்ரியா சாவஜ்ஜனம் ஹித்வா, குஸலாகுஸலப்ப²லம்.

217. ததா³லம்ப³ணசித்தானி, ப⁴வந்தேகாத³ஸேவ ஹி;

மஹாவிபாகசித்தானி, அட்ட² ஸந்தீரணத்தயம்.

218. பஞ்சகிச்சந்தி பா⁴ஸந்தி, உபேக்கா²தீரணத்³வயம்;

சதுகிச்சா மஹாபாகா, திககிச்சா மஹக்³க³தா.

219. து³கிச்சமிதி வோட்ட²ப்³ப³ம், ஸுக²தீரணமீரிதம்;

பஞ்சவிஞ்ஞாணஜவனமனோதா⁴துத்திகம் பன.

220. ஏககிச்சாதி பா⁴ஸந்தி, அட்ட²ஸட்டி² விபா⁴வினோ;

இச்சேவம் கிச்சபே⁴தே³ன, சித்துப்பாதா³ வவத்தி²தா.

221. சக்கு²ஸோதகா⁴னஜிவ்ஹா-காயதா⁴து யதா²க்கமம்;

பஞ்சத்³வாரா ப⁴வங்க³ம் து, மனோத்³வாரம் பவுச்சதி.

222. கா⁴னாத³யோ தயோ ரூபே, பஞ்ச சக்கா²த³யோ ததா²;

அரூபே நத்து²ப⁴யத்த², ததா³லம்ப³ணமானஸம்.

223. ச² த்³வாரா வீதி²சித்தானி, ஸத்த காமீஸு ரூபிஸு;

த்³வாரத்தயம் ச² சித்தானி, மனோத்³வாரமரூபிஸு.

224. படிஸந்தா⁴தி³பூ⁴தா ஹி, அவஸானே சுதிட்டி²தா;

மஜ்ஜே² ப⁴வங்க³ம் சே²த்வான, பச்சேகம் வீதி² ஜாயதி.

225. ரூபாதா³ரம்மணே சக்கு²-பஸாதா³தி³ம்ஹி க⁴ட்டிதே;

ஆவஜ்ஜனாத³யோ ஹோந்தி, ப⁴வங்க³த்³விசலா பரம்.

226. பரிணாமே ப⁴வங்க³ஸ்ஸ, ஆலம்பே³ க³ஹணாரஹே;

ததா² வீதி² மனோத்³வாரே, யதா²ஸம்ப⁴வதோ ப⁴வே.

227. ஆவஜ்ஜா பஞ்சவிஞ்ஞாணம், ஸம்படிச்ச²னதீரணம்;

வோட்ட²ப்³ப³காமஜவனம், ததா³லம்ப³ணமானஸம்.

228. ஸத்தேவம் வீதி²சித்தானி, சித்துப்பாதா³ சதுத்³த³ஸ;

சதுபஞ்ஞாஸ வித்தா²ரா, பஞ்சத்³வாரே யதா²ரஹம்.

229. உப்பாத³ட்டி²திப⁴ங்கா³னம், வஸா சித்தக்க²ணம் தயம்;

ரூபானம் டி²தி ஏகூன-பஞ்ஞாஸஞ்ச து³கே து³கம்.

230. பரித்தேதிபரித்தே ச, மஹந்தேதிமஹந்தகே;

வோட்ட²ப்³ப³மோக⁴ஜவனம், ததா³லம்ப³ந்தி தம் கமா.

231. ஆவஜ்ஜனஞ்ச ஜவனம், மனோத்³வாரே து கோ³சரே;

விபூ⁴தே து ததா³லம்ப³ம், வித்தா²ரா ஸத்தஸட்டி² தே.

232. காமே ஜவனஸத்தால-ம்ப³ணானம் நியமே ஸதி;

விபூ⁴தேதிமஹந்தே ச, ததா³லம்ப³ணமீரிதம்.

233. பஞ்சத்³வாரே மனோதா⁴து, பச்சேகம்ஹி யதா²க்கமம்;

பஞ்சவிஞ்ஞாணயுக³ளம், பச்சேகம் து பகாஸிதம்.

