24. சதுவீஸதிமோ பரிச்சே²தோ³

பச்சயனித்³தே³ஸவண்ணனா

1395. இதா³னி நேஸம் பச்சயவிதி⁴ம் த³ஸ்ஸேதும் ‘‘யேஸ’’ந்திஆதி³ ஆரத்³த⁴ம்.

படிச்ச ஏனம் ப²லமேதி பவத்ததி, திட்ட²தி, உப்பஜ்ஜதி வாதி பச்சயோ, ஹினோதி பதிட்டா²தி ஏத்தா²தி ஹேது, அனேகத்த²த்தா தா⁴துஸத்³தா³னம் ஹி-ஸத்³தோ³ மூல-ஸத்³தோ³ விய பதிட்ட²த்தோ² வேதி³தப்³போ³, ஹினோதி வா ஏதேன கம்மனிதா³னபூ⁴தேன உத்³த⁴ம் ஓஜம் அதிஹரந்தேன மூலேன விய பாத³போ தப்பச்சயம் ப²லம் க³ச்ச²தி விருள்ஹிம் ஆபஜ்ஜதீதி ஹேது, ஹேது ச ஸோ மூலட்டே²ன, பச்சயோ ச உபகாரகட்டே²னாதி ஹேதுபச்சயோ, ஹேது ஹுத்வா பச்சயோ ஹேதுபா⁴வேன பச்சயோதி அத்தோ².

ஏவம் ஆரம்மணபச்சயாதீ³ஸு த³ட்ட²ப்³ப³ம். ஸ்வாயம் படிஸந்தி⁴யம் கம்மஸமுட்டா²னானம், பவத்தியம் சித்தஸமுட்டா²னானம் ரூபானம், உப⁴யத்த² ஸஹஜாதனாமத⁴ம்மானஞ்ச பச்சயோ. ஸப்³ப³லோகியலோகுத்தரந்தி இமினா பஞ்ஞத்தியாபி லோகே விதி³தபா⁴வேன லோகியபதே³ன ஸங்க³ஹிதத்தா ரூபாதி³பே⁴தே³ஸு ச²ப்³பி³தே⁴ஸு ஸங்க²தாஸங்க²தபஞ்ஞத்தித⁴ம்மேஸு ந கோசி த⁴ம்மோ ஆரம்மணபச்சயோ ந ஹோதீதி த³ஸ்ஸேதி. தேனேவ ‘‘யம் யம் த⁴ம்மம் ஆரப்³பா⁴’’தி அனியதோ கதோதி. நனு ச ‘‘யம் யம் த⁴ம்ம’’ந்தி (பட்டா². 1.1.2-3) வுத்தத்தா பஞ்ஞத்தியா க³ஹணம் ந ஹோதீதி? நாயம் தோ³ஸோ த⁴ம்மஸத்³த³ஸ்ஸ ஞேய்யவசனத்தா. ஆரப்³பா⁴தி ஆலம்பி³த்வா, க³ஹேத்வாதி அத்தோ². உப்பஜ்ஜந்தீதி இத³ம் நித³ஸ்ஸனமத்தம். தே பன தம் ஆரப்³ப⁴ உப்பஜ்ஜந்தி சேவ திட்ட²ந்தி ச. யதா² ஹி து³ப்³ப³லோ புரிஸோ த³ண்ட³ம் வா ரஜ்ஜும் வா ஆலம்பி³த்வா உட்ட²ஹதி சேவ திட்ட²தி ச, ஏவம் சித்தசேதஸிகா த⁴ம்மா ரூபாதி³ஆரம்மணம் ஆலம்பி³த்வா உப்பஜ்ஜந்தி சேவ திட்ட²ந்தி சாதி.

ஜேட்ட²கட்டே²ன உபகாரகோ த⁴ம்மோ அதி⁴பதிபச்சயோ. ஜேட்ட²கட்டே²னாதி ச பமுக²பா⁴வேன. அத்தாதீ⁴னானஞ்ஹி பதிபூ⁴தோ த⁴ம்மோ அதி⁴பதீதி ஸோ தேஸம் பமுக²பா⁴வேன பவத்ததி. ‘‘ச²ந்தா³தி⁴பதி ச²ந்த³ஸம்பயுத்தகானம் த⁴ம்மானம் தம்ஸமுட்டா²னானஞ்ச ரூபானம் அதி⁴பதிபச்சயேன பச்சயோ’’திஆதி³வசனதோ ச²ந்தா³த³யோ சத்தாரோ த⁴ம்மா ஸஹஜாதனாமரூபானம் ஸஹஜாதாதி⁴பதீதி த³ஸ்ஸேந்தோ ஆஹ ‘‘தத்த² ஸஹஜாதாதி⁴பதீ’’திஆதி³. ‘‘ச²ந்த³வதோ கிம் நாம கம்மம் ந ஸிஜ்ஜ²தீ’’திஆதி³கம் புரிமாபி⁴ஸங்கா²ரூபனிஸ்ஸயம் லபி⁴த்வா உப்பஜ்ஜமானே சித்துப்பாதே³ ச²ந்தா³த³யோ து⁴ரபூ⁴தா ஜேட்ட²கபூ⁴தா ஸம்பயுத்தத⁴ம்மே, தம்ஸமுட்டா²னரூபே ச ஸாத⁴யமானா வஸே வத்தயமானா ஹுத்வா பவத்தந்தி, தே ச தேஸம் வஸேன வத்தந்தி ஹீனாதி³பா⁴வேன தத³னுவத்தனதோ. தேன தே அதி⁴பதிபச்சயா ஹோந்தி, நோ ச கோ² ஏகதோ. யதா³ ஹி ச²ந்த³ம் து⁴ரம் ச²ந்த³ம் ஜேட்ட²கம் கத்வா சித்தம் பவத்ததி, ததா³ ச²ந்தோ³வ அதி⁴பதி, ந இதரே. ஏஸ நயோ ஸேஸேஸுபி. அதி⁴பதிபா⁴வோபி ஹி நேஸம் அத்தனோ பவத்தினிவாரகே அபி⁴பு⁴ய்ய பவத்தனதோ ஹோதி. அவஸேஸந்தி யதா²வுத்தானம் தேஸம் க³ருகாதப்³ப³தாபா⁴வதோ, க³ருகதஸ்ஸேவ ச ஆரம்மணாதி⁴பதிபா⁴வவசனதோ. வுத்தஞ்ஹேதம் ‘‘யம் யம் த⁴ம்மம் க³ரும் கத்வா யே யே த⁴ம்மா உப்பஜ்ஜந்தி சித்தசேதஸிகா த⁴ம்மா, தே தே த⁴ம்மா தேஸம் தேஸம் த⁴ம்மானம் அதி⁴பதிபச்சயேன பச்சயோ’’தி (பட்டா². 1.1.3). தத்த² க³ரும் கத்வாதி க³ருகாரசித்தீகாரவஸேன வா அஸ்ஸாத³னவஸேன வா க³ரும் பா⁴ரிகம் லத்³த⁴ப்³ப³ம் அனவஞ்ஞாதம் கத்வா. க³ருகாதப்³ப³ஞ்ஹி ஆரம்மணம் தன்னின்னபோணபப்³பா⁴ரானம் அஸ்ஸாத³னபச்சவேக்க²ணமக்³க³ப²லானம் அத்தனோ வஸே வத்தயமானம் விய பச்சயோ ஹோதி, தஸ்மா அயம் அத்தாதீ⁴னானம் பதிபா⁴வேன உபகாரகத்தா அதி⁴பதிபச்சயோ த³ட்ட²ப்³போ³.

