5. பஞ்சமோ பரிச்சே²தோ³

கம்மவிபா⁴கோ³

328. விபா⁴க³ம் பன கம்மானம்,

பவக்கா²மி இதோ பரம்;

கம்மபாகக்ரியாபே⁴தே³,

அமோஹாய ஸமாஸதோ.

329. கம்மபச்சயகம்மந்தி, சேதனாவ ஸமீரிதா;

தத்தா²பி நானக்க²ணிகா, புஞ்ஞாபுஞ்ஞாவ சேதனா.

330. தே³தி பாகமதி⁴ட்டா²ய, ஸம்பயுத்தே யதா²ரஹம்;

கம்மஸ்ஸாயூஹனட்டே²ன, பவத்தத்தா ஹி சேதனா.

331. க்லேஸானுஸயஸந்தானே, பாகத⁴ம்மா ஹி ஜாயரே;

பஹீனானுஸயானம் து, க்ரியாமத்தம் பவத்ததி.

332. மூலபா⁴வா ச ஸப்³பே³ஸம், ததே²வாவஜ்ஜனத்³வயம்;

ஜனிதானி ச கம்மேஹி, விபாகானி பவத்தரே.

333. சித்துப்பாத³வஸேனேவ, கம்மம் தேத்திம்ஸதா⁴ டி²தம்;

கம்மசதுக்கபே⁴தே³ஹி, விபா⁴வேய்ய விசக்க²ணோ.

334. பச்சுப்பன்னாதி³கண்ஹாதி³-ஜனகாதி³க³ராதி³தோ;

தி³ட்ட²த⁴ம்மாதி³காமாதி³-பே⁴தா³ ச²தா⁴ யதா²க்கமம்.

335. யம் பாபம் ஸுக²வோகிண்ணம், அகிச்சே²ன கரீயதி;

பச்சுப்பன்னஸுக²ம் கம்மம், ஆயதிம் து³க்க²பாகஜம்.

336. கிச்சே²ன து³க்க²வோகிண்ணம், யதி³ பாபம் கரீயதி;

பச்சுப்பன்னே ச தம் து³க்க²ம், ஆயதிம் து³க்க²பாகஜம்.

337. கிச்சே²ன து³க்க²வோகிண்ணம், யதி³ புஞ்ஞம் கரீயதி;

பச்சுப்பன்னம்ஹி தம் து³க்க²ம், ஆயதிம் ஸுக²பாகஜம்.

338. யம் புஞ்ஞம் ஸுக²வோகிண்ணம், அகிச்சே²ன கரீயதி;

பச்சுப்பன்னஸுக²ஞ்சேவ, ஆயதிம் ஸுக²பாகஜம்.

339. விஸஸம்ஸட்ட²மது⁴ரம், ஸவிஸம் தித்தகம் ததா²;

கோ³முத்தமது⁴பே⁴ஸஜ்ஜ-மிச்சோபம்மம் யதா²க்கமம்.

340. ஸமாதா³னே விபாகே ச, ஸுக²து³க்க²ப்பபே⁴தி³தம்;

கம்மமேவம் சதுத்³தா⁴தி, பகாஸேந்தி ததா²க³தா.

341. ஆனந்தரியகம்மாதி³, ஏகந்தகடுகாவஹம்;

கண்ஹம் கண்ஹவிபாகந்தி, கம்மம் து³க்³க³திகா³மிகம்.

342. பட²மஜ்ஜா²னகம்மாதி³, ஏகந்தேன ஸுகா²வஹம்;

ஸுக்கம் ஸுக்கவிபாகந்தி, கம்மம் ஸக்³கூ³பபத்திகம்.

343. வோகிண்ணகம்ம வோகிண்ண-ஸுக²து³க்கூ²பபத்திகம்;

கண்ஹஸுக்கம் கண்ஹஸுக்க-விபாகந்தி ஸமீரிதம்.

344. அகண்ஹஸுக்கமீரேந்தி, அகண்ஹஸுக்கபாகத³ம்;

கம்மம் லோகுத்தரம் லோகே, க³திகம்மக்க²யாவஹம்.

