15. பன்னரஸமோ பரிச்சே²தோ³

அரூபாவசரஸமாதி⁴பா⁴வனானித்³தே³ஸவண்ணனா

980. ஏவம் பத²வீகஸிணவஸேன சதுக்கபஞ்சகஜ்ஜா²னானி த³ஸ்ஸேத்வா யஸ்மா ஸேஸகஸிணவஸேன நித்³தி³ஸியமானே க³ந்த²கா³ரவோ ஹோதி, தஸ்மா தம் ஸப்³ப³ம் ட²பேத்வா அரூபாவசரம் விபா⁴வேதும் ‘‘ரூபாரூப’’ந்திஆதி³ ஆரத்³த⁴ம். ரூபாரூபமதீதேனாதி ரூபாரூபப⁴வம் அதிக்கந்தேன, புனானூபபத்திவஸேன ரூபாரூபப⁴வம் அதிக்கந்தேன, பகே³வ காமாவசரப⁴வம். ரூபாரூபாதி³வேதி³னாதி ரூபாரூபாதி³பூ⁴மந்தரவேதி³னா.

982-4. யஸ்மா அயம் அரூபாவசரஸமாதி⁴ நாம ரூபவிராக³பா⁴வனா ரூபவிராக³வஸேனேவ அபி⁴னிப்பா²தே³தப்³பா³வ, தஸ்மா தம் உப்பாதே³துகாமஸ்ஸ ரூபே விரஜ்ஜனாகாரம், விரத்தமானஸேன ச தத³த்தா²ய படிபஜ்ஜனவிதி⁴ம் த³ஸ்ஸேதும் ‘‘ரூபே கோ²’’திஆதி³ ஆரத்³த⁴ம். த³ண்ட³னட்டே²ன த³ண்டோ³, முக்³க³ராதி³, பரபீளனாதி⁴ப்பாயேன தஸ்ஸ ஆதா³னம் த³ண்டா³தா³னம். ஆதி³-ஸத்³தே³ன ஸத்தா²தா³னகலஹவிக்³க³ஹவிவாத³துவம்துவம்பேஸுஞ்ஞாதீ³னம், அதி³ன்னாதா³னாதீ³னஞ்ச க³ஹணம். சக்கு²ரோகா³த³யோதி ஆதி³-ஸத்³தே³ன ஸோதரோகா³தீ³னம். ரூபே ஆதீ³னவம் தி³ஸ்வாதி கரஜரூபாதி³ஓளாரிகரூபே தன்னிதா³னம் தோ³ஸம் தி³ஸ்வா. நிப்³பி³ந்த³மானஸோதி விரத்தமானஸோ. அரூபந்தி அரூபாவசரபா⁴வனம். தம்ஹா கஸிணரூபாதி தம்ஹா படிபா⁴க³னிமித்தஸங்கா²தா கஸிணரூபா. நனு சாயம் ரூபே ஆதீ³னவம் தி³ஸ்வா தம் ஸமதிக்கமத்தா²ய படிபஜ்ஜதி, படிபா⁴க³னிமித்தஞ்ச அரூபம் பண்ணத்திமத்தத்தாதி கத²ம் தஸ்மா நிப்³பி³ஜ்ஜதீதி அனுயோக³ம் ஸந்தா⁴ய ஓபம்மவஸேன தமத்த²ம் த³ஸ்ஸேந்தோ ஆஹ ‘‘ஸூகராபி⁴ஹதோவ ஸா’’தி. யதா² ஹி வனே ஸூகரேன பஹதமத்தோ ஸுனகோ² ததோ பீ⁴தோ ரூபத³ஸ்ஸனவேலாயம் ப⁴த்தபசனஉக்க²லிம் தூ³ரதோ தி³ஸ்வா ஸூகரபடிபா⁴க³தாய தஸ்ஸம் ஸூகராஸங்கம் உப்பாதே³த்வா உத்ரஸ்தோ பலாயதேவ, ஏவமேவ ரூபே நிப்³பி³ந்த³மானஸோ தம் அதிக்கமிதுகாமோ தப்படிபா⁴கே³ கஸிணரூபேபி நிப்³பி³ஜ்ஜதி, ஸமதிக்கமிதுகாமோதி அதி⁴ப்பாயோ.

985-6. சதுத்தே² பன ஜா²னஸ்மிந்தி ட²பேத்வா பரிச்சி²ன்னாகாஸகஸிணம் நவஸு பத²வீகஸிணாதீ³ஸு அஞ்ஞதரஸ்மிம் படிலத்³த⁴சதுத்த²ஜ்ஜா²னே. கேசி பன ஆலோககஸிணம்பி ட²பேத்வா அட்ட²ஸூதி வத³ந்தி. தஸ்ஸ பன ட²பனே காரணம் ந தி³ஸ்ஸதி. ஸுட்டு² சிண்ணோ சரிதோ அதிப்பகு³ணிகதோ ஆவஜ்ஜனாதி³லக்க²ணோ வஸீபா⁴வோ ஏதேனாதி ஸுசிண்ணவஸீ. கரோதி…பே… யதோதி யஸ்மா இத³ம் சதுத்த²ஜ்ஜா²னசித்தம் மயா நிப்³பி³ந்த³கஸிணரூபம் ஆரம்மணம் கரோதி. ஆஸன்னஸோமனஸ்ஸஞ்சாதி யதோ ததியஜ்ஜா²னஸ்ஸ ஆஸன்னதாய ஆஸன்னஸோமனஸ்ஸபச்சத்தி²கஞ்ச. தூ²லஸந்தவிமோக்க²தோதி ஸந்தவிமோக்க²ஸங்கா²தஅரூபஜ்ஜா²னதோ ஏதம் யதோ தூ²லம் ஓளாரிகம். அரூபஜ்ஜா²னஞ்ஹி யே தே ஸந்தா விமோக்கா² அதிக்கம்ம ரூபே ஆருப்பந்திஆதீ³ஸு ‘‘ஸந்தவிமோக்க²’’ந்தி வுச்சதி, ஸந்ததாஸித்³தி⁴ சஸ்ஸ அனுஸ்ஸதிதோ த³ட்ட²ப்³பா³.