அந்தரயதீதி அந்தரம், ப்³யவதா⁴யகந்தி அத்தோ², நாஸ்ஸ அந்தரம் விஜ்ஜதீதி அனந்தரோ, ஸோயேவ பச்சயோதி அனந்தரபச்சயோ, அனந்தரபா⁴வேன உபகாரகோ த⁴ம்மோதி அதி⁴ப்பாயோ. அனந்தரனிருத்³தா⁴தி அத்தனோ நிரோதா⁴னந்தரம் அனுரூபசித்துப்பாத³ஸ்ஸ உப்பத்திபச்சயபா⁴வேன தஸ்ஸ உப்பத்தியா புரிமபா⁴கே³ அனந்தரம் ஹுத்வா நிருத்³தா⁴, ரூபத⁴ம்மா பன அனந்தரபச்சயா நத்தி².

ஸமனந்தரபா⁴வேன உபகாரகோ த⁴ம்மோ ஸமனந்தரபச்சயோ, ததா² ஸமனந்தரபச்சயோபீதி ட²பேத்வா உபஸக்³க³மத்தம் ந ஏத்த² கோசி விஸேஸோ. யோ ஹி அனந்தரபச்சயோ, ஸோவ ஸமனந்தரபச்சயோதி. புரிமபச்சி²மானஞ்ஹி அனந்தருப்பாத³பா⁴வதோ நிரந்தருப்பாத³னஸமத்த²தா அனந்தரபச்சயதா, ரூபகலாபானம் விய ஸண்டா²னாபா⁴வதோ பச்சயபச்சயுப்பன்னானம் ஸஹட்டா²னாபா⁴வதோ ச ‘‘இத³மிதோ உத்³த⁴ம் ஹேட்டா² திரிய’’ந்தி விபா⁴கா³பா⁴வா அத்தனோ ஏகத்தமிவ உபனேத்வா ஸுட்டு² அனந்தரபா⁴வேன உப்பாதே³தும் ஸமத்த²தா ஸமனந்தரபச்சயதா, தஸ்மா த⁴ம்மதோ அவிஸேஸேபி வினேய்யவஸேன ப்³யஞ்ஜனத்த²மத்ததோ விஸேஸம் க³ஹேத்வா தேஸம் விஸும் தே³ஸனா கதா. யம்பி ‘‘அத்தா²னந்தரதாய அனந்தரபச்சயோ, காலானந்தரதாய ஸமனந்தரபச்சயோ’’தி ஆசரியானம் மதம், தம் ‘‘நிரோதா⁴ வுட்ட²ஹந்தஸ்ஸ நேவஸஞ்ஞானாஸஞ்ஞாயதனம் குஸலம் ப²லஸமாபத்தியா ஸமனந்தரபச்சயேன பச்சயோ’’திஆதீ³ஹி (பட்டா². 1.1.418) விருஜ்ஜ²தீதிஆதி³னா படிக்கி²த்தம்.

உப்பஜ்ஜமானோவ ஸஹுப்பாத³னவஸேன உபகாரகோ த⁴ம்மோ ஸஹஜாதபச்சயோ பகாஸஸ்ஸ பதீ³போ விய, ஸோ பனாயம் ‘‘சித்தசேதஸிகா த⁴ம்மா அஞ்ஞமஞ்ஞம், ஸஹஜாதரூபானஞ்ச, மஹாபூ⁴தா அஞ்ஞமஞ்ஞம், உபாதா³ரூபானஞ்ச, படிஸந்தி⁴க்க²ணே வத்து²விபாகா அஞ்ஞமஞ்ஞ’’ந்தி ச திவிதோ⁴ ஹோதி, தஸ்மா வுத்தம் ‘‘சித்தசேதஸிகா’’திஆதி³. யம்பி ஹி பாளியம் அரூபக்க²ந்தா⁴தி³வஸேனஸ்ஸ ச²ப்³பி³த⁴தம் வுத்தம், தம்பி ஏத்தே²வ ஸங்க³ஹிதம். யோ பனேத்த² ஸேஸரூபத⁴ம்மானம், உப⁴யத்த² வத்து²னோ ச பவத்தியா அரூபத⁴ம்மானம், உபாதா³ரூபானஞ்ச அஞ்ஞமஞ்ஞம் மஹாபூ⁴தானம் ஸஹஜாதபச்சயத்தாபா⁴வோ, ஸோ பச்சயபா⁴வஸாமத்தி²யவிஸேஸாயோக³தோதி த³ட்ட²ப்³ப³ம்.

அஞ்ஞமஞ்ஞம் உப்பாத³னுபத்த²ம்ப⁴னபா⁴வேன அத்தனோ உபகாரகஸ்ஸ உபகாரகோ த⁴ம்மோ அஞ்ஞமஞ்ஞபச்சயோ. அஞ்ஞமஞ்ஞுபத்த²ம்ப⁴கதித³ண்ட³கம் விய உபகாரகதா ச அஞ்ஞமஞ்ஞதாவஸேனேவ த³ட்ட²ப்³பா³, ந ஸஹஜாதாதி³வஸேன. ஸஹஜாதாதி³பச்சயோ ஹோந்தோயேவ ஹி கோசி கஸ்ஸசி அஞ்ஞமஞ்ஞபச்சயோ ந ஹோதி சித்தசேதஸிகானம் சித்தஜரூபே ஸதி, மஹாபூ⁴தானம் உபாதா³ரூபே ஸதி அஞ்ஞமஞ்ஞபச்சயத்தாபா⁴வதோ. யதா²ஹ ‘‘சத்தாரோ க²ந்தா⁴ அரூபினோ அஞ்ஞமஞ்ஞபச்சயேன பச்சயோ, சத்தாரோ மஹாபூ⁴தா…பே… ஓக்கந்திக்க²ணே நாமரூபம் அஞ்ஞமஞ்ஞபச்சயேன பச்சயோ’’தி (பட்டா². 1.1.7). ஆசரியேன பன பச்சயுப்பன்னத⁴ம்மே அபராமஸித்வா வுச்சமானத்தா அவிஸேஸேன வுத்தம் ‘‘ததா² அஞ்ஞமஞ்ஞபச்சயோ’’தி.

