1. பட²மோ பரிச்சே²தோ³

சித்தனித்³தே³ஸோ

8. சித்தம் சேதஸிகம் ரூபம், நிப்³பா³னந்தி நிருத்தரோ;

சதுதா⁴ தே³ஸயீ த⁴ம்மே, சதுஸச்சப்பகாஸனோ.

தத்த² சித்தந்தி விஸயவிஜானனம் சித்தம், தஸ்ஸ பன கோ வசனத்தோ²? வுச்சதே – ஸப்³ப³ஸங்கா³ஹகவஸேன பன சிந்தேதீதி சித்தம், அத்தஸந்தானம் வா சினோதீதிபி சித்தம்.

9. விசித்தகரணா சித்தம், அத்தனோ சித்ததாய வா;

பஞ்ஞத்தியம்பி விஞ்ஞாணே, விசித்தே சித்தகம்மகே;

சித்தஸம்முதி த³ட்ட²ப்³பா³, விஞ்ஞாணே இத⁴ விஞ்ஞுனா.

தம் பன ஸாரம்மணதோ ஏகவித⁴ம், ஸவிபாகாவிபாகதோ து³வித⁴ம். தத்த² ஸவிபாகம் நாம குஸலாகுஸலம், அவிபாகம் அப்³யாகதம். குஸலாகுஸலாப்³யாகதஜாதிபே⁴த³தோ திவித⁴ம்.

தத்த² குஸலந்தி பனேதஸ்ஸ கோ வசனத்தோ²?

10. குச்சி²தானம் ஸலனதோ, குஸானம் லவனேன வா;

குஸேன லாதப்³ப³த்தா வா, குஸலந்தி பவுச்சதி.

11. சே²கே குஸலஸத்³தோ³யம், ஆரோக்³யே அனவஜ்ஜகே;

தி³ட்டோ² இட்ட²விபாகேபி, அனவஜ்ஜாதி³கே இத⁴.

தஸ்மா அனவஜ்ஜஇட்ட²விபாகலக்க²ணம் குஸலம், அகுஸலவித்³த⁴ம்ஸனரஸம், வோதா³னபச்சுபட்டா²னம். வஜ்ஜபடிபக்க²த்தா அனவஜ்ஜலக்க²ணம் வா குஸலம், வோதா³னபா⁴வரஸம், இட்ட²விபாகபச்சுபட்டா²னம், யோனிஸோமனஸிகாரபத³ட்டா²னம். ஸாவஜ்ஜானிட்ட²விபாகலக்க²ணமகுஸலம். தது³ப⁴யவிபரீதலக்க²ணமப்³யாகதம், அவிபாகாரஹம் வா.

தத்த² குஸலசித்தம் ஏகவீஸதிவித⁴ம் ஹோதி, ததி³த³ம் பூ⁴மிதோ சதுப்³பி³த⁴ம் ஹோதி – காமாவசரம், ரூபாவசரம், அரூபாவசரம், லோகுத்தரஞ்சேதி.

தத்த² காமாவசரகுஸலசித்தம் பூ⁴மிதோ ஏகவித⁴ம், ஸவத்து²காவத்து²கபே⁴த³தோ து³வித⁴ம், ஹீனமஜ்ஜி²மபணீதபே⁴த³தோ திவித⁴ம், ஸோமனஸ்ஸுபேக்கா²ஞாணப்பயோக³பே⁴த³தோ அட்ட²வித⁴ம் ஹோதி. ஸேய்யதி²த³ம் – ஸோமனஸ்ஸஸஹக³தம் ஞாணஸம்பயுத்தம் அஸங்கா²ரிகமேகம், ஸஸங்கா²ரிகமேகம், ஸோமனஸ்ஸஸஹக³தம் ஞாணவிப்பயுத்தம் அஸங்கா²ரிகமேகம், ஸஸங்கா²ரிகமேகம், உபேக்கா²ஸஹக³தம் ஞாணஸம்பயுத்தம் அஸங்கா²ரிகமேகம், ஸஸங்கா²ரிகமேகம், உபேக்கா²ஸஹக³தம் ஞாணவிப்பயுத்தம் அஸங்கா²ரிகமேகம், ஸஸங்கா²ரிகமேகந்தி இத³ம் அட்ட²வித⁴ம்பி காமாவசரகுஸலசித்தம் நாம.

12. உத்³தா³னதோ து³வே காமா, க்லேஸவத்து²வஸா பன;

கிலேஸோ ச²ந்த³ராகோ³வ, வத்து² தேபூ⁴மவட்டகம்.

13. கிலேஸகாமோ காமேதி, வத்து² காமீயதீதி ச;

ஸிஜ்ஜ²தி து³விதோ⁴பேஸ, காமோ வோ காரகத்³வயே.

14. யஸ்மிம் பன பதே³ஸே ஸோ, காமோயம் து³விதோ⁴பி ச;

ஸம்பத்தீனம் வஸேனாவ-சரதீதி ச ஸோ பன.

15. பதே³ஸோ சதுபாயானம், ச²ன்னம் தே³வானமேவ ச;

மனுஸ்ஸானம் வஸேனேவ, ஏகாத³ஸவிதோ⁴ பன.

16. காமோவசரதீதேத்த², காமாவசரஸஞ்ஞிதோ;

அஸ்ஸாபி⁴லக்கி²தத்தா ஹி, ஸஸத்தா²வசரோ விய.

17. ஸ்வாயம் ரூபப⁴வோ ரூபம், ஏவம் காமோதி ஸஞ்ஞிதோ;

உத்தரஸ்ஸ பத³ஸ்ஸேவ, லோபம் கத்வா உதீ³ரிதோ.

18. தஸ்மிம் காமே இத³ம் சித்தம், ஸதா³வசரதீதி ச;

காமாவசரமிச்சேவம், கதி²தம் காமகா⁴தினா.

19. படிஸந்தி⁴ம் ப⁴வே காமே, அவசாரயதீதி வா;

காமாவசரமிச்சேவம், பரியாபன்னந்தி தத்ர வா.

20. இத³ம் அட்ட²வித⁴ம் சித்தம், காமாவசரஸஞ்ஞிதம்;

த³ஸபுஞ்ஞக்ரியவத்து²-வஸேனேவ பவத்ததி.

21. தா³னம் ஸீலம் பா⁴வனா பத்திதா³னம்,

வேய்யாவச்சம் தே³ஸனா சானுமோதோ³;

தி³ட்டி²ஜ்ஜுத்தம் ஸம்ஸுதிச்சாபசாயோ,

ஞேய்யோ ஏவம் புஞ்ஞவத்து²ப்பபே⁴தோ³.

22. க³ச்ச²ந்தி ஸங்க³ஹம் தா³னே, பத்திதா³னானுமோத³னா;

ததா² ஸீலமயே புஞ்ஞே, வேய்யாவச்சாபசாயனா.