987-91. சதுத்தே²தி சதுத்த²ஜ்ஜா²னே. பட²மாருப்பஞ்ச ஸந்ததோ தி³ஸ்வாதி ஸம்ப³ந்தோ⁴, ஸந்தவஸேன மனஸி கரித்வாதி அத்தோ². ஸந்ததோ மனஸிகரணேனேவ சேத்த² பணீததோ, ஸுகு²மதோ ச மனஸிகாரோ ஸித்³தோ⁴வ ஹோதீதி ந தே விஸும் க³ஹிதா. பத்த²ரித்வானாதி பகே³வ வட்³டி⁴தம், ததா³ வட்³ட⁴னவஸேன வா பத்த²ரித்வா. புப்³ப³காலவஸேன சேதம் வுத்தம். தேன நம் உக்³கா⁴டேத்வா பச்சா² ந வட்³டி⁴தப்³ப³ந்தி த³ஸ்ஸேதி. ந ஹி தம் பச்சா² வட்³ட⁴னத்தா²ய வாயமியமானம்பி வட்³ட⁴தீதி. தேனாதி கஸிணரூபேன.

இதா³னிஸ்ஸ உக்³கா⁴டனாகாரம் த³ஸ்ஸேதும் ‘‘ஆகாஸோ இதி வா’’திஆதி³ம் வத்வா புன தம் ஸமத்தே²தும் ‘‘உக்³கா⁴டேந்தோ ஹீ’’திஆதி³ வுத்தம். உத³யவஸேன, பரிச்சே²த³ப²ரணவஸேன ச அந்தாபா⁴வதோ அனந்தோ. ந ஸம்வேல்லேதீதி கடஸாரககிலஞ்ஜாத³யோ விய ந படிஸம்ஹரதி. நாவஜ்ஜந்தோ ந பேக்க²ந்தோதி அனாவஜ்ஜந்தோ அனபேக்க²ந்தோ. அஞ்ஞத³த்து² தேன பு²ட்டோ²காஸம் வுத்தனயேன மனஸிகரோந்தோயேவாதி அதி⁴ப்பாயோ. இத³ஞ்ஹி வுத்தம் ஹோதி – ரூபாவசரசதுத்த²ஜ்ஜா²னஸ்ஸ ஆரம்மணபூ⁴தம் கஸிணரூபம் ஸப்³பே³ன ஸப்³ப³ம் அமனஸிகரோதோ, தேன ச பு²ட்டோ²காஸம் ‘‘ஆகாஸோ ஆகாஸோ’’தி மனஸிகரோதோ யதா³ தம் பா⁴வனானுபா⁴வேன ஆகாஸம் ஹுத்வா உபட்டா²தி, ததா³ ஸோ கஸிணம் உக்³கா⁴டேதி நாமாதி.

992-5. ஏவம் கஸிணுக்³கா⁴டனவஸேன படிலத்³தே⁴ ஆகாஸனிமித்தே புன படிபஜ்ஜனவிதி⁴ம், யஸ்ஸத்தா²ய யேஸம் படிபஜ்ஜதி, தத³த்த²ஸித்³த⁴ஞ்ச த³ஸ்ஸேதும் ‘‘கஸிணுக்³கா⁴டிமாகாஸம் நிமித்த’’ந்திஆதி³ வுத்தம். ஆகாஸஸ்ஸ அனிமித்தபா⁴வேபி நிமித்தேன பு²ட்டோ²காஸபா⁴வதோ ‘‘நிமித்த’’ந்தி வுத்தம். பஞ்ச…பே… விக்க²ம்ப⁴ந்தீதி நனு ரூபாவசரபட²மஜ்ஜா²னஸ்ஸ உபசாரக்க²ணேயேவ நீவரணானி விக்க²ம்பி⁴தானி, ததோ பட்டா²ய ச ந தேஸம் பரியுட்டா²னம் அத்தி². யதி³ ஸியா, ஜா²னதோ பரிஹாயேய்யாதி? ஸச்சமேதம், இமஸ்ஸ பன ஜா²னஸ்ஸ வண்ணப⁴ணனவஸேனேதம் வுத்தம் யதா² அஞ்ஞத்தா²பி ஹேட்டா² பஹீனானம் உபரி பஹானவசனந்தி. யே பன ‘‘ஸப்³பே³ குஸலா த⁴ம்மா ஸப்³பே³ஸம் அகுஸலானம் படிபக்கா²தி கத்வா ஏவம் வுத்த’’ந்தி வத³ந்தி, தேஹி து³தியஜ்ஜா²னூபசாராதீ³ஸு நீவரணவிக்க²ம்ப⁴னாவசனஸ்ஸ காரணம் வத்தப்³ப³ம் ஹோதி. யம்பி சேகே வத³ந்தி ‘‘ஸந்தேவ ஸுகு²மானி ரூபாவசரஅவிக்க²ம்ப⁴னீயானி, தானி ஸந்தா⁴யேதம் வுத்த’’ந்தி, தம் தேஸம் மதிமத்தம். ந ஹி மஹக்³க³தகுஸலேஸு லோகுத்தரகுஸலம் விய ஓதி⁴ஸோ பஹானம் நாம அத்தி². யோ பன ரூபாவசரேஹி அரூபானம் உளாரப²லதாதி³விஸேஸோ, ஸோ பா⁴வனாவிஸேஸேன ஸந்ததரப்பணீததரபா⁴வேன தேஸுயேவ புரிமபுரிமேஹி பச்சி²மபச்சி²மானம் வியாதி த³ட்ட²ப்³ப³ம். இதா⁴பீதி ந கேவலம் ரூபாவசரசதுத்த²ஜ்ஜா²னே, ‘‘ஸேஸானி காமாவசரானீ’’திஆதீ³ஸு பன இத⁴ யம் வத்தப்³ப³ம் அவுத்தம், தம் ரூபாவசரஜ்ஜா²னனித்³தே³ஸே வுத்தனயானுஸாரேன வேதி³தப்³ப³ம்.

