5. பஞ்சமோ பரிச்சே²தோ³

பூ⁴மிபுக்³க³லசித்துப்பத்தினித்³தே³ஸவண்ணனா

182. இதோ பரம் பவக்கா²மி, பு³த்³தி⁴வுத்³தி⁴கரம் நயம்;

சித்தானம் பூ⁴மிஸுப்பத்திம், புக்³க³லானம் வஸேன ச.

அஹம் இதோ பரம் பு³த்³தி⁴வுத்³தி⁴கரம் நயம் மதிவத்³தி⁴கரம் நயம் பவக்கா²மி தே³ஸேஸ்ஸாமி. சித்தானம் பூ⁴மிஸுப்பத்திம் புக்³க³லானம் வஸேன ச பூ⁴மீஸு சித்தானம் உப்பத்திம், புக்³க³லானம் வஸேன பூ⁴மீஸு சித்தானம் உப்பத்திஞ்ச பவக்கா²மி.

183. தே³வா சேவ மனுஸ்ஸா ச, திஸ்ஸோ ச அபாயபூ⁴மியோ ஹோந்தி, க³தியோ பஞ்ச தேஸம் தே³வமனுஸ்ஸதிரச்சா²னபேதனிரயக³தீனம் வஸேன பஞ்ச க³தியோ நித்³தி³ட்டா² ஸத்து²னா த³ஸ்ஸிதா ப⁴க³வதா. தயோ ப⁴வா பன காமரூபாரூபப⁴வவஸேன தயோ ஸத்து²னா நித்³தி³ட்டா² த³ஸ்ஸிதா.

184-5. பூ⁴மியோ தத்த² திம்ஸேவ, தாஸு திம்ஸேவ புக்³க³லா தத்த² தேஸு தீஸு ப⁴வேஸு திம்ஸ ஏவ பூ⁴மியோ ஹோந்தி, தாஸு பூ⁴மீஸு உப்பன்னா புக்³க³லா திம்ஸ ஏவ ஹோந்தி, ஏதாஸு பூ⁴மீஸு உப்பன்னா ஸப்³பே³ ச பன புக்³க³லா படிஸந்தி⁴கசித்தானம் வஸேன ஏகூனவீஸதி ஹோந்தி. படிஸந்தி⁴ ச நாமேஸா ஏஸா படிஸந்தி⁴ ச நாம து³விதா⁴ த்³விப்பகாரா ஸமுதீ³ரிதா ஸத்து²னா கதி²தா.

186. அசித்தகா படிஸந்தி⁴, ஸசித்தகா படிஸந்தி⁴ ச இதி து³விதா⁴ படிஸந்தி⁴ ஹோதி, அஸஞ்ஞிப்³ரஹ்மானம் படிஸந்தி⁴ அசித்தகா ரூபபடிஸந்தி⁴ ஹோதி. ஸேஸா ரூபபடிஸந்தி⁴தோ ஸேஸா ஸசித்தகா ஸசித்தகபடிஸந்தி⁴ ஞேய்யா பண்டி³தேன ஜானிதப்³பா³. ஸா பன ஸசித்தகா படிஸந்தி⁴ ஏகூனவீஸதி ஹோதி.

187. படிஸந்தி⁴வஸேனேவ ஸசித்தகபடிஸந்தி⁴வஸேன ஏவ வீஸதி புக்³க³லா ஹோந்தி. இத⁴ இமஸ்மிம் சித்தாதி⁴காரே சித்தாதி⁴காரத்தா அசித்தகபடிஸந்தி⁴ ரூபபடிஸந்தி⁴ ந ச உத்³த⁴டா ந ச கதி²தா மயா.

188. அஹேதுத்³விதிஹேதூதி, புக்³க³லா திவிதா⁴ ஸியும் அஹேதுகத்³விஹேதுகதிஹேதுகா இதி திவிதா⁴ திப்பகாரா புக்³க³லா ஸியும் ப⁴வேய்யும். அரியா பன புக்³க³லா அட்ட² இதி ஏவம் இமினா மயா வுத்தப்பகாரேன ஸப்³பே³ புக்³க³லா ஏகாத³ஸ ஈரிதா கதி²தா ப⁴க³வதா.

189. பூ⁴மீஸு திம்ஸபூ⁴மீஸு சித்தானம் உப்பத்திம் ஏதேஸம் பன ஸப்³பே³ஸம் புக்³க³லானம் பபே⁴த³தோ பூ⁴மீஸு சித்தானம் உப்பத்திஞ்ச க³ண்ஹதோ க³ண்ஹந்தஸ்ஸ மம வசனம் நிபோ³த⁴த², தும்ஹே ஜானாத² ஸுணாத².

190. தீஸு பூ⁴மீஸு கதி சித்தானி ஜாயந்தி? மே மய்ஹம் வத³ தானி சித்தானி த்வம் கதே²ஹி, ஸப்³பா³ஸு பூ⁴மீஸு சுத்³த³ஸ ஏவ சித்தானி. தம் யதா² –

வோட்ட²ப்³ப³ம் காமபுஞ்ஞஞ்ச, வியுத்தானி ச தி³ட்டி²யா;

உத்³த⁴ச்சஸஹிதஞ்சேவ, ஹோந்தி ஸப்³ப³த்த² சுத்³த³ஸ.

191. ஸதா³ வீஸதி சித்தானி, காமேயேவ ப⁴வே ஸியும் வீஸதி சித்தானி காமேயேவ ப⁴வே ஸதா³ ஸப்³ப³ஸ்மிம் காலே ஸியும் ப⁴வேய்யுந்தி. தம் யதா² –

காமே அட்ட² மஹாபாகா, தோ³மனஸ்ஸத்³வயம்பி ச;

ததா² கா⁴னாதி³விஞ்ஞாணத்தயம் பாகா அபுஞ்ஞஜா.

