4. சதுத்தோ² பரிச்சே²தோ³

ஏகவிதா⁴தி³னித்³தே³ஸவண்ணனா

127. இதோ பரம் பவக்கா²மி, நயமேகவிதா⁴தி³கம்;

ஆபி⁴த⁴ம்மிகபி⁴க்கூ²னம், பு³த்³தி⁴யா பன வுத்³தி⁴யா.

அஹம் இதோ பரம் இதோ பரிச்சே²த³தோ பரம் ஏகவிதா⁴தி³கம் நயம் ஆபி⁴த⁴ம்மிகபி⁴க்கூ²னம் பு³த்³தி⁴யா வுத்³தி⁴த்தா²ய பவக்கா²மி தே³ஸேஸ்ஸாமி.

128. ஸப்³ப³மேகவித⁴ம் சித்தம், விஜானனஸபா⁴வதோ ஸப்³ப³ம் சித்தம் விஜானனஸபா⁴வதோ ஏகவித⁴ம், து³வித⁴ஞ்ச ப⁴வே சித்தம் அஹேதுகஸஹேதுகதோ இத³ம் சித்தம் து³வித⁴ம் ப⁴வேய்ய.

129. புஞ்ஞாபுஞ்ஞவிபாகா ஹி, காமே த³ஸ ச பஞ்ச ச ஹி ஸச்சம் காமே காமாவசரே குஸலாகுஸலவிபாகா த³ஸ பஞ்ச ச கிரியா திஸ்ஸோ இதி ஸப்³பே³ அட்டா²ரஸ சித்துப்பாதா³ அஹேதுகா.

130. அஹேதுகதோ சித்துப்பாத³தோ ஸேஸா ஏகஸத்ததி சித்துப்பாதா³ ஸஹேதுகாதி ஸஹேதுகா நாமாதி மஹேஸினா தாதி³னா அவிபரீதஸபா⁴வேன ஹேதுவாதி³னா பச்சயவாதி³னா நித்³தி³ட்டா².

131. ஸவத்து²காவத்து²கதோ ஸவத்து²கஅவத்து²கவஸேன ததா² உப⁴யவஸேன ஸவத்து²கவஸேன, அவத்து²கவஸேன ச ஸப்³ப³ம் வுத்தப்பகாரேன ச மானஸம் திவித⁴ம் ஹோதி.

132-4. ஸப்³போ³ காமவிபாகோ ச, ரூபே பஞ்சத³ஸாபி ச சித்துப்பாதா³ ஆதி³மக்³கோ³ பட²மமக்³கோ³ ஹஸிதுப்பாதோ³ மனோதா⁴துகிரியாபி ச தோ³மனஸ்ஸத்³வயஞ்சாபி தேசத்தாலீஸ மானஸா வினா வத்து²ம் வத்து²ம் வஜ்ஜேத்வா ந உப்பஜ்ஜந்தி, ஏகந்தேன ஸவத்து²கா நாம. அரூபாவசரவிபாகா ச ஏகந்தேன அவத்து²கா, மயா வுத்ததோ சித்துப்பாத³தோ ஸேஸானி த்³வேசத்தாலீஸ சித்தானி உப⁴யதா² ஸவத்து²காவத்து²கவஸேன ஸியும்.

135. ஏகேகாரம்மணம் சித்தம், பஞ்சாரம்மணமேவ ச சித்தம் ச²ளாரம்மணகஞ்சேதி ஏவம் இமினா மயா வுத்தப்பகாரேனாபி திவித⁴ம் சித்தம் ஸியா.

