6. ச²ட்டோ² பரிச்சே²தோ³

ஆரம்மணவிபா⁴க³வண்ணனா

291. ஏதேஸம் பன சித்தானம், ஆரம்மணமிதோ பரம்;

த³ஸ்ஸயிஸ்ஸாமஹம் தேன, வினா நத்தி² ஹி ஸம்ப⁴வோ.

இதோ பரம் இதோ பரிச்சே²த³தோ பரம் அஹம் ஏதேஸம் பன சித்தானம் ஆரம்மணம் த³ஸ்ஸயிஸ்ஸாமி. ஹி கஸ்மா? தேன வினா தம் ஆரம்மணம் வஜ்ஜேத்வா சித்தானம் ஸம்ப⁴வோ நத்தி² யஸ்மா காரணா, தஸ்மா காரணா த³ஸ்ஸயிஸ்ஸாமி.

292. ரூபம் ஸத்³த³ம் க³ந்த⁴ம் ரஸம், போ²ட்ட²ப்³ப³ம் த⁴ம்மமேவ ச;

ச²தா⁴ ஆரம்மணம் ஆஹு, ச²ளாரம்மணகோவிதா³.

ச²ளாரம்மணேஸு சே²கா பண்டி³தா ஆரம்மணம் ச²தா⁴ ச²ப்பகாரம் ஆஹு கதே²ஸும்.

293. தத்த² பூ⁴தே உபாதா³ய. தத்த² தேஸு ஆரம்மணேஸு பூ⁴தே உபாதா³ய பூ⁴தே படிச்ச வண்ணோ சதுஸமுட்டி²தோ கம்மசித்தஉதுஆஹாரஸங்கா²தேஹி சதூஹி பச்சயேஹி ஸமுட்டி²தோ நிப்³ப³த்தோ நித³ஸ்ஸனேன ஸஹ பவத்தோ படிகே⁴ன ஸஹ பவத்தோ ரூபாரம்மணஸஞ்ஞிதோ.

294. து³விதோ⁴பி ஸமுத்³தி³ட்டோ², ஸத்³தோ³ சித்தோதுஸம்ப⁴வோ ஸத்³தோ³ து³விதோ⁴பி முனினா ஸமுத்³தி³ட்டோ² சித்தோதுஸம்ப⁴வோ, ஸவிஞ்ஞாணகஸத்³தோ³வ சித்தஸமுட்டி²தோ ஹோதி. கத²ம்? வசீபே⁴த³கசித்தேன பூ⁴தாய ஜாதாய பூ⁴மியா பத²வீதா⁴துயா விகாரதா பத²வீலக்க²ணபா⁴வதோ அதித²த்³த⁴லக்க²ணதா விகாரதா நாம. ஸா வசீவிஞ்ஞத்தி விஞ்ஞாயதீதி விஞ்ஞத்தியா உபாதி³ண்ணக⁴ட்டனஸ்ஸ கம்மஜபத²வீதா⁴துயா க⁴ட்டனஸ்ஸ காரணம் சித்தஜபத²வீதா⁴துயா கம்மஜபத²வீதா⁴துயா க⁴ட்டனஞ்ச ஸத்³தோ³ ச அபுப்³ப³ம் அசரிமம் ஹோதி.

295. அவிஞ்ஞாணகஸத்³தோ³ யோ ஸோ அவிஞ்ஞாணகஸத்³தோ³ உதுஸமுட்டி²தோ ஹோதி. அயம் து³விதோ⁴பி ஸத்³தோ³ ஸத்³தா³ரம்மணதம் க³தோ ஸத்³தா³ரம்மணபா⁴வம் பத்தோ.

296. த⁴ரீயதீதி க³ச்ச²ந்தோ க³ச்ச²ந்தோ ஜனேஹி த⁴ரீயதேதி க³ந்தோ⁴. க³மு ஸப்ப க³திம்ஹி, த⁴ர தா⁴ரணே. ஸூசனதோ அத்தனோ ஸாதா⁴ரணஸ்ஸ புப்பா²தி³னோ வத்து²ஸ்ஸ பகாஸனதோபி வா க³ந்தோ⁴ நாம. க³ந்த⁴ ஸூசனே. அயம் க³ந்தோ⁴ சதூஹி ஸமுட்டா²னம் ஏதஸ்ஸாதி சதுஸமுட்டா²னோ. க³ந்தா⁴ரம்மணஸம்மதோ.

297. ரஸமானா ரஸந்தீதி, ரஸோதி பரிகித்திதோ ஜனா ரஸமானா யம் த⁴ம்மஜாதம் ரஸந்தி அனுப⁴வந்தி, இதி யஸ்மா காரணா, தஸ்மா காரணா ரஸோ இதி ரஸோ நாம பண்டி³தேஹி பரிகித்திதோ, ஸோ ரஸோ சதுஸம்பூ⁴தோ ரஸாரம்மணனாமகோ.

298. பு²ஸீயதீதி போ²ட்ட²ப்³ப³ம் யம் த⁴ம்மஜாதம் ஜனேஹி பு²ஸீயதீதி தஸ்மா போ²ட்ட²ப்³ப³ம், பத²வீதேஜவாயவோ. தம் போ²ட்ட²ப்³ப³ம் சதுஸம்பூ⁴தம் போ²ட்ட²ப்³பா³ரம்மணம் மதம்.

299. ஸப்³ப³ம் நாமஞ்ச ரூபஞ்ச, ஹித்வா ரூபாதி³பஞ்சகம் ரூபாதி³பஞ்சகம் ஹித்வா ஸப்³ப³ம் நாமஞ்ச சித்தசேதஸிகனிப்³பா³னனாமஞ்ச ரூபஞ்ச பஞ்சபஸாத³ஸுகு²மரூபஞ்ச லக்க²ணானி ச அனிச்சது³க்க²அனத்தலக்க²ணானி ச பஞ்ஞத்தி ச த⁴ம்மாரம்மணஸஞ்ஞிதம்.

300. சா²ரம்மணானி லப்³ப⁴ந்தி, காமாவசரபூ⁴மியம் காமாவசரபூ⁴மியம் சா²ரம்மணானி லப்³ப⁴ந்தி. தீணி ரூபாவசரே ரூபஸத்³த³த⁴ம்மாரம்மணவஸேன லப்³ப⁴ந்தி. அரூபே பன ஏகேகம் த⁴ம்மாரம்மணம் லப்³ப⁴தி.

