5. பஞ்சமோ பரிச்சே²தோ³

பூ⁴மிபுக்³க³லசித்துப்பத்தினித்³தே³ஸவண்ணனா

182-8. பு³த்³தி⁴யா வுத்³தி⁴ம் விருள்ஹிம் கரோதீதி பு³த்³தி⁴வுத்³தி⁴கரம். யஸ்ஸ யஸ்ஸ நயஸ்ஸ கத²னம் படிஞ்ஞாதம், தம் தம் த³ஸ்ஸேந்தோ ஆஹ ‘‘சித்தானம் பூ⁴மீஸுப்பத்தி’’ந்தி. தம் வத்வா பூ⁴மீனம் ஆதா⁴ரவஸேன பஸங்கா³க³தம் க³திபே⁴த³ம், ப⁴வபே⁴த³ஞ்ச த³ஸ்ஸேதும் ‘‘தே³வா சேவா’’திஆதி³ வுத்தம். ‘‘சதஸ்ஸோபாயபூ⁴மியோ’’தி வத்வா அஸுரக³தியா பேதக³தியம்யேவ ஸங்க³ஹிதத்தா ‘‘க³தியோ பஞ்சா’’தி வுத்தந்தி வத³ந்தி. மயம் பன ‘‘திஸ்ஸோவாபாயபூ⁴மியோ’’தி பாடே²ன ப⁴விதப்³ப³ந்தி மஞ்ஞாம. ந ஹி ஏஸ அனாகுலவசனோ ஆசரியோ ஈதி³ஸம் புப்³பா³பரவிருத்³த⁴ம் விய ஸம்மோஹஜனகம் வசனம் பா⁴ஸதி. பாளியம்பி ஹி –

‘‘பஞ்ச கோ² இமா, ஸாரிபுத்த, க³தியோ. கதமா பஞ்ச? நிரயோ திரச்சா²னயோனி பேத்திவிஸயோ மனுஸ்ஸா தே³வா’’தி (அ. நி. 9.68) –

ஏவம் திண்ணமேவ அபாயானம் வஸேன வுத்தம். காமரூபாரூபவஸேன தயோ ப⁴வா. தத்தா²தி தேஸு தீஸு ப⁴வேஸு. திம்ஸேவாதி சதஸ்ஸோ அபாயபூ⁴மியோ, ஸத்தவிதா⁴ காமஸுக³திபூ⁴மி, ஸோளஸ ரூபீப்³ரஹ்மலோகா, சதஸ்ஸோ அரூபபூ⁴மியோதி ஏகதிம்ஸபூ⁴மீனமந்தரே சித்தப்பவத்திஅதி⁴காரத்தா அஸஞ்ஞபூ⁴மிம் அபனேத்வா அவஸேஸா திம்ஸேவ பூ⁴மியோதி அத்தோ². தாஸு திம்ஸேவ புக்³க³லாதி தாஸு பூ⁴மீஸு உப்பன்னா புக்³க³லா பூ⁴மிக³ணனவஸேன திம்ஸேவ ஹோந்தி. பூ⁴மிவஸேன திம்ஸவிதா⁴பி பன படிஸந்தி⁴சித்தக³ணனாய ஏகூனவீஸதி ஹோந்தீதி த³ஸ்ஸேந்தோ ஆஹ ‘‘பூ⁴மீஸ்வேதாஸூ’’திஆதி³.

படிஸந்தி⁴கசித்தானந்தி த³ஸ காமாவசரபடிஸந்தி⁴சித்தானி, பஞ்ச ரூபாவசரபடிஸந்தி⁴சித்தானி, சத்தாரி அரூபாவசரபடிஸந்தி⁴சித்தானீதி இமேஸம் ஏகூனவீஸதிபடிஸந்தி⁴சித்தானம் வஸேன. அஸஞ்ஞீனமசித்தகாதி அஸஞ்ஞஸத்தானம் அசித்தகா படிஸந்தி⁴. வுத்தஞ்ஹேதம் –

‘‘அஸஞ்ஞஸத்தா தே³வா அஹேதுகா அனாஹாரகா அப²ஸ்ஸகா அவேத³னகா அஸஞ்ஞகா அசேதனகா அசித்தகா பாதுப⁴வந்தீ’’தி.

யதி³ படிஸந்தி⁴வஸேன வீஸதி புக்³க³லா, கத²ம் பூ⁴மிவஸேன திம்ஸாதி வுத்தா. ஏகதிம்ஸாதி ஹி வத்தப்³ப³ந்தி ஆஹ ‘‘இதா⁴’’திஆதி³.