தருஆதீ³னம் பத²வீ விய அதி⁴ட்டா²னாகாரேன, சித்தகம்மாதீ³னம் படாத³யோ விய ச நிஸ்ஸயாகாரேன உபகாரகோ த⁴ம்மோ நிஸ்ஸயபச்சயோ. வத்து²ரூபானீதி ஸத்தன்னம் விஞ்ஞாணதா⁴தூனம் அதி⁴ட்டா²னாகாரேன நிஸ்ஸயபச்சயபூ⁴தானி வத்து²ரூபானி. மஹாபூ⁴தா சித்தசேதஸிகா சாதி அஞ்ஞமஞ்ஞம், உபாதா³ரூபானஞ்ச ததே²வ நிஸ்ஸயபூ⁴தானி மஹாபூ⁴தானி அஞ்ஞமஞ்ஞம், ஸஹஜாதரூபானஞ்ச நிஸ்ஸயாகாரேன பச்சயானி சித்தசேதஸிகானி, தத³தீ⁴னவுத்திதாய அத்தனோ ப²லேன நிஸ்ஸிதோ ந படிக்கி²த்தோதி நிஸ்ஸயோ.

யதா² பன பு⁴ஸோ ஆயாஸோ உபாயாஸோ, ஏவம் பு⁴ஸோ நிஸ்ஸயோ உபனிஸ்ஸயோ, ப³லவகாரணந்தி அத்தோ², தஸ்மா ப³லவகாரணபா⁴வேன உபகாரகோ த⁴ம்மோ உபனிஸ்ஸயபச்சயோதி வேதி³தப்³போ³. ஸோ ஆரம்மணூபனிஸ்ஸயோ அனந்தரூபனிஸ்ஸயோ பகதூபனிஸ்ஸயோதி திவிதோ⁴தி ஆஹ ‘‘ஆரம்மணா’’திஆதி³. தத்த² –

‘‘தா³னம் த³த்வா ஸீலம் ஸமாதி³யித்வா உபோஸத²கம்மம் கத்வா தம் க³ரும் கத்வா பச்சவேக்க²தி, புப்³பே³ ஸுசிண்ணானி க³ரும் கத்வா பச்சவேக்க²தி, ஜா²னா வுட்ட²ஹித்வா ஜா²னம் க³ரும் கத்வா பச்சவேக்க²தி, ஸேகா² கோ³த்ரபு⁴ம் க³ரும் கத்வா பச்சவேக்க²ந்தி, வோதா³னம் க³ரும் கத்வா பச்சவேக்க²ந்தி, ஸேகா² மக்³கா³ வுட்ட²ஹித்வா மக்³க³ம் க³ரும் கத்வா பச்சவேக்க²ந்தீ’’தி (பட்டா². 1.1.423) –

ஏவமாதி³னா நயேன ஆரம்மணூபனிஸ்ஸயோ தாவ ஆரம்மணாதி⁴பதினா ஸத்³தி⁴ம் நானத்தம் அகத்வாவ விப⁴த்தோ. தேனாஹ ‘‘ஆரம்மணூபனிஸ்ஸயோ ஆரம்மணாதி⁴பதியேவா’’தி. கிஞ்சாபி நானத்தம் அகத்வா விப⁴த்தோ, ததா²பி அயம் தேஸம் விஸேஸோ – யம் ஆரம்மணம் க³ரும் கத்வா சித்தசேதஸிகா உப்பஜ்ஜந்தி, தம் நியமதோ தேஸம் ஆரம்மணேஸு ப³லவாரம்மணம் ஹோதி. இதி க³ருகாதப்³ப³மத்தட்டே²ன ஆரம்மணாதி⁴பதி, ப³லவகாரணட்டே²ன ஆரம்மணூபனிஸ்ஸயோதி ச ஏவமேதேஸம் நானத்தம் வேதி³தப்³ப³ம்.

அனந்தரூபனிஸ்ஸயோபி ‘‘புரிமா புரிமா குஸலா க²ந்தா⁴ பச்சி²மானம் பச்சி²மானம் குஸலானம் க²ந்தா⁴னம் உபனிஸ்ஸயபச்சயேன பச்சயோ’’திஆதி³னா (பட்டா². 1.1.423) நயேன அனந்தரபச்சயேன ஸத்³தி⁴ம் நானத்தம் அகத்வாவ விப⁴த்தோதி ஆஹ ‘‘அனந்தரூபனிஸ்ஸயோ பன அனந்தரபச்சயோவா’’தி. ஏவம் ஸந்தேபி அத்தனோ அனந்தரா அனுரூபசித்துப்பாத³வஸேன அனந்தரபச்சயோ, ப³லவகாரணவஸேன அனந்தரூபனிஸ்ஸயபச்சயோதி ஏவமேதேஸம் நானத்தம் வேதி³தப்³ப³ம்.

பகதியா ஏவ பச்சயந்தரரஹிதேன அத்தனோ ஸபா⁴வேனேவ உபனிஸ்ஸயோ பகதூபனிஸ்ஸயோ, ஆரம்மணஅனந்தரேஹி அமிஸ்ஸோவ புத²கே³வ கோசி உபனிஸ்ஸயோதி வுத்தம் ஹோதி. அத² வா பகதோ உபனிஸ்ஸயோ பகதூபனிஸ்ஸயோ. பகதோதி சேத்த² ப-காரோ உபஸக்³கோ³, ஸோ அத்தனோ ப²லஸ்ஸ உப்பாத³னஸமத்த²பா⁴வேன ஸந்தானே நிப்பா²தி³தபா⁴வம், உபஸேவிதபா⁴வஞ்ச தீ³பேதி, தஸ்மா அத்தனோ ஸந்தானே நிப்ப²ன்னோ வா காயிகஸுக²து³க்க²ஸத்³தா⁴ஸீலாதி³ உபஸேவிதோ வா உதுபோ⁴ஜனாதி³ பகதூபனிஸ்ஸயோதி அத்தோ². உபஸேவனஞ்சேத்த² து³வித⁴ம் உபயோகோ³பஸேவனம் ஆரம்மணூபஸேவனஞ்ச. ஏவஞ்ச கத்வா அனாக³தஸ்ஸாபி உபனிஸ்ஸயபச்சயதா லத்³தா⁴ ஹோதி. காயிகஸுக²…பே… யோ சாதி ஏத்த² காயிகஸுக²து³க்கா²னி ராக³ஸத்³தா⁴தீ³னம், உதுபோ⁴ஜனாத³யோ சித்தஸமாதா⁴னாதீ³னம், ஸத்³தா⁴ஸீலாத³யோ ஸத்³தா⁴ஸீலாதீ³னஞ்ச உபனிஸ்ஸயா ஹோந்தி. ஆதி³-ஸத்³தே³ன யம் யம் உபனிஸ்ஸாய யஸ்ஸ யஸ்ஸ ஸம்ப⁴வோ, தம் தம் தஸ்ஸ தஸ்ஸ உபனிஸ்ஸயபச்சயபூ⁴தம் ஸங்க³ண்ஹாதி. பச்சயமஹாபதே³ஸோ ஹேஸ, யதி³த³ம் உபனிஸ்ஸயபச்சயோதி.