கா⁴னாதி³விஞ்ஞாணத்தயந்தி குஸலவிபாககா⁴னாதி³த்தயம். பாகா அபுஞ்ஞஜா அகுஸலதோ ஜாதா அஹேதுகா ஸத்த விபாகா. பஞ்ச ரூபப⁴வேயேவ பஞ்ச சித்தானி ரூபப⁴வேயேவ ப⁴வந்தி. சத்தாரேவ அரூபிஸு சத்தாரி சித்தானி அரூபீஸுயேவ ஹோந்தி. தம் யதா² –

ரூபேவ ரூபபாகா வாருப்பபாகா அரூபிஸு;

நவ மஹக்³க³தா பாகா, ரூபாரூபேவ ஜாயரே.

192. காமரூபப⁴வேஸ்வேவ அட்டா²ரஸ சித்தானி ப⁴வந்தி.

தம் யதா² –

புஞ்ஞரூபானி பஞ்சேவ, புஞ்ஞஜம் ஸம்படிச்ச²னம்;

சக்கு²ஸோதத்³வயம் புஞ்ஞபாகம் ஸந்தீரணத்³வயம்.

புஞ்ஞபாகம் ஹஸிதுப்பாத³மனோதா⁴துக்ரியாபி ச;

அட்டா²ரஸாதி³மக்³கே³ன, பஞ்ச ரூபக்ரியாபி ச;

காமரூபப⁴வேஸ்வேவ, ஏதானேவ ஸதா³ ஸியும்.

த்³வேசத்தாலீஸ சித்தானி, ஹோந்தி தீஸு ப⁴வேஸுபி த்³வேசத்தாலீஸ சித்தானி ஹோந்தி. தம் யதா² –

படிக⁴த்³வயவஜ்ஜிதானி, அபுஞ்ஞானி த³ஸேவ ச;

மஹாபுஞ்ஞானி அட்டே²வ, வோட்ட²ப்³ப³னக்ரியானி ச.

புஞ்ஞாருப்பானி சத்தாரி, ஆருப்பகிரியானி ச;

கனிட்ட²மக்³க³வஜ்ஜானி, ஸத்த லோகுத்தரானி ச;

த்³வேசத்தாலீஸ சித்தானி, ஹோந்தி தீஸு ப⁴வேஸுபி.

193. ட²பேத்வா பன ஸப்³பே³ஸம், சதஸ்ஸோபாயபூ⁴மியோ சதஸ்ஸோ அபாயபூ⁴மியோ ட²பேத்வா வஜ்ஜேத்வா அபாயதோ ஸேஸானம் ஸப்³பே³ஸம் புக்³க³லானம் ச²ப்³பீ³ஸபூ⁴மீஸு தேரஸ ஏவ சித்தானி ஹோந்தி. தம் யதா² –

சதுத்தா²ரூபாவசரம், அனாகா³மிப²லாத³யோ;

மஹாக்ரியா ச ஜாயந்தி, தேரஸாபாயவஜ்ஜிதா.

அனாகா³மிப²லாத³யோதி ஆதி³-ஸத்³தே³ன ஹி அரஹத்தப²லானி க³ஹிதானி.

194. அபரானி சதஸ்ஸோபி, ட²பேத்வாருப்பபூ⁴மியோ சதஸ்ஸோ அரூபபூ⁴மியோ ட²பேத்வா ஸேஸாஸு ச²ப்³பீ³ஸபூ⁴மீஸு அபரானி ச² சித்தானி ஜாயந்தி. தம் யதா² –

மனோதா⁴துக்ரியஞ்சேவ, புஞ்ஞஜம் ஸம்படிச்ச²னம்;

சக்கு²ஸோதத்³வயம் புஞ்ஞபாகம் ஸந்தீரணத்³வயம்;

சே²வ சித்தானி ஜாயந்தி, ததா² உபரிவஜ்ஜிதே.

195. ஸுத்³தா⁴வாஸிகதே³வானம், ட²பேத்வா பஞ்ச பூ⁴மியோ பஞ்ச பூ⁴மியோ ட²பேத்வா பஞ்சவீஸதிபூ⁴மீஸு பஞ்ச சித்தானி ஜாயந்தி. தம் யதா² –

தி³ட்டி²யா ஸம்பயுத்தானம், விசிகிச்சா²யுதம் ததா²;

பஞ்ச ஸப்³ப³த்த² ஜாயந்தி, ஸுத்³தா⁴வாஸவிவஜ்ஜிதே.

196. அபரானி து³வே ஹோந்தி, பஞ்சவீஸதிபூ⁴மிஸு;

ட²பேத்வா நேவஸஞ்ஞஞ்ச, சதஸ்ஸோபாயபூ⁴மியோ.

சதஸ்ஸோபாயபூ⁴மியோ நேவஸஞ்ஞானாஸஞ்ஞஞ்ச ட²பேத்வாயேவ பஞ்சவீஸதிபூ⁴மீஸு அபரானி து³வே சித்தானி ஹோந்தி. தம் யதா² –

ட²பேத்வா நேவஸஞ்ஞஞ்ச, சதஸ்ஸோபாயபூ⁴மியோ;

ஸேஸாஸு ததியாருப்பஜவனம் ஜாயதி த்³வயம்.