ந விஜ்ஜதி ஹேது இமேஸந்தி அஹேதூ, து³வே, தீணி ச ஹேதூ இமேஸந்தி த்³விதிஹேதூ, படிஸந்தி⁴வஸேன அஹேதுகா, து³ஹேதுகா, திஹேதுகா சாதி அத்தோ². தத்த² அஹேதுகா ஆபாயிகா ச, ஏகச்சே பூ⁴மதே³வா, மனுஸ்ஸேஸு ஜச்சந்த⁴ஜச்சப³தி⁴ரஜச்சும்மத்தகனபும்ஸகஉப⁴தோப்³யஞ்ஜனகாத³யோ ச. வுத்தாவஸேஸா காமஸுக³திவாஸினோவ து³ஹேதுகா. திஹேதுகா பன காமஸுக³திவாஸினோவ. அரியா பன அட்டா²தி சதுன்னம் அரியமக்³க³ஸமங்கீ³னம், சதுன்னஞ்ச அரியப²லஸமங்கீ³னம் வஸேன அட்ட² அரியபுக்³க³லா. நனு ச அரியாபி திஹேதுகாயேவாதி? ஸச்சம், சித்துப்பாத³ம் பன பத்வா தேஸம் விஸேஸஸப்³பா⁴வதோ விஸும்யேவ உத்³த⁴டாதி த³ட்ட²ப்³ப³ம்.

189-92. ‘‘பூ⁴மீஸுப்பத்திம் ப⁴ணதோ மே நிபோ³த⁴தா²’’தி ஸுத்வா சோத³கோ ‘‘திம்ஸபூ⁴மீஸூ’’திஆதி³னா ஸப்³பே³ஸம் பூ⁴மீனம் ஸாதா⁴ரணசித்தானி புச்ச²தி, இதரோ ‘‘சுத்³த³ஸேவா’’தி விஸ்ஸஜ்ஜேதி. தத்த² அட்ட² பரித்தகுஸலானி, சத்தாரி தி³ட்டி²விப்பயுத்தானி, உத்³த⁴ச்சஸஹக³தம், மனோத்³வாராவஜ்ஜனஞ்சாதி சுத்³த³ஸேவ, ந ஊனானி நாதி⁴கானி, ஸப்³பா³ஸு திம்ஸபூ⁴மீஸு ஹோந்தி, ஸப்³ப³பூ⁴மீனம் ஸாதா⁴ரணானீதி அத்தோ².

ஸதா³…பே… ஸியுந்தி த்³வே தோ³ஸமூலானி, குஸலவிபாகசக்கு²ஸோதவிஞ்ஞாணஸம்படிச்ச²னஸந்தீரணத்³வயவஜ்ஜிதானி அட்டா²ரஸ காமாவசரவிபாகசித்தானீதி வீஸதி சித்தானி ஸதா³ காமேயேவ ப⁴வே ஸியும், ந கதா³சி அஞ்ஞத்த² உப்பஜ்ஜந்தீதி அத்தோ². நனு ச ப்³ரஹ்மூனம்பி அகுஸலவிபாகானி உப்பஜ்ஜந்தீதி? ஸச்சம் உப்பஜ்ஜந்தி, தானி காமப⁴வே அனிட்ட²ரூபாத³யோ ஆரப்³ப⁴ உப்பஜ்ஜந்தி ப்³ரஹ்மலோகே தேஸம் அபா⁴வதோதி காமப⁴வேயேவ நியமிதானி. ரூபாவசரவிபாகசித்தானி பஞ்ச ரூபாவசரப⁴வேயேவ ஸியும், சத்தாரோ ச அரூபாவசரவிபாகா அரூபீஸூதி ஆஹ ‘‘பஞ்ச ரூபப⁴வே’’திஆதி³.

காம …பே… ப⁴வந்தீதி ரூபாவசரகுஸலகிரியசித்தானி சேவ குஸலவிபாகானி ச சக்கு²ஸோதவிஞ்ஞாணஸம்படிச்ச²னஸந்தீரணானி வோட்ட²ப்³ப³னவஜ்ஜானி ச த்³வே அஹேதுககிரியசித்தானி பட²மமக்³க³விஞ்ஞாணந்தி அட்டா²ரஸ சித்தானி காமரூபப⁴வேயேவ ப⁴வந்தி, ந அரூபப⁴வே. தத்த² ஹி ஸப்³ப³ஸோ ரூபஸஞ்ஞானம் ஸமதிக்கந்தத்தா ரூபாவசரகுஸலகிரியா நுப்பஜ்ஜந்தி. சக்கு²விஞ்ஞாணாதீ³னி வத்து²த்³வாரவிரஹதோ, ஹஸிதுப்பாதோ³ ஏகந்தவத்து²னிஸ்ஸயத்தா, ஸோதாபத்திமக்³கோ³ பரதோகோ⁴ஸபச்சயாயேவ நிப்³ப³த்தனதோ ந உப்பஜ்ஜதி. த்³வேசத்தாலீஸாதி அட்ட² பரித்தகுஸலானி, சத்தாரி அரூபகுஸலானி, பட²மமக்³க³வஜ்ஜானி ஸத்த லோகுத்தரசித்தானி, படிக⁴த்³வயவஜ்ஜிதானி ச த³ஸ அகுஸலசித்தானி, புப்³பே³ வுத்தஅஹேதுககிரியாத்³வயவஜ்ஜிதானி நவ காமாவசரகிரியசித்தானி, சத்தாரி அரூபாவசரகிரியசித்தானீதி ஏவம் த்³வேசத்தாலீஸ சித்தானி தீஸு ப⁴வேஸு ஹோந்தி.

