17. ஸத்தரஸமோ பரிச்சே²தோ³

அபி⁴ஞ்ஞாரம்மணனித்³தே³ஸவண்ணனா

1104-5. பஞ்ச இத்³தி⁴விதா⁴தீ³னீதி –

‘‘இத்³தி⁴வித⁴ம் தி³ப்³ப³ஸோதம், பரசித்தவிஜானனா;

புப்³பே³னிவாஸானுஸ்ஸதி, தி³ப்³ப³சக்கூ²தி பஞ்சதா⁴’’தி. –

ஏவமாக³தா பஞ்ச. ஸத்தாபி⁴ஞ்ஞா இமா பனாதி அதீதம்ஸஞாணஸ்ஸ புப்³பே³னிவாஸானுஸ்ஸதிஞாணே, மனோமயஞாணஸ்ஸ ச இத்³தி⁴வித⁴ஞாணே அந்தோக³த⁴த்தா வுத்தம். அதீதம்ஸஞாணம் நாம பரேஸம் பச்சுப்பன்னப⁴வே யாவ படிஸந்தி⁴பரியோஸானம் பவத்தசித்தாரம்மணம் ஞாணம். மனோமயஞாணம்பி நாம மனோமயகாயாபி⁴னிம்மானாதி³வஸப்பவத்தம் இத்³தி⁴வித⁴ஞாணம்.

1106. இதா³னி இமேஸம் அபி⁴ஞ்ஞாஞாணானம் ஆரம்மணவினிச்ச²யே அஸம்மோஹத்த²ம் தம் த³ஸ்ஸேதுமாரப⁴ந்தோ ஆஹ ‘‘ஸத்தன்ன’’ந்திஆதி³. சத்தாரோ ஆரம்மணத்திகாதி பரித்தாரம்மணத்திகோ மக்³கா³ரம்மணத்திகோ அதீதாரம்மணத்திகோ அஜ்ஜ²த்தாரம்மணத்திகோதி இமே சத்தாரோ ஆரம்மணத்திகா. ஏத்தா²தி இத³ம் பச்சாமஸனம் கிம் திகானம், உதா³ஹு ஆரம்மணானந்தி, கிஞ்சேத்த² – யதி³ திகானம், தத³யுத்தம். ந ஹி திகேஸு அபி⁴ஞ்ஞாஞாணானி பவத்தந்தி. அத² ஆரம்மணானம், தம்பி அயுத்தம். ந ஹி அஞ்ஞம் உத்³தி³ஸித்வா அஞ்ஞஸ்ஸ பச்சாமஸனம் யுத்தந்தி. யதா² இச்ச²ஸி, ததா² ஹோது. ப⁴வது தாவ திகானம், நனு வுத்தம் ‘‘திகேஸு அபி⁴ஞ்ஞாஞாணானி நப்பவத்தந்தீ’’தி? நாயம் விரோதோ⁴ திகவோஹாரேன ஆரம்மணானம்யேவ க³ய்ஹமானத்தா. அத² வா பன ஹோது ஆரம்மணானம், நனு வுத்தம் ‘‘அஞ்ஞம் உத்³தி³ஸித்வா அஞ்ஞஸ்ஸ பச்சாமஸனம் அயுத்த’’ந்தி. அயம்பி ந தோ³ஸோ யதா²வுத்தகாரணேனேவாதி.