23. தே³ஸனா ஸவனம் தி³ட்டி²-உஜுகா பா⁴வனாமயே;

புன தீணேவ ஸம்போ⁴ந்தி, த³ஸ புஞ்ஞக்ரியாபி ச.

24. ஸப்³பா³னுஸ்ஸதிபுஞ்ஞஞ்ச, பஸம்ஸா ஸரணத்தயம்;

யந்தி தி³ட்டி²ஜுகம்மஸ்மிம், ஸங்க³ஹம் நத்தி² ஸம்ஸயோ.

25. புரிமா முஞ்சனா சேவ, பரா திஸ்ஸோபி சேதனா;

ஹோதி தா³னமயம் புஞ்ஞம், ஏவம் ஸேஸேஸு தீ³பயே.

இதா³னி அஸ்ஸ பனட்ட²வித⁴ஸ்ஸாபி காமாவசரகுஸலசித்தஸ்ஸ அயமுப்பத்திக்கமோ வேதி³தப்³போ³. யதா³ ஹி யோ தே³ய்யத⁴ம்மப்படிக்³கா³ஹகாதி³ஸம்பத்திம், அஞ்ஞம் வா ஸோமனஸ்ஸஹேதும் ஆக³ம்ம ஹட்ட²பஹட்டோ² ‘‘அத்தி² தி³ன்ன’’ந்தி ஆதி³னயப்பவத்தம் ஸம்மாதி³ட்டி²ம் புரக்க²த்வா பரேஹி அனுஸ்ஸாஹிதோ தா³னாதீ³னி புஞ்ஞானி கரோதி, ததா³ஸ்ஸ ஸோமனஸ்ஸஸஹக³தம் ஞாணஸம்பயுத்தம் அஸங்கா²ரிகம் பட²மம் மஹாகுஸலசித்தம் உப்பஜ்ஜதி. யதா³ பன வுத்தனயேனேவ ஹட்ட²பஹட்டோ² ஸம்மாதி³ட்டி²ம் புரக்க²த்வா பரேஹி உஸ்ஸாஹிதோ கரோதி, ததா³ஸ்ஸ தமேவ சித்தம் ஸஸங்கா²ரிகம் ஹோதி. இமஸ்மிம் பனத்தே² ஸங்கா²ரோதி அத்தனோ வா பரஸ்ஸ வா பவத்தஸ்ஸ புப்³ப³ப்பயோக³ஸ்ஸாதி⁴வசனம். யதா³ பன ஞாதிஜனஸ்ஸ படிபத்தித³ஸ்ஸனேன ஜாதபரிசயா பா³லகா பி⁴க்கூ² தி³ஸ்வா ஸோமனஸ்ஸஜாதா ஸஹஸா யம் கிஞ்சி ஹத்த²க³தம் த³த³ந்தி வா வந்த³ந்தி வா, ததா³ தேஸம் ததியசித்தமுப்பஜ்ஜதி. யதா³ பன தே ‘‘தே³த² வந்த³த², அய்யே’’தி வத³ந்தி, ஏவம் ஞாதிஜனேன உஸ்ஸாஹிதா ஹுத்வா ஹத்த²க³தம் த³த³ந்தி வா வந்த³ந்தி வா, ததா³ தேஸம் சதுத்த²சித்தமுப்பஜ்ஜதி. யதா³ பன தே³ய்யத⁴ம்மப்படிக்³கா³ஹகாதீ³னம் அஸம்பத்திம் வா அஞ்ஞேஸம் வா ஸோமனஸ்ஸஹேதூனம் அபா⁴வம் ஆக³ம்ம சதூஸுபி விகப்பேஸு ஸோமனஸ்ஸரஹிதா ஹோந்தி, ததா³ ஸேஸானி சத்தாரி உபேக்கா²ஸஹக³தானி உப்பஜ்ஜந்தி. ஏவம் ஸோமனஸ்ஸுபேக்கா²ஞாணப்பயோக³பே⁴த³தோ அட்ட²வித⁴ம் காமாவசரகுஸலசித்தம் வேதி³தப்³ப³ம்.

26. த³ஸபுஞ்ஞக்ரியாதீ³னம், வஸேன ச ப³ஹூனிபி;

ஏதானி பன சித்தானி, ப⁴வந்தீதி பகாஸயே.

27. ஸத்தரஸ ஸஹஸ்ஸானி, த்³வே ஸதானி அஸீதி ச;

காமாவசரபுஞ்ஞானி, ப⁴வந்தீதி வினித்³தி³ஸே.

தம் பன யதா²னுரூபம் காமாவசரஸுக³தியம் ப⁴வபோ⁴க³ஸம்பத்திம் அபி⁴னிப்பா²தே³தி.

இதரேஸு பன ரூபாவசரகுஸலசித்தம் ஸவத்து²கதோ ஏகவித⁴ம், த்³வீஸு ப⁴வேஸு உப்பஜ்ஜனதோ து³வித⁴ம், ஹீனமஜ்ஜி²மபணீதபே⁴த³தோ திவித⁴ம், படிபதா³தி³பே⁴த³தோ சதுப்³பி³த⁴ம், ஜா²னங்க³யோக³பே⁴த³தோ பஞ்சவித⁴ம். ஸேய்யதி²த³ம் – காமச்ச²ந்த³ப்³யாபாத³தி²னமித்³த⁴உத்³த⁴ச்சகுக்குச்சவிசிகிச்சா²விப்பஹீனம் விதக்கவிசாரபீதிஸுக²சித்தேகக்³க³தாஸம்பயுத்தம் பட²மம், விதக்கவிப்பஹீனம் விசாரபீதிஸுக²சித்தேகக்³க³தாஸம்பயுத்தம் து³தியம், விதக்கவிசாரவிப்பஹீனம் பீதிஸுக²சித்தேகக்³க³தாஸம்பயுத்தம் ததியம், விதக்கவிசாரபீதிவிப்பஹீனம் ஸுக²சித்தேகக்³க³தாஸம்பயுத்தம் சதுத்த²ம், விதக்கவிசாரபீதிஸுக²விப்பஹீனம் உபேக்கா²சித்தேகக்³க³தாஸம்பயுத்தம் பஞ்சமந்தி இத³ம் பஞ்சவித⁴ம் ரூபாவசரகுஸலசித்தம் நாம.

தம் பன யதா²ஸம்ப⁴வம் பத²வீகஸிணாதீ³ஸு ஆரம்மணேஸு பவத்திவஸேன அனேகவித⁴ம் ஹோதி. ஸப்³ப³ம் பனேதம் ரூபாவசரபா⁴வனாபுஞ்ஞவஸப்பவத்தம் யதா²னுரூபம் ரூபாவசரூபபத்தினிப்பா²த³கம் ஹோதி. ஏவம் தாவ ரூபாவசரகுஸலம் வேதி³தப்³ப³ம்.