997-1001. ‘‘புன பா⁴வேதுகாமேனா’’தி வுத்தே பட²மமேவ பட²மாருப்பஸ்ஸ பா⁴விதத்தா கிம் பா⁴வேதுகாமேனாதி அனுயோகே³ ‘‘து³தியாருப்பமானஸ’’ந்தி வுத்தம், ந பன ‘‘து³தியாருப்பமானஸம் பா⁴வேதுகாமேனா’’தி இமினா அஜ்ஜா²ஸயேன. ந ஹி பட²மம் து³தியாருப்பம் பா⁴விதந்தி. ரூபாவசரஜ்ஜா²னம் அனதிக்கமித்வா அனதி⁴க³ந்தப்³ப³தோ தம் மனஸிகாரஸமுதா³சாரஸ்ஸ ஹானபா⁴கி³யபா⁴வாவஹனதோ ரூபாவசரஜ்ஜா²னமேதஸ்ஸ பச்சத்தி²கந்தி கத்வா வுத்தம் ‘‘ஆஸன்ன…பே… பச்சத்தி²கந்தி சா’’தி. வீதி²படிபன்னாய பா⁴வனாய உபரூபரிவிஸேஸாவஹபா⁴வதோ, பணீதபா⁴வஸித்³தி⁴தோ ச பட²மாருப்பதோ து³தியாருப்பம் ஸந்ததரஸபா⁴வந்தி ஆஹ ‘‘து³தியாருப்ப…பே… பனா’’தி. வக்க²தி ஹி ‘‘ஸுபணீததரா ஹோந்தி, பச்சி²மா பச்சி²மா இதா⁴’’தி (அபி⁴த⁴. 1040). விஞ்ஞாணமிச்சேவம் மனஸா காதப்³ப³ந்தி விஞ்ஞாணம் விஞ்ஞாணம் இச்சேவம் மனஸா காதப்³ப³ம், கேவலம் அனந்தம் அனந்தந்தி ந மனஸி காதப்³ப³ம். தேனாஹ ‘‘அனந்தந்தி…பே… மனஸா நிதா⁴’’தி. அனந்தம் விஞ்ஞாணம் அனந்தம் விஞ்ஞாணந்தி பன மனஸி காதும் வட்டதி.

1002-6. தஸ்மிம் பன நிமித்தஸ்மிந்தி தஸ்மிம் பட²மாருப்பவிஞ்ஞாணஸங்கா²தே விஞ்ஞாணனிமித்தே. விசாரேந்தஸ்ஸ மானஸந்தி பா⁴வனாசித்தம் பவத்தேந்தஸ்ஸ. ஆகாஸபு²டவிஞ்ஞாணேதி கஸிணுக்³கா⁴டிமாகாஸம் ப²ரித்வா பவத்தே பட²மாருப்பவிஞ்ஞாணே ஆரம்மணபூ⁴தே. அப்பேதீதி அப்பனாவஸேன பவத்ததி. ஸபா⁴வத⁴ம்மேபி ஆரம்மணஸமதிக்கமபா⁴வனாவிஸேஸபா⁴வதோ இத³ம் அப்பனாபத்தம் ஹோதி சதுத்தா²ருப்பம் விய. அப்பனா…பே… நயோவாதி து³தியாருப்பஜ்ஜா²னே புரிமபா⁴கே³ தீணி, சத்தாரி வா ஜவனானி காமாவசரானி உபேக்கா²வேத³னாஸம்பயுத்தானேவ ஹோந்தி. சதுத்த²ம், பஞ்சமம் வா ஆருப்பமானஸந்திஆதி³னா அப்பனானயோ பட²மாருப்பஜ்ஜா²னே வுத்தனயோவ. ப²ரித்வா பவத்தவிஞ்ஞாணந்தி பட²மாருப்பவிஞ்ஞாணம் விஞ்ஞாணஞ்சந்தி வுச்சதீதி ருள்ஹீஸத்³த³வஸேன வுத்தபா⁴வமேவ பகாஸேதும் ‘‘விஞ்ஞாணா…பே… ஸியா’’தி வுத்தம். புப்³பே³ அனந்தஸ்ஸ ஆகாஸஸ்ஸ ஆரம்மணகரணவஸேன அனந்ததாய ‘‘விஞ்ஞாணஞ்ச’’ந்தி வுத்தந்தி. புன மனஸிகாரவஸேன வா அனந்ததாய ததா² வுத்தந்தி த³ஸ்ஸேதும் ‘‘மனக்காரவஸேனாபீ’’திஆதி³ வுத்தம். து³தியாருப்பம் பா⁴வேந்தோ ஹி பட²மாருப்பம் அனந்ததோ அனவஸேஸதோ மனஸி கரோந்தோ அனந்தந்தி மனஸி கரோதி.