பச்சயுப்பன்னதோ பட²மதரம் உப்பஜ்ஜித்வா வத்தமானபா⁴வேன உபகாரகோ த⁴ம்மோ புரேஜாதபச்சயோ. ஸோ ச ரூபத⁴ம்மோவ ஸமானோ அரூபத⁴ம்மஸ்ஸேவ ஹோதி. தேனாஹ ‘‘வத்து²புரேஜாதோ நாமா’’திஆதி³. யதா² சேத்த² ‘‘வத்து²ரூபானீ’’தி ஹத³யவத்து²னோபி க³ஹணம், ஏவம் ‘‘ரூபாதீ³னீ’’திஆதி³-க்³க³ஹணேன த⁴ம்மாரம்மணஸ்ஸாபி க³ஹணம் த³ட்ட²ப்³ப³ம். நனு ச பஞ்சாரம்மணானேவ ஆரம்மணபுரேஜாதபா⁴வேன ஆக³தானீதி? ஸச்சம் ஆக³தானி, பஞ்ஹாவாரே பன ‘‘ஸேகா² வா புது²ஜ்ஜனா வா சக்கு²ம் அனிச்சதோ து³க்க²தோ அனத்ததோ விபஸ்ஸந்தீ’’திஆதி³னா (பட்டா². 1.1.424) அவிஸேஸேன பச்சுப்பன்னசக்கா²தீ³னம்பி க³ஹிதத்தா த⁴ம்மாரம்மணஸ்ஸ ஆரம்மணபுரேஜாதபா⁴வோ ந ஸக்கா படிபா³ஹிதும். அத்த²தோபி ஹேதம் ஸித்³த⁴ம் ‘‘யம் யம் பச்சுப்பன்னம் ஆரம்மணம் க³ஹேத்வா மனோத்³வாரே சித்தம் பவத்ததி, தம் தஸ்ஸ ஆரம்மணபுரேஜாதம் ஹோதீ’’தி. ஏத்த² ச நிஸ்ஸயாரம்மணாகாராதீ³ஹி விஸிட்டா² புரேஜாதபா⁴வேன வினா உபகாரபா⁴வம் அக³ச்ச²ந்தானம் வத்தா²ரம்மணானம் புரேஜாதாகாரேன உபகாரகதா புரேஜாதபச்சயதாதி அயமஸ்ஸ நிஸ்ஸயாரம்மணபச்சயதாஹி விஸேஸோ.

கி³ஜ்ஜ²போதகஸரீரானம் ஆஹாராஸா சேதனா விய புரேஜாதானம் ரூபானம் உபத்த²ம்ப⁴கபா⁴வேன உபகாரகோ த⁴ம்மோ பச்சா²ஜாதபச்சயோ. மனோஸஞ்சேதனாஹாரவஸேன ஹி பச்சா²ஜாதசித்தசேதஸிகேஹி வினா ஸந்தானட்டி²திஹேதுபா⁴வம் அக³ச்ச²ந்தானம் பச்சா²ஜாதாகாரேன சித்தசேதஸிகானம் உபகாரகதா விப்பயுத்தாகாராதீ³ஹி விஸிட்டா² பச்சா²ஜாதபச்சயதாதி ஏவம் ஸப்³ப³பச்சயானம் பச்சயந்தராகாரவிஸிட்டா² உபகாரகதா த³ட்ட²ப்³பா³. ஸோ பன ‘‘பச்சா²ஜாதா சித்தசேதஸிகா த⁴ம்மா புரேஜாதஸ்ஸ இமஸ்ஸ காயஸ்ஸ பச்சா²ஜாதபச்சயேன பச்சயோ’’தி (பட்டா². 1.1.11) ஆக³தத்தா ஏகவிதோ⁴தி ஆஹ ‘‘சித்தசேதஸிகாவா’’தி.

புரிமபுரிமபரிசிதக³ந்தோ² விய உத்தருத்தரஸ்ஸ க³ந்த²ஸ்ஸ குஸலாதி³பா⁴வேன அத்தஸதி³ஸபகு³ணப³லவபா⁴வவிஸிட்ட²ம் அத்தஸஜாதியதாகா³ஹகம் ஆஸேவனம், தேன பச்சயா ஸஜாதியத⁴ம்மாவ ஆஸேவனபச்சயோ. பி⁴ன்னஜாதிகா ஹி பி⁴ன்னஜாதிகானம் ஆஸேவனகு³ணேன பகு³ணப³லவபா⁴வவிஸிட்ட²ம் குஸலாதி³பா⁴வஸங்கா²தம் அத்தனோ க³திம் கா³ஹாபேதும் ந ஸக்கோந்தி, ந ச ஸயம் ததோ க³ண்ஹந்தி. தே பன அனந்தராதீதானி லோகியகுஸலாகுஸலானி சேவ அனாவஜ்ஜனகிரியாஜவனானி சாதி ஆஹ ‘‘ட²பேத்வா ஆவஜ்ஜனத்³வய’’ந்திஆதி³. ‘‘ந மக்³க³பச்சயா ஆஸேவனே ஏக’’ந்தி (பட்டா². 1.1.221) வசனதோ அஹேதுககிரியாஸு ஹஸிதுப்பாத³ஸ்ஸேவ ஆஸேவனபா⁴வேன, ஆவஜ்ஜனத்³வயம் ஆஸேவனபச்சயோ ந ஹோதி, லோகுத்தரம்பி குஸலம் பி⁴ன்னஜாதிகஸ்ஸேவ ப²லஸ்ஸ புரேசரத்தா ந தேன, ஆஸேவனகு³ணம் க³ண்ஹாபேதி, விபாகாப்³யாகதம்பி கம்மவஸேன. விபாகபா⁴வப்பத்தம் கம்மபரிணாமிதம் கம்மவேக³க்கி²த்தம் பதிதம் விய ஹுத்வா பவத்தமானம் அத்தனோ ஸபா⁴வம் கா³ஹேத்வா பரிபா⁴வேத்வா நேவ அஞ்ஞவிபாகம் பவத்தேதி, ந ச புரிமவிபாகானுபா⁴வம் க³ஹேத்வா உப்பஜ்ஜதி. லோகுத்தரவிபாகம்பி ஹி கிஞ்சாபி ஜவனவஸேன உப்பஜ்ஜதி, ஆஸேவனகு³ணம் பன க³ண்ஹாதி, ந ச அஞ்ஞம் கா³ஹாபேதி. யம்பி ‘‘ஆஸேவனவினிமுத்தம் ஜவனம் நத்தீ²’’தி ஆசரியத⁴ம்மபாலத்தே²ரேன வுத்தம், தம்பி ‘‘யேபு⁴ய்யவஸேன வுத்த’’ந்தி விஞ்ஞாயதி, இதரதா² பன ஆசரியஸ்ஸ அஸமபேக்கி²தாவிதா⁴யகத்தப்பஸங்க³தோ. ததா² ஹி வுத்தம் பட்டா²னட்ட²கதா²யம் ‘‘லோகுத்தரோ பன ஆஸேவனபச்சயோ நாம நத்தீ²’’தி (பட்டா². அட்ட². 1.12). மக்³கோ³ பன கோ³த்ரபு⁴தோ ஆஸேவனம் ந க³ண்ஹாதீதி நத்தி² பூ⁴மிஆதி³வஸேன நானாஜாதிகதாய அனதி⁴ப்பேதத்தா. ததா² ஹி வுத்தம் பட்டா²னே ‘‘கோ³த்ரபு⁴ மக்³க³ஸ்ஸ ஆஸேவனபச்சயேன பச்சயோ, வோதா³னம் மக்³க³ஸ்ஸ ஆஸேவனபச்சயேன பச்சயோ’’தி (பட்டா². 1.1.426).