136-8. விஞ்ஞாணானி ச த்³வே பஞ்ச, அட்ட² லோகுத்தரானி ச அபி⁴ஞ்ஞாமானஸம் ட²பேத்வா ஸப்³ப³ம் மஹக்³க³தஞ்சேவாதி தேசத்தாலீஸ சித்துப்பாதா³ பன ஏகேகாரம்மணா விஞ்ஞேய்யா தீ⁴ரேன. தத்த² சித்தே மனோதா⁴துத்தயம் பஞ்சாரம்மணம் ஈரிதம் ப⁴க³வதா. மயா வுத்தசித்ததோ ஸேஸானி தேசத்தாலீஸ சித்தானி ச²ளாரம்மணிகானி மதானி ஸத்து²னா, ததா² ஏவம் சித்தம் குஸலாகுஸலாதி³தோ திவித⁴ம். ஆதி³-ஸத்³தே³ன அப்³யாகதம் க³ஹேதப்³ப³ம்.

139. அஹேதுகம் சித்தம் ஏகஹேதுகஞ்ச சித்தம் த்³விஹேதுகஞ்ச சித்தம் திஹேதுகஞ்ச சித்தந்தி ஏவம் இமினா பகாரேன சித்தம் சதுப்³பி³த⁴ம் விபா⁴வினா விஞ்ஞாதப்³ப³ம்.

140-2. ஹேட்டா² மயாபி நித்³தி³ட்டா² அட்டா²ரஸ சித்துப்பாதா³ அஹேதுகா, விசிகிச்சு²த்³த⁴ச்சஸம்யுத்தம் சித்தம் ஏகஹேதுகம் ஏவம் உதீ³ரிதம் ப⁴க³வதா. காமே காமாவசரே புஞ்ஞவிபாகக்ரியதோ குஸலவஸேன ச விபாகவஸேன ச கிரியாவஸேன ச த்³வாத³ஸதா⁴ சித்துப்பாதா³ அகுஸலா ச த³ஸதா⁴ சாதி பா³வீஸதி சித்துப்பாதா³ து³ஹேதுகா. காமே காமாவசரே புஞ்ஞவிபாகக்ரியதோ புஞ்ஞவஸேன ச விபாகவஸேன ச கிரியாவஸேன ச த்³வாத³ஸதா⁴ சித்துப்பாதா³. ஸப்³ப³ம் மஹக்³க³தஞ்சேவ அப்பமாணம் லோகுத்தரசித்தஞ்ச திஹேதுகம்.

143-50. ரூபீரியாபத²விஞ்ஞத்தி-ஜனகாஜனகாதி³தோதி ரூபஇரியாபத²விஞ்ஞத்திஜனகவஸேன ரூபஇரியாபத²ஜனகவஸேன ச ரூபஜனகவஸேன ச திகிச்சாஜனகவஸேன சாதிஆதீ³ஹி பகாரேஹி ஸப்³ப³ம் சித்தம் சதுப்³பி³த⁴ம் ஹோதி. தத்த² தஸ்மிம் சித்தே த்³வாத³ஸாகுஸலா, காமதா⁴துயா குஸலா, ததா² காமே த³ஸ கிரியா, அபி⁴ஞ்ஞாமானஸம் த்³வயம், இமே பா³த்திம்ஸ மானஸா ரூபானி ஸமுட்டா²பேந்தி, இரியாபத²ம் கப்பேந்தி, விஞ்ஞத்திம் ஜனயந்தி. குஸலா மஹக்³க³தமானஸா கிரியா ச மஹக்³க³தமானஸா, அட்ட² அனாஸவசித்தானி, ச²ப்³பீ³ஸதி ச மானஸா ரூபானி ஸமுட்டா²பேந்தி, இரியாபத²ம் கப்பேந்தி. சோபனம் ந பாபேந்தி விஞ்ஞத்திம் ந ஜனயந்தீதி அத்தோ². இமே சித்துப்பாதா³ து³கிச்சனியதா, த³ஸ விஞ்ஞாணே ட²பேத்வா த்³வீஸு பூ⁴மீஸு விபாகா மனோதா⁴துத்³வயஸந்தீரணத்தயமஹாவிபாகரூபவிபாகானம் வஸேன அட்டா²ரஸ பாகா மனோதா⁴து கிரியா சேவாதி இமானி ஏகூனவீஸதி சித்தானி ரூபானி ஸமுட்டா²பேந்தி, இதரத்³வயம் ந கரோந்தி, புன த்³வேபஞ்சவிஞ்ஞாணா பட²மம் ‘‘த³ஸ விஞ்ஞாணே’’தி வுத்தத்தா ‘‘புனா’’தி வுத்தா. அரூபீஸு விபாகா ச ஸப்³பே³ஸம் ஸத்தானம் படிஸந்தி⁴சித்தஞ்ச அரஹதோ சுதிசித்தஞ்ச இமே ஸோளஸ மானஸா திகிச்சானி ந கரோந்தி.