234. மனோத்³வாரே து ஜவனம், மஹக்³க³தமனுத்தரம்;

ஸுக²தீரணவோட்ட²ப்³ப³ம், பரித்தஜவனம் ச²ஸு.

235. மஹாவிபாகசித்தானி, உபேக்கா²தீரணத்³வயம்;

ச²ஸு த்³வாரேஸு ஜாயந்தி, வீதி²முத்தானி சேகதா³.

236. ஸத்ததி வீதி²சித்தானி, விபாகா து மஹக்³க³தா;

நவ வீதி²விமுத்தா ச, து³விதா⁴பி த³ஸீரிதா.

237. இச்சேவம் த்³வாரபே⁴தே³ன, விபா⁴வேத்வா ததோ பரம்;

ஞேய்யா கோ³சரபே⁴தே³ன, சித்துப்பாதா³ யதா²ரஹம்.

238. ரூபஸத்³த³க³ந்த⁴ரஸபோ²ட்ட²ப்³பா³ பஞ்ச கோ³சரா;

ஸேஸஞ்ச ரூபபஞ்ஞத்தினாமஞ்ச த⁴ம்மகோ³சரம்.

239. பஞ்சத்³வாரே வத்தமானம், பஞ்சாலம்ப³ம் யதா²க்கமம்;

சா²லம்ப³ணம் மனோத்³வாரே, அதீதானாக³தம்பி ச.

240. பஞ்ஞத்தாதீதவத்தந்தம், ச²த்³வாரக்³க³ஹிதம் பன;

ச²ளாரம்மணஸங்கா²தம், யேபு⁴ய்யேன ப⁴வந்தரே.

241. நிமித்தக³திகம்மானம், கம்மமேவாத² கோ³சரம்;

படிஸந்தி⁴ப⁴வங்கா³னம், சுதியாவ யதா²ரஹம்.

242. பஞ்சாலம்பே³ மனோதா⁴து, பச்சேகம்ஹி யதா²க்கமம்;

பஞ்சவிஞ்ஞாணயுக³ளம், பச்சேகம் து பகாஸிதம்.

243. காமபாகானி ஸேஸானி, ஹஸனஞ்ச பரித்தகே;

ஞாணஹீனானிபுஞ்ஞானி, ஜவனானி அனிம்மலே.

244. திஹேதுகாமபுஞ்ஞானி, புஞ்ஞாபி⁴ஞ்ஞா ச லோகியா;

ஸப்³பா³லம்பே³ பவத்தந்தி, அக்³க³மக்³க³ப²லம் வினா.

245. க்ரியாபி⁴ஞ்ஞா ச வோட்ட²ப்³ப³ம், க்ரியா காமே திஹேதுகா;

ஸப்³பா³லம்பே³ பவத்தந்தி, நிப்³பா³னே நிம்மலா ஸியும்.

246. து³தியஞ்ச சதுத்த²ஞ்ச, ஆருப்பேஸு மஹக்³க³தே;

மஹக்³க³தஞ்ஞே வோஹாரே, அயமாலம்ப³ணே நயோ.

247. சக்கு²ஸோதகா⁴னஜிவ்ஹா-காயஹத³யவத்து²னா;

காமலோகே ச²வத்தூ²னி, நிஸ்ஸிதா ஸத்த தா⁴துயோ.

248. பஞ்சவிஞ்ஞாணதா⁴தூ ச, தாஸம் புப்³பா³பரத்தயம்;

மனோதா⁴து ததோ ஸேஸா, மனோவிஞ்ஞாணதா⁴து ச.

249. சதஸ்ஸோ தா⁴துயோ ரூபே, தீணி வத்தூ²னி நிஸ்ஸிதா;

அரூபே து அனிஸ்ஸாய, தா⁴த்வேகாவ பவத்ததி.

250. பஞ்சப்பஸாதே³ நிஸ்ஸாய, பச்சேகம் து யதா²க்கமம்;

பஞ்சவிஞ்ஞாணயுக³ளம், ப⁴வதீதி பகாஸிதம்.

