23. தேவீஸதிமோ பரிச்சே²தோ³

கிலேஸப்பஹானகதா²வண்ணனா

1375. இதா³னி இமிஸ்ஸாயேவ சதுத்த²ஞாணாய ஞாணத³ஸ்ஸனவிஸுத்³தி⁴யா ஆனுபா⁴வவிஜானனத்த²ம் யேன யே த⁴ம்மா பஹாதப்³பா³, தேஸம் பஹானஞ்ச அபி⁴ஸமயகாலே பரிஞ்ஞாதி³கிச்சானி ச த³ஸ்ஸேதும் ‘‘ஏதேஸு யேன யே த⁴ம்மா’’திஆதி³ ஆரத்³த⁴ம். யே த⁴ம்மாதி யே ஸம்கிலேஸத⁴ம்மா. ஸம்யோஜனாதீ³ஸு க²ந்தே⁴ஹி க²ந்தா⁴னம், ப²லேன கம்மஸ்ஸ, து³க்கே²ன வா ஸத்தானம் ஸம்யோஜனட்டே²ன ப³ந்த⁴னட்டே²ன ஸம்யோஜனானி. ஸம்பயுத்தத⁴ம்மானம் விபா³த⁴னட்டே²ன, உபதாபனட்டே²ன, ஸம்கிலிட்ட²தாய ச கிலேஸா. அபி⁴னிவேஸாதி³வஸேன மிச்சா²விபரீதம் பவத்தனதோ மிச்சா²ஸபா⁴வாதி மிச்ச²த்தா. லோகே த⁴ம்மா, லோகபரியாபன்னா த⁴ம்மா, லோகப்பவத்தியம் ஸதி அனுபரமத⁴ம்மத்தா வாதி லோகத⁴ம்மா. மச்சே²ரஸ்ஸ பா⁴வோ, கம்மம் வாதி மச்ச²ரியம். விபரீதட்டே²ன விபல்லாஸா. நாமகாயஸ்ஸ ச ரூபகாயஸ்ஸ ச க³ந்த²னதோ க³ந்தா². அரியேஹி அக³ந்தப்³பா³, அயுத்தா க³தீதி வா அக³தி. ஆஸவந்தீதி ஆஸவா, ஆப⁴வக்³க³தோ ஸப்³ப³மோகாஸலோகம், ஆகோ³த்ரபு⁴தோ ஸப்³பே³ த⁴ம்மே ப்³யாபேத்வா பவத்தந்தீதி அத்தோ², ஆஸவந்தி ஸம்ஸாரது³க்க²ந்தி வா ஆஸவா, சக்கா²தீ³ஹி வா ஸம்வராஸம்வரத்³வாரேஹி ஸத்தஸந்தானே ஆஸவந்தி வணதோ யூஸானி ஸந்த³ந்தி வியாதி ஆஸவா, ஆஸவந்தி வா ஏதேஹி சித்தானி விஸயேஸூதி ஆஸவா. ஸம்ஸாரமஹாஸாக³ரப்பத்திஹனனதோ ஓகா⁴ வியாதி ஓகா⁴. ஹேட்டா² வுத்தனயேன யோஜனதோ யோகா³. நிவாரேந்தி லோகியலோகுத்தரகு³ணவிஸேஸாதி⁴க³மந்தி நீவரணானி. அனிச்சாதி³த⁴ம்மஸபா⁴வம் அதிக்கம்ம பரதோ அஸபா⁴வதோ ஆமஸந்தீதி பராமாஸா. மண்டூ³கம் பன்னகோ³ விய ஆரம்மணம் பு⁴ஸம் ஆதி³யந்தீதி உபாதா³னானி. அப்பஹீனபா⁴வேன ஸத்தஸந்தானே அனுஸேந்தி மூஸிகவிஸம் விய அனுரூபகாரணம் லபி⁴த்வா உப்பஜ்ஜந்தீதி அனுஸயா. சித்தஸ்ஸ மலீனபா⁴வகரணட்டே²ன மலா. அகுஸலகம்மானி ச தானி து³க்³க³தீனம் பதா² சாதி அகுஸலகம்மபதா². இத⁴ பன கம்மபத²பா⁴வம் அப்பத்தானம் தம்ஸபா⁴வதோ க³ஹணம் த³ட்ட²ப்³ப³ம். சித்தம் உப்பஜ்ஜதி ஏத்தா²தி சித்துப்பாதோ³, சேதஸிகராஸி, அகுஸலோ ச ஸோ சித்துப்பாதோ³ சாதி அகுஸலசித்துப்பாதோ³.

காமப⁴வதோ உபரிகோட்டா²ஸபா⁴வதோ ததியமக்³க³ப்பத்தியா உத்³த⁴ம் ப⁴ஜிதப்³ப³தோ, ஸேவிதப்³ப³தோ சாதி உத்³த⁴ம்பா⁴கா³, ரூபாரூபப⁴வா, தேஸம் ஹிதானி தத்து²ப்பஜ்ஜனக²ந்தா⁴தி³யோஜனதோதி உத்³த⁴ம்பா⁴கி³யானி, தானியேவ ஸம்யோஜனானீதி உத்³த⁴ம்பா⁴கி³யஸம்யோஜனானி. ரூபாரூபப⁴வதோ ஹேட்டி²மகோட்டா²ஸபா⁴வதோ தத்து²ப்பாத³கிலேஸானம் அப்பஹீனபா⁴வேன ததியமக்³க³ப்பத்தியா ஹேட்டா² ப⁴ஜிதப்³ப³தோ வா அதோ⁴பா⁴கா³, காமப⁴வா, தேஸம் ஹிதானி ஸம்யோஜனானீதி அதோ⁴பா⁴கி³யஸம்யோஜனானீதி.