345. இதி வட்டப்பவத்தம்ஹி, க்லேஸவோதா³னபே⁴தி³தம்;

கம்மக்க²யேன ஸங்க³ய்ஹ, சதுதா⁴ கம்மமீரிதம்.

346. ஜனகஞ்சேவுபத்த²ம்ப⁴-முபபீளோபகா⁴தகம்;

சதுதா⁴ கிச்சபே⁴தே³ன, கம்மமேவம் பவுச்சதி.

347. ஜனேதி ஜனகம் பாகம், தம் சி²ந்த³துபபீளகம்;

தம் பவத்தேதுபத்த²ம்ப⁴ம், தம் கா⁴தேதோபகா⁴தகம்.

348. கரோதி அத்தனோ பாக-ஸ்ஸாவகாஸந்தி பா⁴ஸிதம்;

பாகதா³யககம்மம் து, யம் கிஞ்சி ஜனகம் ப⁴வே.

349. பா³த⁴மானககம்மம் து, தம் பாகமுபபீளகம்;

உபகா⁴தகமீரேந்தி, தது³பச்சே²த³கம்பரே.

350. க³ருகாஸன்னமாசிண்ணம், கடத்தாகம்முனா ஸஹ;

கம்மம் சதுப்³பி³த⁴ம் பாக-பரியாயப்பபே⁴த³தோ.

351. மஹக்³க³தானந்தரியம், க³ருகம்மந்தி வுச்சதி;

கதம் சிந்திதமாஸன்ன-மாஸன்னமரணேன து.

352. பா³ஹுல்லேன ஸமாசிண்ணமாசிண்ணந்தி பவுச்சதி;

ஸேஸம் புஞ்ஞமபுஞ்ஞஞ்ச, கடத்தாகம்மமீரிதம்.

353. தி³ட்ட²த⁴ம்மே வேத³னீயமுபபஜ்ஜாபரே ததா²;

பரியாயவேத³னீயமிதி சாஹோஸிகம்முனா.

354. பாககாலவஸேனாத², காலாதீதவஸேன ச;

சதுதே⁴வம்பி அக்கா²தம், கம்மமாதி³ச்சப³ந்து⁴னா.

355. தி³ட்ட²த⁴ம்மே வேத³னீயம், பட²மம் ஜவனம் ப⁴வே;

அலத்³தா⁴ஸேவனத்தாவ, அஸமத்த²ம் ப⁴வந்தரே.

356. வேத³னீயம் துபபஜ்ஜபரியோஸானமீரிதம்;

பரினிட்டி²தகம்மத்தா, விபச்சதி அனந்தரே.

357. ஸேஸானி வேத³னீயானி, பரியாயாபரே பன;

லத்³தா⁴ஸேவனதோ பாகம், ஜனேந்தி ஸதி பச்சயே.

358. வுச்சந்தாஹோஸிகம்மானி, காலாதீதானி ஸப்³ப³தா²;

உச்சி²ன்னதண்ஹாமூலானி, பச்சயாலாப⁴தோ ததா².

359. சதுதா⁴ புன காமாதி³பூ⁴மிபே⁴தே³ன பா⁴ஸிதம்;

புஞ்ஞாபுஞ்ஞவஸா த்³வேதா⁴, காமாவசரிகம் ப⁴வே.

360. அபுஞ்ஞம் தத்த² ஸாவஜ்ஜ-மனிட்ட²ப²லதா³யகம்;

தம் கம்மப²ஸ்ஸத்³வாரேஹி, து³வித⁴ம் ஸம்பவத்ததி.+

361. காயத்³வாரம் வசீத்³வாரம், மனோத்³வாரந்தி தாதி³னா;

கம்மத்³வாரத்தயம் வுத்தம், ப²ஸ்ஸத்³வாரா ச² தீ³பிதா.

362. கம்மத்³வாரே மனோத்³வாரே, பஞ்சத்³வாரா ஸமோஹிதா;

ப²ஸ்ஸத்³வாரமனோத்³வாரம், கம்மத்³வாரத்தயம் கதம்.

363. ததா² ஹி காயவிஞ்ஞத்திம், ஜனேத்வா ஜாதசேதனா;

காயகம்மம் வசீகம்மம், வசீபே⁴த³பவத்திகா.