251. காமபாகானி ஸேஸானி, மக்³கா³வஜ்ஜனமாதி³தோ;

ஹஸனம் படிகா⁴ரூபா-வசரம் வத்து²னிஸ்ஸிதம்.

252. த்³வேசத்தாலீஸ நிஸ்ஸாய, அனிஸ்ஸாய ச ஜாயரே;

அனிஸ்ஸாய விபாகானி, ஆருப்பேதி ஸமீரிதம்.

253. இச்சேவம் வத்து²பே⁴தே³ன, சித்துப்பாதா³ பகாஸிதா;

ததோ பரம் விபா⁴வேய்ய, பூ⁴மிபே⁴தே³ன பண்டி³தோ.

254. நிரயே பேதலோகே ச, திரச்சா²னாஸுரே ததா²;

பாபகம்மோபபஜ்ஜந்தி, பாபபாகாய ஸந்தி⁴யா.

255. பூ⁴மிஸ்ஸிதேஸு தே³வேஸு, மனுஸ்ஸேஸுபி ஹீனகா;

அஹேதுகாய ஜாயந்தி, புஞ்ஞபாகாய ஸந்தி⁴யா.

256. சாதுமஹாராஜிகா ச, தாவதிம்ஸா ச யாமகா;

துஸிதா சேவ நிம்மானரதினோ வஸவத்தினோ.

257. இச்சேவம் ச²ஸு தே³வேஸு, மனுஸ்ஸேஸு ச ஜாயரே;

மஹாவிபாகஸந்தீ⁴ஹி, காமபுஞ்ஞகதா ஜனா.

258. ப்³ரஹ்மானம் பாரிஸஜ்ஜா ச, ததா² ப்³ரஹ்மபுரோஹிதா;

மஹாப்³ரஹ்மா ச ஜாயந்தி, பட²மஜ்ஜா²னஸந்தி⁴யா.

259. பரித்தா அப்பமாணாபா⁴, ஜாயந்தாப⁴ஸ்ஸரா ததா²;

து³தியஜ்ஜா²னபாகாய, ததியாய ச ஸந்தி⁴யா.

260. பரித்தஸுப⁴ப்பமாணஸுபா⁴ ச ஸுப⁴கிண்ஹகா;

சதுத்தா²ய து ஜாயந்தி, ததியஜ்ஜா²னபூ⁴மிகா.

261. வேஹப்ப²லா அஸஞ்ஞீ ச, ஸுத்³தா⁴வாஸாதி ஸத்தஸு;

பஞ்சமாய ச ஜாயந்தி, அஸஞ்ஞீசித்தவஜ்ஜிதா.

262. அவிஹா ச அதப்பா ச, ஸுத³ஸ்ஸா ச ஸுத³ஸ்ஸினோ;

அகனிட்டா²தி பஞ்சேதே, ஸுத்³தா⁴வாஸா பகாஸிதா.

263. ஆகாஸானஞ்சாயதனபாகாதீ³ஹி யதா²க்கமம்;

ஆகாஸானஞ்சாயதனபூ⁴மிகாதீ³ஸு ஜாயரே.

264. சுதிஸந்தி⁴ப⁴வங்கா³னம், வஸா பாகா மஹக்³க³தா;

காமே ஸஹேதுகா பாகா, ததா³லம்ப³ணதோபி ச.

265. யதா²வுத்தனியாமேன, பூ⁴மீஸ்வேகாவ ஜாயரே;

சித்துப்பாதே³ஸு ஸப்³ப³த்த², ந த்வேவாஸஞ்ஞினோ மதா.

266. கா⁴னஜிவ்ஹாகாயதா⁴து-நிஸ்ஸிதம் மானஸம் ததா²;

படிக⁴த்³வயமிச்சேவமட்ட² ஹோந்தேவ காமிஸு.

267. சக்கு²ஸோதஞ்ச விஞ்ஞாணம், மனோதா⁴து ச தீரணம்;

காமரூபேஸு ஜாயந்தி, யதா²ஸம்ப⁴வதோ த³ஸ.