1107-10. பரித்தாதீ³ஸு ஸத்தஸூதி அஸதிபி வத்து²பே⁴தே³ பூ⁴மிகாலஸந்தானபே⁴த³வஸேன பி⁴ன்னேஸு பரித்தமஹக்³க³தஅதீதானாக³தபச்சுப்பன்னஅஜ்ஜ²த்தப³ஹித்³தா⁴ரம்மணவஸேன ஸத்தஸு பரித்தாதி³ஆரம்மணவிபா⁴கே³ஸு. இத்³தி⁴வித⁴ஞாணஸ்ஸ மக்³கா³ரம்மணதாய அபா⁴வதோ இத⁴ மக்³கா³ரம்மணத்திகோ ந லப்³ப⁴தி. காயம் சித்தஸன்னிஸ்ஸிதம் கத்வா அதி³ஸ்ஸமானேன காயேன க³ந்துகாமோதி ஸம்ப³ந்தோ⁴. சித்தஸன்னிஸ்ஸிதகரணஞ்ச தம் விய காயஸ்ஸ அதி³ஸ்ஸமானஸீக⁴க³திகதாவஸேன தக்³க³திகதாபாத³னம். யதா² சித்தம் ந தி³ஸ்ஸதி ஸீக⁴க³மனஞ்ச, ஏவம் காயம்பி அதி³ஸ்ஸமானம், ஸீக⁴க³மனஞ்ச கத்வா யதி²ச்சி²தட்டா²னம் க³ந்துகாமோதி அயஞ்ஹேத்த² அத்தோ². சித்தவஸேனாதி மஹக்³க³தசித்தவஸேன பரிணாமேதீதி பாட²ஸேஸோ. தேனாஹ ‘‘தம் மஹக்³க³தே ச சித்தஸ்மிம் ஸமாரோபேதீ’’தி. பாத³கஜ்ஜா²னஞ்ஹி ஸமாபஜ்ஜித்வா வுட்டா²ய ‘‘அயம் காயோ இத³ம் சித்தம் விய அதி³ஸ்ஸமானோ, ஸீக⁴க³மனோ ச ஹோதூ’’தி பரிகம்மம் கரோதி, பரிகம்மம் பன கத்வா புன ஸமாபஜ்ஜித்வா வுட்டா²ய ததே²வ பரிகம்மம் கரோந்தோ காயம் க³ஹேத்வா மஹக்³க³தே பாத³கசித்தே ஸமாரோபேதி, தக்³க³திகம் கரோதி விய, அதி³ஸ்ஸமானம், ஸீக⁴க³மனஞ்ச கரோதி. தம் பன ஸீக⁴க³மனத்த²ம் அபா⁴விதித்³தி⁴பாதா³னம் விய த³ந்த⁴ம் அப்பவத்தித்வா கதிபயசித்தவாரேஹேவ இச்சி²தட்டா²னப்பத்திவஸேன த³ட்ட²ப்³ப³ம், ந ஏகசித்தக்க²ணேனேவ. ‘‘நாஹம், பி⁴க்க²வே, அஞ்ஞம் ஏகத⁴ம்மம்பி ஸமனுபஸ்ஸாமி, யம் ஏவம் லஹுபரிவத்தம், யத²யித³ம், பி⁴க்க²வே, சித்த’’ந்தி (அ. நி. 1.48) ஹி ஏத்த² அஞ்ஞ-க்³க³ஹணேனேவ ரூபத⁴ம்மானம் க³ஹிதத்தா சித்தக்க²ணவஸேன ரூபப்பவத்தி ந யுத்தா. யத்த² யத்த² ச த⁴ம்மா உப்பஜ்ஜந்தி, தத்த² தத்தே²வ பி⁴ஜ்ஜந்தி ச, ந ச இத்³தி⁴ப³லேன த⁴ம்மானம் கேனசி லக்க²ணஞ்ஞத²த்தம் ஸக்கா காதுந்தி. சித்தவஸேன ரூபகாயம் பாத³கஜ்ஜா²னே ஸமாரோபேந்தஸ்ஸ காயமேவ ஆரம்மணந்தி ஆஹ ‘‘காயாரம்மணதோ’’தி, காயே வண்ணாரம்மணதோதி வுத்தம் ஹோதி. காயஸன்னிஸ்ஸிதம் கத்வா சித்தந்தி ஏத்த² ந சித்தம் காயம் விய த³ந்த⁴ம் தி³ஸ்ஸமானம் கரோதி, கிந்து த³ந்த⁴தி³ஸ்ஸமானக³திகரணமத்தமேவாதி த³ட்ட²ப்³ப³ம்.

1112-3. அனாக³தமதீதஞ்ச கரோதி விஸயம் யதா³தி மஹாதா⁴துனிதா⁴னே மஹாகஸ்ஸபத்தே²ராதீ³னம் விய அனாக³தம் அதி⁴ட்ட²ஹந்தானம் அனாக³தம் ஆரம்மணம் கரோதி, காயவஸேன சித்தபரிணாமனகாலே ததே³வ சிரனிருத்³த⁴ம் பாத³கஜ்ஜா²னம் ஆரம்மணம் கரோந்தானம் அதீதம் ஆரம்மணம் கரோதி, ததா³ அதீதாரம்மணம், அனாக³தகோ³சரஞ்ச ஹோதி, பச்சுப்பன்னோ கோ³சரோ பச்சுப்பன்னஸ்ஸ ரூபகாயஸ்ஸ ஆரம்மணகரணதோ. ஹத்தி²ஆத³யோ அபி⁴னிம்மினந்தஸ்ஸாபி ஹி கிஞ்சாபி பரிகம்மம் அனாக³தாரம்மணம் ஹோதி, அதி⁴ட்டா²னசித்தம் பன பச்சுப்பன்னாரம்மணமேவ. உபசாராரம்மணம் விய ஹி படிபா⁴க³னிமித்தம் தேன ஸஹ பாதுபூ⁴தமேவ தஸ்ஸாரம்மணம் ஹோதி.