193-204. ஏவம் ப⁴வவஸேன சித்துப்பத்திம் த³ஸ்ஸேத்வா இதா³னி காலவஸேன த³ஸ்ஸேந்தோ ஆஹ ‘‘ட²பேத்வா பனா’’திஆதி³. ஸப்³பா³ஸந்தி நித்³தா⁴ரணத்தே² ஸாமிவசனம். அட்ட² மஹாகிரியா, அரஹத்தமக்³க³ப²லசித்தானி, அனாகா³மிப²லம், நேவஸஞ்ஞானாஸஞ்ஞாயதனகுஸலகிரியாதி தேரஸேவ சித்தானி அபாயரஹிதாஸு ச²ப்³பீ³ஸபூ⁴மீஸு ஹோந்தி அபாயேஸு விபாகாவரணஸப்³பா⁴வே ஏதேஸம் அனுப்பஜ்ஜனதோ. அபரானி ச² சித்தானீதி ஸம்ப³ந்தோ⁴. தானி பன ரூபப⁴வஸாதா⁴ரணானம் பஞ்சபரித்தவிபாகானம், கிரியமனோதா⁴துயா ச வஸேன வேதி³தப்³பா³னி.

பஞ்ச சித்தானீதி தி³ட்டி²ஸம்பயுத்தவிசிகிச்சா²வஸேன பஞ்ச சித்தானி. தானி ஹி பஞ்சஸு ஸுத்³தா⁴வாஸபூ⁴மீஸு ந லப்³ப⁴ந்தி. தத்த² அனாகா³மிகீ²ணாஸவானமேவ அதி⁴வுத்த²த்தா, தேஸஞ்ச பட²மமக்³கே³னேவ இமேஸம் பஞ்சன்னம் விஞ்ஞாணானம் அனுப்பாத³த⁴ம்மதம் ஆபாதி³தத்தா.

அபரானி து³வேதி ததியாருப்பகுஸலகிரியசித்தானி. தானி ஹி நேவஸஞ்ஞானாஸஞ்ஞாயதனேஸு அதிக்கந்தாரம்மணத்தா, அபாயேஸு ச அஹேதுகபடிஸந்தி⁴கத்தா நுப்பஜ்ஜந்தி. சதுவீஸதீபூ⁴மிஸு த்³வே சாதி விஞ்ஞாணஞ்சாயதனகுஸலகிரியாவஸேன த்³வே சித்தானி. தேவீஸபூ⁴மிஸு த்³வேயேவாதி ஆகாஸானஞ்சாயதனகுஸலகிரியசித்தானி.

ஏகாத³ஸவித⁴ந்தி ரூபாவசரகுஸலகிரியா ஹஸிதுப்பாதோ³தி ஏகாத³ஸ. ஸோதாபத்திப²லம் யாவ அனாகா³மிமக்³கோ³ சத்தாரி ச சித்தானி ஸுத்³தா⁴வாஸஅபாயவஜ்ஜாஸு ஏகவீஸதிபூ⁴மீஸு ப⁴வந்தி. ஏகம் ஸோதாபத்திமக்³க³சித்தம் ஸுத்³தா⁴வாஸஅபாயஅரூபபூ⁴மிவஜ்ஜேஸு ஸத்தரஸஸு பூ⁴மீஸு ஜாயதி. த்³வே தோ³ஸமூலானி, குஸலவிபாககா⁴னஜிவ்ஹாகாயவிஞ்ஞாணானி, ஸத்த அகுஸலவிபாகாதி த்³வாத³ஸ சித்தானி மஹக்³க³தபூ⁴மிவஜ்ஜாஸு ஏகாத³ஸஸு காமபூ⁴மீஸு ஜாயந்தி. அட்ட² மஹாவிபாகசித்தானி காமாவசரதே³வமனுஸ்ஸவஸேன ஸத்தபூ⁴மீஸு ஜாயந்தி. ச²ஸு பூ⁴மிஸூதி வேஹப்ப²லஸுத்³தா⁴வாஸஸங்கா²தாஸு ச²ஸு பஞ்சமஜ்ஜா²னபூ⁴மீஸு.