1010. பட²மாருப்பவிஞ்ஞாணாபா⁴வோதி கஸிணம் உக்³கா⁴டேத்வா ஆகாஸோ விய ஆகாஸானஞ்சாயதனம் பஹாய தஸ்ஸ அபா⁴வோ மனஸி காதப்³போ³. கஸ்மா பனேத்த² து³தியாருப்பவிஞ்ஞாணாபா⁴வம் அமனஸிகத்வா பட²மாருப்பவிஞ்ஞாணாபா⁴வோ மனஸி காதப்³போ³தி? வுச்சதே – தயித³ம் ஆரம்மணாதிக்கமனவஸேன பத்தப்³ப³ம், ந பன அங்கா³திக்கமனவஸேன. ததா² ச ஸதி ஆரம்மணேயேவ ஸாதிஸயம் தோ³ஸத³ஸ்ஸனேன தம் ஸமதிக்கமிதப்³ப³ம், ஆரம்மணஞ்ச து³தியாருப்பஸ்ஸ பட²மாருப்பமேவ, தஸ்மா கஸிணே ஆதீ³னவம் தி³ஸ்வா தம் உக்³கா⁴டேத்வா தப்³பி³வித்தாகாஸஸ்ஸ விய பட²மாருப்பவிஞ்ஞாணே ஆதீ³னவம் தி³ஸ்வா தம் பஹாய தத³பா⁴வஸ்ஸேவ மனஸிகரணம் யுத்தந்தி. அப⁴யகி³ரிவாஸினோ பன ‘‘விஞ்ஞாணஞ்சாயதனாபா⁴வோயேவ மனஸி காதப்³போ³’’தி வத³ந்தி, தே பன இமேஸம் ஆரம்மணாதிக்கமனவஸேன பத்தப்³ப³பா⁴வம் அஸல்லக்கே²த்வா கதே²ந்தி. யதி³ ஸல்லக்கே²ந்தி, அஞ்ஞத்த² தோ³ஸம் தி³ஸ்வா அஞ்ஞஸ்ஸ ஸமதிக்கமே அதிப்பஸங்க³தோ³ஸதோ ந முச்சந்தி.

அதா²பி வதே³ய்யும் – ‘‘விஞ்ஞாணஞ்சாயதனம் ஸதோ ஸமாபஜ்ஜதி, ஸதோ ஸமாபஜ்ஜித்வா ஸதோ வுட்டா²தி, ஸதோ வுட்ட²ஹித்வா தஞ்ஞேவ விஞ்ஞாணம் பா⁴வேதீ’தி வசனதோ விஞ்ஞாணஞ்சாயதனாபா⁴வோயேவ மனஸி காதப்³போ³’’தி, தயித³ம் பாளிஅத்த²ம் விருஜ்ஜி²த்வா க³ஹணவஸேன சிந்திதம். ந ஹேத்த² தஞ்ஞேவ விஞ்ஞாணந்தி விஞ்ஞாணஞ்சாயதனம் அதி⁴ப்பேதம். யதி³ ஹி தம் அதி⁴ப்பேதம் ஸியா, விஞ்ஞாணஞ்சாயதனந்தி தஸ்ஸ பதா⁴னபா⁴வேன நித்³தி³ட்ட²த்தா தஞ்ஞேவாதி வசனேனேவ பரியத்தம், கிம் விஞ்ஞாணந்தி வசனேன. அத² ஸரூபனித்³தே³ஸத்த²ம் விஞ்ஞாணவசனம், ஏவம் ஸதி தஞ்ஞேவ விஞ்ஞாணஞ்சாயதனந்தி வுத்தம் ஸியா, தஸ்மா விஞ்ஞாணந்தி வசனேன யம் ஆரப்³ப⁴ விஞ்ஞாணஞ்சாயதனம் பவத்தம், தஸ்ஸேவ ஆகாஸானஞ்சாயதனஸ்ஸ க³ஹணம், ந இதரஸ்ஸாதி ஸுட்டு² வுத்தம்.

1011-2. பட²மாருப்பவிஞ்ஞாணாபா⁴வோமனஸிகாதப்³போ³தி வத்வா மனஸிகாரவிதி⁴ம் த³ஸ்ஸேதும் ‘‘தம் பனா’’திஆதி³ வுத்தம். அகத்வா மனஸாதி மனஸா ஆரம்மணம் அகத்வா ஸப்³பே³ன ஸப்³ப³ம் தம் அசிந்தேத்வா. ‘‘ஆகாஸம் ஆகாஸ’’ந்தி மனஸி கரோந்தஸ்ஸ கஸிணவிவித்தாகாஸம் விய ‘‘நத்தி² நத்தீ²’’தி, ‘‘ஸுஞ்ஞம் ஸுஞ்ஞ’’ந்தி வா மனஸி கரோந்தஸ்ஸ விஞ்ஞாணவிவித்தம் அபா⁴வமத்தமேவ உபட்டா²தீதி ஆஹ ‘‘நத்தீ²’’திஆதி³. வா-ஸத்³தோ³ அனியமத்தோ², தேன த்³வீஸு பகாரேஸு ஏகேனபி அத்த²ஸித்³தி⁴ ஹோதீதி த³ஸ்ஸேதி. அவுத்தவிகப்பனத்தோ² வா வா-ஸத்³தோ³, தேன ‘‘விவித்தம் விவித்த’’ந்தி இமஸ்ஸபி ஸங்க³ஹோ த³ட்ட²ப்³போ³. அனியமோ பனேத்த² திண்ணம்பி விஸும் விஸும் பரியாயபா⁴வதோவ ஸித்³தோ⁴. பரியாயஸத்³தா³ ஹி விஸும் விஸும்யேவ அத்த²ம் ஸாதே⁴ந்தா பரியாயாதி லோகே நிருள்ஹா. யதா²ஹு –