1114-5. காயம் …பே… ஸியாதி அத்தனோ காயம் சித்தவஸேன பரிணாமனகாலே அஜ்ஜ²த்தஸ்ஸ காயஸ்ஸ ஆரம்மணகரணதோ, அத்தனோ சித்தம் காயவஸேன பரிணாமனகாலே சித்தஸ்ஸ ஆரம்மணகரணதோ. வா-ஸத்³தே³ன அவுத்தஸமுச்சயத்தே²ன க³ஹிதே அத்தனோ குமாரவண்ணாதி³அபி⁴னிம்மானகாலே காயஸ்ஸ ஆரம்மணகரணதோ ச அஜ்ஜ²த்தாரம்மணம் ஸியா. ப³ஹித்³தா⁴ ரூபத³ஸ்ஸனேதி ப³ஹித்³தா⁴ ஹத்தி²அஸ்ஸாதி³ரூபத³ஸ்ஸனகாலே.

1116-8. பச்சுப்பன்னே பரித்தே சாதி ஸரூபவிபா⁴வனமேதம். தி³ப்³ப³ஸோதஸ்ஸ ஹி பச்சுப்பன்னோவ ஸத்³தோ³ ஆரம்மணம் ஹோதி, ஸோ ச ஸபா⁴வதோ பரித்தோவ. குச்சி²ஸத்³த³ஸ்ஸாதி குச்சி²யம் வாதஸத்³த³ஸ்ஸ. தத்த² பாணகஸத்³த³ஸ்ஸ பன ஸவனே ப³ஹித்³தா⁴ரம்மணமேவ. வஸிதாபத்தஸ்ஸ அத்தனோ விதக்கவிப்பா²ரஸத்³த³ஸவனேபி அஜ்ஜ²த்தாரம்மணந்தி வத³ந்தி, தம் பன ஏகாத³ஸப⁴வங்க³சித்ததோ உபரி ப⁴வங்க³ம் பவத்திதுமத³த்வா ப⁴வங்க³தோ வுட்டா²ய ஆவஜ்ஜனஸமத்த²தாவஸேன வஸிதாபத்தஸ்ஸேவ யுஜ்ஜதி. ‘‘பரஸ்ஸ ச ஸத்³த³ஸ்ஸா’’தி ஸம்ப³ந்தி⁴தப்³ப³ம். ந ஹி பரஸ்ஸ குச்சி²ஸத்³த³ஸவனேயேவ ப³ஹித்³தா⁴ரம்மணம் ஹோதி, அத² கோ² பரஸ்ஸ சித்தஸமுட்டா²னஸத்³த³ஸவனேபீதி.

1119-22. பரித்தாதீ³ஸூதி பரித்தமஹக்³க³தஅப்பமாணமக்³க³அதீதானாக³தபச்சுப்பன்னப³ஹித்³தா⁴ரம்மணேஸு. பரித்தானந்தி காமாவசரசித்தானம். மஜ்ஜி²மானந்தி பரித்தஅப்பமாணானம் மஜ்ஜே² ப⁴வத்தா மஜ்ஜி²மஸங்கா²தானம் ரூபாரூபாவசரசித்தானம். மஜ்ஜே²ப⁴வதா ச தே³ஸனாவஸேன, ந ஸபா⁴வவஸேன. சேதோபரியஞாணம் பரஸ்ஸ சித்தமேவ ஜானாதி, அவஸேஸக்க²ந்த⁴த்தயம் பன ந ஜானாதீதி இமம் மஹாஅட்ட²கதா²வாத³ம் ஸந்தா⁴யாஹ ‘‘மக்³க³சித்தஸ்ஸ ஜானனே’’திஆதி³. அயஞ்ஹேத்த² அதி⁴ப்பாயோ – யஸ்மா சேதோபரியஞாணம் சித்தமேவ ஜானாதி, தஸ்மா தம் மக்³கா³ரம்மணம் ந ஹோதி, மக்³க³ஸம்பயுத்தசித்தஜானனதோ பன பரியாயேன மக்³கா³ரம்மணதா அட்ட²கதா²யம் அனுஞ்ஞாதாதி. பட்டா²னே பன –

‘‘குஸலா க²ந்தா⁴ இத்³தி⁴வித⁴ஞாணஸ்ஸ சேதோபரியஞாணஸ்ஸ புப்³பே³னிவாஸானுஸ்ஸதிஞாணஸ்ஸ யதா²கம்மூபக³ஞாணஸ்ஸ அனாக³தம்ஸஞாணஸ்ஸ ஆரம்மணபச்சயேன பச்சயோ’’தி (பட்டா². 1.1.404) –

வுத்தத்தா சத்தாரோபி க²ந்தா⁴ சேதோபரியஞாணஸ்ஸ ஆரம்மணம் ஹோந்தி, தஸ்மா நிப்பரியாயேனேவ மக்³கா³ரம்மணதா லப்³ப⁴தீதி இத³மேத்த² ஸங்க³ஹகாரானம் ஸன்னிட்டா²னம்.