301-3. க²ணவத்து²பரித்தத்தா, ஆபாத²ம் ந வஜந்தி யே யே ரூபாத³யோ பஞ்ச விஸயா க²ணவத்து²பரித்தத்தா பஞ்சாரம்மணானம் க²ணஸ்ஸ பரித்தத்தா மந்த³த்தா தேஸம் அப்பாயுகத்தா வத்து²பரித்தத்தா பஞ்சாரம்மணானம் அதிகு²த்³த³கவத்து²கத்தா ஆபாத²ம் பஞ்சத்³வாரேஸு பாகடபா⁴வம் ந வஜந்தி, பஞ்சபஸாதே³ஸு க⁴ட்டனகிச்சம் ந ஸாதே⁴ந்தி, தே ரூபாத³யோ பஞ்ச விஸயா த⁴ம்மாரம்மணம் ஹோந்தி. இதி யேஸம் ஏகச்சானம் ஆசரியானம் மதம் ஹோதி. கிராதி அனுஸ்ஸவனத்தே² நிபாதோ. தே படிக்கி²பிதப்³பா³வ தே ஏவம் வாதி³னோ ஏகச்சே ஆசரியா படிக்கி²பிதப்³பா³, மயா படிஸேதி⁴தப்³பா³. கஸ்மா? சக்கு²விஞ்ஞாணம் ஸோதவிஞ்ஞாணஸ்ஸ கோ³சரபூ⁴தம் ஸத்³த³ம் ந படிஅனுபோ⁴தி, ஸோதவிஞ்ஞாணம் சக்கு²விஞ்ஞாணஸ்ஸ கோ³சரபூ⁴தம் ரூபம் ந படிஅனுபோ⁴தி. இதி அஞ்ஞமஞ்ஞஸ்ஸ கோ³சரம் நேவ பச்சனுபோ⁴ந்தானம் தேஸம் பஞ்சன்னம் சக்கு²விஞ்ஞாணாதீ³னம் விஞ்ஞாணானம் தஞ்ச கோ³சரம் மனோதா⁴துமனோவிஞ்ஞாணதா⁴துஸங்கா²தம் ஜவனம் பன பச்சனுபோ⁴தி. இதி வசனஸ்ஸ ப⁴க³வதா வுத்தத்தா படிக்கி²பிதப்³பா³. ரூபாத³யோ பன விஸயா ரூபாதி³பஞ்சாரம்மணானி ஏவ ஹோந்தி.

304-6. தி³ப்³ப³சக்கா²தி³ஞாணானம், ரூபாதீ³னேவ கோ³சரா தானி ரூபாதீ³னி ஏவ கோ³சரா தி³ப்³ப³சக்கா²தி³ஞாணானம் அனாபாத²க³தானம் ஏவ பாகடபா⁴வம் அப்பத்தானேவ. இதிபி வசனம் வுத்தம் ந யுஜ்ஜதி. யம் த⁴ம்மஜாதம் ரூபாரம்மணம் ப⁴வந்தம், தம் த⁴ம்மஜாதம் கத²ம் கேன பகாரேன த⁴ம்மாரம்மணம் ப⁴வேய்ய? ஏவம் ஸதி ரூபாரம்மணஸ்ஸ த⁴ம்மாரம்மணத்தே ஸதி ஏதேஸம் ரூபாரம்மணத⁴ம்மாரம்மணானம் நியமோபி கத²ம் ப⁴வே கேன பகாரேன ப⁴வேய்ய? ஸப்³ப³ம் ஆரம்மணம் ஏதம் ஏதம் ஸப்³ப³ம் ஆரம்மணம் ச²ப்³பி³த⁴ம் ச²ப்பகாரம் ப⁴க³வதா ஸமுதீ³ரிதம். தம் பரித்தத்திகாதீ³னம் வஸேன ப³ஹுப்பகாரேஹி மதம்.

307. ஸப்³போ³ காமவிபாகோ ச ஸப்³போ³ தேவீஸதிகாமவிபாகோ ச க்ரியாஹேதுத்³வயம்பி ச மனோதா⁴துஹஸிதுப்பாத³வஸேன கிரியாஹேதுத்³வயம்பி சாதி பஞ்சவீஸதி சித்துப்பாதா³ ஏகந்தபரித்தாரம்மணா ஏகந்தகாமாவசராரம்மணா ஸியும் ப⁴வேய்யும்.

308-10. இட்டா²தி³பே⁴தா³ பஞ்சேவ, ரூபஸத்³தா³த³யோ பன த்³விபஞ்சன்னம் விஞ்ஞாணானம் படிபாடியா அனுக்கமேன கோ³சரா ஹோந்தி. ரூபாதி³பஞ்சகம் ஸப்³ப³ம், மனோதா⁴துத்தயஸ்ஸ து மனோதா⁴துத்தயஸ்ஸ பன ஸப்³ப³ம் ரூபாதி³பஞ்சகம் ஆரம்மணம் ஹோதி, ஏதேஸம் தேரஸன்னம் பன சித்தானம் ரூபக்க²ந்தோ⁴வ கோ³சரோ ஆரம்மணம் ஹோதி. நாரூபம் நாமம் ஆரம்மணம் ந கரோந்தி. ந ச பஞ்ஞத்திம் பஞ்ஞத்திம் ஆரம்மணம் ந கரோந்தி. நாதீதம் அதீதம் ஆரம்மணம் ந கரோந்தி. ந சனாக³தம் அனாக³தம் ஆரம்மணம் ந கரோந்தி ஏவ. ஹி ஸச்சம் வத்தமானோ கோ³சரோ ஏதேஸம் த்³விபஞ்சவிஞ்ஞாணானம், மனோதா⁴துத்தயஸ்ஸ சாதி தேரஸன்னம் சித்தானம் தம் ஆரம்மணம் வத்தமானம் ஏவ பச்சுப்பன்னம் ஏவ.

311. தேரஸேதானி சித்தானி, ஜாயந்தே காமதா⁴துயம் ஏதானி தேரஸ சித்தானி காமதா⁴துயம் ஜாயந்தி, ரூபாவசரே புஞ்ஞஜானி சக்கு²ஸோதவிஞ்ஞாணஸம்படிச்ச²னானி, கிரியாமனோதா⁴து சாதி சத்தாரி சித்தானி ஜாயந்தி. அரூபிஸு அரூபபூ⁴மீஸு நேவ கிஞ்சிபி ஏகம்பி சித்தம் நேவ ஜாயதி.

