13. தேரஸமோ பரிச்சே²தோ³

காரகபடிவேத⁴னித்³தே³ஸோ

ஏத்தா²ஹ – நித்³தி³ட்டா² குஸலாத³யோ நாம த⁴ம்மா, ந பனேதேஸம் காரகோ அத்தா நித்³தி³ட்டோ². தஸ்ஸ ஹி காரகஸ்ஸ வேத³கஸ்ஸ அத்தனோ அபா⁴வே குஸலாகுஸலானம் த⁴ம்மானம் அபா⁴வோ ஸியா, தேஸமபா⁴வே ததா³யத்தவுத்தீனம் தேஸம் விபாகானமபா⁴வோ ஹோதி, தஸ்மா குஸலாதீ³னம் த⁴ம்மானம் தே³ஸனா நிரத்தி²காதி? அத்ர வுச்சதே – நாயம் நிரத்தி²கா, ஸாத்தி²காவாயம் தே³ஸனா. யதி³ காரகஸ்ஸாபா⁴வா குஸலாதீ³னமபா⁴வோ ஸியா, தஸ்ஸ பரிகப்பிதஸ்ஸ அத்தனோபி அபா⁴வோ ஸியா. கிம் காரணந்தி சே? தஸ்ஸ அத்தனோ அஞ்ஞஸ்ஸ காரகஸ்ஸாபா⁴வதோ. காரகாபா⁴வேபி கத்தா அத்தா அத்தீ²தி சே? ததா² குஸலாதீ³னம்பி அஸதிபி கத்தரி அத்தி²தா உபக³ந்தப்³பா³, குதோயம் தவ தத்தா²னுரோதோ⁴, இத⁴ விரோதோ⁴தி. அதா²பி யதா² பன லோகே காரகாபா⁴வேபி பத²வீஆபதேஜஉதுஆத³யோ படிச்ச அங்குராதீ³னம் அபி⁴னிப்³ப³த்தி தி³ஸ்ஸதி, ததா² ஏதேஸம்பி குஸலாதீ³னம் த⁴ம்மானம் ஹேதுபச்சயஸாமக்³கி³யா அபி⁴னிப்³ப³த்தி ஹோதீதி வேதி³தப்³பா³.

அதா²பி சேத்த² தஸ்ஸா பஞ்ஞாய பரிகப்பிதோ நிச்சோ து⁴வோ குஸலாதீ³னம் கத்தா அத்தா பரமத்த²தோ அத்தீ²தி சே? தமுபபரிக்கி²ஸ்ஸாம தாவ, ஸோ பன தாவ அத்தா காரகோ வேத³கோ கிம் ஸசேதனோ வா, உதா³ஹு அசேதனோ வாதி? கிஞ்சேத்த² – யதி³ அசேதனோ ஸியா, பாகாரதருபாஸாணஸதி³ஸோ ஸியா. தஸ்ஸ காரகவேத³கத்தாபா⁴வோ ஸியா. யதி³ ஸசேதனோ, ஸோ சேதனாய அஞ்ஞோ வா ஸியா, அனஞ்ஞோ வா. அதா²னஞ்ஞோ, சேதனாய நாஸே அத்தனோபி நாஸோ ஸியா. கிம் காரணந்தி சே? சேதனாய அனஞ்ஞத்தா.

அதா²பி ப⁴வதோ அதி⁴ப்பாயோ ஏவம் ஸியா, அத்தனோ பன நாஸோ ந ப⁴வதி நிச்சத்தா, சேதனாயயேவ நாஸோ ப⁴வதீதி? வுச்சதே – அத்தனோ அனாஸே ஸதி சேதனாயபி நாஸோ ந ப⁴வதி. கிம் காரணந்தி சே? சேதனாய அனஞ்ஞத்தா. சேதனத்தானம் அனஞ்ஞத்தே ஸதி சேதனாயயேவ நாஸோ ப⁴வதி, ந அத்தனோதி அயுத்தமேதம். அத² சேதனாயயேவ வினாஸே விஸேஸகாரணம் நத்தி², அத்தாவ நஸ்ஸது, திட்ட²து சேதனா. அத² சேதனாய நாஸே அத்தனோ நாஸோ ந ப⁴வதீதி சே? சேதனாய அத்தா அஞ்ஞோ ஸியா. அத² அஞ்ஞஸ்ஸ அத்தஸ்ஸ நாஸே ஸதி ஸயம் நாஸோ ந ப⁴வதி, ஏவஞ்ச ஸதி ‘‘சேதனாய அனஞ்ஞோ அத்தா’’தி தவ படிஞ்ஞா ஹீனா. அதா²பி சேதனத்தானம் அனஞ்ஞத்தே ஸதி அத்தனோ அனாஸோ சேதனாயபி அனாஸோ ப⁴வது. அத² ந ப⁴வதி, படிஞ்ஞா ஹீனா. அத² வுத்தப்பகாரதோ விபரீதம் வா ஸியா, அத்தா நஸ்ஸது, சேதனா திட்ட²து. அத² பன ஏவம் ந ப⁴வதீதி சே? அனஞ்ஞத்தபக்க²ம் பரிச்சஜ. அத² பன ந பரிச்சஜஸி, படிஞ்ஞாஹீனோ ப⁴வஸி.