1123-5. அதீதஸத்ததி³வஸப்³ப⁴ந்தரே, அனாக³தஸத்ததி³வஸப்³ப⁴ந்தரேயேவ ச பவத்தம் பரசித்தம் சேதோபரியஞாணம் ஜானாதி, ததோ பட்டா²ய பன படிஸந்தி⁴பரியோஸானம், சுதிபரியோஸானஞ்ச பவத்தம் அதீதம்ஸஞாணஸ்ஸ, அனாக³தம்ஸஞாணஸ்ஸ ச கோ³சரந்தி அதி⁴ப்பாயேனாஹ ‘‘அதீதே’’திஆதி³. அதீதஸ்ஸ, அனாக³தஸ்ஸ ச பரசித்தஸ்ஸ ஜானனம் ஸம்ப⁴வதி, பச்சுப்பன்னஸ்ஸ பன ந ஸம்ப⁴வதீதி புச்ச²தி ‘‘கத²ஞ்ச பனா’’திஆதி³. இதரோ யத்த² ஸம்ப⁴வதி, தம் த³ஸ்ஸேதும் பச்சுப்பன்னம் தாவ விப⁴ஜித்வா த³ஸ்ஸேந்தோ ‘‘பச்சுப்பன்னம் திதா⁴ வுத்த’’ந்திஆதி³மாஹ. க²ணஸந்ததிஅத்³த⁴தோதி க²ணபச்சுப்பன்னம் ஸந்ததிபச்சுப்பன்னம் அத்³தா⁴பச்சுப்பன்னந்தி ஏவம் க²ணஸந்ததிஅத்³தா⁴வஸேன திதா⁴ வுத்தம்.

1126. திக்க²ணஸம்பத்தந்தி உப்பாத³ட்டி²திப⁴ங்க³வஸேன க²ணத்தயபரியாபன்னம். பச்சுப்பன்னக²ணாதி³கந்தி க²ண-ஸத்³தா³தி³கம் பச்சுப்பன்னம் க²ணபச்சுப்பன்னந்தி வுத்தம் ஹோதி. ஏகத்³வேஸந்ததிவாரபரியாபன்னந்தி ஏத்த² அந்த⁴காரே நிஸீதி³த்வா ஆலோகட்டா²னம் க³தஸ்ஸ ந ச தாவ ஆரம்மணம் பாகடம் ஹோதி, யாவ பன தம் பாகடம் ஹோதி, ஏத்த²ந்தரே பவத்தா ரூபஸந்ததி, அரூபஸந்ததி வா ‘‘ஏகத்³வேஸந்ததிவாரா’’தி வேதி³தப்³பா³. ‘‘ஆலோகட்டா²னே விசரித்வா ஓவரகம் பவிட்ட²ஸ்ஸாபி ந தாவ ஸஹஸா ரூபம் பாகடம் ஹோதி, யாவ தம் பாகடம் ஹோதி, புப்³பே³வ தத்த² நிஸின்னஸ்ஸ விய ஏத்த²ந்தரே ஏகத்³வேஸந்ததிவாரா வேதி³தப்³பா³. தூ³ரே ட²த்வா பன ரஜகாதீ³னம் ஹத்த²விகாரம், க⁴ண்டிபே⁴ரீஆதி³ஆகோடனஹத்த²விகாரஞ்ச தி³ஸ்வா ந பன தாவ ஸத்³த³ம் ஸுணாதி, யாவ பன தம் ஸுணாதி, ஏத்த²ந்தரே ஏகத்³வேஸந்ததிவாரா வேதி³தப்³பா³’’தி (விஸுத்³தி⁴. 2.416) ஏவம் தாவ மஜ்ஜி²மபா⁴ணகத்தே²ரா வத³ந்தி.