இமேஸு பன த³ஸஸு ரூபப⁴வஸம்யோஜனம், அரூபப⁴வஸம்யோஜனம், காமப⁴வஸம்யோஜனஞ்ச அத்த²தோ லோபோ⁴வ, ஸக்காயதி³ட்டி²ஸீலப்³ப³தபராமாஸாபி தி³ட்டி²யேவ, தஸ்மா த⁴ம்மதோ ஸத்த ஸம்யோஜனானி.

மிச்சா²ஸங்கப்போ மிச்சா²வாயாமோ மிச்சா²ஸமாதீ⁴தி ததா² பவத்தானம் விதக்கவீரியஸமாதீ⁴னமதி⁴வசனம். மிச்சா²வாசாத³யோ தயோ ததா² பவத்தா சேதனா. மிச்சா²ஸதி பன சித்துப்பாதோ³. மிச்சா²ஞாணம் ததா² பவத்தோ மோஹோ. மிச்சா²விமுத்தி லோகதூ²பிகாதீ³ஸு மோக்கோ²தி பவத்தமிச்சா²கா³ஹோ.

காரணூபசாரேனாதி லாப⁴ஹேதுகோ லாபோ⁴, அலாப⁴ஹேதுகோ அலாபோ⁴திஆதி³னா காரியஸ்ஸ காரணவஸேன உபசரணேன. லோகத⁴ம்மக்³க³ஹணந்தி லோகத⁴ம்மக்³க³ஹணேன க³ஹணம்.

ஆவாஸே மச்ச²ரியம், ஆவாஸஹேதுகம் வா மச்ச²ரியந்தி ஆவாஸமச்ச²ரியம். ஏவம் குலமச்ச²ரியாதீ³னிபி. தத்த² ஆவாஸோதி விஹாராதி³. குலந்தி உபட்டா²ககுலம், ஞாதிகுலஞ்ச. லாபோ⁴தி பச்சயலாபோ⁴யேவ. வண்ணோதி ஸரீரவண்ணோ ச கு³ணவண்ணோ ச. த⁴ம்மோதி ஆக³மோ, அதி⁴க³மோ ச.

‘‘தயோ’’தி வத்து²ம் அபி⁴ந்தி³த்வா வுத்தம், பி⁴ந்தி³த்வா ச பன வுச்சமானே த்³வாத³ஸ ஹோந்தி.

அபி⁴ஸஜ்ஜனூபனய்ஹனவஸேன பவத்தனதோ அபி⁴ஜ்ஜா²ப்³யாபாதா³னம் காயக³ந்த²தா த³ட்ட²ப்³பா³. ‘‘இத³மேவ ஸச்சம் மோக⁴மஞ்ஞ’’ந்தி ஏவம் அவத்து²ம்ஹி பவத்தோ அபி⁴னிவேஸோ இத³ம்ஸச்சாபி⁴னிவேஸோ. ஸீலப்³ப³தபராமாஸஇத³ம்ஸச்சாபி⁴னிவேஸகாயக³ந்தா² சேத்த² அத்த²தோ தி³ட்டி²யேவ, தஸ்மா த⁴ம்மதோ தயோ காயக³ந்தா².

‘‘ச²ந்த³தோ³ஸமோஹப⁴யானீ’’தி அக³திகாரணத்தா வுத்தம், ச²ந்தா³தீ³ஹி பன அகத்தப்³ப³கரணம், கத்தப்³பா³கரணஞ்ச அக³தி நாம.

ஆஸவேஸு காமராக³ப⁴வராகா³ அத்த²தோ லோபோ⁴தி த⁴ம்மதோ தயோ ஆஸவா.

தேஸமேவாதி காமராகா³தீ³னமேவ. தே ஹி ஓகோ⁴ விய அத்தனி பதிதே அபாயஸமுத்³த³ம் பாபேந்தி, ஸம்ஸாரது³க்க²தோ ச ஸீஸம் உக்கி²பிதும் ந தே³ந்தி, க²ந்தா⁴தீ³னி ச க²ந்தா⁴தீ³ஹி யோஜேந்தி.

காமுபாதா³னாதீ³னீதி காமுபாதா³னதி³ட்டு²பாதா³னஸீலப்³ப³துபாதா³னஅத்தவாது³பாதா³னானி. தி³ட்டு²பாதா³னாதீ³னி சேத்த² ததா² பவத்தா தி³ட்டி²யேவ, காமுபாதா³னம் லோபோ⁴தி த⁴ம்மதோ த்³வே உபாதா³னானி.