சத்தாரி…பே… பூ⁴மிஸூதி சதுத்த²ஜ்ஜா²னவிபாகோ பரித்தஸுப⁴அப்பமாணஸுப⁴ஸுப⁴கிண்ஹவஸேன தீஸு பூ⁴மீஸு ஜாயதி, து³தியஜ்ஜா²னவிபாகோ, ததியஜ்ஜா²னவிபாகோ ச பரித்தாபா⁴அப்பமாணாபா⁴ஆப⁴ஸ்ஸரவஸேன தீஸு பூ⁴மீஸு, பட²மஜ்ஜா²னவிபாகோ ப்³ரஹ்மபாரிஸஜ்ஜப்³ரஹ்மபுரோஹிதமஹாப்³ரஹ்மாவஸேன தீஸு பூ⁴மீஸு ஹோதீதி ஏவம் சத்தாரி சித்தானி ஏகேகவஸேன தீஸு தீஸு பூ⁴மீஸு ஜாயந்தி.

206-9. ஏவம் ஏத்தகானேவ சித்தானி ஏத்தகாஸு பூ⁴மீஸு உப்பஜ்ஜந்தீதி சித்தனியமவஸேன உப்பத்திம் த³ஸ்ஸேத்வா இதா³னி ஏத்தகாஸு ஏவ பூ⁴மீஸு ஏத்தகானேவ சித்தானி உப்பஜ்ஜந்தீதி பூ⁴மினியமவஸேன த³ஸ்ஸேதும் ‘‘குஸலாகுஸலா காமே’’திஆதி³ ஆரத்³த⁴ம். தத்த² காமே குஸலாகுஸலா வீஸதி, தேஸம் பன்னரஸ அஹேதுகா பாகா, ஆவஜ்ஜனத்³வயஞ்சாதி ஸத்ததிம்ஸேவ மானஸா நரகாதீ³ஸு சதூஸுபி அபாயேஸு ஜாயரே. அவஸேஸானி பன ஸத்தரஸ காமாவசரவிபாககிரியசித்தானி, பஞ்சதிம்ஸ மஹக்³க³தலோகுத்தரானீதி த்³வேபஞ்ஞாஸ மானஸா கதா³சிபி தேஸு நுப்பஜ்ஜந்தி அபூ⁴மிபா⁴வதோதி அத்தோ².

அஸீதி ஹத³யாதி வுத்தாவஸேஸானி அஸீதி சித்தானி. கா⁴னாதி³விஞ்ஞாணத்தயந்தி குஸலவிபாககா⁴னாதி³விஞ்ஞாணத்தயம். ‘‘அபுஞ்ஞஜா பாகா’’தி அகுஸலவிபாகானம் ஸப்³பே³ஸமேவ க³ஹிதத்தா கா⁴னாதி³விஞ்ஞாணத்தயம் அக்³க³ஹிதவிஸேஸம்பி பாரிஸேஸஞாயேன குஸலவிபாகமேவ விஞ்ஞாயதி.

213. தோ³மனஸ்ஸந்தி தோ³மனஸ்ஸஸஹக³தம். க்ரியா ச த்³வேதி வோட்ட²ப்³ப³னவஜ்ஜிதா த்³வே அஹேதுககிரியா.

214. பூ⁴மிவஸேனேவாதி புக்³க³லே அனாமஸித்வா கேவலம் பூ⁴மிவஸேன. புக்³க³லானம் வஸேன ச பூ⁴மிவஸேன ச சித்துப்பத்திம் விபா⁴வயேதி ஸம்ப³ந்தோ⁴.

216-8. பஞ்சபூ⁴மிஸூதி சதுராபாயமனுஸ்ஸவஸேன பஞ்சபூ⁴மீஸு. அஹேதுகானம் படிஸந்தி⁴ஸதி³ஸததா³ரம்மணவஸேன ‘‘ஸத்ததிம்ஸேவா’’தி வுத்தம், அஞ்ஞகம்மேன பன த்³விஹேதுகததா³ரம்மணஸ்ஸாபி ஸம்ப⁴வதோ ஏகசத்தாலீஸ ஹோந்தி. ஆசரியஜோதிபாலத்தே²ரஸ்ஸ அதி⁴ப்பாயேன திஹேதுகவிபாகேஹிபி ஸத்³தி⁴ம் பஞ்சசத்தாலீஸேவாதி த³ட்ட²ப்³ப³ம். அஹேதுகஸ்ஸ வுத்தேஹீதி அஹேதுகஸத்தஸ்ஸ வுத்தேஹி ஸத்ததிம்ஸமானஸேஹி ஸஹ. நவ க்ரியாதி அட்ட² மஹாகிரியா, ஹஸிதுப்பாதோ³ சாதி இமானி அஸாதா⁴ரணகிரியசித்தானி நவ.