312-3. மஹாபாகானமட்ட²ன்னம் அட்ட²ன்னம் மஹாவிபாகானம் பவத்தியம் ச²ஸு த்³வாரேஸு ததா³ரம்மணகிச்சானம் ரூபாதி³ச²பரித்தானி கோ³சரா. ஸந்தீரணத்தயஸ்ஸபி பவத்தியம் பஞ்சத்³வாரே ஸந்தீரணத்தயகிச்சஸ்ஸ, ச²த்³வாரேஸு ததா³லம்ப³ணகிச்சஸ்ஸ ச ரூபாதி³ச²பரித்தானி கோ³சரா. ரூபாத³யோ பரித்தா ச², ஹஸிதுப்பாத³கோ³சரா ஹஸிதுப்பாத³ஸ்ஸ ரூபாத³யோ ச² பரித்தா கோ³சரா ஹோந்தி. பஞ்சத்³வாரே படுப்பன்னா பஞ்சஸு த்³வாரேஸு யே கோ³சரா பச்சுப்பன்னா, மனோத்³வாரே திகாலிகா யே கோ³சரா திகாலிகா தீஸு காலேஸு நியுத்தா.

314-5. து³தியாருப்பசித்தஞ்ச, சதுத்தா²ருப்பமானஸம் குஸலவிபாககிரியாவஸேன ச²ப்³பி³த⁴ம் சித்தம் மஹக்³க³தகோ³சரம் நியதம் நியதாரம்மணம் ஹோதி, தம் ச²ப்³பி³த⁴ம் சித்தம் மஹக்³க³தகோ³சரம் புப்³பே³ அத்தனா அதி⁴க³தஆகாஸானஞ்சாயதனஆகிஞ்சஞ்ஞாயதனகுஸலாரம்மணம், தேஸு த்³வே து³தியசதுத்தா²ருப்பபாகா ‘‘யஸ்ஸ யஸ்ஸ குஸலஜா²னஸ்ஸ யம் யம் ஆரம்மணம் க³ஹேத்வா ப்³ரஹ்மலோகே படிஸந்தி⁴ ஹோதீ’’தி வசனதோ ஸகஸககுஸலஸ்ஸ ஆரம்மணம் ஏவ தேஸம் விபாகானம் ஆரம்மணம் ஹோதி. நிப்³பா³னாரம்மணத்தா ஹி, ஏகந்தேன அனஞ்ஞதோ அட்டா²னாஸவசித்தானம் அப்பமாணோவ நிப்³பா³னம் ஏவ கோ³சரம் ஆரம்மணம் ஹோதி. ஹி கஸ்மா காரணா? நிப்³பா³னாரம்மணத்தா, ந அஞ்ஞதோ ஆரம்மணதோ.

316-320. சத்தாரோ ஞாணஹீனா ச, காமாவசரபுஞ்ஞதோ காமாவசரகுஸலவஸேன சத்தாரோ ஞாணஹீனா ச க்ரியதோ கிரியவஸேன சத்தாரோ ஞாணஹீனா ச த்³வாத³ஸாகுஸலானி ச தே பரித்தாரம்மணா சேவ மஹக்³க³தகோ³சரா ச, தே ந வத்தப்³பா³ ச ஹோந்தி. கஸ்மா? பஞ்ஞத்தாரம்மணத்தா. சத்தாரோ ஞாணஸம்யுத்தா, புஞ்ஞதோ குஸலவஸேன சத்தாரோ ஞாணஸம்பயுத்தா, க்ரியதோ கிரியவஸேன சத்தாரோ ஞாணஸம்பயுத்தா ச ததா² அபி⁴ஞ்ஞாத்³வயஞ்ச கிரியாவோட்ட²ப்³ப³னம்பி ச ஏகாத³ஸன்னம் ஏதேஸம் சித்தானம் கோ³சரோ பரித்தமஹக்³க³தஅப்பமாணவஸேன திவிதோ⁴ ஹோதி. இமே ஏகாத³ஸ ந வத்தப்³பா³பி ஹோந்தி. கஸ்மா? பஞ்ஞத்தாரம்மணத்தா. யானி வுத்தாவஸேஸானி வுத்ததோ சித்ததோ ஸேஸானி யானி சித்தானி, தானி ந வத்தப்³பா³ரம்மணானீதி விபா⁴வினா விஞ்ஞேய்யானி.

பரித்தாரம்மணத்திகம் ஸமத்தம்.

321. து³தியாருப்பசித்தஞ்ச, சதுத்தா²ருப்பமானஸம்;

ச²ப்³பி³த⁴ம் பன ஏகந்தஅதீதாரம்மணம் ஸியா.