197. த்³வேபி சித்தானி ஜாயந்தி, சதுவீஸதிபூ⁴மிஸு சதஸ்ஸோபாயபூ⁴மியோ ஆகிஞ்சஞ்ஞஞ்ச நேவஸஞ்ஞஞ்ச ட²பேத்வா ஸேஸாஸு சதுவீஸதிபூ⁴மீஸு த்³வேபி சித்தானி ஜாயந்தி. தம் யதா² –

சதுத்த²ததியாருப்பம், ட²பேத்வாபாயபூ⁴மியோ;

ஸேஸாஸு து³தியாருப்ப-ஜவனம் ஜாயதி த்³வயம்.

198. அபாயபூ⁴மியோ ஹித்வா சதஸ்ஸோ அபாயபூ⁴மியோ திஸ்ஸோ உபரி அரூபபூ⁴மியோ ஹித்வா ச²ட்³டே³த்வா ஸேஸாஸு தேவீஸதிபூ⁴மீஸு த்³வேயேவ பன சித்தானி ஹோந்தி. தம் யதா² –

அபாயபூ⁴மியோ ஹித்வா, திஸ்ஸோசாருப்பபூ⁴மியோ;

ஸேஸாஸு பட²மாருப்பம், ஜவனத்³வயம் ஜாயதி.

199. அரூபே ச அபாயே ச அட்ட² பூ⁴மியோ ட²பேத்வா ஸேஸாஸு பா³வீஸதிபூ⁴மீஸு ஏகாத³ஸவித⁴ம் சித்தம் ஹோதி. தம் யதா² –

ஸப்³ப³ம் ரூபஞ்ச விபாகம், ட²பேத்வா ஸிதமானஸம்;

ஏகாத³ஸேவ ஜாயதி, அபாயாரூபவஜ்ஜிதே.

200. ஸுத்³தா⁴வாஸே அபாயே ச நவ பூ⁴மியோ ட²பேத்வா ஸேஸாஸு ஏகவீஸாஸு பூ⁴மீஸு நிச்சம்பி சத்தாரோ ஏவ மானஸா ஹோந்தி. தம் யதா² –

ஸோதாபத்திப²லஞ்சேவ, ஸகதா³கா³மிப²லம்பி ச;

ஸகதா³கா³மிமக்³கோ³ ச, ட²பேத்வாபாயஸுத்³த⁴கே;

அனாகா³மிமக்³கோ³ சேவ, ஏகவீஸாஸு ஹோந்தி ஹி.

201. ஏகம் ஸத்தரஸஸ்வேவ, சித்தம் ஜாயதி பூ⁴மிஸு ஸுத்³தா⁴வாஸஅபாயாருப்பபூ⁴மியோ ட²பேத்வா அவஸேஸாஸு ஸத்தரஸஸு பூ⁴மீஸு ஏகம் சித்தம் ஜாயதி. தம் யதா² –

ஸுத்³தா⁴வாஸே அபாயே ச, ட²பேத்வாருப்பபூ⁴மியோ;

ஆதி³மக்³கோ³ ஏகோ ஹோதி, ஸத்தரஸஸு பூ⁴மிஸு.

202. த்³வாத³ஸேவ து ஜாயந்தே, ஏகாத³ஸஸு பூ⁴மிஸு;

ட²பேத்வா பன ஸப்³பா³பி, பூ⁴மியோ ஹி மஹக்³க³தா. –

ஏகூனவீஸதிபூ⁴மியோ ட²பேத்வா ஸேஸாஸு ஏகாத³ஸஸு பூ⁴மீஸு த்³வாத³ஸ சித்தானி ஜாயந்தி. தம் யதா² –

தோ³மனஸ்ஸத்³வயாபுஞ்ஞபாகா ஸத்த ச புஞ்ஞஜம்;

கா⁴னாதி³த்தயம் ஸேஸாஸு, ஹித்வா ஸப்³பா³ மஹக்³க³தா.

203. காமாவசரதே³வானம் வஸேன ச மனுஸ்ஸானம் வஸேன ச ஸத்தஸு காமாவசரபூ⁴மீஸு அட்ட² சித்தானி ஸப்³ப³தா³ ஜாயந்தி. தம் யதா² –

காமே தே³வமனுஸ்ஸானம், மஹாபாகானி ஜாயரே;

ஸதா³ ஸத்தஸு ஏதானி, ஹித்வா தேவீஸ பூ⁴மியோ.

204. பஞ்சமஜ்ஜா²னபாகேகோ, ஜாயதே ச²ஸு பூ⁴மிஸு ஏகோ பஞ்சமஜ்ஜா²னவிபாகோ வேஹப்ப²லாதீ³ஸு ச²ஸு பூ⁴மீஸு ஜாயதி. சத்தாரி பன ரூபவிபாகசித்தானி தீஸு தீஸு பூ⁴மீஸு ஜாயந்தி. அயமேத்தா²தி⁴ப்பாயோ – ஏகோ பட²மரூபவிபாகோ ப்³ரஹ்மபாரிஸஜ்ஜப்³ரஹ்மபுரோஹிதமஹாப்³ரஹ்மானம் தீஸு பூ⁴மீஸு ஜாயதி, ஏகோ து³தியரூபவிபாகோ, ஏகோ ததியரூபவிபாகோ ச பரித்தாபா⁴அப்பமாணாபா⁴ஆப⁴ஸ்ஸரானம் தீஸு பூ⁴மீஸு ஜாயதி, ஏகோ சதுத்த²ரூபவிபாகோ பரித்தஸுப⁴அப்பமாணஸுப⁴ஸுப⁴கிண்ஹானம் தீஸு பூ⁴மீஸு ஜாயதி.