364. விஞ்ஞத்தித்³வயஸம்பத்தா, மனோகம்மந்தி வுச்சதி;

பே⁴தோ³யம் பரியாயேன, கம்மானமிதி தீ³பிதோ.

365. பாணகா⁴தாதி³கம் கம்மம், காயே பா³ஹுல்லவுத்திதோ;

காயகம்மம் வசீகம்மம், முஸாவாதா³தி³கம் ததா².

366. அபி⁴ஜ்ஜா²தி³ மனோகம்மம், தீஸு த்³வாரேஸு ஜாயதி;

த்³வீஸு த்³வாரேஸு ஸேஸானி, பே⁴தோ³யம் பரமத்த²தோ.

367. ப²ஸ்ஸத்³வாரமனோத்³வாரே, விஞ்ஞத்தித்³வயமீரிதம்;

பஞ்சத்³வாரே த்³வயம் நத்தி², அயமேத்த² வினிச்ச²யோ.

368. அக்க²ந்திஞாண கோஸஜ்ஜம், து³ஸ்ஸில்யம் முட்ட²ஸச்சதா;

இச்சாஸம்வரபே⁴தே³ன, அட்ட²த்³வாரேஸு ஜாயதி.

369. கம்மத்³வாரத்தயஞ்சேவ, பஞ்சத்³வாரா ததா²பரே;

அஸம்வரானம் பஞ்சன்னம், அட்ட² த்³வாரா பகாஸிதா.

370. தத்த² கம்மபத²ப்பத்தம், படிஸந்தி⁴ப²லாவஹம்;

பாணகா⁴தாதி³பே⁴தே³ன, த³ஸதா⁴ ஸம்பவத்ததி.

371. பாணாதிபாதோ ப²ருஸம், ப்³யாபாதோ³ ச ததா²பரோ;

இச்சேவம் திவித⁴ம் கம்மம், தோ³ஸமூலேஹி ஜாயதி.

372. மிச்சா²சாரோ அபி⁴ஜ்ஜா² ச, மிச்சா²தி³ட்டி² ததா²பரா;

இச்சேவம் திவித⁴ம் கம்மம், லோப⁴மூலேஹி ஜாயதி.

373. தே²ய்யாதா³னம் முஸாவாதோ³, பிஸுணம் ஸம்ப²லாபனம்;

கம்மம் சதுப்³பி³த⁴ம்மேதம், த்³விமூலேஹி பவத்ததி.

374. ச²ந்தா³தோ³ஸா ப⁴யா மோஹா, பாபம் குப்³ப³ந்தி பாணினோ;

தஸ்மா ச²ந்தா³தி³பே⁴தே³ன, சத்தாலீஸவித⁴ம் ப⁴வே.

375. இச்சாபுஞ்ஞம் பகாஸேந்தி, சதுராபாயஸாத⁴கம்;

அஞ்ஞத்தா²பி பவத்தம்ஹி, விபத்திப²லஸாத⁴னம்.

376. திவித⁴ம் பன புஞ்ஞம் து, அனவஜ்ஜிட்ட²பாகத³ம்;

தா³னம் ஸீலம் பா⁴வனா ச, தீஸு த்³வாரேஸு ஜாயதி.

377. மஹத்தகா³ரவா ஸ்னேஹா, த³யா ஸத்³து⁴பகாரதோ;

போ⁴க³ஜீவாப⁴யத⁴ம்மம், த³த³தோ தா³னமீரிதம்.

378. புஞ்ஞமாசாரவாரித்த-வத்தமாரப்³ப⁴ குப்³ப³தோ;

பாபா ச விரமந்தஸ்ஸ, ஹோதி ஸீலமயம் ததா³.

379. தா³னஸீலவினிமுத்தம், பா⁴வனாதி பவுச்சதி;

புஞ்ஞம் பா⁴வேந்தி ஸந்தானே, யஸ்மா தேன ஹிதாவஹம்.

380. ஜனேத்வா காயவிஞ்ஞத்திம், யதா³ புஞ்ஞம் கரீயதி;

காயகம்மம் ததா³ ஹோதி, தா³னம் ஸீலஞ்ச பா⁴வனா.