220-1. ‘‘சதுபஞ்ஞாஸ மானஸா’’தி வத்வா தேஸம் ஸரூபதோ த³ஸ்ஸனத்த²ம் ஆஹ ‘‘த்³விஹேதுகஸ்ஸா’’திஆதி³. புன ‘‘சதுபஞ்ஞாஸா’’திஆதி³ பன நிக³மனம்.

223-4. பஞ்ஞாஸேவஸ்ஸ சித்தானீதி திஹேதுகஸ்ஸ புது²ஜ்ஜனஸ்ஸ வுத்தசதுபஞ்ஞாஸசித்தேஸு தி³ட்டி²விசிகிச்சா²ஸஹக³தவஜ்ஜானி ஏகூனபஞ்ஞாஸ, ஸோதாபத்திப²லந்தி இமானி பஞ்ஞாஸேவ சித்தானி அஸ்ஸ காமாவசரஸ்ஸ ஸோதாபன்னதே³ஹினோ ஜாயந்தே. நவதிம்ஸேவாதி ஏகூனசத்தாலீஸசித்தானி. பட²மம் ப²லந்தி ஸோதாபத்திப²லம்.

225-8. து³தியஞ்ச ப²லம் ஹித்வாதி ஸகதா³கா³மிப²லம் ஹித்வா. ச-ஸத்³தே³ன ஸோதாபத்திப²லஞ்ச ஹித்வாதி அத்தோ². அத்தனோ ப²லேன ஸஹ யானி அட்ட²சத்தாலீஸ சித்தானி, தானி அனாகா³மிஸ்ஸ ஸத்தஸ்ஸ ஜாயந்தி. சத்தாலீஸஞ்ச சத்தாரீதி தேவீஸதி காமாவசரவிபாகசித்தானி, வீஸதி கிரியசித்தானி, அரஹத்தப²லஞ்சாதி சதுசத்தாலீஸ சித்தானி. ஸகம் ஸகந்தி ‘‘ஸோதாபன்னஸ்ஸ ஸோதாபத்திமக்³க³சித்தம், ஸகதா³கா³மினோ ஸகதா³கா³மிமக்³க³சித்த’’ந்திஆதி³னா அத்தனோ அத்தனோ மக்³க³சித்தம். கஸ்மா பன தேஸம் ஏகேகமேவ சித்தம் ஹோதீதி ஆஹ ‘‘ஏகசித்தக்க²ணாஹி தே’’தி. பஞ்சதிம்ஸேவாதி ஸத்தரஸ காமரூபாரூபகுஸலசித்தானி, படிக⁴த்³வயவஜ்ஜானி த³ஸ அகுஸலானி, ரூபப⁴வே லப்³ப⁴மானகானி பஞ்ச அஹேதுகவிபாகானி, ஆவஜ்ஜனத்³வயம், பட²மஜ்ஜா²னவிபாகோ சாதி பஞ்சதிம்ஸ சித்தானி தீஸு பட²மஜ்ஜா²னபூ⁴மீஸு புது²ஜ்ஜனஸ்ஸ ஜாயந்தி.

232-5. ஹித்வா சாதி ஏத்த² ச-ஸத்³தே³ன பட²மப²லஸ்ஸ க³ஹணம் த³ஸ்ஸேதி. தேன அபுஞ்ஞபஞ்சகம் ஹித்வா பட²மம் ப²லம் க³ஹேத்வா சாதி அத்தோ². அபுஞ்ஞபஞ்சகந்தி தி³ட்டி²ஸம்பயுத்தவிசிகிச்சா²ஸஹக³தவஸேன பஞ்ச அகுஸலசித்தானி. தத்தா²தி தேஸு ஸோதாபன்னஸ்ஸ வுத்தேஸு. தத்தே²வாதி ஸகதா³கா³மிஸ்ஸ வுத்தேஸு. புஞ்ஞஜம் ஸம்படிச்ச²னம் ஸந்தீரணத்³வயஞ்சேவாதி ஸம்ப³ந்தோ⁴.