205. சத்தாரி பன சித்தானி, ஹோந்தி ஏகேகபூ⁴மிஸு அரூபாவசரவிபாகானம் வஸேன சத்தாரி பன சித்தானி ஏகேகபூ⁴மீஸு ஏகேகாஸு பூ⁴மீஸு ஹோந்தி, இதி ஏவம் இமினா மயா வுத்தப்பகாரேன ஸப்³பா³ஸு பூ⁴மீஸு சித்துப்பாத³ம் பரிதீ³பயே பண்டி³தோ கதே²ய்ய.

206-7. குஸலாகுஸலா காமே காமே வீஸதி குஸலாகுஸலா, தேஸம் பாகா அஹேதுகா தேஸம் குஸலாகுஸலானம் அஹேதுகா பஞ்சத³ஸ விபாகா ஆவஜ்ஜனத்³வயஞ்ச இதி ஏவம் இமினா மயா வுத்தப்பகாரேன ஸத்ததிம்ஸ மானஸா நரகாதீ³ஸு சதூஸு அபாயேஸுபி ஜாயரே. அவஸேஸானி த்³விபஞ்ஞாஸ சித்தானி கதா³சிபி கிஸ்மிஞ்சி காலேபி நுப்பஜ்ஜந்தி. தம் யதா² –

பஞ்சத³ஸானி ரூபே து, அரூபே த்³வாத³ஸீரிதா;

அட்ட² லோகுத்தரானேவ, காமபாகா ஸஹேதுகா.

அட்ட² மஹாக்ரியா சேவ, ஹஸிதுப்பாத³மானஸம்;

த்³விபஞ்ஞாஸானி சித்தானி, அபாயேஸு ந ஜாயரே.

208. காமே தே³வமனுஸ்ஸானம் காமாவசரே தே³வமனுஸ்ஸானம் மஹக்³க³தா நவ பாகா நேவ ஜாயந்தி, அஸீதி ஹத³யா மானஸா ஸதா³ ஜாயந்தி. தம் யதா² –

த்³வாத³ஸாகுஸலானேவ, குஸலானேகவீஸதி;

ஸத்தவீஸதி பாகா ச, மஹக்³க³தவிவஜ்ஜிதா.

காமே தே³வமனுஸ்ஸானம், க்ரியசித்தானி வீஸதி;

ஹோந்தி அஸீதி சித்தானி, விஞ்ஞேய்யானி விபா⁴வினா.

209-12. காமே காமாவசரே அட்ட² மஹாவிபாகா தோ³மனஸ்ஸத்³வயம்பி ச ததா² கா⁴னாதி³விஞ்ஞாணத்தயம் குஸலவிபாகம் அபுஞ்ஞஜா ஸத்த பாகா. நத்தி² ஆருப்பபாகா ச, ரூபாவசரபூ⁴மியம் அரூபபாகா ச சத்தாரோ ரூபாவசரபூ⁴மியம் நத்தி². அயமேத்தா²தி⁴ப்பாயோ – ரூபாவசரபூ⁴மியம் அட்ட² மஹாவிபாகா காமஸுக³திஸத்தானம் த்³வின்னம் விபாகசித்தத்தா ந ஹோந்தி, ஜா²னேன விக்க²ம்பி⁴தத்தா தோ³மனஸ்ஸத்³வயம்பி நத்தி², கா⁴னஜிவ்ஹாகாயபஸாத³விரஹிதத்தா குஸலவிபாகம் கா⁴னாதி³த்தயம் நத்தி², அனிட்டா²ரம்மணானம் அபா⁴வதோ ஸத்த அகுஸலவிபாகா ச நத்தி², அரூபபாகா ச நத்தி². கஸ்மா? அரூபானம் விபாகசித்தத்தா. இமேஹி ஸஹ சித்தேஹி இமேஹி சதுவீஸதிசித்தேஹி ஸஹ தயோ மக்³கா³ ப²லத்³வயம் ஸோதாபத்திமக்³கோ³ ஸகதா³கா³மிமக்³கோ³ அனாகா³மிமக்³கோ³ ச ஸோதாபத்திப²லஸகதா³கா³மிப²லானி ச சத்தாரோ தி³ட்டி²ஸம்யுத்தா விசிகிச்சா²ஸம்யுத்தம்பி ச சத்தாரோ ஹேட்டி²மா பாகா ச ஸுத்³தா⁴வாஸே ந லப்³ப⁴ரே ந லப்³ப⁴ந்தி. அயமேத்தா²தி⁴ப்பாயோ – புது²ஜ்ஜனஸோதாபன்னஸகதா³கா³மிபுக்³க³லானம் அஸாதா⁴ரணத்தா ஸுத்³தோ⁴ ச ஆவாஸோ, அத² வா கோ⁴ராதிக்கமட்டி²தத்தா அனாகா³மிபுக்³க³லா ஸுத்³தா⁴ நாம, சதுரோக⁴திண்ணத்தா கீ²ணாஸவா ஸுத்³தா⁴ நாம, தேஸம் ஸுத்³தா⁴னம் த்³வின்னம் உத்தமஸத்தானம் ஆவாஸோதிபி ஸுத்³தா⁴வாஸோ, தஸ்மிம்.