ஸம்யுத்தபா⁴ணகா பன ‘‘ரூபஸந்ததி அரூபஸந்ததீதி த்³வே ஸந்ததியோ வத்வா உத³கம் அக்கமித்வா க³தஸ்ஸ யாவ தீரே அக்கந்தஉத³கலேகா² ந விப்பஸீத³தி, அத்³தா⁴னதோ ஆக³தஸ்ஸ யாவ காயே உஸுமபா⁴வோ ந வூபஸம்மதி, ஆதபா ஆக³ந்த்வா க³ப்³ப⁴ம் பவிட்ட²ஸ்ஸ யாவ அந்த⁴காரபா⁴வோ ந விக³ச்ச²தி, அந்தோக³ப்³பே⁴ கம்மட்டா²னம் மனஸிகத்வா தி³வா வாதபானம் விவரித்வா ஓலோகேந்தஸ்ஸ யாவ அக்கீ²னம் ப²ந்த³னபா⁴வோ ந வூபஸம்மதி, அயம் ரூபஸந்ததி நாம. த்³வே தயோ ஜவனவாரா அரூபஸந்ததி நாமாதி வத்வா தது³ப⁴யம்பி ஸந்ததிபச்சுப்பன்னம் நாமா’’தி (விஸுத்³தி⁴. 2.416) ஏவம் ஏகமேவ ஸந்ததிவாரம் வத³ந்தி. தத்த² மஜ்ஜி²மபா⁴ணகவாதே³ ஏகச்சஸ்ஸ ஸீக⁴ம்பி பாகடம் ஹோதீதி ஏகத்³வேஸந்ததிவாராதி ஏக-க்³க³ஹணம்பி கதம். ஆசரியத⁴ம்மபாலத்தே²ரோ பன ‘‘அதிபரித்தஸபா⁴வஉதுஆதி³ஸமுட்டா²னா வா ஏகத்³வேஸந்ததிவாரா வேதி³தப்³பா³’’திபி (விஸுத்³தி⁴. மஹா. 2.416) ஆஹ.

1127-8. ஏகப்³ப⁴வபரிச்சி²ன்னந்தி ஏகஸ்மிம் ப⁴வே படிஸந்தி⁴சுதிவஸேன பரிச்சி²ன்னம் ஏகப⁴வபரியாபன்னம் த⁴ம்மஜாதம். யம் ஸந்தா⁴ய வுத்தம் ‘‘யோ சாவுஸோ மனோ, யே ச த⁴ம்மா, உப⁴யமேதம் பச்சுப்பன்னம், தஸ்மிம் சே பச்சுப்பன்னே ச²ந்த³ராக³படிப³த்³த⁴ம் ஹோதி விஞ்ஞாண’’ந்திஆதி³, ஸந்ததிபச்சுப்பன்னஞ்சேத்த² அபி⁴த⁴ம்மட்ட²கதா²ஸு ஆக³தம், அத்³தா⁴பச்சுப்பன்னம் ஸுத்தே. கேசீதி அப⁴யகி³ரிவாஸினோ.

1129-30. யதா² சாதிஆதி³ ஏத்த² தேஸம் ஓபம்மத³ஸ்ஸனம். ஏகபுப்ப²ம் அத்தனோ வண்டேன ஏகஸ்ஸ வண்டம் விஜ்ஜ²தீதி ஸம்ப³ந்தோ⁴. மஹாஜனஸ்ஸாபி…பே… விஜ்ஜ²தீதி ‘‘அதீதம் சித்தம், அனாக³தம் சித்தம், இமஸ்ஸ சித்தம், அஸுகஸ்ஸ சித்த’’ந்தி ஏவம் விபா⁴க³ம் அகத்வா பரஸ்ஸ சித்தம் ஜானாமிச்சேவ ராஸிவஸேன மஹாஜனஸ்ஸ சித்தே ஆவஜ்ஜிதே ஏகஸ்ஸ சித்தம் ஏகேன சித்தேன உப்பாத³க்க²ணே வா டி²திக்க²ணே வா ப⁴ங்க³க்க²ணே வா ஏகந்தேன படிவிஜ்ஜ²தீதி அத்தோ².

1131-2. தம் பன தேஸம் வசனம் அயுத்தந்தி த³ஸ்ஸேதும் ‘‘யேனாவஜ்ஜதீ’’திஆதி³ வுத்தம். வஸ்ஸஸஹஸ்ஸம்பி ஹி ஏவம் ஆவஜ்ஜயதோ ஆவஜ்ஜனஜவனானம் ஏகஸ்மிம் ஆரம்மணே டா²னம் நத்தி², அபி⁴ஞ்ஞாசித்தஞ்ச ஸசே க²ணபச்சுப்பன்னம் ஜானாதி, ஆவஜ்ஜனேன ஸஹ ஏகாரம்மணே வத்தமானமேவ ஜானாதி, நோ அஞ்ஞதா², தஸ்மா தேஸம் ஆவஜ்ஜனஜவனானம் த்³வின்னம் ஸஹ ஏகஸ்மிம் ஆரம்மணே அட்டா²னாபா⁴வதோ தம் ந யுஜ்ஜதி. ப⁴வது தாவ கோ ஏத்த² தோ³ஸோதி சே ஆஹ ‘‘ஆவஜ்ஜனஜவனான’’ந்திஆதி³. தத்த² மக்³க³ப²லவீதி²தோ அஞ்ஞம் அனிட்ட²ட்டா²னம். மக்³க³ப²லவீதி²யஞ்ஹி ஆவஜ்ஜனாதீ³னம் ஸங்கா²ராரம்மணத்தா, கோ³த்ரபு⁴ஆதீ³னஞ்ச நிப்³பா³னாரம்மணத்தா நானாரம்மணதா இட்டா², அஞ்ஞத்த² பன அனிட்டா², தஸ்மா அனிட்டே² டா²னே ஜவனாவஜ்ஜனானம் நானாரம்மணதாபத்திதோ³ஸோ அயுத்தோதி தம் தேஸம் வசனம் அயுத்தந்தி பகாஸிதம் அட்ட²கதா²ஸூதி அதி⁴ப்பாயோ.