ஸத்தானுஸயாதி ஏத்த² யதி³ அப்பஹீனட்டே²ன ஸத்தஸந்தானே அனுஸேந்தீதி அனுஸயா. கஸ்மா ஸத்தேவ வுத்தா, நனு அஞ்ஞேஸம்பி கிலேஸானம் அப்பஹீனபா⁴வோ விஜ்ஜதீதி? ந மயம் அப்பஹீனமத்தேன அனுஸயம் வதா³ம, கிந்து அப்பஹீனபா⁴வேன தா²மக³தகிலேஸா அனுஸயாதி, தா²மக³மனஞ்ச நேஸம் அஞ்ஞேஹி அஸாதா⁴ரணோ ஸபா⁴வோ த³ட்ட²ப்³போ³. ததா² ஹி த⁴ம்மஸபா⁴வவேதி³னா ததா²க³தேன இமேயேவ அனுஸயா வுத்தா, காமராகோ³யேவ அனுஸயோ காமராகா³னுஸயோ. ஏவம் ஸேஸேஸுபி. அபரே பன ‘‘காமராக³ஸ்ஸ அனுஸயோ’’திஆதி³னிப்³ப³சனம் வத்வா காமராகா³தீ³னம் பீ³ஜபூ⁴தா அத்தபா⁴வஸ்ஸ கிலேஸஸம்பூ⁴தா கிலேஸுப்பாத³னஸத்தி அனுஸயாதி வண்ணேந்தி, தேஸம் மதபடிக்கே²போ இத⁴ பபஞ்சாவஹத்தா அனாஹடோ.

பாணஸ்ஸ அதிபாதோ பாணாதிபாதோ, பாணோதி வோஹாரதோ ஸத்தோ, பரமத்த²தோ ஜீவிதிந்த்³ரியம். தஸ்மிம் பாணே பாணஸஞ்ஞினோ ஜீவிதிந்த்³ரியுபச்சே²த³கப்பயோக³ஸமுட்டா²பிகா வத⁴கசேதனா பாணாதிபாதோ. பரப⁴ண்டே³ ததா²ஸஞ்ஞினோ ததா³தா³யகப்பயோக³ஸமுட்டா²பிகா தே²ய்யசேதனா அதி³ன்னாதா³னம். அஸத்³த⁴ம்மகாமதாய காயத்³வாரப்பவத்தா அக³ந்தப்³ப³ட்டா²னவீதிக்கமசேதனா காமேஸுமிச்சா²சாரோ. அபூ⁴தம் வத்து²ம் பூ⁴ததோ பரம் விஞ்ஞாபேதுகாமஸ்ஸ ததா² விஞ்ஞாபனப்பயோக³ஸமுட்டா²பிகா சேதனா முஸாவாதோ³. ஸோ பன பரஸ்ஸ அத்த²பே⁴த³கரோவ கம்மபதோ², இதரோ கம்மமேவ. ஸம்கிலிட்ட²சித்தஸ்ஸ பரபே⁴த³னகாமதாய, அத்தபியகம்யதாய வா பரபே⁴த³கப்பயோக³ஸமுட்டா²பிகா சேதனா பிஸுணவாசா. ஸாபி த்³வீஸு பி⁴ன்னேஸுயேவ கம்மபதோ². பரமம்மச்சே²த³கப்பயோக³ஸமுட்டா²பிகா ஏகந்தப²ருஸசேதனா ப²ருஸவாசா. அனத்த²விஞ்ஞாபனப்பயோக³ஸமுட்டா²பிகா ஸம்கிலிட்ட²சேதனா ஸம்ப²ப்பலாபோ நாம. ஸோ பன பரேஹி க³ஹிதேயேவ கம்மபதோ² ஹோதி. ‘‘அஹோ வதேத³ம் மம ஹோதூ’’தி ஏவம் பரப⁴ண்டா³பி⁴ஜ்ஜா²யனலக்க²ணா அபி⁴ஜ்ஜா². ‘‘அஹோ வதாயம் ஸத்தோ வினஸ்ஸேய்யா’’தி ஏவம் மனோபதோ³ஸலக்க²ணோ ப்³யாபாதோ³. ‘‘நத்தி² தி³ன்ன’’ந்திஆதி³னா நயேன விபரீதத³ஸ்ஸனலக்க²ணா மிச்சா²தி³ட்டி². ஏத்த² ச நத்தி²கஅஹேதுகஅகிரியதி³ட்டீ²ஹியேவ கம்மபத²பே⁴தோ³.

இமேஸு ச பாணாதிபாதாதி³ திவித⁴ம் காயகம்மமேவ. தம் காயவசீத்³வாரேஸுயேவ உப்பஜ்ஜதி, ந மனோத்³வாரே. ததா² முஸாவாதா³தி³ சதுப்³பி³த⁴ம் வசீகம்மமேவ. அபி⁴ஜ்ஜா²தி³கம் பன திவித⁴ம் மனோகம்மமேவ. தம் தீஸுபி த்³வாரேஸு பவத்ததி. த்³வாரந்தரேஸுபி பவத்தமானஸ்ஸ ஸகஸகனாமாபரிச்சாகோ³ வுத்தோயேவ. த⁴ம்மதோ சேத்த² ஆதி³தோ ஸத்த சேதனாஸபா⁴வா, இதரே தயோ சேதனாஸம்பயுத்தாதி த³ட்ட²ப்³பா³. மஹாஸாவஜ்ஜஅப்பஸாவஜ்ஜப்பயோகா³தி³பே⁴தோ³ பன தத்த² தத்த² வுத்தனயேன வேதி³தப்³போ³.