‘‘பரியாயேனேவ தே யஸ்மா, வத³ந்தத்த²ம் ந ஸம்ஹதா;

பரியாயத்த²ம் ததோ ஸப்³ப³ம், பரியாயேஸு வவத்தி²த’’ந்தி.

1013-6. தஸ்மிம் நிமித்தேதி பட²மாருப்பவிஞ்ஞாணஸ்ஸ அபா⁴வஸங்கா²தே ஜா²னுப்பத்திகாரணபூ⁴தே நிமித்தே. ஸதி ஸந்திட்ட²தீதி அபா⁴வனிமித்தாரம்மணா ஸதி ஸம்மா ஸுப்பதிட்டி²தா ஹுத்வா திட்ட²தி. ஸதிஸீஸேன சேத்த² உபசாரஜ்ஜா²னானுகு³ணானம் ஸத்³தா⁴பஞ்சமானம் இந்த்³ரியானம் ஸகிச்சயோக³ம் த³ஸ்ஸேதி. உபசாரஜ்ஜா²னம் பன ‘‘பி⁴ய்யோபி ஸமாதி⁴யதி மானஸ’’ந்தி இமினா வுத்தந்தி த³ட்ட²ப்³ப³ம். கஸிணுக்³கா⁴டிமா…பே… அபா⁴வகேதி ஏவம் பவத்தவிஞ்ஞாணஸ்ஸ நத்தி²பா⁴வஸங்கா²தே வினாஸாபா⁴வகே ந புரே அபா⁴வாதி³கே. அப்பனானயோ பனேத்த² பத²வீகஸிணே வுத்தனயானுஸாரேன வேதி³தப்³போ³தி ஆஹ ‘‘அப்பனாய நயோ’’திஆதி³.

1017-9. ஏவம் யம் தத்த² அவஸிட்ட²ம், தம் அதிதி³ஸித்வா இதா³னி விஸேஸம் த³ஸ்ஸேதும் ‘‘ஆகாஸக³தவிஞ்ஞாண’’ந்திஆதி³ வுத்தம். பரிகம்மமனக்காரே தஸ்மிம் அந்தரஹிதேதி ‘‘நத்தி² நத்தீ²’’தி பவத்தபரிகம்மமனஸிகாரே அமனஸிகரணேன அஸ்மிம் பட²மாருப்பவிஞ்ஞாணே அந்தரஹிதே, ந பன க²ணப⁴ங்க³வஸேன, ஜா²னபரிஹானிவஸேன வா அந்தரஹிதே. க²ணப⁴ங்க³வஸேன ஹி அந்தரதா⁴னம் க²ணே க²ணே உபலப்³ப⁴தி. பரிஹானிவஸேன ச அந்தரதா⁴னே புன தம் அனுப்பாதே³த்வா உத்தரி ஞாணாதி⁴க³மோயேவ நத்தீ²தி. தஸ்ஸாபக³மமத்தம்வ பஸ்ஸந்தோ வஸதீதி தஸ்ஸ பட²மாருப்பஸ்ஸ அபா⁴வமத்தம் பஸ்ஸந்தோ ஸோ யோகா³வசரோ விஹரதி. யதா² கத²ம் வியாதி ஆஹ ‘‘ஸன்னிபாத’’ந்திஆதி³. இத³ம் வுத்தம் ஹோதி – யதா² நாம கோசி புரிஸோ மண்ட³லமாளாதீ³ஸு கத்த²சி கேனசிதே³வ கரணீயேன ஸன்னிபதிதம் பி⁴க்கு²ஸங்க⁴ம் தி³ஸ்வா கத்த²சி க³ந்த்வா ஸன்னிபாதகிச்சாவஸானே உட்டா²ய பக்கந்தேஸு பி⁴க்கூ²ஸு புன தம் டா²னம் க³ந்த்வா ஓலோகேந்தோ ஸுஞ்ஞமேவ பஸ்ஸதி, ஏவம்ஸம்பத³மித³ம் த³ட்ட²ப்³ப³ந்தி. தத்ரித³ம் ஓபம்மஸம்ஸந்த³னம் – யதா² ஸோ புரிஸோ ஸன்னிபதிதம் பி⁴க்கு²ஸங்க⁴ம் தி³ஸ்வா க³தோ, ததோ ஸப்³பே³ஸு பி⁴க்கூ²ஸு அபக³தேஸு தம் டா²னம் தேஹி ஸுஞ்ஞமேவ பஸ்ஸதி, ந பன தேஸம் குதோசி அபக³தகாரணம், ஏவமயம் யோகா³வசரோ புப்³பே³ விஞ்ஞாணஞ்சாயதனஜ்ஜா²னசக்கு²னா பட²மாருப்பவிஞ்ஞாணம் தி³ஸ்வா நத்தீ²தி மனஸிகாரேன தஸ்மிம் அபக³தே ததியாருப்பசக்கு²னா தஸ்ஸ நத்தி²பா⁴வமேவ பஸ்ஸதி, ந தஸ்ஸ அபக³தகாரணம் வீமம்ஸதி ஜா²னஸ்ஸ தாதி³ஸாபோ⁴கா³பா⁴வதோதி.