சித்தப்பயோக³ஸங்கா²தஆயூஹனகிரியாபா⁴வேன ஸஹஜாதானம், நானக்க²ணிகானஞ்ச உபகாரகோ த⁴ம்மோ கம்மபச்சயோ. கம்மந்தி ஹி சேதனா வுச்சதி, ஸா ச ஆயூஹனப்³யாபாரா. பச்சயுப்பன்னேன ஸஹ உப்பன்னா ஸஹஜாதா, பச்சயுப்பன்னதோ நானக்க²ணே ப⁴வா நானக்க²ணிகா. ஸஹஜாதா லோகியலோகுத்தரா சேதனாதி ஸம்ப³ந்தோ⁴. ஸா ஸஹஜாதனாமானம், தம்ஸமுட்டா²னானஞ்ச ரூபானம் பச்சயோ, இதரா பன விபாககடத்தாரூபானந்தி த³ட்ட²ப்³ப³ம். ஸாஸவகுஸலாகுஸலசேதனாதி அத்தனோ உப்பாத³விஸிட்டே² ஸந்தானே ஸேஸபச்சயஸமாக³மே பவத்தமானானம் விபாககடத்தாரூபானம் ஸந்தானவிஸேஸனகிரியாபா⁴வேன உபகாரிகா காமரூபாரூபகுஸலசேதனா, அகுஸலசேதனா ச. தஸ்ஸா ஹி ததா² கிரியாபா⁴வேன பவத்தத்தா தேஸம் பவத்தி, ந அஞ்ஞதா². இதரா பன ஸஹஜாதானம் ஆயூஹனகிரியாபா⁴வேன பவத்தமானா உபகாரிகாதி வத்தப்³ப³ம். அவதா⁴ரணேன பனேத்த² சேதனாஸம்பயுத்தம் அபி⁴ஜ்ஜா²தி³கம்மம் படிக்கி²பதி ஸதிபி விபாகத⁴ம்மஸபா⁴வே சேதனாவஜ்ஜானம் அதம்ஸபா⁴வத்தா. அனாஸவ…பே… பச்சயோதி இமினா லோகியகுஸலசேதனாய விஸேஸமத்தம் த³ஸ்ஸேதி, ந நானக்க²ணிககம்மபச்சயதாபா⁴வம். ஏவஞ்ச கத்வா வுத்தம் அட்ட²கதா²யம் ‘‘அரூபாவசரசேதனா, பன லோகுத்தரசேதனா ச உப்பஜ்ஜித்வா நிருத்³தா⁴ அத்தனோ அத்தனோ விபாகக்க²ந்தா⁴னம் நானக்க²ணிககம்மபச்சயேன பச்சயோ’’தி.

அத்தனோ நிருஸ்ஸாஹஸந்தபா⁴வேன ஸஹஜாதனாமரூபானம் நிருஸ்ஸாஹஸந்தபா⁴வாய உபகாரகா அரூபத⁴ம்மாவ விபாகபச்சயோ. தேனாஹ ‘‘விபாகசித்தசேதஸிகா’’தி. தே ஹி பயோகே³ன அஸாதே⁴தப்³ப³தாய கம்மஸ்ஸ கதத்தா நிப்ப²ஜ்ஜனமத்ததோ நிருஸ்ஸாஹஸந்தபா⁴வா ஹோந்தி, ந கிலேஸவூபஸமஸந்தபா⁴வா. நிருஸ்ஸாஹஸந்தபா⁴வதோ ஏவ ஹி ப⁴வங்கா³த³யோ து³விஞ்ஞேய்யா. பஞ்சத்³வாரேபி ஹி ஜவனப்பவத்தியாவ ரூபாதீ³னம் க³ஹிததா விஞ்ஞாயதி. அபி⁴னிபாதஸம்படிச்ச²னஸந்தீரணமத்தா பன விபாகா து³விஞ்ஞேய்யா ஏவ.

ரூபாரூபானம் உபத்த²ம்ப⁴கட்டே²ன உபகாரோ ஆஹாரபச்சயோ. ஸதிபி ஹி ஜனகபா⁴வே உபத்த²ம்ப⁴கத்தமேவ ஆஹாரஸ்ஸ பதா⁴னகிச்சம், ஜனயந்தோபி ச ஆஹாரோ அவிச்சே²த³வஸேன உபத்த²ம்பே⁴ந்தோவ ஜனேதீதி உபத்த²ம்ப⁴னபா⁴வோவ ஆஹாரபா⁴வோதி. தத்த² கப³ளீகாரோ ஆஹாரோ ரூபகாயஸ்ஸேவ உபத்த²ம்ப⁴கோ, ஸேஸா தயோ ரூபாரூபகாயஸ்ஸ. ந கேவலஞ்ஹி தே நாமத⁴ம்மானமேவ அவிச்சே²த³ஹேதுகா, அத² கோ² படிஸந்தி⁴யம் கடத்தாரூபானம், பவத்தே சித்தஜரூபானம்பி.