ஏதானீதி இமானி மக்³க³ஞாணானி. யதா²ஸம்ப⁴வந்தி தம்தம்மக்³கா³னுரூபம்.

அபாயம் க³ச்ச²ந்தி ஏதேஹீதி அபாயக³மனீயா. ஸேஸாதி ந அபாயக³மனீயா. ஓளாரிகாதி ததியமக்³கே³ன பஹாதப்³பா³வத்த²ம் உபாதா³ய ஓளாரிகா. தேனாஹ ‘‘ஸுகு²மா ததியமக்³க³ஞாணவஜ்ஜா²’’தி. ஸுகு²மா காமராக³படிகா⁴தி ஸம்ப³ந்தோ⁴. சதுத்த²மக்³க³ஞாணவஜ்ஜா² ஏவாதி அவதா⁴ரணேன பட²மமக்³கா³தி³வஜ்ஜ²தம் நிவத்தேதி. ந ஹி ரூபராகா³தீ³னம் அபாயகா³மினியாவத்தா²பி அத்தி², யதோ தே பட²மஞாணவஜ்ஜா²பி ஸியுந்தி.

யத்த² யத்த² பன ஏவ-ஸத்³தே³ன அவதா⁴ரணம் அகத்வா யம் யம் து³தியஞாணவஜ்ஜ²ந்தி வா ததியஞாணவஜ்ஜ²ந்தி வா சதுத்த²ஞாணவஜ்ஜ²ந்தி வா வக்க²தி, தத்த² தத்த² ஸோ ஸோ புரிமஞாணேஹி ஹதாபாயக³மனீயாதி³பா⁴வோவ ஹுத்வா உபரிஞாணவஜ்ஜோ² ஹோதீதி வேதி³தப்³போ³. தேன லோப⁴…பே… சதுத்த²ஞாணவஜ்ஜா²னீதி ஏத்த² லோபா⁴த³யோ ஹேட்டி²மமக்³க³வஜ்ஜா²பி ஹோந்தேவ.

யஸேதி பரிவாரே.

து³க்கே² ஸுக²ந்தி ஸஞ்ஞாசித்தவிபல்லாஸாதி ஸம்ப³ந்தோ⁴.

அக³தியோ பட²மமக்³க³ஞாணவஜ்ஜா²தி கிஞ்சாபி ச²ந்தா³த³யோ தண்ஹாதி³ஸபா⁴வா உபரிமக்³க³வஜ்ஜா², ததா²பி தம்மூலகஸ்ஸ அகத்தப்³ப³கரணஸ்ஸ, கத்தப்³பா³கரணஸ்ஸ ச அபாயக³மனீயதாய பட²மமக்³க³ஞாணவஜ்ஜா².

கதாகதகுஸலாகுஸலவிஸயம் யம் விப்படிஸாரபூ⁴தம் குக்குச்சம், தம் இத⁴ ததியஞாணவஜ்ஜ²ம் வுத்தம். யம் பன ‘‘குக்குச்சபகததாய ஆபத்திம் ஆபஜ்ஜதீ’’தி வுத்தம் குக்குச்சம், தம் ஸந்தா⁴ய ‘‘குக்குச்சவிசிகிச்சா² ஸோதாபத்திமக்³கே³ன பஹீயந்தீ’’தி (த⁴. ஸ. அட்ட². 1176) த⁴ம்மஸங்க³ணீஅட்ட²கதா²யம் வுத்தம், தஸ்மா த்³வின்னம் வசனானம் அயம் அதி⁴ப்பாயோ வேதி³தப்³போ³. அஞ்ஞேஸுபி ஏதி³ஸேஸு டா²னேஸு அதி⁴ப்பாயோவ பரியேஸிதப்³போ³, ந விரோத⁴தோ பச்சேதப்³ப³ம். ஓளாரிகானவஸேஸப்பஹானம் வா ஸந்தா⁴ய குக்குச்சஸ்ஸ பட²மததியஞாணவஜ்ஜ²தா வுத்தா. யம் பன அரஹதோ உப்பஜ்ஜமானம் ‘‘ப⁴க³வதா படிக்கி²த்தம் அனுவஸித்வா அனுவஸித்வா ஆவஸத²பிண்ட³ம் பு⁴ஞ்ஜிதுந்தி குக்குச்சாயந்தோ ந படிக்³க³ஹேஸீ’’தி (பாசி. 204) ஆக³தம் குக்குச்சம், ந தம் நீவரணம். ந ஹி நீவரணம் அரஹதோ உப்பஜ்ஜதி, நீவரணபதிரூபகம் பன கப்பதீதி வீமம்ஸனபூ⁴தம் வினயகுக்குச்சம் நாம, தம் ததா²பவத்தசித்துப்பாதோ³வ.

காமராக³படிகா⁴னுஸயா அனுஸஹக³தா ததியஞாணவஜ்ஜா², ஓளாரிகானம் பன து³தியஞாணவஜ்ஜ²தா ஹேட்டா² வுத்தனயாவ.

அகுஸலசித்துப்பாத³-க்³க³ஹணேன சேத்த² மக்க²பலாஸமாயாஸாடே²ய்யத²ம்ப⁴ஸாரம்பா⁴தீ³னம் ஸங்க³ஹோ கதோதி த³ட்ட²ப்³ப³ம்.