268. வோட்ட²ப்³ப³காமபுஞ்ஞானி, விப்பயுத்தானி தி³ட்டி²யா;

உத்³த⁴ச்சஸஹிதஞ்சேதி, ஸப்³ப³த்தே²தானி சுத்³த³ஸ.

269. கங்கி²தம் தி³ட்டி²யுத்தானி, ஸுத்³தா⁴வாஸவிவஜ்ஜிதே;

ஸிதஞ்ச ரூபஜவன-மாருப்பாபாயவஜ்ஜிதே.

270. காமக்ரியா ஸஹேதூ ச, உத்³த⁴ம் லோகுத்தரத்தயம்;

சதுத்தா²ருப்பஜவனம், ஸப்³ப³த்தா²பாயவஜ்ஜிதே.

271. ஸேஸமாருப்பஜவனம், ஹித்வாபாயம் யதா²க்கமம்;

உத்³த⁴மாருப்பபூ⁴மிஞ்ச, ஜாயதீதி விபா⁴வயே.

272. ஸோதாபத்திப²லாதீ³னி, சத்தாரானுத்தரானி து;

ஸுத்³தா⁴வாஸமபாயஞ்ச, ஹித்வா ஸப்³ப³த்த² ஜாயரே.

273. ஸுத்³தா⁴வாஸமபாயஞ்ச, ஹித்வாரூபஞ்ச ஸப்³ப³தா²;

பட²மானுத்தரோ மக்³கோ³, ஸேஸட்டா²னேஸு ஜாயதி.

274. ஸத்ததிம்ஸ அபாயேஸு, காமேஸீதி பகாஸிதா;

பஞ்சபஞ்ஞாஸ ஸுத்³தே⁴ஸு, ரூபேஸ்வேகூனஸத்ததி.

275. ச²சத்தாலீஸ ஆருப்பே, உப்பஜ்ஜந்தி யதா²ரஹம்;

இச்சேவம் பூ⁴மிபே⁴தே³ன, சித்துப்பாதா³ பகாஸிதா.

276. திஹேதுஸத்தே ஸப்³பா³னி, த்³விஹேதுகாஹேதுகே பன;

பரித்தானி விவஜ்ஜேத்வா, ஞாணபாகக்ரியாஜவே.

277. புது²ஜ்ஜனானம் ஸம்போ⁴ந்தி, தி³ட்டி²யுத்தஞ்ச கங்கி²தம்;

ஸோதாபன்னாதி³திண்ணம்பி, ப²லம் ஹோதி யதா²ஸகம்.

278. வீதராக³ஸ்ஸ ஜவனம், க்ரியா சந்திமனுத்தரம்;

புது²ஜ்ஜனாதி³திண்ணம்பி, படிக⁴ம் ஸமுதீ³ரிதம்.

279. ஜவா புது²ஜ்ஜனாதீ³னம், சதுன்னம் ஸேஸ ஸாஸவா;

ஸாஸவாவஜ்ஜபாகானி, பஞ்சன்னமபி தீ³பயே.

280. புது²ஜ்ஜனேஸு தேஸட்டி², ஸோதாபன்னாதி³கத்³வயே;

ஏகூனஸட்டி² சித்தானி, அனாகா³மிகபுக்³க³லே.

281. ஸத்தபஞ்ஞாஸ ஜாயந்தி, தேபஞ்ஞாஸ அனாஸவே;

மக்³க³ட்டே²ஸு ஸகோ மக்³கோ³, புக்³க³லேஸு அயம் நயோ.

282. திஹேதுகாமசுதியா, ஸப்³பா³பி படிஸந்தி⁴யோ;

த்³விஹேதாஹேதுசுதியா, காமாவசரஸந்தி⁴யோ.

283. ரூபாவசரசுதியா, ஸஹேதுபடிஸந்தி⁴யோ;

ஆருப்பாருப்பசுதியா, ஹேட்டி²மாருப்பவஜ்ஜிதா.

284. படிஸந்தி⁴ ததா² காமே, திஹேதுபடிஸந்தி⁴யோ;

ப⁴வந்தீதி ச மேதா⁴வீ, சுதிஸந்தி⁴னயம் நயே.