அயமேத்தா²தி⁴ப்பாயோ – ஸுத்³தா⁴வாஸே பன ஸோதாபத்திமக்³க³ஸோதாபத்திப²லஸகதா³கா³மிமக்³க³ஸகதா³கா³மிப²லஅனாகா³மிமக்³கா³ ந விஜ்ஜந்தி. கஸ்மாதி சே? அனாகா³மிப²லட்டா²னம்யேவ தஸ்மிம் உப்பஜ்ஜனதோ சத்தாரோ தி³ட்டி²ஸம்யுத்தா ச விசிகிச்சா²யுத்தஞ்ச பஞ்ச அகுஸலசித்தானம் ஸோதாபன்னேன வினாஸிதத்தா, இதி தஸ்மா காரணா ந ஜாயந்தி. சத்தாரோ ஹேட்டி²மவிபாகா ஹேட்டி²மானம் ரூபப்³ரஹ்மானம் விபாகசித்தத்தா நத்தி². ஸேஸானி ஏகபஞ்ஞாஸ சித்தானி ஸுத்³தா⁴வாஸே பன லப்³ப⁴ந்தி. தம் யதா² –

தி³ட்டி²யா விப்பயுத்தானி, உத்³த⁴ச்சஸஹக³தம் ததா²;

காமபுஞ்ஞானி அட்ட² ச, ரூபபுஞ்ஞானி பஞ்ச வா.

அரூபகுஸலானேவ, மக்³கோ³ கீ²ணாஸவஸ்ஸ ச;

சக்கு²ஸோதமனோதா⁴து, புஞ்ஞஜா தீரணா து³வே.

பஞ்சமஜ்ஜா²னபாகோ ச, அனாகா³மிப²லாத³யோ;

ஸுத்³தா⁴வாஸேஸு லப்³ப⁴ந்தி, க்ரியசித்தானி வீஸதி.

ரூபாவசரிகா ஸப்³பே³ ஸப்³பா³னி ரூபாவசரானி பஞ்சத³ஸ சித்தானி, காமதா⁴துயா ஸப்³பே³ தேவீஸதி விபாகா.

213. தோ³மனஸ்ஸாதி³மக்³கோ³ ச தோ³மனஸ்ஸத்³வயஞ்ச ஆதி³மக்³கோ³ ச ஸோதாபத்திமக்³கோ³ ச, க்ரியா ச த்³வே அஹேதுகா பஞ்சத்³வாராவஜ்ஜனஹஸிதுப்பாதா³னி கிரியானி சாதி தேசத்தாலீஸ சித்தானி அரூபபூ⁴மியம் நத்தி². பஞ்ச ரூபாவசரவிபாகா ரூபீனம் விபாகசித்தத்தா நத்தி². ரூபஜவனானி ஹேட்டி²மஜா²னானம் விரத்தத்தா நத்தி². சக்கு²ஸோதவிஞ்ஞாணானி புஞ்ஞஜானி பஸாத³ரஹிதத்தா நத்தி². கா⁴னாதி³விஞ்ஞாணானி பகதியாயேவ நத்தி². குஸலவிபாகா மனோதா⁴து சக்கா²தி³க்³க³ஹிதபஞ்சாரம்மணத்தா அரூபானம் த⁴ம்மாரம்மணத்தா நத்தி², அஸதி சக்கா²தி³விஞ்ஞாணே ஸா ச புஞ்ஞஜா மனோதா⁴து தாய ச அஸதியா சக்கா²தி³விஞ்ஞாணம்பி நத்தி²யேவ. கிரியாமனோதா⁴துபி பஞ்சாரம்மணத்தாயேவ நத்தி², ஹஸிதுப்பாதோ³பி ரூபகாயாபா⁴வா ஸிதஸ்ஸாபா⁴வா நத்தி², புப்³பே³வ தி³ட்ட²ஸச்சா அரியா ரூபபூ⁴மிகா, தஸ்மா ஆதி³மக்³கோ³பி நத்தி².

214. ஏவம் பூ⁴மிவஸேனேவ, சித்துப்பத்திம் விபா⁴வயே ஏவம் இமினா மயா வுத்தப்பகாரேன பூ⁴மிவஸேன சித்துப்பத்திம் விபா⁴வயே தீ⁴ரோ கதே²ய்ய. ததா² ஏவம் ஏகாத³ஸன்னம் புக்³க³லானம் வஸேன சித்துப்பத்திம் தீ⁴ரோ விபா⁴வயே கதே²ய்ய.

215. குஸலாகுஸலா காமே,

தேஸம் பாகா அஹேதுகா;

ஆவஜ்ஜனத்³வயஞ்சாதி,

ஸத்ததிம்ஸேவ மானஸாதி. –

அயம் வுத்தத்தா².

216. ஏவம் சதூஸ்வபாயபூ⁴மீஸு மனுஸ்ஸபூ⁴மியஞ்சாதி பஞ்சபூ⁴மீஸு அஹேதுகஸ்ஸ ஸத்தஸ்ஸ ஜாயந்தே உப்பஜ்ஜந்தி. த்³வேபஞ்ஞாஸாவஸேஸானி, ந ஜாயந்தி கதா³சிபி அவஸேஸானி த்³வேபஞ்ஞாஸ சித்தானி கதா³சிபி ந ஜாயந்தி ந உப்பஜ்ஜந்தி, தானி ஸரூபதோ வுத்தானேவ.

217. அஹேதுகஸ்ஸ ஸத்தஸ்ஸ உப்பஜ்ஜந்தேஹி ஸத்ததிம்ஸசித்தேஹி ஸஹ து³ஹேதுகா, சதுமஹாவிபாகா சாதி சத்தாலீஸ சித்தானி ததா² ஏககம் து³ஹேதுகஸ்ஸ ஸத்தஸ்ஸ ஜாயந்தி.