1020-4. சதுத்தா²…பே… ந ச ஸந்தந்தி யதா² நேவஸஞ்ஞானாஸஞ்ஞாயதனசித்தம் ஸங்கா²ராவஸேஸஸுகு²மபா⁴வப்பத்தியா ஸவிஸேஸம் ஸந்தம், ஏவமயம் ஆகிஞ்சஞ்ஞாயதனஸமாபத்தி ந ச ஸந்தா தத³பா⁴வதோதி அதி⁴ப்பாயோ. ச-ஸத்³தோ³ பனேத்த² அவுத்தஸமுச்சயத்தோ². தேன ‘‘ஸஞ்ஞா ரோகோ³, ஸஞ்ஞா க³ண்டோ³, ஸஞ்ஞா ஸல்லம், ஏதம் ஸந்தம், ஏதம் பணீதம், யதி³த³ம் நேவஸஞ்ஞானாஸஞ்ஞாயதன’’ந்தி இமஸ்ஸபி ஸங்க³ஹோ வேதி³தப்³போ³. சதுத்த²ம் ஸந்ததோதி ஸங்கா²ராவஸேஸஸுகு²மபா⁴வேனேவ ஸவிஸேஸம் ஸந்ததாய, அஸந்தபா⁴வகரரோகா³தி³ஸரிக்க²கஸஞ்ஞாவிரஹதோ ச ஸந்ததோ தி³ஸ்வா. ‘‘ஸந்தம் ஸந்தமித³ம் சித்த’’ந்தி இமினா பா⁴வனாகாரம் த³ஸ்ஸேதி. விப⁴ங்கே³பி ஹி தம்யேவ ஆகிஞ்சஞ்ஞாயதனம் ஸந்ததோ மனஸி கரோதீதி அயமேவ பா⁴வனாகாரோ க³ஹிதோ. அபரே பன ‘‘பாளியம் இமஸ்ஸ பா⁴வனாகாரோ ந க³ஹிதோ’’தி வத்வா தத்த² காரணம் வத³ந்தி, தத்த² வத்தப்³ப³ம் விஸுத்³தி⁴மக்³க³ஸம்வண்ணனாதி³தோ க³ஹேதப்³ப³ம்.

1027. ததியாருப்பஸங்கா²தக்க²ந்தே⁴ஸு ச சதூஸுபி ஆரம்மணபூ⁴தேஸூதி அதி⁴ப்பாயோ.

1029-31. அபா⁴வமத்தம்பீதி ஸுஞ்ஞதமத்தம்பி ஏவம் ஸுகு²மம்பீதி அதி⁴ப்பாயோ. ஸந்தாரம்மணதாயாதி ஸந்தம் ஆரம்மணம் ஏதஸ்ஸாதி ஸந்தாரம்மணா, தப்³பா⁴வோ ஸந்தாரம்மணதா, தாய, ந ஜா²னஸந்ததாய. ந ஹி ததியாருப்பஸமாபத்தி சதுத்தா²ருப்பதோ ஸந்ததரா. சோத³கோ யம் ஸந்ததோ மனஸி கரோதி, ந தத்த² ஆதீ³னவத³ஸ்ஸனம் ப⁴வேய்ய. அஸதி ச ஆதீ³னவத³ஸ்ஸனே ந ஸமதிக்கமோ ஏவ ஸியாதி ‘‘ஸந்ததோ சே மனக்காரோ கத²ஞ்ச ஸமதிக்கமோ’’தி ஆஹ. இதரோ ‘‘அனாபஜ்ஜிதுகாமத்தா’’திஆதி³னா பரிஹாரமாஹ. தேன ஆதீ³னவத³ஸ்ஸனம்பி அத்தே²வாதி த³ஸ்ஸேதி. யஸ்மிஞ்ஹி ஜா²னே அபி⁴ரதி, தத்த² ஆவஜ்ஜனஸமாபஜ்ஜனாதி³படிபத்தியா ப⁴விதப்³ப³ம். ஸா பனஸ்ஸ ததியாருப்பே ஸப்³ப³ஸோவ நத்தி², கேவலம் ஸுஞ்ஞபா⁴வதோ ஆரம்மணகரணமத்தமேவ. ததா² ஹேஸ கிஞ்சாபி தம் ஸந்ததோ மனஸி கரோதி, அத² க்²வஸ்ஸ ‘‘அஹமேதம் ஆவஜ்ஜிஸ்ஸாமி, ஸமாபஜ்ஜிஸ்ஸாமீ’’தி ஆபோ⁴கோ³ ஸமன்னாஹாரோ ந ஹோதி. கஸ்மா? ஆகிஞ்சஞ்ஞாயதனதோ நேவஸஞ்ஞானாஸஞ்ஞாயதனஸமாபத்தியா பணீததரதாய. யதா² ஹி ராஜா மஹதா ராஜானுபா⁴வேன நக³ரவீதி²யம் சரந்தோ த³ந்தகாராத³யோ கம்மகாரே சே²கே அனேகானி த³ந்தவிகதிஆதீ³னி ஸிப்பானி கரோந்தே தி³ஸ்வா ‘‘அஹோ வத ரே சே²கா ஆசரியா, ஈதி³ஸானி ஸிப்பானி கரிஸ்ஸந்தீ’’தி ஏவம் தேஸம் சே²கதாய துஸ்ஸதி, ந சஸ்ஸ ஏவம் ஹோதி ‘‘அஹோ வதாஹம்பி ரஜ்ஜம் பஹாய ஏவரூபோ ஸிப்பிகோ ப⁴வேய்ய’’ந்தி. தம் கிஸ்ஸ ஹேது? ரஜ்ஜஸிரியா மஹானிஸம்ஸதாய, ஸோ தேஸம் ஜீவிதம் திணாயபி அமஞ்ஞமானோ தே ஸமதிக்கமித்வா க³ச்ச²தி, ஏவம்ஸம்பத³மித³ம் த³ட்ட²ப்³ப³ம்.