322-6. விஞ்ஞாணானம் த்³விபஞ்சன்னம் த்³வின்னம் பஞ்சவிஞ்ஞாணானம், மனோதா⁴துத்தயஸ்ஸ ச தேரஸன்னம் சித்தானம் கோ³சரா ரூபாத³யோ பஞ்ச த⁴ம்மா பச்சுப்பன்னாவ, அட்ட² காமமஹாவிபாகா ததா³ரம்மணகிச்சவஸேன அதீதானாக³தபச்சுப்பன்னகோ³சரா, சுதிகிச்சவஸேன அதீதாரம்மணா, படிஸந்தி⁴ப⁴வங்க³கிச்சவஸேன பச்சுப்பன்னாதீதாரம்மணா. ஸோமனஸ்ஸஸந்தீரணம் ஸந்தீரணகிச்சவஸேன பச்சுப்பன்னாரம்மணம். ததா³ரம்மணகிச்சவஸேன பச்சுப்பன்னானாக³தாதீதாரம்மணம். ஸேஸஸந்தீரணத்³வயம் ஸந்தீரணகிச்சவஸேன பச்சுப்பன்னாரம்மணம், ததா³ரம்மணகிச்சவஸேன பச்சுப்பன்னானாக³தாதீதாரம்மணம், சுதிகிச்சவஸேன அதீதாரம்மணம், படிஸந்தி⁴ப⁴வங்க³கிச்சவஸேன பச்சுப்பன்னாதீதாரம்மணம். ஹஸிதுப்பாத³சித்தம் ஜவனகிச்சவஸேன பச்சுப்பன்னாதீதானாக³தகோ³சரம். இதி ஏதே த்³வாத³ஸ மானஸா பன ஸியாதீதாரம்மணா அதீதாரம்மணா ஸியும். பச்சுப்பன்னானாக³தகோ³சரா பச்சுப்பன்னாரம்மணா அனாக³தாரம்மணா ஸியும். காமே வீஸதி குஸலாகுஸலா க்ரியதோ கிரியவஸேன காமே நவ மானஸா, வோட்ட²ப்³ப³ம் வோட்ட²ப்³ப³னகிச்சவஸேன பச்சுப்பன்னாரம்மணம், ஆவஜ்ஜனகிச்சவஸேன திகாலாரம்மணம். மஹாகிரியமானஸா ஜவனகிச்சவஸேன திகாலாரம்மணா, ஸந்தே பஞ்ஞத்திகாலே நவத்தப்³பா³ரம்மணா. த்³வே அபி⁴ஞ்ஞாமானஸாபி அபி⁴ஞ்ஞாகிச்சவஸேன அதீதாதி³கோ³சரா ஸியும். இமே மானஸா பஞ்ஞத்திகாலேபி ஸந்தே நவத்தப்³பா³ ப⁴வந்தி. ரூபாரூபப⁴வேஸு மயா வுத்ததோ ஸேஸானி ஸப்³பா³னி சித்தானி அதீதாரம்மணாதி³னா அதீதாரம்மணாதி³வஸேன பண்டி³தேன ந வத்தப்³பா³னி ந கதி²தப்³பா³னி ஹோந்தி ஏவ, பஞ்ஞத்தாரம்மணானி ஏவ ஹோந்தீதி அத்தோ².

327. காமதோ ச க்ரியா பஞ்ச காமாவசரவஸேன பஞ்ச கிரியா, ரூபதோ ரூபாவசரவஸேன பஞ்சமீ க்ரியா அபி⁴ஞ்ஞாசித்தம், ஏதேஸம் ச²ன்னம் சித்தானம் நத்தி² கிஞ்சி ஏகம்பி அகோ³சரம் அனாரம்மணம், ஸப்³பா³ரம்மணந்தி அத்தோ². ‘‘பஞ்சமீ க்ரியா’’தி வசனம் அபி⁴ஞ்ஞாசித்தவஸேன வுத்தம். ஸுத்³த⁴ஜா²னஸ்ஸ பஞ்சமரூபகிரியஸ்ஸ பஞ்ஞத்தாரம்மணம் ஏவாதி வேதி³தப்³ப³ம்.

328. நிப்³பா³னஞ்ச சதுப்³பி³த⁴ம் ப²லம், மக்³க³ம் ரூபஞ்ச அரூபம் சித்தசேதஸிகஸங்கா²தம் நாமஞ்ச கோ³சரம் காதும் யானி சித்தானி ஸக்கோந்தி, தானி சித்தானி மே வத³, ஆசரிய, தானி மய்ஹம் கதே²ஹி.

329-30. சத்தாரோ ஞாணஸம்யுத்தா, புஞ்ஞதோ புஞ்ஞவஸேன சத்தாரோ ஞாணஸம்பயுத்தா, க்ரியதோ ததா² கிரியவஸேன சத்தாரோ ஞாணஸம்பயுத்தா, த்³வே அபி⁴ஞ்ஞாமானஸா, கிரியாவோட்ட²ப்³ப³னம்பி சாதி ஏகாத³ஸ சித்தானி நிப்³பா³னஞ்ச ப²லஞ்ச மக்³க³ஞ்ச ரூபஞ்ச அரூபம் நாமஞ்ச கோ³சரம் காதும் ஸக்கோந்தி.

331-4. சித்தேஸு பன ஸப்³பே³ஸு யானி சித்தானி அரஹத்தப²லம் அரஹத்தமக்³க³ம் கோ³சரம் காதும் ஸக்கோந்தி, தானி கதி சித்தானி மே வத³ தானி மய்ஹம் த்வம் கதே²ஹி. ஸப்³பே³ஸு பன சித்தேஸு, ச² ச சித்தானி மே ஸுண, போ⁴ ப⁴த்³த³முக², த்வம் மய்ஹம் வசனம் ஸுணோஹி, ஸப்³பே³ஸு பன சித்தேஸு ச² சித்தானி அரஹத்தப²லம் அரஹத்தமக்³க³ம் கோ³சரம் காதும் ஸக்கோந்தி. சத்தாரோ ஞாணஸம்யுத்தா, கிரியா ச வோட்ட²ப்³ப³னம்பி ச கிரியாபி⁴ஞ்ஞாமனோ சாதி ச² ச சித்தானி கோ³சரம் காதும் ஸக்கோந்தி. புஞ்ஞதோ புஞ்ஞவஸேன சத்தாரோ ஞாணஸம்பயுத்தா, புஞ்ஞதோ புஞ்ஞவஸேன அபி⁴ஞ்ஞாசித்தஞ்ச அரஹத்தப²லம் மக்³க³ம் கோ³சரம் காதும் ந ஸக்கோந்தி.

335-8. அரஹதோ கீ²ணாஸவஸ்ஸ மக்³க³சித்தம் ப²லமானஸம் வா புது²ஜ்ஜனா வா ஸேக்கா² வா விஜானிதும் ந ஸக்கோந்தி. கஸ்மா காரணா? புது²ஜ்ஜனோ ஸோதாபன்னஸ்ஸ மானஸம் ந ஜானாதி, ஸோதாபன்னோ ஸகதா³கா³மிஸ்ஸ மானஸம் ந ஜானாதி, ஸகதா³கா³மீ அனாகா³மிஸ்ஸ மானஸம் ந ஜானாதி, அனாகா³மீ அரஹந்தஸ்ஸ மானஸம் ந ஜானாதி. ஹேட்டி²மோ ஹேட்டி²மோ புக்³க³லோ உபரூபரி டி²தஸ்ஸ புக்³க³லஸ்ஸ மானஸம் நேவ ஜானாதி, உபரூபரி டி²தோ புக்³க³லோபி ஹேட்டி²மஸ்ஸ ஹேட்டி²மஸ்ஸ புக்³க³லஸ்ஸ மானஸம் ஜானாதி.

