8. அட்ட²மோ பரிச்சே²தோ³

பகிண்ணகனித்³தே³ஸவண்ணனா

475-6. இதா³னி யதா²வுத்தானம் ஸப்³பே³ஸம்பி சித்தானம் பாகடபா⁴வத்த²ம் –

‘‘ஸுத்தம் தோ³வாரிகோ சேவ,

கா³மில்லோ அம்ப³கோ³ளியோ;

ஜச்சந்தோ⁴ பீட²ஸப்பீ ச,

உபனிஸ்ஸயமத்த²ஸோ’’தி. (த⁴. ஸ. அட்ட². 498 விபாகுத்³தா⁴ரகதா²) –

அட்ட²கதா²ய ஆக³தமாதிகாய வஸேன பகிண்ணகனயம் த³ஸ்ஸேதும் ‘‘இதா³னி பனா’’திஆதி³ ஆரத்³த⁴ம். தத்த² மனஸந்தி சித்தானம். ‘‘மானஸ’’ந்திபி பட²ந்தி, தம் ந ஸுந்த³ரம். பந்த²மக்கடகோதி பாணகபடங்கா³தீ³னம் ஸஞ்சரணட்டா²னே ஜாலம் பஸாரேத்வா தேஸம் மக்³க³ரக்க²ணதோ ‘‘பந்த²மக்கடகோ’’தி லத்³த⁴னாமோ உண்ணனாபி⁴. தி³ஸாஸு பன பஞ்சஸூதி உபமேதப்³பா³னம் பஞ்சபஸாதா³னம் வஸேன வுத்தம். தத்தா²தி மக்³கே³, தத்த² ஜாலமஜ்ஜே²தி வா ஸம்ப³ந்தோ⁴. ஸுத்தம் பஸாரேத்வாதி ஜாலப³ந்த⁴னமாஹ.

478-80. ந்தி ருதி⁴ரமாஹ. தி³ஸாஸு து³தியாதீ³ஸு ஸுத்தே…பே… க⁴ட்டிதேதி ஸம்ப³ந்தோ⁴. ‘‘பஸாதா³ பஞ்ச த³ட்ட²ப்³பா³’’திஆதி³ உபமாஸம்ஸந்த³னம். சித்தம்…பே… வியாதி ஹத³யவத்து²ம் நிஸ்ஸாய பவத்தமானசித்தம் ஜாலமஜ்ஜே² நிபன்னமக்கடகோ விய த³ட்ட²ப்³ப³ம்.

482-5. பஸாத³க⁴ட்டனந்தி பஸாதே³ க⁴ட்டிதம். ப⁴வங்கா³வட்டனந்தி ப⁴வங்க³ம் ஆவட்டேந்தம். த⁴ம்மதோ அஞ்ஞா காசி கிரியா நாம நத்தீ²தி த⁴ம்மமேவ சலனேன ஸஹ உபமேதி. ஸுத்தானுஸாரம்வாதி ஸுத்தானுஸாரேன க³மனம் விய. ஜவனஸ்ஸ ஆரம்மணரஸானுப⁴வனதோ தஸ்ஸ பவத்தி யூஸபானேன ஸத்³தி⁴ம் உபமேத்வா வுத்தா. வத்து²ம்யேவாதி யதா² புரிமசித்தானி ஹத³யவத்து²னிஸ்ஸிதானி பஸாத³வத்து²ம் அனுக³தானி அஞ்ஞாரம்மணானி ச ஹோந்தி, ந ஏவம் ப⁴வங்க³ம். தம் பன வத்தா²ரம்மணந்தரரஹிதம் கேவலம் ஹத³யவத்து²மேவ நிஸ்ஸாய பவத்ததீதி தீ³பேதி. பரிவத்தனந்தி புன ப⁴வங்க³பா⁴வேன பரிவத்தனம். ப⁴வங்கா³வஜ்ஜனாதீ³னம் த⁴ம்மதோ பே⁴தே³பி ஸந்ததிவஸேன ஏகத்தம் க³ஹேத்வா ஏகேனேவ மக்கடகேன உபமாஸம்ஸந்த³னம் வுத்தம்.

486-90. உபமா ஏவ ஓபம்மம். ததோ பஸாத³வத்து²தோ சித்தாதி ஸம்ப³ந்தோ⁴. தீ³பிதம் இமினா ஓபம்மேன. ஏகேகாரம்மணந்தி ரூபாதீ³ஸு பஞ்சஸு ஏகேகம் ஆரம்மணம். ஸப்³ப³ஸோதி ஸப்³பே³ஸு சக்கா²தீ³ஸு யத்த² கத்த²சீதி அத்தோ². இதா³னி ஏகேகாரம்மணஸ்ஸ த்³வீஸு த்³வீஸு ஆபாத²க³மனம் பகாஸேதும் ‘‘ரூபம் சக்கு²பஸாத³ம்ஹீ’’திஆதி³ வுத்தம். கே² ஆகாஸே க³ச்ச²தீதி க²கோ³, பக்கி². ஸாகி²னோதி ருக்க²ஸ்ஸ.

492-3. ரூபஸ்ஸாதி ஸம்ப³ந்தே⁴ ஸாமிவசனம், தஸ்ஸ பன க⁴ட்டனம், ஆபாத²க³மனம்பி சாதி த்³வீஹி ஸஹ ஸம்ப³ந்தோ⁴. பஸாத³ஸ்ஸாதி கம்மத்தே² ஸாமிவசனம், அத்த²தோ ஆபாத²க³மனம்பி சாதி ஸம்ப³ந்தோ⁴. ஆரம்மணவஸேன, ஆபாத²ம் ஆக³ச்ச²ந்தஸ்ஸபி பஸாத³க⁴ட்டனேன ச ப⁴வங்க³சலனஸ்ஸ பச்சயபா⁴வேன ஆபாத²ம் விய உபக³மனந்தி அத்தோ².

494-5. ததோதி ப⁴வங்க³சலனதோ பரம், குஸலம் ஜவனம் சித்தந்தி காமாவசரகுஸலஜவனசித்தம். அகுஸலமேவ வாதி வா-ஸத்³தே³ன கிரியாப்³யாகதசித்தம்பி ஸங்க³ண்ஹாதி. ஏத்த² ஸியா – கோ பனேதம் ஜவனம் குஸலதாய வா அகுஸலதாய வா நியமேதீதி? யோனிஸோமனஸிகாரோ சேவ அயோனிஸோமனஸிகாரோ ச. யஸ்ஸ ஹி சதுசக்கஸம்பதா³வஸேன யோனிஸோமனஸிகாரோ பவத்ததி, ஆவஜ்ஜனம், வோட்ட²ப்³ப³னஞ்ச யோனிஸோவ ஆவட்டேதி, வவத்தா²பேதி ச, தஸ்ஸ அகுஸலுப்பத்தி நத்தி². யஸ்ஸ பன வுத்தவிபரியாயேன அயோனிஸோமனஸிகாரோ ச ஹோதி, ஆவஜ்ஜனம், வோட்ட²ப்³ப³னஞ்ச அயோனிஸோ ச ஆவட்டேதி, வவத்தா²பேதி ச, தஸ்ஸ குஸலஜவனுப்பத்தி நத்தி², தஸ்மா யோனிஸோமனஸிகாரோ குஸலதாய, அயோனிஸோமனஸிகாரோ அகுஸலதாய ச நியமேதீதி த³ட்ட²ப்³ப³ம். கிரியாஜவனம் பன அரஹத்தமேவ நியமேதி. கேசி பன ‘‘கிரியாஜவனம் பன மனஸிகாரோ ச நியமேதி. யதா² ஹி ஆவஜ்ஜனம் குஸலாகுஸலானம் விஸும் விஸும் பச்சயோ ஹோதி, ஏவம் கிரியாஜவனஸ்ஸாபீ’’தி வத³ந்தி.

497. தோ³வாரிகோபமாதீ³னீதி ஏத்த² ஏகோ ராஜா ஸயனக³தோ நித்³தா³யதி, தஸ்ஸ பரிசாரகோ பாதே³ பரிமஜ்ஜந்தோ நிஸீதி³, ப³தி⁴ரதோ³வாரிகோ த்³வாரே டி²தோ, தயோ படிஹாரா ஸயனஸ்ஸ, த்³வாரஸ்ஸ ச மஜ்ஜே² படிபாடியா டி²தா. அதே²கோ பச்சந்தவாஸீ மனுஸ்ஸோ பண்ணாகாரம் ஆதா³ய த்³வாரம் ஆகோடேஸி, ப³தி⁴ரதோ³வாரிகோ ஸத்³த³ம் ந ஸுணாதி, பாத³பரிமஜ்ஜகோ ஸஞ்ஞம் அகாஸி, தாய ஸஞ்ஞாய த்³வாரம் விவரித்வா பஸ்ஸி, பட²மபடிஹாரோ பண்ணாகாரம் க³ஹேத்வா து³தியஸ்ஸ அதா³ஸி, து³தியோ ததியஸ்ஸ, ததியோ ரஞ்ஞோ, ராஜா பரிபு⁴ஞ்ஜி. தத்த² ராஜா விய ஜவனம் த³ட்ட²ப்³ப³ம், பாத³பரிமஜ்ஜகோ விய ஆவஜ்ஜனம், ப³தி⁴ரதோ³வாரிகோ விய சக்கு²விஞ்ஞாணம், தயோ படிஹாரா விய ஸம்படிச்ச²னாதீ³னி தீணி வீதி²சித்தானி, பச்சந்தவாஸினோ பண்ணாகாரம் ஆதா³ய த்³வாராகோடனம் விய ஆரம்மணஸ்ஸ பஸாத³க⁴ட்டனம், பாத³பரிமஜ்ஜகேன ஸஞ்ஞாய தி³ன்னகாலோ விய கிரியாமனோதா⁴துயா ப⁴வங்க³ஸ்ஸ ஆவட்டிதகாலோ, தேன தி³ன்னஸஞ்ஞாய ப³தி⁴ரதோ³வாரிகஸ்ஸ த்³வாரவிவரகாலோ விய சக்கு²விஞ்ஞாணஸ்ஸ ஆரம்மணே த³ஸ்ஸனகிச்சஸாத⁴னகாலோ, பட²மபடிஹாரேன பண்ணாகாரஸ்ஸ க³ஹிதகாலோ விய விபாகமனோதா⁴துயா ஆரம்மணஸ்ஸ ஸம்படிச்சி²தகாலோ, பட²மேன து³தியஸ்ஸ தி³ன்னகாலோ விய விபாகமனோவிஞ்ஞாணதா⁴துயா ஆரம்மணஸ்ஸ ஸந்தீரிதகாலோ, து³தியேன ததியஸ்ஸ தி³ன்னகாலோ விய கிரியாமனோவிஞ்ஞாணதா⁴துயா ஆரம்மணஸ்ஸ வவத்தா²பிதகாலோ, ததியேன ரஞ்ஞோ தி³ன்னகாலோ விய வோட்ட²ப்³ப³னேன ஜவனஸ்ஸ நிய்யாதிதகாலோ, ரஞ்ஞோ பரிபோ⁴க³காலோ விய ஜவனஸ்ஸ ஆரம்மணரஸானுப⁴வனகாலோதி அயம் தோ³வாரிகோபமா.

‘‘இத³ம் பன ஓபம்மம் கிம் தீ³பேதீ’’திஆதி³ உச்சு²யந்தூபமாய வுத்தனயேன வேதி³தப்³பா³. ஸம்ப³ஹுலா கா³மதா³ரகா அந்தரவீதி²யம் பம்ஸும் கீளந்தி, தத்தே²கஸ்ஸ ஹத்தே² கஹாபணோ படிஹஞ்ஞி. ஸோ ‘‘மய்ஹம் ஹத்தே² படிஹதம், கிம் நு கோ² ஏத’’ந்தி ஆஹ. அதே²கோ ‘‘பண்ட³ரம் ஏத’’ந்தி ஆஹ. அபரோ ஸஹ பம்ஸுனா கா³ள்ஹம் க³ண்ஹி. அஞ்ஞோ ‘‘புது²லம் சதுரஸ்ஸம் ஏத’’ந்தி ஆஹ. அபரோ ‘‘கஹாபணோ ஏஸோ’’தி ஆஹ. அத² ஆஹரித்வா மாது அத³ம்ஸு, ஸா கம்மே உபனேஸி. தத்த² ஸம்ப³ஹுலானம் தா³ரகானம் அந்தரவீதி²யம் கீளந்தானம் ஸன்னிஸின்னகாலோ விய சித்தப்பவத்தி த³ட்ட²ப்³பா³, கஹாபணஸ்ஸ ஹத்தே² படிஹதகாலோ விய ஆரம்மணேன பஸாத³ஸ்ஸ க⁴ட்டிதகாலோ, ‘‘கிம் நு கோ² ஏத’’ந்தி வுத்தகாலோ விய தம் ஆரம்மணம் க³ஹேத்வா கிரியாமனோதா⁴துயா ப⁴வங்க³ஸ்ஸ ஆவட்டிதகாலோ, ‘‘பண்ட³ரம் ஏத’’ந்தி வுத்தகாலோ விய சக்கு²விஞ்ஞாணேன த³ஸ்ஸனகிச்சஸ்ஸ ஸாதி⁴தகாலோ, ஸஹ பம்ஸுனா கா³ள்ஹம் க³ஹிதகாலோ விய விபாகமனோதா⁴துயா ஆரம்மணஸ்ஸ ஸம்படிச்சி²தகாலோ, ‘‘புது²லம் சதுரஸ்ஸம் ஏத’’ந்தி வுத்தகாலோ விய விபாகமனோவிஞ்ஞாணதா⁴துயா ஆரம்மணஸ்ஸ ஸந்தீரிதகாலோ, ‘‘கஹாபணோ ஏஸோ’’தி வுத்தகாலோ விய கிரியாமனோவிஞ்ஞாணதா⁴துயா ஆரம்மணஸ்ஸ வவத்தா²பிதகாலோ, மாதரா கம்மே உபனீதகாலோ விய ஜவனஸ்ஸ ஆரம்மணரஸானுப⁴வனம் வேதி³தப்³ப³ந்தி அயம் கா³மதா³ரகோபமா.