218-23. ஸப்³பே³ மஹக்³க³தா சேவ ஸப்³பே³ ஸத்தவீஸதிவிதா⁴ மஹக்³க³தா சேவ ஸப்³பே³பி ச அனாஸவா ஸப்³பே³ அட்ட² லோகுத்தரா சேவ சத்தாரோ திஹேதுகவிபாகா ச காமே ஹஸிதுப்பாதோ³ ஸஹேதுகமஹாகிரியா சாதி நவ க்ரியாபி சேதி சத்தாலீஸம் ததா² அட்ட² ச து³ஹேதுனோ ஸத்தஸ்ஸ ந ஜாயந்தி.

அயமேத்தா²தி⁴ப்பாயோ – து³ஹேதுனோ ரூபாரூபஸமாபத்தியா அஸமத்த²தாய ஸத்தவீஸ மஹக்³க³தா ந ஜாயந்தி, மக்³க³ப²லம் அதி⁴க³ந்தும் அஸமத்த²தாய அட்ட² லோகுத்தரா ந ஜாயந்தி, திஹேதுகவிபாகா திஹேதுகானம் ஸத்தானம் விபாகசித்தத்தா ந ஜாயந்தி, நவ கிரியானி கீ²ணாஸவானம்யேவ உப்பஜ்ஜமானத்தா ந ஜாயந்தீதி. காமாவசரஸத்தஸ்ஸ, திஹேதுபடிஸந்தி⁴னோ புது²ஜ்ஜனஸ்ஸ சதுபஞ்ஞாஸ மானஸா ஜாயந்தி. கதமானி தானி? து³ஹேதுகஸ்ஸ வுத்தானி சத்தாலீஸ சித்தானி ததா² ஏகஞ்ச காமதா⁴துயம் சத்தாரோ ஞாணஸம்பயுத்தவிபாகா ரூபாரூபேஸு நவ புஞ்ஞானி சாதி சதுபஞ்ஞாஸ மானஸா ஜாயந்தி. புது²ஜ்ஜனஸ்ஸ திஹேதுனோ காமஸத்தஸ்ஸ பஞ்சதிம்ஸ சித்தானி ந ஜாயரே ந ஜாயந்தி. தம் யதா² –

ஆவஜ்ஜனத்³வயம் ஹித்வா, அட்டா²ரஸ க்ரியாபி ச;

நவ மஹக்³க³தா பாகா, அட்ட² லோகுத்தரானி ச.

காமபுது²ஜ்ஜனஸ்ஸேவ, திஹேதுபடிஸந்தி⁴னோ;

பஞ்சதிம்ஸேவ சித்தானி, ந ஜாயந்தி கதா³சிபி.

ச²தே³வேஸு மனுஸ்ஸேஸு சாதி ஸத்தஸு பூ⁴மீஸு ஜாதஸ்ஸ ஸோதாபன்னஸ்ஸ தே³ஹினோ ஸத்தஸ்ஸ பஞ்ஞாஸ சித்தானி ஜாயந்தி. இதி வசனம் தீ⁴ரோ நித்³தி³ஸே கதே²ய்ய. தம் யதா² –

தி³ட்டி²யா விப்பயுத்தானி, தோ³மனஸ்ஸத்³வயம்பி ச;

உத்³த⁴ச்சஸஹிதஞ்சேவ, காமபுஞ்ஞானி அட்ட² ச.

நவ மஹக்³க³தபுஞ்ஞானி, ஆவஜ்ஜனத்³வயம்பி ச;

ஸப்³பே³ காமவிபாகா ச, ஸோதாபத்திப²லம்பி ச.

அஸ்ஸ ஸோதாபன்னஸ்ஸ நவதிம்ஸேவ சித்தானி ந உப்பஜ்ஜந்தி. இதி வசனம் தீ⁴ரோ தீ³பயே தே³ஸேய்ய. தம் யதா² –

ஆவஜ்ஜனத்³வயம் ஹித்வா, அட்டா²ரஸ க்ரியாபி ச;

நவ மஹக்³க³தா பாகா, ஸத்த லோகுத்தரானி ச.

தி³ட்டி²யா ஸம்பயுத்தானி, விசிகிச்சா²யுதம் ததா²;

நவதிம்ஸ ந ஜாயந்தி, ஸோதாபன்னஸ்ஸ தே³ஹினோ.

224. பட²மம் ப²லம் ட²பேத்வா ஸோதாபன்னஸ்ஸ புக்³க³லஸ்ஸ வுத்தானி சித்தானி அத்தனோ ஸகதா³கா³மினோ ப²லேன ஸகதா³கா³மிப²லேன ஸஹ ஸகதா³கா³மிபுக்³க³லஸ்ஸ ஸியும்.

225. ஸோதாபன்னஸ்ஸ வுத்தானி, ட²பேத்வா படிக⁴த்³வயம் து³தியஞ்ச ப²லம் ஸகதா³கா³மிப²லஞ்ச ஹித்வா அத்தனோ அனாகா³மிப²லேன ஸஹ ஸோதாபன்னஸ்ஸ ஸத்தஸ்ஸ வுத்தானி யானி அட்ட²சத்தாலீஸ சித்தானி அத்தி², தானி அனாகா³மிஸ்ஸ ஸத்தஸ்ஸ ஜாயந்தி. இதி வசனம் தீ⁴ரோ வினித்³தி³ஸே.