அதா²யம் ப⁴வதோ அதி⁴ப்பாயோ ஸியா ‘‘நாயம் மம அத்தா சேதனாய அனஞ்ஞோ, அஞ்ஞோயேவா’’தி? தத்ர வுச்சதே – இத⁴ பன அஞ்ஞத்தம் து³வித⁴ம் ஹோதி லக்க²ணகதமஞ்ஞத்தஞ்ச தே³ஸந்தரகதமஞ்ஞத்தஞ்சாதி. தத்த² கிம் த்வம் சேதனத்தானம் லக்க²ணகதமஞ்ஞத்தம் வதே³ஸி, உதா³ஹு தே³ஸந்தரகதமஞ்ஞத்தந்தி? அஹம் லக்க²ணகதமஞ்ஞத்தம் வதா³மீதி. யதா² ஹி ரூபரஸக³ந்தா⁴தீ³னமேகதே³ஸே வத்தமானானம்பி லக்க²ணதோ அஞ்ஞத்தம் ஹோதி, ஏவம் சேதனத்தானமேகதே³ஸே வத்தமானானம்பி லக்க²ணதோ அஞ்ஞத்தம் ஹோதி, தஸ்மா லக்க²ணகதமஞ்ஞத்தம் வதா³மீதி. தத்ர வுச்சதே – யதா² ஹி ஜாதவேத³ஸ்ஸ ட³ய்ஹமானே ஆமகஸங்க⁴டே ஆமகவண்ணவினாஸே ரஸாதீ³னம் வினாஸோ ப⁴வதி, ததே²வ சேதனாய வினாஸே அத்தனோபி வினாஸோ ஸியா. கிம் காரணந்தி சே? ரூபரஸாதீ³னம் விய ஏகதே³ஸத்தாதி.

அதே²வம் ப⁴வதோ மதி ஸியா ‘‘ஏகதே³ஸத்தே ஸதிபி அத்தனோ பன நாஸோ ந ப⁴வதி, சேதனாயயேவ வினாஸோ ப⁴வதீ’’தி? அத்ர வுச்சதே – அத்தனோ அனாஸே சேதனாயபி அனாஸோவ ஹோதி. கிம் காரணந்தி சே? ரூபரஸாதீ³னம் விய அவினிப்³போ⁴க³தோ. அத² ஸமானே ஏகதே³ஸத்தே அவினிப்³போ⁴க³பா⁴வேபி கேன ஹேதுனா சேதனாய ஏவ நாஸோ ப⁴வதி, ந பன அத்தனோ. அத² விஸேஸகாரணம் நத்தி², தவ லத்³தி⁴யா அத்தாவ நஸ்ஸது, திட்ட²து சேதனா. அத² சேதனாய நாஸே அத்தனோ நாஸோ ந ப⁴வதி, உபி⁴ன்னம் ஏகதே³ஸதா நத்தி². ஏவஞ்ச ஸதி கோ தோ³ஸோதி சே? யம் பன தயா வுத்தம், யதா² ரூபரஸக³ந்தா⁴தீ³னம் ஏகதே³ஸே வத்தமானானம்பி லக்க²ணதோ அஞ்ஞத்தம், ததா² சேதனத்தானமேகதே³ஸே வத்தமானானம்பி லக்க²ணதோ அஞ்ஞத்தந்தி? தமயுத்தந்தி தவ படிஞ்ஞா ஹீனா. அத² ரூபரஸாதீ³னம் விய ஸமானேபி ஏகதே³ஸத்தே யதி³ அத்தனோ அனாஸே சேதனாயபி அனாஸோ ந ப⁴வதி, படிஞ்ஞாஹீனோ அஸி. அத² வுத்தப்பகாரதோ விபரீதம் வா ஸியா, தவ அத்தா நஸ்ஸது, சேதனா திட்ட²து. அதே²வம் ந ப⁴வதீதி சே? ஏகதே³ஸதாவ நத்தீ²தி.

அத² தே³ஸந்தரகதமஞ்ஞத்தம் வதே³ஸி, சேதனத்தானம் அஞ்ஞத்தே ஸதி க⁴டபடஸகடகே³ஹாதீ³னம் விய அஞ்ஞத்தம் ஸியா. சேதனாய வினா அனஞ்ஞதா தே அத்தா ந க⁴டேன வினா படோ விய அஞ்ஞோ ஸியா. அஞ்ஞோ ச ஹி க⁴டோ அஞ்ஞோ ச படோதி? ந, ஏவஞ்ச ஸதி கோ தோ³ஸோதி சே? ‘‘அசேதனோ அத்தா’’தி புப்³பே³ வுத்ததோ³ஸதோ ந பரிமுச்சதீதி. தஸ்மா பரமத்த²தோ ந கோசி கத்தா வா வேத³கோ வா அத்தா அத்தீ²தி த³ட்ட²ப்³ப³ந்தி.