இத³ம் ஓபம்மம் கிம் தீ³பேதி? கிரியாமனோதா⁴து அதி³ஸ்வாவ ப⁴வங்க³ம் ஆவட்டேதி, விபாகமனோதா⁴து அதி³ஸ்வாவ ஸம்படிச்ச²தி, விபாகமனோவிஞ்ஞாணதா⁴து அதி³ஸ்வாவ ஸந்தீரேதி, கிரியாமனோவிஞ்ஞாணதா⁴து அதி³ஸ்வாவ வவத்தா²பேதி, ஜவனம் அதி³ஸ்வாவ ஆரம்மணரஸம் அனுப⁴வதி, ஏகந்தேன பன சக்கு²விஞ்ஞாணமேவ த³ஸ்ஸனகிச்சம் ஸாதே⁴தீதி தீ³பேதி. ஜச்சந்த⁴பீட²ஸப்பீஉபமா உபரி ஆக³மிஸ்ஸதி.

498-509. ஏத்தகா உபமா ஸங்க³ஹேத்வா ‘‘தோ³வாரிகோபமாதீ³னீ’’தி வத்வா ‘‘உபனிஸ்ஸயமத்த²ஸோ’’தி ஏத்த² உபனிஸ்ஸயபா⁴வம் பகாஸேதும் ‘‘அஸம்பே⁴தே³னா’’திஆதி³மாஹ. அஸம்பே⁴தே³னாதி அவினட்ட²பா⁴வேன, வாதபித்தாதீ³ஹி அனுபஹதபா⁴வேன ச. வாதபித்தாதி³உபஹதம்பி ஹி சக்கு²விஞ்ஞாணஸ்ஸ பச்சயபா⁴வானுபக³மனதோ ஸம்பி⁴ன்னமேவ நாம ஹோதி, பஞ்சிந்த்³ரியானம் அத்தி²க்க²ணேயேவ நிஸ்ஸயபா⁴வூபக³மனதோ க²ணவஸேன அஸம்பே⁴தோ³பி யுஜ்ஜதி. ஏஸ நயோ ஸோதபஸாதா³தீ³ஸுபி. ரூபாபாத²க³மேனாதி தூ³ரே டி²தஸ்ஸ ப²லிகாதீ³ஹி அந்தரிதஸ்ஸ சக்கு²விஞ்ஞாணுப்பத்தியா பச்சயோ ப⁴விதும் யோக்³யதே³ஸே அவட்டி²தவஸேன ரூபஸ்ஸ ஆபாத²க³மனேன. ஏவஞ்ச கத்வா தூ³ரே டி²தம், பரம்முகே² டி²தம்பி தி³ப்³ப³சக்கு²ஸ்ஸ ஆபாத²க³தமேவ நாம ஹோதி. ஆலோகனிஸ்ஸயேனாபீதி ரூபாவபா⁴ஸனஸமத்த²ஆலோகஸங்கா²தனிஸ்ஸயேன. ஆலோகே ஸதி ஸம்ப⁴வோ சேத்த² ஆலோகனிஸ்ஸயதா, ந ஆலோகஸ்ஸ நிஸ்ஸயபச்சயத்தா. மனக்காரோவ ஹேது மனக்காரஹேது, தேன ஸஹ வத்ததீதி ஸமனக்காரஹேது. தேன ஆலோகனிஸ்ஸிதம் த³ஸ்ஸேதி. ஸமேதேஹீதி ஸம்யுத்தேஹி ஏகீபூ⁴தேஹி, ந ஏகஸ்ஸபி விரஹேனாதி அத்தோ².

ஆகாஸனிஸ்ஸயேனாதி கண்ணச்சி²த்³த³ஸங்கா²தஆகாஸனிஸ்ஸயேன. தேனேவ ஹி அட்ட²கதா²யம் ‘‘ந ஹி பிஹிதகண்ணச்சி²த்³த³ஸ்ஸ ஸோதவிஞ்ஞாணம் பவத்ததீ’’தி வுத்தம். பா³ஹிராகாஸம்பி பன இச்சி²தமேவ. ததா² ஹி அவிவரே கே³ஹே நிஸீதி³த்வா வுச்சமானானம் ப³ஹி டி²தா ந ஸுணந்தி. வாயோஸன்னிஸ்ஸயேனாதி நாஸிகச்சி²த்³த³ம் பவிஸனவாயுஸன்னிஸ்ஸயேன. ஆபோஸன்னிஸ்ஸயேனாதி கே²ளஸங்கா²தஆபோஸன்னிஸ்ஸயேன. பத²வீஸன்னிஸ்ஸயேனாதி காயபஸாத³வத்து²ஸ்ஸ பத²வீதா⁴துஸன்னிஸ்ஸயேன. மனோவிஞ்ஞாணந்தி ஜவனமனோவிஞ்ஞாணம்.

510-11. மனோ…பே… வேதி³தப்³ப³ந்தி ‘‘அஸம்பே⁴தா³ மனஸ்ஸா’’தி ஏத்த² வுத்தம் மனோ ப⁴வங்க³சித்தந்தி வேதி³தப்³ப³ம். தம் பன சுதிவஸேன நிருத்³த⁴ம்பி கிரியாமயசித்தஸ்ஸ பச்சயபா⁴வம் அனுபக³ந்த்வா கேவலம் ப⁴வங்க³ப்பவத்திவஸேன மந்த³தா²மக³தம் ஹுத்வா பவத்தனம்பி ஸம்பி⁴ன்னமேவாதி த³ட்ட²ப்³ப³ம். நாயம் ஸப்³ப³த்த² க³ச்ச²தீதி சதுவோகாரே அலப்³ப⁴னதோ. தேனாஹ ‘‘ப⁴வம் து பஞ்சவோகார’’ந்திஆதி³. தத்த² பஞ்சன்னம் க²ந்தா⁴னம் வோகாரோ ஏத்தா²தி பஞ்சவோகாரோ. ஹோதி ஹி பி⁴ன்னாதி⁴கரணம்பி அஞ்ஞபத³த்த²ஸமாஸோ யதா² ‘‘உரஸிலோமோ’’தி. அத² வா யதா²பச்சயம் பஞ்சஹி க²ந்தே⁴ஹி வோகரீயதீதி பஞ்சவோகாரோ. ‘‘அத்த²தோ’’தி ஏவமாதி³கம் பத³ம் சக்கா²தீ³னி த³ஸ்ஸனாதி³கிச்சானீதி ஏத்தகமேவ ஸந்தா⁴ய வுத்தம், ந அஞ்ஞம் கிஞ்சி விஸேஸனந்தி ந தத்த² வினிச்ச²யோ வுத்தோ.

512-4. ஸப்³பா³னீதி காமாவசராதி³பே⁴த³ம் அனாமஸித்வா ஸப்³பா³னி. கம்மந்தி படிஸந்தி⁴னிப்³ப³த்தகா உபபஜ்ஜவேத³னீயபூ⁴தா, அபராபரியவேத³னீயபூ⁴தா வா சேதனா. கம்மனிமித்தந்தி யம் வத்து²ம் ஆரம்மணம் கத்வா ஆயூஹனகாலே கம்மம் ஆயூஹதி, தம் தா³னூபகரணாதி³கம், பாணகா⁴தோபகரணாதி³கஞ்ச. க³தினிமித்தந்தி ப⁴வந்தரமுபபஜ்ஜிதப்³ப³ப⁴வபரியாபன்னவண்ணாயதனம், தம் பன ஸுக³தியம் மனுஸ்ஸலோகே நிப்³ப³த்தந்தஸ்ஸ ரத்தகம்ப³லஸதி³ஸமாதுகுச்சி²வண்ணவஸேன, தே³வலோகே நிப்³ப³த்தந்தஸ்ஸ உய்யானகப்பருக்க²வண்ணவஸேன, து³க்³க³தியம் நிப்³ப³த்தந்தஸ்ஸ அக்³கி³ஜாலாதி³வண்ணவஸேன, பேததிரச்சா²னயோனீஸு பேததிரச்சா²னானம் நிப³த்³த⁴ஸஞ்சரணட்டா²னபரியாபன்னதாவண்ணவஸேன ச த³ட்ட²ப்³ப³ம். ‘‘திவித⁴’’ந்தி இத³ம் யதா²ஸம்ப⁴வவஸேன வுத்தம், ரூபாரூபஸம்ப³ந்தீ⁴னம் பன கம்மனிமித்தமேவ ஆரம்மணம் ஹோதி. ததா² ஹி மஹக்³க³தவிபாகானி ஏகந்தேன கம்மஸதி³ஸாரம்மணானி வுத்தானி.

பச்சுப்பன்னமதீதம் வாதி க²ணவஸேன பச்சுப்பன்னமதீதம் வா. தத்த² க³தினிமித்தம் ஏகந்தேன பச்சுப்பன்னமேவ, கம்மனிமித்தம் பச்சுப்பன்னமதீதம் வா, கம்மம் பன அதீதமேவ. அனாக³தாரம்மணம் பன பச்சுப்பன்னகம்மனிமித்தக³தினிமித்தம் விய அனாபாத²க³தத்தா, அதீதகம்மகம்மனிமித்தம் விய அனனுபூ⁴தத்தா ச விபூ⁴தம் ஹுத்வா நோபதிட்டா²தீதி அதிஸந்தபா⁴வேன பவத்தமானா படிஸந்தி⁴ தம் ஆரப்³ப⁴ பவத்திதும் ந ஸக்கோதீதி வுத்தம் ‘‘நத்தி² அனாக³த’’ந்தி. மஹக்³க³தபடிஸந்தீ⁴னம் ஏகந்தேன கம்மஸதி³ஸாரம்மணபா⁴வேன கம்மஸ்ஸ விய அதீதனவத்தப்³பா³ரம்மணத்தா ந தாஸம் விஸும் ஆரம்மணம் உத்³த⁴டம். தத்த² து³தியசதுத்தா²ரூபபடிஸந்தீ⁴னம் அதீதமேவ ஆரம்மணம் இதராஸம் நவத்தப்³ப³ந்தி த³ட்ட²ப்³ப³ம்.

517-20. மஹாவிபாகானம் படிஸந்தா⁴தி³சதுகிச்சவஸேனேவ பவத்தனதோ ரூபாரூபப⁴வே படிஸந்தி⁴ப⁴வங்க³சுதிவஸேன தம்தம்விபாகஸ்ஸேவ பவத்திதோ, ததா³ரம்மணஸ்ஸ ச அபா⁴வேன தத்த² ந லப்³ப⁴தீதி ஆஹ ‘‘மஹாபாகா…பே… த்³வயே’’தி. அனிட்ட²ரூபானம் ப்³ரஹ்மலோகே அஸம்ப⁴வேபி தத்த² ட²த்வா இத⁴ அனிட்டா²ரம்மணம் பஸ்ஸந்தானம் அகுஸலவிபாகானி ந உப்பஜ்ஜந்தீதி ந வத்தப்³ப³ந்தி ரூபப⁴வேபி ஸந்தீரணத்தயம் வுத்தம். அபி⁴த⁴ம்மத்த²ஸங்க³ஹஸச்சஸங்கே²பாதீ³ஸுபி ஹி இமினாவ அதி⁴ப்பாயேன ரூபலோகே அகுஸலவிபாகப்பவத்தி த³ஸ்ஸிதா. அபரே பன ‘‘காமப⁴வே ஸந்தீரணத்தயம், ரூபப⁴வே ஸந்தீரணத்³வயந்தி யதா²லாப⁴வஸேன யோஜேதப்³ப³’’ந்தி வத³ந்தி.

கதா³சிபீதி பரித்தாரம்மணேஸு பரித்தஜவனானம் உப்பாதே³பி. ‘‘பீ³ஜஸ்ஸாபா⁴வதோ’’தி ரூபாரூபப⁴வத்³வயே ததா³ரம்மணாபா⁴வஸ்ஸ காரணம் வத்வா தமேவ பகாஸேதும் ‘‘படிஸந்தி⁴பீ³ஜ’’ந்திஆதி³ வுத்தம். படிஸந்தி⁴யேவ பீ³ஜபூ⁴தந்தி படிஸந்தி⁴பீ³ஜம். தஸ்ஸாதி ததா³ரம்மணஸ்ஸ.

