12. த்³வாத³ஸமோ பரிச்சே²தோ³

பஞ்ஞத்தினித்³தே³ஸோ

ஏத்தா²ஹ – ‘‘கிம் ஏத்தகமேவ ஞேய்யம், உதா³ஹு அஞ்ஞம்பி அத்தீ²’’தி? அத்தி² பஞ்ஞத்தி நாமாதி. ஸா பனேஸா பஞ்ஞபேதப்³ப³தோ, பஞ்ஞாபனதோ ச ‘‘பஞ்ஞத்தீ’’தி வுச்சதி. தேனேவாஹ – ‘‘யா தேஸம் தேஸம் த⁴ம்மானம் ஸங்கா² ஸமஞ்ஞா பஞ்ஞத்தி வோஹாரோ நாமம் நாமகம்மம் நாமதே⁴ய்யம் நிருத்தி ப்³யஞ்ஜனம் அபி⁴லாபோ’’தி. தத்த² ஸங்கா²யதீதி ஸங்கா², கதீ²யதீதி அத்தோ². கிந்தி கதீ²யதி? ‘‘அஹ’’ந்தி ‘‘மம’’ந்தி ‘‘பரோ’’தி ‘‘பரஸ்ஸா’’தி ‘‘மஞ்சோ’’தி ‘‘பீட²’’ந்தி அனேகேஹி ஆகாரேஹி கதீ²யதீதி ஸங்கா². ஸமஞ்ஞாயதீதி ஸமஞ்ஞா. பஞ்ஞாபீயதீதி பஞ்ஞத்தி. வோஹரீயதீதி வோஹாரோ. கிந்தி வோஹரீயதி? ‘‘அஹ’’ந்தி ‘‘மம’’ந்தி ‘‘பரோ’’தி ‘‘பரஸ்ஸா’’தி ‘‘மஞ்சோ’’தி ‘‘பீட²’’ந்தி. ஏவம் தாவ பஞ்ஞபேதப்³ப³தோ பஞ்ஞத்தீதி வுத்தா. ‘‘அஹ’’ந்தி ஹி ரூபாத³யோ த⁴ம்மே உபாதா³ய படிச்ச காரணம் கத்வா யதா² தே ரூபாத³யோ த⁴ம்மா உப்பாத³வயவந்தோ, ந ஏவம்விதா⁴, கேவலம் லோகஸங்கேதேன ஸித்³தா⁴ யா அயம் ‘‘அஹ’’ந்தி கதீ²யதி சேவ பஞ்ஞாபீயதி ச, ஏஸா பஞ்ஞத்தீதி அத்தோ².

இதா³னி பஞ்ஞாபனதோ பஞ்ஞத்திம் பகாஸேதும் ‘‘நாமம் நாமகம்ம’’ந்திஆதி³மாஹ. தத்த² நாமந்தி தம் தம் த⁴ம்மம் ‘‘ஏஸ இத்த²ன்னாமோ நாமா’’தி பஞ்ஞபேதி, தஸ்மா தம் பஞ்ஞத்தீதி பவுச்சதி. நாமகம்மந்திஆதீ³னி தஸ்ஸா ஏவ வேவசனானி. அயம் பஞ்ஞாபனதோ பஞ்ஞத்தி நாம.

ஸா பனேஸா தஜ்ஜாபஞ்ஞத்தி உபாதா³பஞ்ஞத்தி உபனிதா⁴பஞ்ஞத்தீதி திவிதா⁴ ஹோதி. தத்த² தஜ்ஜாபஞ்ஞத்தி நாம சக்கு²ஸோதரூபஸத்³த³பத²வீதேஜோவாயோதிஆதி³னயப்பவத்தா. உபாதா³பஞ்ஞத்தி பன ஸமூஹாஸமூஹவஸேன து³விதா⁴ ஹோதி. தத்த² ஸமூஹபஞ்ஞத்தி நாம ரூபாரூபத⁴ம்மேஸு ஏகஸ்ஸ வா ப³ஹூனம் வா நாமம் க³ஹேத்வா ஸமூஹமேவோபாதா³ய வுச்சதி. கத²ம்? அச்ச²தரச்ச²க⁴டபடாதி³ப்பபே⁴தா³. அயம் ஸமூஹபஞ்ஞத்தி நாம. அஸமூஹபஞ்ஞத்தி பன தி³ஸாகாஸகாலனிமித்தாபா⁴வனிரோதா⁴தி³பே⁴தா³.