339-342. யோ த⁴ம்மோ யஸ்ஸ த⁴ம்மஸ்ஸ ஆரம்மணம் ஹோதி, தம் ஆரம்மணம் ஏகம் ஏகம் உத்³த⁴ரித்வா இதோ பரம் பவக்கா²மி. குஸலாரம்மணம் காமே காமே அட்ட²வித⁴ம் குஸலம் அட்ட²வித⁴ஸ்ஸ காமாவசரகுஸலஸ்ஸ ஆரம்மணம் ஹோதி. கத²ம்? புப்³பே³வ கதம் அட்ட²வித⁴ம் மஹாகுஸலம் பச்சா² ஸோமனஸ்ஸஸஹக³தஞாணஸம்பயுத்தசித்தத்³வயேன வா ஸோமனஸ்ஸஸஹக³தஞாணவிப்பயுத்தசித்தத்³வயேன வா உபேக்கா²ஸஹக³தஞாணஸம்பயுத்தத்³வயேன வா உபேக்கா²ஸஹக³தஞாணவிப்பயுத்தத்³வயேன வா அனுஸ்ஸரணகஆலாதீ³ஸு தஸ்ஸ அட்ட²வித⁴ஸ்ஸ குஸலஸ்ஸ ஜவனகிச்சவஸேன ஆரம்மணம் ஹோதி, விப்படிஸாரகாலாதீ³ஸு த்³வாத³ஸவித⁴ஸ்ஸ அகுஸலஸ்ஸ ஆரம்மணம் ஹோதி, குஸலஸ்ஸ அபி⁴ஞ்ஞாமானஸஸ்ஸ ச கிரியஸ்ஸ அபி⁴ஞ்ஞாமானஸஸ்ஸ ச ஆரம்மணம் ஹோதி, ஏகாத³ஸவித⁴ஸ்ஸ காமாவசரவிபாகஸ்ஸ ததா³ரம்மணவஸேன ஆரம்மணம் ஹோதி. ததா² காமக்ரியஸ்ஸாதி ஜவனகிச்சவஸேன ஹஸனஸ்ஸ ஆவஜ்ஜனகிச்சவஸேன வோட்ட²ப்³ப³னஸ்ஸ ஜவனகிச்சவஸேன மஹாகிரியஸ்ஸ ஆரம்மணம் ஹோதி, ஏதேஸம் ச²ன்னம் ராஸீனம் ஆரம்மணம் ஸியா ப⁴வேய்ய. ரூபாவசரபுஞ்ஞானி பஞ்ச ததோ ச²ராஸிதோ காமவிபாகம் வஜ்ஜேத்வா பஞ்சன்னம் ராஸீனம் ஆரம்மணானி ஹோந்தி. ததா³ லோப⁴மூலமோஹமூலவஸேன அத்தனா படிலத்³த⁴ஜா²னானம் அனுஸ்ஸரணகாலே தஸ்ஸ த³ஸவித⁴ஸ்ஸ அகுஸலஸ்ஸ ஆரம்மணம் ஹோதி, திஹேதுகபடிஸந்தி⁴னோ ஸத்தஸ்ஸ ஜா²னதோ பரிஹீனஸ்ஸ ஜா²னம் பச்சவேக்க²தோ ஜா²னாரம்மணம் தோ³மனஸ்ஸயுத்தம் ஹோதி, ததா³ தஸ்ஸ படிக⁴த்³வயஸ்ஸ ஆரம்மணம் ஹோதி. காமக்ரியஸ்ஸாதி ஏகந்தபரித்தாரம்மணானி கிரியாமனோதா⁴துஹஸனானி வஜ்ஜேத்வா ஆவஜ்ஜனகிச்சவஸேன வோட்ட²ப்³ப³னஸ்ஸ, ஜவனகிச்சவஸேன மஹாகிரியஸ்ஸ ச ஆரம்மணம் ஹோதி.

343. ஆருப்பகுஸலஞ்சாபி, தேபூ⁴மகுஸலஸ்ஸ ச மஹாகுஸலஸ்ஸ ச அபி⁴ஞ்ஞாகிச்சவஸேன பஞ்சமரூபகுஸலஸ்ஸ ச து³தியசதுத்த²அரூபகுஸலஸ்ஸ ச தேபூ⁴மகக்ரியஸ்ஸாபி வோட்ட²ப்³ப³னஸ்ஸ மஹாகிரியஸ்ஸ ச அபி⁴ஞ்ஞாகிச்சவஸேன பஞ்சமரூபகிரியஸ்ஸ ச து³தியசதுத்தா²ருப்பகிரியஸ்ஸ ச ஆரம்மணம் ஹோதி, து³தியாருப்பகிரியஸ்ஸ ச பட²மாருப்பகிரியாய ஆரம்மணேன ப⁴விதப்³ப³ம், சதுத்தா²ருப்பகிரியஸ்ஸ ச ததியாருப்பகிரியாய ஆரம்மணேன ப⁴விதப்³ப³ம், ஏவஞ்ச ஸதி கத²ம் பட²மாருப்பகுஸலம் து³தியாருப்பகிரியஸ்ஸ ஆரம்மணம் ஹோதி, ததியாருப்பகுஸலஞ்ச சதுத்தா²ருப்பகிரியஸ்ஸ ஆரம்மணம் ஹோதீதி சே வத்தப்³ப³ம், யதா³ புது²ஜ்ஜனயோகீ³ வா ஸேக்கோ² வா யோகீ³ ரூபஸமாபத்திம் ஸமாபஜ்ஜித்வா ததோ வுட்ட²ஹித்வா ஆகாஸானஞ்சாயதனஸங்கா²தம் பட²மாருப்பஸமாபத்திம் ஸமாபஜ்ஜித்வா வீதராகோ³ ஹுத்வா அத்தனா அதி⁴க³தா ஸமாபத்தியோ க³ஹேத்வா புது²ஜ்ஜனஸேக்க²காலே அத்தனா அனதி⁴க³தம் து³தியம் அரூபஸமாபத்திம் ஸமாபஜ்ஜி, ததா³ கீ²ணாஸவகாலே ஸமாபஜ்ஜிதம் து³தியம் அரூபகிரியம் பட²மாருப்பகுஸலம் ஆரம்மணம் கரோதி, ஏவம் பட²மாருப்பகுஸலம் து³தியாருப்பகிரியஸ்ஸ ஆரம்மணம் ஹோதி.