1032. ஸுகு²மம் பரந்தி உக்கம்ஸதோ ஸுகு²மம், பட²மஜ்ஜா²னூபசாரதோ பட்டா²ய ஹி தச்சே²ந்தியா விய பவத்தமானாய பா⁴வனாய அனுக்கமேன ஸங்கா²ரா தத்த² அந்திமகோட்டா²ஸதம் பாபிதாதி. யதி³ ஏவம் கத²ம் பா⁴வனா அத்தனோ கிச்சம் ஸாதே⁴தி, நனு சேஸா தத³வத்த²ம் பாபிதா ஆரம்மணம் ந ஸம்மா உபனிஜ்ஜா²யதீதி? நயித³மேவ த³ட்ட²ப்³ப³ம். பா⁴வனாப³லேன ஸுகு²மபா⁴வம் பாபிதாபி சேஸா அத்தனோ கிச்சே து³ப்³ப³லத்தம் ந பாபிதா, அத² கோ² விப்பா²ரிகதாபா⁴வம் க³மிதா, தேன ததா² ஸுகு²மாபி அத்தனோ கிச்சே ந து³ப்³ப³லா ஏவாதி ந தத்த² தஸ்ஸா அஸாமத்தி²யம் ஹோதி.

1033-4. யாய ஸஞ்ஞாயாதி யாதி³ஸாய ஸஞ்ஞாய ஸத்³த³ப்பவத்திஹேதுபூ⁴தாய. ஸோ நேவஸஞ்ஞானாஸஞ்ஞாயதனஸமங்கீ³ புக்³க³லோ. நேவஸஞ்ஞீ ச நாஸஞ்ஞீ ஹோதி நேவஸஞ்ஞானாஸஞ்ஞாஸமங்கீ³ ஹோதி. ந கேவலம் து ஸஞ்ஞாவ ஏதி³ஸீ ஸுகு²மா நேவஸஞ்ஞானாஸஞ்ஞா ஹோதி, அத² கோ² பன வேத³னாத³யோபி ஸுகு²மா, வேத³னாபி நேவவேத³னானாவேத³னா, சித்தம்பி நேவசித்தம்னாசித்தம், ப²ஸ்ஸோபி நேவப²ஸ்ஸோனாப²ஸ்ஸோ. ஏஸ நயோ ஸேஸஸம்பயுத்தத⁴ம்மேஸு. ஸஞ்ஞாஸீஸேன பன ‘‘நேவஸஞ்ஞானாஸஞ்ஞாயதன’’ந்தி வுத்தம் ‘‘நானத்தகாயா நானத்தஸஞ்ஞினோ’’திஆதீ³ஸு (தீ³. நி. 3.332, 341, 357, 359; அ. நி. 7.44; 9.24) விய. நனு சேத்த² யதி³ ஸஞ்ஞா அத்தி², கத²ம் நேவஸஞ்ஞாதி வத்தும் வட்டதி. யதி³ நத்தி², கத²ம் நாஸஞ்ஞாதி அனுயோக³ம் ஸந்தா⁴ய இமமத்த²ம் உபமாஹி ஸாதே⁴தும் ‘‘பத்தமக்க²னதேலேனா’’திஆதி³ வுத்தம். தத்த² பத்தமக்க²ணதேலேனாதி அந்தோவுத்த²தாய யாகு³யா ஸத்³தி⁴ம் அகப்பியட்டே²ன தேலம் அத்தீ²தி, நாளிபூராதீ³னம் வஸேன நத்தீ²தி ச வத்தப்³பே³ன பத்தே மக்கி²ததேலேன. மக்³க³ஸ்மிம் உத³கேன சாதி உபாஹனதேமனமத்தட்டே²ன உத³கம் அத்தீ²தி, நஹானவஸேன நத்தீ²தி ச வத்தப்³பே³ன மக்³க³ஸ்மிம் உத³கேன.