1133-4. யதி³ ஏவம், கத²ம் சேதோபரியஞாணம் பச்சுப்பன்னாரம்மணம் ஹோதீதி ஆஹ ‘‘தஸ்மா’’திஆதி³. யஸ்மா ஏவம் அயுத்தந்தி பகாஸிதம், தஸ்மா. ஜவனவாரதோதி ஏகஜவனவாரவஸேன. இத³ம் பன க²ணபச்சுப்பன்னானந்தரம் லஹுகம் கத்வா பச்சுப்பன்னத³ஸ்ஸனத்த²ம் வுத்தம், யம் பன வத்தமானஜவனவீதி²தோ அதீதானாக³தவஸேன த்³விதிஜவனவீதி²பரிமாணகாலே பவத்தம் பரசித்தம், தம் ஸப்³ப³ம்பி ‘‘ஸந்ததிபச்சுப்பன்னம் நாமா’’தி அட்ட²கதா²யம் (விஸுத்³தி⁴. 2.416) வுத்தம், தஸ்மா ஜவனவாரதோதி த்³விதிஜவனவாரவஸேன தீ³பேதப்³ப³ம், ந ஸகலேன பச்சுப்பன்னத்³து⁴னாதி அதி⁴ப்பாயோ. நித்³தி³ட்ட²ம் ஸம்யுத்தட்ட²கதா²யம். தத்ராயம் தீ³பனாதிஆதி³ ஜவனவாரஸ்ஸ அத்³தா⁴பச்சுப்பன்னபா⁴வதீ³பனமுகே²ன இத்³தி⁴சித்தஸ்ஸ பவத்திஆகாரதீ³பனம்.

1139-41. ஸந்ததிபச்சுப்பன்னம்பி அத்³தா⁴பச்சுப்பன்னேனேவ ஸங்க³ஹேத்வா ஆஹ ‘‘அத்³தா⁴வஸா…பே… பனா’’தி. ஆனந்தா³சரியோ பனேத்த² அபி⁴த⁴ம்மமாதிகாய ஆக³தஸ்ஸ பச்சுப்பன்னபத³ஸ்ஸ அத்³தா⁴ஸந்ததிபச்சுப்பன்னபத³த்த²தா ந கத்த²சி பாளியம் வுத்தா, தஸ்மா சித்தஸாமஞ்ஞேன சித்தம் ஆவஜ்ஜயமானம் அபி⁴முகீ²பூ⁴தம் விஜ்ஜமானசித்தம் ஆவஜ்ஜேதி, பரிகம்மானி ச தம் தம் விஜ்ஜமானசித்தம் சித்தஸாமஞ்ஞேனேவ ஆரம்மணம் கத்வா சித்தஜானனபரிகம்மானி ஹுத்வா பவத்தந்தி. சேதோபரியஞாணம் பன விஜ்ஜமானசித்தம் படிவிஜ்ஜ²ந்தம் தேன ஸஹ ஏகக்க²ணே உப்பஜ்ஜதி. தத்த² யஸ்மா ஸந்தானக்³க³ஹணதோ ஏகத்தவஸேன ஆவஜ்ஜனாதீ³னி சித்தந்தேவ பவத்தானி, தஞ்ச சித்தமேவ, யம் சேதோபரியஞாணேன விபா⁴விதம், தஸ்மா ஸமானாகாரப்பவத்திதோ ந அனிட்டே² டா²னே நானாரம்மணதா ஹோதீதி க²ணபச்சுப்பன்னவஸேனேவ இமஸ்ஸ பச்சுப்பன்னாரம்மணதம் இச்ச²தி. இதரானீதி ஆவஜ்ஜனபரிகம்மசித்தானி. சக்கு²த்³வாரே விஞ்ஞாணந்தி சக்கு²விஞ்ஞாணம்.