யதா³ யோகீ³ ரூபஸமாபத்தியோ ஸமாபஜ்ஜித்வா ததோ வுட்ட²ஹித்வா பட²மாருப்பகுஸலம் து³தியாருப்பகுஸலம் ததியாருப்பகுஸலஞ்ச ஸமாபஜ்ஜித்வா கீ²ணாஸவோ ஹுத்வா அத்தனா அதி⁴க³தா ஸமாபத்தியோ க³ஹேத்வா அத்தனா அனதி⁴க³தம் சதுத்த²ம் அரூபஸமாபத்திம் ஸமாபஜ்ஜி, ததா³ சதுத்தா²ருப்பகிரியா ததியாருப்பகுஸலம் ஆரம்மணம் கரோதி, ஏவம் சதுத்தா²ருப்பகிரியஸ்ஸ ததியாருப்பகுஸலம் ஆரம்மணம் ஹோதி, பச்சா² கீ²ணாஸவகாலே ஸமாபஜ்ஜிதா ரூபாரூபஸமாபத்தியோ ஹோந்தி. யதா² ஹோதி, ததா² ஏவ அகுஸலஸ்ஸபி ஆரம்மணம் ஹோதி.

344-7. அரூபாவசரபாகானந்தி ஜாதினித்³தா⁴ரணம், சதுத்த²து³தியானம் அரூபபாகானம்பி ஆரம்மணம் ஹோதி, ‘‘சதுத்த²து³தியான’’ந்தி வத்தப்³பே³ தியானம்-ஸத்³த³ஸ்ஸ லோபம் கத்வா ‘‘சதுத்த²தூ³’’தி வுத்தம், ததா³ த்³வின்னம் அரூபபாகானம் பட²மாருப்பததியாருப்பஜவனானி ஆரம்மணானி ஹோந்தி, ‘‘யஸ்ஸ குஸலஸ்ஸ ஜா²னஸ்ஸ யம் ஆரம்மணம் க³ஹேத்வா ப்³ரஹ்மலோகே படிஸந்தி⁴ ஹோதீ’’தி வசனதோ ஸகஸககுஸலானம் ஆரம்மணபூ⁴தானி ஆகாஸானஞ்சாயதனஆகிஞ்சஞ்ஞாயதனானி தேஸம் து³தியசதுத்தா²ருப்பபாகானம் ஆரம்மணானி ஹோந்தி, ஏவம் அரூபகுஸலம் இமேஸம் அட்ட²ராஸீனம் ஆரம்மணபச்சயோ ஹோதி. அபரியாபன்னபுஞ்ஞம்பி சதுப்³பி³த⁴லோகுத்தரகுஸலம்பி காமாவசரதோ காமாவசரவஸேன குஸலஸ்ஸ ஞாணஸம்பயுத்தமஹாகுஸலஸ்ஸ ச க்ரியஸ்ஸ வோட்ட²ப்³ப³னஸ்ஸ, ஞாணஸம்பயுத்ததோ கிரியஸ்ஸ ச ரூபதோ ரூபாவசரவஸேன பஞ்சமஸ்ஸ ரூபகுஸலஸ்ஸ ச பஞ்சமஸ்ஸ ரூபகிரியஸ்ஸ சாதி சதுன்னம் ராஸீனம் ஆரம்மணம் ஸதா³ ஹோதி, அயமேத்த² அதி⁴ப்பாயோ – ஸேக்கா²னம் ஞாணஸம்பயுத்தமஹாகுஸலஸ்ஸ, வோட்ட²ப்³ப³னஸ்ஸ, பஞ்சமஸ்ஸ ரூபகுஸலஸ்ஸ ச திவித⁴ம் லோகுத்தரபுஞ்ஞம் ஆரம்மணம் ஹோதி. கீ²ணாஸவஸ்ஸ வோட்ட²ப்³ப³னஸ்ஸ, ஞாணஸம்பயுத்தமஹாகிரியஸ்ஸ, பஞ்சமஸ்ஸ ரூபகிரியஸ்ஸ ச அரஹத்தபுஞ்ஞம் ஆரம்மணம் ஹோதி. யதா² ததா² ஏவ ஸப்³ப³ம் அகுஸலம் காமாவசரதோ காமாவசரவஸேன குஸலஸ்ஸ மஹாகுஸலஸ்ஸ, க்ரியஸ்ஸ ஹஸனவோட்ட²ப்³ப³னமஹாகிரியஸ்ஸ ச ரூபாவசரதோ பன ரூபாவசரவஸேன பஞ்சமஸ்ஸ ரூபகுஸலஸ்ஸ, பஞ்சமஸ்ஸ ரூபகிரியஸ்ஸ ச ஆரம்மணம் ஹோதி, யதா² ததா² ஏவ ஸப்³ப³ஸ்ஸ அகுஸலஸ்ஸ ச காமாவசரவிபாகானம் ததா³ரம்மணகிச்சவஸேன ஏகாத³ஸன்னஞ்சாதி ச²ன்னம் ராஸீனம் ஆரம்மணம் ப⁴க³வதா ஈரிதம்.

348-352. விபாகாரம்மணம் காமே ஸப்³ப³ம் விபாகாரம்மணம் காமாவசரதோபி காமாவசரவஸேனபி குஸலஸ்ஸ மஹாகுஸலஸ்ஸ, க்ரியஸ்ஸ ஹஸனவோட்ட²ப்³ப³னமஹாகிரியஸ்ஸ ச ரூபாவசரதோ சேவ ரூபாவசரவஸேன ச ஏவ பஞ்சமஸ்ஸ ரூபகுஸலஸ்ஸ, பஞ்சமஸ்ஸ ரூபகிரியஸ்ஸ ச காமாவசரபாகானம் காமாவசரவிபாகானம் ஏகாத³ஸன்னஞ்ச ததே²வ அகுஸலஸ்ஸ ச ச²ன்னம் ராஸீனம் ஆரம்மணம் ஹோதி. ரூபே விபாகாரம்மணம் காமாவசரதோபி ச காமாவசரவஸேனபி ச குஸலஸ்ஸ மஹாகுஸலஸ்ஸ, க்ரியஸ்ஸ ச வோட்ட²ப்³ப³னமஹாகிரியஸ்ஸ ச ரூபாவசரதோ சேவ ரூபாவசரவஸேன ச ஏவ குஸலஸ்ஸ ச அபுஞ்ஞஸ்ஸ சாதி பஞ்சன்னம் ராஸீனம் கோ³சரோ ஹோதி, அரூபாவசரபாகேஸு அயம் நயோ ப⁴க³வதா மதோ. வட்டே ந பரியாபன்னா நப்பவிட்டா²தி அபரியாபன்னா, தேஸம் புக்³க³லானம் பாகாபி காமதோ காமாவசரவஸேன குஸலஸ்ஸ ஞாணஸம்பயுத்தமஹாகுஸலஸ்ஸ, க்ரியஸ்ஸ ச வோட்ட²ப்³ப³னஞாணஸம்பயுத்தமஹாகிரியஸ்ஸ ச ரூபதோபி ரூபாவசரவஸேனபி குஸலஸ்ஸ பஞ்சமஸ்ஸ ரூபகுஸலஸ்ஸ, க்ரியஸ்ஸ ச பஞ்சமஸ்ஸ ரூபகிரியஸ்ஸ ச ஏவம் ஆரம்மணம் ஹோதீதி. ஏத்தா²யமதி⁴ப்பாயோ அபரியாபன்னபுஞ்ஞே வுத்தனயேனேவ வேதி³தப்³போ³.