1376. தேன தேனாதி தேன தேன கா⁴தகேன ஸத்³தி⁴ம். கிம் பனேதானி ஏதே த⁴ம்மே கா⁴தேந்தானி அதீதானாக³தே கா⁴தேந்தி, உதா³ஹு பச்சுப்பன்னேதி. கிம் பனேத்த², யதி³ தாவ அதீதானாக³தே, அப²லோ வாயாமோ ஆபஜ்ஜதி. கஸ்மா? பஹாதப்³பா³னம் ததா³ நத்தி²தாய. அத² பச்சுப்பன்னே, ததா²பி அப²லோ வாயாமேன ஸத்³தி⁴ம் பஹாதப்³பா³னம் அத்தி²தாய. அதா²பி கத²ஞ்சி பஹானம் ஸியா, ஸம்கிலேஸிகா மக்³க³பா⁴வனா ஆபஜ்ஜதி பஹாதப்³ப³ப்பஹாயகானம் ஸஹாவட்டா²னதோ? ஸச்சமேதம், யே பன மக்³கே³ன அஸமுக்³கா⁴டிதத்தா காரணலாபே⁴ ஸதி அவஸ்ஸம் உப்பஜ்ஜனாரஹா கிலேஸா, தே அத்தனோ உப்பத்தியா அனுப்பத்தித⁴ம்மதம் ஆபாதே³ந்தானி ஏதானி தே அனாக³தே கா⁴தேந்தி நாம.

1377-82. பரிஞ்ஞாதீ³னி கிச்சானீதி பரிஞ்ஞாபஹானஸச்சி²கிரியாபா⁴வனாவஸேன சத்தாரி கிச்சானி. வுத்தானீதி ‘‘து³க்க²ம் பரிஞ்ஞேய்ய’’ந்திஆதி³னா (ஸம். நி. 5.1099), ‘‘யோ, பி⁴க்க²வே, து³க்க²ம் பஸ்ஸதீ’’திஆதி³னா (ஸம். நி. 5.1100) ச வுத்தானி. ஸச்சாபி⁴ஸமயேதி சதுன்னம் அரியஸச்சானம் படிவிஜ்ஜ²னக்க²ணே.

யதா²ஸபா⁴வதோதி அவிபரீதஸபா⁴வேன. ‘‘ஜானிதப்³பா³னீ’’தி வத்வா கத²ம் பனேதம் ஜானிதப்³ப³ம், கத²ம் நாம ஏகேகஸ்ஸ ஞாணஸ்ஸ ஏகக்க²ணே சத்தாரி கிச்சானி ஸம்ப⁴வந்தி. ந ஹி தாதி³ஸம் கிஞ்சி லோகே தி³ட்ட²ம் அத்தி², ந ச வசனம் லப்³ப⁴தீதி சோத³னம் மனஸி நிதா⁴ய தேஸம் ஜானனவிதி⁴ம் உபமாவஸேன தாவ த³ஸ்ஸேதும் ‘‘பதீ³போ ஹீ’’திஆதி³ வுத்தம். வித³ம்ஸேதீதி த³ஸ்ஸேதி. பரியாதி³யதீதி கே²பேதி.

1383-4. பரிஞ்ஞாபி⁴ஸமயேனாதி அனவஸேஸதோ பரிச்சி²ஜ்ஜ ஜானனஸங்கா²தேன படிவிஜ்ஜ²னேன. அபி⁴ஸமேதீதி அஸம்மோஹவஸேன படிவிஜ்ஜ²தி. பஹானாபி⁴ஸமயேனேவாதி ஸமுச்சே²த³ப்பஹானஸங்கா²தேன படிவிஜ்ஜ²னேன அஸம்மோஹதோவ அபி⁴ஸமேதி. பா⁴வனாவிதி⁴னாதி ஸஹஜாதாதி³பச்சயதாவஸேன பா⁴வனாபி⁴ஸமயவிதி⁴னா. மக்³க³ஞாணஞ்ஹி ஸம்மாஸங்கப்பாதி³வஸேன மக்³க³புப்³ப³பா⁴க³பா⁴வனாஸம்பூ⁴தேன அரியமக்³க³பா⁴வனாஸங்கா²தேன படிவிஜ்ஜ²னேன அபி⁴ஸமேதீதி அட்ட²ங்கி³கம் மக்³க³ம் அஸம்மோஹதோ படிவிஜ்ஜ²தி. தஞ்ஹி ஸம்பயுத்தத⁴ம்மேஸு ஸம்மோஹம் வித்³த⁴ம்ஸேந்தம் அத்தனிபி ஸம்மோஹம் வித்³த⁴ம்ஸேதியேவ. நிரோத⁴ந்தி நிப்³பா³னம். ஸச்சி²கரோதீதி பச்சக்க²கரணவஸேன படிவிஜ்ஜ²தி. ‘‘நிரோத⁴ம் ஸச்சி²கரோதீ’’தி நிரோத⁴ஸச்சமேகம் ஆரம்மணபடிவேதே⁴ன சத்தாரிபி ஸச்சானி அஸம்மோஹபடிவேதே⁴ன மக்³க³ஞாணம் படிவிஜ்ஜ²தி.