ஸேஸேஸு பன த்³வீஸு அரூபாவசரகுஸலசித்தம் தாவ உபேக்கா²வேத³னாயோக³பே⁴த³தோ ஏகவித⁴ம், ஸவத்து²காவத்து²கபே⁴த³தோ து³வித⁴ம், ஹீனமஜ்ஜி²மபணீதபே⁴த³தோ திவித⁴ம், ஆரம்மணபே⁴த³தோ சதுப்³பி³த⁴ம். கஸிணுக்³கா⁴டிமாகாஸம், தத்த² பவத்தவிஞ்ஞாணம், தஸ்ஸ அபக³மோ, ஆகிஞ்சஞ்ஞாயதனந்தி இத³மஸ்ஸ சதுப்³பி³த⁴மாரம்மணம். யதா²படிபாடியா ஏதஸ்ஸாரம்மணஸ்ஸ பே⁴த³தோ சதுப்³பி³த⁴ம் ஹோதி. ஸேய்யதி²த³ம் – ஸப்³ப³ஸோ ரூபஸஞ்ஞானம் ஸமதிக்கமா படிக⁴ஸஞ்ஞானம் அத்த²ங்க³மா நானத்தஸஞ்ஞானம் அமனஸிகாரா ஆகாஸானஞ்சாயதனஸஞ்ஞாஸஹக³தம், விஞ்ஞாணஞ்சாயதனஸஞ்ஞாஸஹக³தம், ஆகிஞ்சஞ்ஞாயதனஸஞ்ஞாஸஹக³தம், நேவஸஞ்ஞானாஸஞ்ஞாயதனஸஞ்ஞாஸஹக³தந்தி இத³ம் சதுப்³பி³த⁴ம் அரூபாவசரகுஸலசித்தம் நாம. ஸப்³ப³ம் பனேதம் அரூபாவசரபா⁴வனாபுஞ்ஞவஸப்பவத்தம் யதா²னுரூபம் அரூபூபபத்தினிப்பா²த³கம் ஹோதி. ஏவம் அரூபாவசரகுஸலசித்தம் வேதி³தப்³ப³ம்.

இதரம் பன லோகுத்தரகுஸலசித்தம் நிப்³பா³னாரம்மணதோ ஏகவித⁴ம், நியதானியதவத்து²கபே⁴த³தோ து³வித⁴ம், தீஹி விமோக்க²முகே²ஹி பத்தப்³ப³தோ திவித⁴ம், சதுமக்³க³யோக³பே⁴த³தோ சதுப்³பி³த⁴ம். ஸேய்யதி²த³ம் – ஸக்காயதி³ட்டி²விசிகிச்சா²ஸீலப்³ப³தபராமாஸஸஞ்ஞோஜனப்பஹானகரம் ஸோதாபத்திமக்³க³சித்தம், ராக³தோ³ஸமோஹானம் தனுத்தகரம் ஸகதா³கா³மிமக்³க³சித்தம், காமராக³ப்³யாபாதா³னம் நிரவஸேஸப்பஹானகரம் அனாகா³மிமக்³க³சித்தம், ரூபராக³அரூபராக³மானஉத்³த⁴ச்சஅவிஜ்ஜாபஹானகரம் அரஹத்தமக்³க³சித்தந்தி இத³ம் சதுப்³பி³த⁴ம் லோகுத்தரகுஸலசித்தம் நாம. ஏகேகம் பனேத்த² ஜா²னங்க³யோக³பே⁴த³தோ பஞ்சவித⁴ம் ஹோதி, தஸ்மா வீஸதிவித⁴ம் ஹோதி. ஸப்³ப³ம் பனேதம் லோகுத்தரபா⁴வனாபுஞ்ஞவஸப்பவத்தம் மக்³கா³னுரூபப²லப்பவத்தியா சத்தாரோ அரியபுக்³க³லே அபி⁴னிப்பா²தே³தி. ஏவம் லோகுத்தரகுஸலம் வேதி³தப்³ப³ம்.

28. காமே அட்டே²வ ரூபே ச, பஞ்ச சத்தாரிரூபிஸு;

சத்தாரானுத்தரானேவம், குஸலானேகவீஸதி.

29. குஸலாகுஸலாபக³தேன ஸதா,

குஸலே குஸலேன ச யம் குஸலம்;

சதுபூ⁴மிக³தம் முனினா வஸினா,

லபிதம் லபிதம் ஸகலம்பி மயா.

அகுஸலம் பன பூ⁴மிதோ ஏகவித⁴ம் காமாவசரமேவ, நியதானியதவத்து²வஸேன ச ஏகஹேதுகது³ஹேதுகவஸேன ச படிஸந்தி⁴ஜனகாஜனகவஸேன ச து³வித⁴ம், தீஹி வேத³னாஹி யோக³தோ ச லோப⁴மூலம் தோ³ஸமூலம் மோஹமூலந்தி மூலதோ ச திவித⁴ம் ஹோதி. தத்த² லோப⁴மூலம் பன ஸோமனஸ்ஸுபேக்கா²தி³ட்டி²ப்பயோக³பே⁴த³தோ அட்ட²வித⁴ம் ஹோதி. ஸேய்யதி²த³ம் – ஸோமனஸ்ஸஸஹக³தம் தி³ட்டி²க³தஸம்பயுத்தம் அஸங்கா²ரிகமேகம், ஸஸங்கா²ரிகமேகம், ஸோமனஸ்ஸஸஹக³தம் தி³ட்டி²க³தவிப்பயுத்தம் அஸங்கா²ரிகமேகம், ஸஸங்கா²ரிகமேகம், உபேக்கா²ஸஹக³தம் தி³ட்டி²க³தஸம்பயுத்தம் அஸங்கா²ரிகமேகம், ஸஸங்கா²ரிகமேகம், உபேக்கா²ஸஹக³தம் தி³ட்டி²க³தவிப்பயுத்தம் அஸங்கா²ரிகமேகம், ஸஸங்கா²ரிகமேகந்தி.