521. யதி³ ஏவம் சக்கு²விஞ்ஞாணாதீ³னம்பி காமாவசரபடிஸந்தி⁴பீ³ஜத்தா தத்த² அபா⁴வோ ஆபஜ்ஜதீதி சோதே³ந்தோ ஆஹ ‘‘சக்கு²விஞ்ஞாணாதீ³ன’’ந்திஆதி³. இந்த்³ரியானந்தி சக்கு²விஞ்ஞாணாதீ³னம் வத்து²த்³வாரபூ⁴தானம் சக்கா²தீ³னமிந்த்³ரியானம். பவத்தானுபா⁴வதோதி தேஸம் தத்த² அத்தி²தானுபா⁴வதோ. அயஞ்ஹேத்த² அதி⁴ப்பாயோ – சக்கு²ஸோதவிஞ்ஞாணானம் வத்து²பூ⁴தானி சக்கு²ஸோதிந்த்³ரியானி தத்த² பவத்தந்தீதி தேஸம் பவத்திஆனுபா⁴வதோ சக்கு²ஸோதவிஞ்ஞாணானி பவத்தந்தி. ஸதி ச தேஸம் பவத்தியம் வீதி²சித்துப்பாதோ³ நியதோதி சக்கு²விஞ்ஞாணாதீ³னம் விய ஸம்படிச்ச²னஸந்தீரணானம்பி தத்த² ஸம்ப⁴வோ ஸித்³தோ⁴தி.

523-4. அகாமாவசரத⁴ம்மேதி காமாவசரத⁴ம்மதோ அஞ்ஞே மஹக்³க³தலோகுத்தரத⁴ம்மே. நானுப³ந்த⁴தீதி நானுவத்ததி. ஜனகம்…பே… அனுப³ந்த⁴தீதி யதா² நாம கே³ஹதோ நிக்க²மித்வா ப³ஹி க³ந்துகாமோ தருணதா³ரகோ அத்தனோ ஜனகம் பிதரம் வா அஞ்ஞம் வா பிதுஸதி³ஸம் ஹிதகாமம் ஞாதிம் அங்கு³லியம் க³ஹேத்வா அனுப³ந்த⁴தி, ந அஞ்ஞம் ராஜபுரிஸாதி³ம், ததா² ஏதம்பி ப⁴வங்கா³ரம்மணதோ ப³ஹி நிக்க²மிதுகாமஸபா⁴க³தாய அத்தனோ ஜனகம் பட²மகுஸலாதி³கம் ஸதி³ஸம் வா து³தியகுஸலாதி³காமாவசரஜவனமேவ அனுப³ந்த⁴தி, ந அஞ்ஞம் மஹக்³க³தம் லோகுத்தரந்தி அயமேத்த² அத்தோ². குஸலாகுஸலாதி³ந்தி ஆதி³-க்³க³ஹணேன கிரியாப்³யாகதம் ஸங்க³ண்ஹாதி. ஆனந்தா³சரியோ பன பட்டா²னே ‘‘குஸலாகுஸலே நிருத்³தே⁴ விபாகோ ததா³ரம்மணதா உப்பஜ்ஜதீ’’தி (பட்டா². 3.1.98) விபாகத⁴ம்மத⁴ம்மானமேவானந்தரம் ததா³ரம்மணம் வுத்தம். விப்பா²ரவந்தஞ்ஹி ஜவனம் நாவம் விய நதீ³ஸோதோ ப⁴வங்க³ம் அனுப³ந்த⁴தி, ந பன ச²ளங்கு³பேக்கா²வதோ ஸந்தவுத்திம் கிரியாஜவனம் பண்ணபுடம் விய நதீ³ஸோதோதி கிரியாஜவனானந்தரம் ததா³ரம்மணம் ந இச்ச²தி, ஆசரியஜோதிபாலத்தே²ராத³யோ பன ‘‘லப்³ப⁴மானஸ்ஸபி கேனசி அதி⁴ப்பாயேன கத்த²சி அவசனம் தி³ஸ்ஸதி, யதா² தம் த⁴ம்மஸங்க³ஹே அகுஸலனித்³தே³ஸே லப்³ப⁴மானோபி அதி⁴பதி ந வுத்தோ, தஸ்மா யதி³ அப்³யாகதானந்தரம்பி ததா³ரம்மணம் வுச்சேய்ய, ததா³ வோட்ட²ப்³ப³னானந்தரம்பி தஸ்ஸ பவத்திம் மஞ்ஞேய்யுந்தி கிரியாஜவனானந்தரம் ததா³ரம்மணம் ந வுத்தம், ந பன அலப்³ப⁴னதோ. யஞ்சேத்த² பண்ணபுடம் நித³ஸ்ஸிதம், தம் நித³ஸ்ஸிதப்³பே³ன ஸமானம் ந ஹோதி, நாவாபண்ணபுடானஞ்ஹி நதீ³ஸோதஸ்ஸ ஆவட்டனம் க³தி ச விஸதி³ஸீதி நாவாயம் நதீ³ஸோதஸ்ஸ அனுப³ந்த⁴னம், பண்ணபுடஸ்ஸ அனனுப³ந்த⁴னஞ்ச யுஜ்ஜதி, இத⁴ பன கிரியாஜவனேதரஜவனானம் ப⁴வங்க³ஸோதஸ்ஸ ஆவட்டனம் க³தி ச ஸதி³ஸீதி ஏதஸ்ஸ அனனுப³ந்த⁴னம், இதரஸ்ஸ அனுப³ந்த⁴னஞ்ச ந யுஜ்ஜதி, தஸ்மா விசாரேதப்³ப³மேவ த’’ந்தி வத³ந்தி.

525-6. யதா² சேதம் மஹக்³க³தலோகுத்தரத⁴ம்மே நானுவத்ததி, ததா² யதா³ ஏதே காமாவசரத⁴ம்மாபி மஹக்³க³தானுத்தரத⁴ம்மாரம்மணா ஹுத்வா பவத்தந்தி, ததா³ தேபி நானுப³ந்த⁴தீதி ஆஹ ‘‘காமாவசரத⁴ம்மாபீ’’திஆதி³. மஹக்³க³தா-க்³க³ஹணேன சேத்த² லோகுத்தரானம்பி ஸங்க³ஹோ த³ட்ட²ப்³போ³. தே சாபீதி ச-ஸத்³தே³ன லோகுத்தராரம்மணானம் க³ஹணம். கஸ்மா நானுப³ந்த⁴தீதி ஆஹ ‘‘பரித்தாரம்மணத்தா’’திஆதி³. பரித்தாரம்மணத்தாதி ஹேட்டா² வுத்தனயேன காமாவசரவிபாகானம் ஏகந்தேன பரித்தாரம்மணத்தா. ததா²பரிசிதத்தாதி யதா² ஜவனம், ஏவம் அபரிசிதத்தா. இத³ம் வுத்தம் ஹோதி – யதா² ஹி ஸோ பிதரம், பிதுஸதி³ஸம் வா கஞ்சி அனுப³ந்த⁴ந்தோ தருணதா³ரகோ க⁴ரத்³வாரந்தரவீதி²சதுக்காதி³ம்ஹி பரிசிதேயேவ தே³ஸே அனுக³ச்ச²தி, ந அரஞ்ஞம் வா ரக்க²ஸபூ⁴மிம் வா க³ச்ச²ந்தம், ஏவம் காமாவசரத⁴ம்மே அனுப³ந்த⁴ந்தம்பி பரித்தம்ஹி பரிசிதேயேவ தே³ஸே பவத்தமானே தே த⁴ம்மே அனுப³ந்த⁴தி, ந மஹக்³க³தலோகுத்தரத⁴ம்மே ஆரப்³ப⁴ பவத்தமானேபி.

527-32. இதா³னி கிம் இமாய யுத்திகதா²ய, அட்ட²கதா²பமாணதோ சேதம் க³ஹேதப்³ப³ந்தி த³ஸ்ஸேந்தோ ஆஹ ‘‘கிம் தேனா’’திஆதி³. ஜவனேதி காமாவசரஜவனே. ததா³ரம்மணசித்தானி ‘‘ததா³ரம்மண’’ந்தி லத்³த⁴னாமானி சித்தானி ததா³ரம்மணபா⁴வம் ந க³ண்ஹந்தி, ததா³ரம்மணபா⁴வேன ந பவத்தந்தீதி அத்தோ². அத² வா நாமகோ³த்தம் ஆரப்³ப⁴ ஜவனே ஜவிதே ததா³ரம்மணம் தஸ்ஸ ஜவனஸ்ஸ ஆரம்மணம் ந க³ண்ஹந்தி ந லப்³ப⁴ந்தீதி அத்தோ². ரூபாரூபப⁴வேஸு வாதி வா-ஸத்³தே³ன ‘‘ஜவனே ஜவிதேபி ததா³ரம்மணம் ந க³ண்ஹந்தீ’’தி ஆகட்³ட⁴தி. பண்ணத்திம் ஆரப்³பா⁴தி காமப⁴வேபி பண்ணத்திம் ஆரப்³ப⁴. லக்க²ணாரம்மணாயாதி அனிச்சாதி³லக்க²ணத்தயாரம்மணாய, ப³லவவிபஸ்ஸனாயாதி அத்தோ². ‘‘தீணி லக்க²ணானி, திஸ்ஸோ ச பஞ்ஞத்தியோ குஸலத்திகே ந லப்³ப⁴ந்தீ’’தி அட்ட²கதா²ய வுத்தத்தா திண்ணம் லக்க²ணானம் த⁴ம்மதோ அபா⁴வேன தம் ஆரப்³ப⁴ பவத்தாய விபஸ்ஸனாய ததா³ரம்மணானி ந லப்³ப⁴ந்தி. பட்டா²னே பன ‘‘ஸேகா² வா புது²ஜ்ஜனா வா குஸலம் அனிச்சதோ து³க்க²தோ அனத்ததோ விபஸ்ஸந்தி, குஸலாகுஸலே நிருத்³தே⁴ விபாகோ ததா³ரம்மணதா உப்பஜ்ஜதீ’’தி (பட்டா². 1.1.406) வசனதோ க²ந்தா⁴ரம்மணிகவிபஸ்ஸனாய ததா³ரம்மணம் லப்³ப⁴தீதி த³ட்ட²ப்³ப³ம். மிச்ச²த்தனியதேஸூதி ‘‘கதமே த⁴ம்மா மிச்ச²த்தனியதா? சத்தாரோ தி³ட்டி²க³தஸம்பயுத்தசித்துப்பாதா³’’தி (த⁴. ஸ. 1426) ஏவமாக³தேஸு மிச்சா²கா³ஹவஸேன பவத்தேஸு த⁴ம்மேஸு ஜவனம் ஹுத்வா ஜவிதேஸு. கஸ்மா பன தேஸு ஜவிதேஸு ததா³ரம்மணம் ந லப்³ப⁴தீதி? காமாவசரவிபாகானஞ்ஹி நியதமிச்சா²தி³ட்டி² விய ‘‘அத்தா ஓச்சி²ஜ்ஜதீ’’திஆதி³னா அத்தபரிகப்பனாவஸேன அப்பவத்தனதோ நியதமிச்சா²தி³ட்டி²வஸப்பவத்தேஸு தேஸு ஜவிதேஸு தத³னந்தரம் ததா³ரம்மணானி ந உப்பஜ்ஜந்தி, அனியதமிச்சா²தி³ட்டி²வஸப்பவத்தேஸு பன ஜவிதேஸு ததா³ரம்மணம் நுப்பஜ்ஜதீதி நத்தி². அத² வா மிச்ச²த்தனியதேஸூதி மிச்சா²பா⁴வனியதஸபா⁴வேஸு தம்விஸயேஸூதி அத்தோ². மிச்ச²த்தனியதத⁴ம்மானம் த⁴ம்மஸபா⁴வம் அக்³க³ஹேத்வா மிச்ச²த்தனியதஸபா⁴வஸ்ஸேவ க³ஹணதோ, தஸ்ஸ ச விபாகானம் அவிபூ⁴தத்தா மிச்ச²த்தனியதஸபா⁴வே ஆரப்³ப⁴ ததா³ரம்மணா ந லப்³ப⁴ந்தி. பி-ஸத்³தே³ன ஸம்மத்தனியதேஸுபீதி ஸம்பிண்டே³தி, ‘‘லோகுத்தரத⁴ம்மே ஆரப்³பா⁴’’தி வா ஏதேன ஸித்³த⁴த்தா ந தேஸம் விஸும் உத்³த⁴ரணம் கதம். அட்ட²கதா²யம் பன மிச்ச²த்தனியதஸம்மத்தனியதானம் அஞ்ஞமஞ்ஞபடிபக்க²பா⁴வேன ப³லவபா⁴வதோ ததா³ரம்மணஸ்ஸ அவத்து²பா⁴வத³ஸ்ஸனத்த²ம் மிச்ச²த்தனியதானந்தரம் ஸம்மத்தனியதாபி உத்³த⁴டா. மிச்ச²த்தனியதஸபா⁴வஸ்ஸ விய படிஸம்பி⁴தா³ஸபா⁴வஸ்ஸபி காமாவசரவிபாகானம் அவிபூ⁴தபா⁴வேன படிஸம்பி⁴தா³ஞாணானி ஆரப்³ப⁴ ஜவனே ஜவிதே ததா³ரம்மணம் ந லப்³ப⁴தீதி ஆஹ ‘‘படிஸம்பி⁴தா³ஞாணானீ’’திஆதி³. மனோத்³வாரேபீதி ந கேவலம் பஞ்சத்³வாரேஸுயேவ, அத² கோ² மனோத்³வாரேபி. ஸப்³பே³ஸந்தி அஹேதுகது³ஹேதுகாதீ³னம் ஸப்³பே³ஸம். அனுபுப்³ப³தோதி ஹேட்டா² வுத்தஅனுக்கமதோ.