தேஸு தேஸு கிச்சேஸு பச்சயுப்பன்னத⁴ம்மேஹி அத்தானம் அனுவத்தாபனகஸங்கா²தஆதி⁴பச்சட்டே²ன பச்சயோ இந்த்³ரியபச்சயோ. அதி⁴பதிபச்சயத⁴ம்மானஞ்ஹி பவத்திவினிவாரகே அபி⁴ப⁴வித்வா பவத்தனேன க³ருபா⁴வோ அதி⁴பதியட்டோ², இந்த்³ரியானம் பன த³ஸ்ஸனாதி³கிச்சேஸு சக்கு²விஞ்ஞாணாதீ³ஹி, ஜீவனே கம்மஜரூபேஹி, அரூபத⁴ம்மேஹி ச ஜீவந்தேஹி ஸுகி²தாதி³பா⁴வேஸு ஸுகி²தாதீ³ஹி அதி⁴மோக்க²பக்³க³ஹஉபட்டா²னாவிக்கே²பப்பஜானனேஸு ‘‘அனஞ்ஞாதம் ஞஸ்ஸாமீ’’தி பவத்தியம் ஆஜானனே, அஞ்ஞாதாவிபா⁴வே ச ஸத்³தா⁴தி³ஸஹஜாதேஹீதி ஏவம் தம்தம்கிச்சேஸு சக்கா²தி³பச்சயேஹி த⁴ம்மேஹி சக்கா²தீ³னம் அனுவத்தனியதாமத்தம் இந்த்³ரியானம் ஆதி⁴பச்சட்டோ²தி அயமேவ தேஸம் விஸேஸோ. ரூபஸத்தக-க்³க³ஹணேன சக்கா²தீ³னி பஞ்ச, இத்தி²புரிஸிந்த்³ரியத்³வயஞ்ச த³ஸ்ஸேதி. ஜீவிதிந்த்³ரியம் பன அரூபஜீவிதிந்த்³ரியேன ஸத்³தி⁴ம் ஏகதோ கத்வா ஜீவித-க்³க³ஹணேன க³ஹிதம். ஏவஞ்ஹி த்³வாவீஸதி இந்த்³ரியானி ஹோந்தி. ‘‘அனாதி³மதி ஸம்ஸாரே அனஞ்ஞாதம் அஸச்சி²கதம் சதுஸச்சத⁴ம்மம், நிப்³பா³னமேவ வா ஞஸ்ஸாமீ’’தி பவத்தஸ்ஸ இந்த்³ரியம் அனஞ்ஞாதஞ்ஞஸ்ஸாமீதிந்த்³ரியம், பட²மமக்³க³ஞாணம். ஆஜானதோ பட²மமக்³கே³ன தி³ட்ட²மரியாத³ம் அனதிக்கமித்வா ஜானதோ இந்த்³ரியம் அஞ்ஞிந்த்³ரியம், ஸோதாபத்திப²லதோ யாவ அரஹத்தமக்³கா³ ச²ஸு ஞாணம், அஞ்ஞாதாவினோ சதூஸு ஸச்சேஸு பரினிட்டி²தகிச்சஸ்ஸ இந்த்³ரியம் அஞ்ஞாதாவிந்த்³ரியம், அரஹத்தப²லஞாணம். பட²மம் பரியாயதோ இந்த்³ரியத்தம் ஸந்தா⁴ய ரூபஸத்தக-க்³க³ஹணேன க³ஹேத்வாபி புன கத²ஞ்சி உபகாரகத்தாபா⁴வதோ இத்தி²புரிஸிந்த்³ரியானம் ஏத்த² அக்³க³ஹணம் த³ஸ்ஸேதும் ‘‘தேஸூ’’திஆதி³ வுத்தம். தானி ஹி யேபு⁴ய்யேன லிங்கா³தீ³ஹி அனுவத்தியமானானிபி பச்சயபா⁴வதோ நானுவத்தீயந்தீதி வுத்தோவாயமத்தோ².

ஆரம்மணூபனிஜ்ஜா²னலக்க²ணூபனிஜ்ஜா²னவஸேன உபக³ந்த்வா ஆரம்மணனிஜ்ஜா²னம் ஜா²னபச்சயதா, ஸோ ச விதக்காதீ³னமேவ ஆவேணிகோ ஸபா⁴வோதி ஆஹ ‘‘ஜா²னபச்சயோ’’திஆதி³. தே பன படிஸந்தி⁴யம் கடத்தாரூபானம், பவத்தே சித்தஜரூபானம், உப⁴யத்த² நாமத⁴ம்மானஞ்ச பச்சயாதி த³ட்ட²ப்³ப³ம்.

ஸுக³திதோ, து³க்³க³திதோ, குஸலதோ, அகுஸலதோ வா நிய்யானட்டே²ன ஸஹஜாதானம் உபகாரகதா மக்³க³பச்சயதா, ஸா ச ஸம்மாதி³ட்டா²தீ³னந்தி ஆஹ ‘‘மக்³க³பச்சயோ’’திஆதி³. ஸங்கப்ப-க்³க³ஹணேன ஸம்மாஸங்கப்பம், மிச்சா²ஸங்கப்பஞ்ச த³ஸ்ஸேதி. ஏவம் ஸேஸேஸுபி. மிச்சா²ஸங்கப்பாத³யோ ஹி அபாயமக்³க³ங்கா³, மிச்சா²ஸதிமிச்சா²வாசாத³யோ சேத்த² ததா²பவத்தசித்துப்பாதா³, சேதனா ச, அயம்பி ஜா²னபச்சயே வுத்தானமேவ பச்சயுப்பன்னானம் பச்சயோதி த³ட்ட²ப்³ப³ம்.

பரமத்தே²ன பி⁴ன்னானம்பி ஏகீபா⁴வக³தானம் விய ஏகுப்பாதா³தி³பா⁴வஸங்கா²தஸம்பயோக³லக்க²ணேன உபகாரகதா ஸம்பயுத்தபச்சயதா, ஸா ச நாமத⁴ம்மானமேவ, ந ரூபத⁴ம்மானந்தி ஆஹ ‘‘ஸம்பயுத்தபச்சயோ’’திஆதி³.

அஞ்ஞமஞ்ஞஸம்ப³ந்த⁴தாய யுத்தானம்பி ஸமானானம் விப்பயுத்தபா⁴வேன விஸம்ஸட்ட²தாய நானத்தூபக³மனேன உபகாரகதா விப்பயுத்தபச்சயதா, ஸா ச வத்தூ²னம், சித்தசேதஸிகானமேவ வாதி ஆஹ ‘‘விப்பயுத்தபச்சயோ’’திஆதி³. ச² வத்தூ²னி ஹி ஸத்தன்னம் விஞ்ஞாணானம் யதா²ரஹம் படிஸந்தி⁴யம், பவத்தே, சித்தசேதஸிகா படிஸந்தி⁴யம் கடத்தாரூபானம், பவத்தியம் சித்தஸமுட்டா²னானஞ்ச விப்பயுத்தபச்சயோ. வத்து²புரேஜாதானீதி இத³ம் சக்கா²தி³வத்து²வஸேனேவ வுத்தம், ஹத³யவத்து² பன படிஸந்தி⁴யம்பி பச்சயபா⁴வதோ ஸஹஜாதம்பி லப்³ப⁴தி. வுத்தம்பி ஹேதம் அப்³யாகதபத³ஸ்ஸ ஸஹஜாதவிப⁴ங்கே³ ‘‘படிஸந்தி⁴க்க²ணே விபாகாப்³யாகதா க²ந்தா⁴ கடத்தாரூபானம், க²ந்தா⁴ வத்து²ஸ்ஸ, வத்து² க²ந்தா⁴னம் விப்பயுத்தபச்சயேன பச்சயோ’’தி. ததா² பச்சா²ஜாதா சித்தசேதஸிகாதி ச சக்கு²விஞ்ஞாணாதி³வஸேனேவ வுத்தம், ‘‘ஸஹஜாதா குஸலா க²ந்தா⁴ சித்தஸமுட்டா²னானம் ரூபானம் விப்பயுத்தபச்சயேன பச்சயோ’’திஆதி³வசனதோ (பட்டா². 1.1.434) பன ஸஹஜாதாபி லப்³ப⁴ந்தி. ஏவஞ்ச கத்வா வுத்தம் அட்ட²கதா²யம் ‘‘விப்பயுத்தபச்சயோ ஸஹஜாதபுரேஜாதபச்சா²ஜாதவஸேன திவிதோ⁴’’தி. அயம் பன ரூபத⁴ம்மோ ஸமானோ ரூபத⁴ம்மஸ்ஸ பச்சயோ ந ஹோதி ஸம்பயோகா³ஸங்காய அபா⁴வதோ.