யதா³ ஹி ‘‘நத்தி² காமேஸு ஆதீ³னவோ’’திஆதி³னா நயேன மிச்சா²தி³ட்டி²ம் புரக்க²த்வா கேவலம் ஹட்ட²துட்டோ² காமே வா பரிபு⁴ஞ்ஜதி, தி³ட்ட²மங்க³லாதீ³னி வா ஸாரதோ பச்சேதி ஸபா⁴வதிக்கே²னேவ அனுஸ்ஸாஹிதேன சித்தேன, ததா³ஸ்ஸ பட²மம் அகுஸலசித்தம் உப்பஜ்ஜதி. யதா³ பன மந்தே³ன ஸமுஸ்ஸாஹிதேன, ததா³ து³தியம். யதா³ மிச்சா²தி³ட்டி²ம் அபுரக்க²த்வா கேவலம் ஹட்ட²துட்டோ² மேது²னம் த⁴ம்மம் வா பரிபு⁴ஞ்ஜதி, பரஸம்பத்திம் வா அபி⁴ஜ்ஜா²யதி, பரஸ்ஸ ப⁴ண்ட³ம் வா ஹரதி ஸபா⁴வதிக்கே²னேவ அனுஸ்ஸாஹிதேன சித்தேன, ததா³ ததியம். யதா³ மந்தே³ன ஸமுஸ்ஸாஹிதேன, ததா³ சதுத்த²ம் உப்பஜ்ஜதி. யதா³ பன காமானம் வா அஸம்பத்திம் ஆக³ம்ம அஞ்ஞேஸம் வா ஸோமனஸ்ஸஹேதூனம் அபா⁴வேன சதூஸுபி விகப்பேஸு ஸோமனஸ்ஸரஹிதா ஹோந்தி, ததா³ ஸேஸானி சத்தாரி உபேக்கா²ஸஹக³தானி உப்பஜ்ஜந்தீதி. ஏவம் ஸோமனஸ்ஸுபேக்கா²தி³ட்டி²ப்பயோக³பே⁴த³தோ அட்ட²வித⁴ம் லோப⁴மூலம் வேதி³தப்³ப³ம்.

தோ³ஸமூலம் பன ஏகந்தஸவத்து²கதோ ஏகவித⁴ம், அஸங்கா²ரஸஸங்கா²ரபே⁴த³தோ து³வித⁴ம் தோ³மனஸ்ஸஸஹக³தம் படிக⁴ஸம்பயுத்தம் அஸங்கா²ரம், ஸஸங்கா²ரந்தி. அஸ்ஸ பன பாணாதிபாதாதீ³ஸு திக்க²மந்த³ப்பவத்திகாலே உப்பத்தி வேதி³தப்³பா³.

மோஹமூலம்பி விசிகிச்சு²த்³த⁴ச்சயோக³தோ து³வித⁴ம் ஹோதி உபேக்கா²ஸஹக³தம் விசிகிச்சா²ஸம்பயுத்தம், உபேக்கா²ஸஹக³தம் உத்³த⁴ச்சஸம்பயுத்தந்தி. தஸ்ஸ அஸன்னிட்டா²னவிக்கே²பகாலேஸு பவத்தி வேதி³தப்³பா³தி.

ஏவம் தாவ த்³வாத³ஸவித⁴ம் அகுஸலசித்தம் வேதி³தப்³ப³ம், ஸப்³ப³ம் பனேதம் யதா²னுரூபம் அபாயேஸு உபபத்தியா, ஸுக³தியம்பி து³க்க²விஸேஸஸ்ஸ அபி⁴னிப்பா²த³கம் ஹோதி.

30. லோப⁴மூலவஸேனட்ட², தோ³ஸமூலவஸா து³வே;

மோஹமூலவஸேன த்³வே, ஏவம் த்³வாத³ஸதா⁴ ஸியும்.

31. பாபாபாபேஸ்வபாபேன, யம் வுத்தம் பாபமானஸம்;

பாபாபாபப்பஹீனேன, தம் மயா ஸமுதா³ஹடம்.

இதரம் பன அப்³யாகதமவிபாகாரஹதோ ஏகவித⁴ம் ஹோதி, ஜாதிபே⁴த³தோ து³வித⁴ம் விபாகசித்தம் கிரியசித்தந்தி. தத்த² விபாகசித்தம் பூ⁴மிபே⁴த³தோ சதுப்³பி³த⁴ம் காமாவசரம் ரூபாவசரம் அரூபாவசரம் லோகுத்தரந்தி. தத்த² காமாவசரம் து³வித⁴ம் குஸலவிபாகம் அகுஸலவிபாகந்தி. குஸலவிபாகம் து³வித⁴ம் ஸஹேதுகமஹேதுகஞ்சேதி.

தத்த² ஸஹேதுகவிபாகசித்தம் ஸககுஸலம் விய ஸோமனஸ்ஸுபேக்கா²ஞாணப்பயோக³பே⁴த³தோ அட்ட²வித⁴ம். ஸேய்யதி²த³ம் – ஸோமனஸ்ஸஸஹக³தம் ஞாணஸம்பயுத்தம் அஸங்கா²ரம், ஸஸங்கா²ரம், ஸோமனஸ்ஸஸஹக³தம் ஞாணவிப்பயுத்தம் அஸங்கா²ரம், ஸஸங்கா²ரம், உபேக்கா²ஸஹக³தம் ஞாணஸம்பயுத்தம் அஸங்கா²ரம், ஸஸங்கா²ரம், உபேக்கா²ஸஹக³தம் ஞாணவிப்பயுத்தம் அஸங்கா²ரம், ஸஸங்கா²ரந்தி இத³ம் அட்ட²வித⁴ம் ஸஹேதுகவிபாகம் நாம.

யதா² பனஸ்ஸ குஸலம் தா³னாதி³வஸேன ச²ஸு ஆரம்மணேஸு பவத்ததி, ந இத³ம் ததா². இத³ம் ஹி படிஸந்தி⁴ப⁴வங்க³சுதிததா³ரம்மணவஸேன பரித்தத⁴ம்மபரியாபன்னேஸுயேவ ச²ஸு ஆரம்மணேஸு பவத்ததி. ஸம்பயுத்தத⁴ம்மானஞ்ச விஸேஸே அஸதிபி ஆதா³ஸதலாதீ³ஸு முக²னிமித்தம் விய நிருஸ்ஸாஹம் விபாகம், முக²ம் விய ஸஉஸ்ஸாஹம் குஸலந்தி வேதி³தப்³ப³ம். இமேஸம் பன விபச்சனட்டா²னம் வேதி³தப்³ப³ம். இமானி ஹி படிஸந்தி⁴ப⁴வங்க³சுதிததா³ரம்மணானி ஹுத்வா விபச்சந்தி.

32. காமாவசரதே³வானம், மனுஸ்ஸானம் இமே பன;

து³ஹேதுகதிஹேதூனம், ப⁴வந்தி படிஸந்தி⁴யோ.

33. ததோ பவத்தியம் ஹுத்வா, ப⁴வங்க³ம் யாவதாயுகம்;

ப³லவாரம்மணே ஹுத்வா, ததா³ரம்மணமேவ ச.

34. ததோ மரணகாலஸ்மிம், சுதி ஹுத்வா பவத்தரே;

ஏவம் சதூஸு டா²னேஸு, விபச்சந்தீதி நித்³தி³ஸே.

35. ஸபூ⁴மிகுஸலேஹேவ, மஹாபாகா ஸமா வினா;

கம்மத்³வாரஞ்ச கம்மஞ்ச, புஞ்ஞானம் க்ரியவத்து²கம்.