533. ந விஜ்ஜதீதி மனோத்³வாரஸ்ஸ அப்படிக⁴பா⁴வேன ந விஜ்ஜதி. ப⁴வங்க³தோதி ப⁴வங்க³ஸந்தானதோ, தஸ்ஸ ஆரம்மணதோ வா. வுட்டா²னந்தி ப⁴வங்க³ஸந்தானே, தஸ்ஸாரம்மணே வா ஸதி தஸ்ஸ வுட்டா²னம்.

535-6. ஸத்த ஸத்தாதி ஏகேகஸ்ஸ ஸத்த ஸத்தாதி கத்வா. பாபபாகாதி அகுஸலவிபாகா. ‘‘த்³வாத³ஸாபுஞ்ஞசித்தான’’ந்தி வத்வா ‘‘பாபபாகா’’தி வசனம் ‘‘தத்ரித³ம் ஸுக³தஸ்ஸ ஸுக³தசீவரப்பமாண’’ந்திஆதீ³ஸு விய ஸஞ்ஞாஸத்³த³வஸேன வுத்தம். ஏவம் பவத்தியம் அகுஸலவிபாகானம் பவத்திம் த³ஸ்ஸேத்வா இதா³னி படிஸந்தி⁴யம் த³ஸ்ஸேதும் ‘‘ஏகாத³ஸவிதா⁴ன’’ந்திஆதி³ வுத்தம். உத்³த⁴ச்சசேதனாய பவத்திவிபாகதா³னமத்தம் வினா படிஸந்தி⁴தா³னாபா⁴வதோ ஆஹ ‘‘ஹித்வா உத்³த⁴ச்சமானஸ’’ந்தி. கிம் பனேத்த² காரணம், அதி⁴மோக்க²விரஹேன ஸப்³ப³து³ப்³ப³லம்பி விசிகிச்சா²ஸஹக³தம் படிஸந்தி⁴ம் ஆகட்³ட⁴தி, அதி⁴மோக்க²ஸபா⁴வதோ ததோ ப³லவதரம்பி உத்³த⁴ச்சஸஹக³தம் நாகட்³ட⁴தீதி? படிஸந்தி⁴தா³னஸபா⁴வாபா⁴வதோ. ‘‘ப³லவம் ஆகட்³ட⁴தி, து³ப்³ப³லம் நாகட்³ட⁴தீ’’தி ஹி அயம் விசாரணா படிஸந்தி⁴தா³னஸபா⁴வேஸுயேவ. யஸ்ஸ பன படிஸந்தி⁴தா³னஸபா⁴வோ ஏவ நத்தி², ந தஸ்ஸ ப³லவபா⁴வோ படிஸந்தி⁴ஆகட்³ட⁴னே காரணந்தி.

கத²ம் பனேதம் விஞ்ஞாதப்³ப³ம் ‘‘உத்³த⁴ச்சஸஹக³தஸ்ஸ படிஸந்தி⁴தா³னஸபா⁴வோ நத்தீ²’’தி? த³ஸ்ஸனேனபஹாதப்³பே³ஸு அனாக³தத்தா. திவிதா⁴ ஹி அகுஸலா த³ஸ்ஸனேனபஹாதப்³பா³, பா⁴வனாயபஹாதப்³பா³, ஸியா த³ஸ்ஸனேனபஹாதப்³பா³ ஸியா பா⁴வனாயபஹாதப்³பா³தி. தத்த² தி³ட்டி²ஸம்பயுத்தவிசிகிச்சா²ஸஹக³தசித்துப்பாதா³ த³ஸ்ஸனேனபஹாதப்³பா³ நாம. யதா²ஹ ‘‘கதமே த⁴ம்மா த³ஸ்ஸனேனபஹாதப்³பா³? சத்தாரோ தி³ட்டி²க³தஸம்பயுத்தசித்துப்பாதா³ விசிகிச்சா²ஸஹக³தோ சித்துப்பாதோ³’’தி (த⁴. ஸ. 1408). தே ஹி பட²மம் நிப்³பா³னத³ஸ்ஸனதோ ‘‘த³ஸ்ஸன’’ந்தி லத்³த⁴னாமேன ஸோதாபத்திமக்³கே³னேவ பஹாதப்³ப³த்தா ‘‘த³ஸ்ஸனேனபஹாதப்³பா³’’தி வுச்சந்தி. உத்³த⁴ச்சஸஹக³தசித்துப்பாதோ³ பா⁴வனாயபஹாதப்³போ³ நாம. யதா²ஹ ‘‘கதமே த⁴ம்மா பா⁴வனாயபஹாதப்³பா³? உத்³த⁴ச்சஸஹக³தோ சித்துப்பாதோ³’’தி. ஸோ ஹி அக்³க³மக்³கே³ன பஹாதப்³ப³த்தா ‘‘பா⁴வனாயபஹாதப்³போ³’’தி வுத்தோ. உபரிமக்³க³த்தயஞ்ஹி பட²மமக்³கே³ன தி³ட்ட²ஸ்மிம்யேவ பா⁴வனாவஸேன உப்பஜ்ஜதி, ந அதி³ட்ட²புப்³ப³ம் கிஞ்சி பஸ்ஸதி, தஸ்மா ‘‘பா⁴வனா’’தி வுச்சதி. தி³ட்டி²விப்பயுத்ததோ³மனஸ்ஸஸஹக³தசித்துப்பாதா³ பன ஸியா த³ஸ்ஸனேனபஹாதப்³பா³ ஸியா பா⁴வனாயபஹாதப்³பா³ நாம. யதா²ஹ ‘‘சத்தாரோ தி³ட்டி²க³தவிப்பயுத்தா லோப⁴ஸஹக³தசித்துப்பாதா³ த்³வே தோ³மனஸ்ஸஸஹக³தசித்துப்பாதா³. இமே த⁴ம்மா ஸியா த³ஸ்ஸனேனபஹாதப்³பா³ ஸியா பா⁴வனாயபஹாதப்³பா³’’தி (த⁴. ஸ. 1409). தே ஹி அபாயனிப்³ப³த்தகாவத்தா²ய பட²மமக்³கே³ன, ஸேஸாவத்தா²ய உபரிமக்³கே³ஹி பஹீயமானத்தா ஸியா த³ஸ்ஸனேனபஹாதப்³பா³ ஸியா பா⁴வனாயபஹாதப்³பா³ நாம. தத்த² ஸியா த³ஸ்ஸனேனபஹாதப்³ப³ம்பி த³ஸ்ஸனேனபஹாதப்³ப³ஸாமஞ்ஞேன இத⁴ ‘‘த³ஸ்ஸனேனபஹாதப்³பா³’’த்வேவ வோஹரந்தி. யதி³ ச உத்³த⁴ச்சஸஹக³தம் படிஸந்தி⁴ம் த³தே³ய்ய, ததா³ அகுஸலபடிஸந்தி⁴யா ஸுக³தியம் அஸம்ப⁴வதோ அபாயேஸ்வேவ த³தே³ய்ய, அபாயக³மனீயஞ்ச ஏகந்தேன த³ஸ்ஸனேனபஹாதப்³பா³ ஸியா, இதரதா² அபாயக³மனீயஸ்ஸ அப்பஹீனத்தா ஸேகா²னம் அபாயுப்பத்தி ஆபஜ்ஜதி, ந ச பனேதம் யுத்தம், ‘‘சதூஹபாயேஹி ச விப்பமுத்தோ (கு². பா. 6.11; ஸு. நி. 234), அவினிபாதத⁴ம்மோ’’திஆதி³வசனேஹி ஸஹ விருஜ்ஜ²னதோ, ஸதி ச பனேதஸ்ஸ த³ஸ்ஸனேனபஹாதப்³ப³பா⁴வே ‘‘ஸியா த³ஸ்ஸனேனபஹாதப்³பா³’’தி இமஸ்ஸ விப⁴ங்கே³ வத்தப்³ப³ம் ஸியா, ந ச பனேதம் வுத்தந்தி. அத² ஸியா ‘‘அபாயக³மனீயோ ராகோ³ தோ³ஸோ மோஹோ ததே³கட்டா² ச கிலேஸா’’தி ஏவம் த³ஸ்ஸனேனபஹாதப்³பே³ஸு வுத்தத்தா உத்³த⁴ச்சஸஹக³தஸ்ஸாபி தத்த² ஸங்க³ஹோ ஸக்கா காதுந்தி? தம் ந, தஸ்ஸ நியாமதோ பா⁴வனாயபஹாதப்³ப³பா⁴வேன வுத்தத்தாதி தஸ்மா த³ஸ்ஸனேனபஹாதப்³பே³ஸு அவசனமேவ படிஸந்தி⁴தா³னாபா⁴வம் ஸாதே⁴தீதி.

நனு ச படிஸம்பி⁴தா³விப⁴ங்கே³ –

‘‘யஸ்மிம் ஸமயே அகுஸலம் சித்தம் உப்பன்னம் ஹோதி உபேக்கா²ஸஹக³தம் உத்³த⁴ச்சஸம்பயுத்தம், ரூபாரம்மணம் வா…பே… த⁴ம்மாரம்மணம் வா யம் யம் வா பனாரப்³ப⁴, தஸ்மிம் ஸமயே ப²ஸ்ஸோ ஹோதி…பே… அவிக்கே²போ ஹோதி, இமே த⁴ம்மா அகுஸலா. இமேஸு த⁴ம்மேஸு ஞாணம் த⁴ம்மபடிஸம்பி⁴தா³, தேஸம் விபாகே ஞாணம் அத்த²படிஸம்பி⁴தா³’’தி (விப⁴. 731) –

ஏவம் உத்³த⁴ச்சஸஹக³தசித்துப்பாத³ம் உத்³த⁴ரித்வா தஸ்ஸ விபாகோபி உத்³த⁴டோதி கத²மஸ்ஸ படிஸந்தி⁴தா³னாபா⁴வோ ஸம்படிச்சி²தப்³போ³தி? ந இத³ம் படிஸந்தி⁴தா³னம் ஸந்தா⁴ய உத்³த⁴டம், அத² கோ² பவத்திவிபாகம் ஸந்தா⁴ய. பட்டா²னே பன –

‘‘ஸஹஜாதா த³ஸ்ஸனேனபஹாதப்³பா³ சேதனா சித்தஸமுட்டா²னானம் ரூபானம் கம்மபச்சயேன பச்சயோ, நானக்க²ணிகா த³ஸ்ஸனேனபஹாதப்³பா³ சேதனா விபாகானம் க²ந்தா⁴னம் கடத்தா ச ரூபானம் கம்மபச்சயேன பச்சயோ’’தி (பட்டா². 2.8.89) –

த³ஸ்ஸனேனபஹாதப்³ப³சேதனாய ஏவ ஸஹஜாதனானக்க²ணிககம்மபச்சயபா⁴வம் உத்³த⁴ரித்வாவ ‘‘ஸஹஜாதா பா⁴வனாயபஹாதப்³பா³ சேதனா சித்தஸமுட்டா²னானம் ரூபானம் கம்மபச்சயேன பச்சயோ’’தி பா⁴வனாயபஹாதப்³ப³சேதனாய ஸஹஜாதகம்மபச்சயபா⁴வோவ உத்³த⁴டோ, ந பன நானக்க²ணிககம்மபச்சயபா⁴வோ. ததா² பச்சனீயனயேபி –

‘‘த³ஸ்ஸனேனபஹாதப்³போ³ த⁴ம்மோ நேவத³ஸ்ஸனேனனபா⁴வனாயபஹாதப்³ப³ஸ்ஸ த⁴ம்மஸ்ஸ ஆரம்மணபச்சயேன பச்சயோ, ஸஹஜாத… உபனிஸ்ஸய…பே… பச்சா²ஜாத… கம்மபச்சயேன பச்சயோ’’தி (பட்டா². 2.8.98) –

த³ஸ்ஸனேனபஹாதப்³ப³ஸ்ஸேவ கம்மபச்சயபா⁴வம் உத்³த⁴ரித்வா –

‘‘பா⁴வனாயபஹாதப்³போ³ த⁴ம்மோ நேவத³ஸ்ஸனேனனபா⁴வனாயபஹாதப்³ப³ஸ்ஸ த⁴ம்மஸ்ஸ ஆரம்மணபச்சயேன பச்சயோ, ஸஹஜாத… உபனிஸ்ஸய… பச்சா²ஜாதபச்சயேன பச்சயோ’’தி (பட்டா². 2.8.99) –

பா⁴வனாயபஹாதப்³ப³ஸ்ஸ த⁴ம்மஸ்ஸ ஸஹஜாதாதி³பச்சயபா⁴வோவ வுத்தோ, ந பன கம்மபச்சயபா⁴வோ, ந ச நானக்க²ணிககம்மபச்சயம் வினா படிஸந்தி⁴ஆகட்³ட⁴னம் அத்தி², தஸ்மா நத்தி² தஸ்ஸ ஸப்³ப³தா²பி படிஸந்தி⁴தா³னம். பவத்திவிபாகம் பனஸ்ஸ ந ஸக்கா நிவாரேதும் படிஸம்பி⁴தா³விப⁴ங்கே³ உத்³த⁴ச்சஸஹக³தானம்பி விபாகஸ்ஸ உத்³த⁴டத்தா, நானக்க²ணிககம்மபச்சயஸ்ஸ ச படிஸந்தி⁴விபாகமேவ ஸந்தா⁴ய அனுத்³த⁴டத்தா. ஏவஞ்ச பன கத்வா யதே³கே ஆசரியா வத³ந்தி ‘‘உத்³த⁴ச்சசேதனா உப⁴யவிபாகம்பி ந தே³தி பட்டா²னே நானக்க²ணிககம்மபச்சயஸ்ஸ அனுத்³த⁴டத்தா’’தி, தம் தேஸம் அபி⁴னிவேஸமத்தமேவாதி த³ட்ட²ப்³ப³ம்.