1143-7. பரித்தாதீ³ஸு அட்ட²ஸூதி சேதோபரியஞாணஸ்ஸ வுத்தேஸு பச்சுப்பன்னாரம்மணம் ஹித்வா நவத்தப்³பா³ரம்மணஞ்ச பக்கி²பித்வா அட்ட²ஸு பரித்தாதீ³ஸு. அதீதே…பே… ப²லம்பி வாதி ஏத்த² அத்தனாதி நித³ஸ்ஸனமத்தம். பரேஹிபி பா⁴விதமக்³க³ம், ஸச்சி²கதப²லஞ்ச புப்³பே³னிவாஸானுஸ்ஸதிஞாணேன ஸமனுஸ்ஸரதி. வா-ஸத்³தே³ன வா அவுத்தஸமுச்சயத்தே²ன அத்தனா பா⁴விதம் மக்³க³ம், ப²லம்பி வா பரேஹி பா⁴விதம் மக்³க³ம், ப²லம்பி வாதி ஏவமத்தோ² க³ஹேதப்³போ³. ததா² ச வுத்தம் அட்ட²கதா²யம் ‘‘அத்தனா, பரேஹி பா⁴விதமக்³க³ம், ஸச்சி²கதப²லஞ்ச அனுஸ்ஸரணகாலே’’தி (விஸுத்³தி⁴. 2.417). ஏவ-காரம் பன பத³பூரணமத்தமேவ. ப²லம்பி வாதி ஏத்த² ‘‘பா⁴வித’’ந்தி ந ஸம்ப³ந்தி⁴தப்³ப³ம். ந ஹி ப²லம் பா⁴வேதப்³ப³ம் ஹோதி, அத² கோ² ஸச்சி²காதப்³ப³மேவாதி. ஸமனுஸ்ஸரதோ மக்³க³ந்தி ஏத்தா²பி ‘‘அத்தனா, பரேஹி வா பா⁴வித’’ந்தி ஸம்ப³ந்தி⁴தப்³ப³ம். ஏகந்ததோதி நியமதோ.

1148-50. நனு ச சேதோபரியஞாணயதா²கம்மூபக³ஞாணானிபி அதீதாரம்மணானேவ, கிம் பன தேஸம், இமஸ்ஸ ச ஆரம்மணே நானாகரணந்தி ஆஹ ‘‘சேதோபரியஞாணம்பீ’’திஆதி³. கிஞ்சாபீதி அயம் நிபாதஸமுதா³யோ, ஏகோ வா நிபாதோ விஸேஸானபி⁴தா⁴னனிமித்தே உபக³மனே த³ட்ட²ப்³போ³. அத² கோ²தி விஸேஸாபி⁴தா⁴னஸமாரம்பே⁴. சித்தமேவாதி இத³ம் புப்³பே³ விசாரிதமேவ. அதீதே சேதனாமத்தந்தி இத³ம்பி புப்³பே³ விய மஹாஅட்ட²கதா²வாத³ம் ஸந்தா⁴யேவ வுத்தம். தத்த² ஹி யதா²கம்மூபக³ஞாணஸ்ஸ சேதனாமத்தமேவ ஆரம்மணம் ஹோதி, ந சித்தம், நாபி இதரே த⁴ம்மா, யதோ தம் யதா²கம்மூபக³ந்தி வுச்சதீதி இமினா அதி⁴ப்பாயேன யதா²கம்மூபக³ஞாணம் அதீதசேதனாமத்தமேவ ஆரம்மணம் கரோதீதி வுத்தம், ஹேட்டா² த³ஸ்ஸிதபாளிவஸேன ஸப்³பே³ சத்தாரோபி க²ந்தா⁴ யதா²கம்மூபக³ஞாணஸ்ஸ ஆரம்மணந்தி ஸங்க³ஹகாரானம் ஸன்னிட்டா²னம். நத்தி² கிஞ்சி அகோ³சரந்தி கிஞ்சி க²ந்த⁴ம் வா க²ந்த⁴படிப³த்³த⁴ம் நாமகோ³த்தாதி³ம் வா அகோ³சரம் நாம நத்தி². தஞ்ஹி அதீதக்க²ந்த⁴க²ந்த⁴படிப³த்³தே⁴ஸு த⁴ம்மேஸு ஸப்³ப³ஞ்ஞுதஞ்ஞாணஸமானக³திகமேவாதி அதி⁴ப்பாயோ.