36. அவிஞ்ஞத்திஜனத்தா ஹி, அவிபாகஸபா⁴வதோ;

அப்பவத்தனதோ சேவ, பாகா புஞ்ஞேஹி நோ ஸமா.

37. பரித்தாரம்மணத்தா ஹி, தேஸமேகந்ததோ பன;

கருணாமுதி³தா தேஸு, ந ஜாயந்தி கதா³சிபி.

38. ததா² விரதியோ திஸ்ஸோ, ந பனேதேஸு ஜாயரே;

பஞ்ச ஸிக்கா²பதா³ வுத்தா, குஸலாதி ஹி ஸத்து²னா.

39. ததா²தி⁴பதினோபேத்த², ந ஸந்தீதி வினித்³தி³ஸே;

ச²ந்தா³தீ³னி து⁴ரம் கத்வா, அனுப்பஜ்ஜனதோ பன.

40. அஸங்கா²ரஸஸங்கா²ர-விதா⁴னம் பன புஞ்ஞதோ;

ஞேய்யம் பச்சயதோ சேவ, விபாகேஸு ச விஞ்ஞுனா.

41. ஹீனாதீ³னம் விபாகத்தா, புஞ்ஞானம் புஞ்ஞவாதி³னா;

ஹீனாத³யோ ப⁴வந்தீதி, விபாகா பரிதீ³பிதா.

42. இத³ம் அட்ட²வித⁴ம் சித்தம், ஏகந்தேன ஸவத்து²கம்;

ஜாயதே காமலோகஸ்மிம், ந பனஞ்ஞத்த² ஜாயதே.

ஏவம் தாவ ஸஹேதுகவிபாகசித்தம் வேதி³தப்³ப³ம்.

அஹேதுகவிபாகசித்தம் பன அலோபா⁴தி³ஹேதுவிரஹிதம் உபேக்கா²ஸஹக³தம் சக்கு²விஞ்ஞாணம், உபேக்கா²ஸஹக³தம் ஸோதவிஞ்ஞாணம், உபேக்கா²ஸஹக³தம் கா⁴னவிஞ்ஞாணம், உபேக்கா²ஸஹக³தம் ஜிவ்ஹாவிஞ்ஞாணம், ஸுக²ஸஹக³தம் காயவிஞ்ஞாணம், உபேக்கா²ஸஹக³தம் அஹேதுகமனோதா⁴துஸம்படிச்ச²னம், ஸோமனஸ்ஸஸஹக³தம் அஹேதுகமனோவிஞ்ஞாணதா⁴துஸந்தீரணம், உபேக்கா²ஸஹக³தம் அஹேதுகமனோவிஞ்ஞாணதா⁴துஸந்தீரணந்தி இத³ம் பன அட்ட²வித⁴ம் அஹேதுகவிபாகசித்தம் நாம.

இத³ம் பன அட்ட²வித⁴ம் நியதவத்து²கதோ ஏகவித⁴ம், நியதானியதாரம்மணதோ து³வித⁴ம். தத்த² விஞ்ஞாணபஞ்சகம் நியதாரம்மணம், ஸேஸத்தயம் அனியதாரம்மணம். ஸுக²ஸோமனஸ்ஸுபேக்கா²வேத³னாயோக³தோ திவித⁴ம். தத்த² ஸுக²ஸஹக³தம் காயவிஞ்ஞாணம், த்³விட்டா²னிகம் ஸந்தீரணம் ஸோமனஸ்ஸுபேக்கா²யுத்தம், ஸேஸமுபேக்கா²யுத்தந்தி.

தி³ட்டா²ரம்மணஸுதாரம்மணமுதாரம்மணதி³ட்ட²ஸுதமுதாரம்மணதி³ட்ட²-ஸுதமுதவிஞ்ஞாதாரம்மணவஸேன பஞ்சவித⁴ம். தத்த² தி³ட்டா²ரம்மணம் சக்கு²விஞ்ஞாணம், ஸுதாரம்மணம் ஸோதவிஞ்ஞாணம், முதாரம்மணம் கா⁴னஜிவ்ஹாகாயவிஞ்ஞாணத்தயம், தி³ட்ட²ஸுதமுதாரம்மணம் மனோதா⁴துஸம்படிச்ச²னம், தி³ட்ட²ஸுதமுதவிஞ்ஞாதாரம்மணம் ஸேஸமனோவிஞ்ஞாணதா⁴துத்³வயந்தி.

வத்து²தோ ச²ப்³பி³த⁴ம். கத²ம்? சக்கு²விஞ்ஞாணஸ்ஸ சக்கு²மேவ வத்து², ததா² ஸோதகா⁴னஜிவ்ஹாகாயவிஞ்ஞாணானம் ஸோதகா⁴னஜிவ்ஹாகாயவத்து², அவஸேஸத்தயஸ்ஸ ஹத³யவத்து²மேவாதி.

ஆரம்மணதோ ஸத்தவித⁴ம் ஹோதி. கத²ம்? ரூபாரம்மணமேவ சக்கு²விஞ்ஞாணம், ததா² ஸத்³த³க³ந்த⁴ரஸபோ²ட்ட²ப்³பா³ரம்மணானி படிபாடியா ஸோதகா⁴னஜிவ்ஹாகாயவிஞ்ஞாணானி, ரூபாதி³பஞ்சாரம்மணா மனோதா⁴து, ஸேஸமனோவிஞ்ஞாணதா⁴துத்³வயம் ச²ளாரம்மணந்தி.

தம் ஸப்³ப³ம் பன அஹேதுகவிபாகசித்தம் கிச்சதோ அட்ட²வித⁴ம் ஹோதி. கத²ம்? த³ஸ்ஸனகிச்சம் சக்கு²விஞ்ஞாணம், ஸவனகா⁴யனஸாயனபு²ஸனஸம்படிச்ச²னஸந்தீரணததா³ரம்மணகிச்சானி அவஸேஸானி.