யதி³ ச தே வதே³ய்யும் – யதா² ‘‘விபாகத⁴ம்மத⁴ம்மா’’தி ஏத்த² விபாக-ஸத்³தே³ன விபாகாரஹதா வுச்சதி, ஏவம் இதா⁴பி உத்³த⁴ச்சஸஹக³தானம் விபாகாரஹதம் ஸந்தா⁴ய ‘‘தேஸம் விபாகே ஞாண’’ந்தி வுத்தம். யதா² ஸத்³தி⁴ந்த்³ரியவினிமுத்தஸ்ஸ அதி⁴முச்சனட்ட²ஸ்ஸ அபா⁴வேபி ஸத்³தி⁴ந்த்³ரியஸ்ஸ அதி⁴முச்சனஸத்திவிஸேஸம் க³ஹேத்வா ஸத்³தி⁴ந்த்³ரியத⁴ம்மோ அதி⁴முச்சனட்டோ² அத்தோ²தி வுச்சதி, ஏவமிதா⁴பி த⁴ம்மவினிமுத்தஸ்ஸ விபாகாரஹபா⁴வஸ்ஸ அபா⁴வேபி த⁴ம்மானமேவ விபாகாரஹஸாமத்தி²யம் க³ஹேத்வா தஸ்ஸ அத்தி²பா⁴வோ வுத்தோ. யதி³ ச தே பவத்திவிபாகம் த³தே³ய்யும், யதா² –

‘‘ஸுகா²ய வேத³னாய ஸம்பயுத்தோ த⁴ம்மோ து³க்கா²ய வேத³னாய ஸம்பயுத்தஸ்ஸ த⁴ம்மஸ்ஸ கம்மபச்சயேன பச்சயோ, நானக்க²ணிகா’’தி (பட்டா². 1.2.57) –

பவத்திவிபாகஸ்ஸபி வஸேன நானக்க²ணிககம்மபச்சயோ வுத்தோ, ஏவமேத்தா²பி நானக்க²ணிககம்மபச்சயபா⁴வோ வத்தப்³போ³ ஸியா. ந ஹி லப்³ப⁴மானஸ்ஸ அவசனே காரணம் அத்தீ²தி தஸ்மா யதா²த⁴ம்மஸாஸனே அவசனம்பி அபா⁴வமேவ தீ³பேதி. அபிச யதி³ உத்³த⁴ச்சஸஹக³தஸ்ஸ பவத்திவிபாகதா³னம் அதி⁴ப்பேதம் ஸியா, ததா³ ‘‘அனுபாதி³ன்னுபாதா³னியோ த⁴ம்மோ உபாதி³ன்னுபாதா³னியஸ்ஸ த⁴ம்மஸ்ஸ ந கம்மபச்சயேன பச்சயோ’’தி படிஸேதோ⁴ ந காதப்³போ³ ஸியா. ந ஹி ட²பேத்வா உத்³த⁴ச்சம் அஞ்ஞோ கோசி அனுபாதி³ன்னுபாதா³னியோ த⁴ம்மோ உபாதி³ன்னுபாதா³னியஸ்ஸ த⁴ம்மஸ்ஸ பச்சயோ ப⁴விதும் அஸமத்தோ² அத்தீ²தி, தயித³மேதேஸம் அபி⁴லாபமத்தம். ததா² ஹி யம் தாவ வுத்தம் ‘‘விபாகாரஹபா⁴வம் க³ஹேத்வா தேஸம் விபாகேதி வுத்த’’ந்தி, ததே³வ தஸ்ஸ விபாகஸப்³பா⁴வம் தீ³பேதி. ந ஹி விபாகாரஹபா⁴வே ஸதி அபி⁴ஞ்ஞாதீ³னம் விய தஸ்ஸ அவிபாகதாய காரணம் அத்தீ²தி. யம்பி வுத்தம் ‘‘நானக்க²ணிககம்மபச்சயஸ்ஸ அவசனம் விபாகபா⁴வம் தீ³பேதீ’’தி, தம்பி ந ஸுந்த³ரம், லப்³ப⁴மானஸ்ஸாபி கத்த²சி கேனசி அதி⁴ப்பாயேன அவசனதோ. ததா² ஹி த⁴ம்மஸங்க³ணியம் லப்³ப⁴மானம்பி ஹத³யவத்து² ந வுத்தம். தஸ்மா யதி³ பவத்திவிபாகம் ஸந்தா⁴ய நானக்க²ணிககம்மபச்சயபா⁴வோ வுச்சேய்ய, ததா³ படிஸந்தி⁴விபாகதா³னம்பிஸ்ஸ மஞ்ஞேய்யுந்தி லப்³ப⁴மானஸ்ஸபி பவத்திவிபாகஸ்ஸ வஸேன நானக்க²ணிககம்மபச்சயபா⁴வோ ந வுத்தோதி. யம் பன அனுபாதி³ன்னுபாதா³னியஸ்ஸ உபாதி³ன்னுபாதா³னியம் பதி கம்மபச்சயபடிக்கே²பவசனம், தம் அபி⁴ஞ்ஞாகுஸலாதி³கே ஸந்தா⁴யாதி ந ஏத்தாவதா உத்³த⁴ச்சஸஹக³தஸ்ஸ பவத்திவிபாகதா³னம் ஸப்³ப³தா²பி படிக்கி²பிதும் ஸக்காதி. யம்பி அட்ட²கதா²யம் ‘‘யதா² ச அபி⁴ஞ்ஞாசேதனா, ஏவமுத்³த⁴ச்சசேதனாபி ‘ஸங்கா²ரபச்சயா விஞ்ஞாண’ந்தி ஏத்த² அபனேதப்³பா³’’தி வுத்தம், தம்பி உத்³த⁴ச்சசேதனாய தத்த² நித்³தி³ஸியமானாய யதா² இதரா படிஸந்தி⁴பவத்திவஸேன து³வித⁴ஸ்ஸபி விபாகவிஞ்ஞாணஸ்ஸ பச்சயோ, ஏவமுத்³த⁴ச்சசேதனாபீதி க³ண்ஹேய்யுந்தி வுத்தம், ந தஸ்ஸ பவத்திவிபாகாபா⁴வதோதி.

ஆசரியபு³த்³த⁴மித்தாத³யோ பன உத்³த⁴ச்சஸஹக³தம் த்³விதா⁴ விப⁴ஜித்வா ஏகஸ்ஸ உப⁴யவிபாகதா³னம், ஏகஸ்ஸ ஸப்³ப³தா²பி விபாகாபா⁴வம் வண்ணேந்தி. தேஸஞ்ஹி அயம் வினிச்ச²யோ – அத்தி² உத்³த⁴ச்சம் பா⁴வனாயபஹாதப்³ப³ம்பி, அத்தி² நபா⁴வனாயபஹாதப்³ப³ம்பி. தேஸு பா⁴வனாயபஹாதப்³ப³ம் ஸேக²ஸந்தானப்பவத்தம், இதரம் புது²ஜ்ஜனஸந்தானப்பவத்தம். ப²லதா³னஞ்ச புது²ஜ்ஜனஸந்தானே பவத்தஸ்ஸேவ, நேதரஸ்ஸ. ததா² ஹி த³ஸ்ஸனபா⁴வனானம் அபா⁴வேபி யேஸம் புது²ஜ்ஜனானம், ஸேகா²னஞ்ச த³ஸ்ஸனபா⁴வனாஹி ப⁴விதப்³ப³ம், தேஸம் தது³ப்பத்திகாலே தாஹி பஹாதும் ஸக்குணேய்யா அகுஸலா ‘‘த³ஸ்ஸனேனபஹாதப்³பா³, பா⁴வனாயபஹாதப்³பா³’’தி ச வுச்சந்தி. புது²ஜ்ஜனானம் பன பா⁴வனாய அபா⁴வதோ பா⁴வனாயபஹாதப்³ப³சிந்தா நத்தி², தேன தேஸம் பவத்தமானா தே த³ஸ்ஸனேன பஹாதும் அஸக்குணேய்யாபி ‘‘பா⁴வனாயபஹாதப்³பா³’’தி ந வுச்சந்தி. யதி³ வுச்சேய்யும், த³ஸ்ஸனேனபஹாதப்³பா³ பா⁴வனாயபஹாதப்³பா³னம் கேஸஞ்சி கேசி கதா³சி ஆரம்மணாரம்மணாதி⁴பதிஉபனிஸ்ஸயபச்சயேஹி பச்சயா ப⁴வேய்யும். ஸகப⁴ண்டே³ ச²ந்த³ராகா³தீ³னஞ்ஹி கேஸஞ்சி ஸக்காயதி³ட்டா²த³யோ கேசி அதீதாதீ³ஸு கிஸ்மிஞ்சி காலே ஆரம்மணாதி⁴பதிஉபனிஸ்ஸயேஹி பச்சயா ஹோந்தீதி நத்தி², ந ச பட்டா²னே ‘‘த³ஸ்ஸனேனபஹாதப்³பா³ பா⁴வனாயபஹாதப்³பா³னம் கேனசி பச்சயேன பச்சயோ’’தி வுத்தா, தஸ்மா நத்தி² புது²ஜ்ஜனேஸு பவத்தமானானமகுஸலானம் பா⁴வனாயபஹாதப்³ப³பரியாயோ. யதி³ தத்த² அவசனமேவ பமாணம், ஏவம் ஸதி ஸேக²ஸந்தானபவத்தானம்பி அகுஸலானம் பா⁴வனாயபஹாதப்³ப³பரியாயோ நத்தீ²தி ஆபஜ்ஜதீதி? நாபஜ்ஜதி, ஸேக²ஸந்தானப்பவத்தானம் பா⁴வனாய பஹாதும் ஸக்குணேய்யத்தா. தேனேவ ச கிஞ்சி கத்வா ஸேகா²னம் த³ஸ்ஸனேனபஹாதப்³பா³னம் அகுஸலானம் பஹீனபா⁴வேன அஸ்ஸாத³னாபி⁴னந்த³னானம் வத்தூ²னி ந ஹோந்தி. பஹீனதாய ஏவ ஸோமனஸ்ஸஸ்ஸ ஹேதுபூ⁴தா, அவிக்கே²பஹேதுபூ⁴தா ச ந தோ³மனஸ்ஸம், உத்³த⁴ச்சஞ்ச உப்பாதே³ந்தீதி ந தேஸம் ஆரம்மணாரம்மணாதி⁴பதிபகதூபனிஸ்ஸயபா⁴வம் க³ச்ச²ந்தி. ந ஹி பஹீனகிலேஸே உபனிஸ்ஸாய அரியா ராக³தோ³ஸவிக்கே²பே உப்பாதே³ந்தி. வுத்தஞ்ச ‘‘ஸோதாபத்திமக்³கே³ன யே கிலேஸா பஹீனா, தே கிலேஸே ந புனேதி, ந பச்சேதி, ந பச்சாக³ச்ச²தீதி ஸுக³தோ, ஸகதா³கா³மி…பே… அரஹத்தமக்³கே³ன…பே… ஸுக³தோ’’தி. புது²ஜ்ஜனானம் பன த³ஸ்ஸனேன பஹாதும் ஸக்குணேய்யா த³ஸ்ஸனேன பஹாதும் அஸக்குணேய்யானம் கேனசி பச்சயேன பச்சயா ந ஹோந்தீதி ந ஸக்கா வத்தும், ‘‘தி³ட்டி²ம் அஸ்ஸாதே³தி அபி⁴னந்த³தி, தம் ஆரப்³ப⁴ ராகோ³ உப்பஜ்ஜதி, தி³ட்டி² உப்பஜ்ஜதி, விசிகிச்சா² உப்பஜ்ஜதி, உத்³த⁴ச்சம் உப்பஜ்ஜதி, விசிகிச்ச²ம் ஆரப்³ப⁴ விசிகிச்சா² உப்பஜ்ஜதி, தி³ட்டி² உப்பஜ்ஜதி, உத்³த⁴ச்சம் உப்பஜ்ஜதீ’’தி (பட்டா². 1.1.407) தி³ட்டி²விசிகிச்சா²னம் உத்³த⁴ச்சாரம்மணபா⁴வஸ்ஸ வுத்தத்தா. ஏத்த² ஹி உத்³த⁴ச்சந்தி உத்³த⁴ச்சஸஹக³தம் சித்துப்பாத³ம் ஸந்தா⁴ய வுத்தம், ந த³ஸ்ஸனேனபஹாதப்³பே³ஸுபி லப்³ப⁴மானசேதஸிகம் உத்³த⁴ச்சம். ஏவஞ்ச கத்வா அதி⁴பதிபச்சயனித்³தே³ஸே ‘‘தி³ட்டி²ம் க³ரும் கத்வா அஸ்ஸாதே³தி அபி⁴னந்த³தி, தம் க³ரும் கத்வா ராகோ³ உப்பஜ்ஜதி, தி³ட்டி² உப்பஜ்ஜதீ’’தி (பட்டா². 1.1.415) ஏத்தகமேவ வுத்தம், ந வுத்தம் ‘‘உத்³த⁴ச்சம் உப்பஜ்ஜதீ’’தி, தஸ்மா ஸேக²ஸந்தானப்பவத்தானமகுஸலானம் த³ஸ்ஸனேனபஹாதப்³பா³னம் கேனசி பச்சயேன பச்சயத்தாபா⁴வதோ புது²ஜ்ஜனானம் ஸந்தானேவ த³ஸ்ஸனேனபஹாதப்³பா³னமகுஸலானம் பச்சயா ந ஹோந்தீதி ந ஸக்கா வத்துந்தி பட்டா²னே த³ஸ்ஸனேனபஹாதப்³பா³னம் பா⁴வனாயபஹாதப்³ப³ஸ்ஸ ஆரம்மணாரம்மணாதி⁴பதிஉபனிஸ்ஸயபச்சயத்தானுத்³த⁴ரணம் ஸேக²ஸந்தானப்பவத்தானம் பா⁴வனாயபஹாதப்³ப³பரியாயபா⁴வம் ஸாதே⁴தி, புது²ஜ்ஜனஸந்தானேயேவ நத³ஸ்ஸனேனபஹாதப்³பா³னமகுஸலானம் பா⁴வனாயபஹாதப்³ப³பரியாயபா⁴வம் ந ஸாதே⁴தி, தஸ்மா த³ஸ்ஸனபா⁴வனாஹி பஹாதப்³பா³னம் அதீதாதி³பா⁴வேன நவத்தப்³ப³த்தேபி யாதி³ஸானம் தாஹி அனுப்பத்தித⁴ம்மதா ஆபாதே³தப்³பா³, தே புது²ஜ்ஜனேஸு பவத்தமானா த³ஸ்ஸனேன பஹாதும் ஸக்குணேய்யா த³ஸ்ஸனமக்³கா³பேக்கா²ய தத³ப்பவத்தியம்பி த³ஸ்ஸனேனபஹாதப்³பா³ நாம. ஸேகே²ஸு பவத்தமானா பா⁴வனாய பஹாதும் ஸக்குணேய்யா தத³ப்பவத்தியம்பி தத³பேக்கா²ய பா⁴வனாயபஹாதப்³பா³ நாம. த³ஸ்ஸனேன பஹாதும் அஸக்குணேய்யா பன புது²ஜ்ஜனேஸு பவத்தமானா ஹேட்டா² வுத்தனயேன நேவத³ஸ்ஸனேனபஹாதப்³பா³ நபா⁴வனாயபஹாதப்³பா³, தேஸு பா⁴வனாயபஹாதப்³பா³ ஸஹாயவிரஹதோ விபாகம் ந ஜனேந்தி. ததா² ஹி தேஸம் த³ஸ்ஸனேனபஹாதப்³ப³ஸங்கா²தம் ஸஹகாரீகாரணம் ஸஹாயபூ⁴தம் நத்தீ²தி பா⁴வனாயபஹாதப்³ப³சேதனாய நானக்க²ணிககம்மபச்சயபா⁴வோ ந வுத்தோ. அபேக்கி²தப்³ப³த³ஸ்ஸனபா⁴வனாரஹிதானம் பன புது²ஜ்ஜனேஸு உப்பஜ்ஜமானானம் ஸகப⁴ண்டே³ ச²ந்த³ராகா³தீ³னம், உத்³த⁴ச்சஸஹக³தசித்துப்பாத³ஸ்ஸ ச ஸம்யோஜனத்தயததே³கட்ட²கிலேஸானம் அனுபச்சி²ன்னதாய அபரிக்கீ²ணஸஹாயானம் விபாகுப்பாத³னம் ந ஸக்கா படிக்கி²பிதுந்தி உத்³த⁴ச்சஸஹக³தத⁴ம்மானம் விபாகோ விப⁴ங்கே³ வுத்தோதி.