226. கதி சித்தானி ஜாயந்தி, காமே அரஹதோ பன காமே ஸத்தஸு காமபூ⁴மீஸு ஜாதஸ்ஸ அரஹதோ கீ²ணாஸவஸ்ஸ கதி சித்தானி ஜாயந்தி? சத்தாரி ச சத்தாரீஸஞ்ச சித்தானி காமே ஸத்தஸு காமபூ⁴மீஸு ஜாதஸ்ஸ அரஹதோ ஸியும் ப⁴வேய்யும். தம் யதா² –

தேவீஸ காமபாகானி, க்ரியசித்தானி வீஸதி;

அரஹத்தப²லேனேவ, காமே அரஹதோ ஸியும்.

227. மக்³க³ட்டா²னம் சதுன்னம்பி தேஸம் புக்³க³லானம் ஸகம் ஸகம் மக்³க³சித்தம் ஸியா ப⁴வேய்ய. ஏகசித்தக்க²ணா ஹி தே ஹி ஸச்சம் தம் மயா வுத்தம் வசனம். தே மக்³கா³ ஏகசித்தக்க²ணா.

228. புது²ஜ்ஜனஸ்ஸ தீஸ்வேவ, பட²மஜ்ஜா²னபூ⁴மிஸு தீஸு ஏவ பட²மஜ்ஜா²னபூ⁴மீஸு ஜாதஸ்ஸ புது²ஜ்ஜனஸ்ஸ ப்³ரஹ்முனோ பஞ்சதிம்ஸ ஏவ சித்தானி ஜாயந்தி. இதி வசனம் தீ⁴ரோ வினித்³தி³ஸே உச்சாரேய்ய. தம் யதா² –

தோ³மனஸ்ஸத்³வயம் ஹித்வா, அபுஞ்ஞானி த³ஸேவ ச;

காமபுஞ்ஞானி அட்டே²வ, நவ புஞ்ஞா மஹக்³க³தா.

சக்கு²ஸோதத்³வயம் புஞ்ஞபாகம் ஸந்தீரணத்³வயம்;

ஆவஜ்ஜனத்³வயஞ்சேவ, புஞ்ஞஜம் ஸம்படிச்ச²னம்;

பட²மஜ்ஜா²னபாகோ ச, பஞ்சதிம்ஸேவ ஜாயரே.

229-234. கா⁴னாதீ³ஸு பஸாதே³ஸு பவத்தம் குஸலவிபாகம் விஞ்ஞாணத்தயம் ஸத்த அபுஞ்ஞஜா பாகா அட்ட² மஹாபாகா ததா² உபரிஜா²னபூ⁴மீஸு ஜாதா பாகா ஆருப்பா சத்தாரோ விபாகாபி ச தோ³மனஸ்ஸத்³வயம்பி ச ஆவஜ்ஜனத்³வயவஜ்ஜா அட்டா²ரஸ க்ரியா சேவ அட்ட² லோகுத்தரானி ச ஏதானி சதுபஞ்ஞாஸ சித்தானி பட²மஜ்ஜா²னபூ⁴மீஸு தீஸு நிப்³ப³த்தஸ்ஸ புது²ஜ்ஜனஸ்ஸ தே³ஹினோ ஸத்தஸ்ஸ ந ச லப்³ப⁴ரே ந லப்³ப⁴ந்தி. தாஸு தீஸு பூ⁴மீஸு நிப்³ப³த்தஸ்ஸ புது²ஜ்ஜனஸ்ஸ ப்³ரஹ்முனோ வுத்தேஸு சித்தேஸு அபுஞ்ஞபஞ்சகம் ஹித்வா தத்த² தீஸு பட²மஜ்ஜா²னபூ⁴மீஸு நிப்³ப³த்தஸ்ஸ ஸோதாபன்னஸ்ஸ ப்³ரஹ்முனோ பட²மப²லேன ஸஹ ஏகதிம்ஸ சித்தானி ஜாயரே ஜாயந்தி. ஸகதா³கா³மினோ தத்த² தீஸு பட²மஜ்ஜா²னபூ⁴மீஸு ஜாதஸ்ஸ ஸகதா³கா³மினோ ப்³ரஹ்முனோ தேஸு சித்தேஸு பட²மம் ப²லம் ட²பேத்வா ஸகதா³கா³மிப²லம் பக்கி²பித்வா ஏகதிம்ஸேவ சித்தானி ஜாயரே. அனாகா³மிஸ்ஸ தத்தே²வ தீஸு பட²மஜ்ஜா²னபூ⁴மீஸு ஏவ ஜாதஸ்ஸ அனாகா³மிஸ்ஸ து³தியம் ப²லம் ட²பேத்வா அத்தனோ ப²லசித்தேன ஸஹ ஏகதிம்ஸேவ சித்தானி ஜாயந்தி.

235. விஞ்ஞாணம் சக்கு²ஸோதானம், புஞ்ஞஜம் ஸம்படிச்ச²னம்;

ஸந்தீரணத்³வயஞ்சேவ, க்ரியசித்தானி வீஸதி.

236-7. அரஹத்தப²லம் பட²மஜ்ஜா²னதோ ஸம்ப⁴வோ பாகோ ஸத்தவீஸதி சித்தானி அரஹந்தஸ்ஸ கீ²ணாஸவஸ்ஸ ஜாயரே. புது²ஜ்ஜனஸ்ஸ தீஸ்வேவ தீஸு ஏவ து³தியஜ்ஜா²னபூ⁴மீஸு ஜாதஸ்ஸ புது²ஜ்ஜனஸ்ஸ ப்³ரஹ்முனோ து³தியஜ்ஜா²னததியஜ்ஜா²னபாகேன ஸஹ ச²த்திம்ஸ சித்தானி ஜாயந்தி. தம் யதா² –

தோ³மனஸ்ஸத்³வயம் ஹித்வா, அபுஞ்ஞானி த³ஸேவ ச;

காமபுஞ்ஞானி அட்டே²வ, நவ புஞ்ஞமஹக்³க³தா.