151. ஏகத்³விதிசதுட்டா²ன-பஞ்சட்டா²னப்பபே⁴த³தோ ஏககிச்சத்³விகிச்சதிகிச்சசதுகிச்சபஞ்சகிச்சபே⁴தே³ன பஞ்சதா⁴ சித்தம் பஞ்சபகாரம் சித்தம் பஞ்சனிம்மலலோசனோ பு³த்³தோ⁴ அக்கா²ஸி கதே²ஸி.

152. குஸலாகுஸலா ஸப்³பே³, சித்துப்பாதா³ மஹாக்ரியா;

மஹக்³க³தா க்ரியா சேவ, சத்தாரோ ப²லமானஸா.

153. ஸப்³பே³வ பஞ்சபஞ்ஞாஸ சித்துப்பாதா³ ஜவனட்டா²னதோயேவ ஜவனகிச்சவஸேனேவ ஏகட்டா²னே ஏககிச்சே நிப்பபஞ்சேன ஸத்து²னா தண்ஹாமானதி³ட்டி²விரஹிதேன ஸத்து²னா நியாமிதா கதி²தா.

154. புன த்³வேபஞ்சவிஞ்ஞாணா சித்துப்பாதா³ த³ஸ்ஸனே ஸவனே ததா² கா⁴யனே ஸாயனட்டா²னே பு²ஸனே படிபாடியா ஸத்து²னா நியாமிதா.

155. மனோதா⁴துத்திகம் ஆவஜ்ஜனே படிச்ச²னே, ஏதே அட்ட²ஸட்டி² சித்துப்பாதா³ ஏகட்டா²னிகதம் ஏககிச்சபா⁴வம் க³தா பத்தா ப⁴வந்தி.

156-8. சித்தத்³வயம் த்³விட்டா²னிகம் நாம உதீ³ரிதம் ப⁴க³வதா, ஸோமனஸ்ஸயுதம் சித்தம் பஞ்சத்³வாரே ஸந்தீரணம் ஸியா. ச²த்³வாரே ததா³லம்ப³ணஞ்ச ப³லவாரம்மணே அதிமஹந்தாரம்மணே ஸதி ஸியா, ததா² வோட்ட²ப்³ப³னம் பஞ்சத்³வாரேஸு வோட்ட²ப்³ப³னம் ஹோதி. மனோத்³வாரேஸு பன ஸப்³பே³ஸம் ஆரம்மணானம் ஆவஜ்ஜனம் ஹோதி, இத³ம் சித்தத்³வயம் த்³விட்டா²னிகம் நாம ஹோதி.

159. படிஸந்தி⁴யா டா²னதோ படிஸந்தி⁴யா கிச்சவஸேன ப⁴வங்க³ஸ்ஸ டா²னதோ ப⁴வங்க³ஸ்ஸ கிச்சவஸேன சுதியா டா²னதோ சுதியா கிச்சவஸேன தே மஹக்³க³தவிபாகா நவ திட்டா²னிகா திகிச்சாதி முனினா மதா.