தத்த² சக்கு²தோ பவத்தம் விஞ்ஞாணம், சக்கு²ம்ஹி ஸன்னிஸ்ஸிதம் விஞ்ஞாணந்தி வா சக்கு²விஞ்ஞாணம், ததா² ஸோதவிஞ்ஞாணாதீ³னி. தத்த² சக்கு²ஸன்னிஸ்ஸிதரூபவிஜானனலக்க²ணம் சக்கு²விஞ்ஞாணம், ரூபமத்தாரம்மணரஸம், ரூபாபி⁴முக²பா⁴வபச்சுபட்டா²னம், ரூபாரம்மணாய கிரியாமனோதா⁴துயா அபக³மபத³ட்டா²னம். ததா² ஸோதகா⁴னஜிவ்ஹாகாயவிஞ்ஞாணானி ஸோதாதி³ஸன்னிஸ்ஸிதஸத்³தா³தி³விஜானனலக்க²ணானி, ஸத்³தா³தி³மத்தாரம்மணரஸானி, ஸத்³தா³தீ³ஸு அபி⁴முக²பா⁴வபச்சுபட்டா²னானி, ஸத்³தா³தி³ஆரம்மணானம் கிரியாமனோதா⁴தூனம் அபக³மபத³ட்டா²னானி. மனோதா⁴துஸம்படிச்ச²னம் பன சக்கு²விஞ்ஞாணாதீ³னம் அனந்தரா ரூபாதி³விஜானனலக்க²ணம், ரூபாதி³ஸம்படிச்ச²னரஸம், ததா²பா⁴வபச்சுபட்டா²னம், சக்கு²விஞ்ஞாணாதீ³னம் அபக³மபத³ட்டா²னம்.

ஸேஸா பன த்³வே அஹேதுகமனோவிஞ்ஞாணதா⁴துயோ ச²ளாரம்மணவிஜானனலக்க²ணா, ஸந்தீரணாதி³ரஸா, ததா²பா⁴வபச்சுபட்டா²னா, ஹத³யவத்து²பத³ட்டா²னாதி வேதி³தப்³பா³. தத்த² பட²மா ஏகந்தமிட்டா²ரம்மணே பவத்திஸப்³பா⁴வதோ ஸோமனஸ்ஸயுத்தாவ ஹுத்வா பஞ்சத்³வாரே ஸந்தீரணகிச்சம் ஸாத⁴யமானா பஞ்சஸு த்³வாரேஸு ட²த்வா விபச்சதி, ச²ஸு பன த்³வாரேஸு ப³லவாரம்மணே ததா³ரம்மணம் ஹுத்வா விபச்சதி. து³தியா பன இட்ட²மஜ்ஜ²த்தாரம்மணே பவத்திஸப்³பா⁴வதோ உபேக்கா²ஸஹக³தா ஹுத்வா ஸந்தீரணததா³ரம்மணபடிஸந்தி⁴ப⁴வங்க³சுதிவஸேன பவத்தனதோ பஞ்சஸு டா²னேஸு விபச்சதி. கத²ம்? மனுஸ்ஸலோகே தாவ ஜச்சந்த⁴ஜச்சப³தி⁴ரஜச்சஜளஜச்சும்மத்தகபண்ட³கஉப⁴தோப்³யஞ்ஜனனபும்ஸகாதீ³னம் படிஸந்தி⁴க்³க³ஹணகாலே படிஸந்தி⁴ ஹுத்வா விபச்சதி. படிஸந்தி⁴யா வீதிவத்தாய பவத்தியம் யாவதாயுகம் ப⁴வங்க³ம் ஹுத்வா விபச்சதி. இட்ட²மஜ்ஜ²த்தே பஞ்சாரம்மணவீதி²யா ஸந்தீரணம் ஹுத்வா, ப³லவாரம்மணே ச²த்³வாரே ததா³ரம்மணம் ஹுத்வா, மரணகாலே சுதி ஹுத்வாதி இமேஸு பன பஞ்சஸு டா²னேஸு விபச்சதீதி. ஏவம் தாவ அஹேதுகவிபாகசித்தானி வேதி³தப்³பா³னி.

43. காமாவசரபுஞ்ஞஸ்ஸ, விபாகா ஹோந்தி ஸோளஸ;

தம் திஹேதுகபுஞ்ஞஸ்ஸ, வஸேன பரிதீ³பயே.

இதா³னி ரூபாவசரவிபாகசித்தானி வுச்சந்தி. தானி நியதவத்து²கதோ ஏகவிதா⁴னி, ஜா²னங்க³யோக³பே⁴த³தோ பஞ்சவிதா⁴னி. கத²ம்? விதக்கவிசாரபீதிஸுக²சித்தேகக்³க³தாஸம்பயுத்தம் பட²மம், விசாரபீதிஸுக²சித்தேகக்³க³தாஸம்பயுத்தம் து³தியம், பீதிஸுக²சித்தேகக்³க³தாஸம்பயுத்தம் ததியம், ஸுக²சித்தேகக்³க³தாஸம்பயுத்தம் சதுத்த²ம், உபேக்கா²சித்தேகக்³க³தாஸம்பயுத்தம் பஞ்சமந்தி இமானி பஞ்சபி ரூபாவசரவிபாகசித்தானி உபபத்தியம் படிஸந்தி⁴ப⁴வங்க³சுதிவஸேன பவத்தந்தி.

இதா³னி அரூபாவசரவிபாகசித்தானி வுச்சந்தி. தானி ஸககுஸலானி விய ஆரம்மணபே⁴த³தோ சதுப்³பி³தா⁴னி ஹோந்தி. கத²ம்? ஆகாஸானஞ்சாயதனஸஞ்ஞாஸஹக³தம், விஞ்ஞாணஞ்சாயதனஸஞ்ஞாஸஹக³தம், ஆகிஞ்சஞ்ஞாயதனஸஞ்ஞாஸஹக³தம், நேவஸஞ்ஞானாஸஞ்ஞாயதனஸஞ்ஞாஸஹக³தந்தி இமானி சத்தாரி அரூபாவசரவிபாகசித்தானி.

44. குஸலானுக³தம் கத்வா, பா⁴ஜிதம் கிம் மஹக்³க³தம்;

காமாவசரபுஞ்ஞம்வ, நாஸமானப²லம் யதோ.

45. அத்தனோ குஸலேஹேவ, ஸமானம் ஸப்³ப³தா² இத³ம்;

க³ஜாதீ³னம் யதா² சா²யா, க³ஜாதி³ஸதி³ஸா ததா².

46. காமாவசரபுஞ்ஞம்வ, நாபராபரியவேத³னம்;

ஜா²னா அபரிஹீனஸ்ஸ, ஸத்தஸ்ஸ ப⁴வகா³மினோ.

47. குஸலானந்தரம்யேவ, ப²லம் உப்பஜ்ஜதீதி ச;

ஞாபனத்த²ம் பனேதஸ்ஸ, குஸலானுக³தம் கதம்.

48. படிப்பதா³க்கமோ சேவ, ஹீனாதீ³னஞ்ச பே⁴த³தோ;

ஜா²னாக³மனதோ சேத்த², வேதி³தப்³போ³ விபா⁴வினா.

49. அபா⁴வோதி⁴பதீனஞ்ச, அயமேவ விஸேஸகோ;

ஸேஸம் ஸப்³ப³ம் ச ஸேஸேன, குஸலேன ஸமம் மதம். –

ஏவம் ரூபாவசராரூபாவசரவிபாகா வேதி³தப்³பா³.