ஏவம் யுத்திவஸேன விபா⁴விதம் ஏகபடிவேத⁴ம் ஆக³மேனபி ஸாதே⁴தும் ‘‘வுத்தம்பி சேத’’ந்திஆதி³ வுத்தம். மக்³க³ஸமங்கி³ஸ்ஸ ஞாணந்தி ஹி ‘‘யோ நு கோ², ஆவுஸோ, து³க்க²ம் பஸ்ஸதி, து³க்க²ஸமுத³யம்பி ஸோ பஸ்ஸதி, து³க்க²னிரோத⁴ம்பி, து³க்க²னிரோத⁴கா³மினிபடிபத³ம்பி ஸோ பஸ்ஸதீ’’தி (ஸம். நி. 5.1100) ஏகஸச்சத³ஸ்ஸனஸமங்கி³னோ அஞ்ஞஸச்சத³ஸ்ஸனஸமங்கி³பா⁴வவிசாரணாயம் தமத்த²ம் ஸாதே⁴தும் ஆயஸ்மதா க³வம்பதித்தே²ரேன வுத்தம். அஞ்ஞதா² கமாபி⁴ஸமயே ஸதி புரிமதி³ட்ட²ஸ்ஸ புன அத³ஸ்ஸனதோ ஸமுத³யாதி³பஸ்ஸதோ து³க்கா²தி³த³ஸ்ஸனம் புன அவத்தப்³ப³ம் ஸியா. இதா³னி பனேத்த² உபமாஸம்ஸந்த³னம் கரோந்தோ ஆஹ ‘‘பதீ³போ’’திஆதி³. நிஸ்ஸயாபா⁴வஹேதுதாய து³க்க²பரிஞ்ஞாய வட்டிஜ்ஜா²பனஸதி³ஸதா, படிபக்க²வித்³த⁴ம்ஸனதாய ஸமுத³யப்பஹானஸ்ஸ அந்த⁴காரவினாஸனஸதி³ஸதா, ஞாணாலோகபரிப்³ரூஹனதாய மக்³க³பா⁴வனாய ஆலோகவித³ம்ஸனஸதி³ஸதா, தேன தேன மக்³கே³ன யதா² யதா² நிரோத⁴ஸ்ஸ ஸச்சி²கிரியா, ததா² ததா² கிலேஸஸ்னேஹபரியாதா³னம் ஹோதீதி நிரோத⁴ஸச்சி²கிரியாய ஸ்னேஹபரியாதா³னஸதி³ஸதா காரணூபசாரேன வுத்தா.

1385-6. அபராயபி உபமாய தமத்த²ம் த³ஸ்ஸேந்தோ ஆஹ ‘‘உக்³க³ச்ச²ந்தோ’’திஆதி³. ஓபா⁴ஸேதீதி பகாஸேதி. படிஹஞ்ஞதீதி படிப்பஸ்ஸம்பே⁴தி. ஏத்தா²பி யதா² ஸூரியோ ரூபக³தானி ஓபா⁴ஸேதி, ஏவம் மக்³க³ஞாணம் து³க்க²ம் பரிஜானாதி. யதா² அந்த⁴காரம் வினாஸேதி, ஏவம் ஸமுத³யம் பஜஹதி. யதா² ஆலோகம் த³ஸ்ஸேதி, ஏவம் ஸஹஜாதாதி³பச்சயதாய மக்³க³ம் பா⁴வேதி. யதா² ஸீதம் படிப்பஸ்ஸம்பே⁴தி, ஏவம் ஸப்³ப³கிலேஸத³ரத²பரிளாஹபடிப்பஸ்ஸத்³தி⁴பூ⁴தம் நிரோத⁴ம் ஸச்சி²கரோதீதி உபமாஸம்ஸந்த³னம் த³ட்ட²ப்³ப³ம்.

1388. அப்பேதீதி பப்போதி. து³க்க²பரிஞ்ஞாய ஸக்காயதீரஸமதிக்கமபா⁴வதோ ஓரிமதீரப்பஜஹனஸதி³ஸதா, மக்³க³பா⁴வனாய ஸத்ததிம்ஸபோ³தி⁴பக்கி²யத⁴ம்மவஹனதாய ப⁴ண்ட³வஹனஸதி³ஸதா, ஏத்தாவதா பஞ்ஞாபா⁴வனாய நானாகிலேஸவித்³த⁴ம்ஸனவஸப்பவத்தோ ஆனிஸம்ஸோ த³ஸ்ஸிதோ ஹோதீதி.