யதா³ பன ஸா விஜ்ஜமானம் பரமத்த²ம் ஜோதயதி, ததா³ ‘‘விஜ்ஜமானபஞ்ஞத்தீ’’தி பவுச்சதி. யதா³ அவிஜ்ஜமானம் ஸமூஹாஸமூஹபே⁴த³ம் நாமமத்தம் ஜோதயதி, ததா³ ‘‘அவிஜ்ஜமானபஞ்ஞத்தீ’’தி பவுச்சதி. து³விதா⁴பி பனேஸா ஸோதத்³வாரஜவனானந்தரம் க³ஹிதபுப்³ப³ஸங்கேதமனோத்³வாரஜவனவிஞ்ஞாணேன விஞ்ஞாயதி. யாய க³ஹிதபுப்³ப³ஸங்கேதேன மனோத்³வாரஜவனவிஞ்ஞாணேன பஞ்ஞாபீயதி. யம் ஸந்தா⁴ய ‘‘விஜ்ஜமானபஞ்ஞத்தி, அவிஜ்ஜமானபஞ்ஞத்தி, விஜ்ஜமானேன அவிஜ்ஜமானபஞ்ஞத்தி, அவிஜ்ஜமானேன விஜ்ஜமானபஞ்ஞத்தி, விஜ்ஜமானேன விஜ்ஜமானபஞ்ஞத்தி, அவிஜ்ஜமானேன அவிஜ்ஜமானபஞ்ஞத்தீ’’தி ச²க்கனயோ வுத்தோ. தத்த² பரமத்த²தோ விஜ்ஜமானானம் ரூபாதீ³னம் பஞ்ஞாபனா விஜ்ஜமானபஞ்ஞத்தி. ததா² அவிஜ்ஜமானானமித்தி²புரிஸாதீ³னம் பஞ்ஞாபனா அவிஜ்ஜமானபஞ்ஞத்தி. ட²பேத்வா பன வசனத்த²ம் கேனசி ஆகாரேன அனுபலப்³ப⁴மானானம் பஞ்சமஸச்சாதீ³னம், தித்தி²யபரிகப்பிதானம் வா பகதிபுரிஸாதீ³னம் பஞ்ஞாபனாபி அவிஜ்ஜமானபஞ்ஞத்தியேவ. ‘‘தேவிஜ்ஜோ, ச²ளபி⁴ஞ்ஞோ’’தி ஏவமாதி³னயப்பவத்தா விஜ்ஜமானேன அவிஜ்ஜமானபஞ்ஞத்தி. ‘‘இத்தி²ஸத்³தோ³, புரிஸஸத்³தோ³’’தி ஏவமாதி³கா அவிஜ்ஜமானேன விஜ்ஜமானபஞ்ஞத்தி. ‘‘சக்கு²விஞ்ஞாணம், ஸோதவிஞ்ஞாண’’ந்தி ஏவமாதி³கா விஜ்ஜமானேன விஜ்ஜமானபஞ்ஞத்தி. ‘‘க²த்தியகுமாரோ, ப்³ராஹ்மணகுமாரோ, பி⁴க்கு²குமாரோ’’தி ஏவமாதி³கா அவிஜ்ஜமானேன அவிஜ்ஜமானபஞ்ஞத்தீதி ஏவம் வுத்தா ச² பஞ்ஞத்தியோபி ஏத்தே²வ ஸங்க³ஹம் க³ச்ச²ந்தி. அயம் உபாதா³பஞ்ஞத்தி நாம.

உபனிதா⁴பஞ்ஞத்திபி ஏதிஸ்ஸா ஏவ பபே⁴தா³, ஸா பன ‘‘தீ³க⁴ம் உபனிதா⁴ய ரஸ்ஸோ, ரஸ்ஸம் உபனிதா⁴ய தீ³கோ⁴’’திஆதி³னயப்பவத்தா ‘‘கபணம் மானுஸகம் ரஜ்ஜம் தி³ப்³ப³ஸுக²ம் உபனிதா⁴யா’’தி ஏவமாதி³கா ச, தஸ்மா பஞ்ஞபேதப்³ப³தோ ச பஞ்ஞாபனதோ ச பஞ்ஞத்தீதி வேதி³தப்³பா³. ஸமஞ்ஞா ஸமத்தா.

778. பரமத்த²தோ ச பஞ்ஞத்தி, ததியா கோடி ந விஜ்ஜதி;

த்³வீஸு டா²னேஸு குஸலோ, பரவாதே³ஸு ந கம்பதி.

இதி அபி⁴த⁴ம்மாவதாரே பஞ்ஞத்தினித்³தே³ஸோ நாம

த்³வாத³ஸமோ பரிச்சே²தோ³.