353-6. காமே இத³ம் ஸப்³ப³கிரியசித்தம் காமாவசரதோபி ச காமாவசரவஸேனபி ச குஸலஸ்ஸ மஹாகுஸலஸ்ஸ, க்ரியஸ்ஸ ச ஹஸனவோட்ட²ப்³ப³னமஹாகிரியஸ்ஸ ச ரூபாவசரதோ சேவ ரூபாவசரவஸேன ச ஏவ குஸலஸ்ஸ பஞ்சமஸ்ஸ ரூபகுஸலஸ்ஸ, க்ரியஸ்ஸ ச பஞ்சமஸ்ஸ ரூபகிரியஸ்ஸ ச ஏகாத³ஸகாமாவசரபாகஸ்ஸ ச ததே²வ அகுஸலஸ்ஸ ச ஏதேஸம் ச²ன்னம் ராஸீனம் ஆரம்மணம் ஹோதி. யம் க்ரியாமானஸம் ரூபே ரூபாவசரே யம் கிரியாமானஸம், காமபாகம் ததோ வினா ததோ ராஸிதோ காமபாகம் வினா வஜ்ஜேத்வா பஞ்சன்னம் பன ராஸீனம் ஆரம்மணம் ஹோதி. காமாவசரதோ காமாவசரவஸேன கிரியஸ்ஸ வோட்ட²ப்³ப³னமஹாகிரியஸ்ஸ ஆரம்மணம் ஹோதி, ஹஸனம் ஏகந்தபரித்தாரம்மணத்தா ரூபகிரியம் ஆரம்மணம் ந கரோதி. க்ரியாசித்தம் பனாருப்பே அரூபகிரியாசித்தம் பன தேஸம் பஞ்சன்னம் ஏவ ச ராஸீனம் ஆருப்பக்ரியஸ்ஸாபி பட²மாருப்பகிரியம் து³தியாருப்பகிரியஸ்ஸ ஆரம்மணம் ஹோதி, ததியாருப்பகிரியம் சதுத்தா²ருப்பகிரியஸ்ஸ ஆரம்மணம் ஹோதி. இதி ச²ன்னம் ராஸீனம் கோ³சரோ ஹோதியேவ.

357-8. ரூபம் சதுஸமுட்டா²னம், ரூபாரம்மணஸஞ்ஞிதம்;

காமாவசரபுஞ்ஞஸ்ஸ, ததே²வ குஸலஸ்ஸ ச;

அபி⁴ஞ்ஞாத்³வயசித்தஸ்ஸ, காமபாகக்ரியஸ்ஸ ச.

த்³விசக்கு²விஞ்ஞாணமனோதா⁴துத்³வயஸந்தீரணத்தயமஹாபாகஸ்ஸ ச காமகிரியஸ்ஸ சாதி ஏகாத³ஸவித⁴ஸ்ஸ காமகிரியஸ்ஸ ச ச²ன்னம் ஏதேஸம் ராஸீனம் ஆரம்மணபச்சயோ ஹோதி.

359-360. நிப்³பா³னாரம்மணம் காமரூபாவசரதோ காமரூபாவசரவஸேன ஸேக்கா²னம் ஞாணஸம்பயுத்தமஹாகுஸலஸ்ஸ, ரூபாவசரவஸேன பஞ்சமஸ்ஸ ரூபகுஸலஸ்ஸ ச காமரூபகிரியஸ்ஸ ச கீ²ணாஸவானம் வோட்ட²ப்³ப³னஞாணஸம்பயுத்தமஹாகிரியஸ்ஸ ச பஞ்சமரூபகிரியஸ்ஸ ச உப⁴யஸ்ஸாபி சித்தஸ்ஸ ஆரம்மணம் ஹோதி. அபரியாபன்னதோ சேவ லோகுத்தரவஸேன ச ஏவ ப²லஸ்ஸ, குஸலஸ்ஸ ச ஏதேஸம் ச²ன்னம் ராஸீனம் ஆரம்மணபச்சயோ ஹோதி.

361-2. நானப்பகாரகம் ஸப்³ப³ம், பஞ்ஞத்தாரம்மணம் பன தேபூ⁴மகஸ்ஸ புஞ்ஞஸ்ஸ மஹாகுஸலஸ்ஸ, ஸுத்³த⁴ஜா²னஸ்ஸ பஞ்சவித⁴ஸ்ஸ ரூபகுஸலஸ்ஸ, பட²மாருப்பததியாருப்பகுஸலஸ்ஸ ச ததே²வ அகுஸலஸ்ஸ ச ரூபாரூபவிபாகஸ்ஸ ஸப்³ப³ஸ்ஸ ரூபவிபாகஸ்ஸ, பட²மாருப்பததியாருப்பவிபாகஸ்ஸ ச தேபூ⁴மகக்ரியஸ்ஸ ச ஹஸனவோட்ட²ப்³ப³னமஹாகிரியஸ்ஸ ஸப்³ப³ஸ்ஸ ரூபகிரியஸ்ஸ, பட²மாருப்பததியாருப்பகிரியஸ்ஸ சாதி நவன்னம் பன ராஸீனம் ஆரம்மணபச்சயோ ஹோதி.