1151-2. அத்தக்க²ந்தா⁴னுஸ்ஸரணேதி அத்தனோ க²ந்தா⁴னுஸ்ஸரணகாலே. ஸரணே…பே… கோ³சரந்தி ‘‘அதீதே விபஸ்ஸீ ப⁴க³வா அஹோஸி, தஸ்ஸ மாதா ப³ந்து⁴மதீ, பிதா ப³ந்து⁴மா’’திஆதி³னா நயேன நாமகோ³த்தாதி³ம், பத²வீனிமித்தாதி³ஞ்ச அனுஸ்ஸரணகாலே நவத்தப்³பா³ரம்மணம் ஹோதி. நவத்தப்³ப³கோ³சரந்தி ஹி பரித்தாரம்மணஅதீதாரம்மணத்திகவஸேன வுத்தம், அஜ்ஜ²த்தாரம்மணத்திகவஸேன பன ஆகிஞ்சஞ்ஞாயதனஜ்ஜா²னஸ்ஸ ஆரம்மணபூ⁴தத⁴ம்மாரம்மணகாலே நவத்தப்³பா³ரம்மணம் ஹோதி, அவஸேஸபஞ்ஞத்தாரம்மணகாலே ப³ஹித்³தா⁴ரம்மணம் ஹோதி. நாமகோ³த்தந்தி சேத்த² க²ந்த⁴படிப³த்³தோ⁴ ஸம்முதிஸித்³தோ⁴ ப்³யஞ்ஜனத்தோ², ந ப்³யஞ்ஜனம். ப்³யஞ்ஜனஞ்ஹி ஸத்³தா³யதனஸங்க³ஹிதத்தா பரித்தம் ஹோதி. யதா²ஹ ‘‘நிருத்திபடிஸம்பி⁴தா³ பரித்தாரம்மணா’’தி (விப⁴. 749).

1154. தி³ப்³ப³ஸோதஸமந்தி யஸ்மா பச்சுப்பன்னம், பரித்தஞ்ச ரூபம் ஆரம்மணம் கரோதி, தஸ்மா பச்சுப்பன்னாரம்மணம், பரித்தாரம்மணஞ்ச ஹோதி, அத்தனோ குச்சி²க³தரூபத³ஸ்ஸனே, பரஸ்ஸ ஹத³யனிஸ்ஸிதலோஹிதத³ஸ்ஸனாதீ³ஸு ச அஜ்ஜ²த்தாரம்மணம், ப³ஹித்³தா⁴ரம்மணஞ்ச ஹோதி.

1155-6. பரித்தாதீ³ஸு அட்ட²ஸூதி புப்³பே³னிவாஸானுஸ்ஸதிஞாணஸ்ஸ வுத்தேஸு அதீதாரம்மணம் வஜ்ஜேத்வா அனாக³தாரம்மணம் பக்கி²பித்வா அட்ட²ஸு. நிப்³ப³த்திஸ்ஸதி…பே… பஜானதோதி இமினா நிப்³ப³த்தக்க²ந்த⁴ஜானனமாஹ. அனாக³தம்ஸஞாணஸ்ஸ அனாக³தமகோ³சரம் நத்தி². தம்பி ஹி அனாக³தக்க²ந்த⁴க²ந்த⁴படிப³த்³தே⁴ஸு த⁴ம்மேஸு ஸப்³ப³ஞ்ஞுதஞ்ஞாணஸமானக³திகமேவ.

1163. ஜானனே நாமகோ³த்தஸ்ஸாதி ‘‘அனாக³தே மேத்தேய்யோ நாம ஸம்மாஸம்பு³த்³தோ⁴ உப்பஜ்ஜிஸ்ஸதி, தஸ்ஸ ஸுப்³ரஹ்மா நாம பிதா ப⁴விஸ்ஸதி, ப்³ரஹ்மவதீ நாம மாதா’’திஆதி³னா நயேன நாமகோ³த்தாதி³ஜானனகாலே.

1164-5. பரித்தாதீ³ஸு பஞ்சஸூதி பரித்தமஹக்³க³தஅதீதஅஜ்ஜ²த்தப³ஹித்³தா⁴ரம்மணவஸேன பஞ்சஸு. காமகம்மஸ்ஸாதி காமாவசரகம்மஸ்ஸ.

1169. விவித⁴த்த²வண்ணபத³ந்தி நானப்பகாரஅத்த²பதே³ஹி, ப்³யஞ்ஜனபதே³ஹி ச ஸம்பன்னம். மது⁴ரத்த²மதினீஹரந்தி மது⁴ரத்த²ம் அதினீஹரஞ்சாதி பத³ச்சே²தோ³.

இதி அபி⁴த⁴ம்மத்த²விகாஸினியா நாம

அபி⁴த⁴ம்மாவதாரஸம்வண்ணனாய

அபி⁴ஞ்ஞாரம்மணனித்³தே³ஸவண்ணனா நிட்டி²தா.