யதி³ ஏவம் அத² கஸ்மா ப⁴க³வதா –

779. ‘‘அஸ்மா லோகா பரம் லோகம்,

ஸோ ச ஸந்தா⁴வதீ நரோ;

ஸோ ச கரோதி வேதே³தி,

ஸுக²து³க்க²ம் ஸயம்கத’’ந்தி ச.

780. ‘‘ஸத்தோ ஸம்ஸாரமாபன்னோ,

து³க்க²மஸ்ஸ மஹப்³ப⁴யம்;

அத்தி² மாதா அத்தி² பிதா,

அத்தி² ஸத்தோபபாதிகோ’’தி ச.

781. ‘‘பா⁴ரா ஹவே பஞ்சக்க²ந்தா⁴,

பா⁴ரஹாரோ ச புக்³க³லோ;

பா⁴ராதா³னம் து³க்க²ம் லோகே,

பா⁴ரனிக்கே²பனம் ஸுக²’’ந்தி ச.

782. ‘‘யஞ்ஹி கரோதி புரிஸோ,

காயேன வாசா உத³ சேதஸா;

தஞ்ஹி தஸ்ஸ ஸகம் ஹோதி,

தஞ்ச ஆதா³ய க³ச்ச²தீ’’தி ச.

783. ‘‘ஏகஸ்ஸேகேன கப்பேன,

புக்³க³லஸ்ஸட்டி²ஸஞ்சயோ;

ஸியா பப்³ப³தஸமோ ராஸி,

இதி வுத்தம் மஹேஸினா’’தி ச.

784. ‘‘அஸத்³தோ⁴ அகதஞ்ஞூ ச,

ஸந்தி⁴ச்சே²தோ³ ச யோ நரோ;

ஹதாவகாஸோ வந்தாஸோ,

ஸ வே உத்தமபோரிஸோ’’தி ச. –

வுத்தந்தி. ஸச்சம் ஏவம் வுத்தம் ப⁴க³வதா, தஞ்ச கோ² ஸம்முதிவஸேன, ந பரமத்த²தோ. நனு ப⁴க³வதா இத³ம்பி வுத்தம் –

785. ‘‘கிம் நு ஸத்தோதி பச்சேஸி, மார தி³ட்டி²க³தம் நு தே;

ஸுத்³த⁴ஸங்கா²ரபுஞ்ஜோயம், நயித⁴ ஸத்துபலப்³ப⁴தீ’’தி ச.

786. ‘‘யதா²பி அங்க³ஸம்பா⁴ரா,

ஹோதி ஸத்³தோ³ ரதோ² இதி;

ஏவம் க²ந்தே⁴ஸு ஸந்தேஸு,

ஹோதி ஸத்தோதி ஸம்முதீ’’தி ச.

தஸ்மா ந வசனமத்தமேவாவலம்பி³தப்³ப³ம், ந ச த³ள்ஹமூள்ஹகா³ஹினா ச ப⁴விதப்³ப³ம், க³ருகுலமுபஸேவித்வா ஸுத்தபதா³னம் அதி⁴ப்பாயோ ஜானிதப்³போ³, ஸுத்தபதே³ஸு அபி⁴யோகோ³ காதப்³போ³. த்³வே ஸச்சானி ப⁴க³வதா வுத்தானி – ‘‘ஸம்முதிஸச்சம், பரமத்த²ஸச்சஞ்சா’’தி. தஸ்மா த்³வேபி ஸம்முதிபரமத்த²ஸச்சானி அஸங்கரதோ ஞாதப்³பா³னி. ஏவம் அஸங்கரதோ ஞத்வா கோசி காரகோ வா வேத³கோ வா நிச்சோ து⁴வோ அத்தா பரமத்த²தோ நத்தீ²தி உபபரிக்கி²த்வா பச்சயஸாமக்³கி³யா த⁴ம்மானம் பவத்திம் ஸல்லக்கே²த்வா பண்டி³தேன குலபுத்தேன அத்த²காமேன து³க்க²ஸ்ஸந்தகிரியாய படிபஜ்ஜிதப்³ப³ந்தி.

787. யோ இமம் க³ந்த²ம் அச்சந்தம், சிந்தேதி ஸததம்பி ஸோ;

கமேன பரமா பஞ்ஞா, தஸ்ஸ க³ச்ச²தி வேபுலம்.

788. அதிமதிகரமாதி⁴னீஹரம்,

விமதிவினாஸகரம் பியக்கரம்;

பட²தி ஸுணதி யோ ஸதா³ இமம்,

விகஸதி தஸ்ஸ மதீத⁴ பி⁴க்கு²னோ.

இதி அபி⁴த⁴ம்மாவதாரே காரகபடிவேத⁴னித்³தே³ஸோ நாம

தேரஸமோ பரிச்சே²தோ³.