அரியப²லஸமாபத்தினிரோத⁴ஸமாபத்தியோபி பனஸ்ஸா ஆனிஸம்ஸாதி த³ட்ட²ப்³ப³ம். தா பன ஸங்கே²பதோ ஏவம் த³ட்ட²ப்³பா³ – ‘‘அரியப²லஸமாபத்தீ’’தி ஹி சதுன்னம்பி ப²லட்டா²னம் அத்தனோ அத்தனோ அரியப²லஸ்ஸ தி³ட்ட²த⁴ம்மஸுக²விஹாரத்த²ம் நிரோதே⁴ அப்பனா. சத்தாரோபி ஹி அரியபுக்³க³லா ஸகம் ஸகம் ப²லஸமாபத்திம் ஸமாபஜ்ஜந்தி. கேசி பன ‘‘அனாகா³மிஅரஹந்தோவ ஸமாபஜ்ஜந்தி ஸமாதி⁴ஸ்மிம் பரிபூரகாரிதாயா’’தி வத³ந்தி, தம் அகாரணம் அத்தனா படிலத்³த⁴ஸமாபத்திஸமாபஜ்ஜனே ஸமாதி⁴ஸ்மிம் பரிபூரகாரிதாய காதப்³பா³பா⁴வதோ. ஸப்³ப³ஸோ அஸமுச்சி²ன்னகிலேஸஸ்ஸ ஹி புது²ஜ்ஜனஸ்ஸாபி அத்தனா படிலத்³த⁴லோகியஸமாபத்திஸமாபஜ்ஜனம் லப்³ப⁴தி, கிமங்க³ம் பன ஸமுச்சி²ன்னேகச்சகிலேஸானம் அரியானம். உபரிமா பன ஹேட்டி²மம் புப்³பே³ படிலத்³த⁴ம்பி ந ஸமாபஜ்ஜந்தி புக்³க³லந்தரபா⁴வம் உபக³தத்தா. ஸமுக்³கா⁴டிதகம்மகிலேஸனிரோத⁴னேன ஹி புது²ஜ்ஜனேஹி விய ஸோதாபன்னஸ்ஸ, ஸோதாபன்னாதீ³ஹி ஸகதா³கா³மிஆதீ³னம் புக்³க³லந்தரபா⁴வூபக³மனம் அத்தி², அனந்தரப²லத்தா ச லோகுத்தரகுஸலானம் ஹேட்டி²மதோ உபரிமோ ப⁴வந்தரக³தோ விய ஹோதீதி தஸ்ஸ தஸ்ஸ அரியஸ்ஸ தம் தம் ப²லம் ப⁴வங்க³ஸதி³ஸம் ஹோதி, தஸ்மா புக்³க³லந்தரபா⁴வூபக³மனேன படிப்பஸ்ஸத்³த⁴த்தா நத்தி² உபரிமஸ்ஸ ஹேட்டி²மப²லஸமாபத்தியா ஸமாபஜ்ஜனம், ஹேட்டி²மோ பன உபரிமம் ந ஸமாபஜ்ஜதி அனதி⁴க³தத்தாதி சத்தாரோபி புக்³க³லா ஸகஸகப²லமேவ ஸமாபஜ்ஜந்தி. தம் பன ஸமாபஜ்ஜிதுகாமேன அரியஸாவகேன ரஹோக³தேன படிஸல்லீனேன உத³யப்³ப³யாதி³வஸேன ஸங்கா²ரா விபஸ்ஸிதப்³பா³. தஸ்ஸ பவத்தானுபுப்³ப³விபஸ்ஸனஸ்ஸ ஸங்கா²ராரம்மணகோ³த்ரபு⁴ஞாணானந்தரம் ப²லஸமாபத்திவஸேன நிரோதே⁴ சித்தம் அப்பேதி. ப²லஸமாபத்தினின்னசித்ததாய சேத்த² ஸேக²ஸ்ஸ ப²லமேவ உப்பஜ்ஜதி, ந மக்³கோ³. அஞ்ஞோ ஏவ ஹி விபஸ்ஸனாசாரோ அரியமக்³கா³வஹோ, அஞ்ஞோ ப²லஸமாபத்திஆவஹோ.

ததா² ஹி அரியமக்³க³வீதி²யம் அனுலோமஞாணானி அனிப்³பி³த்³த⁴புப்³பா³னம் தூ²லதூ²லலோப⁴க்க²ந்தா⁴தீ³னம் ஸாதிஸயம் பதா³லனேன லோகியஞாணேஸு உக்கம்ஸபாரமிப்பத்தானி மக்³கா³னுகூலானி ஹுத்வா உப்பஜ்ஜந்தி, ப²லஸமாபத்திவீதி²யம் பன தானி தேன தேன மக்³கே³ன தேஸம் தேஸம் கிலேஸானம் ஸமுச்சி²ன்னத்தா கிலேஸவிக்க²ம்ப⁴னே நிருஸ்ஸுக்கானி கேவலம் அரியானம் ப²லஸமாபத்திஸுக²ஸமங்கி³பா⁴வஸ்ஸ பரிகம்மப்பத்தானி ஹுத்வா உப்பஜ்ஜந்தீதி ந தேஸம் குதோசி வுட்டா²னஸம்ப⁴வோ. யதோ நேஸம் பச்சி²மோ ஸங்கா²ரனிமித்ததோ வுட்ட²ஹித்வா மக்³க³ஸ்ஸ அனந்தரபச்சயோ ப⁴வேய்ய, தேனேவ ச ப²லஸமாபத்தியா அனந்தரபச்சயபூ⁴தம் ஞாணம் ஸங்கா²ராரம்மணமேவ ஹோதி, ந நிப்³பா³னாரம்மணந்தி வேதி³தப்³ப³ம். புப்³பா³பி⁴ஸங்கா²ரவஸேன சஸ்ஸா பப³ந்த⁴வஸேன பவத்திபரிச்சி²ன்னகாலாபக³மே ப⁴வங்க³வஸேன ததோ வுட்டா²னஞ்ச வேதி³தப்³ப³ம்.