237. ஏவம் பட²மஜ்ஜா²னபூ⁴மியம் புது²ஜ்ஜனஸோதாபன்னாதி³வஸேன சித்தஸம்ப⁴வம் த³ஸ்ஸேத்வா இதா³னி தேஸமேவ வஸேன து³தியஜ்ஜா²னபூ⁴மியம் த³ஸ்ஸேதும் ‘‘புது²ஜ்ஜனஸ்ஸா’’திஆதி³ ஆரத்³த⁴ம். து³தியஜ்ஜா²னததியஜ்ஜா²னவிபாகானம் ஏகஸத்தஸ்ஸேவ அஸம்ப⁴வேபி து³தியஜ்ஜா²னதலே நிப்³ப³த்தே புது²ஜ்ஜனாத³யோ புது²ஜ்ஜனாதி³பா⁴வஸாமஞ்ஞேன ஏகதோ க³ஹேத்வா ‘‘து³தியஜ்ஜா²னததியஜ்ஜா²னபாகதோ’’தி வுத்தம்.

242. பரித்தஸுபா⁴தி³தோ பட்டா²ய யாவ அகனிட்டா² ததியசதுத்த²ஜ்ஜா²னபூ⁴மீஸு பட²மஜ்ஜா²னபூ⁴மியம் வுத்தக³ணனாய சித்தப்பவத்தி வேதி³தப்³பா³. தேனாஹ ‘‘பரித்தகஸுபா⁴தீ³ன’’ந்திஆதி³.

247. சதுவீஸதி சித்தானீதி அட்ட²பரித்தகுஸலானி, சத்தாரி அரூபகுஸலானி, படிக⁴த்³வயவஜ்ஜிதானி த³ஸ அகுஸலசித்தானி, பட²மாருப்பவிபாகோ, மனோத்³வாராவஜ்ஜனஞ்சாதி சதுவீஸதி சித்தானி பட²மாருப்பபூ⁴மியம் புது²ஜ்ஜனஸ்ஸ ஜாயந்தி.

250-3. த³ஸ பஞ்சாதி அட்ட² மஹாகிரியா, சதஸ்ஸோ அரூபகிரியா, மனோத்³வாராவஜ்ஜனம், பட²மாருப்பவிபாகோ, அரஹத்தப²லஞ்சாதி பன்னரஸ சித்தானி பட²மாருப்பபூ⁴மியம் அரஹதோ ஹோந்தி.

தேவீஸாதி பட²மாருப்பபூ⁴மியம் புது²ஜ்ஜனஸ்ஸ வுத்தேஸு சதுவீஸதிசித்தேஸு ஆகாஸானஞ்சாயதனகுஸலவிபாகவஜ்ஜா பா³வீஸதி ச து³தியாருப்பவிபாகோ சாதி தேவீஸதி து³தியாருப்பபூ⁴மியம் புது²ஜ்ஜனஸ்ஸ ஹோந்தி. தத்தே²வ திண்ணம் ப²லட்ட²ஸேகா²னம் புது²ஜ்ஜனஸ்ஸ வுத்தேஸு அகுஸலபஞ்சகவஜ்ஜானி அட்டா²ரஸ, தம்தம்ப²லஞ்சாதி ஏகூனவீஸதி சித்தானி ஹோந்தி.

க்ரியா த்³வாத³ஸாதி அட்ட² மஹாகிரியா, ஆகாஸானஞ்சாயதனவஜ்ஜிதா திஸ்ஸோ அரூபகிரியா, மனோத்³வாராவஜ்ஜனந்தி த்³வாத³ஸ கிரியசித்தானி. பாகேகோதி ஏகோ அரூபவிபாகோ.

து³தியாருப்பபூ⁴மியம் புது²ஜ்ஜனஸ்ஸ வுத்தேஸு விஞ்ஞாணஞ்சாயதனகுஸலவிபாகவஜ்ஜானி ஏகவீஸதி, ஆகிஞ்சஞ்ஞாயதனவிபாகோ சாதி பா³வீஸதி சித்தானி ததியாருப்பபூ⁴மியம் புது²ஜ்ஜனஸ்ஸ உப்பஜ்ஜந்தி.