363-4. ரூபாரம்மணிகா த்³வே து த்³வே சித்துப்பாதா³ ரூபாரம்மணிகா, த்³வே த்³வே ஸத்³தா³தி³கோ³சரா த்³வே த்³வே சித்துப்பாதா³ ஸத்³தா³ரம்மணாதி³கோ³சரா, தயோ மனோதா⁴துஸங்கா²தா சித்துப்பாதா³ பஞ்சாரம்மணிகா நாம மதா ப⁴க³வதா. இத⁴ இமஸ்மிம் காமாவசராதி⁴காரே ஏகசத்தாலீஸேவ சித்துப்பாதா³ ச²ளாரம்மணிகா மதா. அயம் காமாவசரசித்தானம் ஆரம்மணக்கமோ.

365-9. பஞ்சாபி⁴ஞ்ஞா விவஜ்ஜேத்வா, ரூபாரூபா அனாஸவா இமே ஸப்³பே³ சித்துப்பாதா³ த⁴ம்மாரம்மணகோ³சரா ஹோந்தி. பட²மாருப்பகுஸலம் து³தியாருப்பசேதஸோ குஸலஸ்ஸ ஆரம்மணம் ஹோதி, து³தியாருப்பசேதஸோ விபாகஸ்ஸ ச ஆரம்மணம் ஹோதி, து³தியாருப்பசேதஸோ கிரியஸ்ஸ ச ஆரம்மணம் ஹோதி. து³தியாருப்பசேதஸோ கிரியஸ்ஸ பட²மாருப்பகுஸலாரம்மணபா⁴வே காரணம் ஹேட்டா² வுத்தமேவ. பட²மாருப்பபாகோயம், து³தியாருப்பசேதஸோ குஸலஸ்ஸ ச து³தியாருப்பசேதஸோ விபாகஸ்ஸ ச து³தியாருப்பசேதஸோ கிரியஸ்ஸ ச ஆரம்மணம் ந ஹோதி. ஹி கஸ்மா? தேஸம் து³தியாருப்பகுஸலவிபாககிரியானம் பட²மாருப்பகுஸலாரம்மணத்தா. பட²மம் து க்ரியாசித்தம் பட²மம் கிரியாசித்தம் பன து³தியாருப்பசேதஸோ புஞ்ஞஸ்ஸ ஆரம்மணம் ந ஹோதி. து³தியாருப்பசேதஸோ விபாகஸ்ஸ ஆரம்மணம் ந ஹோதி. ரூபாரூபப⁴வேஸு ஹி கீ²ணாஸவா விபாகசித்தானி சுதிவஸேன ஸகஸககுஸலானம் ஆரம்மணம் கரோந்தி. பட²மம் து க்ரியாசித்தம் பன து³தியாருப்பசேதஸோ கிரியஸ்ஸ ஆரம்மணம் ஹோதி. இதி ஏவம் இமினா மயா வுத்தப்பகாரேன சித்தானம் ஆரம்மணுப்பத்தி விபா⁴வினா தீ⁴ரேன ஞேய்யா.

370-3. புது²ஜ்ஜனஸ்ஸ ஸேக்க²ஸ்ஸ, அரூபாரம்மணம் த்³விதா⁴ த்³விப்பகாரம் குஸலம் குஸலஸ்ஸ து³தியாருப்பகுஸலஸ்ஸ ஆரம்மணம் ஹோதி, தம் பட²மாருப்பகுஸலம் து³தியாருப்பவிபாகஸ்ஸ ஆரம்மணம் ஸியா ப⁴வேய்ய. கீ²ணாஸவஸ்ஸ பி⁴க்கு²ஸ்ஸ, பட²மாருப்பமானஸம் ஆரம்மணம் திதா⁴ திப்பகாரம் ஹோதி. இதி வசனம் மஹேஸினா வுத்தம். க்ரியஸ்ஸாபி து³தியாருப்பகிரியஸ்ஸாபி பட²மாருப்பகிரியா ஆரம்மணம் ஹோதி. குஸலம்பி பட²மாருப்பகுஸலம்பி து³தியாருப்பகிரியஸ்ஸ ச ஆரம்மணம் ஹோதி. குஸலம் பட²மாருப்பகுஸலம் து³தியாருப்பவிபாகஸ்ஸ ஆரம்மணம் ஹோதி. ஏவம் இமினா மயா வுத்தப்பகாரேன பட²மாருப்பமானஸம் ஆரம்மணம் திதா⁴ ஹோதி. ததியாருப்பசித்தம்பி சதுத்தா²ருப்பசேதஸோ குஸலஸ்ஸ ஆரம்மணம் ஹோதி, சதுத்தா²ருப்பசேதஸோ விபாகஸ்ஸ ச தம் ஆரம்மணம் ஹோதி. ஏவமேவ யதா² பட²மாருப்பமானஸம் ஆரம்மணம் த்³விதா⁴ ஹோதி, ஏவமேவ ததா² ததியாருப்பசித்தம் ஆரம்மணம் த்³விதா⁴ ஹோதி. யதா² பட²மாருப்பமானஸம் ஆரம்மணம் திதா⁴ ஹோதி, ஏவமேவ ததா² ததியாருப்பசித்தம் ஆரம்மணம் திதா⁴ ஸியா.

374. யம் யம் பன இதா⁴ரப்³ப⁴ இத⁴ இமஸ்மிம் அதி⁴காரே யம் யம் கோ³சரம் ஆரப்³ப⁴ படிச்ச யே யே சித்துப்பாதா³ ஜாயந்தி, ஸோ ஸோ கோ³சரோ தேஸஞ்ச தேஸஞ்ச சித்துப்பாதா³னம் ஆரம்மணபச்சயோ ஹோதி.

375. யோ பன நரோ இமஸ்ஸ அபி⁴த⁴ம்மாவதாரஸ்ஸ கிர பாரம் து³த்தரம் இத⁴ இமஸ்மிம் லோகே உத்தரதி, ஸோ நரோ அபி⁴த⁴ம்மமஹண்ணவே பாரம் து³த்தரம் உத்தரம் உத்தரதி ஏவ.

இதி அபி⁴த⁴ம்மாவதாரடீகாய

ஆரம்மணவிபா⁴க³வண்ணனா நிட்டி²தா.

ச²ட்டோ² பரிச்சே²தோ³.