நிரோத⁴ஸமாபத்தி பன ததியசதுத்த²ப²லட்டா²னம் அனுபுப்³ப³னிரோத⁴வஸேன சித்தசேதஸிகானம் த⁴ம்மானம் அப்பவத்தி. அனாகா³மிஅரஹந்தோயேவ ஹி காமச்ச²ந்தா³தி³ஸமுச்சி²ந்த³னேன ஸமாதி⁴ஸ்மிம் பரிபூரகாரிதாய ஸமத²ப²லஸமன்னாக³தத்தா நிரோத⁴ம் ஸமாபஜ்ஜந்தி. ததா² ஹேதம் ஸமத²விபஸ்ஸனானம் யுக³னந்த⁴பா⁴வப்பவத்தனவஸேன த்³வீஹி ப³லேஹி ஸமன்னாக³தஸ்ஸேவ ஸம்ப⁴வதி, தஸ்மா தம் ஸமாபஜ்ஜிதுகாமேன அனாகா³மினா, கீ²ணாஸவேன வா அட்ட²ஸமாபத்திலாபி⁴னா ரஹோக³தேன படிஸல்லீனேன பட²மஜ்ஜா²னம் ஸமாபஜ்ஜித்வா வுட்டா²ய தத்த² ஸங்கா²ரா அனிச்சதோ து³க்க²தோ அனத்ததோ விபஸ்ஸிதப்³பா³, ததோ து³தியம் ததியம் சதுத்த²ம் ஆகாஸானஞ்சாயதனம் விஞ்ஞாணஞ்சாயதனம் ஸமாபஜ்ஜித்வா வுட்டா²ய ததே²வ தத்த² ஸங்கா²ரா ஸம்மஸிதப்³பா³, அத² ஆகிஞ்சஞ்ஞாயதனம் ஸமாபஜ்ஜித்வா வுட்டா²ய நானாப³த்³தா⁴விகோபனம் ஸங்க⁴படிமானனம் ஸத்து²பக்கோஸனம் அத்³தா⁴னபரிச்சே²தோ³தி சதுப்³பி³த⁴ம் புப்³ப³கிச்சம் காதப்³ப³ம்.

தத்த² ஸரீரதோ விஸம்யுத்தா மஞ்சபீடா²த³யோ ஸத்தாஹப்³ப⁴ந்தரே யதா² ந நஸ்ஸந்தி, ததா² அதி⁴ட்டா²னம் நானாப³த்³தா⁴விகோபனம். ஸரீரஸம்யுத்தே விஸும் அதி⁴ட்டா²னகிச்சம் நத்தி². ஸங்கோ⁴ பன ஞத்திகம்மாதீ³ஸு கிஞ்சிதே³வ கம்மம் கத்துகாமோ ‘‘யாவ மம் ந பக்கோஸதி, தாவதே³வ வுட்ட²ஹிஸ்ஸாமீ’’தி புப்³பா³போ⁴க³கரணம் ஸங்க⁴படிமானனம். ஸத்தா² ச ‘‘ஸிக்கா²பத³பஞ்ஞாபனாதீ³ஸு யாவ மம் ந பக்கோஸதி, தாவதே³வ வுட்ட²ஹிஸ்ஸாமீ’’தி புப்³பா³போ⁴க³கரணம் ஸத்து²பக்கோஸனம். ஸத்தாஹப்³ப⁴ந்தரே அத்தனோ ஆயுஸங்கா²ரஸ்ஸ பவத்தனஸமத்த²தாவலோகனம் அத்³தா⁴னபரிச்சே²தோ³. ஏவம் கதபுப்³ப³கிச்சேன நேவஸஞ்ஞானாஸஞ்ஞாயதனம் ஸமாபஜ்ஜிதப்³ப³ம். அதே²கம் வா த்³வே வா சித்தவாரே அதிக்கமித்வா அசித்தகோ ஹோதி, நிரோத⁴ம் பு²ஸதி, ததோ யதா²பரிச்சே²த³ம் ததியசதுத்த²ப²லானம் அஞ்ஞதரேன நிரோதா⁴ வுட்ட²ஹிஸ்ஸதீதி. ஏவமயம் து³விதா⁴ ஸமாபத்தி லோகுத்தரபஞ்ஞாய ஆனிஸம்ஸோ.

1392-4. ஸதே³வகலோகதோ உத்திண்ணேன, உத்தரிதரேன வாதி லோகுத்தரேன ஸம்மாஸம்பு³த்³தே⁴ன. பஞ்ஞாய பா⁴வனந்தி ஸம்ப³ந்தோ⁴. ஹிதபா⁴வனந்தி இத⁴லோகபரலோகஹிதவிபா⁴வனம் இமம் பஞ்ஞாபா⁴வனம். ஸுக²ஸம்ஹிதந்தி ஸினித்³த⁴ச்சா²யுத³கவந்ததாதி³னா ஸுக²ஸஹிதம். ஹிதந்தி யோக³கம்மஸ்ஸ ஹிதம். உத்தமந்தி உக்³க³ததமம், அச்சுக்³க³தம் ப³லவந்தம்பீதி அதி⁴ப்பாயோ. அவிக்³க³ஹகம்பத³ந்தி விக்³க³ஹஞ்ச கம்பஞ்ச ந தே³தீதி அவிக்³க³ஹகம்பத³ந்தி அத்தோ².

இதி அபி⁴த⁴ம்மத்த²விகாஸினியா நாம

அபி⁴த⁴ம்மாவதாரஸம்வண்ணனாய

கிலேஸப்பஹானகதா²வண்ணனா நிட்டி²தா.