254-60. புது²ஜ்ஜனஸ்ஸ வுத்தேஸு அபுஞ்ஞபஞ்சகவஜ்ஜானி ஸத்தரஸ, பட²மப²லஞ்சாதி அட்டா²ரஸ ததியாருப்பபூ⁴மியம் ஸோதாபன்னஸ்ஸ உப்பஜ்ஜந்தி. தானீதி தானேவ அட்டா²ரஸ சித்தானி. ‘‘ட²பேத்வா பட²மம் ப²ல’’ந்தி ஹி வசனதோ து³தியப²லம் பக்கி²பித்வாதி அயமத்தோ² அவுத்தஸித்³தோ⁴. ந ஹி ஸகதா³கா³மினோ ஸகதா³கா³மிப²லஞ்ச நுப்பஜ்ஜதி. ஏவஞ்ச கத்வா வுத்தம் ‘‘ட²பேத்வா து³தியம் ப²ல’’ந்தி. ஏத்தா²பி அனாகா³மிப²லம் பகரணஸித்³த⁴மேவாதி த³ட்ட²ப்³ப³ம். அட்ட² மஹாகிரியா, த்³வே ததியசதுத்தா²ருப்பகிரியா, மனோத்³வாராவஜ்ஜனம், ஆகிஞ்சஞ்ஞாயதனவிபாகோ, அரஹத்தப²லந்தி தேரஸ சித்தானி ததியாருப்பபூ⁴மியம் கீ²ணாஸவஸ்ஸ ஜாயந்தி. ததியாருப்பபூ⁴மியம் புது²ஜ்ஜனஸ்ஸ வுத்தேஸு த்³வாவீஸதிசித்தேஸு ஆகிஞ்சஞ்ஞாயதனகுஸலவிபாகவஜ்ஜாதி வீஸதி, நேவஸஞ்ஞானாஸஞ்ஞாயதனவிபாகோதி ஏகவீஸதி சித்தானி சதுத்தா²ருப்பபூ⁴மியம் புது²ஜ்ஜனஸ்ஸ ஜாயந்தி. புது²ஜ்ஜனஸ்ஸ வுத்தேஸு அபுஞ்ஞபஞ்சகவஜ்ஜானி ஸோளஸ, ஸோதாபத்திப²லஞ்சாதி ஸத்தரஸ தத்தே²வ ஸோதாபன்னஸ்ஸ ஹோந்தி. அட்ட² மஹாகிரியா, த்³வே ச நேவஸஞ்ஞானாஸஞ்ஞாயதனவிபாககிரியா, மனோத்³வாராவஜ்ஜனம், அரஹத்தப²லஞ்சாதி த்³வாத³ஸ சித்தானி தத்தே²வ அரஹதோ உப்பஜ்ஜந்தி.

261-3. அரூபகுஸலா சேவ கிரியாபி ச உப்பஜ்ஜந்தி, ந பன விபாகாதி அதி⁴ப்பாயோ. உத்³த⁴முத்³த⁴மரூபீனந்தி விஞ்ஞாணஞ்சாயதனாதீ³ஸு அரூபீனம். ஹேட்டி²மாதி விஞ்ஞாணஞ்சாயதனிகானம் ஆகாஸானஞ்சாயதனகுஸலவிபாகா நுப்பஜ்ஜந்தி, ஆகிஞ்சஞ்ஞாயதனிகானம் ஆகாஸானஞ்சாயதனவிஞ்ஞாணஞ்சாயதனகுஸலவிபாகாதி ஏவமாதி³னா ஹேட்டி²மா ஹேட்டி²மா அரூபா நுப்பஜ்ஜந்தி. கஸ்மாதி ஆஹ ‘‘தி³ட்டா²தீ³னவதோ கிரா’’தி. கிராதி அனுஸ்ஸுதியம். தி³ட்டா²தீ³னவதோதி ஆரம்மணே, ஜா²னே ச தி³ட்ட²தோ³ஸத்தா. குஸலானுத்தராதி லோகுத்தரகுஸலா.

266. ஸப்³போ³ ரூபோ மஹக்³க³தோதி ஸப்³போ³ ரூபாவசரமஹக்³க³தசித்துப்பாதோ³. மனோதா⁴தூதி கிரியாமனோதா⁴துவிபாகமனோதா⁴தூனம் காமவிபாக-க்³க³ஹணேன க³ஹிதத்தா.