1035-7. அயம் அத்தோ²தி கிஞ்சி விஸேஸம் உபாதா³ய ஸபா⁴வதோ அத்தீ²தி வத்தப்³ப³ஸ்ஸேவ த⁴ம்மஸ்ஸ கிஞ்சி விஸேஸம் உபாதா³ய நத்தீ²தி வத்தப்³ப³தாஸங்கா²தோ அயமத்தோ². படுஸஞ்ஞாகிச்சம் காதும் அஸமத்த²தாய ஹி நேவஸஞ்ஞதா, ஸங்கா²ராவஸேஸஸுகு²மபா⁴வேன நாஸஞ்ஞதா ச ஹோதி. தேனாஹ ‘‘படுஸஞ்ஞாய கிச்சஸ்ஸா’’திஆதி³. ஆரம்மணஸஞ்ஜானனஞ்சேவ விபஸ்ஸனாய விஸயபா⁴வம் உபக³ந்த்வா நிப்³பி³தா³ஜனனஞ்ச படுஸஞ்ஞாகிச்சம் கத²மயம் ஸஞ்ஞாவ ஸமானா ஸஞ்ஞாகிச்சம் காதும் ந ஸக்கோதீதி ஆஹ ‘‘யதா² த³ஹனகிச்ச’’ந்திஆதி³. ந்ஹாதுகாமஸ்ஸ உண்ஹஸீதபா⁴வம் அகத்வா ஸுக²ஜனனதாய ஸுகோ²த³கம், தஸ்மிம். தேஜோதா⁴து யதா² த³ஹனகிச்சம் காதும் ந ஸக்கோதி, ஏவமேஸா அதிஸந்தாரம்மணே பவத்தத்தா ஆரம்மணஸஞ்ஜானனம் காதும் ந ஸக்கோதி, பரமஸுகு²மத்தம் க³தாவ. தேனேவ ஹேஸா அகதாபி⁴னிவேஸஸ்ஸ விபஸ்ஸனாஞாணேன ஸுக²க்³க³ய்ஹா ந ஹோதீதி ஸேஸஸமாபத்தீஸு ஸஞ்ஞா விய விபஸ்ஸனாய விஸயபா⁴வம் உபக³ந்த்வா நிப்³பி³தா³ஜனனம்பி காதும் ந ஸக்கோதி, அஞ்ஞேஸு ஹி க²ந்தே⁴ஸு அகதவிபஸ்ஸனாபி⁴னிவேஸோ பி⁴க்கு² நேவஸஞ்ஞானாஸஞ்ஞாயதனக்க²ந்தே⁴ ஸம்மஸித்வா நிப்³பி³த³ம் பத்தும் ஸமத்தோ² நாம நத்தி², அபி ஆயஸ்மா ஸாரிபுத்தோ. பகதிவிபஸ்ஸகோ பன ஸாரிபுத்தஸதி³ஸோ பி⁴க்கு² க²ந்தா⁴தி³முகே²ன விபஸ்ஸனம் அபி⁴னிவிஸித்வா த்³வாராரம்மணேஹி ஸத்³தி⁴ம் த்³வாரப்பவத்தத⁴ம்மானம் விபஸ்ஸனம் ஆரபி⁴த்வா டி²தோ ஸக்குணேய்ய தப்³பி³ஸயம் உத³யப்³ப³யஞாணம் உப்பாதே³தும், ஸோபி கலாபஸம்மஸனவஸேனேவ, நோ அனுபத³த⁴ம்மவிபஸ்ஸனாவஸேன. ந ஹி ஸாரிபுத்தஸதி³ஸோ பி⁴க்கு² சதுத்தா²ருப்பபரியாபன்னேஸு ப²ஸ்ஸாதி³த⁴ம்மேஸு வினிப்³பு⁴ஜித்வா விஸும் விஸும் ஸரூபதோ க³ஹேத்வா அனிச்சாதி³வஸேன ஸம்மஸிதும் ஸக்கோதி. கேவலம் பன அவினிப்³பு⁴ஜ்ஜ ஏகதோ க³ஹேத்வா கலாபதோ ஸமூஹதோயேவ ஸம்மஸிதும் ஸமத்தோ² ஹோதி, ஏவம் ஸுகு²மத்தேனேஸா விஜ்ஜதி.

1038-40. ரூபந்தி கஸிணரூபஸங்கா²தம் படிபா⁴க³னிமித்தம். ஆகாஸந்தி கஸிணுக்³கா⁴டிமாகாஸம். விஞ்ஞாணந்தி ஆகாஸே பவத்தவிஞ்ஞாணம். தத³பா⁴வகந்தி தஸ்ஸ ஆகாஸே பவத்தவிஞ்ஞாணஸ்ஸ அபா⁴வகம். கமதோதி பட²மாருப்பம் ஸமதிக்கமித்வா ஹோதீதிஆதி³னா அனுக்கமதோ. அத்தனா வுத்தமத்த²ம் அட்ட²கதா²வசனம் ஆஹரித்வா ஸாதே⁴ந்தோ ‘‘ஆஹ சா’’திஆதி³மாஹ. இதா⁴தி இமாஸு சதூஸு அரூபஸமாபத்தீஸு. பச்சி²மா பச்சி²மா ஸமாபத்தியோ ஹி புரிமாபுரிமாஹி ஸமாபத்தீஹி ஸுபணீததரா ஸுட்டு² பணீததரா, ஸுந்த³ரபணீததராதி வா அத்தோ². பாஸாத³தலஸாடிகாதி சதுபூ⁴மகபாஸாத³ஸ்ஸ ஹேட்டி²மஹேட்டி²மதோ உபரூபரி ஸவிஸேஸா பஞ்ச காமகு³ணா, சத்தாரோ பாஸாத³தலா ச தூ²லஸண்ஹஸண்ஹதரஸண்ஹதமஸுத்தேஹி விஹிதா ஆயாமவித்தா²ரதோ ஸமப்பமாணா ஸாடிகா ச.

1042. ரூபாரூபப⁴வம் அபி⁴பு⁴ய்ய நிப்³பா³னம் யாதி, அத² வா நீவரணே அபி⁴பு⁴ய்ய ரூபாரூபப⁴வம் யாதீதி அத்தோ².

இதி அபி⁴த⁴ம்மத்த²விகாஸினியா நாம

அபி⁴த⁴ம்மாவதாரஸம்வண்ணனாய

அரூபாவசரஸமாதி⁴பா⁴வனானித்³தே³ஸவண்ணனா நிட்டி²தா.