யதி³ ஏவம், அபேக்கி²தப்³ப³த³ஸ்ஸனபா⁴வனாரஹிதானம் அகுஸலானம் ‘‘நேவத³ஸ்ஸனேனனபா⁴வனாயபஹாதப்³பா³’’தி வத்தப்³ப³தா ஆபஜ்ஜதீதி? நாபஜ்ஜதி, அப்பஹாதப்³ப³ஸபா⁴வானம் குஸலாதீ³னம் ‘‘நேவத³ஸ்ஸனேனனபா⁴வனாயபஹாதப்³பா³’’தி வுத்தத்தா, அப்பஹாதப்³ப³விருத்³த⁴ஸபா⁴வத்தா ச அகுஸலானம். யதி³ ஏவம் தே இமஸ்மிம் திகே நவத்தப்³பா³தி வத்தப்³பா³ ஆபஜ்ஜந்தீதி? நாபஜ்ஜந்தி, சித்துப்பாத³கண்டே³ த³ஸ்ஸிதானம் த்³வாத³ஸாகுஸலசித்துப்பாதா³னம் த்³வீஹி பதே³ஹி ஸங்க³ஹிதத்தா. யதா² ஹி உப்பன்னத்திகே த⁴ம்மவஸேன ஸப்³பே³ஸம் ஸங்க²தத⁴ம்மானம் ஸங்க³ஹிதத்தா காலவஸேன அஸங்க³ஹிதாபி அதீதா ‘‘நவத்தப்³பா³’’தி ந வுத்தா சித்துப்பாதா³னுரூபேன ஸங்க³ஹிதேஸு நவத்தப்³ப³ஸ்ஸ அபா⁴வா, ஏவம் இதா⁴பி சித்துப்பாத³பா⁴வேன ஸங்க³ஹிதேஸு நவத்தப்³ப³ஸ்ஸ அபா⁴வா ‘‘நவத்தப்³பா³’’தி ந வுத்தா. ஸப்³பே³ன ஸப்³ப³ஞ்ஹி த⁴ம்மவஸேன அஸங்க³ஹிதஸ்ஸ திகது³கேஸு நவத்தப்³ப³தாபத்தி. யத்த² ஹி சித்துப்பாதோ³ கோசி நியோக³தோ நவத்தப்³போ³ அத்தி², தத்த² தேஸம் சதுத்தோ² கோட்டா²ஸோ அத்தீ²தி யதா²வுத்தபதே³ஸு விய தத்தா²பி பி⁴ந்தி³த்வா பா⁴ஜேதப்³பே³ சித்துப்பாதே³ பி⁴ந்தி³த்வா பா⁴ஜேதி ‘‘ஸியா நவத்தப்³பா³பரித்தாரம்மணா’’திஆதி³னா, தத³பா⁴வா உப்பன்னத்திகே, இத⁴ ச ததா² ந வுத்தந்தி.

அத² வா யதா² ஸப்படிகே⁴ஹி ஸமானஸபா⁴வத்தா ரூபதா⁴துயம் ‘‘தயோ மஹாபூ⁴தா ஸப்படிகா⁴’’தி வுத்தா, யதா²ஹ ‘‘அஸஞ்ஞஸத்தானம் அனித³ஸ்ஸனஸப்படிக⁴ம் ஏகம் மஹாபூ⁴த’’ந்தி, ஏவம் புது²ஜ்ஜனானம் பவத்தமானா பா⁴வனாயபஹாதப்³ப³ஸமானஸபா⁴வா ‘‘பா⁴வனாயபஹாதப்³பா³’’தி வுச்சேய்யுந்தி நத்தி² நவத்தப்³ப³தாபஸங்கோ³. ஏவஞ்ச ஸதி புது²ஜ்ஜனானம் பவத்தமானாபி பா⁴வனாயபஹாதப்³பா³ ஸகப⁴ண்டே³ ச²ந்த³ராகா³த³யோ பரப⁴ண்டே³ ச²ந்த³ராகா³தீ³னம் உபனிஸ்ஸயபச்சயோ, ராகோ³ ச ராக³தி³ட்டீ²னம் அதி⁴பதிபச்சயோதி அயமத்தோ² லத்³தோ⁴ ஹோதி. தேனேவ ஹி –

‘‘பா⁴வனாயபஹாதப்³போ³ த⁴ம்மோ த³ஸ்ஸனேனபஹாதப்³ப³ஸ்ஸ த⁴ம்மஸ்ஸ உபனிஸ்ஸயபச்சயேன பச்சயோ, ஆரம்மணூபனிஸ்ஸயோ, பகதூபனிஸ்ஸயோ’’தி (பட்டா². 2.8.84) –

இமிஸ்ஸா நித்³தே³ஸே த³ஸ்ஸனேனபஹாதப்³பா³னம் உபனிஸ்ஸயபச்சயபா⁴வீத⁴ம்மே நித்³தி³ஸந்தேன ப⁴க³வதா –

‘‘பகதூபனிஸ்ஸயோ – பத்த²னம் உபனிஸ்ஸாய பாணம் ஹனதி…பே… ஸங்க⁴ம் பி⁴ந்த³தி, பா⁴வனாயபஹாதப்³போ³ ராகோ³ தோ³ஸோ மோஹோ மானோ பத்த²னா த³ஸ்ஸனேனபஹாதப்³ப³ஸ்ஸ ராக³ஸ்ஸ தோ³ஸஸ்ஸ மோஹஸ்ஸ மானஸ்ஸ தி³ட்டி²யா பத்த²னாய உபனிஸ்ஸயபச்சயேன பச்சயோ. ஸகப⁴ண்டே³ ச²ந்த³ராகோ³ பரப⁴ண்டே³ ச²ந்த³ராக³ஸ்ஸ உப…பே… ஸகபரிக்³க³ஹே ச²ந்த³ராகோ³ பரபரிக்³க³ஹே ச²ந்த³ராக³ஸ்ஸ உபனிஸ்ஸயபச்சயேன பச்சயோ’’தி (பட்டா². 2.8.84) –

புது²ஜ்ஜனஸந்தானே பத்த²னாத³யோ நித்³தி³ட்டா².

ஏவம்பி யதா² அபோ²ட்ட²ப்³ப³த்தா ரூபதா⁴துயம் தயோ மஹாபூ⁴தா ந பரமத்த²தோ ஸப்படிகா⁴, ஏவம் அபேக்கி²தப்³ப³பா⁴வனாரஹிதா புது²ஜ்ஜனேஸு பவத்தமானா ஸகப⁴ண்டே³ ச²ந்த³ராகா³த³யோ பன பரமத்த²தோ பா⁴வனாய பஹாதப்³பா³தி பா⁴வனாயபஹாதப்³பா³னம் நானக்க²ணிககம்மபச்சயதா ந வுத்தா, ந ச ‘‘த³ஸ்ஸனேனபஹாதப்³பா³ பா⁴வனாயபஹாதப்³பா³னம் கேனசி பச்சயேன பச்சயோ’’தி வுத்தா. யே ஹி த³ஸ்ஸனேனபஹாதப்³ப³பச்சயா கிலேஸா, ந தே த³ஸ்ஸனதோ உத்³த⁴ம் பவத்தந்தி. த³ஸ்ஸனேனபஹாதப்³ப³பச்சயஸ்ஸாபி பன உத்³த⁴ச்சஸஹக³தஸ்ஸ ஸஹாயவேகல்லமத்தமேவ த³ஸ்ஸனேன கதம், ந தஸ்ஸ கோசி பா⁴வோ த³ஸ்ஸனேன அனுப்பத்தித⁴ம்மதம் ஆபாதி³தோதி தஸ்ஸ ஏகந்தபா⁴வனாயபஹாதப்³ப³தா வுத்தா, தஸ்மா உத்³த⁴ச்சபா⁴வேன ஏகஸபா⁴வஸ்ஸேவ தஸ்ஸ ஸதி ஸஹாயே விபாகுப்பாத³னவசனம், அஸதி ச விபாகானுப்பாத³னவசனம் ந விருஜ்ஜ²தி. தயித³ம் ஸப்³ப³மேதேஸம் ஆசரியானம் அஹோபுரிஸிகாரமத்தம். கஸ்மா? உத்³த⁴ச்சஸஹக³தஸ்ஸ ஏகந்தபா⁴வனாயபஹாதப்³ப³பா⁴வேன வுத்தத்தா. ஏவஞ்ஹி வுத்தம் ப⁴க³வதா ‘‘கதமே த⁴ம்மா பா⁴வனாயபஹாதப்³பா³. உத்³த⁴ச்சஸஹக³தோ சித்துப்பாதோ³’’தி (த⁴. ஸ. 1406). யதி³ ச உத்³த⁴ச்சஸஹக³தம் நபா⁴வனாயபஹாதப்³ப³ம் அப⁴விஸ்ஸ, யதா² அதீதாரம்மணத்திகே ‘‘நியோகா³ அனாக³தாரம்மணா நத்தீ²’’தி (த⁴. ஸ. 1433) வத்வா விப⁴ஜ்ஜ வுத்தம், ஏவமிதா⁴பி ‘‘நியோகா³ பா⁴வனாயபஹாதப்³பா³ நத்தீ²’’தி வத்வா ‘‘உத்³த⁴ச்சஸஹக³தோ ஸியா பா⁴வனாயபஹாதப்³போ³ ஸியா நவத்தப்³போ³ ‘த³ஸ்ஸனேனபஹாதப்³போ³’திபி ‘பா⁴வனாயபஹாதப்³போ³’திபீ’’திஆதி³ வத்தப்³ப³ம் ஸியா, ந ச ததா² வுத்தம். யா ச ‘‘தமத்த²ம் படிபாதே³ந்தேஹி யதி³ வுச்சேய்யு’’ந்திஆதி³னா யுத்தி வுத்தா, ஸாபி அயுத்தி. கஸ்மா? த³ஸ்ஸனேனபஹாதப்³பா³ரம்மணானம் ராக³தி³ட்டி²விசிகிச்சா²உத்³த⁴ச்சானம் தேன தேன பஹாதப்³ப³பா⁴வவஸேன இச்சி²தத்தா. யஞ்ச ‘‘உத்³த⁴ச்சம் உப்பஜ்ஜதீ’’தி உத்³த⁴ச்சஸஹக³தசித்துப்பாதோ³ வுத்தோதி த³ஸ்ஸேதும் அதி⁴பதிபச்சயனித்³தே³ஸே உத்³த⁴ச்சஸ்ஸ அனுத்³த⁴ரணம் காரணவஸேன வுத்தம், தம்பி அகாரணம் அஞ்ஞத்தா²பி ஸாவஸேஸபாடா²னம் த³ஸ்ஸனதோ. ததா² ஹி ‘‘அதீதோ த⁴ம்மோ பச்சுப்பன்னஸ்ஸ த⁴ம்மஸ்ஸ, அனாக³தோ த⁴ம்மோ பச்சுப்பன்னஸ்ஸ த⁴ம்மஸ்ஸ ஆரம்மணபச்சயேன பச்சயோ’’தி ஏதேஸம் விப⁴ங்கே³ சேதோபரியஞாணக்³க³ஹணம் கத்வா ‘‘பச்சுப்பன்னோ த⁴ம்மோ பச்சுப்பன்னஸ்ஸ த⁴ம்மஸ்ஸா’’தி இமஸ்ஸ விப⁴ங்கே³ லப்³ப⁴மானம்பி சேதோபரியஞாணம் ந க³ஹிதம். யம்பி பா⁴வனாயபஹாதப்³ப³ஸ்ஸ விபாகதா³னம்ஹி த³ஸ்ஸனேனபஹாதப்³ப³ஸ்ஸ ஸஹாயபா⁴வூபக³மனம் வுத்தம், தம்பி விசாரேதப்³ப³ம் – கிம் அவிஜ்ஜாதி³ விய தா³னஸீலாதீ³னம் உபபத்தியம்யேவ விபாகதா³னஸாமத்தி²யா டா²னவஸேன த³ஸ்ஸனேனபஹாதப்³பா³ பா⁴வனாயபஹாதப்³பா³னம் ஸஹகாரீகாரணம் ஹோதி, உதா³ஹு கிலேஸோ விய கம்மஸ்ஸ படிஸந்தி⁴தா³னம்ஹீதி? கிஞ்சேத்த² – யதி³ தாவ புரிமோ நயோ, ஸேக²ஸந்தானே பா⁴வனாயபஹாதப்³ப³ஸ்ஸ அகிரியாபா⁴வோ ஆபஜ்ஜதி, பஹீனாவிஜ்ஜாமானதண்ஹானுஸயஸ்மிம் ஸந்தானே தா³னாதி³ விய ஸஹாயவேகல்லேன அவிபாகஸபா⁴வதம் ஆபன்னத்தா. அத² து³தியோ, பா⁴வனாயபஹாதப்³ப³த்தேன அபி⁴மதஸ்ஸாபி த³ஸ்ஸனேனபஹாதப்³ப³பா⁴வோ ஆபஜ்ஜதி, படிஸந்தி⁴தா³னே ஸதி அபாயக³மனீயஸபா⁴வானதிவத்தனதோ, தஸ்மா அம்ஹேஹி ஹேட்டா² வுத்தனயேனேவ உத்³த⁴ச்சஸஹக³தஸ்ஸ விபாகதா³னம் ஸம்படிச்சி²தப்³ப³ம், ந யேஸம் கேஸஞ்சி வசனம். பட்டா²னானுஸாரீஹி ப⁴விதப்³ப³ந்தி.