269-73. ஏவம்…பே… ஹேட்டி²மந்தி து³தியாருப்பபூ⁴மியம் வுத்தேஸு து³தியாருப்பத்தயம் ட²பேத்வா அத்தனோ பாகேன ஸஹ ததியாருப்பபூ⁴மியம் ஏகூனசத்தாலீஸ சித்தானி தத்த²வுத்தேஸு ததியாருப்பத்தயம் ட²பேத்வா அத்தனோ பாகேன ஸஹ ஸத்ததிம்ஸாதி ஏவம் ஸேஸத்³வயேபி ஹேட்டி²மஹேட்டி²மம் ஹித்வா சித்தக³ணனா ஞேய்யா. அத்தனோ அத்தனோதி பட²மாருப்பபூ⁴மியம் பட²மாருப்பவிபாகோ, து³தியாருப்பபூ⁴மியம் து³தியாருப்பவிபாகோதி ஏவம் அத்தனோ அத்தனோ விபாகா சத்தாரோ ச அனாஸவா லோகுத்தரவிபாகாதி ஏவம் சதூஸு அரூபபூ⁴மீஸு ஏகேகாய பூ⁴மியா பஞ்ச பஞ்ச விபாகா ஜாயந்தி. யா கிரியா தேரஸேவ ஸியும், தா ஸப்³ப³பட²மாருப்பபூ⁴மியம் கீ²ணாஸவஸ்ஸ ஜாயந்தேதி ஸம்ப³ந்தோ⁴. து³தியாருப்பபூ⁴மியம் கீ²ணாஸவஸ்ஸ பட²மாருப்பகிரியசித்தம் வஜ்ஜேத்வா த்³வாத³ஸேவ க்ரியா ஹோந்தி. ததியாருப்பபூ⁴மியம் து³தியாருப்பகிரியசித்தம் வஜ்ஜேத்வா ஏகாத³ஸ. சதுத்தா²ருப்பபூ⁴மியம் ததியாருப்பகிரியசித்தம் வஜ்ஜேத்வா த³ஸேவ விஞ்ஞேய்யா.

274-5. இதா³னி கேவலம் புக்³க³லவஸேன தேஸமேவ புக்³க³லானம் ஆவேணிகசித்தம் த³ஸ்ஸேதும் ‘‘அரஹதோ பனா’’திஆதி³னா அரஹதோயேவ உப்பஜ்ஜனகசித்தம் த³ஸ்ஸேத்வா அனாகா³மிஆதீ³னம் பாடிபுக்³க³லிகம் ஸகஸகப²லசித்தம் பாகடமேவாதி ஸம்கி²த்தம். அரஹதோதி கீ²ணாஸவஸ்ஸ. அரஹதோ பா⁴வோ அரஹத்தம், அரஹத்தப²லந்தி அத்தோ². தஞ்ஹி ‘‘அரீனம் ஹதத்தா அரஹா’’திஆதி³னா அரஹந்த-ஸத்³த³ஸ்ஸ பவத்தினிமித்தபா⁴வேன ‘‘அரஹத்த’’ந்தி வுச்சதி. இதா³னி தேஸம் தேஸம் புக்³க³லானம் ஸாதா⁴ரணசித்தானி த³ஸ்ஸேதும் ‘‘சதுன்னஞ்ச ப²லட்டா²ன’’ந்திஆதி³ வுத்தம்.

290. ஸுஸாரந்தி அத்த²ப்³யஞ்ஜனவஸேன பரிச்சஜிதப்³ப³ஸ்ஸ பே²க்³கு³ஸ்ஸ அபா⁴வதோ ஸுட்டு² ஸாரம், ஸப்³ப³ஸோ ஸாரந்தி அத்தோ². பரந்தி ஸுஸாரத்தா ஏவ பரம். ஸத்தானம் இத⁴லோகபரலோகஹிதபடிச்சா²த³கஸ்ஸ அவிஜ்ஜந்த⁴காரஸ்ஸ வித⁴மனதோ மோஹந்த⁴காரப்பதீ³பம். சிந்தேதீதி அத்த²வஸேன சிந்தேதி. வாசேதீதி ப்³யஞ்ஜனவஸேன ஸஜ்ஜா²யதி. ராக³தோ³ஸானம் மோஹேன ஸஹ அவினாபா⁴வதோ தஸ்ஸ அனுபக³மனம் அத்த²ஸித்³த⁴மேவாதி ‘‘மோஹந்த⁴காரப்பதீ³ப’’ந்தி வத்வாபி ‘‘நரம்…பே… நோபயந்தீ’’தி ராக³தோ³ஸானுபக³மனமேவ வுத்தம். ‘‘மோஹந்த⁴காரப்பதீ³ப’’ந்தி வா வசனேனேவ மோஹஸ்ஸ அனுபக³மோ வுத்தோ ஹோதீதி ராக³தோ³ஸானமேவ அனுபக³மனம் வுத்தம். மூலபூ⁴தானம் பன திண்ணம் அனுபக³மனவசனேன ஸேஸகிலேஸானம்பி அனுபக³மனம் வுத்தமேவாதி த³ட்ட²ப்³ப³ம்.

இதி அபி⁴த⁴ம்மத்த²விகாஸினியா நாம

அபி⁴த⁴ம்மாவதாரஸம்வண்ணனாய

பூ⁴மிபுக்³க³லசித்துப்பத்தினித்³தே³ஸவண்ணனா நிட்டி²தா.

பட²மோ பா⁴கோ³ நிட்டி²தோ.

நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ

அபி⁴த⁴ம்மாவதார-அபி⁴னவடீகா

(து³தியோ பா⁴கோ³)