யேஸஞ்ஹி நாமானம் சக்கா²தீ³னம் அப்³ப⁴ந்தரதோ நிக்க²மந்தானம் விய பவத்தி, ரூபானஞ்ச நாமஸன்னிஸ்ஸயேனேவ உப்பஜ்ஜமானானம் ஸம்பயோகா³ஸங்கா ஹோதி, தேஸமேவ விப்பயுத்தபச்சயதா வுத்தா. ரூபானம் பன ரூபேஹி ஸாஸங்கா நத்தி², வத்து²ஸன்னிஸ்ஸயேனேவ ச ஜாயந்தானம் நாமானம் விஸயமத்தம் ஆரம்மணந்தி தேனாபி தேஸம் ஸம்பயோகா³ஸங்கா நத்தி². பச்சுப்பன்னஸபா⁴வேன அத்தி²பா⁴வேன தாதி³ஸஸ்ஸேவ த⁴ம்மஸ்ஸ உபத்த²ம்ப⁴கத்தேன உபகாரகதா அத்தி²பச்சயதா. ஸதிபி ஹி ஜனகத்தே டி²தியம்யேவ ஸாதிஸயோ அத்தி²பச்சயானம் ப்³யாபாரோதி உபத்த²ம்ப⁴கதா தேஸம் க³ஹிதா, தே ச ரூபஜீவிதிந்த்³ரியாதீ³னேவாதி ஆஹ ‘‘அத்தி²பச்சயோ’’திஆதி³. ரூபஜீவிதிந்த்³ரியஞ்ஹி கடத்தாரூபானம், கப³ளீகாராஹாரோ இமஸ்ஸ காயஸ்ஸ, ஆரம்மணபுரேஜாதானி சித்தசேதஸிகானம் நிஸ்ஸயபச்சயே வுத்தத⁴ம்மா, தத்தே²வ வுத்தபச்சயுப்பன்னஞ்ச அத்தி²பச்சயோ. நிஸ்ஸயபச்சயே வுத்தத⁴ம்மாதி ச வத்து²ரூபமஹாபூ⁴தசித்தசேதஸிகானம் த⁴ம்மஸாமஞ்ஞேனேவ க³ஹணம், ந நிஸ்ஸயபச்சயபா⁴வீனம்யேவ. பச்சா²ஜாதானம்பி சித்தசேதஸிகானம் புரேஜாதஸ்ஸ காயஸ்ஸ பஞ்ஹாவாரே பச்சயபா⁴வேன நித்³தி³ட்ட²த்தா. ஏத்த² ச அத்தி²பா⁴வாபா⁴வேன அனுபகாரகானமேவ அத்தி²பா⁴வேன உபகாரகதாய அத்தி²பச்சயதாபா⁴வதோ நத்தி² நிப்³பா³னஸ்ஸ ஸப்³ப³தா³ பா⁴வினோ அத்தி²பச்சயதா, உப்பாதா³தி³யுத்தானம் வா நத்தி²பா⁴வோபகாரதாவிருத்³தோ⁴ உபகாரகபா⁴வோ அத்தி²பச்சயதாதி ந தஸ்ஸ தப்பச்சயத்தப்பஸங்கோ³.

நத்தி²பச்சயோதிஆதீ³ஸு அனந்தரதாமத்தேன, சித்தனியாமகபா⁴வேன வா உபகாரகதா அனந்தரபச்சயதா. ஏகஸ்மிம் ப²ஸ்ஸாதி³த⁴ம்மஸமுதா³யே பவத்தமானே து³தியஸ்ஸ அபா⁴வதோ அத்தனோ டி²தியா ஓகாஸமலப⁴ந்தானம் அனந்தரம் உப்பஜ்ஜமானகசித்தசேதஸிகானம் ஓகாஸதா³னவஸேன உபகாரகதா நத்தி²பச்சயதா. அத்தனோ ஸபா⁴வாவிக³மேன அப்பவத்தமானானம் விக³தபா⁴வேன உபகாரகதா விக³தபச்சயதா. அத்த²தோ பன த்³வின்னம்பி அனந்தரபச்சயபா⁴வீத⁴ம்மத்தா அவிஸேஸோ வுத்தோ. ஸபா⁴வதாமத்தேன உபகாரகதா அத்தி²பச்சயதா, நிரோதா⁴னுபக³மனவஸேன உபகாரகதா அவிக³தபச்சயதாதி பச்சயவிஸேஸோ தேஸம் த⁴ம்மாவிஸேஸேபி வேதி³தப்³போ³. த⁴ம்மானஞ்ஹி ஸமத்த²தாவிஸேஸம் ஸப்³பா³காரேன ஞத்வா ப⁴க³வதா சதுவீஸதிபச்சயா தே³ஸிதாதி ப⁴க³வதி ஸத்³தா⁴ய ‘‘ஏவம் விஸேஸா ஏதே த⁴ம்மா’’தி ஸுதமயஞாணம் உப்பாதே³த்வா சிந்தாபா⁴வனாமயஞாணேஹி தத³பி⁴ஸமயாய யோகோ³ கரணீயோ. அவிஸேஸேபி த⁴ம்மஸாமத்தி²யஸ்ஸ ததா² ததா² வினேதப்³ப³புக்³க³லானம் வஸேன ஹேட்டா² வுத்தோபி பச்சயோ புன பகாரந்தரேன வுச்சதி யதா² அஹேதுகது³கம் வத்வாபி ஹேதுவிப்பயுத்தது³கம் வியாதி த³ட்ட²ப்³ப³ம்.

யஸ்மா மஹாபூ⁴தா அஞ்ஞமஞ்ஞம், உபாதா³ரூபானஞ்ச ஸஹஜாதபச்சயா, மஹாபூ⁴தா அஞ்ஞமஞ்ஞம் அஞ்ஞமஞ்ஞனிஸ்ஸயபச்சயா, உபாதா³ரூபானம் நிஸ்ஸயபச்சயாவ, கப³ளீகாரோ ஆஹாரோ இமஸ்ஸ காயஸ்ஸ ஆஹாரபச்சயோ, மஹாபூ⁴தா அஞ்ஞமஞ்ஞம், உபாதா³ரூபானஞ்ச ஜீவிதிந்த்³ரியம் கடத்தாரூபானஞ்ச அத்தி²அவிக³தஇந்த்³ரியபச்சயா, தஸ்மா வுத்தம் ‘‘ரூபம் ரூபஸ்ஸ…பே… ஸத்ததா⁴ பச்சயோ ஹோதீ’’தி.