537-8. யந்தி யம் ஆவஜ்ஜனத்³வயம். கரணமத்தத்தாதி கரணமத்தமேவ ட²பேத்வா ப²லதா³னாபா⁴வதோ. வாதபுப்ப²ஸமந்தி மோக⁴புப்ப²ஸமம், யதா² தம் பட²மஸஞ்ஜாதம் அச்சி²ன்னமூலேபி ருக்கே² நிப்³ப³த்தம் புரிமேஹி அதி³ன்னப²லத்தா ப²லனிப்³ப³த்தகம் ந ஹோதி, ஏவமித³ம் அனுபச்சி²ன்னப⁴வமூலேபி ஸந்தானே நிப்³ப³த்தம் அனாஸேவனபா⁴வேன ப²லதா³யகம் ந ஹோதீதி அதி⁴ப்பாயோ. ஜவனத்தம் து ஸம்பத்தந்தி அட்டா²ரஸவித⁴ம் கீ²ணாஸவாவேணிகம் விஞ்ஞாணமாஹ. கிச்சஸாத⁴னதோதி ப⁴வதண்ஹாமூலஸ்ஸ அவோச்சி²ன்னபா⁴வே ஸதி குஸலாகுஸலகம்மகிச்சஸ்ஸ ஸாத⁴னதோ, தா³னாதி³தம்தம்கிச்சஸாத⁴னவஸேன வா. இத³ம் வுத்தம் ஹோதி – யதா² ஹி சி²ன்னமூலஸ்ஸ ருக்க²ஸ்ஸ புப்ப²ம் புப்ப²னமத்தம் ட²பேத்வா அப²லமேவ ஹோதி, ஏவமேதம்பி தம்தம்கிச்சஸாத⁴னமத்தம் ட²பேத்வா ஸமுச்சி²ன்னப⁴வதண்ஹாமூலே ஸந்தானே பவத்தனதோ அப²லமேவாதி.

539-40. படிச்சாதி ஹேதுத⁴ம்மஸ்ஸ படிமுக²ம் க³ந்த்வா தம் அபச்சக்கா²ய. ஏதீதி பவத்ததி, திட்ட²தி உப்பஜ்ஜதி வாதி வுத்தம் ஹோதி. ‘‘ஏதீ’’தி ஹி இத³ம் உப்பத்திட்டி²தீனம் ஸாதா⁴ரணவஸேன பவத்திபரிதீ³பகம். தேனேவாஹ ‘‘டி²தியுப்பத்தியாபி வா’’தி. ஏகச்சோ ஹி பச்சயோ டி²தியா ஏவ உபகாரகோ ஹோதி யதா² பச்சா²ஜாதபச்சயோ, ஏகச்சோ உப்பத்தியா ஏவ யதா² அனந்தராதி³கோ, ஏகச்சோ உப⁴யஸ்ஸ யதா² ஹேதுஆத³யோ. ஏவம் பச்சய-ஸத்³த³ஸ்ஸ வசனத்த²ம் த³ஸ்ஸேத்வா இதா³னி பச்சயலக்க²ணம் த³ஸ்ஸேந்தோ ஆஹ ‘‘யோ த⁴ம்மோ’’திஆதி³. யோதி ஹேதுத⁴ம்மோ. யஸ்ஸாதி யஸ்ஸ ப²லத⁴ம்மஸ்ஸ. டி²தியுப்பத்தியாபி வாதி டி²தித்த²ம், உப்பத்தித்த²ம் வா. டி²தியாதி வா டி²திக்க²ணே, உப்பத்தியாதி உப்பாத³க்க²ணே. யஸ்ஸ த⁴ம்மஸ்ஸ உபகாரோ, யஸ்ஸ த⁴ம்மஸ்ஸ டி²தியுப்பத்தியாதி வா ஸம்ப³ந்தோ⁴. ‘‘உபகாரோ’’தி இமினா த⁴ம்மேன த⁴ம்மஸத்திஉபகாரகம் த³ஸ்ஸேதி. ‘‘ஸம்ப⁴வோ’’திஆதி³ பச்சயஸ்ஸேவ பரியாயத³ஸ்ஸனம். ஸம்ப⁴வதி ஏதஸ்மாதி ஸம்ப⁴வோ. ததா² பப⁴வோ. ஹினோதி பதிட்டா²தி ஏத்தா²தி ஹேது. அனேகத்த²த்தா தா⁴துஸத்³தா³னம் ஹி-ஸத்³தோ³ மூல-ஸத்³தோ³ விய பதிட்ட²த்தோ² வேதி³தப்³போ³. ஹினோதி வா ஏதேன கம்மனிதா³னபூ⁴தேன உத்³த⁴ம் ஓஜம் அபி⁴ஹரந்தேன மூலேன விய பாத³போ தப்பச்சயம் ப²லம் க³ச்ச²தி, வுத்³தி⁴ம் விருள்ஹிம் ஆபஜ்ஜதீதி ஹேது. அத்தனோ ப²லம் கரோதீதி காரணம். பச்சயோ மதோதி பச்சயோவ ‘‘ஸம்ப⁴வோ’’திஆதி³தோ மதோ. அத்த²தோ ஏதே ஸமானா, ப்³யஞ்ஜனமத்தம்யேவ நேஸம் நானத்தந்தி வுத்தம் ஹோதி.

541-5. ஏவம் பட்டா²னே ஆக³தஸப்³ப³பச்சயானம் ஸாதா⁴ரணவஸேன அத்த²ம் வத்வா இதா⁴தி⁴ப்பேதஸ்ஸ ஹேதுபச்சயஸ்ஸேவ ஸரூபம் த³ஸ்ஸேதும் ‘‘லோபா⁴தி³ பன யோ த⁴ம்மோ’’திஆதி³ வுத்தம். மூலட்டே²னாதி ஸம்பயுத்தானம் ஸுப்பதிட்டி²தபா⁴வஸாத⁴னஸங்கா²தமூலட்டே²ன. ச²ளேவாதி மூலட்டே²னூபகாரகபா⁴வஸ்ஸ தேஸமேவ ஆவேணிகபா⁴வேன ஏதே ச²ளேவ. ஜாதிதோதி குஸலாகுஸலாப்³யாகதஜாதிதோ. நவதா⁴தி தயோ குஸலஹேதூ, தயோ அகுஸலஹேதூ, தயோ அப்³யாகதஹேதூதி நவதா⁴. த⁴ம்மானம்…பே… ஸாத⁴கோதி யதா² ஸாலிவீஹிபீ³ஜாதீ³னி ஸாலிவீஹிஆதி³பா⁴வஸ்ஸ ஸாத⁴கானி, மணிஆதி³பபா⁴வத்தூ²னஞ்ச நீலாதி³வண்ணானி நீலாதி³மணிபபா⁴ய ஸாத⁴கானி, ஏவம் ஹேதுபச்சயோ யதா²ரஹம் அத்தனோ ஸம்பயுத்தானம் குஸலாதி³த்தஸாத⁴கோதி குஸலாகுஸலாப்³யாகதத⁴ம்மானம் யதா²க்கமம் குஸலாகுஸலாப்³யாகதபா⁴வஸாத⁴கோ மூலட்டோ²தி அயமேத்த² அத்தோ². ஏகே ஆசரியாதி ரேவதாசரியம், தஸ்ஸ ஸிஸ்ஸானுஸிஸ்ஸே ச ஸந்தா⁴யாஹ. அத² வா க³ரும்ஹி ப³ஹுவசனம்பி யுஜ்ஜதீதி ரேவதாசரியமேவ ஸந்தா⁴ய ‘‘ஏகே ஆசரியா’’தி வுத்தம்.

ஏவம் ஸந்தேதி யதி³ மூலட்டோ² குஸலாதி³பா⁴வஸாத⁴கோ, ஏவம் ஸதி. யதா² சித்தம் சித்தஜரூபானம் பச்சயோ ஹோதி, ஏவம் தம்ஸம்பயுத்தத⁴ம்மாபீதி ஆஹ ‘‘தம்ஸமுட்டா²னரூபிஸூ’’தி, ஹேதுஸமுட்டா²னரூபேஸூதி அத்தோ². நேவ ஸம்பஜ்ஜதீதி ந ஸிஜ்ஜ²தி, ‘‘ஹேதூ ஹேதுஸம்பயுத்தகானம் த⁴ம்மானம் தம்ஸமுட்டா²னானஞ்ச ரூபானம் ஹேதுபச்சயேன பச்சயோ’’தி வுத்தோ ஹேதுபச்சயபா⁴வோ ந ஸம்பஜ்ஜதீதி வுத்தம் ஹோதி. யதா² குஸலாகுஸலா ஹேதூ தம்ஸமுட்டா²னரூபஸ்ஸ குஸலாதி³பா⁴வாய ந பரியத்தா, ஏவம் அப்³யாகதோபி ஹேது தம்ஸமுட்டா²னஸ்ஸ ரூபஸ்ஸ அப்³யாகதபா⁴வாய ந பரியத்தோ. ஸபா⁴வேன ஹி தம் அப்³யாகதந்தி ஆஹ ‘‘ந ஹீ’’திஆதி³. யதி³ குஸலாதி³பா⁴வம் ந ஸாதே⁴ந்தி, பச்சயாபி ந ஹோந்தீதி வதே³ய்யாதி ஆஹ ‘‘ந தேஸ’’ந்திஆதி³. ‘‘ஹேதூ ஹேதுஸம்பயுத்தகானம் த⁴ம்மானம் தம்ஸமுட்டா²னானஞ்ச ரூபானம் ஹேதுபச்சயேன பச்சயோ’’தி (பட்டா². 1.1.1) வசனதோ தே அலோபா⁴த³யோ தேஸம் ரூபானம் பச்சயா ந ந ஹோந்தி, ப⁴வந்தேவாதி அத்தோ².