சக்கு²ஸோதத்³வயம் புஞ்ஞபாகம் ஸந்தீரணத்³வயம்;

ஆவஜ்ஜனத்³வயஞ்சேவ, புஞ்ஞஜம் ஸம்படிச்ச²னம்.

து³தியஜ்ஜா²னபாகேன, ததியஜ்ஜா²னபாகதோ;

ச²த்திம்ஸேவ ச சித்தானி, து³தியஜ்ஜா²னதே³ஹினோ.

238-241. புது²ஜ்ஜனஸ்ஸ வுத்தேஸு, ஹித்வா வாபுஞ்ஞபஞ்சகம் அத்தனோ ப²லேன ஸஹ பா³த்திம்ஸ சித்தானி ஸோதாபன்னஸ்ஸ ஜாயந்தி. ஸோதாபன்னஸ்ஸ வுத்தேஸு, ட²பேத்வா பட²மம் ப²லம் ஸோதாபன்னஸ்ஸ வுத்தேஸு பட²மம் ப²லம் ட²பேத்வா அத்தனோ ப²லசித்தேன ஸஹ பா³த்திம்ஸ சித்தானி, ஸகதா³கா³மிஸ்ஸ வுத்தேஸு து³தியம் ப²லம் ட²பேத்வா அனாகா³மிப²லேன ஸஹ பா³த்திம்ஸேவ சித்தானி அஸ்ஸ அனாகா³மினோ ப⁴வந்தி. அரஹந்தஸ்ஸ தீஸ்வேவ, அட்ட²வீஸதி அத்தனோ தீஸு ஏவ து³தியஜ்ஜா²னபூ⁴மீஸு ஜாதஸ்ஸ அரஹதோ அத்தனோ ப²லேன து³தியஜ்ஜா²னததியஜ்ஜா²னபாகதோ பாகேஹி ஸஹ அட்ட²வீஸதி சித்தானி ஹோந்தி. தம் யதா² –

விஞ்ஞாணம் சக்கு²ஸோதானம், புஞ்ஞஜம் ஸம்படிச்ச²னம்;

ஸந்தீரணத்³வயஞ்சேவ, க்ரியசித்தானி வீஸதி.

அரஹத்தப²லம் பாகோ, து³தியஜ்ஜா²னஸம்ப⁴வோ;

ததியஜ்ஜா²னபாகோ ச, அட்ட²வீஸதி மானஸா.

242-6. பரித்தகஸுபா⁴தீ³னம், தே³வானம் தீஸு பூ⁴மீஸு சதுத்த²ஜ்ஜா²னவிபாகேன ஸஹ பஞ்சதிம்ஸேவ சித்தானி ஜாயந்தி. ஸோதாபன்னஸ்ஸ தத்தே²க-திம்ஸ சித்தானி ஜாயரேதத்த² தாஸு தீஸு பரித்தகஸுபா⁴தீ³னம் பூ⁴மீஸு ஸோதாபன்னஸ்ஸ ச ஏகதிம்ஸ சித்தானி ஜாயரே. யதா² ஏவம் ஸகதா³கா³மினோ ஏகதிம்ஸ சித்தானி ஜாயரே. ததா² அனாகா³மினோ ஏகதிம்ஸ ஜாயரே. தத்தே²வ தாஸு தீஸு பூ⁴மீஸு ஏவ ஜாதஸ்ஸ கீ²ணாஸவஸ்ஸ ஸத்தவீஸதி மானஸா ஹோந்தி, ததா² ஏவம் வேஹப்ப²லே வேஹப்ப²லபூ⁴மியம் ஜாதானம் புது²ஜ்ஜனஸேக்கா²னம் பஞ்சன்னம் ஸப்³பே³ஸம் புக்³க³லானம் மானஸா ஹோந்தி. பஞ்சஸு ஸுத்³தா⁴வாஸிகபூ⁴மீஸு ஜாதஸ்ஸ அனாகா³மினோ ஸத்தஸ்ஸ ஏகதிம்ஸேவ சித்தானி ஹோந்தி. இதி வசனம் தீ⁴ரோ பரிதீ³பயே தே³ஸேய்ய. தத்தே²வ தாஸு ஸுத்³தா⁴வாஸபூ⁴மீஸு ஏவ ஜாதஸ்ஸ அரஹதோ ஸத்தவீஸதி மானஸா ஹோந்தி. ஏவம் இமினா மயா வுத்தப்பகாரேன ரூபீஸு பஞ்சத³ஸஸு ரூபிபூ⁴மீஸு ஜாதானம் ஸப்³பே³ஸம் புக்³க³லானம் சித்தானி விபா⁴வினா தீ⁴ரேன விஞ்ஞேய்யானி ஜானிதப்³பா³னி.

247. சதுவீஸதி சித்தானி, பட²மாருப்பபூ⁴மியம் பட²மஆருப்பபூ⁴மியம் ஜாதஸ்ஸ புது²ஜ்ஜனஸ்ஸ சதுவீஸதி சித்தானி ஜாயந்தி. இதி வசனம் தீ⁴ரோ வினித்³தி³ஸே. தம் யதா² –

தோ³மனஸ்ஸத்³வயம் ஹித்வா, அபுஞ்ஞானி த³ஸேவ ச;

காமபுஞ்ஞானி அட்டே²வ, ஆருப்பகுஸலானி ச;