160-3. அட்ட² காமா மஹாபாகா, படிஸந்தி⁴ப⁴வங்க³தோ படிஸந்தி⁴ப⁴வங்க³வஸேன ததா³ரம்மணதோ சேவ ததா³ரம்மணவஸேன ச ஏவ சுதிட்டா²னவஸேன ச அட்ட² சித்தானி சதுட்டா²னிகசித்தானி ஹோந்தி, இதி வசனம் தீ⁴ரோ நித்³தி³ஸே, குஸலாகுஸலபாகோபேக்கா²ஸஹக³தத்³வயம் பஞ்சத்³வாரே ஸந்தீரணம் ப⁴வே, ச²த்³வாரிகேஸுபி ப³லவாரம்மணே ஸதி ததா³ரம்மணதா ஸியா. படிஸந்தி⁴ப⁴வங்கா³னம் டா²னவஸேன ச சுதிட்டா²னவஸேன ச இத³ம் சித்தத்³வயம் பஞ்சட்டா²னிகசித்தம் நாமாதி உதீ³ரிதம் முனினா.

164. பஞ்சகிச்சம் த்³வயம் சித்தம், அட்ட²கம் பன சதுகிச்சம், நவகம் திகிச்சம், த்³வே சித்துப்பாதா³ த்³விகிச்சா, இமேஸம் இமேஹி சித்துப்பாதே³ஹி ஸேஸம் ஏககம் கிச்சம்.

165. ப⁴வங்கா³வஜ்ஜனஞ்சேவ, த³ஸ்ஸனம் ஸம்படிச்ச²னம்;

ஸந்தீரணம் வோட்ட²ப்³ப³னம், ஜவனம் ப⁴வதி ஸத்தமம்.

166. ச²ப்³பி³த⁴ம் ஹோதி தம் ச²ன்னம் தம் சித்தம் ச²ன்னம் சக்கு²ஸோதகா⁴னஜிவ்ஹாகாயமனோவிஞ்ஞாணானம் பபே⁴த³தோ ச²ப்³பி³த⁴ம் ஹோதி, சக்கு²ஸோதகா⁴னஜிவ்ஹாகாயமனோதா⁴துமனோவிஞ்ஞாணதா⁴தூனம் ஸத்தன்னம் வஸேன சித்தம் ஸத்ததா⁴ ஹோதி.

167. ஏகேகாரம்மணம் ச²க்கம், பஞ்சாரம்மணபே⁴த³தோ ச²ளாரம்மணதோ சேவ ச²ளாரம்மணசித்தவஸேன மனோ சித்தம் அட்ட²வித⁴ம் ஹோதி.

168. தத்த² தஸ்மிம் சித்தே த்³வேபஞ்சவிஞ்ஞாணா ஏகேககோ³சரா ஹோந்தி, த்³வே சித்துப்பாதா³ ரூபாரம்மணிகா, த்³வே த்³வே சித்துப்பாதா³ ஸத்³தா³தி³கோ³சரா.

169. பஞ்சாபி⁴ஞ்ஞாவிவஜ்ஜிதம் ஸப்³ப³ம் மஹக்³க³தம், ஸப்³ப³ம் லோகுத்தரஞ்ச இதி இத³ம் சித்தம் ஏகேகாரம்மணம் ப⁴வே.

170. இத³ம் ச²க்கம் ஏகேகாரம்மணம் விபா⁴வினா ஞேய்யம், மனோதா⁴துத்தயம் பஞ்சாரம்மணிகம் நாம ப⁴வே.

171. காமாவசரசித்தானி சத்தாலீஸம் ததா² ஏகேகம் ஸப்³பா³னி அபி⁴ஞ்ஞானி ச ச²ளாரம்மணிகானீதி ச²ளாரம்மணிகானி நாம பண்டி³தேன விஞ்ஞேய்யானி.

172. ஸத்தவிஞ்ஞாணதா⁴தூஸு பச்சி²மம் மனோவிஞ்ஞாணதா⁴துஞ்ச குஸலாகுஸலாப்³யாகதவஸேன திதா⁴ கத்வா நவவித⁴ம் சித்தம் ஹோதி.