இதா³னி லோகுத்தரவிபாகசித்தானி ஹோந்தி. தானி சதுமக்³க³யுத்தசித்தப²லத்தா சதுப்³பி³தா⁴னி ஹோந்தி. கத²ம்? ஸோதாபத்திமக்³க³ப²லசித்தம், ஸகதா³கா³மிமக்³க³ப²லசித்தம், அனாகா³மிமக்³க³ப²லசித்தம், அரஹத்தமக்³க³ப²லசித்தந்தி. ஏவம் பனேத்த² ஏகேகம் ஜா²னங்க³யோக³பே⁴த³தோ பஞ்சவித⁴ம், புன மக்³க³வீதி²ப²லஸமாபத்திவஸேன பவத்திதோ து³வித⁴ம். ஏவம் லோகுத்தரகுஸலவிபாகசித்தானி வேதி³தப்³பா³னி.

50. ஸுஞ்ஞதம் அனிமித்தந்தி, ததா²பணிஹிதந்திபி;

ஏதானி தீணி நாமானி, மக்³க³ஸ்ஸானந்தரே ப²லே.

51. லப்³ப⁴ந்தி பரபா⁴க³ஸ்மிம், வளஞ்ஜனப²லேஸு ந;

விபஸ்ஸனாவஸேனேவ, தானி நாமானி லப்³ப⁴ரே.

52. ஹோந்தி ஸாதி⁴பதீனேவ, லோகுத்தரப²லானி து;

விபாகேதி⁴பதீ நத்தி², ட²பேத்வா து அனாஸவே.

53. அத்தனோ மக்³க³பா⁴வேன, மக்³கோ³ ‘‘மக்³கோ³’’தி வுச்சதி;

ப²லம் மக்³க³முபாதா³ய, மக்³கோ³ நாமாதி வுச்சதி. –

ஏவம் லோகுத்தரவிபாகா வேதி³தப்³பா³.

இதா³னி ஸத்தாகுஸலவிபாகானி வுச்சந்தி. அகுஸலவிபாகம் உபேக்கா²ஸஹக³தம் சக்கு²விஞ்ஞாணம், உபேக்கா²ஸஹக³தம் ஸோதவிஞ்ஞாணம், உபேக்கா²ஸஹக³தம் கா⁴னவிஞ்ஞாணம், உபேக்கா²ஸஹக³தம் ஜிவ்ஹாவிஞ்ஞாணம், து³க்க²ஸஹக³தம் காயவிஞ்ஞாணம், உபேக்கா²ஸஹக³தம் அஹேதுகமனோதா⁴துஸம்படிச்ச²னம், உபேக்கா²ஸஹக³தம் அஹேதுகமனோவிஞ்ஞாணதா⁴துஸந்தீரணந்தி இமானி ஸத்த அகுஸலவிபாகசித்தானி.

ஏத்த² பன உபேக்கா²ஸஹக³தாஹேதுகமனோவிஞ்ஞாணதா⁴து ஏகாத³ஸவிதே⁴னாபி அகுஸலசித்தேன கம்மே ஆயூஹிதே கம்மகம்மனிமித்தக³தினிமித்தேஸு அஞ்ஞதரம் ஆரம்மணம் கத்வா சதூஸு அபாயேஸு படிஸந்தி⁴ ஹுத்வா விபச்சதி, படிஸந்தி⁴யா வீதிவத்தாய து³தியசித்தவாரம் ததோ பட்டா²ய யாவதாயுகம் ப⁴வங்க³ம் ஹுத்வா, அனிட்ட²மஜ்ஜ²த்தாரம்மணாய பஞ்சவிஞ்ஞாணவீதி²யா ஸந்தீரணம் ஹுத்வா, ப³லவாரம்மணே ச²ஸு த்³வாரேஸு ததா³ரம்மணம் ஹுத்வா, மரணகாலே சுதி ஹுத்வா விபச்சதி. ஏவம் பஞ்சஸு டா²னேஸு விபச்சதி. கேவலம் ஹி தானி குஸலவிபாகாஹேதுகசித்தானி குஸலகம்மபச்சயானி, இமானி அகுஸலகம்மபச்சயானி. அயமிமேஸம், தேஸஞ்ச விஸேஸோ.

54. அனிட்டா²னிட்ட²மஜ்ஜ²த்தகோ³சரே வத்தரே இமே;

ஸுகா²தி³த்தயயுத்தா தே, து³க்கு²பேக்கா²யுதா இமே.

ஏவம் காமாவசரகுஸலவிபாகஸஹேதுகமட்ட²வித⁴ம், அஹேதுகமட்ட²வித⁴ம், ஜா²னங்க³யோக³பே⁴த³தோ ரூபாவசரவிபாகம் பஞ்சவித⁴ம், ஆரம்மணபே⁴த³தோ அரூபாவசரவிபாகம் சதுப்³பி³த⁴ம், மக்³க³ஸம்பயுத்தசித்தப²லபே⁴த³தோ லோகுத்தரவிபாகம் சதுப்³பி³த⁴ம், சக்கு²விஞ்ஞாணாதி³பே⁴த³தோ அகுஸலவிபாகம் ஸத்தவித⁴ந்தி ச²த்திம்ஸவித⁴ம் விபாகசித்தம் வேதி³தப்³ப³ம்.

55. ஏவம் ச²த்திம்ஸதா⁴ பாகம், பாகஸாஸனபூஜிதோ;

ஸவிபாகாவிபாகேஸு, குஸலோ ஸுக³தோப்³ரவி.

கிரியாப்³யாகதசித்தம் பன அவிபாகதோ ஏகவித⁴ம், பரித்தமஹக்³க³ததோ து³வித⁴ம், காமாவசரரூபாவசரஅரூபாவசரபூ⁴மிபே⁴த³தோ திவித⁴ம். தத்த² காமாவசரம் து³வித⁴ம் ஸஹேதுகமஹேதுகந்தி. தத்த² ஸஹேதுகம் ஏகவித⁴ம் அரஹதோ ஏவ உப்பஜ்ஜனதோ. ஸோமனஸ்ஸுபேக்கா²ஞாணப்பயோக³பே⁴த³தோ காமாவசரகுஸலம் விய அட்ட²வித⁴ம் ஹோதி. ஸேய்யதி²த³ம் – ஸோமனஸ்ஸஸஹக³தம் ஞாணஸம்பயுத்தம் அஸங்கா²ரிகம், ஸஸங்கா²ரிகம், ஸோமனஸ்ஸஸஹக³தம் ஞாணவிப்பயுத்தம் அஸங்கா²ரிகம், ஸஸங்கா²ரிகம், உபேக்கா²ஸஹக³தம் ஞாணஸம்பயுத்தம் அஸங்கா²ரிகம், ஸஸங்கா²ரிகம், உபேக்கா²ஸஹக³தம் ஞாணவிப்பயுத்தம் அஸங்கா²ரிகம், ஸஸங்கா²ரிகந்தி இமானி அட்ட² ஸஹேதுககிரியசித்தானி. ஏதானி பன யதா²னுரூபம் தா³னாதி³வஸேன கீ²ணாஸவானம்யேவ பவத்தந்தி. ஏவம் ஸஹேதுககிரியசித்தானி வேதி³தப்³பா³னி.