546-7. ந க³ந்தப்³போ³தி ந பச்சேதப்³போ³. இத³ம் வுத்தம் ஹோதி – யதி³ குஸலாதி³ஹேதுயோ அத்தனோ விய அத்தஹேதுகானம் த⁴ம்மானம் குஸலாதி³பா⁴வம் ஸாதே⁴ந்தி, குஸலாகுஸலஹேதுபச்சயஸம்பூ⁴தா ரூபத⁴ம்மாபி தே விய குஸலாத³யோ ஸியும், ஹேதுயோ வா ரூபானம் பச்சயா ந ஸியும், ந ச பனேதம் உப⁴யம்பி அத்தி², தஸ்மா குஸலாதீ³னம் குஸலாதி³பா⁴வஸாத⁴கோ மூலட்டோ²தி ந விஞ்ஞாதப்³ப³ந்தி. அபிச யதி³ ஹேதுபடிப³த்³தோ⁴ குஸலாதி³பா⁴வோ, ததா³ அப்³யாகதபா⁴வோபி தப்படிப³த்³தோ⁴ ஸியா, அஹேதுகானம் அப்³யாகதபா⁴வோ ந ஸிஜ்ஜ²தி. யதி³ ச ஹேதுபடிப³த்³தோ⁴ குஸலாதி³பா⁴வோ, ஹேதூனம்பி குஸலாதி³பா⁴வோ அப்படிப³த்³தோ⁴ ஸியா. அத² தேஸம்பி ஸேஸஹேதுபடிப³த்³தோ⁴, ஏவம்பி மோமூஹசித்தஸம்பயுத்தஸ்ஸ ஹேதுனோ அகுஸலபா⁴வோ ந ஸிஜ்ஜே²ய்ய. அத² தஸ்ஸ ஸோ அஞ்ஞஹேதுகோ ஸியா, ஏவம் ஸதி ஸேஸஹேதூனம்பி தம்ஹேதுகோவ ஸியா. யதா² ச ஸேஸஹேதூனம், ஏவம் அவஸேஸஸம்பயுத்தத⁴ம்மானம்பி தம்ஹேதுகோவ ஸியா. அத² ஸியா ஹேதூனம் ஸபா⁴வதோவ குஸலாதி³பா⁴வோ, ஸம்பயுத்தானம் பன ஹேதுபடிப³த்³தோ⁴தி, ஏவம் ஸதி அலோபோ⁴ குஸலோ வா ஸியா அப்³யாகதோ வா. யதி³ ஹி ஸோ ஸபா⁴வதோ குஸலோ, தம்ஸபா⁴வத்தா அப்³யாகதோ ந ஸியா. அத² அப்³யாகதோ, தம்ஸபா⁴வத்தா குஸலோ ந ஸியா அலோப⁴ஸபா⁴வஸ்ஸ அதோ³ஸத்தாபா⁴வோ விய. யஸ்மா பன உப⁴யதா²பி ஹோதி, தஸ்மா யதா² உப⁴யதா² ஹோந்தேஸு ஸத்³தா⁴தீ³ஸு ஸம்பயுத்தேஸு ஹேதுபடிப³த்³த⁴ம் குஸலாதி³பா⁴வம் பரியேஸத², ந ஸபா⁴வதோ, ஏவம் ஹேதூஸுபி குஸலாதி³தா அஞ்ஞபடிப³த்³தா⁴ பரியேஸிதப்³பா³, ந ஸபா⁴வதோ. ஸா பன பரியேஸியமானா யோனிஸோமனஸிகாராதி³படிப³த்³தா⁴ ஹோதீதி ஹேதூஸு விய ஹேதுஸம்பயுத்தத⁴ம்மேஸுபி யோனிஸோமனஸிகாராதி³படிப³த்³தோ⁴ குஸலாதி³பா⁴வோ, ந ஹேதுபடிப³த்³தோ⁴தி. தேனேவாஹ –

‘‘யோனிஸோ, பி⁴க்க²வே, மனஸி கரோதோ அனுப்பன்னா சேவ குஸலா த⁴ம்மா உப்பஜ்ஜந்தி, உப்பன்னா ச குஸலா த⁴ம்மா அபி⁴வட்³ட⁴ந்தீ’’திஆதி³ (அ. நி. 1.67).

ஸமயஞ்ஞுனாதி ஆபி⁴த⁴ம்மிகமதவேதி³னா. ஸுப்பதிட்டி²தபா⁴வஸ்ஸ ஸாத⁴னேனாதி அத்தஹேதுகானம் த⁴ம்மானம் ஸம்மா பதிட்டி²தபா⁴வஸ்ஸ தி²ரபா⁴வஸ்ஸ ஸாத⁴னேன. லத்³த⁴ஹேதுபச்சயா ஹி த⁴ம்மா விருள்ஹமூலா விய பாத³பா தி²ரா ஹோந்தி ஸுப்பதிட்டி²தா, அஹேதுகா திலபீ³ஜாதி³ஸேவாலா விய ந ஸுப்பதிட்டி²தாதி.

548. ஸப்³ப³ஸோதி காமாவசராதி³ஸப்³ப³பா⁴கே³ன.

550-1. படிஸந்தி⁴க்க²ணே சித்தஸமுட்டா²னானம் ரூபானம் அபா⁴வதோ அத்தனா ஸம்பயுத்தானம், கடத்தாரூபானமேவ ச பச்சயபா⁴வோதி ஆஹ ‘‘அத்தனா…பே… ஜாதான’’ந்தி. கம்மஸ்ஸ கதத்தா ஏவ ச உபசிதத்தா ச ந இஸ்ஸராதி³ஹேதுனோ ஸம்பூ⁴தானி ரூபானி கடத்தாரூபானி, கம்மஸமுட்டா²னரூபானீதி அத்தோ², கடத்தாரூபானேவ ஜாதானி பூ⁴தானி நிப்³ப³த்தானீதி கடத்தாரூபஜாதானி. ததே²வாதி யதா² படிஸந்தி⁴யம் கடத்தாரூபானம், ஏவந்தி அத்தோ². சித்தஜானஞ்சாதி ச-ஸத்³தே³ன ‘‘அத்தனா ஸம்பயுத்தான’’ந்தி ஆகட்³ட⁴தி.

553. லோகுத்தரவிபாகானம் படிஸந்தி⁴வஸேன அப்பவத்தனதோ நத்தி² கம்மஸமுட்டா²னஸ்ஸ பச்சயபா⁴வோதி ஆஹ ‘‘சித்தஜான’’ந்திஆதி³.

555. ஹேதுபச்சயஸம்ப⁴வோதி ஹேதுபச்சயஸம்பூ⁴தத⁴ம்மோ, ஹேதுபச்சயதோ பச்சயுப்பன்னத⁴ம்மானம் ஸம்ப⁴வாகாரோ வா. ஸஞ்ஜாதஸுக²ஹேதுனாதி ஸஞ்ஜாதஞாணேன, ஸம்பஜஞ்ஞேனாதி அத்தோ². ஞாணஞ்ஹி ‘‘ஸுகி²னோ சித்தம் ஸமாதி⁴யதி, ஸமாஹிதோ யதா²பூ⁴தம் பஜானாதீ’’திஆதி³வசனதோ ஸுக²ம் ஹேது ஏதஸ்ஸாதி,

‘‘தி³ட்டே² த⁴ம்மே ச யோ அத்தோ²,

யோ சத்தோ² ஸம்பராயிகோ;

அத்தா²பி⁴ஸமயா தீ⁴ரோ,

பண்டி³தோதி பவுச்சதீ’’தி. (ஸம். நி. 1.129) –

ஆதி³வசனதோ ஸுக²ஸ்ஸ ஹேதூதி வா ‘‘ஸுக²ஹேதூ’’தி வுச்சதி.

556. லோகஸ்ஸ அதி⁴பதி லோகாதி⁴பதி, ஸகலலோகனாயகேனாதி அத்தோ². அத்தாதீ⁴னானம் பதினோதி அதி⁴பதீ. ச²ந்த³ம் து ஜேட்ட²கம் கத்வாதி ‘‘ச²ந்த³வதோ கிம் நாம ந ஸிஜ்ஜ²தீ’’திஆதி³கம் புரிமாபி⁴ஸங்கா²ரூபனிஸ்ஸயம் லபி⁴த்வா உப்பஜ்ஜமானே சித்துப்பாதே³ ச²ந்தோ³ ஜேட்ட²கபூ⁴தோ ஸம்பயுத்தத⁴ம்மே வஸே வத்தமானோ ஹுத்வா பவத்ததி, ஸம்பயுத்தத⁴ம்மா ச தஸ்ஸ வஸே பவத்தந்தி ஹீனாதி³பா⁴வேன தத³னுவத்தனதோதி ஆஹ ‘‘ச²ந்த³ம் து ஜேட்ட²கம் கத்வா’’திஆதி³. கத்வா து⁴ரந்தி ஸஹஜாதபுப்³ப³ங்க³மவஸேன புப்³ப³ங்க³மம் கத்வா. ச²ந்தா³தி⁴பதி நாம ஸோ வா சித்துப்பாதோ³ ச²ந்தா³தி⁴பதி நாம ‘‘ச²ந்தோ³ அதி⁴பதி இமஸ்ஸா’’தி கத்வா. ஏஸேவாதி ‘‘சித்தம் து⁴ரம் கத்வா…பே… காலஸ்மிம் சித்தாதி⁴பதி நாமா’’திஆதி³னா யதா²வுத்தோவ நயோ. ஸேஸேஸூதி சித்தாதீ³ஸு. ஏத்த² ச ‘‘ச²ந்த³ம்…பே… காலஸ்மி’’ந்திஆதி³னா காலஸ்ஸ நியமிதத்தா சத்தாரோபேதே ஏகக்க²ணே அதி⁴பதீ ந ஹோந்தீதி த³ட்ட²ப்³ப³ம். ஏவஞ்ச கத்வா பட்டா²னே ‘‘ச²ந்தா³தி⁴பதி ச²ந்த³ஸம்பயுத்தகானம் த⁴ம்மானம் தம்ஸமுட்டா²னானஞ்ச ரூபானம் அதி⁴பதிபச்சயேன பச்சயோ’’திஆதி³னா (பட்டா². 1.1.3) சதுன்னம்பி அதி⁴பதீனம் பச்சயபா⁴வோ விஸும் விஸும்யேவ உத்³த⁴டோ. யதி³ ஹி தே ஏகக்க²ணேயேவ அதி⁴பதிபச்சயா ஸியும், ததா³ யதா² ஹேதுபச்சயனித்³தே³ஸே ‘‘ஹேதூ ஹேதுஸம்பயுத்தகான’’ந்திஆதி³னா அவிஸேஸேன வுத்தம் மூலட்டே²ன உபகாரகபா⁴வஸ்ஸ விஜ்ஜமானேன த்³வின்னம், திண்ணம்பி ஹேதூனம் ஏகக்க²ணே பச்சயபா⁴வூபக³மனதோ, ஏவம் ஏகக்க²ணேயேவ ப³ஹூனம் ஜேட்ட²கபா⁴வே ஸதி அதி⁴பதிபச்சயனித்³தே³ஸேபி ‘‘அதி⁴பதீ அதி⁴பதிஸம்பயுத்தகான’’ந்திஆதி³னா வத்தப்³ப³ம் ஸியா. யஸ்மா பன ஏவம் அவத்வா ‘‘ச²ந்தா³தி⁴பதி ச²ந்த³ஸம்பயுத்தகான’’ந்திஆதி³னா சத்தாரோவ விஸேஸேத்வா வுத்தா, தஸ்மா ஏகேகத⁴ம்மோயேவ ஏகக்க²ணே அதி⁴பதிபச்சயோ ஹோதீதி த³ட்ட²ப்³ப³ம். ஜேட்ட²ட்டே²னாதி பமுக²பா⁴வேன.

ஸோப⁴னா மதி, ஸோப⁴னம் வா மதம் ஏதேஸம் அத்தீ²தி ஸுமதினோ, ஸம்மாதி³ட்டி²காதி அத்தோ², தேஸம் மதிம் விபோ³தே⁴தி பபோ³தே⁴தீதி ஸுமதிமதிவிபோ³த⁴னம். குச்சி²தா மதி, குச்சி²தம் வா மதம் ஏதேஸந்தி குமதினோ, மிச்சா²தி³ட்டி²கா, தேஸம் மதிபூ⁴தா மதிபா⁴வேன பரிகப்பிதத்தாதி குமதிமதி, மிச்சா²தி³ட்டி², ஸாயேவ இந்த⁴னஸதி³ஸதாய இந்த⁴னம் தஸ்ஸ பாவகம் அக்³கி³ வியாதி குமதி…பே… பாவகம். அதிமது⁴ரந்தி நிபுணக³ம்பீ⁴ரேன அத்த²ரஸேன சேவ ஸுவிமலஸகி²லேன ப்³யஞ்ஜனரஸேன ச மது⁴ரம். அவேதீ³தி ஓகா³ஹேத்வா ஜானாதி. யோ யோதி தே²ரனவமஜ்ஜி²மேஸு யோ கோசி. ஜினவசனம் ஸகலம் அவேதீ³தி தேபிடகஸ்ஸபி ஸகலஜினவசனஸ்ஸ க³ஹணஸமத்த²தாபடிலாபே⁴ன தம் அவக³ச்ச²தி.

இதி அபி⁴த⁴ம்மத்த²விகாஸினியா நாம

அபி⁴த⁴ம்மாவதாரஸம்வண்ணனாய

பகிண்ணகனித்³தே³ஸவண்ணனா நிட்டி²தா.