173. மனோவிஞ்ஞாணதா⁴துயா பே⁴தோ³ புஞ்ஞாபுஞ்ஞவஸேனேவ விபாககிரியபே⁴த³தோ ச²ஸத்ததிவிதோ⁴ ஹோதி.

174. மனோதா⁴தும் விபாககிரியபே⁴த³தோ த்³விதா⁴ கத்வா புப்³பே³ வுத்தேஹி நவதா⁴ சித்தேஹி மானஸம் த³ஸதா⁴ ஹோதி.

175. பச்சி²மம் தா⁴துத்³வயம் மனோதா⁴துமனோவிஞ்ஞாணதா⁴துத்³வயம், மனோதா⁴தும் குஸலவிபாகஅகுஸலவிபாககிரியாவஸேன திதா⁴ கத்வா, மனோவிஞ்ஞாணதா⁴துஞ்ச குஸலாகுஸலாப்³யாகதவஸேன திவிதா⁴ கத்வா சக்கு²ஸோதகா⁴னஜிவ்ஹாகாயவிஞ்ஞாணேஹி ஸஹ சித்தம் ஏகாத³ஸவித⁴ம் ஹோதி, இதி இத³ம் வசனம் பண்டி³தோ பரிதீ³பயே.

176. மனோவிஞ்ஞாணதா⁴தும்பி குஸலாகுஸலாதி³தோ குஸலாகுஸலவிபாககிரியாவஸேன சதுதா⁴ விப⁴ஜித்வான தம் சித்தம் சக்கு²ஸோதகா⁴னஜிவ்ஹாகாயவிஞ்ஞாணேஹி ஸஹ திப்பகாராய மனோதா⁴துயா ச ஸஹ த்³வாத³ஸதா⁴பி தீ⁴ரோ வதே³.

177-9. சித்தம் சுத்³த³ஸட்டா²னபே⁴தே³ன சுத்³த³ஸதா⁴ ப⁴வே, படிஸந்தி⁴யா வஸேன ச ப⁴வங்க³வஸேன ச சுதியா வஸேன ச ஆவஜ்ஜனஸ்ஸ வஸேன ச பஞ்சன்னம் த³ஸ்ஸனாதீ³னம் கிச்சானம் வஸேன ச ஸம்படிச்ச²னசேதஸோ வஸேன ச ஸந்தீரணஸ்ஸ வஸேன ச வோட்ட²ப்³ப³னஜவனானம் வஸேன ச, யதா² ஏவம் ததா³ரம்மணசித்தஸ்ஸ வஸேன சாதி ஏவம் இமினா பகாரேன டா²னபே⁴த³தோ கிச்சபே⁴தே³ன சுத்³த³ஸதா⁴ சித்தம் ஹோதி, இதி இத³ம் வசனம் தீ⁴ரோ பரிதீ³பயே பரிதீ³பேய்ய.

180. பூ⁴மிபுக்³க³லனானத்தவஸேன பூ⁴மினானத்தவஸேன, புக்³க³லனானத்தவஸேன ச சித்தானம் பவத்திதோ இத³ம் சித்தம் ப³ஹுதா⁴ ஹோதி, இதி வசனஞ்ச தீ⁴ரோ விபா⁴வயே பகாஸேய்ய.

181. இத⁴ இமஸ்மிம் ஸாஸனே யோ பி⁴க்கு² மதிமா இமஸ்மிம் ஏகவிதா⁴தி³னயே குஸலோ சே²கோ ஹோதி, அபி⁴த⁴ம்மே பவத்தா அத்தா² தஸ்ஸ பி⁴க்கு²னோ ஹத்த²க³தா ஹத்த²பவிட்டா² ஆமலகா விய ஸுத்³த⁴மணிகா விய ஹோந்தி.

இதி அபி⁴த⁴ம்மாவதாரடீகாய

ஏகவிதா⁴தி³னித்³தே³ஸவண்ணனா நிட்டி²தா.

சதுத்தோ² பரிச்சே²தோ³.