381. வசீவிஞ்ஞத்தியா ஸத்³தி⁴ம், யதா³ புஞ்ஞம் கரீயதி;

வசீகம்மம் மனோகம்மம், வினா விஞ்ஞத்தியா கதம்.

382. தம்தம்த்³வாரிகமேவாஹு, தம்தம்த்³வாரிகபாபதோ;

விரமந்தஸ்ஸ விஞ்ஞத்திம், வினா வா ஸஹ வா புன.

383. தா³னம் ஸீலம் பா⁴வனா ச, வேய்யாவச்சாபசாயனா;

பத்தானுமோத³னா பத்தி-தா³னம் த⁴ம்மஸ்ஸ தே³ஸனா;

ஸவனம் தி³ட்டி²ஜுகம்ம-மிச்சேவம் த³ஸதா⁴ டி²தம்.

384. காமபுஞ்ஞம் பகாஸேந்தி, காமே ஸுக³திஸாத⁴கம்;

அஞ்ஞத்தா²பி பவத்தம்ஹி, ஸம்பத்திப²லஸாத⁴கம்.

385. சித்துப்பாத³ப்பபே⁴தே³ன, கம்மம் வீஸதிதா⁴ டி²தம்;

காமாவசரமிச்சேவம், விபா⁴வேந்தி விபா⁴வினோ.

386. ரூபாவசரிகம் கம்ம-மப்பனாபா⁴வனாமயம்;

கஸிணாதி³கமாரப்³ப⁴, மனோத்³வாரே பவத்ததி.

387. பத²வாபோ ச தேஜோ ச,

வாயோ நீலஞ்ச பீதகம்;

லோஹிதோதா³தமாகாஸம்,

ஆலோகோதி விஸாரதா³.

388. கஸிணானி த³ஸீரேந்தி, ஆதி³கம்மிகயோகி³னோ;

உத்³து⁴மாதம் வினீலஞ்ச, விபுப்³ப³கம் விகா²தி³தம்.

389. விச்சி²த்³த³கஞ்ச விக்கி²த்தம், ஹதவிக்கி²த்தலோஹிதம்;

புளவம் அட்டி²கஞ்சேதி, அஸுப⁴ம் த³ஸதா⁴ டி²தம்.

390. பு³த்³தே⁴ த⁴ம்மே ச ஸங்கே⁴ ச, ஸீலே சாகே³ ச அத்தனோ;

தே³வதோபஸமாயஞ்ச, வுத்தானுஸ்ஸதிபா⁴வனா.

391. மரணே ஸதி நாமேகா, ததா² காயக³தாஸதி;

ஆனாபானஸதிச்சேவம், த³ஸதா⁴னுஸ்ஸதீரிதா.

392. மேத்தா கருணா முதி³தா, உபேக்கா² பா⁴வனாதி ச;

சதுப்³ரஹ்மவிஹாரா ச, அப்பமஞ்ஞாதி பா⁴ஸிதா.

393. ஆஹாரே து படிக்கூல-ஸஞ்ஞேகாதி பகாஸிதா;

சதுதா⁴துவவத்தா²னம், சதுதா⁴துபரிக்³க³ஹோ.

394. சத்தாரோருப்பகா சேதி, சத்தாலீஸ ஸமாஸதோ;

கம்மட்டா²னானி வுத்தானி, ஸமதே² பா⁴வனானயே.

395. ஆனாபானஞ்ச கஸிணம், பஞ்சகஜ்ஜா²னிகம் தஹிம்;

பட²மஜ்ஜா²னிகா வுத்தா, கோட்டா²ஸாஸுப⁴பா⁴வனா.

396. மேத்தாத³யோ சதுஜ்ஜா²னா, உபேக்கா² பஞ்சமீ மதா;

ஆருப்பாருப்பகா ஸேஸா, உபசாரஸமாதி⁴கா.

397. கஸிணாஸுப⁴கோட்டா²ஸே,

ஆனாபானே ச ஜாயதி;

படிபா⁴கோ³ தமாரப்³ப⁴,

தத்த² வத்ததி அப்பனா.

398. கம்மட்டா²னேஸு ஸேஸேஸு, படிபா⁴கோ³ ந விஜ்ஜதி;