ரூபம் அரூபஸ்ஸாதிஆதீ³ஸுபி ஹேட்டா² வுத்தபச்சயுப்பன்னத⁴ம்மே ஸுட்டு² உபலக்கே²த்வா பச்சயோ யோஜேதப்³போ³. ரூபம் ரூபாரூபஸ்ஸாதி நத்தீ²தி இத³ம் ஸஹஜாதபச்சயபூ⁴தம்பி ரூபம் ரூபாரூபத்³வயஸ்ஸ பச்சயபா⁴வேன அனாக³தந்தி கத்வா வுத்தம்.

ஸப்³பே³ஸம் பச்சயானம் ஆரம்மணபச்சயே உபனிஸ்ஸயபச்சயே, ஸஹஜாதனானக்க²ணிகசேதனாய கம்மபச்சயே, ஸஹஜாதபுரேஜாதபச்சா²ஜாதாதி³பே⁴த³ஸ்ஸ அத்தி²பச்சயே ச ஸமோதா⁴னதோ ஸப்³பே³பி பச்சயா ஸங்கே²பதோ சதுப்³பி³தா⁴யேவாதி த³ஸ்ஸேந்தோ ஆஹ ‘‘ஸப்³பே³ பனிமே’’திஆதி³.

இதி அபி⁴த⁴ம்மத்த²விகாஸினியா நாம

அபி⁴த⁴ம்மாவதாரஸம்வண்ணனாய

பச்சயனித்³தே³ஸவண்ணனா நிட்டி²தா.

நிக³மனகதா²வண்ணனா

1400-2. ஸப்³ப³த⁴ம்மேஸு அப்படிஹதக³திதாய ஸுந்த³ரா மதி இமஸ்ஸாதி ஸுமதி, தஸ்ஸ ஸுமதிஸ்ஸ ப⁴க³வதோ மதிவிசாரம் ஞாணசாரம் போ³தே⁴தீதி ஸுமதிமதிவிசாரபோ³த⁴னோ. விருத்³தா⁴ மதி யேஸம் தே விமதினோ, விருத்³தா⁴ மதீதி ச விருத்³த⁴த³ஸ்ஸனந்தி அத்தோ². தேஸம் விமோஹம் வினாஸேதீதி விமதிவிமோஹவினாஸனோ. யதோ யஸ்மா நாமதோ ஸுமதினா பி⁴க்கு²னா மானதோ ப³ஹுமானேன ஆயாசிதஸம்மானதோ ஆயாசிதோ ஹுத்வா ஸம்மா அவனதோ ஸதா³யேவ மதோ அயம், ததோ தஸ்மா மயா ரசிதோ அபி⁴த⁴ம்மாவதாரோ. ததா² ஹி பா⁴வனா ஸாதூ⁴னம் ஸம்பா⁴வனா ஹிதவிபா⁴வனா ஹிதப்பகாஸனதோ ஸதா³ தோஸதா³தி யோஜனா.

1403-14. அயுத்தம் வா விருத்³த⁴ம் வாதி ஏத்த² ‘‘அட்ட²கதா²ய விமுக²பூ⁴தம் அயுத்தம் நாம, பாளியா விமுக²பூ⁴தம் விருத்³த⁴’’ந்தி வத³ந்தி. ப்³யப்பதா²னந்தி ச வாசனாமக்³கா³னந்தி அத்தோ². திவிதா⁴தி ஏகோ ப்³யப்பதோ² ஸத்³த³ஸம்பன்னோ, ந அத்த²ஸம்பன்னோ, ஏகோ அத்த²ஸம்பன்னோ, ந ஸத்³த³ஸம்பன்னோ, ஏகோ உப⁴யஸம்பன்னோதி திப்பகாராதி அத்தோ². ஹிதமேவ அத்தோ²தி ஹிதத்தோ², தம் அத்தனோ காமேதீதி ஹிதத்த²காமோ. அஸம்கிண்ணகுலாகுலேஹி அஸம்பி⁴ன்னகுலேஹி ஸம்கிண்ணே. கேலாஸோயேவ ஸிக²ரோதி கேலாஸஸிக²ரோ, ஸோ ஹி ஹிமவதோ சதுராஸீதியா கூடஸஹஸ்ஸானம் பாமோக்கோ² ரஜதமயோ மஹாஸிக²ரோ. ததா³காரேஹி ஸப்³ப³ஸேதேஹி பாஸாதே³ஹி படிமண்டி³தத்தா கேலாஸ…பே… மண்டி³தோ. கண்ஹதா³ஸேனாதி ஏவம்னாமகேன உபாஸகேன. பாசீனபாஸாதே³தி பாசீனதி³ஸாபா⁴க³ஸன்னிஸ்ஸிதே பாஸாதே³. அயந்தி அயமபி⁴த⁴ம்மாவதாரோ.

நிட்டி²தாயம் அபி⁴த⁴ம்மத்த²விகாஸினீ நாம

அபி⁴த⁴ம்மாவதாரஸம்வண்ணனா.

நிக³மனகதா²

1. ரம்மே புலத்தி²னக³ரே நக³ராதி⁴ராஜே,

ரஞ்ஞா பரக்கமபு⁴ஜேன மஹாபு⁴ஜேன;

காராபிதே வஸதி ஜேதவனே விஹாரே,

யோ ரம்மஹம்மியவரூபவனாபி⁴ராமே.

2. ஸம்பன்னஸீலத³மஸம்யமதோஸிதேஹி,

ஸம்மானிதோ வஸிக³ணேஹி கு³ணாகரேஹி;

பத்தோ முனிந்த³வசனாதி³ஸு நேகக³ந்த²-

ஜாதேஸு சாசரியதம் மஹிதம் விதூ³ஹி.

3. ஞாணானுபா⁴வமிஹ யஸ்ஸ ச ஸூசயந்தீ,

ஸம்வண்ணனா ச வினயட்ட²கதா²தி³கானம்;

ஸாரத்த²தீ³பனிமுகா² மது⁴ரத்த²ஸார-

ஸந்தீ³பனேன ஸுஜனம் பரிதோஸயந்தீ.

4. தஸ்ஸானுகம்பமவலம்பி³ய ஸாரிபுத்த-

த்தே²ரஸ்ஸ தா²மக³தஸாரகு³ணாகரஸ்ஸ;

யோ ஸாஸனே ஜினவரஸ்ஸ ரதிம் உளாரம்,

பப்போதி நந்தி³பரிவேணனிவாஸவாஸீ.

5. ஸ ஸாத⁴யம் ஸோதுஹிதம் அனப்பகம்,

ஸுமங்க³லோதீ³ரிதனாமவிஸ்ஸுதோ;

அகாபி⁴த⁴ம்மத்த²விகாஸினிம் இமம்,

பகாஸயந்திம் மது⁴ரத்த²ஸம்பத³ந்தி.

அபி⁴த⁴ம்மாவதாரடீகா ஸமத்தா.