அஹேதுககிரியசித்தம் பன திவித⁴ம் கிரியாஹேதுகமனோதா⁴துஉபேக்கா²ஸஹக³தாவஜ்ஜனசித்தம், கிரியாஹேதுகமனோவிஞ்ஞாணதா⁴துஸோமனஸ்ஸஸஹக³தம் ஹஸிதுப்பாத³சித்தம், கிரியாஹேதுகமனோவிஞ்ஞாணதா⁴துஉபேக்கா²ஸஹக³தம் வோட்ட²ப்³ப³னசித்தந்தி.

தத்த² கிரியாஹேதுகமனோதா⁴து உபேக்கா²ஸஹக³தா ஹத³யவத்து²ம் நிஸ்ஸாய சக்கு²த்³வாரே இட்ட²இட்ட²மஜ்ஜ²த்தஅனிட்ட²அனிட்ட²மஜ்ஜ²த்தேஸு ரூபாரம்மணேஸு யேன கேனசி பஸாதே³ க⁴ட்டிதே தம் தம் ஆரம்மணம் க³ஹேத்வா ஆவஜ்ஜனவஸேன சக்கு²விஞ்ஞாணஸ்ஸ புரேசாரீ ஹுத்வா ப⁴வங்க³ம் ஆவட்டயமானா உப்பஜ்ஜதி. ஸோதத்³வாராதீ³ஸுபி ஏஸேவ நயோ. இதரா பன த்³வே அஹேதுகமனோவிஞ்ஞாணதா⁴துயோ ஸாதா⁴ரணாஸாதா⁴ரணாதி து³விதா⁴ ஹோந்தி. தத்த² அஸாதா⁴ரணா பன கிரியாஹேதுகமனோவிஞ்ஞாணதா⁴து ஸோமனஸ்ஸஸஹக³தா கீ²ணாஸவஸ்ஸேவ ச²ஸு த்³வாரேஸு ச²ஸு அனுளாரேஸு ஆரம்மணேஸு ஹஸிதுப்பாத³கிச்சா நியதவத்து²கா உப்பஜ்ஜதி. ஸாதா⁴ரணா பன அஹேதுகமனோவிஞ்ஞாணதா⁴து உபேக்கா²ஸஹக³தா ச²ளாரம்மணவிஜானனலக்க²ணா, ததா²பா⁴வபச்சுபட்டா²னா, ஸா தீஸு ப⁴வேஸு ஸப்³பே³ஸம் ஸசித்தகஸத்தானம் ஸாதா⁴ரணா, ந கஸ்ஸசி பன ஸசித்தகஸ்ஸ ந உப்பஜ்ஜதி நாம. உப்பஜ்ஜமானா பனாயம் பஞ்சத்³வாரமனோத்³வாரேஸு வோட்ட²ப்³ப³னாவஜ்ஜனகிச்சா உப்பஜ்ஜதி. ச² அஸாதா⁴ரணஞாணானிபி ஏதாய க³ஹிதாரம்மணமேவ க³ண்ஹந்தி. ஸப்³பா³ரம்மணக³ஹணஸமத்த²தாய ஸப்³ப³ஞ்ஞுதஞ்ஞாணக³திகாதி வேதி³தப்³பா³. இமானி தீணி அஹேதுககிரியசித்தானி.

இத⁴ ட²த்வா ஹஸனசித்தானி பரிக்³க³ண்ஹிதப்³பா³னி. தேரஸ ஹஸனசித்தானி. குஸலதோ சதூஹி ஸோமனஸ்ஸஸஹக³தேஹி, அகுஸலதோ சதூஹீதி இமேஹி அட்ட²ஹி சித்தேஹி புது²ஜ்ஜனா ஹஸந்தி, ஸேகா² பன குஸலதோ சதூஹி, அகுஸலதோ த்³வீஹி தி³ட்டி²க³தவிப்பயுத்தஸோமனஸ்ஸஸஹக³தேஹீதி ச²ஹி ஹஸந்தி, கீ²ணாஸவா கிரியதோ பஞ்சஹி ஸோமனஸ்ஸஸஹக³தேஹி ஹஸந்தீதி.

56. ஸோமனஸ்ஸயுதானட்ட², குஸலாகுஸலானி ச;

க்ரியதோ பன பஞ்சேவம், ஹாஸசித்தானி தேரஸ.

57. புது²ஜ்ஜனா ஹஸந்தேத்த², சித்தேஹி பன அட்ட²ஹி;

ச²ஹி ஸேகா² அஸேகா² ச, ஹஸந்தி பன பஞ்சஹி.

இதா³னி ரூபாவசரகிரியசித்தானி ஹோந்தி. விதக்கவிசாரபீதிஸுக²சித்தேகக்³க³தாஸம்பயுத்தம் பட²மம், விசாரபீதிஸுக²சித்தேகக்³க³தாஸம்பயுத்தம் து³தியம், பீதிஸுக²சித்தேகக்³க³தாஸம்பயுத்தம் ததியம், ஸுக²சித்தேகக்³க³தாஸம்பயுத்தம் சதுத்த²ம், உபேக்கா²சித்தேகக்³க³தாஸம்பயுத்தம் பஞ்சமந்தி இமானி பஞ்ச ரூபாவசரகிரியசித்தானி.

இதா³னி அரூபாவசரகிரியசித்தானி வுச்சந்தி. ஆகாஸானஞ்சாயதனஸஞ்ஞாஸஹக³தம், விஞ்ஞாணஞ்சாயதனஸஞ்ஞாஸஹக³தம், ஆகிஞ்சஞ்ஞாயதனஸஞ்ஞாஸஹக³தம், நேவஸஞ்ஞானாஸஞ்ஞாயதனஸஞ்ஞாஸஹக³தந்தி இமானி சத்தாரி அரூபாவசரகிரியசித்தானி. இமானி பன ரூபாரூபகிரியசித்தானி ஸகஸகபூ⁴மிகுஸலஸதி³ஸானி. கேவலம் பனேதானி கிரியசித்தானி கீ²ணாஸவானம்யேவ உப்பஜ்ஜந்தி, குஸலானி பன ஸேக²புது²ஜ்ஜனானம். இமானி ச கீ²ணாஸவானம் பா⁴வனாகாரவஸப்பவத்தானி, தானி பன ஸேக²புது²ஜ்ஜனானம் பா⁴வனாபுஞ்ஞவஸப்பவத்தானீதி அயமேவ இமேஸம், தேஸஞ்ச விஸேஸோ.